جدار فصل عنصري ما بين مصر وغزة

وانا جاية سمعت في اذاعة البي بي سي ان القوات الامريكية بتساعد الجيش المصري على بناء جدار ما بينها وبين غزة زي بتاع ذو القرنين كده، مغمق في قاع الارض ومرتفع الى عنان السماء والبي بي سي بتقول ان العملية دي سرية... بالظبط زي محطة المطار السري

ولسة.. ولسة

احنا مش عايزين نرحم حد ابدا ليه؟ لا بجد يعني، انا عايزة افهم وجهة النظر في القسوة وغلظة الحس والتناحة والبلادة اللي احنا فيها دي، ايه؟ لا بنرحم جوة ولا برة واذانا طايل شرق وغرب، ايه؟ ايه؟ الارض اليباب دي مش ناوية تجيبها البر ليه؟ ده احنا ربنا ح يسخطنا اربع جنيهات مخرومة ونبقى ماشيين في الشارع نشخشخ كده

خلاص، ماعدش فيها كسوف ياما اعملي معروف، الجدار من الفولاذ

يا حلاوة يا ولاااااد، والله وعشت وشفتك يامصر لما كبرتي واحلوتي وبقيتي نازية، بس النازيين كانوا فالحين في حاجة على الاقل

احسن يا حلوة.. احسن، خليك كده اشتري عداوة الخلق كلهم واللي خلقهم بالمرة واوعي تخلي عندك ذرة اخلاق ولا دين ولا انسانية، اوعي، احسن ده وحش على صدرك

برتولد بريخت في ايام النازي كتب:

"حقا أنني أعيش في زمن أسود.. الكلمة الطيبة لا تجد من يسمعها.. الجبهة الصافية تفضح الخيانة.. والذي ما زال يضحك.. لم يسمع بعد بالنبأ الرهيب.. أي زمن هذا؟"

وبما اننا في ايام نازي خايب وموكوس وحتى بيمارس نازيته على ناسه، وناسه بيمارسوا نازيتهم على بعض فواضح ان بريخت نفسه ما سمعش بالنبأ الرهيب: فيه نازيين اوحش واخيب وافشل واهطل واكثر قسوة من هتلر

انا دورت على الخبر في البي بي سي ولقيت لنك اهو

عموما هو مافيش امل، واحنا نتسخط، وانا عندي اكتئاب، لا موزار نافع ولا تشايكوفسكي نافع (انا مش مثقفة والعياذ بالله، انا كنت قريت انهم بيعالجوا الاكتئاب، خلوني قاعدة اعيط) ولا طبق الفول نافع ولا الافلام الكوميدي نافعة ومش عارفة اعمل ايه عشان اخرج من الاكتئاب ده لان امي مالهاش ذنب

افكر كده اعمل تلبينة يمكن تنفع... وللا ما تنفعش، ربنا يفرج عني بقى