Thursday 10 December 2009

جدار فصل عنصري ما بين مصر وغزة

وانا جاية سمعت في اذاعة البي بي سي ان القوات الامريكية بتساعد الجيش المصري على بناء جدار ما بينها وبين غزة زي بتاع ذو القرنين كده، مغمق في قاع الارض ومرتفع الى عنان السماء والبي بي سي بتقول ان العملية دي سرية... بالظبط زي محطة المطار السري
ولسة.. ولسة
احنا مش عايزين نرحم حد ابدا ليه؟ لا بجد يعني، انا عايزة افهم وجهة النظر في القسوة وغلظة الحس والتناحة والبلادة اللي احنا فيها دي، ايه؟ لا بنرحم جوة ولا برة واذانا طايل شرق وغرب، ايه؟ ايه؟ الارض اليباب دي مش ناوية تجيبها البر ليه؟ ده احنا ربنا ح يسخطنا اربع جنيهات مخرومة ونبقى ماشيين في الشارع نشخشخ كده
خلاص، ماعدش فيها كسوف ياما اعملي معروف، الجدار من الفولاذ
يا حلاوة يا ولاااااد، والله وعشت وشفتك يامصر لما كبرتي واحلوتي وبقيتي نازية، بس النازيين كانوا فالحين في حاجة على الاقل
احسن يا حلوة.. احسن، خليك كده اشتري عداوة الخلق كلهم واللي خلقهم بالمرة واوعي تخلي عندك ذرة اخلاق ولا دين ولا انسانية، اوعي، احسن ده وحش على صدرك
برتولد بريخت في ايام النازي كتب:
"حقا أنني أعيش في زمن أسود.. الكلمة الطيبة لا تجد من يسمعها.. الجبهة الصافية تفضح الخيانة.. والذي ما زال يضحك.. لم يسمع بعد بالنبأ الرهيب.. أي زمن هذا؟"
وبما اننا في ايام نازي خايب وموكوس وحتى بيمارس نازيته على ناسه، وناسه بيمارسوا نازيتهم على بعض فواضح ان بريخت نفسه ما سمعش بالنبأ الرهيب: فيه نازيين اوحش واخيب وافشل واهطل واكثر قسوة من هتلر



انا دورت على الخبر في البي بي سي ولقيت لنك اهو
عموما هو مافيش امل، واحنا نتسخط، وانا عندي اكتئاب، لا موزار نافع ولا تشايكوفسكي نافع (انا مش مثقفة والعياذ بالله، انا كنت قريت انهم بيعالجوا الاكتئاب، خلوني قاعدة اعيط) ولا طبق الفول نافع ولا الافلام الكوميدي نافعة ومش عارفة اعمل ايه عشان اخرج من الاكتئاب ده لان امي مالهاش ذنب
افكر كده اعمل تلبينة يمكن تنفع... وللا ما تنفعش، ربنا يفرج عني بقى



29 comments:

ola said...

موزار مين و تشايكوفسكي مين
أنا بوظت الدايت ورحت ضربت كشري

ارحمنا يا رب
يا ترحمنا يا تاخدنا
والله تعبت

حسن على said...

النظام البوليسى القمعى فى مصر يعمل فى خدمة السلطة التى يبدو انهااعتطة تعليمات بمراقبة المواطنين الشرفاء والبطش بهم وغض النظر عن لصوص "الياقات البيضاء"الذين نهبو البلاين وهربوا بها للخارج,ويتصل بهذا اشهار سلاح التهديد بالاعتقال او الضرب او التصفية -حسب الحالة -ومجاملة قطاع السياحة بما يصاحبة من اعمال الدعارة الظاهرة لة تماما وتحت رقابتة وسمعة وبصرة ,ونجدهم فى النهاية يتركونهم يرتعون ويهددوا المعترضين -حماية لما يسمونة هم انفسهم وفيما بينهم "صلة الرحم" وتحول المعنى النبيل لديهم الى "سبوبة "لمصادقة "العاملات بهذة المهنة ,او ربما حمايتهم ايضا,انقلاب فى الاوضاع نجد مثلة فى فيلم "ايرما لا دوس" الظاهرة تتفاقم والشرطة مازالت تراقب الشرفاء بأجزة التنصت والرؤية الليلية واللصوص والقوادين مازالوا يمرحون ويهربون بل ويعيشون أمنين اكثر جدا من شرفاء المواطنين!!!!!!!!!!!!!!!!!!!!!!!"عجبتلك بازمن,

حسن على said...

سقطت فقرة من تعليقى السابق "جدار الفصل العنصرى فى غزة هو جزىء من نفس السياسة الملتوية التى تحابى اسرائيل لاثتقاء شرها فى سنة التوريث حتى يتم الامر بدون مفاجأت

mido said...

من مدونة العنانى :


غضب امنى من تسرب قضية الجدار الفولاذى

و الامن بعت نفى هنا

مصادر أمنية تنفى بناء مصر جداراً فولاذياً على الحدود في سيناء

mido said...

محمد عادل بيقول

ان الانفاق عمقها 20 متر

يعنى مش حتأثر على الانفاق

simplymoi said...

"The mind is its own place, and in itself
can make a heaven of hell, a hell of heaven."
— John Milton (Paradise Lost)

"Farewell Hope, and with Hope farewell Fear"
— John Milton

أبو أمك said...

والله وباضت لك في القفص يا بن عز

يساري فلسطيني said...

تحية للجميع

طالما هناك اصولت مثلكم لن تعدم مصر
الشرفاء... الناس هناك تعبت .. فعلا تعبت و الجروح في الذاكرة لا تندمل بسهولة ... انا ضد حماس على طول الخط و لكن ما هو ذنب الناس

ارحموا من في الارض

و ربما سيرحمكم من بالسماء

الناس هناك فعلا تعبت ... هذا هو اكبر سجن في العالم كله بشهادة الجميع

ليس لدي ما اضيفه سوى ان مصر التي نعرفها هي مصر التي لحكومتها علاقات ديبلوماسية مع اسرائيل من ثلاثون عام و شعبها هو اكثر شعب قومي و يرفض التطبيع ... فموتوا بغيظكم

تحياتي لك و للمتابعين

هتشوفوا said...

لأ يا شيخة ماتقوليش على نفسك كده ده أنتي مثقفة وزي الفل بأمارة ما حاطلنا لنك الخبر بالانجليزي

كلنا والله عندنا اكتئاب وعادي وعايشين وده لأننا مش تافهين ودايما بنبص للأمور بعمق

يساري فلسطيني said...

تحية

في السياسة هناك دائما رؤية استراتيجية و عليه كان يجب على الحكومة المصرية ان ترفض القيام بدور الشرطي امام شعب يتحمل الجوع و المرض ... كان عليهم ان يرفضوا حتى لو هددت اسرائيل باحتلال غزة مرة اخرى ... اي شيء ارحم منسقوط شهداء فلسطينيون و مصرييون نتيجة هذا الخطاء السياسي .

اسرائيل لعبتها صح و الغضب من الناس المحاصرة يوجه الى بلد شقيق و الناس الغلبانة في غزة لن تجد اي تبرير مقنع لموت اطفالها جوعا و مرضا

الحل هو بقلب الطاولة

اي شيء الا هذا الوضع



تحياتي


المشكلة من

Kalimalhus said...

بيعجبنى فيكى براءة الأطفال دى اللى بتخليكى لسة قادرة على الإندهاش لأمور طبيعية جدا .. هوه إنتى كنت مصدقة ما يروج بشكل غير رسمى من إن الحكومة بتاعتنا بتغض الطرف عن بعض أنفاق الحدود بمزاجها لأنها عارفة إنها شريان الحياة للقطاع؟ .. طيب لو مش مصدقة ده يبقى تستغربى ليه؟ .. يعنى بذمتك لو عوكل عرف إن اللى واقف بينه و بين تأكيد توريث عرشه لنوفل هو المليون و نص اللى فى غزة مش هيبعت سلاح الطيران يضربهم بالنابالم بكرة الصبح؟؟ ..

Sahran said...

عزيزتي نوارة

لا تتضايقي ولا تنرفزي كلو حكي بس

عندنا في غزة بيقولوا إنو الأنفاق كلها شراكة بين قيادات حماس وجمال مبارك ,, وهذا هو السر في عدم قيام مصر بخطوات جدية لمنع الأنفاق إلى غزة , وطبعا كلنا بيعرف إنو الأمن المصري لما يحب يعمل شغلة بيعملها , وما في أسهل من منع الأنفاق , ولكن إذا عرف السبب بطل العجب


تحياااااااااااااتي لك


ودمت سالمة

العلم نور said...

كلهم بيحاولوا يقلدوا إسرائيل قدوتهم .. ونحن عندنا في السعودية عايزين يعملوا جدار فاصل بين الحدود اليمنية والسعودية ..

يفتكروا كده أنهم راح يحموا نفسهم ممن يعتبروهم أعداء وهم إخوة في الدم والدين واللغة والتاريخ لكن نسيوا أن هناك قوة لا تقهر وهي قوة الله عز وجل الواحد القهار

lastcrazyboys said...

نفســـي ..وامنية حياتي

أغيب وأرجع ..الاقي خبر عادي كده من اللي مالهمش طعم ولا ريحة
مش خبر مفرح - لاسمح الله - لا حاجة كده من عينة ..استقبل السيد..الخ

ماهما في قطاع الاخبــار -بتاع دكتور سيد علي- بيسخنوا بالاخبار الماسخة الاول ..قبل التقايل
انما انتي بالصلاة عالنبي فكرتيني بحكاية واحد صاحبي أخوه وقعت عليه مية مغلية "بعيد عن السامعين " جريوا بيه عالمستشفى ..وقعوا يفطموا العيال الصغيرة ..لما ابوه يجي من الشغل محدش يجيب سيرة
مرة ..واتنين ..هاااا فهمتوا ..؟
:وبلهجة مدرسية فصيـــحة
فااااهمييييييين

يادوب الراجل يا ولداه بيحط المفتاح ..وهي التكة ..خطى العتبة
والقرد الصغير خالص

"محمـــد اتحرق"

حتى ابن اللذينة بدون مقدمات

انتي بتفكريني بالقصة دي كل ما اخطي المدونة

==

بقولـــك
موزار ايه وتشيكوفسكي ايه بس خدي الضحك كله اهو
http://www.youtube.com/watch?v=lA3QIrkp-3c

ااادي القادة ..مش خطيبك

سامي said...

النهاردة الجمعة وساعة اجابة

Rateb said...

نظرية المؤامرة

لو افترضنا ان البرادعى مستعد يقدم تنازلات لامريكا عشان يوصل للحكم او حتى امريكا او اسرائيل بلغت الريس بكده سواء حصل او محصلش مش تبقى عيب فى حق الريس ان اللى البرادعى بيوعد بيه بكره هو مايعملوش انهارده وامبارح كمان مش عارف ليه راكبه فى دماغى كده

into said...

اوفففففف بقأه
يا رب ايه اللي احنا فيه ده
خلاص كده اصبحنا ذراع تنفيذي للنظام الصهيوني
ومش بس ذراع، لأ ذراع لتنفيذ العمليات القذرة
فاضل ايه؟ سلاح الجو المصري ينفذ الرصاص المصبوب 2 على غزة؟
يا رب اللي يجوع فلسطيني جوعه و اللي يحاصر فلسطيني حاصره
يا رب ارحمنا منه و خده بقاه يا رب

Unknown said...

على فكرة يا شباب

كلام راتب مهم قوي

ممكن.. احتمال.. جايز... يكون كلام البرادعي وسيلة تهديد لعوكل وهو اصلا مش ناقص تهديد هو بيتلكك على الاذية، بيحب الاذية زي عينيه

الحاجة التانية
سهران بيقول الانفاق جمال مبارك طالع منها بسبوبة؟

مش عارفة يا سهران، بس دي واسعة شوية لسبب

ان جمال رجل اعمال كبير هو وعلاء، والانفاق دي يعني ح تكسبهم كام

هم يعملوها والله، ياخدوا فلوس من هنا وهنا

بس متهيألي الانفاق مكسبها مش كبير للدرجة دي

دي ناس لما تسألهم بتكسبوا كام يقولوا لك دلوقت وللا من تلات ثواني ساعة ما سألتني؟

مي ثابت said...

كلامك محتمل جدا يا راتب

و يكون الجدار العازل جزء من رشاوى الإنتخابات الرئاسية القادمة

خاصةً إن الورقة الفلسطينية هى أكتر ورقة تاجر بها حكام الإعتلال و منذ عقود


لكن السؤال الآن

فى حالة صحة هذا السيناريو

هل البردعى على علم و تنسيق مع الإدارة الأمريكية لإبتزاز النظام
؟؟

أم أنه يعمل لحساب نفسه فقط
؟؟
مع تيقنى فى الحالتين من الرضا الأمريكى عنه

لذلك أجد أن أهم شرط لمرشح الرئاسة القادم

فى حالة ما إذا حصل المستحيل و صار لنا رأياً حقيقياً


هو ألا يكون أمريكى الهوى

و لا هو مطبع و لا ينوى التطبيع

و يتعهد بالنظر فى إتفاقية كامب العار


أضغاث أحلام
؟
يجوز

لكن لماذا لا نحلم عسى الرؤيا تصير فى يوم حقيقة

مي ثابت said...

هتشوفوا

لينكات الخبر بالعربى أهه

على

BBC
العربية


http://www.bbc.co.uk/arabic/middleeast/2009/12/091209_sj_gaza_wall_tc2.shtml


و على الشروق المصرية


http://www.shorouknews.com/ContentData.aspx?id=160800#Note

حسن على said...

العلاج الناجع (مؤقتا) للاكتأب هو تناول الشيكولاتة من غر ما تحسى بالذنب على زيادة الوزن,علميا الشيكولاتة مبهجة

Sahran said...

نوارة

إنتي مش مقدرة كام بتجيب الأنفاق من الدخل

لما مليون ونصف المليون شخص أغلب حاجتهم تأتي عن طريق الأنفاق , فما تستبعدي حصول ذلك , وهي مش واسعة ولا حاجة , ولعلمك غزة مش ناقصها فلوس , غزة ناقصها بضائع , واللي كان زمان بقرش صار اليوم بعشرة , وعشان أوضح لك الصورة أكتر , فاسألي واحد من غزة غيري عن الأرباح المهولة التي يجنيها أصحاب الأنفاق في غزة , واسألي كم واحد ارتقى لمرتبة مليونير في فترة الحصار

إحنا بنسمع والعهدة على الراوي أن دخل هذه الأنفاق تجاوز المليار ونصف المليار دولار , وهذا للي في غزة , وطبعا على الجانب الآخر هناك المهرب المصري الذي له عمولة أكبر


تحيااااااااااااااتي لك


ودمت سالمة

شمس العصارى said...

ايه يا نوراة انتى جديدة على الخط السياسى ولا ايه
مستغربة ... يا سلام .... طيب و دى فيها ايه
البيه بيبنى سور حولين العزبة بتاعته .... غريبة دى
و بعدين الكلام ده قديم و قالوه من اكتر من سنتين لما الفلسطينيين فضلوا فى المعبر لايام على الجانبيين و الحكومة قالت انهم اقتحموا المعبر يعنى قبل حركة ابو تريكة كما و بعدين المفروض اننا نتوقع من البيه اكتر و اكتر
__________________
عاوز اعلق على الاخوة الى قالوا ان ترشيح البرادعى مسلسل و ضغط على الريس
انا عن نفسى لا اظن ذلك لان ببساطة اسرائيل و امريكا لازم يوافقوا على الرئيس القام لمصر - و لو حد سال ليه اقله الموضوع يطول شرحه و عاوزله قعدة حلوة و كبايتين شاى و طفاية سجاير ... رغم انى مش مدخن بس لازمة للضيوف-
الموضع ان البرادعى طوع امريكا و الاعلام العالمى و المصرى كبروه قوى خلال السنين الى فاتوا - و جايزة نوبل كمان - فهو كبرة فى دماغه فصدق موضوع طرح اسمه للترشح و الناس هنا طيبيين قوى قوى
لكن اعتبار ده ضغط على الريس لالالالالالا الريس اساس مش محتاج ضغط علشان يمشيله كلامهم ده بيمشيه و زيادة من عنده حبتين كمان
و بالنسبة للبرادعى كيف ننسى دوره القزر فى الملف النووى العراقى المزعوم ولا انتوا نسيتوه

Rateb said...

هو احسن حاجة دلوقتى الناس اللى ورا البرادعى يطالبوه بموقف واضح من امريكا واسرائيل والمفروض كتاب الحكومة الخايبين يعملوا كده بردو عشان نعرف راسنا من رجلينا قبل ما تتنيل زياده عن كده
انا هبقى اكتب بوست عن الموضوع ده كله

هتشوفوا said...

والنبي الناس اللي بتقول أن البرادعي مستعد يقدم تنازلات ودي رشاوي انتخابية وورقة ضغط على مبارك وكلام فاضي, ايه الراجل مش ناوي يرشح نفسه خالص ولا أنتوا عندكو أمل انهم يعملوا الخمس حاجات اللي قال عليهم, وآخر حاجة قالها أنا مرشح مستقل, قولولي بقى هيرشح نفسه ازاي وهو مستقل, كل الحكاية أنه قال دي ولا بلد ولا نظام ولا نيله وبعدين مش كفاية بتوع الحكومة بيشتموه, والأخ اللي بيقول دوره القزر بتاع ملف العراق, ايوة نسينا, ياريت تفكرنا ولا هو كلام وخلاص, على فكرة ده نفس الكلام اللي بيشتموه بيه الوقتي بتوع النظام

Al said...

لو بعث الله نبيه، موسى عليه السلام، مرة أخرى إلى مصر فلن ينجح في انتخابات الرئاسة أمام مبارك، وسيقول له المصريون إن البقر تشابه علينا!

ولو بعث، سبحانه وتعالى، نبيه يوسف الصديق عليه السلام لينافس عزيز مصر وامرأته وابنهما، فسيعلن اللواء حبيب العادلي أن ابن يعقوب لم يتمكن من النجاح في أي دائرة، وأن اخوة يوسف صوتوا لصالح مبارك أو ابنه، وأن النسوة في القاهرة قطعن أيديهن لما رأين جمالاً!

شمس العصارى said...

الاخ : هتشوفوا
دور البرادعى القذر فى ملف العراق مش كلام و خلاص
لا دى افعال و افعال كتير قوى
بس انت الى مش متابع و ارجع و اسئل و ابحث فى النت و اسال كل الناس لو حبيت طول ما انت مش مصدق
البرادعى من اول ما بقا مدير الوكالة كان كل كلام الامريكان ليه بياخده اوامر و ينفذه فضل فى ملف لعراق النووى من 1996 الى 2002 و هو يقول نفتش المواقع النووية قام العراق سابه يفتش و ملقاش حاجة قام قال نفتش القصور الرئاسية العراق احتج و بعدين وافق و برضه ملقاش حاجة قال نفتش تحت نهرى دجلة و الفرات قام العراق قالهم خدوهم و لما تفتشوهم على راحتكم ابقى رجعوهم -ههههههه ماهو من الغلب- و برضه ملقوش حاجة و اخيرا استقر البيه البرادعى و كبار مفتشيه ان اكيد العراق مخبى حاجة - فين الله اعلم - لكن لازم امريكا تدخل تفتش بنفسها
و دى الزيعة الى ضربوا بيها العراق و استمر التفتيش حوالى 4 سنين و فى 2006 قالوا انه العراق لم يكن يمتلك اسلحة نووية و انه كان بيتكلم عليها بس - يعنى طلب ايديها بس هى موفقتش -
الكلام ده مش من عندى و ارجع و اسال و اتاكد قبل ما تقول كلام و خلاص
ــــــــــــــــــــــــ
الاهم من ده كله انا مش بهاجم البرادى علشان ادافع عن النظام المصرى
لالالالالالالالالالالالالالالالا
و الف لا
فداهية النظام و فوق البيعة البرادعى كمان - و مش مهم لطفى ندهولهم معاهم -انا بقول ان البرادعى مينفعش مينفعش مينفعش
و فى سؤال عاوز اساله لكل الناس هنا كاتب الموضوع - نوارة - و كل الى علق
تفتكروا بعد ما كل الاحزاب فى مصر عرضوا انهم يرشحوا البرادى و يدعموه قام هو قال انا لو اترشحت اترشح مستقل
السؤال بقا : يا ترى هو يقصد ايه من ورا مستقل و بيخاطب مين ؟؟؟؟؟
اعتقد اعتقد - بسهلكم الاجابة اهه- ارجعوا و شوفوا تصريحاته و مطالبه و كلامه عن الشروط و كلام عن الوضع الحال فى مصر و كلامه عن التيارات الموجودة
ـــــــــــــــــــــ
نلتقى بعد البرادعى

Rateb said...

يا جماعة فيه احترام واجب لاى حد بيعارض الحكومة ايا كان لكن من مصلحتنا كلنا اننا نبص لمصالحنا الدنيا مليانه الوان غير الابيض والاسود مش عاوزين نبدل فرعون بفرعون يارب البرادعى يكون كويس وربنا يكتب لمصر الخير على ايده بس لازم يقدم لنا احنا اوراق اعتماده ومايقدمش اى اوراق اعتماد لحد غيرنا
http://sekketrateb.blogspot.com/2009/12/blog-post_12.html

rifaa said...

Mozart is the best. Ala Turca is fantatstic but do you know why it is called ala turca? Has to do with Ottoman and getting close to Vienna. Check it out.