العملية في النملية والوقفة الاحتجاجية عدت على خير

تحديث:
الساعة 14:43 بتاريخ 30 ديسمبر 2009 
حسام الحملاوي نزل فيديوهات هنا 
ومحمد عبد الغني نزل الصور هنا 
 فيه خبر بقى بيتناقله الفلسطينيين على وكالاتهم ان العمال المصريين رفضوا استكمال العمل في الجدار وبيقولوا ان الوفد هي اللي قالت كده، انا عايزة لنك الخبر من الوفد عشان نتأكد من الخبر لان الخبر ده لو طلع مش صحيح يبقى الفلسطينيين يا عيني وصلوا لمرحلة خطرة جدا من الانكار النفسي وابتدوا يكتبوا احلامهم على انها اخبار، كده يبقى احنا ضربنا مخ الناس خالص، على رأي فيصل: وانا اللي كنت فاكره يائس؟ اتاريه كان لسة عنده امل فيا. 
امبارح قريت مقال بعته لي مهندس حر، واحد فلسطيني من غزة بيتكلم عن سواقين التاكسي الغزاوية اللي كل ما غزة تنضرب يطلعوا اشاعات ان مصر بعتت كتيبة جيش سرية عشان تنقذهم! 
بس عادي سواقين التاكسي بيقولوا كلام، زي ما سواقين التاكسي عندنا في مصر مقتنعين ان "التعلب بتاعنا هو اللي ح يقضي على اسرائيل بس هو بيجيب رجلهم" ماهو واحد بيلف طول النهار في الشوارع وبيقابل خلق كتير تقرف الكلب الحزين، لازم يحلم عشان يسلي نفسه
لكن لو وصل الامر انهم ينزلوا احلامهم اخبار يبقى كده حاجة تقطع القلب، جننا الناس خالص يعني؟ عموما هو الخبر نزل هنا وانا مش عارفة الوكالة دي الخبر نصه الاولاني صحيح ان فيه ملثمين فلسطينيين اطلقوا النار على معدات البناء بتاعة الجدار وكانوا حريصين انهم ما يصيبوش بني ادمين، بس النص التاني بيقول ان عمال المقاولين العرب امتنعوا عن استكمال البناء، حد عنده مصدر تاني للخبر؟ اصل فيه مهندس مصري بيقول كلام تاني

يارب يطلع الخبر صحيح بس عشان الغلابة دول يتجبر بخاطرهم، انا ما كنتش اعرف ان احنا حطمناهم قوي كده...والنبي يارب ما تصدمهم اكتر من كده، الجدع الفلسطيني اللي كاتب المقال بيقول احنا اخدنا على صدمات كتير وبنعرف نتصرف ونتعايش بس موضوع اننا نتصدم في مصر ده لسه مش عارفين نتعامل معاه!!!! كده وجع قلب بقى، هو احنا ناقصين تأنيب ضمير؟ احنا قربنا نتحول لجوريسيك بارك من كتر تأنيب الضمير، عشان لما احنا لما بنحس بتأنيب الضمير بنبقى متوحشين شوية، والاخ الفلسطيني اللي كان عايز يساعدنا نحفر انفاق عشان نعرف نمشي في بلدنا يقول لي مظاهراتكوا انتوا عشانا لها طعم تاني، وقبل كده مدونة مصرية سافرت الاردن وحكت انها قابلت سواق تاكسي فلسطيني وقال لها احنا مستنيين مصر وح ننضم للجيش المصري لما مصر تنوي تحرر فلسطين واحنا عارفين ان مصر هي اللي ح تحرر فلسطين احنا مستنيينها، طبعا ردت عليه بالبرود العاطفي اللي عند المصريين (على رأي مهندس حر) وقالت له واحنا مالنا، الواد واقف مستني القطر وهي بتقول له واحنا مالنا وش كده....تؤ، انا ما اقدرش على وجع القلب ده، ده مشهد مؤثر قوي، بيفكري بمنظر لواحدة كنت اعرفها عايزة تخرج وتتفسح وتسهر وتنبسط وكل شوية ابنها (كان عنده تمن سنين اياميها) يتصل بيها ويقول لها: تعالي اقعدي معايا يا ماما انا باحبك. وهي تقعد تقول لي: يييييي ابني بيتصل، ردي عليه وقولي له ماما في الحمام. وانا طبعا اقعد اعيط. طب حد من صحفيين الدستور يتأكد من الخبر ده؟ طب حد يوحي للعمال طب.. طب نأجر لهم ناس تعمل نفسها عمال وتمثل انها مضربة؟ ماهو مش معقولة كسرة الخاطر دي، طب بصوا، فيه لجنة في سيناء طلعت البيان ده

محمود ساندمانكي اتصل بيا دلوقت وقال لي انه متضايق لانه اكتشف ان موضوع الامريكان اللي انضربوا قدام السفارة ده طلع اشتغالة وطلع الامن المصري ما ضربهمش ولا حاجة
بصراحة وانا كمان اتضايقت، مش اتضايقت يعني كان نفسي ينضربوا، بس اللي مش عايش في القاهرة لازم ييجي يتفرج على الامن اللي واقف قدام الاجانب مش قادر يعمل لهم حاجة ونازل بهدلة في الناس اللي معدية، مش بيتظاهروا، ولا حتى دريانين بحاجة، دول ماشيين في الشارع، زي الراجل اللي مديره في الشغل يهزأه يقوم راجع البيت ضارب مراته: وكمان بتقولي مساء الخير؟
الناس تبقى ماشية في الشارع فجأتن حتة امين شرطة: امشي من هنا يا خـ... يا ابن المتـ... يا ابن الـ... ينعل ... امك. 
كده، من غير اي حاجة
طبعا كامل تعاطفي مع الامريكان لو كانوا اتضربوا، بس الواحد يحس بالمساواة يعني، دول حتى مش عايزين يحترمونا شوية والضيوف عندنا







تحديث:
الساعة 13:03 يتاريخ 30 ديسمبر 2009
ايمان بدوي اخدت صور وده فيديو



بس ازاي السفارة الامريكاني تقفل الباب وتخلي الامن المصري يضرب المواطنين بتوعها؟ لا بجد انا منبعجة وفاتحة بقي كدهو، ده ساركوزي اللي الواد جاي مستحلف له ما هانش عليه يعمل كده والفرنساويين بقالهم تلات ايام معتمصمين قدام السفارة الفرنسية، ازاي امريكا تعمل كده في مواطنيها؟ دي لو كانت حصلت معانا في اي داهية كان زمانا قلبنا الدنيا صويت وعياط وكرامة مصر وكرامة المصريين وكنا رحنا اشتكينا لامريكا من حكومتنا اللي بتنتهك حقوقنا، طب والامريكان ح يسكتوا؟

تحديث:
الساعة 00:36 بتاريخ 30/12/2009
غفاري جاب لي فيديو للمظاهرة بس مش عارفة بقى انا حاسة ان ده في اول المظاهرة خالص، او في اخرها خالص، ومستنيين حسام الحملاوي ينزل فيديوهاته



بسم الله الرحمن الرحيم الاجابة تونس

عدنا بحمد الله من الوقفة الاحتجاجية اللي كانت على سلم النقابة، انا رحت من صلاح سالم وفنون راحت من كوبري اكتوبر فهي وصلت اسرع مني، وصلت ستة الا ربع وانا وصلت ستة الا سبع دقايق عشان اول ما وصلت طلبتها في الموبايل والموبايل عامل ستة الا سبع دقايق

اول ما وصلت العدد ما كانش كبير، يعني عشرات، حوالي خمسين، سبعين بالكتير، فبعت رسالة لمهندس حر اقول له العدد قليل، قام هو نزل ان العدد قليل على التويتر، شوية وهوب هوب العدد فضل يزيد يزيد يزيد بقى مئات، على ما وائل خليل وصل بقى حوالي ستمية، اول ما شاف وشي: حرام عليك، ده انا مش عارف احط رجليا على الارض تقومي تبعتي تقولي العدد قليل

طبعا اللي على التويتر عارف ان وائل خليل الوحيد لما بيذنبني مش بافتح بقي معاه لما بيقول لي بننننننننننننننننت بابص في الارض، مين بقى فرح فرحة الاعمى وكان سعيد قوي وفضل يسخنه، محمود صابر، اقول له اول ما جيت كان العدد قليل، يقوم محمود صابر يقول له: مش صحيح.. انا هنا من خمسة، العدد كان كده واكتر، وراخر خالد عبد الحميد يغني معاه، اه والله، بيكدبوا عشان يستمتعوا وهم بيشوفوني باضرب مسطرتين على ايدي ومش قادرة ارد. بس انا اثبت صحة كلامي، الا الكدب، ماحبش حد يطلعني كدابة وانا باقول الحقيقة بتصعب عليا نفسي، سبت المظاهرة ومشيت زي الهابلة الم ناس: انت هنا من الساعة كام؟ طب بذمتك العدد مش كان قليل..لحد ما صدقني

فنون بقى، هههههههههههههههههههههه، مبدئيا هي بتقترح هتيفة يبقوا ستايل اكتر من كده، والحمد لله ما اقترحتش ان المرة الجاية نعمله في الجورمانديز او سنجاريا، او نعمله في الغردقة الطف، بس هي طبعا بصراحة يعني معذورة شوية، يعني الهتاف ده كلمتين وخلاص، مش قصة ضياع فلسطين من سنة تمانية واربعين ح نهتفها وواحد يطلع: رب قوم والناس وراه: رب قوم.. ذهبوا الى قوم.. ذهبوا الى قوم.. وما لقهومشي.. وماههبلولااالالا.. الناس ضاعت منك كده خلاص، احم، طيب، هو الوقفة كان فيها اجانب كتير، وكان فيها حاخام من ناتورا كارتا تقريبا لابس بادج عليه: انا يهودي ولست صهيونيا

بالعربي، وطبعا انا وفنون حبيناه قوي، وفنون قعدت تقول: يا جميلة، كميل قوي، تعالي نتصور معاه. وبما اني اصلا كنت صاروخ وسخطوني بني ادم، اي حد يسخني وانا انطلق، رحت قلت له عايزين نتصور معاك قال لي: انا اسف، بس حرام راجل يتصور مع ست، انا اسف ده دين.

قلت له: لالالالا ولا يهمك. ودي طبعا تقول له: وماله، طبعا معاك حق، احنا متفهمين... ماهي مش هي اللي اكلت الكبسة

بس ما كانتش كاشة زي ما كنت متوقعة، دي كانت جاية مستحلفة وجايبة معاها واحد جندته وخلته ييجي من اسكندرية عشان يتضامن

وشفت تميم البرغوتي، قال لي: كان فيه يافطة متعلقة بالعبري بس احنا نزلناها. قلت له: ماهو فيه اسرائيليين

طب نعمل ايه يعني؟ ح نطردهم؟ بامارة ايه؟ اسرائيليين جايين يتضامنوا مع غزة ضد الجدار اللي بتعمله مصر تضامنا مع اسرائيل، حاجة تضايق قوي، بس انا مش عايزة اعيط بقى النهاردة، انا تعبانة وصوتي رايح

هو تميم ما عندوش زينوفوبيا ولا حاجة، فوبيا الاجانب يعني، بس قال لي: انا كنت فاكر ان الوقفة دي للمصريين

قلت له: مافيش حاجة في البلد دي يا تميم للمصريين

حسيت انه اتخنق كده، وراح داخل جوة.. بصراحة انا كنت مبسوطة من العدد وما كنتش عايزة اتنكد، يمكن يومين كده ويصعب عليا نفسي واتنكد، خصوصا ان كان فيه مصريين على الصف التاني بيبصوا لنا بحسرة كده والامن يهشهم زي المعيز وهم بيمشوا عمالين يبصوا لنا برضه، المنظر ده وجعني قوي، يعني لو كانوا بصوا قدامهم ما كنتش اتوجعت كده، بس هي جات مع خالد عبد الحميد بتهريج: ده تدويل فلسطين مش تدويل القدس، مش عارف بقى فلسطين ح تبقى عربية بعد كده ازاي؟

ثم كويس يعني ان فيه عدد كبير في العالم متضامن معانا، كان فيه ايطاليين، وانجليز، امريكان (انا عرفت ان الامريكان انضربوا النهاردة قدام السفارة الامريكية والسفارة قفلت الباب وقالت مالناش دعوة وماما بتخمن ان تكون هي السفارة اللي ادت الكارت بلانش للامن انه يضربهم) وكان فيه فرنساويين كتير، وواحد فرنساوي حد فهمه ان دي وقفة احتجاجية ضد ساركوزي، هو جاي لساركوزي مش لاي حد تاني، مشاعره ناحية ساركوزي زي مشاعري ناحية علاء مبارك (مش انا خليت كريم البحيري بيهتف ورحت موسوسة في وده: وعلاء مبارك، راح قايل يسقط يسقط علاء مبارك هههه الحمد لله)، ومشاعر سلمى سعيد ناحية مبارك، جاية شايلة يافطة: تحرير القدس يبدأ من تحرير القاهرة. وجايبة معاها واحدة انجليزية تقريبا، بس هي خواجية من القللي واضح، بتزغرد وتتكلم عربي وتهتف يسقط يسقط حسني مبارك، طبعا سلمى يعني، ماشية تصاحب كل الاجانب وتحفظهم يسقط يسقط حسني مبارك وانا بتنبأ لها انها ح تشتغل مدرسة في حضانة عشان تاخد الجيل اللي جاي من بابه (ماهو الباشا قاعد معانا شوية) وتعمل لهم اغنية اطفال اسمها يسقط يسقط حسني مبارك وتحكي لهم حدوتة امنا الغولة مبارك والشاطر يسقط يسقط. الاخ الفرنساوي ده بقى، واضح انه عايز يلف العالم عشان يشتم في ساركوزي بس، وقاعد ح يموت، كل شوية يروح طالع لوحده ويهتف ضد ساركوزي لما قلت لخالد عبد الحميد: ادي الجدع ده الميكرفون احسن ح يموت لو ما هتفش ضد ساركوزي، الراجل جاي من اخر الدنيا يعني ادوله فرصة. وبعد ما فش غله في ساركوزي شتم برلسكوني والاتنين دول عاملين له مشكلة كبيرة على فكرة، واول ما تقول ساركوزي يروح ملفوت ناحية الصوت: انت بتقول عز؟

قال وعايز يقنعني انا وفنون ان ساركوزي زي مبارك، وفنون راخرة بتاخده على قد عقله وتقول له: طبعا طبعا

بس هو اللي خلا فنون نفسها في هتيفة ستايل، ان طبعا الهتيفة التقليديين حبوا يجاملوا العدد الغفير ده من الاجانب فقرروا يهتفوا بالانجليزي فبقت

down with the wall

داويييين زا ووووووووووووووووول

free gaza

بقت

فريضام غزة

وبعت رسالة لحسام الحملاوي اللي كان واقف قدام هو ومحمود صابر اقول لهم: يخرب بيت الانجليزي ما تهتفوا انتوا..

ما اعرفش ليه ما اخدوش كلامي بجدية، حسام ابتسم لي من بعيد، ومحمود صابر ساب قدام وجه وقف ورا جنبي عشان يضمن اني ما اطلبش منه حاجة

بس فيه عدد كويس والله العظيم من المصريين، يعني المصريين كانوا بالمئات، غير اللي كانوا واقفين على الصف التاني بيبصوا لنا بصة توجع القلب، نظرة كده شبه واحده مثلا بياخدوا منها ابنها ويحطوه في الملجأ. وفيه كان بيعدي يبص ويخاف من الامن لوحده ويمشي، وبعدين الامن بقى فعلا مشى اتنين بغلاسة كده، لكن ساب الباقيين يقفوا يتفرجوا ويمشوا

على فكرة كان فيه اخ فلسطيني صعبنا عليه وقال مدام المصريين مش عارفين يمشوا في بلدهم نقدر نبعت لكوا حد من عندنا يعمل لكوا انفاق عشان تروحوا مشاويركوا بس

المهم، بلاش نكد بلاش نكد، الوقفة كانت ناجحة فعلا، كان فيه عدد مصريين كبير وعدد اجانب اكبر

ومواطن مصري جه.. تصدقوا؟ بس ما شفتوش يا خسارة، انا وفنون كنا عايزين نشوفه واضح انه كان في الجنب اللي قاعد فيه الاجانب لانه بعت على التويتر: جنبي خواجات مخابيل.. بس فرحت قوي انه راح وكنت عايزة اشوفه

فيه كنيسة قدام النقابة، تصدقوا بايه؟ بقيت كل شوية ابص على الكنيسة على امل ان العدرا تظهر :) هي العدرا مش فلسطينية برضه؟ مش مفروض تساندنا في حاجة زي دي؟

اه بالحق كنت ح انسى، محمود صابر اخد صور هنا حلوة قوي

اهم حاجة بالنسبة لي عدد المصريين وعدد المصريين كان كبير، بس خسارة محمود ما اخدش صور للناس اللي على الناحية التانية
ده اللي انا فاكراه دلوقت
لو افتكرت حاجة تانية ح اقول لكوا