Wednesday 30 December 2009

العملية في النملية والوقفة الاحتجاجية عدت على خير

تحديث:
الساعة 14:43 بتاريخ 30 ديسمبر 2009 
حسام الحملاوي نزل فيديوهات هنا 
ومحمد عبد الغني نزل الصور هنا 
 فيه خبر بقى بيتناقله الفلسطينيين على وكالاتهم ان العمال المصريين رفضوا استكمال العمل في الجدار وبيقولوا ان الوفد هي اللي قالت كده، انا عايزة لنك الخبر من الوفد عشان نتأكد من الخبر لان الخبر ده لو طلع مش صحيح يبقى الفلسطينيين يا عيني وصلوا لمرحلة خطرة جدا من الانكار النفسي وابتدوا يكتبوا احلامهم على انها اخبار، كده يبقى احنا ضربنا مخ الناس خالص، على رأي فيصل: وانا اللي كنت فاكره يائس؟ اتاريه كان لسة عنده امل فيا. 
امبارح قريت مقال بعته لي مهندس حر، واحد فلسطيني من غزة بيتكلم عن سواقين التاكسي الغزاوية اللي كل ما غزة تنضرب يطلعوا اشاعات ان مصر بعتت كتيبة جيش سرية عشان تنقذهم
بس عادي سواقين التاكسي بيقولوا كلام، زي ما سواقين التاكسي عندنا في مصر مقتنعين ان "التعلب بتاعنا هو اللي ح يقضي على اسرائيل بس هو بيجيب رجلهم" ماهو واحد بيلف طول النهار في الشوارع وبيقابل خلق كتير تقرف الكلب الحزين، لازم يحلم عشان يسلي نفسه
لكن لو وصل الامر انهم ينزلوا احلامهم اخبار يبقى كده حاجة تقطع القلب، جننا الناس خالص يعني؟ عموما هو الخبر نزل هنا وانا مش عارفة الوكالة دي الخبر نصه الاولاني صحيح ان فيه ملثمين فلسطينيين اطلقوا النار على معدات البناء بتاعة الجدار وكانوا حريصين انهم ما يصيبوش بني ادمين، بس النص التاني بيقول ان عمال المقاولين العرب امتنعوا عن استكمال البناء، حد عنده مصدر تاني للخبر؟ اصل فيه مهندس مصري بيقول كلام تاني

يارب يطلع الخبر صحيح بس عشان الغلابة دول يتجبر بخاطرهم، انا ما كنتش اعرف ان احنا حطمناهم قوي كده...والنبي يارب ما تصدمهم اكتر من كده، الجدع الفلسطيني اللي كاتب المقال بيقول احنا اخدنا على صدمات كتير وبنعرف نتصرف ونتعايش بس موضوع اننا نتصدم في مصر ده لسه مش عارفين نتعامل معاه!!!! كده وجع قلب بقى، هو احنا ناقصين تأنيب ضمير؟ احنا قربنا نتحول لجوريسيك بارك من كتر تأنيب الضمير، عشان لما احنا لما بنحس بتأنيب الضمير بنبقى متوحشين شوية، والاخ الفلسطيني اللي كان عايز يساعدنا نحفر انفاق عشان نعرف نمشي في بلدنا يقول لي مظاهراتكوا انتوا عشانا لها طعم تاني، وقبل كده مدونة مصرية سافرت الاردن وحكت انها قابلت سواق تاكسي فلسطيني وقال لها احنا مستنيين مصر وح ننضم للجيش المصري لما مصر تنوي تحرر فلسطين واحنا عارفين ان مصر هي اللي ح تحرر فلسطين احنا مستنيينها، طبعا ردت عليه بالبرود العاطفي اللي عند المصريين (على رأي مهندس حر) وقالت له واحنا مالنا، الواد واقف مستني القطر وهي بتقول له واحنا مالنا وش كده....تؤ، انا ما اقدرش على وجع القلب ده، ده مشهد مؤثر قوي، بيفكري بمنظر لواحدة كنت اعرفها عايزة تخرج وتتفسح وتسهر وتنبسط وكل شوية ابنها (كان عنده تمن سنين اياميها) يتصل بيها ويقول لها: تعالي اقعدي معايا يا ماما انا باحبك. وهي تقعد تقول لي: يييييي ابني بيتصل، ردي عليه وقولي له ماما في الحمام. وانا طبعا اقعد اعيط. طب حد من صحفيين الدستور يتأكد من الخبر ده؟ طب حد يوحي للعمال طب.. طب نأجر لهم ناس تعمل نفسها عمال وتمثل انها مضربة؟ ماهو مش معقولة كسرة الخاطر دي، طب بصوا، فيه لجنة في سيناء طلعت البيان ده

محمود ساندمانكي اتصل بيا دلوقت وقال لي انه متضايق لانه اكتشف ان موضوع الامريكان اللي انضربوا قدام السفارة ده طلع اشتغالة وطلع الامن المصري ما ضربهمش ولا حاجة
بصراحة وانا كمان اتضايقت، مش اتضايقت يعني كان نفسي ينضربوا، بس اللي مش عايش في القاهرة لازم ييجي يتفرج على الامن اللي واقف قدام الاجانب مش قادر يعمل لهم حاجة ونازل بهدلة في الناس اللي معدية، مش بيتظاهروا، ولا حتى دريانين بحاجة، دول ماشيين في الشارع، زي الراجل اللي مديره في الشغل يهزأه يقوم راجع البيت ضارب مراته: وكمان بتقولي مساء الخير؟
الناس تبقى ماشية في الشارع فجأتن حتة امين شرطة: امشي من هنا يا خـ... يا ابن المتـ... يا ابن الـ... ينعل ... امك. 
كده، من غير اي حاجة
طبعا كامل تعاطفي مع الامريكان لو كانوا اتضربوا، بس الواحد يحس بالمساواة يعني، دول حتى مش عايزين يحترمونا شوية والضيوف عندنا







تحديث:
الساعة 13:03 يتاريخ 30 ديسمبر 2009
ايمان بدوي اخدت صور وده فيديو



بس ازاي السفارة الامريكاني تقفل الباب وتخلي الامن المصري يضرب المواطنين بتوعها؟ لا بجد انا منبعجة وفاتحة بقي كدهو، ده ساركوزي اللي الواد جاي مستحلف له ما هانش عليه يعمل كده والفرنساويين بقالهم تلات ايام معتمصمين قدام السفارة الفرنسية، ازاي امريكا تعمل كده في مواطنيها؟ دي لو كانت حصلت معانا في اي داهية كان زمانا قلبنا الدنيا صويت وعياط وكرامة مصر وكرامة المصريين وكنا رحنا اشتكينا لامريكا من حكومتنا اللي بتنتهك حقوقنا، طب والامريكان ح يسكتوا؟

تحديث:
الساعة 00:36 بتاريخ 30/12/2009
غفاري جاب لي فيديو للمظاهرة بس مش عارفة بقى انا حاسة ان ده في اول المظاهرة خالص، او في اخرها خالص، ومستنيين حسام الحملاوي ينزل فيديوهاته



بسم الله الرحمن الرحيم الاجابة تونس

عدنا بحمد الله من الوقفة الاحتجاجية اللي كانت على سلم النقابة، انا رحت من صلاح سالم وفنون راحت من كوبري اكتوبر فهي وصلت اسرع مني، وصلت ستة الا ربع وانا وصلت ستة الا سبع دقايق عشان اول ما وصلت طلبتها في الموبايل والموبايل عامل ستة الا سبع دقايق
اول ما وصلت العدد ما كانش كبير، يعني عشرات، حوالي خمسين، سبعين بالكتير، فبعت رسالة لمهندس حر اقول له العدد قليل، قام هو نزل ان العدد قليل على التويتر، شوية وهوب هوب العدد فضل يزيد يزيد يزيد بقى مئات، على ما وائل خليل وصل بقى حوالي ستمية، اول ما شاف وشي: حرام عليك، ده انا مش عارف احط رجليا على الارض تقومي تبعتي تقولي العدد قليل
طبعا اللي على التويتر عارف ان وائل خليل الوحيد لما بيذنبني مش بافتح بقي معاه لما بيقول لي بننننننننننننننننت بابص في الارض، مين بقى فرح فرحة الاعمى وكان سعيد قوي وفضل يسخنه، محمود صابر، اقول له اول ما جيت كان العدد قليل، يقوم محمود صابر يقول له: مش صحيح.. انا هنا من خمسة، العدد كان كده واكتر، وراخر خالد عبد الحميد يغني معاه، اه والله، بيكدبوا عشان يستمتعوا وهم بيشوفوني باضرب مسطرتين على ايدي ومش قادرة ارد. بس انا اثبت صحة كلامي، الا الكدب، ماحبش حد يطلعني كدابة وانا باقول الحقيقة بتصعب عليا نفسي، سبت المظاهرة ومشيت زي الهابلة الم ناس: انت هنا من الساعة كام؟ طب بذمتك العدد مش كان قليل..لحد ما صدقني
فنون بقى، هههههههههههههههههههههه، مبدئيا هي بتقترح هتيفة يبقوا ستايل اكتر من كده، والحمد لله ما اقترحتش ان المرة الجاية نعمله في الجورمانديز او سنجاريا، او نعمله في الغردقة الطف، بس هي طبعا بصراحة يعني معذورة شوية، يعني الهتاف ده كلمتين وخلاص، مش قصة ضياع فلسطين من سنة تمانية واربعين ح نهتفها وواحد يطلع: رب قوم والناس وراه: رب قوم.. ذهبوا الى قوم.. ذهبوا الى قوم.. وما لقهومشي.. وماههبلولااالالا.. الناس ضاعت منك كده خلاص، احم، طيب، هو الوقفة كان فيها اجانب كتير، وكان فيها حاخام من ناتورا كارتا تقريبا لابس بادج عليه: انا يهودي ولست صهيونيا
بالعربي، وطبعا انا وفنون حبيناه قوي، وفنون قعدت تقول: يا جميلة، كميل قوي، تعالي نتصور معاه. وبما اني اصلا كنت صاروخ وسخطوني بني ادم، اي حد يسخني وانا انطلق، رحت قلت له عايزين نتصور معاك قال لي: انا اسف، بس حرام راجل يتصور مع ست، انا اسف ده دين.
قلت له: لالالالا ولا يهمك. ودي طبعا تقول له: وماله، طبعا معاك حق، احنا متفهمين... ماهي مش هي اللي اكلت الكبسة
بس ما كانتش كاشة زي ما كنت متوقعة، دي كانت جاية مستحلفة وجايبة معاها واحد جندته وخلته ييجي من اسكندرية عشان يتضامن

وشفت تميم البرغوتي، قال لي: كان فيه يافطة متعلقة بالعبري بس احنا نزلناها. قلت له: ماهو فيه اسرائيليين
طب نعمل ايه يعني؟ ح نطردهم؟ بامارة ايه؟ اسرائيليين جايين يتضامنوا مع غزة ضد الجدار اللي بتعمله مصر تضامنا مع اسرائيل، حاجة تضايق قوي، بس انا مش عايزة اعيط بقى النهاردة، انا تعبانة وصوتي رايح
هو تميم ما عندوش زينوفوبيا ولا حاجة، فوبيا الاجانب يعني، بس قال لي: انا كنت فاكر ان الوقفة دي للمصريين
قلت له: مافيش حاجة في البلد دي يا تميم للمصريين
حسيت انه اتخنق كده، وراح داخل جوة.. بصراحة انا كنت مبسوطة من العدد وما كنتش عايزة اتنكد، يمكن يومين كده ويصعب عليا نفسي واتنكد، خصوصا ان كان فيه مصريين على الصف التاني بيبصوا لنا بحسرة كده والامن يهشهم زي المعيز وهم بيمشوا عمالين يبصوا لنا برضه، المنظر ده وجعني قوي، يعني لو كانوا بصوا قدامهم ما كنتش اتوجعت كده، بس هي جات مع خالد عبد الحميد بتهريج: ده تدويل فلسطين مش تدويل القدس، مش عارف بقى فلسطين ح تبقى عربية بعد كده ازاي؟
ثم كويس يعني ان فيه عدد كبير في العالم متضامن معانا، كان فيه ايطاليين، وانجليز، امريكان (انا عرفت ان الامريكان انضربوا النهاردة قدام السفارة الامريكية والسفارة قفلت الباب وقالت مالناش دعوة وماما بتخمن ان تكون هي السفارة اللي ادت الكارت بلانش للامن انه يضربهم) وكان فيه فرنساويين كتير، وواحد فرنساوي حد فهمه ان دي وقفة احتجاجية ضد ساركوزي، هو جاي لساركوزي مش لاي حد تاني، مشاعره ناحية ساركوزي زي مشاعري ناحية علاء مبارك (مش انا خليت كريم البحيري بيهتف ورحت موسوسة في وده: وعلاء مبارك، راح قايل يسقط يسقط علاء مبارك هههه الحمد لله)، ومشاعر سلمى سعيد ناحية مبارك، جاية شايلة يافطة: تحرير القدس يبدأ من تحرير القاهرة. وجايبة معاها واحدة انجليزية تقريبا، بس هي خواجية من القللي واضح، بتزغرد وتتكلم عربي وتهتف يسقط يسقط حسني مبارك، طبعا سلمى يعني، ماشية تصاحب كل الاجانب وتحفظهم يسقط يسقط حسني مبارك وانا بتنبأ لها انها ح تشتغل مدرسة في حضانة عشان تاخد الجيل اللي جاي من بابه (ماهو الباشا قاعد معانا شوية) وتعمل لهم اغنية اطفال اسمها يسقط يسقط حسني مبارك وتحكي لهم حدوتة امنا الغولة مبارك والشاطر يسقط يسقط. الاخ الفرنساوي ده بقى، واضح انه عايز يلف العالم عشان يشتم في ساركوزي بس، وقاعد ح يموت، كل شوية يروح طالع لوحده ويهتف ضد ساركوزي لما قلت لخالد عبد الحميد: ادي الجدع ده الميكرفون احسن ح يموت لو ما هتفش ضد ساركوزي، الراجل جاي من اخر الدنيا يعني ادوله فرصة. وبعد ما فش غله في ساركوزي شتم برلسكوني والاتنين دول عاملين له مشكلة كبيرة على فكرة، واول ما تقول ساركوزي يروح ملفوت ناحية الصوت: انت بتقول عز؟
قال وعايز يقنعني انا وفنون ان ساركوزي زي مبارك، وفنون راخرة بتاخده على قد عقله وتقول له: طبعا طبعا
بس هو اللي خلا فنون نفسها في هتيفة ستايل، ان طبعا الهتيفة التقليديين حبوا يجاملوا العدد الغفير ده من الاجانب فقرروا يهتفوا بالانجليزي فبقت
down with the wall
داويييين زا ووووووووووووووووول
free gaza
بقت



فريضام غزة

وبعت رسالة لحسام الحملاوي اللي كان واقف قدام هو ومحمود صابر اقول لهم: يخرب بيت الانجليزي ما تهتفوا انتوا..
ما اعرفش ليه ما اخدوش كلامي بجدية، حسام ابتسم لي من بعيد، ومحمود صابر ساب قدام وجه وقف ورا جنبي عشان يضمن اني ما اطلبش منه حاجة
بس فيه عدد كويس والله العظيم من المصريين، يعني المصريين كانوا بالمئات، غير اللي كانوا واقفين على الصف التاني بيبصوا لنا بصة توجع القلب، نظرة كده شبه واحده مثلا بياخدوا منها ابنها ويحطوه في الملجأ. وفيه كان بيعدي يبص ويخاف من الامن لوحده ويمشي، وبعدين الامن بقى فعلا مشى اتنين بغلاسة كده، لكن ساب الباقيين يقفوا يتفرجوا ويمشوا
على فكرة كان فيه اخ فلسطيني صعبنا عليه وقال مدام المصريين مش عارفين يمشوا في بلدهم نقدر نبعت لكوا حد من عندنا يعمل لكوا انفاق عشان تروحوا مشاويركوا بس
المهم، بلاش نكد بلاش نكد، الوقفة كانت ناجحة فعلا، كان فيه عدد مصريين كبير وعدد اجانب اكبر
ومواطن مصري جه.. تصدقوا؟ بس ما شفتوش يا خسارة، انا وفنون كنا عايزين نشوفه واضح انه كان في الجنب اللي قاعد فيه الاجانب لانه بعت على التويتر: جنبي خواجات مخابيل.. بس فرحت قوي انه راح وكنت عايزة اشوفه

فيه كنيسة قدام النقابة، تصدقوا بايه؟ بقيت كل شوية ابص على الكنيسة على امل ان العدرا تظهر :) هي العدرا مش فلسطينية برضه؟ مش مفروض تساندنا في حاجة زي دي؟
اه بالحق كنت ح انسى، محمود صابر اخد صور هنا حلوة قوي
اهم حاجة بالنسبة لي عدد المصريين وعدد المصريين كان كبير، بس خسارة محمود ما اخدش صور للناس اللي على الناحية التانية
ده اللي انا فاكراه دلوقت
لو افتكرت حاجة تانية ح اقول لكوا

30 comments:

Ghafari said...

ههههههههههههه ايوة ايوة داون زا وول داون داون موبارااك. انا كنت عاوز اقول لحسام اطلع يا حسام شغل الناس دي، بس الراجل كان مشغول بالتصوير.

انا شفتك لما نزلتي جبتي بتاع ناتوري كارتا من تحت، وعمالة تؤلفي شعارات وتغمزي ف ناس تانية بشعارات لول. والاخ اللي قال داون برلسكوني ده، وعدى على غوردون براون ضحكني اوي.

وعلى فكرة، المظاهرة اول منا جيت على خمسة ونص، كان فيها اقل من 100، محمود صابر بقى كان بيبالغ ف الارقام اول مرة :P

بعدين زادوا شوية، انا اخر رقم كتبته كان 200 تقريبا، وائل رد يقولي لا 500 ات ليست... هم زادوا ف الاخر ربما 400 :P

اكتشفت النهاردة اد ايه التظاهرة، البسيطة جدا دي، ممكن تكون مجال لتفريغ طاقة عند مواطن عادي، ومقصدنيش انا، تجاه اللي بيجرا؛ بعدها يرجع البيت بقى متكيف ونفسيته مستريحة زي اللي قال ال ف نفسه. الحكومة دي هابلة، المفروض تسيب الناس تتظاهر وتشتم براحتها وكله هيبقى تمام!

على فكرة كنت متابعك من وقت ما جيتي، بس اتحرجت اسلم، كنت جنبكم بالظبط!

المرة الجاية نشوفك ف حلقة تراتيل ان شاء الله :)

Ghafari said...

إليك بكام فيديو كمان اهم من التظاهرة:
http://www.youtube.com/watch?v=YoYr2uC7960&feature=PlayList&p=7CEBE9EA5C1EB395&index=0

qrique said...

انا عندي سؤال
لما حد يقوللي:
"يا جدعان الانفاق بيتهرب فيها مخدراااات و اسلحه و بيدخل جواسيس من اسرائيل لمصر منها...بلاش تزيطوا في اي زيطه و تعملوا متعاطفين و خلاص"
و يقوللي:"على فكره الانفاق اللي بين مصر و غزه بيستخدم 90% منها لتهريب المخدرات و السلاح"
"المشكله ان الناس بتزيط في الزيطه و خلاص....عشان قالوا بين مصر و غزه..ما صدقوا لقوا فرصه عشان يعملوا مظاهرات و اعتصامات بدون فهم صحيح للموضوع"
ارد عليه اقوله ايه؟معلش استحملوا غباؤنا بس انا معنديش اسباب مترتبة عشان ارد بيها و لما حد يقوللي الجدار صح و اللي يقول انه غلط يبقى فكره بدائي و حدود ارد اقول ايه؟

مواطن مصري said...

بس انا جيت تسجيل موقف عشان تعرفي اني قد كلمتي ب الرغم اني مختلف مع حماس

AhmedEzzat said...

كان نفسي اجي والله , مع اني ساكن قريب بس رجعت من الكليه الساعه 6 هلكاان :(

تتعوض في مرات لاحقه ان شاء الله :D

elmonadel said...

الوقفة كانت حلوة جدا بس انا ما شوفتش العريس و العروسة.
انا سمعت زغاريد و طبل كأننا فى فرح او طهور.

الانطباع الوحيد اللى خرجت بيه انى حسيت ان الاجانب جايين مصر علشان يرفهوا عننا و يسلونا شوية علشان ننسى و نبتدى سنة جديدة سعيدة.

انا مبسوط جدا علشان سلمت عليكى يا نوارة كان نفسى اشوفك.

WIDI

MoMo said...

الاخ qrique سؤال علي سؤالك المخدرات والسلاح دول هما بيجيبوه منين لما هيدخلوه مصر؟؟؟من اسرائيل؟ طيب سؤال علي السؤال التاني انت فاتح حدودك كلها للاسرائيلين يدخلوا بالبطاقة زنقت معاهم قوي يدخلوا السلاح والمخدرات من غزة اللي هما مالهومش وجود فيها اصلا لا ومن الانفاق كمان طيب ليه؟؟ اللي يرد عليك يقولك الانفاق ما بتدخلش حاجة لغزه تقوله ايه؟؟ الفلسطنيين حافرينها ليه غاويين رطوبة؟؟ اقوللك اوصل بنفسك للحدود واسأل رفح المصرية والعريش ومدن القناه عايشين علي ايه

wahat_alshohada said...

سعدت جدا برؤيتك النهاردة ورؤية فنون بس ازاى ما شفتش وائل؟ لى سنين ما شفتوش ولا حتى اخدت بالى من سلمى ان شاء الله المظاهرة الجاية نبقى نرفع ورقة عليها اسامينا علشان نعرف بعض ودة فى الحقيقة ممكن يجنن الامن هيفتكروه شفرة والا حاجة :)
خدى عندك يا قمر فيديو فرانكو اراب للمظاهرة العسل دى
http://www.youtube.com/watch?v=2aDB_MWYSfo

Kalimalhus said...

@qrique
-------
- أعلى عدد وصلته الأنفاق كان 2000 نفق .. تفتكر ممكن العدد ده كله يبقى لتهريب السلاح و المخدرات؟

- منطقى إن حماس و غيرها من حركات المقاومة محتاجين سلاح لكن عايزين مخدرات يعملوا بيها إيه؟ .. و مين معاه فلوس فى غزة و مستعد يصرفها على المخدرات و لو فيه من الصنف ده هيبقى عددهم قد إيه و حجم تعاملاتهم محتاج كام نفق..

- فكرة تهريب السلاح و المخدرات فى الإتجاه العكسى مضحكة جدا لأن غزة محتاجة سلاح و مش هتصدره و الأهم إن رفح منفذها الوحيد فهيدخلها مخدرات و سلاح منين عشان تهربهولنا .. و الكلام إن غزة بيدخلها أى حاجة من البحر كلام فارغ لأن إسرائيل محاصرة سواحلها و قافلاها تماما .. و إذا كان قوارب الصيد ما بتعرفش تشتغل و حتة قارب يتيم كان جاى لكسر الحصار برضه إتعكش تفتكر ممكن يعدى سلاح و خدرات؟؟؟

- حكومتنا غير ملزمة قانونا بغلق المعبر زى ما بيدعى المتحدثين بإسمها و بيعتمدوا فى تمرير أكاذيبهم على جهل غالبية الناس بحقيقة الأمر .. إتفاقية المعابر مصر مش طرف فيها و غير ملزمة ليها و بإمكان مصر إنها تفتح المعبر للسماح بحركة عادية و قانونية و تحت السيطرة الأمنية للناس و البضائع بشكل يسمح لأهل غزة بإنهم يحققوا الحد الأدنى من إحتياجاتهم لأنهم حتى لو إنفتح المعبر هيفضل الحصار الإسرائيلى برضه مضيق عليهم سبل الحصول على كل الإحتياجات و حركة التجارة مع مصر مش هتغطى كل الإحتياج..

- حكاية الجواسيس نكتة بايخة لأن إسرائيل عندها حدود طويلة مع مصر و مش محتاجة تعدى جواسيسها فى نفق لأنهم ممكن يعدو من أى معبر حدودى بالبطاقة و من غير تأشيرة و يضرب لهم تعظيم سلام أو ييجو بالطيارة على القاهرة عدل .. إيه اللى يخليهم يعدوا فى منطقة معادية ليهم و لو إتشمت ريحتهم هيتعكشوا و يشرفوا مع شاليط؟؟

يا ريت نستخدم عقلنا مش أكتر و ياريت نتعلم الشعور بالمسئولية الإنسانية بلاش القومية و لا الدينية إعزنهم كفرة من المريخ تصادف إنهم كائنات حية أقل الإيمان نسمحلهم بأكل يحفظ حياتهم و مواد بناء عشان يبنوا البيوت اللى إتهدمت على رؤوسهم.. مش نبنى سور بإشراف سلاح المهندسين الأمريكى عشان نحمى السيادة؟؟ .. سلامات يا سيادة

wahat_alshohada said...

وشوية صور هنا
http://www.qaweim.com/vb/showthread.php?p=113957#post113957

simplymoi said...

Well done Nawara, This will be your last episode of depression Why?
Because you choose to create a profound meaning and hopefully long-range goal for yourself and your community. Now you will find yourself tend to lead more satisfying and less disturbed live.
Wish you all best and take care.

حـنــّا السكران said...

مقال لعلاء الأسواني :

http://www.shorouknews.com/Columns/column.aspx?id=166580

Unknown said...

وحشتوووووونى ياشباب

كان نفسى أكون موجود معاكم على سلم النقابه

أحلى حاجه اتفرجت عليها الأسبوع ده حسام زكى وزير الخارجيه بتاعنا قال أن اللى بيضرنا ان السلاح بيتهرب من غزه لمصر
الحمساويه اللى مزنوقين بر بحر جو هما اللى بيهربوا سلاح للبدو

هههههههههههههههههههه

بس تخيلت المنظر بتاع ناس الناحيه التانيه ونظرتهم ليكوا وحزنت بجد

هتشوفوا said...

أنا والله كنت بسافر من المنصورة للقاهرة علشان المظاهرات بس للأسف دلوقتي ماينفعش ادي تمن الغربة, ياريتني كنت معاهم

Anonymous said...

هاهاهاها
الخوجاية دي جاية متعلمة جاهزة، احنا اتقابلنا زي دالوقتي السنة اللي فاتت قدام السفارة الاسرائيلية

وعشان خاطرك برضو الخواجة اللي اتجوزته متعلم جاهز ، انا لسة هعلم؟.

LiNa Sh said...

اهو كله كوم بقى
وداوين زا وول دي كوم تاني
:))

Fatma said...

طب شوفي الفيديو اللي حاطاه ايمان بدوي وانت تتأكدي ان كان معايا حق في موضوع الهتيفة
دانا كنت على وشك اني اقودالهتاف من كتر ماتفقعت من الست اللي كانت بتحكي حكاية قبل النوم وعايزانا نقولها وراها

بس اجمالا كان وقفة مشرفة وانا مروحة على وشي ابتسامة ماراحتش لحد دلوقتي
:)

انا فخورة اني اعرف ناس زيكم

هبعتلك صورنا مع الحاخام اللي اتصورناها في الخباثه من غير ما يحس :D

أحمد عبد الفتاح said...

فيديو للوقفة يا نوارة
http://yalally.blogspot.com/2009/12/activists-in-front-of-press-syndicate.html

Unknown said...

انا شفت الفيديو بتاع ايمان
ههههههههههههههههههههه
حسبي الله ونعم الوكيل فيك يا حسام انت ومحمود ماهي دي اللحظة اللي انا بعت لهم فيها عشان ينقذوا الموقف وسابونا فريسة وقعدوا يضحكوا

وحسام يقول لي ده بدع انا كنت مبسوط... هههه انت جاي تعزي وللا جاي تهرج

وبعدين واحدة خوجاية سألته يعني ايه الهتاف ده بتاع: قول يا حسين قول يا خميس الجدار للتوريث

فقال لها
the wall is built in purpose of inheriting power to Gamal Mubarak

فقالت له: طب مين حسين وخميس دول؟

ههههههههههه

خالد عبد الحميد قال له اتصرف، قول لها خميس ده زميل البقري واحكي لها الحكاية توهها عشان ما تسألش تاني

Unknown said...

هو كمال خليل بيقول داويييين داويييين جورج بوش ليه؟ ده مشي

Ghafari said...

انا نفسي اعرف مين خميس وحسين دول!

يساري فلسطيني said...

هذا هو فعلا الزمن الجميل

تحياتي للجميع

و انشاء الله الابتسامة يافنون تكون دائمة على وجوهكم

Heba said...

اللهى يكرمك يا شيخة, يعطيكى ما يحرمك يا رب, ممكن تتفرجى على الفديوهات دى وتقوليلنا رأيك فيها أحسن أنا دماغى حتشت ومش عارفة أصدق ولا ايه
this series with the title: the arrivals
http://www.wakeupproject.com/VList.asp?Series=1

يساري فلسطيني said...

والاخ الفلسطيني اللي كان عايز يساعدنا نحفر انفاق عشان نعرف نمشي في بلدنا يقول لي مظاهراتكوا انتوا عشانا لها طعم تاني،

هههههههه

انتي فعلا رائعة ... شكرا على التنويه

طيف بدر said...

يحكي فيلم (رمضان مبروك أبو العلمين حمودة) عن مدرس للغة العربية في عمق الريف المصري ، و هذا المدرس يرى نفسه في بلدته الريفية أنه أفضل من فيها و أن على الكل السمع له و الطاعة و نسج حول نفسه بين سكان القرية هالة من العظمة و النرجسية و تعامل مع أهل قريته بصلف و عنجهية إلا أنه لما غادر بلدته إلى القاهرة حاول في البداية أن يتعامل مع سكان القاهرة كما كان يتعامل مع أهل قريته و أراد من سكان القاهرة أن يعاملوه كما كان أهل الريف يعاملونه و لكن بالطبع لم يؤت هذا الأسلوب ثماره و وجد نفسه يسقط في نفس الرذائل و الممنوعات التي كان يعاير بها غيره و ظل يكذب على نفسه بأنه لا يزال المعلم الفاضل الذي يحارب الجهل و استشراء الموبقات.
الآن يتعامل النظام الرسمي المصري سياسيا و إعلاميا مع قضية غزة ، بل مع القضية الإسلامية في فلسطين بنفس أسلوب (رمضان مبروك) معتبرا بأن المصريين هم سكان البلدة الريفية و لكنه يفشل إذا ما خرج إلى المدينة .
و أنا في السطور التالية أفند ضعف الحجج التي يسوقها الخطاب الرسمي المصري ، و أسأل الله السداد و أن يرينا الحق حقا و يرزقنا اتباعه و يرينا الباطل باطلا و يرزقنا اجتنابه و أن يقينا الفتن ما ظهر منها و ما بطن .

1- لقد قدمت مصر الكثير و الغالي و النفيس للشعب الفلسطيني و لم يقدم غيرها ما قدمته
----------------------------------------
1 -و كأن ما قدمته مسوغا لتنفيذ جريمة إبادة جماعية و فرض حصار همجي على الشعب الفلسطيني لتحقيق مآرب سياسية معروفة لدى الجميع تتوافق مع الأجندة الأمريكية و الإسرائيلية لفرض الهيمنة على المنطقة و هو حصار أشبه بالحصار الذي تم فرضه على العراقيين تحت حجة القضاء على نظام (صدام حسين) .
2 - و كأن تقديم الدعم لأهلنا في فلسطين هو عمل خيري كالأعمال التي تقدمها أنجلينا جولي و براد بيت في كمبوديا و ميانمار ، و لا يدخل في إطار تأمين المصالح الاستراتيجية لمصر في أن تعيش في محيط يحتويها و ينتمي إليها و هذا هو شأن أي ديبلوماسية بل إن هذا هو من أبجديات الديبلوماسية و علم العلاقات العامة الدولية أن توفر محيطا و عمقا آمنا يحيط بالدولة على المستوى الشعبي و الديموغرافي .
3 - و كأن تقديم الدعم لأهلنا في فلسطين هو مجرد عمل خيري لا يدخل في إطار تعطيل المشاريع التي يتبناها كيان قام على المذابح و التوسع العسكري و الاقتصادي و الاجتماعي و يمتلك أعتى الأسلحة و الترسانات العسكرية.
4 - لو كان الحديث عن الدعم المالي و المعيشي و الصحي فهناك من بلاد العالم في المنطقة و في أوروبا و في شرق آسيا ،بل و الولايات المتحدة الأمريكية نفسها قدمت مبالغ مالية و معونات و منح يتضاءل إلى جوارها "الدعم المالي المصري"
5 - لو كان الحديث عن الدعم التسليحي و اللوجستي (اللوجستيات هي تأمين خطوط الإمدادات و وسائله)فقد توقف هذا الدعم بمجرد الشروع في خطيئة السلام و التطبيع و تضييع نصر صنعه الجنود الأشداء و تحويل نتائجه إلى هزيمة تشبه الضربة القاضية من أجل "مظهرية" قائدهم و حبه للكاميرات (هذا التعبير و مشتقاته جاء على لسان كل من تعامل معه و في أدبياتهم بدءا من الشاذلي و البرادعي و محمد إبراهيم كامل و حتى مناحم بيجين و جيمي كارتر)
6 - أظننا لا ننكر أن هناك الكثيرين غيرنا الذين يدعمون بالوسائل التسليحية سواء نظام الأسد منذ الخمسينات و حتى الحرب الأهلية اللبنانية أو الجمهورية الإيرانية التي نتفق جميعا على تسليحها لحماس و الجهاد و حزب الله و ألوية الناصر بينما تحول موقفنا 180 درجة إلى الحد الذي ننظر فيه إلى تسلح المقاومة الفلسطينية على أنه إرهاب و خطيئة و جريمة .

طيف بدر said...

2 - الفلسطينيون باعوا قضيتهم و نسوها فلماذا نشغل أنفسنا بها ؟
------------------------------
1 - و كأن هذا مسوغا لتنفيذ جريمة إبادة جماعية و فرض حصار همجي على أهل غزة و كأن المصري لن يأكل إلا إذا مات الفلسطيني جوعا .
2 - الغريب أننا نقدم الدعم و التأييد و ننسج شرعية أراجوزية و هزلية على عصابة دحلان و عباس التي باعت القضية فعلا و تتربح من ورائها و لفظهم الفلسطينيون في إنتخابات شهد العالم كله بكفائتها و نتربص بحماس و الجهاد الذين قدم قادتهم أنفسهم و أبناءهم شهداء على أرض فلسطين و لم يثبت عليهم واقعة فساد أو تربح مالي حتى أن الأنظمة السياسية المعادية لهم لم تستطع الشك في ذممهم المالية .
3 - إذا رفع الفلسطينيون السلاح في وجه الإسرائيليين و أمطروا مدنهم بالصواريخ فنحن أول من يعنفهم على تصرفهم و "تهورهم" و نطلب منهم الإنشغال بلقمة العيش و "نسيان الشعارات" و الالتزام بمقررات و اتفاقيات معلوم خلفياتها و أهدافها و عدم إنصافها .
4 - هل لو باع الفلسطينيون قضيتهم ، كنا سنجزع يوميا بأخبار المذابح و الإنتهاكات التي لن تحدث وقتها ؟؟
5 - على نفس هذا المقياس فنحن في مصر لا نستحق احتراما و نستحق أن ننال الكراهية و الأذى من "طوب الأرض" فلدينا رجال أعمال مصريون فرطوا في حياة المصريين و استوردوا سمادا مسرطنا ...
و لدينا رجال أعمال مصريون فرطوا في حياة المصريين وا ستوردوا شحنات من القمح الفاسد ...
و لدينا رجال أعمال مصريون فرطوا في حياة المصريين وا ستوردوا شحنات من الدم الفاسد ...
و لدينا رجال أعمال مصريون لم يشغلوا أنفسهم بالفقراء و اختلسوا الأموال و فروا بها إلى أوروبا ...
و لدينا رجل أعمال أنفق 200 مليون جنيه على مطربة لبنانية ثم قتلها و آخر تزوج بأميرة سعودية لمدة أربعة أشهر أنفق فيها 150 مليون جنيه و ثالث تزوج بهيفاء وهبي وسط أنباء عن زفاف خرافي...
و في الوقت الذي تتزايد فيه معدلات الفقر و تتراجع فيه معدلات التنمية و تختفي فيه الطبقة الوسطى وجدنا منا من يقيم حفلا أسطوريا احتفاء بمطربة من مطربات الإثارة الأمريكيات !!!
فإن كان فينا مثل هؤلاء فطبقا للنظرية البائسة فلماذا يأبه الآخر بنا إن كنا لا نأبه بأنفسنا ؟؟!!
6 - هل يمكن وصم كل مصري يعمل خارج مصر بأنه باع بلاده علما بأن مصر ليست محتلة و لم يتعرض أهلها لتهجير ؟؟

3 - نريد تأمين حدودنا الشرقية !!!
-------------------
1 - أعتقد أنه لو كانت هذه هي الحجة أو أن هذا هو مربط الفرس لشمل التأمين كل حدودنا الشرقية من رفح المصرية شمالا و حتى طابا جنوبا و ليس فقط الـ14 كيلو متر الشمالية مع غزة!!!
2 - التهريب موجود على حدودنا الغربية مع ليبيا و الجنوبية مع السودان في كلا الإتجاهين (ذهابا و إيابا) و لم نبني جدارا عازلا !!!
3 - ما التفسير للتواجد الأمريكي و الفرنسي العسكريين في المناطق الحدودية و الإشراف على بناء السور الفولاذي ؟؟ هل في هذا تأمين لحدودنا أم أنه فتح الساحة مباشرة للتجسس الأمريكي و الفرنسي و تأمين المصالح الإسرائيلية ؟؟
4 - قبل أيام قلائل تم الإمساك بشابين إسرائيليين في وسط سيناء و لم تمض 12 ساعة عليهم إلا و قد عادوا إلى ذويهم وسط تعتيم إعلامي غريب في الوقت الذي لا يكف فيه هذا الإعلام عن توجيه الشرشحات و العداوات و البذاءات نحو حماس و الفلسطينيين و حزب الله و إيران و سوريا و قطر و قناة الجزيرة و و قناة سبيستون و آخرها الجزائر !!!
5 - الإسرائيليون و طبقا لمعاهدة كامب ديفيد يدخلون بسياراتهم و بدون تأشيرات أو جوازات سفر إلى سيناء حاملين معهم المخدرات و الدعارة و أنشطة التجسس و لعلنا نتذكر عائلة مصراتي الإسرائيلية و ما فعلته بشباب مصر و بالضباط الصغار في الجيش المصري و بالمحكمة المصرية التي تبول عليها كبير العائلة أمام شاشات التليفزيون !!!
6 - لماذا لا ننظر إلى غزة كسوق سيدر الملايين على الإقتصاد المصري و لن نجد فيه منافسا ؟؟

طيف بدر said...

4 - الفلسطينيون يقتلون جنودنا !!!
-------------------
1 - وقائع التوترات المسلحة بين الفلسطينيين و حرس الحدود المصري (و الذين تختارهم قوات "حفظ السلام" الدولية و تحدد مهامهم طبقا لموقع هذه القوات الدولية ذات الغالبية الأمريكية على شبكة الإنترنت) حدثت في ظروف خاصة و قليلة في أوقات هرج و مرج و قد سقط ضحايا و مصابون من الطرفين .
2 - ماذا عن دم أهل غزة الذين ماتوا طول 3 سنوات بالجوع و المرض تحت الحصار غير دم المسلمين الذين قتلوا في الأنفاق بفعل التعاون المشترك بين القوات المصرية التابعة لمبارك و القوات الأمريكية ؟ "و كله بالدليل و المصدر" ... أو بفعل إمدد القوت الصهيونية بالغاز و الأسمنت المصري .
3 - الجنود المصريون الذين قتلوا و تم استهدافهم مباشرة بالرصاص الإسرائيلي على طول خط الحدود بين المنطقتين (ج) في سيناء و (د) في فلسطين المحتلة عددهم أكثر بكثير ، و لا يتم فتح تحقيق أو تحديد مسئوليات في وقوعها ، بل إن رصاصات الحقد الإسرائيلي طالت مدنيين من سكان سيناء
4 - لا أعرف ، هل نسينا أن دماء (يوسف أبو زهري) لم تجف بعد أن قتله زبانية الداخلية المصرية بسياط التعذيب الوحشي داخل السجون المصرية و بدون توجيه أي تهمة له ؟؟

wahat_alshohada said...

قرأت ان فيه مجموعة فى مصر قامت برفع قضية ضد جدار غزة وتطالب بوقفة و تفكيك ما تم منه هل يعرف احد اى معلومات حتى ننضم لهم؟

dr.lecter said...

داون داون حسني مبارك

حرر مصر من اللي سارقينها؟

انتم متاكدين ان دي احتجاج علي الجدار ولا حركه كفايه؟

ياحلاوتكم كويس انهم متصرفوش معاكم تصرف ومش ولا بد

انا معرفتش اجي للاسف بس كنت قايل لناس كتيره علي المعاد وقالوا هنروح ان شالله

اهم حاجه اننا راضيين عن اللي عملناه

مهندس مصري بيحب مصر said...

شوفي تصريحات المهندس المصري ده اللي شغال في الجدار
http://www.almokhtsar.com/cms.php?action=show&id=4444
أكد أحد كبار المهندسين المصريين الذين يعملون في بناء "الجدار الفولاذي" الذي تقيمه السلطات المصرية على الحدود مع قطاع غزة أن هناك إشرافًا أمريكيًّا كاملاً من قبل مهندسين، قيل إنهم يعملون في الجيش الأمريكي، على بناء الجدار، وأن بناء الجدار استغرق وقتًا طويلاً في الإعداد له قبل ما يزيد عن ستة أشهر، وأن عملية البناء الفعلي بدأت منذ 3 أشهر وسط حراسة أمنية مشددة.
وقال المهندس -الذي رفض الإفصاح عن اسمه، في تصريح خاص لـ"المركز الفلسطيني للإعلام" اليوم الثلاثاء-: "إنه في البداية عقد اجتماعًا مع عدد من الشخصيات الأمنية والهندسية في الحكومة، بالإضافة إلى عدد من المهندسين الأمريكيين الذين كانوا يكشفون عن عمليات حفر الأنفاق منذ العام الماضي، وقالوا لنا إن التربة على الحدود المصرية بدأت تتأثر من تزايد عدد الأنفاق؛ لذلك علينا البدء في بناء جدار يحد من عمل الأنفاق وذلك عبر حوائط فولاذية في باطن الأرض.
وأكد المهندس أنه حتى الآن تمَّ بناء ما يقرب من خمسة كيلو مترات على طول الحدود على محور صلاح الدين، وأن طول المحور 10 كلم ، وتمَّ غرس الحوائط الحديدية في الأرض فيما يقرب من نصف المحور.
وأشار إلى أن الجدار يغرس على عمق (20-30)، ويتكون من صفائح حديدية صلبه طول الواحدة منها 18م وسمكها 50 سم مزود بمجسات تنبه إلى محاولات خرقه.
وحول وضع مواسير لمياه البحر في باطن الأرض قال: "هذا الأمر حقيقي، فهناك ماسورة رئيسية ضخمة تمتد من البحر غربًا بطول 10 كلم باتجاه الشرق، يتفرع منها مواسير في باطن الأرض مثقبة باتجاه الجانب الفلسطيني يفصل بين الماسورة والأخرى 30 أو 40 مترًا؛ حيث تضخ المياه في الماسورة الرئيسية من البحر مباشرة ومن ثم إلى المواسير الفرعية في باطن الأرض، وكون المواسير مثقبة باتجاه الجانب الفلسطيني؛ فإن المطلوب من هذه المواسير الفرعية إحداث تصدعات وانهيارات تؤثر في عمل الأنفاق على طول الحدود".
وأوضح أن ضخ المياه فترة طويلة من شأنه التسبب في مشكلات متفاقمة، قد تؤثر في مناطق واسعة في مدينة رفح وعلى قواعد وأساسات البناء خاصة في المنطقة المحاذية للحدود.
وأشار إلى خطورة تسرب مياه البحر في باطن الأرض، موضحًا أن المياه المالحة لها تأثير بالغ على التربة وأساسات المنشآت، وقال إن ماء البحر لو حدث أن ترسبت في باطن الأرض سيؤدي إلى انهيار التربة في مناطق واسعة بمحاذاة الحدود؛ نظرًا لأن مئات الأنفاق حفرت في تلك المنطقة، مشيرًا إلى أن التربة المصرية لن تتأثر بسبب حمايتها بالجدار المغروس في باطن الأرض.
وأكد المهنس أن غالبية العاملين في مشروع الجدار على قناعة بأنهم يقومون بعمل وطني لحماية الأراضي المصرية لأن الأنفاق التي تستخدم لنقل البضائع وتصديرها إلى غزة تستخدم أيضا في تسريب خليات "إرهابية" من غزة إلى مصر.
وأكد أن عمليات الحفر والبناء مستمرة في الجدار ولم تتوقف في أي وقت، وإنها مستمرة حتى الآن ولا تلتفت لما يدور في وسائل الإعلام، وإن البناء هو قرار سيادي وسياسي لا نقاش فيه.
المصدر: المركز الفلسطيني للإعلام