الشرطة ابتدت تظبط الصحفيين

اهو صحفي اهو... مش سواق ميكروباص ولا توك توك ولا واحد غلبان، واحد صحفي.. ها؟

طب ايه؟ لو الشرطة قتلتني حتتحركوا طيب؟

طب يا رب تقتلني.. يا رب تقتلني، يا اما تتحركوا يا اما انا اكون ارتاحت

انتوا شفتوا الحلقة دي بتاعة دعاء سلطان؟

بلاش.. طب عرفتوا ان عمر سليمان رجل اسرائيل الاول في مصر، السفاح، قتال القتلا، اللي كان بيعذب بايده المعتقلين، اللي خلا واحد ليبي يقتل نفسه لما عرف ان عمر سليمان راجع يكمل عليه وصلة التعذيب حيرشح نفسه، واعلن ترشحه من جامع؟ فيه صحفية على التويتر اسمها دنيا قالت: هو عمر سليمان كان بيصلي لإله التعذيب في الجامع؟

ده كان بيضخ غاز مسمم في الانفاق.. غاز مسمم يموت بيه الناس كأنهم دبان بيرش عليهم فليت.. ده مش بس مطلوق، ده عايز يرشح نفسه رئيس وكمان فيه ناس متبنية حملته، الجاسوس اللي سنة 2007 في وثائق ويكيليكس كان بيتفق مع الامريكان والاسرائيليين على ضرب غزة في 2009 ويقولهم مصر مش حتطلب وقف اطلاق النار الا لما تخلصوا على كل سلاح حماس واحنا عندنا عملاء جوة نقدر نوافيكم بالتقارير.. عمر سليمان.. عمر سليمان، بتاع، باط هوين، هو انا باهاتي لوحدي ليه في موضوع عمر سليمان ده؟ وكل ما اسأل عليه ماحدش يرد عليا.. فيه ايه؟

طب كنيسة القديسين مش بيتحقق فيها ليه بقى مدام جبنا سيرة عمر سليمان

طب حماس مش بتقدم بلاغات ليه في عمر سليمان ده قاتل لها اخو قيادي بارز اللي هو يوسف ابو زهري

هو عمر سليمان ده شايل في بدلته حجاب المحبة والقبول ولا بيقرا سورة يس سبع مرات كل يوم ولا ايه؟ ماله محجب كده وماحدش بيعفقه ليه واخدته الجلالة وعايز يترشح؟

طب بلاش.. شفتوا فريد الديب بيقول ايه؟

طب انا احب احمل القوى السياسية مسئولية كل اللي بيحصل من عودة الداخلية وعمر سليمان وبراءة مبارك وان شاء الله كلهم حياخدوا اعدام يوم ما مبارك يقول خطبة عيد العمال

عشان هم اللي قاعدين يتناقشوا في كلام في فارغ واسلامية ولا علمانية والدستور اولا ولا الانتخابات اولا.. ايه الهطل ده؟ كلكم حتموتوا

وانا حاكون مت من زمان.. بس قشطة، انا ما عنديش ادنى رغبة في الحياة

انا لا باكل ولا بانام ولو مصر دي مز باحبه وكارفني ما كانش حالي بقى عامل كده

وماحدش يقعد يشتم في الشعب ويقول بينضحك عليه ويقول عايز استقرار، بطلوا نصب وضحك على نفسكم، لو طرحتوا عليه قضايا اجماع وطني حيلتف حواليكم، لان المواطن اللي مش بيرضى ينزل في مظاهرة "الكفار اللي ضد المادة التانية" هو هو نفس المواطن القاطن بدير النحاس اللي مش بيرضى ينزل في مظاهرة الاخوان عشان "دول بيستغلونا" وحسبي الله ونعم الوكيل فيكم

ولا حادعي عليكم ليه؟ ما انت كده كده ميت ميت

والله الموفق