لأ.....كده مش حلو

ايييييه..... مش عارفة بقى اعمل ايه؟ بس انا مش مبسوطة

اولا: يبدو ان استراتيجية اطبطب وادلع اللي انا مصممة التزم بيها دي مش نافعة، بس لسه مش حينفع اتبع استراتيجية يا ناسي هواك وواخد معاك ليالي وسنين عمرنا، عشان الشعب بيزعل، انا لازم انافق الشعب لان الشعب غلبان ومش لاقي حد ينافقه، الناس كلها بتنافق السلطة، بتنافق راس المال، بتنافق امريكا، والاعلام ما بيتكلمش غير على تلات حاجات: الجيش خط احمر، هيبة الشرطة، عجلة الانتاج

طب بالنسبة للشعب؟ الناس اللي آنياكم دي مالهاش حاجة؟ تاخدوا مرتباتكم من فلوسه، وتعملوا من وراه ملايين، وتطلعوا تشتموه وتقولوا له انت حمار ومش بتعرف تنتخب، والجيش خط احمر، ولازم تساعد الشرطة، واقعد في البيت عشان عجلة الانتاج

وكما قال حسام الحملاوي: اظن يعني الشعب هو اللي خط احمر. 

بالنوسبة لهيبة الشرطة، ايه بقى هيبة الشرطة دي؟ يعني قولوا لي في اي بلد تانية الشرطة لها هيبة فين؟ بمعنى ترجموا لي التعبير ده بالانجليزي او الفرنصاوي عشان اتابع معاكم يعني... انهي بلد في الدنيا فيها حاجة اسمها هيبة الشرطة غيرنا؟ ونساعدهم ليه؟ انتوا ناسيين اننا عاملين الثورة يوم عيد الشرطة؟ ناسيين ان الثورة اساسا على الشرطة؟ وبعدين قعدنا نقول الجيش اخواتنا وولادنا ونبوس فيهم، وانا ابوس فيهم كرامة للشعب اللي بيحبهم، لكن ايه بقى الشرطة اخواتنا وولادنا اللي ظهرت فجأتن دي؟ انتوا حتجيبوا لنا كل واحد بيونيفورم وتقولوا لنا اخواتنا وولادنا؟ ومضيفات الطيران اخواتنا وولادنا، ودليفري ماك دونالدز اخواتنا وولادنا، ومدرسة ام المؤمنين الثانوية بنات اخواتنا وولادنا.. فيه ايه فيه ايه؟ مشيناها عائلي مع الجيش لحسابات معينة في دماغ الناس، وانا شخصيا ماشية ورا الناس ومش باحب اسبق عليهم ولا حتى امشي جنبهم، انا دلدولتهم، لكن احنا حنمشيها عوائلي كده عمال على بطال؟

انا خلاص.. مش قادرة على استراتيجية اطبطب وادلع دي

مش قادرة

ومش حاقدر ازعل الناس واقول لسه فاكر قلبي يديلك امان

فاحضطر اتبع استراتيجية: مافيش حاجة تيجي كده اهدا حبيبي كده وارجع زي زمان، يابني اسمعني حتدلعني تاخد عيني كمان

حد الله ما بيني وبينك غير حب الوطن يا حكومة

وزي ما كلنا عارفين: اعلم يا هذا الجيل ان الوطن بشره

اللي يدلع الشعب احبه اللي يزعل الشعب اكرهه... وانا شايفة ان فيه اتجاه كده عشان الشعب يتقرطس، ثم ابتدوا يزعلوه

اربعة يموتوا في اسبوعين على ايد الشرطة، وخطاب الداخلية لتبرير الحوادث دي شبه الخطاب اللي تم الترويج له ايام استشهاد خالد سعيد: ضربني بوشه على ايدي يا سعادة البيه

وهجم عليا... قلت له ما بلاش يا ام بدوي.. وهو ابدا، قعد يشتم ويتف.. لفعته على كتفي وحاولت اكرعه يمكن تكون غازات، راح تافف في وشي، ركبته المرجيحة راح مرجع، قعدته قدام سبيس تون راح حاطط صباعه في كوبس التلفزيون... رحت قاتله بقى اعمل ايه طيب؟ 

طب دول سهل يعني، بيتاكلوا علقة ويطلعوا يجروا، مش اول مرة، اكلوا علقة في القرصاية وطلعوا يجروا، اكلوا علقة في المحلة وطلعوا يجروا، اكلوا علقة في الثورة وطلعوا يجروا، عاتشي.. ناكلهم علقة لو بقوا مدمنين علق

المشكل مش فيهم.. المشكلة في اللي واقف شبكة ما بينا وما بينهم وبيخبيهم ورا ضهره وهو عارف اننا مالناش رغبة اننا نخبط فيه

طب ليه كده يا حاج طاه

اسمع يا حاج... احنا ناس طيبين وكويسين وحلوين وسلميين بجد، وشعب امير فعلا، ونكنس ونمسح ونطبخ ونغير للعيال ونشتغل ونصرف على البيت، فول اوبشن يعني، ونطنش كمان على حاجات كتير.. بس ايه؟

هو حناني عليك قساك حتى عليا؟ ولا رضايا كمان خلاك تلعب بيا؟ ولا تسامح روحي معاك غرك فيا؟ 

أنا يا حبيبي صحيح باتسامح الا.. الا في تلات حاجات مالهمش رابع: الشرطة، ومبارك، واسرائيل... واما يفيض بي ما باعرف اصالح واعرف اجي كتير على قلبي

وغدرك بيا، اثر فيا، واتغيرت شوية شوية، اتغيرت وموش بايديا

واخد بالك؟ 

يا عم لم تعابينك ورجب  حوش صاحبك عني

وايه حكاية مخطط تقسيم مصر بيعتمد على "الوقيعة بين الجيش والشعب.. الوقيعة بين الشرطة والشعب"؟ ها؟ وايه كمان؟ والوقيعة ما بين مبارك والشعب، والوقيعة ما بين اسرائيل والشعب، والوقيعة ما بين ابليس والشعب... ايه ايه ايه؟ ايه ام الهلع اللي انتوا معتمدين عليه من ساعة ما شرفتونا وآنستونا ده؟ مرة هلع البلطجية، ومرة هلع السلفية، ودلوقت هلع تقسيم مصر

ومصر حتتقسم لما يحصل وقيعة بين الشرطة والشعب؟ ده على اساس اننا كنا سمن على عسل قبل كده؟ 

ما يلزموناش يا حاج.. إن جيت للحق، احنا في تمنتاشر يوم ما كانش حد لازمنا خالص، كنا بنعمل كل حاجة لوحدنا، وكانت سهلة، ومريحة وبسيطة، وبصراحة بقى اي حد بيركب على قمة الهرم بيشكل عبء علينا، وبنشيل همه، ونفضل لافحينه على كتفنا، وما بينوبناش غير نصرف له مرتبات ويقرفنا في عيشتنا ونقعد نحط له خطط ازاي نتعامل معاه من غير ما يتسبب لنا في خسائر

بس خلاص، اذا كنا حندي اعانة بطالة.. شغال، احنا اهل كرم، لكن مش حندي اعانة بطالة لناس تقعد تضربنا وتموتنا.. كده انت بتدينا على قفانا يا حاج

الداخلية دي يتم دمجها في وزارة العدل، والعيسوي يقال، وماليش فيه، مش عارف يسيطر، مش عايز يسيطر، ما ليش فيه، يقال، وكل واحد في الداخلية يتفضل يقعد في بيتهم وياخد مرتبه الاساسي معزز مكرم بعد ما يسلم السلاح ويونيفورم، وعندنا 9 مليون عاطل مستعدين يحموا البلد بأجر رمزي، ما فيه فلوس كتير، ما الداخلية بتاخد تلت ميزانية الدولة، تلتها ليه وهي وزارة غير منتجة، يعني اللي بتاخدها فاقد، غفل عن ذكر الله ومال حرام بقى ما خرجتش منه زكاة ولا صدقة، فلوس وبتترمي في الزبالة

ويتم انتداب لجنة قضائية، ولجنة حقوقية لدراسة ملفات الداخلية، اللي محتاج يخش السجن يخش، واللي حيخش مصحة نفسية او عقلية يخش، واللي محتاج اعادة تأهيل، يتحط له برنامج تدريبي يتعلم فيه ازاي يسأل الناس عن الرخص من غير ما يموتوا في ايده

بالنوسبة للامن الوطني.. يتلغي.. يتلغي خالص

بلا مافيا بلا نيلة، مافيا ايه؟ يا ريت يبقوا مافيا.. عشان نعصرهم ينزلوا اطفال احداث، حيعملوا ايه يعني اكتر من اللي بيعملوه دلوقت؟ هم مافيا بقوة القانون، خليهم مافيا خارجين عن القانون، هو احنا ايه عشان يبقى بيراقبنا المخابرات، والمخابرات العسكرية، والامن القومي، وكمان الامن الوطني... ايه ايه ايه؟ احنا في سجن هنا؟ 

يا اما اللي باقوله ده هو اللي يحصل، يا اما يبقى مبارك بيحكم يا حاج... الشعب كان يريد اسقاط النظام

ضحكتوا علينا ووديتوا الراجل الاهطل في شرم الشيخ بياكل ويشرب بفلوسنا، والنظام هو هو، بنفس البنطلون بنفس الفالنة

لا يا عم.. ثورة اونطا.. هاتوا شهداءنا

كده احنا اتاكلنا على قفانا

وبطلوا الخطاب الاعلامي الحقير ده، ما وراكوش حاجة غير تقولوا لنا: كفاية كفاية كفاية.. كفاية ايه؟ هو اللي عملناه في الخلق حيطلع علينا ولا ايه؟ احنا اللي كنا بنقول كفاية.. ماحدش يقول لنا احنا كفاية

وما حدش يحط كلام على بق الناس ويقول الناس زهقت.. اللي زهق يروح، فيه ناس كتير غلابة وما حيلتهمش حاجة يخسروها، وما زهقوش

ثانيا:

بالنوسبة للقوى الوطنية... لكم حق تغنوا تقولوا: انا اللي استاهل كل اللي يجرا لي، الغالي بعته رخيص ولا احسبوش غالي

ايه حوار اسلامية وعلمانية دي؟ 

دي خيانة عظمى

خيانة عظمى... اللي يتكلم الكلام ده ويسيب البلد بتضيع من ايدنا وثورة بتتقتل يبقى خاين

اسلامية ايه وعلمانية ايه هو النظام سقط اصلا؟ 

جورج اسحاق كان قال مرة: القوى الوطنية ماشية ورا الشعب. وكذلك قال خالد يوسف

انا اسفة.. انتوا حنثتوا بوعدكم، وابتديتوا تدوروا على مكاسبكم، وابتديتوا تقولوا كلام فارغ، دستور اولا ايه وتأجيل انتخابات ايه واسلامية ايه وعلمانية ايه ده انتوا حتتشمطوا كلكم واحد واحد بنظام

فوقوا

فوقوا

انتوا بتهلوسوا

اللي عامل صفقة يرجع فيها.. اوعى تقرب اوعى تفوت اوعى تيجي احسن حتموت... مش اربعة وخمسين قفا على سهوة هو، بلاش كده

اللي عمال يتكلم في كلام فارغ يغير الموضوع... طظ في الدستور خالص.. حنلغيه احنا الدستور ده، مش عايزين دستور من اساسه، ما كنا 18 يوم عايشين من غير دستور ومن غير قانون ومن غير دولة وكنا ميت فل وسبعتاشر

القوى  الوطنية لازم تتصالح فورا، لازم نرجع ايد واحدة فورا، مافيش ام صفقات حتنجح، والمصالحة بينكم غير مشروطة والا تبقوا خونة كلكم

ولو ربنا سترها معانا - واحنا دلوقت ما لناش امل غير ان ربنا يسترها معانا من عنده - انا اول واحدة حاعمل حملة عليكم كلكم عشان تتحاكموا بتهمة الخيانة العظمى مع مبارك

كان لازم واحنا بنسقط مبارك نسقط القوى الوطنية كلها اللي ترعرعت في زمنه لان كلهم شبهه وحسبي الله ونعم الوكيل فيهم واحد واحد من اقصى اليمين الى اقصى اليسار كلكم عبء علينا زي ما بقية التنظيمات الهرمية عبء علينا ده انتوا بلوة واترزينا بيها

نحن نؤتى من قبلكم

انتوا الطعنة في ضهر الثورة، مش اي حد تاني، لإن مافيش اي توقعات من اي حد تاني غيركم، وبصراحة انتوا مالكوش لازمة في حياتنا.. ناس كتير مالهمش اي لازمة في حياتنا

كل الناس اللي كنا عايشين من غيرهم طول التمنتاشر يوم ما لهمش لازمة في حياتنا، جبناكم وحطينا شوية منكم فوق روسنا، وشوية منكم في الصدارة، عشان ورانا شغل احنا مش صيع.. واخرتها ايه؟ لو كان الـ... بينفع كان نفع نفسه

ولو كنتوا بتنفعوا كلكوا كنتوا نفعتونا قبلها، دلوقت كل واحد فيكم عمال يقول انا اللي عملت الثورة، لولا مجهوداتي ما كانتش الثورة قامت... طااااب يا سيدي انت وهو وهو وهو، سوا لابس بدلة مدني ولا بدلة ميري

ادي الثورة قامت

هاه؟ 

هاه؟ 

هاه؟ 

نعم؟ ايوة؟ انتوا بتسمعونا سكاتكم؟ 

من الاخر كده عشان ننجز

بالنسبة للجيش: اضرب صاحبك لو هم كتير

بالنسبة للقوى الوطنية: الصلح خير قوم نتصالح

بالنسبة للجمعة الجاية، حتتلغي... ليه؟ عشان القوى الوطنية كلها مش عايزة تتبنى الجمعة الجاية اللي ضد الداخلية، اه وربنا، وفيه منهم كمان ناس بتقول: مش عايزين ندافع عن البلطجية.. اه وربنا

انا مش فاهمة الداخلية محتقراني ليه؟ ما يموتوني يعني.. حادثة كده زي الحادثة بتاعة الجدع اللي من ستة ابريل والبنت بتاعة قناة خمسة وعشرين، اللي راخرة كلها مصادفات

افففففففففففففف استغفر الله العظيم

انا مستنية اهو.. مستنية، حتى تميم وعدني اني لما اموت حيكتب عني قصيدة.. يالا توكلوا على الله