طرحتي اهي.. جاهزة البسها لرجالة مصر لو الشرطة رجعت تشتغل بالطريقة دي تاني

واللجمة الالكترونية في الداخلية رجعت تشتغل بكامل طاقتها، بس بطلوا يحطوا صور مزز على الاكاونتات عشان عرفوا اننا فقسناهم بالحركة دي، فبقوا يحطوا صور غريبة عجيبة مريبة لاشخاص شكلهم حد عضهم من قفاهم

اللي حصل لسواق الميكروباص المقتول لو عدى يبقى قولوا على نفسكم يا رحمن يا رحيم... واحد واحد، ده تاني قتيل تقتله الشرطة بالتعذيب في خلال يومين، وقبلها بعشر ايام الجدع بتاع العمرانية اللي ظابط الشرطة ضربه بالنار ومكلبشه في السرير دلوقت حاليا

انا مش حاعتمد على شهادات الناس ولا اقوال ابن عم المجني عليه اللي قال ان جسم ابن عمه مليان حروق

انا حاعتمد على اقوال المأمور، اسمع يا سيدي

الدروس المستفادة مما سبق هو الآتي:


1- مأمور القسم بينظم المرور في الشارع الساعة تسعة الصبح، وده قبل ما يروح الشغل كنوع من انواع تحسين الدخل، واهو ياما الناس بتشقى
2- مأمور القسم اثناء ما بيشتغل ظابط مرور لما حد بيعمل مخالفة وبيقول له: انا اسف.. بيطنش عليه
3- مأمور القسم اللي بيشتغل ظابط مرور في غير اوقات العمل الرسمية بيطلب الرخص من السواق ولما السواق بيقول له مش حاديلك الرخص الناس اللي رايحة اشغالها بتتلم
4- اللي اتلموا دول عرفوا ان اللي واقف ده مأمور، وذلك عن طريق الآني:
أ- الناس اتلمت وقالت له: حضرتك بتشتغل ايه قبل ما نتخانق بس عشان نبقى عارفين؟ فقالهم انا مأمور
ب- المأمور وقف يلف حوالين نفسه وهو يصرخ: أنا المأموووور... أنا المأمووووور.. زي الراجل بتاع انا عتريس انا بلوة سودا
ج- المارة عندهم الحادثة السادسة..
5- اكتر من 200 أو 300 مواطن عايزين يشوفوا رخصة سواق الميكروباص وعملوا له مليونية احنا اسفين يا رخصة
6- السواق لما شاف 200 او 300 مواطن اتلموا عليه جات له لوثة وقعد يشتمهم كلهم لإنه عنده رغبة دفينة في الانتحار
7- مأمور القسم اللي بيشتغل ظابط مرور جاله في ودنه وقاله انزل بكرامتك بدل ما الناس اللي واقفة يبهدلوك فراح شاتمه تاني وشتم الناس لإنه عايز يتبهدل
8- اكتر من 200 او 300 مواطن نزلوا سواق الميكروباص بالقوة من االميكروباص بينما كان المأمور كان "واقف على يمين دراعه" وشاف الناس بتنزله بالقوة وما اتدخلش، ولا حتى تفرم وسطهم وهم بينزلوه بالقوة
9- السواق السوبر مان اللي فيه حوالي 200 او 300 مواطن قابضين عليه، عمل زي ادهم صبري وحرك اطرافه الاربعة وراح بضهر ايده وعلى وش المأمور
10- جمع رهيب - غير ال200 او 300 مواطن اللي واقفين - جريوا ناحيتهم لانهم شافوه في وسط الزحمة دي وهو بياكله على وشه بضهر ايده... مع انه بقاله تلات سنين وكل الناس عارفاه في الدايرة!
11- لما الظابط انضرب رجع لورا عشان يسيب الناس تضربه، وبعدين قالهم كفاية
12- البني ادم لما يبقى مصاب بيروح القسم الاول يتفيش وبعدين يودوه المستشفى القبطي
13- المستشفى القبطي قالت انه زي الفل وان عنده بعض السحجات والكدمات وكمان عملوا له اسعافات
14- مسئول العلاقات العامة في منظمة حقوق الانسان بيمر بالصدفة على القسم
15- فيه حاجة اسمها "منظمة حقوق الانسان"
16- ما عجبوش الوضع وانبسط ان الجماهير ضربته وادلى بشهادته ان الجماهير عملت معاه الصح
17 - البني ادم لما ما بيطلعش الرخص لمأمور القسم، بيروح القسم، وبعدين يروح المستشفى القبطي، وبعدين يرجع القسم يعملوا له محضر.. واخيرا، بيودوه النيابة العسكرية... قسم رخص
18- المجني عليه بعد ما لف كعب داير وعملوا له الاسعافات اللازمة واتأكدوا ان صحته زي البمب جات له حالة اعياء مفاجئة بلا اي مبرر غير انه كان راجل غلس، وامه عارفة انها مخلفة عيل غلس
19- ثم توفى "الى رحمة الله تعالى"
تعالى انت.. ايه اللي وفاه؟
20- المحضر اتحول للنيابة العامة... امال ايه كان دور النيابة العسكرية في القصة؟
21- التشريح المبدئي قال ان فيه سحجات ومحتاجات لا تؤدي الى الوفاة، ولسه منتظرين تقرير الطب الشرعي عشان نثبت انه بالع لفافة غلاسة، وبيحب يموت عشان يئذي غيره
22- اهل القتيل اقتنعوا الحمد لله ان ابنهم يستاهل يموت... لكنهم للاسف لما راحوا التحرير سخنوهم وفهموهم - بالخطأ - ان ابنهم ما يستاهلش يموت
23- الحمد لله كل شئ تحت السيطرة


---------------------
ما يبقاش فيكي راجل يا بلد لو الشرطة دي رجعت تشتغل تاني