Saturday 4 June 2011

طرحتي اهي.. جاهزة البسها لرجالة مصر لو الشرطة رجعت تشتغل بالطريقة دي تاني

واللجمة الالكترونية في الداخلية رجعت تشتغل بكامل طاقتها، بس بطلوا يحطوا صور مزز على الاكاونتات عشان عرفوا اننا فقسناهم بالحركة دي، فبقوا يحطوا صور غريبة عجيبة مريبة لاشخاص شكلهم حد عضهم من قفاهم
اللي حصل لسواق الميكروباص المقتول لو عدى يبقى قولوا على نفسكم يا رحمن يا رحيم... واحد واحد، ده تاني قتيل تقتله الشرطة بالتعذيب في خلال يومين، وقبلها بعشر ايام الجدع بتاع العمرانية اللي ظابط الشرطة ضربه بالنار ومكلبشه في السرير دلوقت حاليا
انا مش حاعتمد على شهادات الناس ولا اقوال ابن عم المجني عليه اللي قال ان جسم ابن عمه مليان حروق
انا حاعتمد على اقوال المأمور، اسمع يا سيدي



الدروس المستفادة مما سبق هو الآتي:


1- مأمور القسم بينظم المرور في الشارع الساعة تسعة الصبح، وده قبل ما يروح الشغل كنوع من انواع تحسين الدخل، واهو ياما الناس بتشقى
2- مأمور القسم اثناء ما بيشتغل ظابط مرور لما حد بيعمل مخالفة وبيقول له: انا اسف.. بيطنش عليه
3- مأمور القسم اللي بيشتغل ظابط مرور في غير اوقات العمل الرسمية بيطلب الرخص من السواق ولما السواق بيقول له مش حاديلك الرخص الناس اللي رايحة اشغالها بتتلم
4- اللي اتلموا دول عرفوا ان اللي واقف ده مأمور، وذلك عن طريق الآني:
أ- الناس اتلمت وقالت له: حضرتك بتشتغل ايه قبل ما نتخانق بس عشان نبقى عارفين؟ فقالهم انا مأمور
ب- المأمور وقف يلف حوالين نفسه وهو يصرخ: أنا المأموووور... أنا المأمووووور.. زي الراجل بتاع انا عتريس انا بلوة سودا
ج- المارة عندهم الحادثة السادسة..
5- اكتر من 200 أو 300 مواطن عايزين يشوفوا رخصة سواق الميكروباص وعملوا له مليونية احنا اسفين يا رخصة
6- السواق لما شاف 200 او 300 مواطن اتلموا عليه جات له لوثة وقعد يشتمهم كلهم لإنه عنده رغبة دفينة في الانتحار
7- مأمور القسم اللي بيشتغل ظابط مرور جاله في ودنه وقاله انزل بكرامتك بدل ما الناس اللي واقفة يبهدلوك فراح شاتمه تاني وشتم الناس لإنه عايز يتبهدل
8- اكتر من 200 او 300 مواطن نزلوا سواق الميكروباص بالقوة من االميكروباص بينما كان المأمور كان "واقف على يمين دراعه" وشاف الناس بتنزله بالقوة وما اتدخلش، ولا حتى تفرم وسطهم وهم بينزلوه بالقوة
9- السواق السوبر مان اللي فيه حوالي 200 او 300 مواطن قابضين عليه، عمل زي ادهم صبري وحرك اطرافه الاربعة وراح بضهر ايده وعلى وش المأمور
10- جمع رهيب - غير ال200 او 300 مواطن اللي واقفين - جريوا ناحيتهم لانهم شافوه في وسط الزحمة دي وهو بياكله على وشه بضهر ايده... مع انه بقاله تلات سنين وكل الناس عارفاه في الدايرة!
11- لما الظابط انضرب رجع لورا عشان يسيب الناس تضربه، وبعدين قالهم كفاية
12- البني ادم لما يبقى مصاب بيروح القسم الاول يتفيش وبعدين يودوه المستشفى القبطي
13- المستشفى القبطي قالت انه زي الفل وان عنده بعض السحجات والكدمات وكمان عملوا له اسعافات
14- مسئول العلاقات العامة في منظمة حقوق الانسان بيمر بالصدفة على القسم
15- فيه حاجة اسمها "منظمة حقوق الانسان"
16- ما عجبوش الوضع وانبسط ان الجماهير ضربته وادلى بشهادته ان الجماهير عملت معاه الصح
17 - البني ادم لما ما بيطلعش الرخص لمأمور القسم، بيروح القسم، وبعدين يروح المستشفى القبطي، وبعدين يرجع القسم يعملوا له محضر.. واخيرا، بيودوه النيابة العسكرية... قسم رخص
18- المجني عليه بعد ما لف كعب داير وعملوا له الاسعافات اللازمة واتأكدوا ان صحته زي البمب جات له حالة اعياء مفاجئة بلا اي مبرر غير انه كان راجل غلس، وامه عارفة انها مخلفة عيل غلس
19- ثم توفى "الى رحمة الله تعالى"
تعالى انت.. ايه اللي وفاه؟
20- المحضر اتحول للنيابة العامة... امال ايه كان دور النيابة العسكرية في القصة؟
21- التشريح المبدئي قال ان فيه سحجات ومحتاجات لا تؤدي الى الوفاة، ولسه منتظرين تقرير الطب الشرعي عشان نثبت انه بالع لفافة غلاسة، وبيحب يموت عشان يئذي غيره
22- اهل القتيل اقتنعوا الحمد لله ان ابنهم يستاهل يموت... لكنهم للاسف لما راحوا التحرير سخنوهم وفهموهم - بالخطأ - ان ابنهم ما يستاهلش يموت
23- الحمد لله كل شئ تحت السيطرة


---------------------
ما يبقاش فيكي راجل يا بلد لو الشرطة دي رجعت تشتغل تاني

84 comments:

The Pharaoh said...

حاجة تقرف, مش هترجعوا غير كده أقعدوا في بيتكم و قلتكم أحسن, و أم تقارير الطب الشرعي هتطلع طبعا بالع لفافة, ماهو للاسف العيب مطلعش في السباعي (اللي متحكمش عالتزوير مع إنهم شالوه عشان مزور) العيب طلع في ....

sabrafamily76 said...

غلبت اعلم فيك والطبع فيك غالب وديل الكلب عمره ماينعدل ولو علقوا فيه قالب .هو احنا من المريخ يا .... دا لو كان قالك مش طالع كنت طلعت مسدسك وطخيتو

mohamed said...

film mn elfd2 el5argy w tab3n ahm elabtal m2mor elqasm l3eb z7i7 sabkha w rasmha bs elsh3b el3'aby msd2sh 5als w eldars elgdid qarb msh 7ytaol elmara di m3dna youm 6/6/2011

nour1971 said...

كالعاده حا اقول لك انا مبقتشي فاهمه حاجه و متغاظه جدااااااااااااااا اولا التليفزيون المصري الوسخ و يوري علي الكلمه بس هو ميتوصفشي غير كده قال ان فيه مذيعه نزلت التحرير النهارده و شباب الثوره اتحرشوا بيها و مسكوها من مناطق حساسه تخيلي الكلام ده في التليفزيون المصري نشره الساعه ٢٤ اللي هي بتاعه الساعه١٢ بالليل و قالوا انهم قطعولها هدومهم و بعدين حكايه الشرطه دي هو فيه اييييييييييييييه علشان انا حاسه ان الثوره بتتسرق شويه بشويه و التانين اللي ل ما حد يؤلهم كلمه صغيره يتأمصوا زي الاطفال و يزعلوا و مش عايزين حد يتكلم عليهم خالص مالص بالص علشان هما كبار و فاهمين مصلحت البلد و الاستاذ شرف انا عايزه اعرف هو بيهبب ايه في ايطاليا رايح يحضر احتفاليه ايه هو ده وقته بالزمه مش يشوف المصايب اللي متنيله في البلد الاول هو مش احنا لازم نظبتنا من جوه و بعدين نبقي نروح نحضر حفلات ولا ايه حسبي الله و نعم الوكيل فيهم كلهم ايه الارف ده

nour1971 said...

نسيت اقول حاجه ان الناس الهبله بسسسسسسس الهبلللللللله بس هي اللي حا تصدق المزمور اللي بيتكلم البله و العبيطه بسسسسسسس همي فاكرين الشعب ايه بالظبط اهبل ولا عبيط

nosseir said...

الحل الجذرى لموضوع اقسام الشرطة هو وضعها تحت رقابة قضائية ...رقابة من النيابة العامة...اى حاجة زى كدة ...عشان وكتاب الله الناس دة مش هتتغير غير بالطريقة دة...وفى حل تانى بس شايفة صعب جدا...هو حل جهاز الشرطة وتكوينة من عناصر جديدة تماما...بس طبعا دة حل غبى ولة تبعات تانية كتير...زى مثلا هتجيب ميزانية منين تدى عناصر جهاز الشرطة الجديدة رواتبهم...وعناصر الشرطة القديمة هتتركهم بدون رواتب وبالتالى يتحولوا لبلطجية ولا هتديهم معاش وبالتالى يبقوا عالة على المجتمع... وكمان العناصر الجديدة هتأخد وقت كبير عقبال ما تفهم طبيعة المكان اللى بتشتغل فية ....قصة معقدة بنت وسخة....عشان كدة انا شايف الحل هو وضع جهاز الشرطة الحالى وعناصرة كلها تحت رقابة قضائية وبالذااااات الاقسام..لان المسخرة كلها بتحصل فى الاقسام

Lilian said...

نواره الكلام اللى فى الفيديو بتاع الجزيره مباشر عكس الكلام اللى قاله نفس المأمور فى برنامج مصر فى اسبوع امبارح بالليل ممكن تشوفى الفيديو بتاع البرنامج, هو فيه ايه بالظبط البلد رايحه فين فيه ريحه مش حلوه

abdul hamid said...

حرام عليكى ياأستاذه
هى مش مخالفه وخلاص - انتى عارفه واحنا عارفين ان سواقين المشروع والتاكسى هم اوسخ فئات المجتمع وبلطجيه ويستاهلوا كل معامله سيئه - لو حد اتعرضلك فيهم حتغيرى رأيك 180 درجه - أنا مصدق الضابط - وأرجوكى ساعدى الشرطه مش تكونى ضدهم وخلاص - ولا هو خالف تعرف - راعى نفسك وربك تلاقى انك غلطانه- غلطانه-غلطانه وممكن بعد دى مش حقرالك تانى اذا كان يهمك

abdul hamid said...

وعلى فكره لو طلع التقرير وقال انه كان متعاطى مخدرات - لازم نصدق لأن كلهم بيتعاطوا لو سمحتى ساندى الشرطه وبلاش افتراءومتقعديش تولعيها على الفاضى - انتى افورتـى فى دى شويه - اعترفى عشان أحبك

abdul hamid said...

عيب يانونا انا زعلان منك وعليكى أوى - ومش قادر اسكت

sum_1_ said...

صباح الخير و بركة انك رجعتي تكتبي تاني
100000000000000 like for ur article
ابقي احسبي حسابي في طرحة بمبي لو كمان واحد اتقتل( لو مافيش بمبي أي لون من عندك بقى)

Mohamed Azmy Kewan said...

و ربنا نستحق نلبسها يا نواره ..

بساطه said...

انا اعرف 3 محترمين ومتربيين دخلوا يوما ما كلية الشرطه ..
2منهم استقالو وواحد طلب نقله على اداره ما مش فاكرها يمكن البريد .. بصراحه الي افهموا ان ولاد الناس بيستقيلوا او مابيستحملوش يتفرجوا عالبلاوي دي وبيروحوا اماكن اداريه مثلا .. اه صديق اخر ابن ناس ومتربي معايا لم يستقيل وفضل في مكانه عادي اقسم بالله العظيم اني قابلته بعد الثوره لاقيت معالم مخه منتهيه اجيله يمين اجيله شمال الواد غبي

ههههه والله العظيم قالي انا عرفت ليه اليهود بيقتلوا اطفال الحجاره لانه اتصاب بطوبه في مظاهره باين وقالك كان عايز يقتل الي عمل كده ويومها روحت محبط واتأكدت فوق تأكدي ان مفييييييش فايده في الشرطه الحاليه ومخي فضل يلف

ووصلت في الاااااااخر ان احنا نجيب خبراء اجانب تدير المناصب الكبيره في الشرطه وتتولي الناس الطازه وتعلمهم ونرفد الكبار كلهم



ده كلام مش هينفع يتنفذ وعبيط لكن الحل ايه انا مش عاااارف؟؟

الموضوع بتاع ان احنا نقعد الجهاز ده في البيت هيتحاااارب يانواره وهنخش حرب مع الشعب قبل الحكومه الطريقه الي قلتي بيها الموضوع مش منطقيه لازم يكون في خطه اوضح



اه نسيت اقولك حاجه مهمه
ان صحبي الي مخه باظ عمره لا يتعدى الثلاثين

صالح إسماعيل said...

القتيل لازم يتحاسب...لان الوفاة من غير سبب قلة أدب....شوية سحجات....ما صدق راح مات....ايه السواقين الخرعين دول

المحروسة said...

الشرطه فخدمتك
لو يعني حد خانقك
والا مديرك مضايقك
اطلبنا حضرتك

...مراتك آكله ودنك
وبتخرج غصب عنك
كلمنا نظبطك

عاوز حرية قول
أو طهقان مالفلول
غايتنا مساعدتك

لو واقف في المرور
وزهقان مالطابور
طنش رخصتك

نفسك ترتاح يا مصري
اطلبنا نيجي دوغري
واجبنا نموتك

وزياده في المعزه
رخص الدفن جاهزة
اتفضل رخصتك

صالح إسماعيل said...

القتيل لازم يتعاقب....ده الموت من غير سبب قلة أدب...
شوية حجات ويمثل فيها....وبعدين يقولوا مات.....
طيب نعمل ايه بقى مع الناس دى...واهله مشيوا واقتنعوا ...بس جه شباب من الثورة...وهيجوا الدنيا....من أنتم....من أنتم.....فاتكم القطار....فاتكم القطار...خدوا ميكروباص

المحروسة said...

تقرير الطب الشرعي أثبت أن السائق مات باسفكسيا الخنق جراء ابتلاعه رخصة القياده

والسباعي يقول ان سبب الوفاة ليس انحشار الرخصه في الترقوة بل كونها منتهية الصلاحية مما أدى إلى تسمم حاد أودى بحياة السائق

صالح إسماعيل said...

القتيل لازم يتعاقب....ده الموت من غير سبب قلة أدب...
شوية حجات ويمثل فيها....وبعدين يقولوا مات.....
طيب نعمل ايه بقى مع الناس دى...واهله مشيوا واقتنعوا ...بس جه شباب من الثورة...وهيجوا الدنيا....من أنتم....من أنتم.....فاتكم القطار....فاتكم القطار...خدوا ميكروباص

Anonymous said...

للأسف ناس كتير لابسة الطرحة من زمان وناس كتير لسة ح تلبس.والله أنك يا نوارة أحسن من مائة رجل

FAW said...

حضرتك إنسانة مريضة نفسيا

Abd Elhamed said...

والله العظيم شفته و انا رايح الشغل الكلام ده حصل امبارح الصبح الساعه 9 و الأنا شفته بظبط نزلت عند اول شارع الجلاء تحت الكبري و شفت المأمور كان بينزل السواق من العربيه و هو بيشده من القميص انا كنت مستعجل علشان كنت متأخر على الشغل مشيت و مشفتش ايه الحصل بعد كده علشان اركب اكتوبر لازم اعدي من قدام القسم و انا معدي لاقيت البوكس وصل و جواه السواق و هو شبه عاري كان من غير البنطلون و القميص متقطع و 2 امناء شرطه كانوا بيضربوه جوه البوكس بالشلاليت و البونيات و سحلوه على بطنه و نزلوه من البوكس شادينه من القميص و الضرب مستمر و سحلوه لحد ما دخلوه القسم و طبعا الشتايم شغاله رصاص و هما برده بيضربوه و ابتدوا يكهربوه و هو على باب القسم و الظباط الطلعوا بره القسم و هم بينزلوه قالوا للامناء بالكلمه بس يا ابني اضربوه جوه و المدرعه بتاعت الجيش كانت واقفه و ظابط الجيش بيسأل واحد منهم بيقولوا هو عمل ايه قاله ضرب المأمور والله العظيم ده الحصل قدام عين

Abd Elhamed said...

والله العظيم شفته و انا رايح الشغل الكلام ده حصل امبارح الصبح الساعه 9 و الأنا شفته بظبط نزلت عند اول شارع الجلاء تحت الكبري و شفت المأمور كان بينزل السواق من العربيه و هو بيشده من القميص انا كنت مستعجل علشان كنت متأخر على الشغل مشيت و مشفتش ايه الحصل بعد كده علشان اركب اكتوبر لازم اعدي من قدام القسم و انا معدي لاقيت البوكس وصل و جواه السواق و هو شبه عاري كان من غير البنطلون و القميص متقطع و 2 امناء شرطه كانوا بيضربوه جوه البوكس بالشلاليت و البونيات و سحلوه على بطنه و نزلوه من البوكس شادينه من القميص و الضرب مستمر و سحلوه لحد ما دخلوه القسم و طبعا الشتايم شغاله رصاص و هما برده بيضربوه و ابتدوا يكهربوه و هو على باب القسم و الظباط الطلعوا بره القسم و هم بينزلوه قالوا للامناء بالكلمه بس يا ابني اضربوه جوه و المدرعه بتاعت الجيش كانت واقفه و ظابط الجيش بيسأل واحد منهم بيقولوا هو عمل ايه قاله ضرب المأمور والله العظيم ده الحصل قدام عين

eman said...

هو لو طلع تقرير الطب الشرعى ان السواق مات قضاء وقدر هتصدقيه ولا انت ناويه من دلوقت ما تصدقهوش؟

eman said...

هو لو طلع تقرير الطب الشرعى ان السواق مات قضاء وقدر هتصدقيه ولا انت ناويه من دلوقت ما تصدقهوش؟

eman said...

انا مصدقه الضابط ولو فى حاجه غلط فهى حاجتين:1-ان لازم دوريات الشرطه كلها ت نزل معاها كاميرات تراقب عمل الضباط 2-السائق (واخده بالك سائق برضة)بتاع العمرانيه المفروضه يتعاقب هو والضابط والضابط يتعاقب اولا على طلب الرشوه وعلى اهانه مواطن وعلى استخدام السلاح بدون داع والسائق يتعاقب للاعتداءعلى الضابط وبس
اسألك حاجه بقى لو انت مكان الضابط هطبقى القانون ازاى ..يقوله روح على موقفك او هاسحب رخصك يحول السائق الموضوع لخناقه...مات ليه بقى ف ناس كتييييييييير بتموت من غير سبب امبارح واحد هنا ف الفيوم صاحى من نومه عادى وماشتكاش حتى من صداع وبيصبح على امه وقع من طوله مات ...بدون سبب وصغير ف السن

Mohamed Sabry said...

بلاش طرحتك انتى يا نواره عشان فيه رجاله كتير متستحقش تلبسها فى مصر

طلعوا بيه على مركز شرطه
كدمه وسحجه يااخى احه
الحقيقه و الكلام ان شرطتنا دى بنت حرام

gasser said...

الظاهر أن بعض ظباط الداخلية مش عاجبك انتقادك ليهم . وعايزين يقضوها في البلد بلطجة .
تخيلي أنهم صوروا البوست بتاعتك على تويتر وعايزين يقدموها كدليل ضدك في بلاغ سب وقذف !!! يتقال عليم ايه دول بقى ؟؟؟؟
عالم هبل :::))))
ربنا معاكي

mr said...

وفضل السواق يضرب المامور بالاقلام والناس تحاول تحوش عنه بس المامور قالهم سيبوه يضربنى سيبوه يضرب اضرب كمان اضرب عاوز افوق اضرب عاوز اتوب والمامور كان مستمتع اوى وبيقول اح

keno_2010 said...

حسبي الله ونعم الوكيل الناس دي ايه ربنا ينتقم منهم هم ومن يدافع عنهم ويجمعهم مع بعض في الاخرة اميين

mr said...

والسواق فضل يضرب المأمور بالاقلام والناس حاولت تحوش عن المامور المسكين لكن المامور قالهم لاء سيبوه يضربنى سيبوه يفوقنى اضربنى اضرب كمان عاوز افوق اضرب عاوز اتوب والمأمور كان مستمتع وبيقول اح

محمد على طيلون said...

لا حول ولا قوة الا بالله حقول ايه مفيش حاجة تتقال
انا بدأت احس ان دخول المجلس العسكرى فى الثورة دى مدبر
وان فى مصيبة حتحصل
وحنلبس العمة ونتقرطس
وترجع ريما لعادتها القديمة
بس مش حنسكت
وربنا محنسكت
ويا ويل الشرطة لو حصل تجاوزات تانى

متفائل said...

رواية الشرطة للواقعة فيها شيئين غير منطقيين (مش مليون زي مانتي كاتبه) هما
أولاً : لما تلتميت واحد يضربوا بني أدم لازم يكون فيه نزيف داخلي وكسور تؤدي إلى الوفاة مش كدمات وسحجات فقط
ثانياً : حكاية بتاع حقوق الإنسان اللي معدي بالصدفة ده
لهذا فأنت محقة في شكوكك هذه المرة .. فلتقومي إذن بواجبك الصحفي (هو إنتي مش صحفية ؟) .. أخطفي رجلك لغاية مكان الواقعة وأسألي الناس فمن المؤكد حتلاقي ناس كتير شهدوها خصوصاً أصحاب المحلات المجاورة والباعة الجائلين .. أكيد حيقلولك الحقيقة وحيقلولك مين اللي ضرب السواق ؟ الشرطة ولا الجماهير اللي إتجمعت

vlvo said...

طيب كلامك مقنع والحل
قبل ما تقولي الحل اريد ان اذكرك أنني اعتبر خريجي اكاديمية مبارك للامن طابور خامس مزروع في قلب الوطن ورم سرطاني خبيث طفل عاق مدلل اعتاد الا يري الا نفسه وان يعبد رؤساءه وان الحديث بشأن اي مشاعر انتماء لاي مقدسات ضرب من الهزل والسخرية لذلك فهم لن يهمه البلد ولا اهلها ويجب يجب يحب التعامل معهم بهذا الاعتبار انهم محتاجون لتأهيل نفسي وليس من المعقول ان نتركهم في اماكنهم لان مش معقول نعطيهعم مرتبات ببلاش انهم عبء رهيب علي الجيش والشعب معا وسيكونون سبب في احتلال مصر نعم بهذا الشكل لن يعود الجيش لثكناته يجب البحث عن بدائل للشرطة والتعامل معها باعتبار واقعهم النفسي الذي شوهته مؤسسات عديدة بدء من اكاديمية مبارك للامن الي منظومة حكم فاسد بائد
ولا يجب التعامل معهم من منطلق دورهم الاجتماعي او الوظيفي المنوط بهم لانه انتفي عنهم يوم ان اتنحي مبارك

vlvo said...

طيب كلامك مقنع والحل
قبل ما تقولي الحل اريد ان اذكرك أنني اعتبر خريجي اكاديمية مبارك للامن طابور خامس مزروع في قلب الوطن ورم سرطاني خبيث طفل عاق مدلل اعتاد الا يري الا نفسه وان يعبد رؤساءه وان الحديث بشأن اي مشاعر انتماء لاي مقدسات ضرب من الهزل والسخرية لذلك فهم لن يهمه البلد ولا اهلها ويجب يجب يحب التعامل معهم بهذا الاعتبار انهم محتاجون لتأهيل نفسي وليس من المعقول ان نتركهم في اماكنهم لان مش معقول نعطيهعم مرتبات ببلاش انهم عبء رهيب علي الجيش والشعب معا وسيكونون سبب في احتلال مصر نعم بهذا الشكل لن يعود الجيش لثكناته يجب البحث عن بدائل للشرطة والتعامل معها باعتبار واقعهم النفسي الذي شوهته مؤسسات عديدة بدء من اكاديمية مبارك للامن الي منظومة حكم فاسد بائد
ولا يجب التعامل معهم من منطلق دورهم الاجتماعي او الوظيفي المنوط بهم لانه انتفي عنهم يوم ان اتنحي مبارك

prof-osama said...

بفرض صحة رواية الداخلية التى اميل الى تصديقها ... هل نلوم مواطنين هل شهامتهم فى طحن.:) احد افراد عصابات الميكروباص ... ..لا بأس ان نستعير المقصلة من ادبيات الثورة الفرنسية ....بكل اسف تصرفات البلطجية خلتنى اتعاطف مع اى عنف يصدر من رجال الشرطة تجاة فئة من المجتمع يصعب التعامل معاها باى لغة غير العنف .. لانهم مش بيفهموا غير اللغة ديةوبسسسسس

Ahmed said...

النطع اللي واقف ورا ده وماسك اللاسلكي هو غالبا ظابط المباحث اللي أعد السيناريو والقصة الكدابة ده وحفظهالوه وواقف يتطمن إنه بيقولها صح
حسبنا الله ونعم الوكيييييييييييييل
مش عايزين جهاز الشرطة ده
يا جماعة الجهاز ده أخطر تحدي للثورة
الحكاية مش هتتحل بسهولة
ليس لها من دون الله كاشفة

prof-osama said...

الثورة قامت علشان النوعية دية من البشر تكتسب حد ادنى من الحرية والعدالة لكن بكل اسف الثورة معدتش عليهم اصلا .. هما فى حالة استغلال وهدم دائم فى المجتمع وفاكرين نفسهم تحرروا من اى قانون وان الارض ومن عليها بقت مرتع ليهم..وحيث ان تبين معدنهم الخبيث اللى كنا عارفينة بس شوفناة بعينا فلا تعاطف ولا قانون معاهم فليكن العنف هو لغة الحوار معهم ...وكمان مفيش مانع ان تبقى سمعة الاقسام بالنسبة ليهم انها سلخانة لامثالهم مش مكان للتفاهم والكلام بالحسنى لانهم ادنى من ان يسموا ببشر ....

prof-osama said...

الثورة قامت علشان النوعية دية من البشر تكتسب حد ادنى من الحرية والعدالة لكن بكل اسف الثورة معدتش عليهم اصلا .. هما فى حالة استغلال وهدم دائم فى المجتمع وفاكرين نفسهم تحرروا من اى قانون وان الارض ومن عليها بقت مرتع ليهم..وحيث ان تبين معدنهم الخبيث اللى كنا عارفينة بس شوفناة بعينا فلا تعاطف ولا قانون معاهم فليكن العنف هو لغة الحوار معهم ...وكمان مفيش مانع ان تبقى سمعة الاقسام بالنسبة ليهم انها سلخانة لامثالهم مش مكان للتفاهم والكلام بالحسنى لانهم ادنى من ان يسموا ببشر ....

prof-osama said...

انا اللى خايف منة ان الناس تبدأ تكتب كلام تحت شعار الشعب وسواقين الميكروباص والبلطجية ايد واحدة ضد الشرطة ... :))) لان الانفلات الاخلاقى فى التعامل مع الشرطة وصولا للتعدى عليهم بالضرب يستدعى رد حاسم لان واللة هيبة اصغر عسكرى امن كممثل للقانون هى هدف كلنا لازم نسعى الية ..

vlvo said...

طيب كلامك مقنع والحل
قبل ما تقولي الحل اريد ان اذكرك أنني اعتبر خريجي اكاديمية مبارك للامن طابور خامس مزروع في قلب الوطن ورم سرطاني خبيث طفل عاق مدلل اعتاد الا يري الا نفسه وان يعبد رؤساءه وان الحديث بشأن اي مشاعر انتماء لاي مقدسات ضرب من الهزل والسخرية لذلك فهم لن يهمه البلد ولا اهلها ويجب يجب يحب التعامل معهم بهذا الاعتبار انهم محتاجون لتأهيل نفسي وليس من المعقول ان نتركهم في اماكنهم لان مش معقول نعطيهعم مرتبات ببلاش انهم عبء رهيب علي الجيش والشعب معا وسيكونون سبب في احتلال مصر نعم بهذا الشكل لن يعود الجيش لثكناته يجب البحث عن بدائل للشرطة والتعامل معها باعتبار واقعهم النفسي الذي شوهته مؤسسات عديدة بدء من اكاديمية مبارك للامن الي منظومة حكم فاسد بائد
ولا يجب التعامل معهم من منطلق دورهم الاجتماعي او الوظيفي المنوط بهم لانه انتفي عنهم يوم ان تنحي مبارك

عبدالغنى الحايس said...

انتوا عايزين جنازة وتشبعوا فيها لطم

DIY CNC said...

وبعد مايلبسونا طرح
اى اى اى
سعاد حسنى فيلم الكرنك

Unknown said...

عبد الحميد

ممكن تدلي بشاهدتك دي قدام النائب العام؟

لو سمحت لو تقدر تدلي بشهادتك اتصل بمالك عدلي

او رد عليا دلوقت او ابعت لي ايميلك في التعليقات واحنا نتكلم

sum_1_ said...

كلام الظابط فكرني بفيلم هندي قديم البطل بيلاقي بنت صغيرة قدام الجامع بياخدها يربيها بتطلع أمه
لقد ولى عهد اهانة الكرامة و بدأ عهد اهانة الذكاء

Egyptian Vina said...

انا زهقت بقه و هاروح انتحر..لسه الشرطة بتكدب من اول الامين للوزير..لازم وزير الداخلية يتشال و يجى واحد بيعاقب المخطئ مش بينقله و لازم وزير العدل يتشال و يجيبوا واحد عامل جدول للنيابة للتفتيش ع الاقسام

-_- said...

هدي اعصابك يا ابو انس
هو كل حد عايزنا نسمع كلامه يعاير الناس بإنعدام الرجولة
!!!

ليه اصدق سواق الميكروباص و مصدقش المأمور ؟؟

الشرطة فاسدة و هتفضل فيها فساد مهما نضفنا فيهم لان ديل الكلب عمره ما يتعدل بس في نفس الوقت في سواقين ميكروباص عايزة الحرق

و انا شفت كذا موقف لسواقين بيشتموا عساكر مرور و الناس بيتلموا و يدوا السواق البلطجي علقة حلوة عشان يحترم نفسه بعد كده

نفسي يبقى في لجنة قضائية في كل قسم او وكيل نيابة في كل قسم , هنريح دماغنا على الاخر

-_- said...

المعلق عبد الحميد

يا ريت لو شفت الكلام ده بجد تبلغه لحد او نوارة تنشره على المدونة عشان ميضعش وسط التعليقات و الراجل ده لو له حق مش لازم يضيع

karem saad said...

يارب . انصر مصر وشعبها من شعبها .

متفائل said...

أتفق مع الرأي القائل بأن هناك فئة من معتادي البلطجة والإجرام ما ينفعش معاهم غير العنف .. لكن حتى العنف محتاج علام وتأهيل .. كلنا شفنا في التلفزيون كيف تتعامل الشرطة الإنجليزية مثلاً مع مثيري الشغب من المشجعين الإنجليز في مباريات كرة القدم .. بتضربهم بالجزمة وتشل حركتهم .. ولكن حسب قواعد فنية مش بغشومية وهبل يؤديان إلى وفاة المتهم .. علموهم يضربوا أزاي .. صعبة دي ؟

hayat ank said...

ولاد ستين تيييييييييييت وعايزين ضرب النار والجزمه هم شاطرين قوى فى التلفيق والكدب زى كل النظام الزباله دول مش لالالالالالالالالالالالازم يعيشوا ليوم التلات ولا الاربع وقال ناصر امين الشرطه قضاء الاعلام لان الى بيعمل التقارير عن اسباب الوفاه تابع للقضاء الى هو زى الزفت والى بيوصل القضيه اعلام الى هو زى النيله والى عمل الحادثه الى هم الشرطه ولاد ستميت تيت وهم اصلا تيييييييت والى مشغلنهم تيت وفلى الاخر هم عايزينا نبقى تييت وترجع البلد تبقى زى ما بيقولوا علينا بتوع الخليج انتوا بلد تيييييييييييييييت

hayat ank said...

لو السواق هو الى غلطان وابن ستيت تيييييييييييييت يبقى الناس هاتضربه لغايه ما تموتوا طب لو انضرب ولسه ما ماتش يبقى ناخده على المستشفى ولا القسم ومن قسم لقسم حاجه تيييييييييييييت

Ahmed said...

24- مافيش امتحانات IQ في الداخلية

blueroseash said...

لا وبيتكلم بهدوء ولا كأن القسم متنحاصر ولا كأنه عمل اي حاجة الا القلم مش معلم في وشه ليه مع انه اداه بضهر ايده كف يتولوه على حد وصفه؟ بس بيتعلمو بسرعة يعني اتعظو من قسم بولاق الدكرور وعملو للراجل تقرير طبي في مستشفى وبعدين عدموه العافية وبعدين فسحوه لحد ما خلص زي خالد سعيد ودلوقتي بيجهزولو اللفافة في الطب الشرعي
هي البلد مالها رجالتها يتجمعو بكلمة ويريحو بضحكة مفيش فيها راجل يلمها على كلمة واحدة "حرية مصر" مفيش فيها مصري راجل راضع من ست جدعة يقف ويقول ورايا يا شعب مادام احنا نفسنا نبقى غنم ياريت نبقى غنم بس حرة ورا راجل حر ولا كلنا خلاص انتاج لبن صناعي مسرطم ماننفعش فير للقهر

mahmoud said...

نقول كمان امن الدولة زي ماهو ولسة خاطف ناس ونائب رئيس الجهاز طلع علي قناة الحياة وكذب علي الهوا لما قال السياسة اتغيرت ولو اتغيرت كانوا افرجوا علي الناس المقبوض عليهم بشكل غير قانوني وماكنش ابو الراجل اللي في طب اسنان طلع علي التحرير مع بلال فضل وماكانوش سابوا المجرمين في الجهاز في مكانهم وماكانش المحترم نائب رئيس الجهاز وصف الجرائم ضد الانسانية التي ارتكبها جهاز العار بانها بعض التجاوزات وعلي فكرة رسائل البرايفت نمبر لسه شغالة نائب رئيس الجهاز كداااااااااااب والنظاام اللي لم يسقط الا راسه بينيمناااااااااااااااا الاساس في تصوري هو الانسان قبل النظام يعني لازم امناء الشرطة والضباط اي القاعدة العريضة يخرج قرار سياااااااااسي ان انتاج الاجيال الجديدة منهم يشمل مواصفات ادمية لو النظام الحاكم في مصر اخد قراااااااار هه حيحصل التغيير اللي احنا عايزينه مش بس مرتبط بالقوانين اللي ممكن ينتهكوها كالعادة لكن مرتبط كمان بالارادة السياسية في تغيير تربية ضباط الشرطة في الكلية ومواصفات اختيار الامناء وهنا نتكلم مجددا عن اعادة هيكلة وزارة الداخلية وحتي الان لم نري من المجلس العسكري نية واضحة لذلك تربية جهز شرطة محترم حياخد سنين بس المهم النية الحقيقية لفعل ذلك واذا كان المجلس العسكري سايب الميليشيات اللي بتحكم دلوقتي بحجة ان البلد حتقع ماشي خليهم بس لما ينتهي عمرهم الافتراضي والسلطة ماتبقاش لزماهم لازم الدائرة دي تقف ولازم نعد جهاز محترم ولازم يكون فيه ارادة لكدة

Unknown said...

مبروك يا نوارة الشرطة رجعت من تاني في خدمة الشعب للتخلص من حياته التعيسة والاقساط والغرامات والايجارت والعشوائيات اللي جواه ،ولاا طرحة ولا حاجة وعن خالي الابنودي انقل
مأساتنا ان الخونة ..بيموتوا
بدون عقاب ولا فصاص ..!!
مأياتنا
ان الخونة بيموتووا ..وخلاص
بدون مشانق في الساحات ..
ولا رصاص

على كل حال
صدقي مازال ..!!
صدقي على قيد الحياة
بيفجر الدم النبيل
ويبطش بالاستقلال
ويمرغ الحياة تحت الجزم والخيل
ويفتح الكوبري علينا
كل صبح وليل ..!
والانجليز..
مازالوا بيقهقهوا
ويضربوا ..ويسجنواالشباب
على كوبري عباس ..
او
في
شارع الجلاء
وصحيح
معاكم ان شعبنا غافي
لكنه ما زال حافي
وكل ما بلده اتخرب
وكل ما وطنه اتنهب
وكل ما عرق السنين
اتفك
واتباع
واتسلب
وكل ما تاهت الحقيقة
تحت اطنا الاكاذيب في الخطب
اظن ده كافي لشحنه بالغضب
واكيد بيكتشف السبب
واكيد اكيد
في كل يوم
-في السر -
بيتولد
من جديد ويحن للمواعيد
ومش بعيد
بكره تلاقيه تاني في عابدين
او في اسوان او في الصعيد
بيقطع الصورة
ويهتف للاستقلال والحرية
ويحرق الثكنات "الانجليزية "
في ميدان الحرية

سيدي عبدالرحمن الابنودي
رضي الله عنه وارضاه

او كما قال ....

Nicholas Urfe said...

نوارة مع كل احترامي لراي حضرتك، في جزء ناقص في تدوينتك، الشرطة غلط؟ ايوة غلط وعارفين ان في بلاوي ، وانا كتبت على حسابك على الفايس انه مفروض الشعب يخلق جهاز شرطة منه ومش شرطة اي كلام ، شرطة حقيقية وعلمية وكفاءه ، ويجبر الدولة تحله محل الجهاز الموجود

لكن في تدوينتك دي انتي متجاهلة ان بتوع الميكروباص وكل الفئة دي من الغلابة ، عندها كمية عنف وصياعة وحب للبلطجة غير طبيعي، وانهم طرف اساسي في المشكلة
ولازم الدولة تلاقي لهم حل

المشكلة طرفين يا نوارة :
بلطجية وسكان عشوائيات وجهلة من ناحية

وشرطة ما تعرفش الا طريقة واحده للتعامل مع الناس دي من ناحية ...

الشرطة قاسية ،،،والعشوائيات متخلفين وظروفهم تدفعهم للبربرية

والسلام

om said...

الدروس المستفادة مما سبق هو الآتي:
الجزء الأول
1- مأمور القسم بيقوم بدوره كمأمور الساعة تسعة الصبح، و هو دة (شغله مش بحاول يحسن دخله ولا حاجة).
2- مأمور القسم اثناء شغله لما حد بيعمل مخالفة وبيقول له: انا اسف.. بيعديها من باب العفو عند المقدرة و تحسين صورة الشرطة عند الناس.
3- مأمور القسم بيطلب الرخص من السواق ولما السواق بيقول له مش حاديلك الرخص الناس اللي رايحة اشغالها بتتدخل عشان عندهم وعى و إيجابيين.
4- الإيجابيين دول عرفوا ان اللي واقف ده مأمور، عن طريق إنه قال أنا المأمور (لا صرخ زى المجنون ولا هما قالوله حضرتك بتشتغل إيه قبل ما نتخانق بس، راجعى الفيديو تانى.. عينى عينك كدة شغالة تدليس و تحريف.. رهيييبة)
ج- المارة عندهم الحاسة السادسة و وعى عالى..
5- اكتر من 200 أو 300 مواطن عايزين يساعدوا الشرطة فى تأدية واجبها فبدأوا يطالبوا السواق إنه يطلع الرخصة للمأمور عشان دة حقه.. (واللا دى كمان مش من حق المأمور!!)
6- السواق لما شاف 200 او 300 مواطن اتلموا عليه جات له لوثة (أكيد طبعا لو هو بلطجى و واخدها بالدراع لازم تجيله لوثة) وقعد يشتمهم كلهم لإنه عنده رغبة دفينة في البلطجة (مش فى الانتحار زى ما قلتى و إلا يبقى مجنون طبعا يا ولداه!)
7- مأمور القسم جاله في ودنه وقاله انزل بكرامتك بدل ما الناس اللي واقفة يبهدلوك فراح شاتمه تاني وشتم الناس لإنه (قليل الأدب و بلطجى (مش لإنه عايز يتبهدل يا أكبر داعية للفتنة فى مصر لا إراديا بتصرفاتك الهوجاء دى)..
8- اكتر من 200 او 300 مواطن نزلوا سواق الميكروباص بالقوة من االميكروباص بينما كان المأمور بيقوللهم سيبوه سيبوه إحنا هنتخذ معاه الإجراءات القانونية.(سابهم يتدخلوا معاه عشان إحنا قاعدين ليل و نهار نوصى الناس تتعاون مع الشرطة و المأمور فاهم الحالة إللى البلد فيها فاعتبر إن مشاركة الناس طبيعية، زائد إنه ما كانش معاه أى قوة شرطة، يعنى عدد الناس أكتر بكتير) (ومحدش ضرب حد لحد دلوقتى).. (مش زى مانتى بتقولى شاف الناس بتنزله بالقوة وما اتدخلش، ولا حتى اتفرم وسطهم وهم بينزلوه بالقوة، و راجعى الفيديو تانى.. و كإنه المفروض عشان يثبت إنه مش من الفلول لازم يتعجن عشان يحرر البلطجى إللى بيبلطج عليه!! بطلوا تقعدوا على راسكو بقى عشان ما تشوفوش الدنيا بالشقلوب)
9- السواق البلطجى اللي فيه حوالي 200 او 300 مواطن محاوطينه -و المأمور لسة فى الصورة ما راحش فى حتة بعيد- راح بضهر ايده وعلى وش المأمور (أظن مش محتاج يبقى سوبرمان أو أدهم صبرى عشان يعمل كدة، كفاية يبقى بلطجى أو سواق ميكروباص صايع حتى و بس..)
10- جمع رهيب - غير ال200 او 300 مواطن اللي واقفين - جريوا ناحيتهم لانهم شافوه في وسط الزحمة دي وهو بياكله على وشه بضهر ايده... مع انه بقاله تلات سنين وكل الناس عارفاه في الدايرة! (لا غبار على هذا الكلام، ماعرفش بس إنتى حطة علامة تعجب ليه؟)
11- لما الظابط انضرب رجع لورا عشان مذهول (مش عشان يسيب الناس تضربه زى ما بتقولى يا مفترية) وبعدين لما لقى الناس بدأت تضرب قالهم كفاية ما تضربوش..
12- البني ادم لما يبقى مصاب بيروح القسم الاول يتعمل له محضر (مش بيتفتش يا مفترية) وبعدين لو لقوا حالته تستدعى المستشفى بيودوه المستشفى القريبة (مش شرط القبطى زى مانتى بتقولى، بس واضح فعلا إن مستوى فهمكم للأحداث قاصر جدا)..(و راجعى الفيديو تانى)
13- المستشفى القبطي قالت انه عنده بعض السحجات والكدمات وكمان عملوا له اسعافات
14- مسئول العلاقات العامة في منظمة حقوق الانسان بيمر بالصدفة على مكان الخناقة (مش عالقسم) و شاف إللى حصل كله زى باقى المواطنين.
15- فيه حاجة اسمها "منظمة حقوق الانسان".. بس إنتوا عايزينها على كيفكم..
16- ما عجبوش الوضع و أيد إن الجماهير ضربته وأدلى بشهادته ان الجماهير عملت معاه الصح.
*******يتبع*****

om said...

الجزء الثانى (تكملة):
17 - البني آدم لما ما بيطلعش الرخص لمأمور القسم، بيروح القسم، وبعدين يروح المستشفى القبطي، وبعدين يرجع القسم يعملوا له محضر.. واخيرا، بيودوه النيابة العسكرية... قسم رخص (ما ليش مزاج الصراحة أسمع الفيديو تانى عشن أتأكد من المعلومة دى إللى إنتى كاتباها بس لو افترضنا إنها صح إنتى إيه إللى مزعلك؟ خصوصا إن البلد لسة فى فترة انتقالية مفيش فصل تام بين الجيش و الدولة لسة؟ و بعدين جايز يكون راح للنيابة العسكرية على اعتبار إنه بلطجى ، واللا دة كما مش تخصص الشرطة العسكرية؟؟!!)
18- المجني عليه بعد ما خلص القسم و المستشفى و هو فى طريقه للقسم تانى أو للنيابة العسكرية جاتله حالة إعياء مفاجئة (مش زى ما نتى بتقولى "بعد ما لف كعب داير".. هو دة كعب داير؟؟ واللا إنتى كمان عايزينهم يرجعوه بيتهم ياخد دش لحد ما يحضروله مشتشفى متنقل و قسم متنقل مراعاة للكدمات إللى عنده؟ جايز يكون دة المطلب الجاى ليكم فى المليونية!)..و طبعا إنتى مستغربة إنه حالة مفاجأة مالهاش سبب غير إنه راجل غلس.. ما تستنى تقرير النيابة قبل ما تهتشى و تسخنى الفتنة يا أعقل الناس إنتى يا بتوع تطبيق العدالة.. عجبى
19- ثم توفى "الى رحمة الله تعالى
20- المحضر اتحول للنيابة العامة.
21- التشريح المبدئي قال ان فيه سحجات لا تؤدي إلى الوفاة، ولسه منتظرين تقرير الطب الشرعي (عشن إحنا ناس عاقلة و هادية و موزونة)
22- اهل القتيل اقتنعوا الحمد لله ان ابنهم غلطان (مش اقتنعوا إنه يستاهل يموت زى ما بتقولى، و موكلين محامى و مستنيين نتيجة التقرير الشرعى عشان ناس عاقلة مش زيكم)... لكنهم للاسف لما راحوا التحرير فيه ناس سخنوهم وفهموهم (ناس من نفس نوعيتكم كدة عادى وجودهم فى كل زخنوق يعنى) ان ابنهم غلطان..
23- الحمد لله كل شئ تحت السيطرة... إلا إنتوا يا مراهقين يا مفتريين يا مشعلى الفتن لا إراديا عن جهل و شعننة و خلاص.

سؤال لم يستوقف أحدا من العاقلين منكم: إيه إللى ما خلاش السواق يطلع الرخصة من الأول أساسا لو هه شريف كدة؟
و آية لعلها تأثر فيكم و تهديكم: كلما أوقدوا نارا للحرب أطفأها الله و يسعون فى الأرض فسادا و الله لا يحب المفسدين
و أخيرا.. فعلا لو القضاء مسكته امرأة البلد هتضيع.. و لا زلت بطلب من ربنا ليل نهار إنك ترجعى تبقى تانى نوارة العاقلة الصادقة الدقيقة المنصفة... آمين

haroon said...

طب وبعدين يعني ؟؟؟؟؟؟؟؟؟ كدة للاسف الامور اختلطت ببعضها ومفيش شرطة هتقدر تقف ف وش البلطجية والخارجين علي القانون طول ما احنا بنهاجم الشرطة وكل احتكاك بين الشرطة والمواطنين هيتفسر بان الشرطة بتعامل الناس وحش وبتضربهم وبتعذبهم ..وبغض النظر عن حكاية السواق دي اللي ممكن فعلا يكون المامور مفبرك الحكاية دي ..لازم يكون فيه حل عشان يرجع احترام الشعب للشرطة وخوف البلطجية والمنحرفين من الشرطة ...

hardway said...

دمك...تقييييييييييييييييييييل
اوعي تفتكري او تتخيلي انك كاتبة ساخرة
كلام بايخ..ممل..سوقي..بيئة كما تتحاكون
انت فاضية من جوه..معندكيش حاجة تتكلمي فيها
دمك... تقيييييييييييييييييييييل

hardway said...

دمك...تقييييييييييييييييييييل
اوعي تفتكري او تتخيلي انك كاتبة ساخرة
كلام بايخ..ممل..سوقي..بيئة كما تتحاكون
انت فاضية من جوه..معندكيش حاجة تتكلمي فيها
دمك... تقيييييييييييييييييييييل

lastcrazyboys said...

متقدرش ننكــر انه عمل معاه واجب

بإنه مرضيش يعمل له غرامة بـ1200 جنيه

hardway said...

نـرنـر..عبد الحميد رد عليكي..ولا لسه
بيفكر....لازم يفكر طبعا هيقول ايه للنائب العام...ويطلع من مطب ( بيكهربوه وهما بيسحلوه ليدخل القسم
واخدين معاهم توصيلة كهربا خارجية)
أحترمي نفسك شوية...بلاش هرتلة الكافيهات
والجلسات العبيطة بتاعتك...........
وبعدين ايه حكاية ..مالك عدلي..كل مصيبة
تقولي اتصل بي او مالك عدلي..هو مالك ده فاضي لكي انت بس...انت فين يا فاطمة..انت مش في الميدان ليه.؟؟؟؟؟

minasalib_1901 said...

انا عن نفسى مصدق نص القصة الولانى لحد مالسواق قالوا مفىش رخص لانى شوفت منظر زى ده قدام عنىة فى الكربة فى مصر الجدىدة سواقىن المىكروباص عاملىن موقف و بىوقفوا الشارع و لما امىن الشرطة بىكلمهم بىتهرى ضرب

minasalib_1901 said...

انا عن نفسى مصدق نص القصة الولانى لحد مالسواق قالوا مفىش رخص لانى شوفت منظر زى ده قدام عنىة فى الكربة فى مصر الجدىدة سواقىن المىكروباص عاملىن موقف و بىوقفوا الشارع و لما امىن الشرطة بىكلمهم بىتهرى ضرب

prof-osama said...

غير اعتراضى الشديد على تجاوزك اللفظى المقيت .. ياريت يبقى سلوكك اكثر اتزانا وحكمة لان الجريمة هى من احد احقر مخلوقات الارض وهوم سائق من مافيا الميكروباص ضد كل الشعب والشعب ذبحة وصلبة كمان اية اللى مزعلك \

yehiajewler said...

مين الراجل اللي واقف ورا مامور قسم الازبكيه؟؟؟؟

bassam said...

سواقين الميكروباص مافيا من البلطجية والدفاع عن البلطجية مايجيش غير من بلطجية

bassam said...

سواقين الميكروباص والباعة الجائلين عبارة عن عصابات

Robabekya said...

Teslamy ya nawara bas I need to add:
24- 3ala bo3d 50 meter we 2omet la elah ella allah maloma, we ma7adesh geh men el esm wala 7atta 3askary ahbal kalo el fodol yebos fe a mesh KOWAT SHORATYA.
25- Ahl el ateel 3arfeen en ebnohm ebn kalb fa lazem ymoot we kano mokatan3een gedan belhabal elly 2et2al dah bas hat2ol a ba2a fel 3anaser el modasa mayla2osh ganaza 2ella we yeshba3o feeha latm.
26- Men emta 7ad bey3raf ma2mor el esm elly gamboh law ba2lo 20 sana.
27- Maw2af 3ashwa2y fe 5 3arabyat bas.
28- El ma2mour khayef 3al el saw2a el ghalban men el 1200 genaih el gharama "gedeeda de".
29- Ma2mor el esm nazel lagna ma3a el sawa2 bas men ghair wala mokhber 7atta.
30- Men emta el nas bet7eb el ma2mour awi keda.
31- Bardo el 7elween beto3 el ta7reer ektano3a we 2alo "e7na etde7ek 3alaina we elly 2al 3ala el manasa dah ebn maladee3 kalb" we tel3o yekna3o el nas elly barra we yedaf3o 3an el esm bas bardo fe 3anaser mondasa welad el herma homa elly wala3o el denya. SHABAB 25 YANAYER MALHOMESH DA3WA BE 2AY 7AGA DOL 3ANASER MONDASA HOMMA ELLY WE7SHEEN. dah tab3an 3ashan 2ay deghof may2olesh enhom ded el thawra wala 7aga. DE EL SHORTA BETMOOT FE SHABAB EL THAWRA YA SALAM YAWLAAAAAAAD.


YAKHY LA2AAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAA

Robabekya said...
This comment has been removed by the author.
romancy said...

انتى بتقولى مصر مفيهاش رجالة الرجالة طلعت من يوم 25 بس طلعو عشان نخوتهم وسابو ال المفروض بيتقال عليهم اهل الفكر والناس بتعرف بتتكلم ف ايه هما ال يجبولهم حقهم الرجالة طلعت وعملت ال مفيش خروف من اهل الفكر قدر يعمله اهل الفكر عملو ايه بئا طلعو ولا اهل ولا ليهم ف الفكر وسابو شوية عواجيز القشف مطلعش من جسمهم الا ف عهد الحيوان ال اول حاجة عملوها خفوه عن الانظار وقالك دا بيموت ومينفعش نحاكمه محاكمة استثنائية عشان دا ابن من ابناء مؤسستنا ال ف عهدهم السعيد كانو بيعملو بكل جهدهم عشان المؤسسة تبطل تجيب رجالة بس لعبهم طلع على شونة وجابت رجالة فقالك نمشيها ميرى بئا وهنحكم 6 شهور وف سره قال قابلة للزيادة وف خلال ال 6 شهور دول هنخلى الشعب يبوس رجلينا عشان الحكم ميطلعش مننا وطلقو علينات كل ال عنه نص عقل يقنع ويثبت ف الناس واول حاجة عملوها خلو الرجالة من ميدان الرجالة يوم 12 فبراير وقلبوها كرنفال وبعد كدا كله راح نام الا الرجالة فضلو معتصمين وقالو البلد دى حقها لسة مرجعش عملتو ايه اول حاجة اخرتعتو عجلة الانتاج وبعدين اخترعتو الاستقرار وبعدين صهينتو لما الكلاب سرحت ع الرجالة وهدت خيمهم وقالو عليهم دول زناة وحشاشين وبيمارسو فعل فاضح ف ميدان الرجالة وقالكلو الشحن لسة مخلصسش ورصيدهم يسمح رحتو جايين مهللين وعريتو المصلحة للدبابير بس سبحان الله طلع من قلب مؤسسة بيحكمها مجلس دبابير رجالة وطلعو قالو المجلس القواد المعرف الناس على بعضبها دا باطل وانتاج الكلب الكبير ال عبيده مش هيسمحو انه يتحاكم او يتأذى سبيتولهم الدين والملة وقلتو عليهم ما ف الخمر وبلغتو عنهم الشرطة العسكرية ال رصدتهم وهجمت عليهم وش الفجر زى البلطجية والمجرمين وقلتو احسن يستاهلو يعنى م الاخر انتو ال خصيتوالرجالة ال كانت لسة فاضلة ف مصر وانتى اول من شاركتى ف حفلة الخصى الجماعى لرجالة مصر يا نوارة وجاية دلوئتى تعددى وترقعى بالصوت ع البلد ال معدش فيها رجالة على راى المثل الجنازة حارة والميت شعب وبعدين ترجعى تقولى الطبقة المتوسطة لما بيتقتل فيهم حد الدنيا بتتقلب مهم بيشوفو الغلابة لما بيتقتل منهم ان شالله 20 واحد بيقولو احنا غلابة وماشيين جوة الحيط ولو نسيتو المدرس ال بيربى العيال ع الاهانة وكسر النفس والضرب زى البهايم ومع ذلك طلع اهاليهم يقولو المدرس دا راجل محترم وبيضرب العيال عشان يربيهم يعنى خدوها قاعدة ان الاهانة هى سيدة الاخلاق يعنى الضرب ف الميت حرام يعنى ال يفتكر ان الشرطة هترجع من غير ما تضرب وتهين ف المواطن يبئا بيشتغل نفسه وعايز يدخل الشرطة الجنة عشان احنا بنركبها ذنوب عشان الضرب ف الميت حرام ف عهد المحروق مبارك جاتلنا انفلونزا الخنازير وانتو بعد ما قمنا بثورة على الخنزير جبتلونا انفلونزا الدبابير

romancy said...

وحاجة كمان حوار التحرشات ال ف ميدان التحرير والبلطجية ال معسكرين هناك ليل نهار دول دول تسالو فيهم كلاب مصطفى محمود وكلاب الحزب الوطنى بتوع ال 50 جنيه وعلبة الكشرى دول ال قررو انهم يخلو ميدان التخريب على حد قولهم يعنى اسم على مسمى لحد يوم 24/6 عشان يجمعو ال يجمعوه ونلاقى ف قلب ميدان التحرير ناس ماسكة يفط وبتقول ارجع يا مبارك وطبعا تحت رعاية المجلس الاعلى للقوادين والحرامية عرفتو بئا الضغط على ميدان التحرير عالى ليه اليومين دول

obad said...

انا موافق على كل اللى بيتقال
بص بصراحة فيه سوائين ميكروباص يستاهلو يتعدمو فى ميدان عام من غير سبب

Rawash Amr said...

فى واحد ظالم ومعاه ناس اسمها مع الظالم
وواحد فاسد ومعاه ناس اسمعا مع الفاسد
وواحد محترم ومعاه ناس اسمها مع المحترم
وواحد من بتوع الاستقرار راجل انما ايه " رصين" والى معاه اسمهم مع "الرصينط والمشكله فى الناس دول
الناس الى مع(الرصين) فهمتى

agent10467 said...

ببساطه شديده مقارنه تقرير القبطى مع الدمرداش و الفارق الزمنى ممكن يبين حاجات كتيره و لو كان السواق رفض يدى الرخصه يبقى مش تمام الله يرحمه

mogmod said...

ياجماعة الراجل اعترف على نفسه سواق الميكروباص كان داخل القسم سليم بشهادة طبية وبعديين خرج منة مات يبقى حصلتله حاجة جوه القسم الموضوع ده مش مفروض يعدى من النيابة حاجة زى دى مفروض تستقيل فيها الحكومة كلها

mogmod said...

الراجل اعترف على نفسه قال ان السواق كان داخلالقسم و معاه شهادة طبية انه سليم ولما خرج من القسم مات يبقى المنطق بيقول انه حصلتله حاجه جوه القسم موتته او ربنا خده فى اللحظه دى بالذات
انا عاوز اقول حاجه لكل اللى بيدافعوا عن الشرطة فاكر كان ضابط المرور بيعامل الناس ازاى قبل 25 يناير
فاكر كويس
تفتكر شخصية زى دى ممكن تكون اتغيرت وباى درجة وقولى لو فى اى شواهد ملموسه
الدين والقانون والعقل بيقول انى لو مسكت واحد بلطجى مش هسحلة من الضرب طالما مسكته يعنى بقى مش خطر وبسلمه للنيابه
لكن المشكلة ان السواق البلطجى ضرب سعادة الباشا الكبييييييييييييير
وانت عارفه بقى ان الناس مش زى بعضها

gogo said...

لأ والمأمور الظريف قاعد يقولة رخص حضرتك بعد اذنك تعالي القسم واكيد لما السواق مرضيش قالة ابوس ايد معاليك هات الرخص بس نسي يقولهالنا دي ، واللجنة بتاعت الداخلية علي صفحة خالد سعيد كان جايب كلام شهود ولقيت الكومنتات كلها كلام غريب فبقول هي الداخلية ملت الصفحة لية ولقيت الاشكال بتاعت الكائنات الفضائية اللي شتم واللي قالي انتي مش هاتحسي غير لما حد يغتصبك ويارب يبقي سواق ميكروباص واتبهدلت اااخر حاجة . المهم هما مركزين مع السواقين بالذات علشان الناس تسكت وتقول اصل السواقين يستاهلوا فعلا دول بيبلطجوا ع الكل وواحد ورا واحد ونرجع نتعود تاني ان تعذيب حد لدرجة الموت بقي خبر عادي هما عايزين يوصلوا لكدة . عايزة اعرف لما كل دة حصل ف الشارع مافيش حد صور حاجة لية ساعة ظابط المعادي شفنا كذا فيديو للظابط وهي الناس بتضربة لية المرة دي مفيش اي فيديوهات بالمناسبة الظابط دة كان ضرب سواق بالنار والناس افتكرتة مات ورغم كدة لما ضربوا الظابط ماموتهوش وكان زي القرد ف المستشفي ولافف راسة بشاش غرقان بيتادين قال يعني دم ياحرام ووقتها الناس ماكنتش طايقة الشرطة اكتر لكن علشان المأمور موتوا الراجل . اهم تلاتة كانوا مضيعين البلد وكان لازم اول حاجة تتصلح بعد الثورة هما ( الداخلية والقضاء والاعلام ) والتلاتة لسة زي ماهما التلاتة يشتغلوننا بجد حاجة تزهق

amal said...

انتى لسه مصدقه يانوارة ان اللى حصل كان ثورة , طب فين الرجاله بتوع الثورة دى فين بتوع كلنا خالد سعيد , فين بتوع حقوق الانسان , فين العدل والرحمة , ياخسارة يا شعب ربنا ادانا الفرصه علشان ننضف ونحقق العدل ونطهر البلد وضيعناها بادينا , والفرصه لما تيجى وتضيع مابتتعوضش تانى ," ربنا لا تؤاخذنا إن نسينا او أخطأنا ربنا ولاتحمل علينا إصرا كما حملته على الذين من قبلنا ربنا ولا تحملنا ملا طاقة لنا به واعف عنا واغفر لنا وارحمنا انت مولانا فانصرنا على القوم الكافرين ..

Eng, Yasser said...

عارفه يانواره إنتى بتفكرينى بمثل شعبى هأقولهولك فى نهاية التعليق

هو فيه سواق غلبان .... ده سواقين الميكروباص دول هم شر الطريق .... والناس بتستغل الموقف علشان الوضع اللى فيه الشرطه بعد 25 يناير .................... يعنى حتى لو المخبر عايز يرتشى من سواق ميكروباص مش هنصدق إن ضابط شرطه كان هيرتشى من سواق ميكروباص ولا إن مأمور هيدافع عن حق ضباطه ومخبريه فى إنهم يرتشوا ... كلنا بنمشى فى الشارع وعارفين أخلاق سائقى الميكروباص شكلها إيه فمحدش يحاول يفهمنا إن فيه سواق ميكروباص كان ضحيه .... دول واقفين دلوقتى فى كل مكان صفين وتلاته وحاجه أخر إنفلات.............. اللى بيحصل دلوقتى إن كله بينافق اللى صوته عالى زى زمان بالضبط والصحف اللى كانت بتنافق النظام قبل كده هى نفسها اللى بتنافق الجموع دلوقتى علشان هم اللى صوتهم عالى ............... ماهو "الغجريه ست جيرانها" وربنا يستر

Eng, Yasser said...

عارفه يانواره إنتى بتفكرينى بمثل شعبى هأقولهولك فى نهاية التعليق

هو فيه سواق غلبان .... ده سواقين الميكروباص دول هم شر الطريق .... والناس بتستغل الموقف علشان الوضع اللى فيه الشرطه بعد 25 يناير .................... يعنى حتى لو المخبر عايز يرتشى من سواق ميكروباص مش هنصدق إن ضابط شرطه كان هيرتشى من سواق ميكروباص ولا إن مأمور هيدافع عن حق ضباطه ومخبريه فى إنهم يرتشوا ... كلنا بنمشى فى الشارع وعارفين أخلاق سائقى الميكروباص شكلها إيه فمحدش يحاول يفهمنا إن فيه سواق ميكروباص كان ضحيه .... دول واقفين دلوقتى فى كل مكان صفين وتلاته وحاجه أخر إنفلات.............. اللى بيحصل دلوقتى إن كله بينافق اللى صوته عالى زى زمان بالضبط والصحف اللى كانت بتنافق النظام قبل كده هى نفسها اللى بتنافق الجموع دلوقتى علشان هم اللى صوتهم عالى ............... ماهو "الغجريه ست جيرانها" وربنا يستر

طنطـــا واى said...

تقرير الطب الشرعى يثبت ان وفاة السائق بتاع مأمور الأزبكية ناتج عن اسفكسيا الخــنق نتيجة أبتلاعة لفــافة ميكــروباص بأربع جنوط سبور

طنطـــا واى said...

تقرير الطب الشرعى يثبت ان وفاة السائق بتاع مأمور الأزبكية ناتج عن اسفكسيا الخــنق نتيجة أبتلاعة لفــافة ميكــروباص بأربع جنوط سبور