Sunday, 23 August 2009

نصيحة لوجه الله تعالى

قانون المرااااااغي
اتفرجوا على قانون المراغي ضروري، مش بس عشان خالد الصاوي رائع، امبارح اول حلقة ما تمكنتش من اني احكم غير على خالد الصاوي، مبدع كالعادة
بس النهاردة تاني حلقة والمسلسل سخن، تصدقوا بالله؟ المسلسل سخن في تاني حلقة؟ حتى المشاهد اللي بتستخدم في المسلسلات عشان تطول الحلقات معمولة حلو جدا، وعاجبني قوي رسم شخصية غادة عبد الرازق، كل الناس عندها يا اما محترمين يا اما غلابة ههههههه لطيف قوي ان يبقى فيه شخصية مرسومة كده :) وشخصية المراغي مرسومة حلو برضه لحد دلوقت، انا مبسوطة قوي، من كل حاجة بس احنا لسة في الحلقة التانية، يارب بقية الحلقات تمشي كده
الا خالد الصاوي بيعمل كده ازاي؟ بيلبس ازاي كده الشخصية لحد ما يتهيالك انك شفت البني ادم ده قبل كده في حياتك العادية؟ على فكرة ده ح يتجنن، الممثلين اللي بيعملوا كده بيلسعوا في الاخر زي جاك نيكلسون، ايوة، هو عامل فعلا زي جاك نيكلسون، من هنا ورايح ح اسميه جاك نيكلسون مصر، هههههههههه كان لازم تشوفوه وهو بيترافع امبارح، فريد الديب ياربي؟

13 comments:

soreal said...

for those of us who dont have tv.... more recommendations please :)

Love-Guru said...

و جاك نيكلسون لسع ازاي ؟ آخر عمل شاهدته لجاك نيكلسون كان
The Bucket List
و كان لسه بعقله
رمضان كريم

جبهة التهييس الشعبية said...

متهيالي المسلسلات موجودة على النت
مصطفى او ميدو ممكن يقولوا لك على المواقع

لاف جورو
جاك نيكلسون مخه ما بقاش ينفع ببصلة مافيش حاجة بيعملها دلوقت غير انه بيمثل وفي حياته اليومية ماعندوش سلك موصل على التاني
ده بيحرق الفلوس

مواطن مصري said...

اتفرجي على ابن الارندلي حلو

لو تعرفي تنزلي مواعيد المسلسلات امتى و قنواتها اية

يبقى وفرتي عليامجهود


هو بيجي الساعة كام؟

مهندس حر said...

أنا شفت النص الأخير من الحلقة الأولى .. للأسف ماشفتش المرافعة اللى إتكلمتى عنها .. أنا برضه معجب بخالد الصاوى كممثل جدا .. بس قدامه حبتين لما يبقى جاك نيكلسون مصر .. جاك نيكلسون قصة و حدوتة كبيرة ..

على فكرة خالد صالح فى تاجر السعادة لابس دوره كويس .. اللى خايف منه إن المسلسل نفسه مايطلعش قد كده ..

أنا عامة بكون متسامح أول تلات أيام و بشوف كذا مسلسل لكن بعد كده همه مسلسلين أو ثلاثة بالكتير اللى بتابعهم..

كل سنة و إنتى طيبة :)

mido said...

soreal

كل ما عليك انك تكتب فى جوجل

قانون المراغى

حتلاقى الحلقة الاولى و التانية مرفوعين على المنتديات

تدخل اى منتدى و تسجل عضوبة

و تحمل


الحلقة الاولى



لقيت مدونة متخصصة فى رفع المسلسلات كلها

ممكن تتابعها على طول

الحلقة الثانية

جبهة التهييس الشعبية said...

خالد صالح استمبا
مكرر

كريم البحيرى said...

فعلا مسلسل جامد جدا اما بخصوص جاك نيكلسون فدا لسع من زمان ومخة فعلا مبقاش ينفع بطمطماية على اساس انها مجنونة يعنى تخيلوا ااقل من المجنونة كمان
تحياتى وكل سنة وانتى طيبة وخلاص ارتحتى بعد ما عرفتى حل الكلمات المتقاطعة
كريم البحيرى

TAFATEFO said...

أنا مش عارف بصراحة الناس ازاي بتقدر تشوف حلقة كل يوم من مسلسل؟؟

أنا بقالي 3 سنين بنزل حلقات المسلسلات كلها كل يوم .. وأتفرج عليهم بعد رمضان

اللي عايز أي مسلسل كامل بعد رمضان يقول ويوصله لحد باب بيته :D

soreal said...

thanks for all your recommendations ppl ^_^

but i have to say, my comment was a bit misleading , for that i appologise..

the net is my tv, i just need to know what worth looking for :)

soreal said...

oh, and i agree with tafatefo too :P

lastcrazyboys said...

فعــــلا

المـــراغي..من اول يوم شدني..وبيجسد شخصية المحامين اللي شايفين شغلهم كويس


وعاجبني جــدا انتــاج " صــدق وعــده"..والبصمة السورية عاملة فيه شغل حلو


بس انا مش معاكي في خالد صالح..ده هو الوحيد اللي نقدر نقول عليه" الهـراء اللذيذ"
مع اني والكلام في سرك ..مش من مريدي صالح في الاساس

حرة المداد said...

كل عام وأنتم بخير....على سيرة النصيحة يقول الله تعالى عن شهر رمضان: (أياما معدودات) ليس كثيرا على ربنا أن نتوحد في هذا الشهر على عبادته وطاعته ودراسة كتابه دراسة متأنية لنحيا به ونحيي به الأمة التي كنا وما زلنا نبكي حالها ومآسيها.,..تعالوا نترك المسلسلات ونقبل على ربنا في أيام معدودات لنفوز بالعتق من النار ونحقق
(لعلكم تتقون)

على فكرة كل المسلسلات تعاد عشرات المرات بعد العيد مباشرة لمن يريد...لكن خسارة كبيرة أن نضيع فيها الوقت وكذلك الساعات المهدرة على النت في الرغي والتصفح...والله يا جماعة لساعة يخلو فيها العبد مع ربه يناجيه ويشكو له ويبكي بين يديه ويستشعر فيها أروع احساس وأروع لذة في هذه الدنيا لهي خير من الدنيا وما عليها...اللهم أعنا على ذكرك وشكرك وحسن عبادتك وارزقنا الاخلاص والثبات