عاجل قسم منشية ناصر يرفض تحرير محاضر للاهالي

الاستاذ سيد فتحي من مؤسسة الهلالي للحريات بعت لي الرسالة التالية على الموبايل: قسم منشية ناصر يمتنع عن تحرير محاضر اثبات حالة لاكثر من اربعين مواطن تصدعت منازلهم المجاورة لموقع الانهيار، وغدا بلاغ لنيابة غرب القاهرة ضد القسم. سيد فتحي. مؤسسة الهلالي للحريات. -------- هالله هالله ع الجد والجد هالله هالله عليه، انا الناس دي واجعني قوي، تصوروا واجعني اكتر كمان من بتوع العبارة، بتوع العبارة ماتوا وارتاحوا، اهاليهم محروقين بس لهم سقف يستظلوا بيه لكن دي ناس في الشارع، مش بس كده، دول كل ما يروحوا حتة يتعاملوا كأنهم حشرات، وينطردوا طردوهم من النادي الاجتماعي بصواريخ نار كأنهم بيطفشوا ناموس والنهاردة طردوهم من الشارع، فاهمين يعني ايه يطردوهم من الشارع؟ والناس لا حول لها ولا قوة عمالين يتفعصوا كأنهم صراصير، اي حد يحط نفسه مكانهم يا ناس. هم دول البلطجية الصيع اللي مش عارفة ايه ومش عارفة ايه؟ هم دول؟ فين البلطجة دي؟ فين الصياعة؟ فين المطاوي والسنج؟ فين الشر المستطير؟ فين الناس اللي صوروهم على انهم وحوش ادمية؟ دول وحوش؟ اللي منين ما يمشوا يتهانوا ويسكتوا دول وحوش؟ اللي انطرودوا من الشارع دول وحوش؟ انتوا عارفين لما نزلت عشان اروح النقابة اتصلت بمالك فقال لي لا خلاص، ده هم عملوا فيهم كده ساعة الفطار واحنا اخدناهم فطرناهم في النقابة وقولنا لهم ارتاحوا، لانهم تعبانين قوي يا نوارة !!!!!!!!! مافيهمش حيل يطالبوا حتى بحقوقهم، بابسط حق لاي انسان، ده الحشرات لها جحور احنا لازم نتحرك باي وسيلة، انا مش عارفة ايه؟ بس حد يشور عليا لاني فعلا مش عارفة افكر