اسكتوا مش قضية سوزان تميم مؤامرة شيعية على السنة

هي اكيد كده، اكيد، اكيد هيفاء وهبي وفضل شاكر لانهم شيعة تآمروا على سوزان تميم وعادل معتوه وهشام طلعت ونزلت عشان سنة
وارتضح بقى، ان سوزان كانت ست شريفة وعفيفة وثروتها ربع مليار، وهشام والسكري ابرياء وابوها بيقول انها ما كانتش متجوزة لكن عادل معتوه بيقول انه هو جوزها "الشرعي" الوحيد، وان القاتل كان مخمور او متعاطي مخدر لان الطعنات حنينة، اه وربنا كاتبين كده، يا إماتن بقى من كتر ما بيحبها قتلها بشويش، او كان فاقد الوعي يا قلب امه ومش حاسس بنفسه لان فيه اشرار كانوا منيمينه تنويم تغطاطيسي وهو ما كانش يقصد يقتلها ده كان رايح يلاعبها عشرة كوتشينة في البلاكونة كوتشينة.
والمحامي بتاع عادل معتوه ساب القضية وبيقول ان عنده ادلة على براءة هشان والسنكري، والمفارقة ان المحامي اسمه "الطباخ" يا سبحان الله، ده ربنا له حاجات يا جدع. وابوها وامها اتخانقوا مع بعض على التركة.
كل ده مش مهم، المهم ان شوزان تميم من اتباع المذهب السني
مما يوحي بمؤامرة كبيرة لضرب المذهب السني في كل من لبنان ودبي والقاهرة وجزر القمر وجرين لاند
خصوصا ان هشام بعت سوزان مع امه في رحلة عمرة عشان ياخد موافقة امه على جوازه من سوزان، بس امه يا ننوس عين امه ما وافقتش، طب والولية اللي هو متجوزها وعمال يتجوز عليها نسوان من الشرق الغرب دي موقعها ايه من الاعراب؟
الطباخ بيقول فيه مؤامرة فيها اطراف كبيرة
طيب يعني شرطة دبي ايه مصلحتها انها تتبلى على السنكري؟ لزمن يكون رئيس الشرطة في دبي شيعي بقى، وحاطط السنكري في دماغه
والاكادة بقى ان هشام طلعت كان ناوي يدفع الدية لاهل القتيلة، طيب منين بريء ومنين ح يدفع الدية؟
وليه السنكري اعترف على نفسه؟
والاخ الزوج الشرعي ده طالق المرة الله يرحمها كده على مخاليق ربنا ودلوقت بيقول انا جوزها الشرعي؟
لا بس باضت له في القفص، ح يورث الفيلا ام 6 مليون اللي هشان طلعت نأبك على شونة اداها لها بفلوسنا، فلوسنا، فلوس اسهمنا وقروضنا
الا ايه الفرق ما بين نسوان مدينتي ونسوان دويقتي عشان واحدة فيهم تتكلف 12.5 مليون والتانية تتكلف طبق عسل اسود ونص رغيف؟ شوية مية وصابون؟ طيب يعني هي اللي في دويقتي لقت المية والصابون وقالت لا؟
ده طفاطيفو ح يتندر بيا في المحافل الدولية، انا ما كنتش متصورة انه ح يطلع بالسرعة دي، ده بيطلع، بيطلع خلاص، القرن طش اهو