Sunday 14 September 2008

ياللا يا شعوعيين يا كفرة

سبحان الله يا جدع انت وهو، ده انتوا عيال شعوعية كفرة وكل شوية تقولوا كلام فارغ عن البني ادمين وقيمة البني ادم وكلام فارغ كده، استغفر الله العظيم يارب ده احنا في شهر فضيل، ايه حكاية قيمة البني ادم دي؟ هو البني ادم يسوى ايه؟ نفس طالع ومش عارف ح يدخل تاني وللا لا، استغفر الله العظيم، والناس ماتت شهدا، وساعتهم جات، نعمل ايه بقى؟ يعني لو ما كانوش ماتوا من الصخرة ما كانوش ماتوا يعني؟ عمرهم كده ح نعمل ايه ح نموت نفسنا بقى؟ انتوا ح تكفروا وللا ايه؟ احنا ناس مؤمنين بالقضاء والقدر والحمد لله على كل حال، ايه اللي بتقولوه ده؟ انتوا اكيد بتشربوا بيرة عشان تقولوا الكلام ده..هي البيرة واصحاب السوء اللي بوظوا دماغكوا كده، الاعمار بيد الله، ودول شوية عيال شمامين وبلطجية ومسجلة خطر، والحكومة ساعدتهم انهم يكفروا عن ذنوبهم بعد ما افتروا في الدنيا كتير وتولوا قوما غضب الله عليهم ويموتوا شهدا في الشهر الفضيل ده، بدل ما تقولوا الحمد لله ربنا رايد لهم الجنة قاعدين تعترضوا على القضا؟
استغفر الله العظيم يارب
استغفر الله العظيم
ربنا ما يآخذناش بما فعل المدونين منا

No comments: