Thursday 11 September 2008

بالنوسبة للمحرم في المكتبة

حيوا تحرير المرأة في الدمام حيث سمح لها بزيارة المكتبة بدون محرم
محرم في المكتبة؟ مافيش محرم في الحمام عشان السيفون مذكر وما يصحش تنفرد بيه لوحدها؟
طيب الرسول لما قال المحرم في السفر كان عشان الستات بتسافر في الصحرا وفيه قطاع طرق وهي مهما كانت عفية برضه لما يطلع عليها خمسة في الصحرا مش ح تعرف تتصرف قوي لازم يبقى معاها حد تعتمد على قوته البدنية عشان تعرف تمشي في الصحرا، حتى من غير ما يطلع عليها خمسة، افرض طلع عليها اسد، مش ح اقول تعبان وعقربة لان البدويات بيضربوا التعابين والعقارب زي ما انت بتضرب الناموس كده، وبعدين التخيير ما بين محرم او صحبة نساء لا يقلوا عن خمسة، عشان لو حصل حاجة يعرفوا يتكاتروا وينقذوا نفسهم
لكن محرم في مكتبة؟ على اساس انه ح يحصل لها ايه في المكتبة؟ مين الاسد اللي نايم في رف المكتبة اللي في الاودة الجوانية؟ مين اللي ح يغتصبها وسط هذا العدد من البشريات وامام الكاميرات، والناس؟ ح يقفوا يسقفوا ويشجعوا وللا ايه؟ ثم محرم ايه دلوقت معلش؟
يعني انا امبارح في الشغل المدير مفروض يقعد لاخر الشيفت ويمضينا انصراف ويمشي هو وياخد معاه الدفتر لان الدفتر ده مسئوليته هو، قام المدير مشي وساب الدفتر مع واحد زميلنا وزميلنا، هو طيب ومؤدب ومتدين وكويس جدااااااااااا انا باحبه قوي، هو صحيح عنده تصور انه اتقى واكثر تدينا من كل الناس بس مش مهم تصوره عن نفسه هو حر فيه بس هو طيب وكويس فعلا وخير، المهم جيت امضي قال لي انا مش ح امضيكوا غير في المعاد لان الاستاذ فلان (المدير) استأمني، كل اللي واقفين كانوا اسم الله عليهم محارم، مناديل يعني، قعدوا يتملقوه ويتحايلوا عليه مش عارفة ليه، قلت له يا فلان من حيث المبدأ اللي انت عملته ده، بما انك مهتم بالحرام والحلال، حرام لانك ساعدته على التزوير هو بنفسه، الدفتر ده مسئوليته هو والمفروض انه قدام الادارة مسئول عن الدفتر فانه يسيبه في عهدتك ويمشي هو ده تزوير، المفروض يا يمشي في معاد ما احنا بنمشي يا يمشينا في المعاد اللي هو ماشي فيه ويتحمل هو المسئولية لكن كان مفروض تقول له انا ماليش دعوة بالمسئولية دي، لانها مش شغلتي، قوم يقول لي ايه؟ تصوروا يقول لي ايه؟: انا ما عنديش الشجاعة اني اقول له كده....لو انت عندك الشجاعة ووحش بنت سبع كلميه
قلت لهم طيب ادوني نمرته حد معاه نمرة الاستاذ فلان؟ اللي يقول لي اهدي، مع اني والله ما كنت متعصبة ولا حاجة، واللي يقول لي كلها ربع ساعة ما تعمليش مشكلة، مع اني ما كنتش ناوية اكلم الراجل واقول له ابوك لابو ابوك ولا حاجة، وفي الاخر واحد قال لي: يعني انت اللي شجاعة؟ طيب انا معايا نمرته وريني ح تكلميه ازاي
شجاعة؟ شجاعة؟ ده مدير ادارة، مش رئيس قناة ولا رئيس القطاع ولا رئيس مراجيح مولد النبي، ايه الشجاعة في اني اكلم واحد فرق السن بيني وبينه تمن سنين والفرق الوظيفي بيني وبينه درجة، ثم انه غلطان، والغلط بيضعف البني ادم مهما كان منصبه يعني، هو ما يقدرش يفتح فيا لانه غلطان، وانا كنت اقدر اقدم فيه مذكرة لو عايزة والقانون في صفي والقانون يحميني، اتصلت بيه وقلت له: يا استاذ فلان، حضرتك اللي مسئول عن الامضا مش فلان الفلاني، يا اما تقعد لحد المعاد يا اما تمضينا قبل ما تمشي انما ما ينفعش تسيب الامضا مع زميل مش مسئوليته وتعمل له مشاكل مع زملائه، دي مسئوليتك انت، عايزنا نمشي حداشر ونص يبقى انت اول واحد تقعد لحد حداشر ونص وتمضي الناس بنفسك، مش دي مسئوليتك برضه؟
فيها حاجة دي؟ دي فيها اي شجاعة؟ دي فيها اي تجاوز وللا مشاكل وللا حتى جدعنة؟ مش تصرف عادي ده؟
طيب السادة الزملا اللي في الاول ما كانوش مصدقين اني اعمل كده وبعد ما عملت كده انبهروا كأني حررت فلسطين، واللي يقول لي: ليه بس عملتي مشكلة! واللي يقول لي والله جدعة! جدعة؟ جدعة في ايه؟ انا واحدة غبية ومخي على قدي، ممكن حد يشرح لي ايه وجه الجدعنة في الكلمتين الخايبين دول؟ بكرة لما تقول صباح الخير يقول لك: اما والله واد عترة
بالذمة دول امشي بيهم في الصحرا ازاي؟
مش عارفين يكلموا مدير ادارة اكبر منهم بتمن سنين، ح يكلموا اسد؟

No comments: