ما تقسوش على الناس اللي متعاطفة بشار

في موضوع سوريا ده، الموضوع مش ابيض واسود لاسباب كتير

يعني مثلا انا عرفت ان غسان بن جدو استقال من الجزيرة، وغسان بن جدو راجل شريف مائة بالمائة، بس هو مصدق الرواية السورية الرسمية للاحداث

مش لازم في الموضوع ده اللي ما يساندش الثوار يبقى شخص مش نضيف، بس ممكن يبقى شخص طيب زيادة، غسان مثلا ضحى بأكل عيشه، واحتمال كبير ما يلاقيش في التوقيت ده مكان يشتغل فيه، لأن كل القنوات الفضائية اللي ينفع غسان يشتغل فيها بتغطي سوريا ومش بتغطي البحرين.. وش كده، وهو استقال عشان عدم تغطية البحرين، وعشان هو بيقول ان التغطية لما يحدث في سوريا اثارية ومش جايبة وجهتين النظر

الكلام ده ممكن يبقى مزعج لحد زيي مثلا، بس انا مش حاتهم غسان في ذمته ابدا، لأسباب كتير، أولا لإن ذمته نضيفة فعلا، ووطني فعلا، ثانيا لأن اساسا معسكر الممانعة دول مش معاهم فلوس يشتروا بيها ذمم، دول هم دولتين تحت الحصار، وحركة تحت الحصار، وحزب بيعمل ماجات ودبابيس عشان يلاقي يصرف على نفسه لو اي حد من حلفائه خلي بيه، ولو معاهم فلوس كانوا اشتروا ذمم وخلصوا من زمان، واللي حيقول لي لا معاهم فلوس وبيشتروا ناس حاقول له حضرتك كحيان وما شفتش يعني ايه فلوس يا جعان، جرب كده تشتغل مع السعودية ولا مع امريكا وهم ينغنغوك، امال يعني الفرقة اللي بتشتغل مع السعودية كبيرة والفرقة اللي بتشتغل معاهم هم عددها قليل ليه؟ 

وانا مش فاهمة ليه فيه ناس كتير من المتعاطفين مع معسكر الممانعة مصدقين رواية الاعلام السوري مع انها مش معقولة ابدا

وناس انا باثق فيهم عمالين يبعتوا لي ميلات يقولوا لي ما تنسيش ان بشار عمل اكتفاء ذاتي من القمح، وعمل تطوير للصناعة، وساند المقاومة، وعمل وعمل

طب يا جماعة استنوا خمسين سنة عشان تقولوا الكلام ده لو سمحتوا، ما ينفعش الكلام ده تقولوه وفيه ناس بتموت، وما يصحش تقولوا لي عدد القتلى 400 بس! استنوا خمسين سنة، التاريخ لسبب ما لا يعبأ بالدم، ولا يعبأ بالقهر، ولا يعبأ بالظلم، ولا يعبأ بواحدة زي طل الملوحي، بعد خمسين سنة حيقولوا على بشار اللي بيقال على محمد علي وعبد الناصر، عشان هو فعلا عمل كل اللي قلتوه ده واكتر، بس دلوقت ما تضغطوش على اعصاب الناس، واعصابي انا بالتحديد وتقولوا لنا الكلام ده، وما ينفعش كمان تطلبوا من ناس خرجت تطلب حرية ارجعوا بيوتكم عشان ده عمل اكتفاء ذاتي من القمح والمحاصيل الاستراتيجية وطور الصناعة السورية، طيب دول بني ادمين اللي خرجوا دول، مش مشنة قمح، ولا مكنة في مصنع، دول بني ادمين، ومقهورين، وزهقانين، ومظلومين، واتقتلوا، و400 في خمس اسابيع مش شوية، و4 يتقتلوا مش شوية، ودم البني ادمين غالي، اغلى من ستميت مصنع، والف غيط قمح، وعشر حروب ينتصر فيها على اسرائيل، وانا ماليش دعوة بإن فيه ناس من مأجورين السعودية وامريكا سخنانين على الثورة في سوريا، انا مالي؟ انا ضميري ما يسمحليش اشوف ناس بتتقتل واسكت، وما ينفعش تربط الولاء الوطني بشخص، وكأن الشعب السوري في اساسه خاين وبشار هو اللي حايشه عنا، وبعدين، طب ما يسيب للناس نفس يتنفسوه يعني، كابس على انفاسهم لما انفجروا فيه ليه؟ ما يخليهم يتكلموا زي ما الناس بتتكلم، ويفرج عن المعتقلين ويسيبهم يعيشوا، ويعمل اصلاحات سياسية، هو بيربي مواشي في زريبة عشان يقولهم مالكوش عندي غير الاكل والشرب والحماية؟ بيخوفهم ليه؟ انت لو قابلت سوري في الدنمارك وقلت له: ايه حكاية المظاهرات في سوريا، حيسيبك ويمشي من كتر الرعب... طب ليه بيعمل كده يعني؟ ايه المبرر لده؟ وحزب البعث ده الحزب النازي العربي، والناس بتقعد تدافع عشان خايفة لبعدين اللي مراقبها يروح يقول ان الزعيم اتشتم وهي سكتت، وكل واحد مراقب التاني، واخرتها يموتهم ويدخل لهم الدبابات؟ وانتوا مصدقين ان الثوار مسلحين؟ وبعدين الاعلام السوري بيقول الثوار مسلحين وبيطخوا على الجيش والشرطة

طيب ماشي

مسلحين وبيطخوا على الجيش والشرطة، ويروحوا جايبين لك فيديو بتاع نضال ده، مسكوه بيقولك سحلوه وبعد ما ضربوه دبحوه بالسكينة.. الله! وليه المجهود ده كله في شخص واحد؟ هم مش برضه مسلحين ومعاهم قناصة وسلاح جايبينه من - قال ايه -  سعد الحريري.. سعد الحريري التافه ده بيعرف يسلح حد؟ طيب يا سيدي، سعد الحريري التافه بيعرف يسلح حد، بس حتى الفيديو ده اللي جايبه التلفزيون السوري نفسه ما شفتش فيه سلاح، وبعدين هو باين فيه حاجة؟ واحد مضروب لما معدوم العافية، وكل دول ملمومين حواليه، كل الشعب ده ملموم عشان يقتل واحد؟ ومسلحين؟ دول لو كان معاهم طوبة كبيرة شوية كانوا خلصوا بدل الهلولة دي

افففففففففففففف

الموقف تراجيدي فعلا

تراجيدي لإن اللي واخدين موقف متعاطف مع بشار مش ناس مأجورة، بس زي ما يكونوا كده سلموا مخهم لنظرية المؤامرة لابعد الحدود، وزي ما يكونوا مش عارفين ما يصدقوش الاعلام السوري اللي كدبه مفضوح لإن لسان حالهم: طب يعني هو معقولة واحد بيطور الصناعة والزراعة ويساند المقاومة يكدب؟ 

اه معقولة على فكرة يكدب... واساسا القمع والقهر اللي هو فارضه على الناس ده مالوش اي مبرر، وحبس عيلة عندها 19 سنة خمس سنين حبس عسكري بتهمة الخيانة العظمى مالوش مبرر، والطخ على الناس مالوش مبرر، و400 قتيل مالوش مبرر، ومافيش حاجة تشفع لده كله، حياة الانسان اغلى من اي حاجة

وفيه من اللي واخدين موقف مساند للثورة مغرضين ويا اما طائفيين ومرضى بالفاشية ضد الشيعة، يا اما هم اصلا من القبيضة فعلا بقى، لإن السعودية وامريكا بيعكموا كويس، وعندهم امل ان بشار يتشال وييجي مكانه حد زي السادات كده يبيع لهم سوريا، او عندهم امل ان سوريا تبقى زي ليبيا وتقلب حرب اهلية

ومش شرط ابدا املهم يتحقق، لإن اولا ربنا موجود، ثانيا القياد في ايد الثوار ويقدروا يسيطروا على الموقف، ثالثا، السوريين وطنيين فعلا، عشان تلاقي واحد عميل امريكاني وسطهم، حياكلوه اكل وهو واقف كده

والخلاصة بالنسبة لي، انا ماليش دعوة مين واخد موقف مع مين ومين مع ايه؟ انا ليا دعوة بالحق

الانسان من حقه يعيش حر، ومن حقه انه لا يقمع، ولا يقهر، ومش يتجبر انه يعلق صورة الزعيم، ويبقى عايش حياته خايف يتكلم، واخوه بيكتب فيه تقارير وهو بيكتب تقارير في اخوه، ولما الناس تخرج وتقول زهقنا، من حقهم يخرجوا ويقولوا زهقنا، وماحدش يطخ عليهم، وماحدش يخوفهم، ولا يموتهم، وماحدش فوق ده كله يتهمهم بالعمالة، والطرف الاقوى هو اللي يلام

وممكن تبقى مشكلة تلخبط الناس لما يبقى المختلف عليه واحد زي بشار مش زي مبارك، حيث ان مبارك لا بنى دولة، ولا احترم انسان، لكن بشار بنى دولة، لكنه ما احترمش الانسان

وانا ما اعرفش ليه فيه ناس حاسة ان الاولوية مش للانسان؟ ليه يعني؟ طظ في الدولة على فكرة، انشالله يبقوا عايشين في خيم يا اخي بس في امان وكرامة وما يخافوش من حد، حتعمل ايه بانسان مرعوب ومش قادر ينطق ولا يتنفس؟ مالوش قيمة الانسان ده، مالوش اي قيمة خالص.. واللي يكسر حاجز الخوف تحت حكم قمعي بالشكل ده مالوش عندي غير الاحترام والمساندة، واللي يقف يقابل الرصاص بالطريقة دي يبقى شهيد... ايا كانت تبعات تحركاته، وايا كانت الجهات اللي حتشمت واسبابها.. الانسان له الاولولية

قضي الامر الذي فيه تستفتيان