Wednesday 13 April 2011

الجواب السادس: باحبه يا بابا عااااااااا

الرائد احمد شومان
الرائد احمد شومان الناس بتحبه، وممتنة له على وقفته معاها، وله مصداقية عندهم لإنه عمل عملية انتحارية عشانهم، وهو بيقول لي: انا عارف اني كان ممكن اخد اعدام لو مبارك ما مشيش، صليت استخارة، وخرجت من البيت وما قلتش لحد حاجة من اللي ناوي اعملها، ولما شفت الناس سلمت سلاحي وعملت اللي عملته
بس هو له اراء كتير قوي في صالح الوطن، وتدعم موقف المجلس العسكري جدا، وتهدي الامور، انا مش حاعرف انقل كل حاجة على لسانه لإنه مخه مترتب وعنده نقاط معينة مرتبة في تسلسل كده مش حاعرف اعملها زيه
لكن مجمل كلامه انه بيقول اننا عمالين نقول ثورة مضادة والثورة المضادة الحقيقية ان القوطة بقت بتسعة جنيه، وان فيه اجهزة شغالة عشان تفشل المجلس العسكري وتفشل حكومة شرف وتخلي الناس تقول ولا يوم من ايام مبارك، واننا لازم نطور آلياتنا، وقال لي: لو بياع الفول ما حسش ان فيه ثورة يبقى مافيش ثورة، وبيقول ان الناس اللي مضايقنا حيتحاكموا حيتحاكموا، بس مش لازم النزعة الثأرية تغلب علينا لإن الثورة المضادة مش كام راس كبيرة، فيه مليون مستفيد كان بيتقال لهم يا باشا وهم بيعملوا دلوقت انهم يرجعوا النظام، والمفروض ان الثورة اسقطت نظام ما اسقطتش شخصيات بعينها، وان اهم حاجة تنجح الثورة هو تماسك القوات المسلحة وانها ما تتهددش ولا حد يشكك فيها وان الاقتصاد يتحسن، وان لازم يسقط النظام بمعنى النظام، يعني السيستم اللي كانت بتشتغل بيه اجهزة الدولة والوزارات لازم يتغير، مش بتغيير وشوش بس، بس كمان بتغيير النظام اللي كانت ماشية بيه، وقال لي بدل الاعتصامات اللي عمال على بطال لحد ما الناس كرهت الاعتصامات ما تعملوا لجان للعمال والفلاحين وانقاذ الاراضي اللي تم التعدي عليها، وجهاز الامن ده دراع الدولة، الظابط اللي اتخرج سنة 81 على وش لوا دلوقت، وما يعرفش غير قانون الطوارئ لازم يتم اعادة تأهيلهم من غير ما نعذبهم ونعاديهم، وفي نفس الوقت الامن لازم يتم حفظه بشكل حاسم، ولازم الناس تشارك في حاجة زي دي، انشالله تعملوا لجان شعبية، نخرج دفع مبكرة، اي حاجة، المهم ان الناس تحس بالامن اكتر من ايام مبارك، وماحدش يقول ما ايام مبارك كان بيحصل كذا وكذا، كان بيحصل ودلوقت مش لازم يحصل، دلوقت فيه ثورة ولازم المواطن العادي اللي نزل في الثورة يحس بتغير ويحس انه بيشارك وانه بيحمي ثورته، مش انه يفض الاعتصامات عشان مضايقاه، لازم هو يحس انه بيشتغل لحماية الثورة عشان تبقى عزيزة عليه
بصراحة عمري ما حاعرف الخص الكلام اللي قاله، لإني قعدت معاه تلات ساعات لحد ما برد ومناخيره ساحت وانا عمالة اعصر فيه وبعدين لما حسيت ان حيجيله برد قلت له لازم تاخد فيتامين سي والا الامة المصرية كلها حتمسك في خناقي اني عييتك
عزيزي الجيش
هو انتوا ليه اي حاجة في مصلحتكم مش بترضوا تعملوها؟
يعني ليه ممنوع اترجم وثائق ويكيليكس اللي فيها صورة مشرفة للقوات المسلحة؟
طب ليه مش بتقولوا مبارك تنحى ازاي وانتوا رفضتوا تضربوا نار على الناس؟
طب ليه احمد شومان ما ياخدش اذن بالظهور الاعلامي ويتكلم مع الناس وهو بيعرف يتكلم ويعبر وبيعرف يقنع اللي قدامه؟ ماهو رأيه من رأيكم في حاجات كتير، وحريص على تماسك القوات المسلحة وولاءها وعلى تماسك البلد، بس هو بيعرف يقول رأيه، انا اصلا لما قعدت معاه غسل لي مخي خالص واقنعني بكل ارائه
وسبحان الله مشيت بعد مقابلته وعديت على ميدان التحرير لقيت اللي هو بيتكلم عليه بالظبط بيحصل في الواقع، فكرة ان الناس ممكن تكره الثورة اللي هي عملتها وتندم عليها
ما كنتش حاضرة ساعة ما الجيش فض الاعتصام بالاهالي، كنت قاعدة مع احمد شومان ونازلة عصر فيه، وهو يقول لي: انت اتأخرتي مش كده؟ اقول له لا ما اتأخرتش.. كمل كمل.. ههههههه لما عذبته
بس وانا راجعة شفت قوات مكثفة للجيش في الكعكة الحجرية والاهالي بيصقفوا لهم وبيبوسوهم ويتصوروا معاهم زي يوم التنحي وبيقولو الجيش والشعب ايد واحدة، بس المرة دي عشان فضوا الاعتصام
طب ليه كده؟
ليه اوصل الناس لكده؟ ماهي الناس دي شاركت في الثورة برضه وباتت في الميدان 
ما نعمل يا جماعة زي ما الراجل بيقول ونعمل لجان شعبية لمتابعة اهداف الثورة، هي اهداف الثورة اننا نفضل نعتصم لحد ما يبان لنا صاحب؟ مش اهداف الثورة: خبز، حرية، عدالة اجتماعية
يبقى نعمل لجان لمتابعة ده
لجان تتابع العمال
لجان تتابع الفلاحين
لجان تتابع الامن
لجان تتابع الاراضي اللي تم التعدي عليها، ده في موضوع التعدي ده خضني قوي، قال لي في فترة الثورة ناس كتير تعدت على اراضي الدولة ولو راحت الاراضي دي طب حنلاقي اراضي فين نزرعها ونتكفي ذاتيا من القمح زي ما وزير الزراعة قال؟ 
الى جانب لجنة التطهير اللي احنا عاملينها
واظن المراكز الحقوقية زي هشام مبارك والمركز المصري عندهم ناس مقدمة مشاريع لاعادة هيكلة المؤسسات، والهيكل الوظيفي فيها والاجور، طب ما يقدموها
وبعدين هو زعلان قوي من وصف المجلس بإنه متواطئ، ومتضايق من الاسلوب في النقد كمان، هو شايف اننا بدل ما نقعد نرمي الناس بالاتهامات ونطول لسانا على ظباط جيش (هههههه بيزعلوا قوي، خلاص يا جماعة نعامل الناس زي مابيحبوا يتعاملوا ما بيحبوش هم يتشتموا) نتعاون ونقدم لهم مشاريع يقوم الناس تحس ان فيه تحرك في المؤسسات وتغيير بيحصل وتطوير، قوم حتى لما ما ينعكسش عليهم بشكل فوري في حياتهم اليومية يقدروا يصبروا وما يحسوش بالتأفف لإن هم حاسين بشغل حقيقي بيتعمل في التطوير والتحسين، وبيقول ان دلوقت كل الناس قاعدة مستنية لما تشوف حيحصل ايه؟ حيحصل ايه ده احنا اللي نحدده بشغلنا مش بانتظارنا.. ده كلامه
طب ما احنا فعلا عندنا مشاريع كتير لتطوير المؤسسات والوزارات والهيئات، ومشاريع كتير بخصوص الفلاحين اظن في مركز الهلالي، ومشاريع كتير في حقوق العمال اكيد في مركز هشام مبارك والمركز المصري، يعني احنا في ايدنا حاجات كتير نقدمها ونقترحها ونعملها، ولو بلجان شعبية للمتابعة، واحنا لو عملنا حملة اللجان الشعبية لحفظ الامن على نطاق واسع ممكن تنجح، وكان مالك عدلي اقترح الاقتراح ده وقال لي: اساسا المصريين بيحبوا يشتغلوا ظباط شرطة، وكل واحد ياخد له ساعتين في الشارع ينظم المرور ويشوف رخص الناس ويقرفهم في عيشتهم زي ايام اللجان الشعبية لما كانوا بيمارسوا احلامهم في انهم يبقوا ظباط شرطة
بخصوص الاشاعات قال لي اللي وصلك ده ربع اللي الاشاعات اللي اذت اسرتي واربكتنا، انا كل شوية حد يكلمني يقول لي انت لقوا جثتك على الطريق الزراعي، وواحدة راحت ميدان التحرير وعملت امي، وواحدة مرة تانية راحت ميدان التحرير وعملت مراتي، لدرجة اني قابلت عسكري قال لي: انت تعرف احمد شومان؟ ده بيقولوا بيتعذب
وبيقول لي انا ولا اتحكم عليا، ولا اتعذبت، ولا اي حاجة، بعد ما الثورة نجحت رحت الشغل، وزمايلي قالوا لي ما تجيش انت مجنون، بس انا رحت، وجم استدعوني، وحققوا معايا، ولا عذبوني ولا ضربوني ولا جم ناحيتي، وانا كمان ما انكرتش اللي عملته، لدرجة اللي بيحقق معايا قال لي يابني اقوالك دي حتئذيك غيرها، قلت له لا انا باقول الحقيقة، وبس، قعدت اسبوع منتظر وبعدين خرجوني
ودلوقت من تحت راس الاشاعات والقرف اللي جاله ده قال لي انا للحظة فكرت استقيل من كتر الضغط العصبي.. فارحموا الراجل، ده جزاته انه وقف معاكم؟
طب انا برضه مش فاهمة ليه ما يطلعش في الاعلام ويقول الكلام ده وحيوصل فكرته احسن مني بكتير قوي، لإن كلامه شيق ومرتب ودماغه منظمة.. طب ايه؟ ما يطلعوه يقول حاجة للناس يمكن يعرف يوصل وجهة النظر كويس، وبرضه لما تيجي من شاب في سنهم حيسمعوا احسن واكتر ويقتنعوا بيه، وبعدين مش ممكن حد يشك انه مضغوط عليه، لو كان بينضغط عليه ما كانش عمل اللي عمله ده، ولو بيخاف كان خاف من العملية الانتحارية اللي عملها
ثم هو مش بتاع منظرة ولا زعامة، هو قصده يخدم البلد، وقعد يضحك لما كتبت على المدونة: هو ايه اللي مصحيه لحد دلوقت؟ وقال لي انا ما بقتش انام من قلقي على البلد... طب ما تطلعوه يكلم الناس كلمتين، واللي بيطلع من القلب بيوصل للقلب، وحينفع البلد وينفع المجلس وينفع الشعب، والجيش والشعب يعيشوا في تبات ونبات ويخلفوا أغاني لمحمد الحلو وثورات، بدل الفشل اللي احنا فيه ده، احنا عمالين نفشل ثورتنا ونفشل نفسنا كده، خسارة.. خسارة.. خسارة قوي، احنا عملنا حاجة جميلة، وتعبنا، وقدمنا تضحيات، ولازم نكملها ونخليها تثمر، احنا عملنا ثورة، مش مولد.. يبقى ثورة لازم تحسن اوضاع الناس، او على الاقل تديهم امل في اوضاعهم تتحسن، مش كل يوم والتاني صابحين على اعتصام وبايتين على فضه وخناقة وصوتكم انتوا والجيش جايب للمنور زي اللي متجوزين جديد ونازلين مناكفة في بعض
يا سيدي لا تمد ايدك عليها، عشان ما عندناش بنات تنضرب، ولا انت كمان تاكلي دماغه ليتجوز عليكي
بس والنبي طلعوا احمد شومان في التلفزيون يكلم الناس، ادوله ساعة اتنين تلاتة، هو عارف بيقول ايه، ودماغه موزونة، وله مصداقية، وبيعرف يفهم اللي قدامه، بدل ما قاعدين مش فاهمين حاجة منكم بصراحة، وبرضه تقارب السن له عامل كبير

59 comments:

بندق said...

ايوة ما انتي سهرانه وباه تتحاكوا و تتسامروا
بكرا أجوزك سيد سيده

Shady said...

متفق تماما مع كلمات الرائد احمد شومان و كلماتك .. رغم فقداني التام للثقه في مجلس العسكر

Unknown said...

طب ما تيلااااااااا
اديها واحدة مباردة كدا لجان الامن و لجان كل حاجة و هتلاقى المتطوعين بالهبل
انا معايا ناس كتير و محتاجين توجية "على الاقل فى المكان حواليا"
و اجابة على سؤال متوقع
طب ما تنزلوا انتو مدام معاكوا عدد و كلام من دا ؟
كل اللى ناس محتاجاه هنا تنسيق ، تنسيق مع حد ، و حاجة تبقا معروفة على مستوى الجمهورية
عشان احنا بسلامتنا مش هننزل كدا من الباب للطاء نقوله رخصك يقول وسع يلا !! و احنا كمان الشرطة موجودة دلوقتى
و الموضوع دا كما ممكن اي حد يسخدمه فى الضد و يفسدهولنا
فالموضوع مش لجان امن بس و ممكن لجان تستلم شكاوى الناس و كدا
ابدأى بس لو بالكتابة و الاعلان عن الموضوع دا و الناس تتكفل بالباقى و انها تجيب متوطعين و ممكن الناس بتوع حملة التوقيعات "فى نظرى" نواة الموضوع دا

عبقرينو said...

لكى يشعر الناس البسطاء بالثورة وتاثيراتها لازم يكون فيه لجان شعبية تساعد الحكومة فى ادائها من مراقبة الاسواق الى ضبط المتهمين الى ماغير ذلك لكى ترجع الحياة الى الهدوء ..ومتفق مع ما ذكرتيه فى مقالك

Ibrahim said...

مش متفق معاكي ،، المفروض ميحتكوش كتير بالإعلام ،، أنتي شايفة أخواتك النوشطاء علي تويتر لسانهم طول أيه ،، خليهم قاعدين كده علي جنب ،، يشتغلوا من سكات ،، عشان مستنيلهم أي كلمة يشوهوهم ، و لو طلعوا في الإعلام كتير هيقولولك شوفوا ابتدت حملة التلميع و لحس البيدات و غيرها من قلة الأدب اللي عارفها

زعبلاوى said...

كنت ممكن اوافق على ظهور احمد شومان فى وسائل الاعلام , , ومتأكد ان كلامه هيهدى ناس كتير من اللى مش عاجبها اداء المجلس العسكرى بقيادة المشير طنطاوى , , ولكنى بسرعة استعدت كلمات شومان اثناء الثورة
وخاصاً الجزء المتعلق بحديثة عن المشير ومطالبته بالرحيل مع مبارك لانه جزء من النظام وان الجيش قد خسر الكثير بوجود المشير طيلة 20 عام
طبعا كل الكلام ده متسجل والناس حافظاه , , حتى اللى نسى ممكن ظهور شومان يخليه يحاول يتذكر ما قد صرح به ويعاود الاستماع الى هذه التسجيلات
اللى عايز اقوله ان ظهور شومان ليس له جدوى حيث سيتشكك فيه الكثيرون بمجرد ان يذكر المجلس الاعلى للقوات المسلحة والمطالبة بمساندته شعبيا حتى نجتاز هذه المرحلة
http://www.youtube.com/watch?v=lr6Y51a2AsU

إيمان said...

ربنا يكرمك يا نواره أن ريقى نشف من اسبوعين فاتوا أقول يا جماعه اللجان الشعبيه علشان نحمي بلدنا
الفرصه قدامنا يا نواره على الأقل محدش قادر يقولنا لأ
يعنى لو نزلنا ننضف الشارع محدش هيقولنا لا
لو نزلنا لجان شعبية للامن محدش هيقولنا لا
لو عملنا جمعيات اهلية للنهوض بالتعليم ودعم المدارس الحكوميه ولمينا تبرعات محدش هيقولنا لا
لو عملنا لجان شعبيه تشوف الفلاحين مشاكلهم ايه ونحاول نحلها محدش هيقولنا لا
تعرفى يا نواره كل اللى عملتو الثوره انها رجعت البلد لينا وهى دلوقتى فى ادينا شوفى بقى هنعمل بيها ايه لو اشتغلنا عليها واستغلينا الفرصه يبقى كده احنا حققنا حلم المصريين من مئات السنين لأن مصر عمرها ما كانت بتاعة المصريين .. تعرفى انا مبنمش وحزييييييييييينه لأن النهارده المصريين بيحققوا حلم على مرور مئاااات السنين مكنوش حتى يحلموا بيه ولا مليون شهيد كان يحققه .. يقوم بعد البلد ما بقت فى اديهم وهم حرين يعملوا اللى هم عايزينه والبلد تقولوهم الحقونى يلا قوموني على رجلي نقعد نعمل قعر مجلس والبيضه الأول ولا الفرخه ونخون بعض ونشتم فى بعض وكل ما حد يقول كلمتين غير رأينا نهزأ اللى جابوه ونقبح لبعض
بس انتى عارفه مش هم دول شعب مصر شعب مصر هو اللى نضف الميدان يوم 11 فبراير وهو اللى نضف الميدان النهارده وباس رجالة الجيش وهو اللى عبر فى 73 وهو اللى بينزل كل جمعه علشان يحمي ثورته وهو العمال والفلاحين مع انى كنت ضد العمال والفلاحين بس هم دول ولاد بلدي وانا واثقه فيهم
دلوقتى علشان الثورة تنجح لازم توصل لبتاع الفول ولبياعة الجرجير وهو ده دورنا وهو ده اللى الثورة المضاده مش عايزاه يحصل وهو ده اللى بيحاربوه اللى بالى بالك علشان تفضل صورة المصري قدام نفسه وقدام العالم انه ميستاهلش وفلاح ومعفن وهو ده مستواه

mido said...

قارنى بقى بين دماغ ومنطق احمد شومان
و بين دماغ ومنطق عتمان ورفاقه فى المجلس

وحتعرفى مبارك بيختار مين جمبه :)

بس المستقبل للابطال دول
عشان كده انا مطمن

mido said...

الملاحظ انه متابع مدونتك اهو يعنى بيدخل النت
وده معناه ان الجيش مش معزول زى منتى فاكرة

mido said...

بالمناسبة ملاحظين ان الاسبوع ده شهد اكبر تقدم فى تطهير مصر من رموز الفساد؟
نظيف، زكريا، صفوت، جمال وعلاء والتحقيق مع مبارك!

نتيجة تصعيد الضغط لاقصى درجة ممكنة والاعتصام اللى مش عاجبكم
صحيح دفعنا تمنه دم وناس اتصايقت مننا بس فى المقايل
وقعنا اعمدة كبيرة فىالنظام

والثورة مستمرة

الفت سلطان said...

واحدة عملت مامته, دي زي الست اللي شافت الجيش بيقتل الظباط المتمردين, الاعتصام ده غلط دلوقتي لان بيدي فرصة للمندسين يثيرو فتن, و ليه مش مصدقين ان اللي اتقتل في الاعتصام ده مش من الجيش, لو الجيش بيضرب في الوش كده كانو كتير ماتو.

الفت سلطان said...

اوعي تنسي عمر سليمان.

paperpile said...

سبحان الله يا نوارة وإنت بتعصري في الرائد شومان أأكدلك إن في كذا واحد في مصر فجأة ربنا ألهمهم بالكلام اللي الرائد شومان قاله والنهاردة قولته واتكلمت معاه مع الشباب على تويتر احنا مش حينقذنا غير الفلاحين والعمال دلوقتي! مع العلم إنا كالعادة صوتنا اتنبح يا جدعا نفعل دور اللجان الشعبية وجبهات حماية الثورة وانزلوا اشتغلوا في الشارع
عن نفسي أنا عايزة أتدفس في اللجان الشعبية بتاعت الفلاحين والعمال والفلاحين بالذات عشان أنا همي حماية الناس ده والزراعة وكده نقفل بند الاكتفاء الذاتي في المأكل (القمح) شفتي الفلاحين اللي استضافهم القرموطي على أون تي في! أكاد أجزم إن ده أحسن حلقة اتعملت فيك يا إعلام يا مصري من قرون اتنين رجالة فلاحين بجلاليب وست فلاحة بالطرحة الفلاحي وقالو أحسن كلام من أي سياسي متحذلق ولا ناشط متفلسف! من الآخر يعني
لو عايزينها تكمل سلمية حالا وفورا اللجان الشعبية تتكون والجبهات تستعد والنظام غصب عنه حيتغير!

gogo said...

لا يا نوارة انا رأيي أنة مايظهرش ف التليفزيون ولاحاجة علشان العيال اللي دماغهم لسعت واللي بيشككوا بيطالبوا بكدة ولو دة اتعمل مش هايهمدوا ... وانتي عارفة ان نسبة كبيرة من الناس لما بيلاقوا حد بيطاوعهم بيسوقوا فيها ومش هاتخلصي من زنهم .. واذا دي حاجة ممكن تتعمل فاكيد مش هايكون كلة ممكن .. انا شايفة ان اللي مصمم مايصدقش ولغاية دلوقتي بيقول بيتعذب ومسجون وكدة بيعمل كدة لغرض في نفس يعقوب .. فلو سديتلية دي هايفتحلك في حاجة تانية المهم انة يشكك ويعمل قلق وبس ... والله الموفق

kbahey said...

نوارة

انسي، تؤ، لع

خليكي واقعية
الجيش هايراركيكال بشدة، كل حاجة من فوق لتحت
عمرهم ما حيطلعوا رائد على تلفزيون يتكلم براحته
ذي هاف تو كونترول ذي ميساج
هو دة طبعهم و طبع المؤسسات الحكومية كلها و الجيش اكثر عشان الطاعة والاوامر و بتاع

دة انتي كدة بتضريه عشان بتطلعي اسمه في الميديا
و الا رئيسه لو شايل منه حيتلككله عليها

ارجو انهم يخيبوا ظني


المهم

دلوقت فاضل لستة صغيرة لأسماء بقية المبشرين بطرة:

فتحي سرور، لانه بتاع سيد قراره مفسد مجلس الشعب، و دة ميعاده الاربعاء يعني في خلال ساعات باذن واحد احد

عمر سليمان وكيل تصدير التعذيب للسي اي ايه عمال على بطال و كل الجنسيات

أحمد شفيق لانه رئيس الوزراء ايام موقعة الجمل و عشان نقطع عليه سكة الترشيح للرئاسة من أصله

محمود وجدي لانه قال ان موقعة الجمل سببها قناصة اجانب و هو وزير الداخلية

paperpile said...

أنا مقتنعة بموضوع اللجان الشعبية وسبحان الله تاني حعيد الكلام لسة كنا بنقول نفس الكلام على تويتر، يعني القلوب عند بعضيها يا رائد شومان ويا نوارة
عمال وفلاحين ومطالبهم ونرجع الأمن والنظام غصب عنه حيتغير واللي ليه مصلحة شخصية ولا شوق في حاجة حيكش
حنعمل جسر شائك بين العسكر ورجال الأعمال عشان الجواز العرفي والعلاقات المشبوهة غير الشرعية اللي كانوا فيها ده ماتحصلش تاني "بوتاتا" ومن هنا ورايح مش حيقعدوا مع بعض من غير محرم أي العمال والفلاحين إيه رأيكوا بقى؟؟؟؟

كيوبيد said...

نواره الكلام زى الفل بس ازاى التنفيذ؟؟ المشكله مش فى الكلام عندك انتى او جنب الرائد خطه للعمل معكى ومن ها الساعه احنا شعب لسه اول مره حرية من اكتر من 50 سنه فاعملين زى الحصان الى هايج عايز ياخد فى وشه من الاسطبل وهاتك يا جرى كلو طالع مظاهرة واعتصام حتى الفئوية ما صدق لقى الباب مفتوح وعايز منو يطير كلو فاكر ان الثوره دى هاتوزع عليه دهب والماظ مش عارف ان ده لسه بدرى عايز وقت وعايز صبر وعايز جهد وعمل معلش المجلس العسكرى لازم يكون فاهم مواقف الشعب شوى على العموم انا من راى بلاش مظاهرة الجمعه الجاى .وبخصوص موضوع المقال فكره فل الى فل ومعكى بس شوفى ازاى نقدار ننفذه وانا معكى وربنا يحفظ مصر من كل سواء

pooa said...

يا نواره بايدكم تكلموا الناس اللي بتعمل اعتصامات دي تبطل كلموهم فهمومهم ان الاعتصامات مهيش موضه ربيع وصيف العام الحالي عشان كل بنت كول وواد روش رايح يعمل اعتصام والله الواحد قلقان على البلد . سيبوا المجلس العسكري يشوف شغله شويه وبينوا للناس ان الامن مستتب ابوس ايدكم كده هتفلت خالص والجيش حاسه فعلا انه بدا يزهق واحده صاحبتي بتقولي ان الشغل التقيل للثورة المضاده هيبدا لما الرئيس الجديد يمسك البلد والجيش يرجع سكناته لان كتر الاعتصامات والثورة المضادة عملت فوضى ومعدش حد ملتزم بقانون ابوس اديكم اجتمعوا مع المثقفين واعملوا لقاءات وندوات عشان الثقه ترجع بين الشعب وبين الجيش والاعتصامات في التحرير والكلام الفارغ ده يخف شويه .

arabian_faithful said...

السلام عليكم

أنا معنديش غير تعقيب واحد بس

أنا عاوزك لوجه الله توصلى الأمانة دى للرائد أحمد شومان

يا فندم يعلم الله إن الواحد لما شاف موقف حضرتك عرف أد أيه مصر مليانة رجالة و حضرتك شرف لكل مواطن مصرى
بالنسبة للهجوم على الجيش فده مش مننا إحنا الناس اللى الظاهر حنفضل مفعول به على طول و أنا نفسى أعرف الناس اللى أحتلت التليفزيون و بتقل فى أدبها دول مين و عاوزين أيه و بيتكلموا بإسم مين
و يافندم جيش مصر مش بس اللى لابسين البدلة الميرى جيش مصر هوا كل مصرى حر أمنية حياته أنه يقدم شىء لبلده يقابل بيه وجه كريم إحنا بس مشكلتنا إننا أتعودنا على سياسة القطيع فبقينا محتاجين دايماً حد يقود الدفة و يوجهنا فالكرة الأن فى ملعب الحكومة لو الحكومة أعلنت عن البدء فى تنفيذ أى مشروع قومى سيشارك أكتر من 20مليون مصرى على الفور بس لازم المبادرة تكون من الدولة

و أخيراً يا فندم ربنا يجازيك خير و يقدرك على خدمة البلد و قادر ربنا يجمعنا فى حرب تحرير الأقصى و ينصرنا على الصهاينة

مصـــــرية said...

اولا يا بختك بقعدتك مع شومان يا نوارة
ثانيا كلام سيادة الرائد مقنع فعلا وانا شوفت فيه الثائر الحق احنا ثوار لكن فضلنا ثايرين ومابنهداش شومان ثار بس هدأ ليرتب افكاره فيما يخدم مصلحة البلد وهو ده الثائر الحق زى ما قال عنه الشيخ الشعراوى الله يرحمه
وانا نفسى فعلا يتكلم احمد شومان للناس لان كلامه بيحظى بثقة كبيرة وهيفسد كتييير على بتوع الثورة المضادة وظباط اليوتيوب اللى كانوا مختفيين ساعة الثورة وظهروا بعد ما خلصت
وبعدين ازاااااى الرائد احمد شومان يستقيل ده احنا مطمنين طول ما امثاله فى المؤسسة العسكرية
تحياتى ليكى وللرائد البطل

Heba said...

اصلا يا نوارة الحركة اللي عملها احمد شومان بتسليم سلاحه و انضمامه للناس في التحرير كان عندي احساس غريب انها بإذن من رؤساءه عشان توصل رسالة معينة تهدي الناس ...آه ان عارفة انها فكرة عبيطة شوية..بس اللي عمله كان عليه تسليط اعلامي كبير و بيوصل دلالة ان الجيش مع الشعب ده وقت ما كان الجيش على حياديته و مش عارفين معانا و الا ضدنا و في اي وقت ممكن يطلع من حياديته و ياخد موقف ضدنا و هنا جاء اللي عمله شومان و كان زي البلسم على قلوب الناس و لسة فاكرة الجزيرة حطت اسمه بالبنط العريض و بتقول معاه كمان 15 ضابط!!
مع دلالة قوية ان ده معناه ميل الجيش للشعب كلن فهمنا كده حد فهم غير كدة؟..ده رغم ان احمد شومان مش بيمثل الجيش..الجيش بقيادته مش بضابط صغير فيه و كام واحد تاني زيه
كان حيفيدنا بإيه تصرف شومان لو قيادة الجيش كان ليها موقف مضاد من الثورة؟ و كمان يمكن الجيش فيه آلاف تانيين مؤيدين لمبارك و بيحبوه من ايام ما كان بيحضر مراسم تخرجهم و اكيد في الجيش علموهم الولاء له قبل كل شئ
و انا باستغرب طلبك بصراحة يا نوارة...يعني هو يطلع يتكلم بأي صفة؟ مينفعش يتكلم كمواطن عادي - بس مشهور - لانه ضابط في الجيش و اى كلمة حيقولها حتطلع بدلالة ان دي سياسة الجيش تجاه الثورة و ده ممكن ميكونش صح

ده رغم ان انا معاكي انه بيقول كلام صح
بس البركة فيكي تنقلي لنا افكاره و مقترحاته لانقاذ الثورة بس مش ضروري تنسبيها له لاحسن تودي الراجل في داهية

nashwa said...

المجتمع المصرى محتاج مليون حاجة غير امن الاهالى الموضوع دة خطرولا يمكن تركه للهواةالامن مسئولية الدولة والدولة فقط والا انفرط العقد الاجتماعى هيا نبادر فىالصناعة التعليم

احلام جوليا said...

طبعا انا مقتنعة بكل كلمة لاني اقترحت عليك نفس الشئ امبارح وقلت نفس الكلام تقريبا وقلت لك اعملوا لجان تفتيش على الاسواق لمنع ارتفاع الاسعار وخدمة توصيل انابيب البوتاجاز للبيت وقلت لكم لو الناس شافت وشوشكم وعرفت انكم الثوار الي بتخدموهم حيحبوكم ويسمعوا كلامكم والي حتقولوا عليه حيسندوكم لكن كده كل يوم بيزيد عدد الي بيقولوا كان ايام مبارك لازم بسرعة تتجمعوا وتقووا الجبهة الداخلية علشان نبقى اقوى من الخارج وقسموا نفسكم وسيبوا كل واحد يعمل شغله الاحزاب بتتكون والمحاكمات الحمد لله بدأت والجيش باذن الله يحافظ على الي عملتوه ويحمي السجون وخصوصا طرة الحبيب على قلوب المصريين وفيه لصوص الشعب وانتم تعملوا الي عليكم وتطوروا مصرعلشان تكسبوا الناس دلوقت ودي فرصة علشان الناس ترجع تحبكم تاني والله

Unknown said...

و الله يا نوارة انا لو في مصر كنت سبت بيتنا و جيت قعدت في مصر ( القاهرة في لهجة اسكندرية ) و روحت اتكلمت مع المراكز الكتير اللى عندها مشاريع و احاول احركهم علشان يحركوا الحكومة و المجلس تجاه المشاريع دي و نشغل الشباب اللى عنده حماس للبلد في البناء

الدرويش المرووش said...

والله مصر مليانة ناس زى الفل و الورد و الياسمين

بس السباخ كان مغطيهم

يا رب كملها على خير

Argenda said...

كلام جميل و بالذات موضوع الطماطم و احساس المواطن بالثورة بس برضه مش لازم ننسى المطالب من محاكمة و اشراف قضائي بس برضه الرغيف أهم
طيب ايه الاليات لده و ايه التنده اللي تجمعنا كلنا عشان ننفذ و امتى نبدأ
لازم اجابات سريعة و بدء أسرع و الا نبقى احنا اللي متباطئين مش المجلس

Early bird said...

على فكره موضوع القوطه ده مش مقياس اصلا من زمان قوى اسمها مجنونه يا قوطه لان سعرها بيتجنن يعنى شويه بقرش وشويه بعشره جنيه فمش كل شويه حد يقول الثوره سبب غلاء القوطه
الرجل العادى ورجل الشارع عمره ما حيقول ولا يوم من ايامك يا مبارك الناس عملت ثوره شعبيه وربنا وفقها ورجعت بيوتها بس مالهومش بقى فى الخناقه اللى حصلت بين من يسمون انفسهم بالنخبه من ناحيه والجيش والشعب نفسه من ناحيه اللى حيضيع الثوره_وان شاء الله مش حتضيع بس مسارها بينحرف _ سياسه فيها لاخفيها مش اكثر وان الناس العاديه شايفه ان الجيش كان بطئ وانه لازم يسرع اكثر من كده ومش واكل معاها خالص حكايه ان صفوت مش حرامى وعايزيين دليل وسرورمش حرامى وعايزيين دليل وان عزمى مش حرامى وعايزيين دليل وفى نفس الوقت اللى بيسرق محفظه ممكن تكون فاضيه ياخدولوا وهو واقف كده 5سنين سجن بمحكمه عسكريه بس كل ده ميوصلش ان الناس تخون الجيش والناس اللى هللت للى فضوا الاعتصام مش علشان كارهيين الثوره لا علشان بيكرهوا اللى بيخون الجيش
فيه ملفيين مهمين الجيش وحكومه شرف ممكن يتعامل فيهم الاول هو وقف نزيف الاموال والمتمثل فى اتفاقيه الغاز وفى اتفاقيات الدهب والبلاوى اللى باعها المخلوع هو والاضيشه لانهم باعوا ثروه مصر كلها مقدما ولو مش عايزيين يغيروا الوحوه القديمه فى الوزارات وخاصه لبترول والاثار يفرضوا عليهم سياسه رقابيه صارمه مع مراجعه كل العقود وايقاف كل شئ حتى يتم انتخاب برلمان جديد اما الملف التانى فلوسنا المنهوبه فى كل مكان وده بقى على مهلهم فيه لان وقف النزيف اهم بكثير من استراجاع المنهوب

على فكره مجبتش سيره ملف المياه ولا السياسه الخارجيه لان الجيش والحكومه عشره على عشره فيهم
الا ايه وضع الشرطه دلوقتى يعنى رجعوا والا لا وبعديين مش الشرطه دى شغاليين فى حكومه برضه
موضوع شومان انه يتكلم وجييه بس ده اصلا اثناء الثوره كان بيوجه كلامه لعنان وبرضه مكانش بيشكر فى المشير يبقى حيطلع اصلا مهما قال مش حيبقى فى صف المجلس العسكرى اللى بيرأسه المشير

زينبو said...

نواااااااااااااااارة انت نايمة ،النيابة تقرر حبس حستي وجيمي وعيلاء 15 يوم .
لولولولولولولولولي

Jameel said...

ست نوارة أولا صباح الخير
و تانيا الكلام ده عين العقل و إذا الناس عايزة تسمع من حد عن الجيش مفيش أحسن من شومان يسمعولوعشان جازف بحياته عشان الثورة و الوطن وكمان عسكري و يعرف المؤسسة العسكرية من الداخل

أنا زي كثيرين عندي شك بأن القيادات العليا بالجيش قد تكون تورطت في السابق في أعمال فساد و هذا لأن الجو كله كان فاسد ولكن المهم أنه في اللحظة التاريخية الحاسمة إنحازوا للشعب و الوطن وعقيدتهم العسكرية وهذا برأيي المتواضع يجب ما قبله و إن كان لا شك إذا كان هذا هو الحال يفسر التباطؤ الحاصل

الشعب قادر على إزاحة هذا الهم الثقيل عن صدورهم خصوصا بعد أن إنكشف معدنهم الأصيل على المحك الحقيقي . لماذا لا تقوم مبادرة شعبية بإعفاء جميع المؤسسة العسكرية عن كل ما حصل قبل التنحي إعفاء شامل و على بياض. و بهذا يرد الشعب لهم الجميل بالإنحياز لهم كما إنحازوا للشعب. هذا سيقطع الطريق على أي من النظام البائد الفاسد اللي يفتكر إنو ماسك على حد ممسك و ممكن يضغط عليهم بيه.
العفو عشان محدش يزعل عن ما قبل التنحي فقط و لعلة الجو العام الفاسد.

Hana said...

كلام جميل..
وعندي سؤال للجيش، هو لو وحدة مش مصرية بترجم وثائق الويكيليكس بتاعة الجيش وحتنشرهاأونلاين بعد أسبوع - إن شاء الله، حتمنعوها من دخول مصر؟

Unknown said...

طيب يا استاذة نوارة طبعا كلام الاستاذ احمد شومان قمة في الروعة بس الاروع لو كان الكلام ده يبقى على ارض الواقع يعني ممكن حد من مجلس امناء الثورة ياخد منه الافكار ويتم طرحها ع الجمهور ويتم مطالبة كل فرد بالاشتراك في اللجنة الي هو حاببها وشايف انه ممكن يقدم فيها

وكمان ياستي الموضوع محتاج تفعيل الجمعيات التنموية الي هي مكتوب عليها بالخط العريض تنمية المجتمع وبتاخد عضويات اشخاص بدون ما تقدم المفروض الجمعيات تنزل توعي الناس سياسيا اقتصاديا وخلقيا وتفهمهم بالواجبات والحقوق وما اكثر الجمعيات التنموية فمصر

مهندس مصري بيحب مصر said...

كلام جميل و كلام معقول ما أقدرش اقول حاجة عنه
:)

elzahraamegahed said...

يا ريت اقتراح اللجان الشعبيه فعلا يتعمل بيه، حتى لحفظ الأمن

وبالنسبه لحبس المخلوع وعياله على ذمة التحقيقات عايزه أعرف سوزان فين من الكلام ده؟

سوزان لو فضلت بره هتولع فى البلد علشان جوزها وولادها وهى أساسا سماويه ، يا ريت يتحقق معاها هى كمان بدل ما تولع لنا ف البلد
محدش يقول دراعاتها اتسجنوا ، لا، عمر سليمان وفاروق حسنى وكلاب كتير لسه بره، ده غير قرايبها الانجليز بمخابراتهم أكيد سدادين

لازم سوزان ما تتسابش كده

mohamad said...

والله يا نوارة نفسي أتطوع في حاجة تساعد البلد . . بس السكة منين ! ! والأحزاب اللي طالعة حاجة تعر . . كله راشق في أنا هاآخد إيه

بساطه said...

لأاااااااااه كله الا اغاني محمد الحلو شوفلنا حاجه تانيه الله يكرمك..
فعلا الراجل ماشاءالله تبارك الله دماغه نضيفه لحسن نحسده

المهم ... ممكن نتعاون مع جمعية خدامين مصر .. دول عندهم بردو مشاريع جاهزه .. وبصفه عامه ممكن يحصل تعاون بين الجمعيات

وموضوع ان الجيش يسمحلك بترجمة وثائق ويكيليكس مستحيل في رايي ... وهو ده الصح

Anonymous said...

سمعت منذ قليل كلام الثائر زياد العليمى فى برنامج صباح دريم، وللأسف فقد لمست فى كلامه الغرور والاستفزاز ايضاً، صار سوبر مواطن، ونحن اقل من مواطنين عاديين، يطالب بالنزول مرة أخرى للتحرير وتعيين مجلس رئاسى ، واختيار رئيس جمهورية ، اليس هذا تحدى ضد الارادة الشعبية.....

Rowaa said...

الله يكرمك انت والرائد احمد شومان اقنعتينى
ربنا يبارك فى الثورة وفى مصر واهلها لكن لاابد من الايغفل الشعب عن سير المحاكمات ولابد من معرفة من القائمين بيها والا ييقوم بالتحقيق فلول وعبيد النظام السابق
اقصد الناس تبدا فى بناء الامجاد وتحسين احوال البلد لكن عينها الثانية مصحصحة على سريان التحقيقات

Rowaa said...

تاكيدا لوجهة النظر الى قولتوها اسمعى ما قاله الشيخ الشعراوى
http://www.youtube.com/watch?v=Q99GEHMR3DA&feature=player_embedded

Passant said...

فكرة كويسة اوى يا نوارة يا ريته يطلع فى وسائل الإعلام بس مش ده ممكن بضره فى شغله انا موافقة اوى على الفكرة بس المهم الراجل يبقى فى امان مش بروح عشان خاطرنا و ياخد لقب متواطئ هو كمان هو انتى لسة ما صحيتيش و لا ايه دانا دخلت اول حاجة على البلوج كنت عايزة اعرف رد فعلك ايه على حبس العائلة المقدسة 15 يوم على ذمة التحقيق

Unknown said...

يا ريت يبقى فيه حملة عشان اللجان الشعبية
ويكون فيه تعاون مع الحكومة
عشان فيه ناس مش هتمشي صح الا بالعافية
شوفوا ايه الالية لتنفيذ ذلك وانا واللي معايا معاكم
وبنا يوفقك ويوفقنا

Hesham essa said...

من هنا ورايح اللى عامل ثورى قوى وراجل جامد يفكر فى مشروع ينفع بيه البلد وكل ابن ..... حلال ودماغه كلها سياسة وبيعرف يقول كلمتين ينزل الشارع يخاطب الناس اللى من 70 سنة لم تسمع سياسة وتفهم الوضع عدل
اما اصحاب الكيبوردات الحمر فلو سمحوا يسكتوا بقه وجعوا دماغ ابونا بالخطط المضادة والافيهات السفيهة والسب فى خلق الله
يعنى لما كل اللى وثقنا فيهم وشفناهم فى الشارع من قبل ومن بعد 25 يناير خونة
همه كانوا فين
رجاءا هذا وقت يجب ان نستيقظ من غفوة الاعتصامات الى صحوة الانجازات
وكل واحد يجيب الغلق وييجى يبنى فى بر مصر

jehad said...

كانت الجزيرة استضافت احمد شومان بدل ما تستضيف نبيل لوقا اللي كنت حاسة ان هايجيني السكر والضغط منه...وفرحت لما اتصلوا عليكي قلت ايوة جالك الموت ياتارك الصلاة بس خيبتي ظني كنت عايزاكي معلهش تفرشي الملايه وتردحي له

واحد من الناس said...

شومان
واحد من جنود مصر
خير أجناد الأرض

ESRAA GALAL said...

طب يلا ماهو لازم نبدأ ولازم نشتغل انا برده قريت مقاله لعلاء الاسوانى كان بيتكلم عن حاجات مهمه عايزين نجمع كل النقط اللى قال عليها علاء الاسوانى واللى قال عليها احمد شومان ونبتدى...بس انا ملاحظه ياجماعه اننا ناسيين الناس اللى اتقبض عليها ومافرجوش عنهم من ايام الثورة لغاية يوم 9 ابريل وصفحة النديم جابت اسمائهم كلهم...برده الناس ديه مش عايزين ننساها

ESRAA GALAL said...

برده يانوارة المفروض ماننساش الناس المحتجزة http://tahrirdiaries.wordpress.com/list-of-detainees-%D9%82%D8%A7%D8%A6%D9%85%D8%A9-%D8%A7%D9%84%D9%85%D8%AD%D8%AA%D8%AC%D8%B2%D9%8A%D9%86/

ديه القايمه اللى باسمائهم

hassn hamdi said...

الدكتور صفوت حجازي بنفسه شهد على ان الجيش ضرب نار وقال ان فيه ضابط صاعقة حط الرشاش في بطنه وقال له امشي أحسن أفرغ الرشاش ده في بطنه، قام الدكتور صفوت فتح البدلة وقال له اضرب انا الدكتور صفوت حجازي، فخده الضابط بالحضن وباسه وقال له امشي يا دكتور ارجوك علشان الاوامر اللي جايلنا اننا نضرب النار على اللي يرفض يمشي
الدكتور صفوت حجازي من القلةالمندسة أو بلطجي مثلا؟
خليكوا منطقيين ومنسجمين مع مبادئكم.. قولوا لمن أحسن أحسنت وللمسيئ أسأت ويجب أن تعاقب
ثم مش المجلس العسكري قال انه هيحقق في احداث يوم الجمعة.؟ فين هيه التحقيقات دي؟ يعني ما سمعناش أي حاجة عنها وكأن اللي اتقتلوا دول مش بني آدمين

أرنوب said...

برافو عليكي .. هذه من المرات النادرة اللي تقولي فيها حاجة لها قيمة .. واضح إنك بدأتي تاخدي الدوا وتنتظمي في العلاج
:):):):):):):):):):):):):):):):):):)

Tamer Nabil Moussa said...

نوارة ممكن اسال سؤال ليكى من غير زعل

انا بتابعك من فترة كبيرة واحيانا اتفق معاكى في ما ذهبتى لية واحيانا لا ودة شىء طبيعى واختلاف الراى لايسفد للود قضية

عايز اعرف لية كلامك فى نوع من السخرية

مجرد سؤال هل دة نوع معين من انواع الكتابة الصحفية

ولا دة مجرد اسلوبك وطريقة عرض لاافكارك

مع خالص تحياتى

محمد نور الدين said...

ست الكل مساء الخير


الصحافي لا ينقل انطباعات


لقد قرأنا انطباعات النوارة عن أحمد شومان ،و لم نقرأ رأي أحمد شومان ، بل أكثر من ذلك إن عبارات مثل " قعدت معاه تلات ساعات لحد ما برد ومناخيره ساحت ،وبعدين لما حسيت ان حيجيله برد قلت له لازم تاخد فيتامين سي والا الامة المصرية كلها حتمسك في خناقي اني عييتك " يبدو أنك نسيت أن من كان معك ضابط في الجيش المصري ، سليل الضباط الأحرار ،وجيش العبور ،وليس مطرب ناعم ومرهف الإحسان خايفة عليه من هبة نسمة .
بدون شك الرائد المحترم لا يستطيع أن بوح بكل شيء ، لكن أتمنى أن يكون قد أسر لك برأيه الحقيقي عن الفئات العليا داخل مؤسسته . أقول الفئات العليا يا النوارة وليس المؤسسة حتى ما تفهمنيش غلط .
تحياتي الصادقة

طبيب بيطري said...

يابنت الحلال
والله العظيم انتوا عقدوتني يعني لازم شومان يقولكم عشان تعملوا طبعا مع كامل احترامي لشومان
بس يعني شباب الثورة غايبة عنه الافكار دي ليه لدرجة ان واحد بيقول لباسم يوسف لما مبارك يتحاكم كل حاجة هتظبط يعني لو كان مات كنا بقينا امريكا
ومسكوا علي لهجة طيب ما البلد كانت بتخسر ايام مبارك جاين ع الاعتصامات ليه
طب زمان كانت بتخسر عشان الحكومة زبالة دلوقتي الحكومة عسل لكن فيه ناس مخها علي قدها
فكرة اللجان الشعبية دي ممتازة
كمان لازم تعملوا مبادرات لزيادة الانتاج
روحوا اعملوا مليونية ف العاشر من رمضان وقولوا لاصحاب المصانع احنا هنساعدكم يوم الخميس نجيب لكم اي حاجة ننقل لكم حاجة لو هنشتغل عمال معاكم يوم الجمعة قصدي ببلاش يعني
مبادرة ساعتين عمل زيادة عشان بلدنا
انتوا لو فكرتوا ف زيادة الانتاج هتطلعوا افكار احسن مني ميت مرة
طيب اعملوا 7 وفود ولا عشرين واتبدروا ف دول افريقيا احنا وفد شباب الثورة وهنساعد ف اي حاجة
وفود اطباء ف دول افريقيا تساعد ف علاج الفقرا ببلاش وخلوا الجيش ينقلكم ببلاش وخدوا دوا معاكم
دا هيفيد مصر ف موضوع النيل
وفود للدول العربية لتشجيع السياحة من المرشدين السياحين وكام مؤتمر كدا
شغلوا دماغكم ف العمار صدقوني هتشتغل احسن م الخراب
علي الله كلامي يوصل
وزي ما عملنا التوقيعات يانوارة
انتوا مش لميتوا 10 الاف توقيع باين ولا 100 الف
انا عاوز 5 الاف شاب وشابة زي الفل وبيعرفوا يتكلموا واتبدروا ف المنطقة وساعدوا الناس حتي لو بابتسامة

طبيب بيطري said...

اه ملحوظة
خلوا رجالة 6 ابريل يهدوا شوية والا هيتعمل فيهم زي معتصمين التحرير ومش بعيد شباب مصر المرة دي يكشفوا علي عذريتهم
خليهم يبقوا محترمين في لغة الخطاب مع الجيش مش بقول يغيروا المفردات بس بقول لغة وطبعا ائتلاف شباب الثورة دول كسبوا كراهية زي الفل
خلوا اللي بيعرفوا يتكلموا هما اللي يتكلموا
مش مقضينها سياسة وكل واحد ناقص يقول هترشح للرئاسة
قولوهم اخزوا واشتغلوا من اجل مصر مش من اجل الكراسي والوظايف المرتاحة
لموا الناس حواليكم عشان يساعدوكم بدل ما تلموهم حواليكم عشان يعملوا اعتصامات
بالعربي كدا
الشعب يريد زيادة الانتاج

Ahmed . M . Abdulrahman said...

كلامك جميل وانا متفق معاكى فيه كله

بس انا حاسس ان المجلس العسكرى عنده مشكله نفسيه

دا تقريبا مبيتكلمش غير من ع لفيس بوك وبالقطاره

ويوم مابيطلع علتليفزيون بيبقى فرح
الحمد الله جت سليمه
ربنا يعدى اليومين الجين على خير

دا مقال الاعتذار للمجلس العسكرى الى حطيطه على مدونتى
الرابط : http://misr25jan2011.blogspot.com/2011/04/blog-post_12.html
____________________

الى عاوزنى يجينى

مدونتى مصر ........الروح و النصر
http://misr25jan2011.blogspot.com
ادعمها تدعم مصر والثوره ادعمها ولا تبخل
___________________

أرنوب said...

الحمد لله تخلصنا من كوليرا أل مبارك .. مرحباً إذن بسرطان الإخوان والسلفيين وهما (التطور الطبيعي للحاجة الساقعة) الذي ستسفر عنه ثورتكم التي تخليتم عنها وتركتوها للضباع تنهش لحمها .... حتنشري التعليق ده يا روح ماما وبابا أم سيلقى مصير سابقه ؟

Anonymous said...

الفساد السياسى..,الفساد السياسى..,الفساد السياسى..,هذا هو الفساد الأخطر,الذى يجب أن يحاسب عليه مبارك وأسرته ومافياه..,هل نتخيل حال مصر الآن,لو كان قد حكمها رؤساء أمناء ؟,هذا الرجل,ضيع ثلاثين عاما,من التزوير للإنتخابات,وعوار القوانين والدستور,وظلم وتعذيب معارضيه,وإرهاب الجهاز الأمنى,وإهانة الشعب المصرى,بسياسة خارجية لا تخدم مصالحنا,بل مصالح إسرائيل وأمريكا. د. شريف عبد الحكم

Anonymous said...

بصرف النظر عن كل ما يجرى حاليا,فإن المصريين أمامهم خياران بلا ثالث,إما أن نوحد جهودنا,لإنقاذ وإنجاح ثورتنا,أو نضيعها,كما حدث بعد ثورة ١٩١٩,وننتظر أخرى قد لا تأتى. د. شربف عبد الحكم

emmy said...

فيه ناس مصممة تجيب آخر كل حاجة طيب مين المستفيد لو جبنا آخر مصر؟لما يكون الناس بيفضوا الاعتصام دلوقت عشان خلاص اعتقدوا انه هيولع البلد يبقي الخطوة القادمة هنتضرب في الشارع لو نزلنا مظاهرات عايزين كده؟ طيب ازاي نتفاداه؟ الله يخليكم فيه اختراع اسمه أقول ايه أمتي وازاي عمرنا ما هنخون مبادئنا لما نلتزم بالنقد الموضوعي وكمان يبقي فيه كياسة في التصرف العالم كله تعاطف معانا لما كنا شباب مؤدب مسالم في مواجهة الديكتاتورية انما لو تحولنا الي شباب متشنج بيضرب في كل اتجاه وتلطيشه هو أكبر دليل علي رعونته وفقدانه لاولويات المرحلة حد هيتعاطف ولا يساند ولا حتي يقاوم اننا نتضرب ان شالله بالنار؟؟؟ لازم نعرف نحقق اهداف الثورة صح وطبعا مش من أهداف الثورة المواجهة العسكرية بين افراد القوات المسلحة والشعب ولا ؟

Unknown said...

فكره تمام بس يا ريت تبقى على ارض الواقع
الشباب اللي كانوا في حملة التوقيعات معاكي ان شاء الله
واكيد فيه شباب تاني هتشارك معانا واللجان الشعبية موجوده
يا ريت زي ما كان فيه حملة للتوقيعات يبقى في حملة
لعمل لجان لمتابعة اهداف الثورة

Wardaya said...

@hassn hamdi و أرنوب
الحمد لله ان لسه في ناس مش غرقانين في الاحلام الوردية
في ناس مش عايزين يعترفو بالحقيقة المرة عشان مش هيبقو مستقرين

وائل جلال said...

انا متفق مع كلام الرائد احمد شومان واعتناعي التام انه اكبر مشكلة هي عدم الوعي وغياب الرؤية والنظرة المستقبلية ودي ميراث اكثر من 50 سنه دي غير الامية وانتشار الفساد وسوء الحالة الاجتماعية اللي فيها البلد عني التغيير مش سهل ولو احنا مش هنتعب ونشتغل يبقى مفيش ثورة ولا دياولو وانا عندي مقترح بسيط وانا سميته يلا نعمل ثورة وعشان مطولش ده موجود في http://elofouk.blogspot.com/
او جروب يلا نعمل ثورة
وربنا يسهل وسترها معنا عشان اللي جاي صعب اوي