Monday, 11 April 2011

ورسالتين من الرائد احمد شومان على الموبايل بتاعي.. اصورها لكم؟

اه بالمناسبة
المأليفاتية المطبلاتية النصابين الكدابين الاوساخ اللي عمالين يشنعوا على الرائد احمد شومان وفعلا حيضروا الراجل في شغله وانا ودعاء مكلمينه ستين مرة وبنطمن عليه دايما 
احمد يوم الجمعة اللي نزل فيها الظباط المعتصمين بعت لي الرسالة دي على الموبايل بعد ما كنا بنتكلم في التليفون:
"لازم نتفق نبقى ضد اي فتنة في صفوف الجيش في التوقيت الصعب ده. مهما كان الاختلاف في اسلوب وشكل وطريقة قيادتهم للوطن. الفتنة قد تؤدي الى ظهور ميليشيات مسلحة يستغلها البعض في أمور ترجعنا لعصور الظلام.."
وبعدين دلوقت بعت لي رسالة تانية على الموبايل:
"اذا كنتم انتم اهل النخبة مشغولون بمصر وحاضرها ومستقبلها وتحاربون من اجل كسر شوكة "الثورة المضادة" كيف يرى المواطن العادي "الثورة" والمرور والشوارع والغلاء..... وكل نواحي الخدمة العامة والتعديات بدون رقيب والكسل والاهمال العمد من البعض. هذه اخطر اساليب الثورة المضادة يا ريت نمشي على التوازي ونقنع الناس يدافعوا عن ثورتهم.. أرجوكم أعلم ان القضايا كثيرة ومتنوعة لكن احساس المواطن العادي بثورته مهم جدا"
-----
طب اقول له ايه؟ اقول له ربنا بالينا بناس صايبهم في مخهم؟ 
انت صح يا احمد.. بس مين يسمع
الا هو ايه اللي مسهره لحد دلوقت؟ مش مفروض ينام بدري؟ :) منكم لله طيرتوا النوم من عين حتى ظباط الجيش اللي بيناموا من المغرب

38 comments:

tito said...

انت كاتبه انه بعتلك رساله علي الموبايل بتاعك انت غالبا الناس لما بتبعتلك رساله بتبقي علي موبايل حد تاني

الشه علي بالليل عشان تبطلي تقلشي علي مخاليق ربنا ما ينام المغرب ولا العشاء فككككك

Radwa ElShami said...

معرفتيش تقفلي من غير متضحكينا برضو!

Reem Wageeh said...

مش هتفرق يا نوارة أصلا...هيكذبوا كده كده
فى ناس عندها إستعداد تخون أهلها فى المرحلة دى
أنا بعت لبلال فضل على تويتر وقلت له ده مش وقت نصح عقلانى ...ده وقت عرض السيناريوهات المحتملة للأحداث ..يعنى لو الثوار والمعتصمين اتصرفت كذا هيبقى رد الفعل من المجتمع إزاى ومن المجلس العسكرى إزاى ...عشان الناس تبقى عارفة رايحة على فين
والكلام هنا المقصود بيه الناس المحتارة اللى مش عارفة تثق فى مين ...مش على اللى بيدوروا على مصلحتهم!!

نبرة التشكيك مبالغ فيها وكتيرة ...والمنطق والحكمة مطلوبين
وربنا يستر يارب ويوحدنا على كلمة الحق ويحمى مصر يارب وكل باحث عن حق يارب:)

رضا على زكى said...

الله ينور يا نواره يا بنت الفهومى

Haya said...

لا إله إلا الله دي عين وصابتكو

magda said...

ربنا يستر علي البلد والله الواحد متنكد ومش عارف يثق في مين ولا يصدق إيه

Argenda said...

كنت سمعت من واحد ان الثورة المضادة بتخرج من قلب الثورة و شكله هيصدق و يحصل
تعرفي اني لقيت جروب فيس اعضاءه 75 الف من بتوع اسف يا ريس عايزين ينزلو 25 ابريل و كمان في عيد ميلاد المخلوع صحيح في اعضاء بتشتم بس العدد برضة كبير
لازم نلم نفسنا بسرعة لأن ممكن ناس مخها متسلط عليها تضيع كل حاجة و ميدان التحرير يتسرق لبتوع المخلوع
بمناسبة الناس سمعت واحد بيقول خدت ايه من الثورة الطماطم كانت ب 2.5 دلوقتي ب8 و ده اللي يخوف لأن ضهرنا الناس و الجيش و الاتنين بدأ حد يبعدنا عنهم مينفعش نسيب مبارك و عيلته و رجالته و برضة مينفعش نسيب أكل عيش الناس الاتنين اولوية مش واحد بس

magda said...

يانوارة من فضلك بلاش تتكلموا بالالغاز الواحد عايز يفهم ويطمن

nosseir said...

بصى هو الجيش غلط فى طريقة فض الاعتصام..الموضوع مكنش محتاج جو الارهاب اللى عملة دة...وبرضة المعتصمين غلطانيين عشان كان مفروض اصلا يحافظوا على مدنية ثورتهم وان محدش عسكرى يخش فيها... بس طبعا لما نيجى نعتب المفروض نعتب اكتر على الكبير اللى هو الجيش... الخلاصة ...بعد ما مبارك يتحط فى الحبس هو وابنة فى خلال الاسبوع دة ..المفروض بقى الناس قادة الائتلاف وكذلك الاخوان والبشرية كلها اللى لها صوت ... تنزل وتنهى الاعتصام بتاع التحرير...والا هيبقى هبل فى هبل ويبقى بندمر بلدنا من اجل لا شئ

mohammad said...

في رأييي الشخصي المتواضع أنه لازم معاقبة كل من أساء لمصر أولا علشان يكونوا عبرة لأي حد يفكر يمس مصر بسوء وعلشان نخلص من الناس الي جابولنا الفقر وخلونانهج من بلدنا أنا تعبت من الغربة وراجع لك يا مصر إن شا الله آكلها بدقة
يا رب إحمي مصر

Ahmed said...

معلش خارج الموضوع
نوارة هانم يا نصيرة الفقراء
مأساة المصريين في ليبيا عموما و مصراته خصوصا
http://www.youtube.com/watch?v=2B3OFLVDE94
ده موضوع داخل في شهرين
و لا حد مهتم
فين جيشنا الوطني
يمكن عشان فقراء...يبقوا طبعا مش مصريين
حسبنا الله و نعم الوكيل

مش فاهمه said...

مش ممكن يستأذن الجيش و يطلع لنا بيوتيوب كده على ما قسم الناس بتصدقك و انا شخصيا مصدقاكى بس فيه ناس بتشك فى كل حاجه و بصراحه سكوته قبل كده و عدم ظهوره ملخبط ناس كتير اعرفهم ياريت و النبى يطل علينا طله و يقول لنا كلمتين بدل الهم اللى احنا فيه و ما تقوليش مش مشكله اللى عايز يصدق و اللى مش عايز يخبط دماغه فى الحيط مش حاينفع الكلام ده دلوقتى نعذر بعض و كل واحد على قد مخه و مش كل الناس متعلمه و متسقفه و فله شمعه منورة زيك يا نوارة

احلام جوليا said...

شفتي الحوار مع السفير السعودي
اتفرستي لما قعد يقول ان الامير وليد ابن طلال اعماله الخيرية كتير وانه المشروع الوحيد الي خسر فيه كان مشروع توشكا وان محدش رضي يشتري في توشكا غيره وان الاراضي المصرية الي في توشكا اتحطت في مزاد بنفس سعر شرا الوليد ومحدش رضى يشتري وانه كان بيشتري مجاملة وفين المستثمر المصري اصلا ليه ماشتراش والمذيعين معرفوش يردوا عليه واتكسفوا لما اتكلم عن اعمال الخيرية للوليد وبنا وانه مش عاوز يتكلم في المواضيع دي ليه المذيعين مرضوش عليه مش عارفة ليه ميستعدوش قبل الحوار بمعلومات كاملة عن المواضيع دي ويقولوا له ان الامير وليد ومعظم امراء السعوديين اشتروا في مصر بابخس الاسعار ليه مواجههوش بالبلاوي الي كل شوية بنسمعها عن الاراضي للمستثمرين السعودين باقل من ثمنها وليه مكلمهوش عن ثمن اراضي سينا الي الامير وليد مكملش باقي الاقساط التافه لحد دلوقت ليه سابوه يطنط علينا بانه مش عاوز يحرجنا بان سيادة الامير بيعطف علينا بفلوسه وناسي انهم اشتروا مصر بتمن بخس وسرقونا وان فلوسنا خبوها في فلوس الامير وكتير من الامراء ونسيوا ان في مشروع قطار الخليج دفع فيه مبارك بفلوسنا باسم مستثمر سعودي علشان يخبي الفلوس ويغسل الاموال وايه حكاية اجاره المستجار هو في في شرع المسلمين اجارة اللصوص غريبة دي والله سبحان الله الم يقل النبي الامي الذي خرج من العرب من اعان ظالما سلطه الله عليه ام ان اقامة حد الله في الشرع الاسلامي مرهون بان يقام فقط على الضعفاء هو الاسلام الي العرب دعونا للدخول اليه غير الاسلام الي بيطبقوه على نفسهم ولا ايه يانواره حسبنا الله ونعم الوكيل

احلام جوليا said...

نوارة مصطفى بكري بيقول ان مبارك بحديثه ده اثبت انه كان على علم بان مكتب النائب العام حيستدعيه وان في احتمال يكون بيتجسس على النائب العام وده خطر لو صحيح الكلام ده يبقى المستندات في مكتب النائب العام في خطر لان ساعتها في خاين في مكتب النائب العام بيسرب لمبارك المعلومات شوفي اللنك الي اتبعت لي
www.youtube.com

احلام جوليا said...

نوار الاولوية دلوقت للم الفتنة لازم نفكر كلنا سوا ازاي نلم الفتنة بس اهم خطوة في راي الشخصي : اننا ندور على الي عملها بالفعل الضباط الي نزلوا التحرير لازم يتحاكموا محاكمة عسكرية لان التمرد على الجيش حاليا جريمة كبيرة وثانيا المدنيين الي ساندوهم لازم حد يفهمهم هم مودينا على فين وثالثا الي في السجون يتمنع عنهم التليفونات والموبايلات وسجن خمس نجوم الي هم فيه ويستحسن حبس انفرادي منها بحجة حمايتهم ومنها لمصلحة التحقيقات حتى لا يتفقوا سويا ميتحطوش في سجن واحد او يتحطوا بعاد عن بعض والحراسة تشدد والي في السجون تجي لهم معلومات مشددة على الايميزوهم ويحذروا من الاعيبهم وكله يتلم الليلة كلها تتلم بسرعة قبل ما تقلب حرب اهليه الشرطة من ناحية والشعب من ناحية والجيش من ناحية ثالثة وحزب الكنبة من ناحية رابعة يبقى مصر ضاعت وحطي شوية مطالب فقوية على موضوع كاميليا يبقى خلصت خلاص لا الكلام ده مينفعش لازم الليلة تتلم بسرعة وباقصى سرعة موضوع التقطير كل شوية بواحد مبقاش نافع الديابة لما تحس بالخطر بتزداد توحش يا نواره لازم تباغت اذا حبيتي تصطاديها لكن لو صيدتي ديب وسبتي اخوه مش حتقدر تصطاديه لانه شافك وشاف طريقتك في الصيد واستعد لها وكفاية الي راح لازم نلحق نفسنا وبسرعة الجبهة الداخلية لازم تبقى قوية لو عاوزين نحمي الجبهة الخارجية لو من جوا مخوخين الخبطة من بره تكسرنا لو جوا ملتحمين الخبطة من برا توجع ايدهم وتكسرها

كمونة said...

حديقة الحيوان وغزوة إثيوبيا

محمود القاعود
الأحد 10 أبريل 2011

كانت إثيوبيا طوال الأسابيع الماضية تخطط لإقامة السدود لمنع وصول حصة كبيرة من مياه نهر النيل إلي مصر ، بما يهدد شعبا بأكمله بالفناء .. إثيوبيا في حالة تنسيق تام مع إسرائيل ، وإسرائيل تريد زعزعة أمن مصر عقب خلع عميلهم الصهيوني حسني باراك ، فوجدت أن أفضل وسيلة لشغل مصر وإضعافها هي أن تتصارع علي المياه وتدخل في حروب طاحنة تستمر لسنوات ولتظل إسرائيل هي القوة الوحيدة بالشرق الأوسط ..

ما تفعله إثيوبيا الآن خطير للغاية ويستلزم وقفة صارمة لإنهاء هذا العبث والتهديد بإلغاء اتفاقية " كامب ديفيد " حتي يكف الكيان الصهيوني اللقيط عن الاستفزاز والتآمر علي شعب مصر وتحريض الدول الإفريقية علي هذه المؤامرة الدنيئة ..

وبينما إسرائيل تخطط و إثيوبيا تنفذ ، نجد أدعياء الليبرالية والعلمانية مشغولون بما هو أهم .. مشغولون بـ " غزوة الصناديق " و " المادة الثانية " و " البكاء على الأضرحة " !

لم تفرد المصري اليوم صفحاتها لتوعية الناس بقضية مياه النيل مثلما أفردت صفحات كبيرة علي مدار أسابيع للدعوة لحذف المادة الثانية والتشنيع على السلفيين والإخوان ..

لم يقم الصليبي نجيب ساويرس بعمل حملة إعلانية ضخمة تدعو الدول الإفريقية لعدم الاندفاع خلف المؤامرة الإثيوبية الإسرائيلية ، مثلما نشر مئات الإعلانات في شتي وسائل الإعلام لرفض التعديلات الدستورية حتي يتم حذف المادة الثانية من الدستور ..

لم يتفاعل موقع اليوم السابع مع المؤامرة الإثيوبية ليحذر الحكومة منها ويطرح وسائل مواجهة هذه الكارثة .

موقع مصراوي لا وقت لديه لمشكلة مياه النيل .. ويكفيه إجراء حوارات مع هيلاري كلينتون وهيكل وإفراد صفحات للحديث عن القضية الكبري وأم المشكلات " عمورة وتمورة " ..

أون تي في تصدر لنا المذيعة التي تشبه الغراب لتتحدث عن المؤامرة السلفية ..

مني الشاذلي تكتفي بالتأتأة والتهتهة والاستظراف السمج والنظر بطريقة مستفزة للكاميرا بدلا من النظر للضيف ، وإغماض عينيها حتي يظهر " الشادو " الأخضر الذي تضعه فوق جفنيها ، والتحدث في توافه الأمور ..

قناة الحياة مشغولة بطباخ الرئيس ومصوّر الرئيس وسباك الرئيس والنفخ في كل حادث وتحويله لحادث طائفي كما هي تعليمات السيد البدوي رئيس حزب الوفد الذي صار حزباً كنسياً بامتياز ..

يحيي الجمل نائب رئيس الوزراء مشغول بالركوع أمام شنودة وتقبيل يده وبحث حذف الألف واللام من " المصدر الرئيسي للتشريع " !

لم اقرأ أي مقال لأدعياء العلمانية والليبرالية عن مشكله مياه النيل .. فجهادهم الأعظم هو الميني جيب والإفطار في نهار رمضان وإلغاء خطبة الجمعة وتجريم النقاب والتحريض علي اعتقال فلان وعلان وازدراء الإسلام والدعوة لتعدد الأزواج وتبادل الزوجات ... إلخ مطالبهم الشاذة ..

لا يكتب أحدهم في قضية ذات أهمية علي الإطلاق .. يحيون حياة الدواب .. أكل ونوم وسب ولا للمادة الثانية ! ولا أحد يزايد علي إسلامي ! لا للتفتيش في النوايا والضمائر !

لقد تحدث الشيخ محمد حسين يعقوب في خطبة الاحتفال بنتيجة الاستفتاء ، واقترح عليهم الذهاب لأميركا وكندا .. طبعا قلبوا الدنيا عقب هذا التصريح .. فهم " مواطنون " يعشقون بلدهم ولا يتلقون تعليمات من الدول " الصحراوية " !

وبرأيي أن أفضل حل لأدعياء العلمانية والليبرالية هو إنشاء حديقة ضخمة ولتكن في " توشكي" علي غرار حديقة الحيوان بـ الجيزة ، وليكن اسمها " حديقة الليبرالية الجديدة " ويتم وضع كل علماني وليبرالي في هذه الحديقة داخل الأقفاص الحديدية ليمارسوا جميعاً " الاستنارة " و " الإبداع " وليرفضوا " الظلامية " و " الوهابية " .. ويتم وضع دستور جديد لهذه الحديقة من قبل لجنة حكماء " مستنيرة " .. وعلي سبيل المثال تكون المادة الأولي : الحديقة الليبرالية الجديدة تضم الحشاشين والملحدين ونظامها " مستنير " .

المادة الثانية :الاستنارة هي المصدر الرئيسي للتشريع والشذوذ هو اللغة الرسمية والحجاب حجاب القلب .. إلخ المواد .

بهذا الاقتراح نحل الإشكال فهم لا يريدون الخروج من الوطن والشعب المصري لا يتحمل سخافاتهم .. وبعمل حديقة حيوان لهم في الصحراء ستتطهر مصر من هذا الطاعون .. وبعد فترة يتم ضم حديقة الحيوان بالجيزة إلي حديقة الليبرالية ، وتوضع يافطة كبيرة علي الباب :ملحوظة الحديقة بها حيوانات منتصبة القامة ليبرالية وعلمانية تعود لعصور الاستنارة !

http://www.tanseerel.com/main/articles.aspx?selected_article_no=20706

واحد عادى said...

نانا - نانا - هوه احمد شومان متجوز؟؟؟؟

Magdy said...

آن أوان لصفقات سياسية تبرمها قوى الشعب الثورية مع "الفلول".أولا بعض ناس لازم يتمتعوا بحصانة زى المجلس العسكرى. لو شافوا فى الأفق انهم حيتحاسبوا سينتهى الموضوع بانقلاب-صريح أو مقنع. ثانيا بعض ناس (ربما واحد فقط من الصف الأول زى سرور أو مجموعة من الصف الثانى زى الجابرى) يتمتعوا بعفو: دول هيعترفوا في العلن بكل الممارسات السابقة من تزوير و سرقة منظمة و قمع و نزع لدور مصر الاقليمى و تضليل الشعب هكذا. بل و قد يتمتعوا بفلوسهم اللى سرقوها كمان فى مقابل حشد الشعب كله-نتيجة اعترافهم- ضد النظام السابق. و علشان ده يتحقق الثورة محتاجة مجلس موسع يتكلم باسمها. يضم كل الأطراف و يحط أهدافه من الأول: أهداف الثورة العامة و يحظر على نفسه مناقشة الأهداف الفرعية

bang887 said...

"احساس المواطن العادي بثورته مهم جدا"

وده بقى بأمارة الإعلام المطلوق علينا؟!!!

الخوجة said...

#JAN25 #TAHRIR #EGYPT فتنة مبارك - يامبارك #BYEMUBARAK | الخوجة

Ahmed Wagih said...

المعتصمين دلوقتي في التحرير هيتحملوا ذنب حرق البلد في الأيام الجاية وكلنا هندفع التمن، وهيبقى فيه مجاعة حقيقية ونهب وسرقة زي أيام المماليك. الجيش مقصرش ولكن فتح النار فعلاً مكانش واحد ولا أتنين اللي ماتوا! ولا أيه؟؟

bang887 said...

من موقع جريدة الشروق:

http://www.shorouknews.com/ContentData.aspx?id=429094

(" وخلال دقائق، كان عساكر الجيش قد انسحبوا من سيارتهم، فركبها مجموعة من البلطجية، فتشوها أولا قبل أن يشعلوا فيها النار. وهو نفس ما حدث مع سيارة أخرى كانت تقل كميات كبيرة من السلك الشائك وقضبان الحديد. ")

السؤال : لماذا لم يقود الجنود سياراتهم لخارج الميدان؟ لماذا تركوا السيارات فى الميدان؟

السلام عليكم said...

وتعليقا على الطماطم وياريتها غاليه بس لا ووحشه كمان بس مش برضه السنه اللى فاتت يعنى قبل الثوره كانت كده برضه وعلى فكره كنا مقاطعينها ومقضينها صلصه جاهزه او حتى من غير خالص اللى بيقولك خدنا ايه من الثوره كان واخد على قفاه من حسنى ومش حاسس واعتقد ان فيهم ناس طيبين بس اغلبهم الحراميه اللى كانوا بيرتشوا ومش فارقه معاهم حاجه ومش حاسسين باللى حواليهم وبتوع اسفين ياريس دول محتاجيين الكشف على قواهم العقليه الا بقى لو هم صهاينه لان حسنى هو كنز اسرائيل الاستراتيجى وده لانه عمل كل ما فى وسعه لتقزيم مصر واهلاك وافقار اهلها وتحويلهم لمجموعه من السماسره النصابيين واللى عايزه تاكل طماطم بالقهر والمرمرطه ومرويه بميه المجارى ومش فارقه معاها كل كميه الفساد والافساد اللى كان المخلوع معيشنا فيه ومش مهم تتسرق المليارات بس تاكل هى طماطم اقولها ...............حسبنا الله ونعم الوكيل

hesham said...

انا مش عاجيني استهزائك بقرائك وشعبك كل يوم . ايه الكلام دة. متحترمني نفسك. مش عاجبك الناس تختلف عنك ، طيب تنحي عن بلوجاتك السخيفة، وارجعي لعملك زي ما قلتي امبارح انك عايزة ، وسيبي الناس ترجع حريتهم. وحاجة اخيرة : انت اللي مش فاهمة حاجة خالص يا نوارة .

Ahmed said...

رجاءً دعونا من مسلل التخوين هذا
لا يعقل ان دعاة الحريه يكونوا اول من يخون ويسب
رجاءً فى هذا الوقت العصيب نريد صوت العقل
لا نريد الاصوات العاليه والسباب

احلام جوليا said...

ممكن اعرف ليه لحد دلوقت متقدمش طلب تجميد اموال مبارك والحاشية والعائلة للدول العربية تبقى مصيبة لو افتكروا انهم حيرجعوا الفلوس من غير طلب ولا انهم مسلمين بصحيح وعندهم امانة حيخافوا ربنا ايه السبب ان مفيش طلب اتقدم من الاصل بشكل رسمي

احلام جوليا said...

ممكن اعرف ليه لحد دلوقت متقدمش طلب تجميد اموال مبارك والحاشية والعائلة للدول العربية تبقى مصيبة لو افتكروا انهم حيرجعوا الفلوس من غير طلب ولا انهم مسلمين بصحيح وعندهم امانة حيخافوا ربنا ايه السبب ان مفيش طلب اتقدم من الاصل بشكل رسمي

hayat ank said...

ناصر امين كان بيقول ايه امبارح على اون تى فى النايم العام متواطئ والملط متواطئوما بيعملوش شغلهم صح لا جوه ولا بره والطلبات الى اتعملت بره لاسترجاع الثروه مش كامله وجوه مش بيمشى بالاجرائات صح القضاء زى الزفت والكسب غير المشروع شارحه انتى ساكته على دول ليه علشان كده الماسوف على شبابه طلع لنا لسانه لانهم سبوه لما عمل كل حاجه وباين هايطلع صح وهايرفع علينا قضيايا رد شرف التعبانين دول هما الى لازم يتشالوا ويتطهر القضاء علشان تبقى اجرائات قانونيه وعادله اسالوا ناصر امين هايقولكوا ان تصريحات النايم العام لامتصاص غضب الناس بس لاكن قانونيا كلام فارغ

medotwines said...

انها الديمقراطية الموجهة
انتم تريدون ديمقراطية موجه اللى على مزاجنا ييجى و اللى مش على مزاجنا لو جه نقلبها دم
فرقتوا ايه عن حسنى مبارك ؟؟؟؟
و النظام السابق

rehab said...

هاجيب لك من الااااااااخر وباختصار , - الاعلام هو الحل – باختصار تاني.. سبب البلبلة الشديدة اللي حاصلة وهز ثقة الناس في الجيش وتجرؤء بعضهم عليه والتشكيك في ولاء قادته وتحويل نظر الناس من التركيز للمطالبة بتحقيق اهداف الثورة والتنبه والتصدي للثورة المضادة وبدء وجود حالة من الخوف و الغضب والتشاؤم تجاه الثورة اللي حصلت هو الاعلام سواء الناطق باسم الثورة المضادة او اللي مع الثورة ولكنه بيعاقب الجيش علي نتيجة الاستفتاء الاخير وبيحارب في اتجاه الفوضي لتتحق مطالبه من مجلس رئاسي وخلافه وانتي فاهماني طبعا .... هما دول القوتين المؤثرتين في الراي العام المصري حاليا او علي الاقل القوتين المتحدثتين بقوة وكثافة وانتشار في الاعلام المصري الخاص حاليا ... فين بئا صوت الجيش صوت العقل صوت الناس الوطنية المثقفة العاقلة التي تعلم خفايا ما يدور ويحاك محليا واقليميا ودوليا وحقيقة كل متحدث ونواياه وخلفياته فين صوت الناس اللي والله العظيم برضوا محترمين ومثقفين ودكاترة ومستشارين اللي بيدعوا الناس للثقة في جيشهم وقياداته وان الجيش بيتصرف صح وان ولائه لمصر مش لمبارك و و و ... دي حاجة لازم تتنفذ وباسرع وقت وبطريقة عالية الحرفية اعلام مصري قوي (قوته مش في صوت عالي ولا اسلوب وكيل النيابة بتاع تامر امين لاء قوته فيما ضيوفه وشفافيته والمتحدثين باسمه) يا رب انشالله قناة واحدة وجرنان واحد يجمع المصريين حوله يفهم الشعب اللي نصه امي يفهمه ويطمنه ويرشده يتصرف ازاي وايه المطلوب منه في كل مرحلة , يطمنه عالمستقبل مش يسودها في وشه ... انتي فين اعلاميا مثلا وبلال فضل ووائل عبد الفتاح وطارق البشري وصبحي صالح ومعتز عبد الفتاح وسليم العوا يا خبر فين الناس دي وطالقين علينا ليه من يسود عيشتنا ويضلمها ويقود في اتجاه مصر مش حمله

mahmoud said...

انا موافق علي كلام الرائد احمد شومان بس المجلس العسكري لازم يفهم اننا يانوارة مش قطط سيامي لما نجوع الغرب يرمي لنا لقمة وياكلنا ويشربنا بشرط الالتزام بسياسات صندوق النقد الدولي ولما ننونو بصوت عالي يفتحوا لنا حنفية الديموقراطية شوية لا احنا حضارة الاف السنين احنا امة اسلامية سبق وقادت الدنيا لازم نعمل تعليم محترم وطز في صندوق النقد لو رفض اننا يبقي عندنا تعليم محترم احنا كائنات منتجة المفروض مش مستهلكة بس لازم كلنا نكون عايزين كده ولازم المجلس العسكري يساعدنا علي كده طالما ملتزمين بكامب ديفيد ومش بنعادي حد ليه الاصرار علي ابقائنا متخلفين الا لو فيه مخطط لضربنا مستقبلا اسرائيل لسه بتثبت جذورها في فلسطين وفي المستقبل سهل قوي انهم يفتعلوا اي حاجة لجرنا لحرب لطموحاتهم في التوسع بس هم مش فاضيين لنا دلوقت يبقي احنا نتقدم ونتطور لنفسينا وطالما ماحربناش حد ماحدش يقدر يضربنا ومحدش ليه عندنا حاجة لازم يكون هدفنا بناء مصر قوية متقدمة متعلمة ولازم المجلس العسكري يكون معانا ومايخضعش لضغوط الغرب لاننا مش ملطشة اوي كدة

Free Software said...

يا شباب
والله يا جماعه كلنا كده محدش بقي يعرف يثق في مين
الجيش بيعمل حجات غلط او صح الخلاف مش هو المشكلة
المشكله ان الشعب لسه زي ما هو والناس مش عايزه تتغير وكله مشغول بالغلاء ولقمة العيش
لازم نعرف ازاي نوصل للناس دي ان البلد مش هتبقى حلو الا بيهم
فين الناس اللي ليهم شعبية بين الناس
يجمعوا نفسهم على هدف واحد
وبلاش ان كل واحد يشتغل في جنب لوحده
لو هما فعلا عايزين مصلحة البلد
مش بتكلم عن حد معين
اكيد هيبقى فيه اختلاف في الراي ولكن الاهم مصلحة البلد
والبلد والله العظيم مش هتتغير الا بينا
كفاية كلام بلا فعل
متسمعش الكلام من طرف واحد اسمع من كلا الاطراف حتى تعرف اين الحق
ولا تصدق اي شيء يقال الا بعد ان تتحقق منه
وزي ما احنا عايزين البلد تبقى احسن في ناس عايزه تخربها
واحنا مش عايزين نديهم الفرصه دي

Mohamed_EzEldin said...

صوريهم وياريت مثلا تسجلي مكالمة سعادتك

Loula said...

ربنا باليكي بيكي انتي اللي متصابه في مخك بطلي تطبيل و اتلمي بقي شويه و لو انت جدعه ابقي حطي التعليق ده انت فعلا هبله ومسكوها طبله
و ابقي قولي عليه فلول و لا ذيول و لا يهمني
و انتي برده نخبه هزولت انتي صدقتي نفسك و لا ايه

مصراويه said...

ردا على الاخ ولا الاخت
Loula
ليه الحقد والغل اللى مالى قلبك ده اعوذ بالله ملعون ابوكوا فلول ولاد وسخه

Wardaya said...

يا بنتي انتي هتكدبي لحد امتى الواحد قرف احمد شومان مش هو الي قال طنطاوي لازم يمشي عشان هو من النظام جاية تقنعينا انه طنطاوي سابه يا عيني امال مسبش الضباط الشرفاء في التحرير ليه يوم الجمعة كفاية كدب و تحوير حرام عليكي بعدين ما دام انت متاكدة اوي كده روحي صوريه فيديو و اثبتي انه لسه عايش اصلا !

كمونة said...

مع اني مش بوافقك في حاجت كتيرة لكن بصدقك جدا جدا جدا وانت من الناس اللي شفتها من بدايات الثورة في برنامج ما وراء الخبر ،،
حقيقي الناس اللي عمالين يكدبوك هم اللي يتشك فيهم
لا يكونوا هما الاسرائيلين والعملاء اللي زارعينهم في النت
بكرة كل حاجة هتبان

احلام جوليا said...

عندي خطة عمل يا نواره حاكم اليومين دول ونتيجة لاحداث مصر اعاني من تصارع الافكار زي ميكون مخي كان نايم وصحى
شوفي دلوقت احنا كلنا بنعاني من الاغلبية الصامته لانهم مش عاجبهم الثورة ليه لان الطماطم غاليه والغاز اختفى ولو الثورة قالت يمين حيقولوا شمال والدليل ان معظم الناس الثورية غيرك قالوا لا فالاستفتاء اقبال على نعم ولو قلتم هشام بسطويسي حيقولوا لكم لا عمرو موسى وحيدورا على الوجوه الي كانوا عارفينها في نظام مبارك علشان ينتخبوها للبرلمان ماهو لمؤاخذه الدماغ البايظة بايظة برضه وهم الثورة مش عاجبهم نتايجها حتى لو مؤقته علشان كده لازم شغل الخطة بقى :
لازم تعملوا لجان شعبية تنزل تراقب الاسواق علشان غلاء الاسعار واللجان دي تكون بعد اتفاقكم مع عصام شرف ويكون لكم زي او علامه بادج حتى علشان تسيطروا على الاسواق وكل لجنة ميمنعش يكون معاها عربية بوكس فيها 4 عساكر وتنزلوا اسواق الخضار اولا البايعين حتعمل لكم الف حساب علشان معكم عساكر جيش شرطة مش مشكلة
ثانيا الناس حتدعي لكم وتقول الولاد بتوع الثورة دول مفيش منهم رجالة زي ما قالوا في بداية الثورة ووقفوا معكم
ثالثا الثورة المضادة الي نجحت بالفعل في انها تفرق بينكم وبين كتير من الشعب الي مش عاجبه حال البلد وهي بتنظف اصلا حترجعوا تكسبوهم في صفكم وده مهم المرحلة الجاية
رابعا لو قلتم بعد كده للناس دي انتخبوا هشام ينتخبوا هشام متنتخبوش عمرو موسى ولا احمد شفيق حيقولوا لكم امين لكن بالوضع الحالي اوعدك ان الناس مش حتقف وقفه صح في الانتخابات لانهم مشين عند في الثورة وخلاص
ثاني نقطة لازم تعملوها مشكلة انابيب الغاز برضه يتعمل لجنة تشوف المشكلة بدأت فين وتوصل الانابيب دي على عربيات في كل عربية شابين من شباب الثورة للاحياء طبعا مش يشيلوا انابيب لا بس يوصلوا لحد البيوت مع العامل الي بيشيل ويوصل وهم يشرفوا على الحكاية بس لحد ينسقوا الناس ويدوهم الانابيب مش شرط يطلعوها للبيوت يكفي توصل تحت البيت وبسعر ميزدش عن 5 جنية مش 20 جنية
كده تبقوا انتم خدتم مبادرة ضد الثورة المضادة بجد يعني اتديرتوا وغيرتوا بدل خط الدفاع خط هجوم وهجوم ابيض زي ثورتكم البيضا وتكسبوهم معاكم بدل ما يطلع كل شوية يكسب علينا نقطة ويفرق شملنا ربنا يفرق شملهم اجمعين بجد يا نواره خدي الفكرة دي وطوريها بالمناسب علشان نرجع نلم شمل مصر تاني والناس ترجع تاني تبقى مع الثورة نلم الجيش والناس ونرجع ايد واحده ضد الظلمة