صباح الفل يا سوريا

والنبي يا سوريا مش بانام بسببك، وبالي مشغول عليكي

بصوا بقى

خصيمكم النبي تتمسكوا بسلمية الثورة... تمسكوا بيها بغباء، مهما يحصل، اوعى اوعى اوعى مهما يعمل بشار تردوا عليه، مهما يضرب قولوا له الله يسامحك، مش دايما القوة مرجلة.. ساعات بتبقى جبن وغباوة

شايفين اليمن؟ اجدع ناس... اجدع ناس بحق، لإنهم اساسا مجتمع مسلح، وقبائل، بس بيتعاملوا مع سلمية الثورة على انها عقيدة ايمانية، مش مهم ان الوقت طول معاهم شوية عشان آل سعود بيبعتوا للموكوس ناس وسلاح، مش مهم، حيمشي حيمشي ان شاء الله، وحيحافظوا على الثورة من انها تخش على حرب اهلية

كان ليا اصدقاء عاملين نفسهم يساريين، هم عبارة عن كمبيوتر ومتسطب عليه برنامج شيوعية، يعني زي ما قرا في الكتاب كده بيسمع من غير تفكير، عشان كده باقول عاملين نفسهم يساريين، لإن الغباوة لا دين لها، الغباوة موجودة في كل حتة، كانوا فرحانين في الاول بليبيا عشان سلاح بقى ودم وقال ايه، عمالين يقولوا: يا ريتنا عملنا زي ليبيا.. بس البعدا مش سامعة لهم حس دلوقت! مش سامعة لهم حس فيما يخص ليبيا، بس سمعت لهم حس في "المواجهة مع الجيش مسألة وقت"... ماهو الغبي حيفضل غبي طول عمره، عشان لينين تصادم مع الجيش فهم حافظين بقى مش فاهمين.. بس برضه اتكتموا خلاص لما الناس فشلت لهم موضوع المواجهة ده

انا مؤمنة بالكفاح المسلح ضد الاحتلال.. بس ده مش احتلال، ده حاكم ظالم ومعاه طوائف وناس، اوعى تمد ايدك عليه
خلوا شعاركم:
لئن بسطت يدك إلي لتقتلني، ما أنا بباسط يدي إليك لأقتلك.

اليمن كانت معرضة في ثانية انها تخش على حرب اهلية، وخلاص، لو لا قدر الله عملت كده كانت الثورة خلصت

وزي ما التوانسة قالوا لنا في اول اربع ايام من الثورة: انتوا بتتعاملوا مع ذخيرة وهم بيتعاملوا مع بشر، الذخيرة بتخلص، البشر مش بيخلص

اوعى اوعى اوعى

تفضلوا ماسكين في سلمية سلمية.. انا عايزاكم تتغابوا في السلمية، آخركم تحدفوا طوب، دي اقصى حاجة مسموح لكم تعملوها في مواجهة البطش، ومعلش.. ودعوا اهاليكم، السلمية مش معناها انك تجري من الضرب، السلمية معناها انك تستقبل الرصاص بصدر مفتوح.. غاندي قال كده، ونفعت

امبارح عرفت ان فيه قبيلة في اليمن مشهورة بإنها ما بتنساش تارها ولا بعد ميت سنة، لو واحد اتقتل منهم بيقتلوا قدامه عشرة، القبيلة دي اتقتل منها ناس كتير في الثورة، وقعدوا يقولوا سلمية سلمية، مع ان معاهم دبابات اساسا

جدعان جدعان جدعان جدعان جدعان جدعان.. رجالة على حق

اهو انا عايزة السوريين يعملوا كده، تحت اي ظرف يفضلوا كده.. دي الوسيلة الوحيدة لنجاح الثورة، اي طاغية بيتمنى من قلبه ان البلد تقلب على حرب اهلية لإن ده اكسب له، هو القذافي مشي؟ ولو مشي حيكون مشي بعد ايه؟ كله بسبب انه لما ضرب ردوا عليه، صحيح ابن الكلب ضرب بالطيران، بس شوية صبر على الموت كانت حتهدم نظامه ويمشي.. يالا.. قدر الله وما شاء فعل

علي عبد الله صالح حيمشي.. وربنا حيخرب بيت اللي بيساعدوه، ان شاء الله ربنا حيخرب بيتهم، منهم لله، انا قابلت هنا سعوديين قاعدين يقولوا لي: ما تزعلوش منا، احنا مالناش ذنب.. ادعوا لنا

ربنا يفك اسرهم

وان شاء الله يفك اسر سوريا.. بس يتمسكوا بالطرق السلمية، اعملوا اي حاجة، افضلوا تظاهروا، اقعدوا له في البيت وما تشغلوش اي مصلحة حكومية، اقطعوا له الشارع وافضلوا نايمين له فيه، مهما يضرب استحملوا الضرب.. حيخلص حيخلص كده

وقولوا يا رب

اه نسيت.. اي حد يقول هتافات طائفية او مذهبية اضربوه. لا بجد، امسكوه في الشارع كده رنوه علقة معتبرة بحيث يبقى عبرة لغيره، وشوفوا لكم علويين متضررين منه، اكيد حتلاقوا، وحاولوا تبرزوهم، احيانا لمحاربة الطائفية بنعمل طائفية ايجابية مضادة

واحنا كمان بيحاولوا يلعبوا في الطائفية عندنا، تميم البرغوتي بيقول لي ده آخر كارت لامريكا في مصر، لو عديتوا منه تبقوا في الامان
احنا مقتلنا في الطائفية.. كلنا كلنا كلنا، بلا استثناء واحد، مقتلنا في الطائفية، وده كارت اسرائيل، وكارت امريكا، وكارت الطغاة، لازم نحرقه
لازم نحرقه
وعايزين في مصر نطلع قانون ضد الطائفية، الطائفي يتحكم عليه انه يخش المتحف ويفضل جوه لحد ما يكفر فيبطل طائفية بقى
الطائفي كفره حلال.. بل هو من المستحبات

يا رب