Friday 22 April 2011

قولوا للقلقان ما يقلقشي.. دولة الاحلام ما تقلقشي

خلاص كده
خلاص
حيوا اهل الشام يا أهل الله
شمروا وابتدوا الجهاد ضد الطاغية
دلوقت سوريا دي بالذات لازم تتوزن بميزان من دهب، ولو الميزان اتظبط سوريا دي حتبقى عسل عسل عسل، وحتتقدم بسرعة الصاروخ وتسبق كل اللي في المنطقة
بس لو لا قدر الله الميزان خسع، يبقى احنا كلنا.. كلنا.. حنرجع خمسين سنة لورا، لو سوريا لا قدر الله حصل فيها اي حرب اهلية، او ميزانها اتشقلب، او اتقلبت طائفية، يبقى خلاص، كلنا روحنا في ستين داهية.. كلللللللللللننننننااااااااااااا
وبالتحديد احنا هنا في مصر، سوريا امن قومي، وامداد استراتيجي
طيب
الاخوة في سوريا ان شاء الله ربنا يوفقهم، ويكتب لهم النجاح، بس هم عندهم كام خطوة كده يعملوها وان شاء الله ينجحوا نجاح باهر يذهل العالم اجمع، بس الخطوات دي محتاجة صبر، ومثابرة، وضبط نفس، وسيطرة على كل المجاميع الكبيرة دي لإن اي غلطة فيها ضياع
اول حاجة، بشار ده زي ما احنا شفنا كده النهاردة، قاتل، ومن زمان وهو قاتل
بس كان بيستمد شرعيته من حاجتين، وحاجتين كل واحدة فيهم اقوى من التانية
الحاجة الاولى: انه بيحمي البلد من الفتنة الطائفية
الحاجة التانية: انه بيساند المقاومة ضد اسرائيل وهو من دول الممانعة
والحقيقة هو ساعد المقاومة فعلا، وفيه ناس مهمة قوي هو آنيهم ولو اتسلموا اسرائيل عايزة رقبتهم، وربنا يستر عليهم بصراحة
طيب.. هم دول حاجتين حيويتين، يعني الاستقرار الداخلي، والامن القومي دول هم اللي بيعملوا الدولة اساسا
يبقى ايه؟ يبقى على الثوار انهم يسلبوه الركيزتين دول، لإنه ما يستاهلهمش، هو تاجر، وبيتاجر بيهم، وساعة الجد قتل ناس، كان ممكن اقترح ان بشار يعمل اصلاحات واسعة الخطوات حفاظا على مساندته للمقاومة وحفاظا على سوريا من الفتن الداخلية، بس الكلام ده كان ينفع قبل ما يقتل كل الناس دي، دلوقت مات الكلام
ده قاتل
قاتل
قاتل
وعلى الثوار انهم يعملوا تلات حاجات رئيسية، التلات حاجات دول محتاجين تظبيط جامد قوي، وضبط نفس شديد، بس لو ظبطت معاهم هم كده خلاص كسبوا الماتش واخدوا البطولة
1- زي ما قلنا قبل كده، الحفاظ على سلمية الثورة، عايزين سلمية بغباء، عايزين نزايد على اليمنيين في سلميتهم كده، تبقى اسلم سلمية في كل السلميات اللي في الدنيا، كده اكيد مية في المية مش حتحصل حرب اهلية، مش انا كنت قلت للسوريين مسموح لكم تستخدموا الطوب وده آخركم؟ لا.. غيرت رأيي، ولا الطوب، انا عايزاكم تبقوا مسيحيين كده، تتمسكوا بالاحتجاج السلمي، مظاهرات، اعتصامات، اضرابات، وتنضربوا وما تقولوش أي.. ومش بس لما تنضربوا ما تقولوش اي.. ولما تتشتموا كمان ما تردوش، وهو ما ينقلنا للنقطة التانية
2- اسحبوا منه الشرعية العربية، بشار مفهم الناس انه لو مشي اسرائيل حتاخد البلد.. لا، انتوا موقفكم المعادي لإسرائيل، والمساند للمقاومة، والداعم للقضية الفلسطينية لازم يبقى واضح وضوح الشمس، ولازم تركزوا عليه، وما تطلعوش الا في ايدكم علم فلسطين، ومعلش، امسحوها في وشي انا، حقكم عليا انا اذا كان اي حد زعلكم من فصائل المقاومة، حتى لو هم شتموكوا انتوا ما تشتموهمش.. احرجوهم كده في نفسهم، وندموهم انهم اخدوا الموقف ده، عشان لما تنتصروا ان شاء الله يقعدا يعضوا في بنان الندم كده، ما تدوش مبرر لأي حد انه يقف ضدكم، عشان اللي يبقى ضدكم يبقى مدان فعلا، ارفعوا الحرج عن الناس اللي بشار عامل تربيطات معاهم، عشان لو وقفوا ضدكم يبقى هم اللي بيحرجوا نفسهم وما يبقاش لهم اعذار
انا عارفة ان الشعب السوري وطني اكتر من بشار بستميت مرة، ولو سوريا بقت ديمقراطية، وحتبقى ان شاء الله، اسرائيل حتبل المرتبة بالليل، والنظام السعودي حيقلع عريان ويطلع يجري في الشارع وهو ناكش شعره، دولة عربية ديمقراطية وضد اسرائيل وبتدعم المقاومة دي حاجة تنزع فتيل اي عميل في المنطقة، وتفقد اي ديكتاتور شرعيته وتبقوا كسبتوا ثواب في المنطقة كلها
ولو تلاحظوا ان امريكا واسرائيل مش واخدين موقف مساند للثورة في سوريا زي ما عملوا مع المعارضة الايرانية لانهم عارفين يعني ايه سوريا تبقى حرة وديمقراطية، يعني خراب بيتهم المستعجل ان شاء الله
واحسن برضه انهم حلوا عن راسكم، هم عمرهم ما بينفعوا حد، هم مضرين، ولو كانوا بينفعوا كانوا نفعوا المعارضة الايرانية
واندال واقذار وما عندهمش اخلاق، امريكا دي بلد قذرة، عشان ما اخدتش اي موقف مشرف من اي ثورة محترمة غير خناقة الشرشحة اللي حصلت بين طرفي النظام في ايران، وغير كده ادتنا كلنا الطرشا، وهي مصلحتها ان اي طاغية يستمر في الحكم، ومصلحتها ان بشار يفضل عشان يبقى الوحيد اللي من العرب بيساعد المقاومة هو انسان طاغية ومفتري، ومش عايزين نموذج ديمقراطي يدعم المقاومة ولا يبقى وطني، ومش عايزين نموذج ديمقراطي عربي من الاساس، امال حيبرروا احتلالنا واستغلالنا ازاي الا انهم يقولوا علينا غير اهل للديمقراطية
والسعودية بتحب تساعد الطغاة كنوع من انواع المبدأ، حتى لو الطاغية عدوها، مش مهم، النظام السعودي ماشي بمبدا انا والاحتلال على العالم العربي وانا والانظمة المستبدة على الشعوب، ونظام بيحتقر ارادة الشعب، وبيحتقر الشعوب بالاساس وبيسميهم "العامة" والرويبضة 
واحسن برضه ان السعودية اول امبارح بعتت لبشار فلوس، امال الكتكوت كان بيقول ان بندر بن سلطان وسعد الحريري بيهربوا للثوار سلاح ليه؟ هو فين السلاح ده؟ الناس ماتت في الشارع ومافيش بمبة اتفقعت.. وكويس، انا مش عايزة بمبة تتفقع، كده تمام
وهو ما يقودنا للنقطة التالتة
3- ابعدوا عن سعد الحريري والسعودية واي قوى طائفية في المنطقة، انا عارفة ان اتهامات "سلفية" والتورط مع الحريري وبندر وسلاماندر وكل ده كلام فارغ، بس احتياطي، ممكن تلاقوهم عايزين يركبوا عليكم لما يلاقوكم قربتوا تنتصروا، لا.. ابعدوا عنهم، دي ناس طائفية وما تفرقش عن بشار حاجة، انتوا عايزين ايه؟ اي مساندة احنا هنا في مصر سدادين، مافيش مصري ما بيحبش سوريا ويتمنى لها كل خير وسعادة وحرية، وانتوا مش محتاجين اكتر من دعم لقضيتكم ونقل للحقائق، واحنا رقبتنا يعني.. وحاجة تانية اهم، هي تبدو طائفية شوية بس انتوا محتاجينها في المرحلة دي: اي علوي معاكم اعملوه نجم الشاشة، العلويين مش سعداء في حياتهم في سوريا ولا حاجة، هم منسحقين، وهم مش بيحكموا البلد، اللي بيحكموا البلد علويين، لكن العلويين مش هم اللي بيحكموا البلد، لو معاكم انشالله واحد علوي بس، خلوه هو اللي يتكلم باسم الثوار في الجزيرة، وابرزوه، عشان تبعدوا اي شبهة طائفية عن ثورتكم
بس كده، يبقى سلمية بغباء، موقف واضح ووطني من القضية الفلسطينية واسرائيل والمقاومة، وما تخشوش في مهاترات مع حد، وموقف وطني ضد الطائفية واضح برضه. كده الخطة 424 وقريب قوي حنقول لكم مبروك، وحاسبوا من المندسين، واي مندس ينضرب عشان يحرم يندس وسطكم، واوعوا اوعوا اوعوا تصطدموا بالجيش
معلش.. انا عارفة ان الجيش السوري فيه شوية مشاكل كده، معلش، امسحوها في وشي برضه، مش كويس تصطدموا بيه، لئن بسط اليكم يده ليقتلكم ما أنتم بباسطين إليه أيديكم لتقتلوه.. 
واهم حاجة:
قولوا يا رب
وخدوا بوسة.. ودي هدية من  مصر
حيث لا تلتام.. جراحات
حيث لا تلتام.. ولا تذبل
حيث كل ختام.. لآهاتي
يبتدي من الآن.. من الآتي 
مثل موج البحر.. مثل الموج
قولوا للقلقان.. ما يقلقشي
دولة الاحلام.. ما تقلقشي
حيوا اهل الشام.. يا اهل الله
-------
المصريين.. خدوا انشروا اسماء الشهداء السوريين، وكل ما بيرتفع شهيد الاسماء حتزيد، ربنا يطهر بدمهم سوريا


43 comments:

emmy said...

حيوا اهل الشام وحيوا أحرار الشام وان شاء الله مهم انهم ما يشجعوش علي اي انقسام عسكري ما عدا ذلك لا اظن الاسلحة متوفرة للشعب السوري

احمد النشار said...

نوارة هما الحكاما لعرب ,,,,بقوا بيستلذوا بدمنا , اكتر من الاول كده ليه؟؟؟؟؟
المفروض بعد تونس كانوا يعرفوا ان كل ما الدم زاد , الكل ما الثورة زادت
منهم الله

Unknown said...

المشكلة يانوارة ان بشار الكلب عنده استعداد وبدم بارد انه يموت 30الف اربعين الف ولو حتى 100 الف مش هتفرق معاه في حاجة خالص وتابعي كده ردود الافعال من كل الدنيا هو عارف ان دي اخرتها وبالمناسبة ليه مفيش اي صوت لحسن نصر الله لغاية دلوقتي وانا بقولك انه لو نطق فهو هينطق عشان يهاجم الثوار ويقول انها مخططات اجنبية لزعزعة استقرار سوريا مفيش في ايدينا غير اننا نقعد ندعي ربنا انه يهد بشار وعيلته كلها ويرد كيدهم في نحرهم

Hana said...

قريت البوست وباعيط..
وبازيد على كلامك ليهم حاجة واحدة بس.
ياليتنا كنا معكم فنفوز فوزاً عظيماً

الله يأيدكم وينصركم في سوريا وفي مصر وفي ليبيا واليمن وتونس وكل بلاد الأحرار، ولا يحرمنا بركاتكم

Anonymous said...

العزيزة نوارة : لاتفرحي قوي كدة الفوضي الخلاقة ليس معناها اننا في الوطن العربي من سيفرح الذي سيفرح هم الغرب ومعهم حبيبتهم اسرائيل وتاكدي اننا من الان فصاعدا سنري اسوء ايام حياتنا علي الاطلاق تلك هي الحقيقة وسنري

Unknown said...

nawarra kalamek jamil bass meshkeltik enik msad2a eno hal mokawama fe3lan mokawama w eno bashar byed3am el mokawama.hadol shelet tojar youtajiroun bi akdass el kadaya el3arabiya

Unknown said...

ماتسمعينا سكاتك بعد نعم بتاعتك وبعد الاعلان الدستورى الجريمة اللى عملها المجلس العسكرى وحط فية كل صلاحيات الرئيس وبعد 9 ابريل واللى حصل من الجيش اعتقد انتى مابقتيش فاهمة حاجة ظاهرة صوتية

Unknown said...

المجلس العسكرى بتاعك عمل اية للقتلى السوريين واللبيين واليمنيين

الفراغ said...

ايه يانوارة
انتى ارتحتى كدا خلاص من ناحية مصر
خلاص اطمنتى ان مبارك فى ايد امينةوانهم بيحافظوا عليه من الهوا الطاير
خلاص خدتى بطارك وطار بلدك
فى ايه؟؟؟؟؟؟؟؟؟؟؟
مالك ساكته ليه
مافيش ولا كلمةعن المتحدين العرب فى طره لاند
ماهزكيش كلمة جمال لعز ((طيب وبعدين بعد ماشوية عيال دخلونا طره ))
ياترى هما مستنيين ايه اللى يحصل؟!!!!!!!!!!!!!

Unknown said...

أمين يا رب

mutamarrida said...

dear Nawara,I think you will regret your positioning on Syria.Your good heart has unfortunately positioned you in the same basket with the Us,AlSeoud,Qatar and" Israel",the zionist entity.Nothing is quite ever so simple and Syria is not comparable to Mobarak.As an example it is the only arab nation without foreign debts,not enslaved to IMF and the World Bank,the syrian Muslim Brotherhood are NOT like the Egyptian ones.When Syria will descend into inferno and civil war ,thus giving the zionists the biggest price ever in their horrid history,did you ask yourself what will become of Palestine?Years of hard work by Jihad,Hamas,and Hezbollah will be destroyed ,the blood of their martyrs squandered so that the traitor of the moment Abbas/Fayyad or any body else of this school could sign an "agreement"with the ennemy.Of course Azmi Bishara who is suffering from an acute Stockholm Syndrome and from new found wealth and fame in Qatar will be delighted and will expend to the joy of zionists on his concept that "Israel"will fall on the inside and thus disappear in......200 years!He will be joined by the rest of the club of arab al e'teedal who will compensate with the loss of Mubarak by having a new member,namely Syria.Dear Nawara,what is happening in Syria is a very dirty game for which we will all pay the price.In 32 years in the diplomatic service I learned that nothing is as it seems to appear ,whole countries are misused by the media,abused by counterfeited news and propaganda,the world is a jungle where if you want to survive you have to use your brain first and foremost and trust only your good judgement!

Hossam Hassan said...

الله يرحمهم وينصر اهل سوريا

الكلب نهايته قربت

Unknown said...

مقال كتير حلو ومهم بس ياريت كان بالعربية الفصحى بشار وجماعته مجرمين متل لقذافي حاب اقولك الشب السوري كله مقاوم وممانع بس بشار بتاجر فيها واي كان شكل الحكم القادم سوري ستبقى مقاومة

Unknown said...

كلام gsanad صحيح ، بشار ونظامه مستعدين يقتلوا الشعب السوري بالكامل وفوقهم الشعب الفلسطيني كمان ، نظام دموي مرعب.
هذا الفيديو من مدينة إزرع بالجنوب سوريا بالقرب من درعا شوفيه يا نوارة وحتعرفي إن بشار مجرم بكل معنى الكلمة، بس بحذرك وكل واحد ممكن يشوف الفيديو، المناظر اللي فيه قاسية وصادمة وبشعة جداً:
http://www.youtube.com/watch?v=Td0jLCkaoz0

nosseir said...

نوارة لقت نفسها فاضية اليومين دول ومبارك خلاص اتسجن ...قالت نروح نسجن بشار ونقلب حكمة.. ..شغال شغال

محمد طنطاوي said...

مش عارف أقلك إيه كلامك عن سورية مهم ، بس كنا محتاجين نتكلم كمان عن المحافظين الجدد ، ومش عايزين ننسى كمان باقى الدول العربية : العراق الجرحة وليبيا واليمن والسودان والجزائر والمغرب والأردن
وبخصوص الشتيمة دى أنا واحد من الناس اللى كنت بقول لزمايلى الشتيمة لأ وبلطجية النظام كان بيشتمونا

Ahmed . M . Abdulrahman said...

الله اكبر و ان شاء الله ينتصروا بس يا نواره احنا لازم ناخد موقف اكثر حزم احنا بنلعب لازم الشعب المصرى يقاطع الحكومه السوريه ويساعد حركات التحرر فى المنطقه ويدعم الوحده العربيه والقوميه
ولازم نخلع ال سعود دول خالص

خلعهم فى منتهى الصعوبه يكاد يكون مستحيل

لانهم عارفين ازاى يلجموا شعبهم

وهناك مفيش غير شعار واحد

الملك لله و لاولاد عبد العزيز

و لازم تفهمى ان السعوديه هم عباره عن رعاه غنم ولاكن لديهم عتاد حربى كثيف

و لديهم المال

ولاكن الصبر و المثابره العربيه قادره على قصم الطغيان السعودى الفاشى الجاسوسى

و قادره على دحر يبشار واعوانه من الخونه اتباع السعوديه الذين هم اتباع بدورهم لاميريكا

ودى بيسموها نظريه الفيشه

لازم نطلع قوافل تنجد الناس دى المجازر لسه جايه لازم نتصرف وبسرعه

سلام مؤقتا
__________________________
اقرأ مقال حركة الدقون المصريه ( اراء و تخاريف سلفية) على مدونه مصر الروح والنصر ادعمها تدعم مصر و الثوره ادعمها ولا تبخل
رابط المقال : http://misr25jan2011.blogspot.com/2011/04/blog-post_6643.html

________________________________

الى عاوزنى يجينى
http://misr25jan2011.blogspot.com

محمد طنطاوي said...

مش عارف أقلك إيه كلامك عن سورية مهم ، بس كنا محتاجين نتكلم كمان عن المحافظين الجدد ، ومش عايزين ننسى كمان باقى الدول العربية : العراق الجرحة وليبيا واليمن والسودان والجزائر والمغرب والأردن
وبخصوص الشتيمة دى أنا واحد من الناس اللى كنت بقول لزمايلى الشتيمة لأ وبلطجية النظام كان بيشتمونا

نور الدين said...

اولا مساء الخير عليكي يا بنت عمنا فؤاد نجم والسلام ليه من كل الاسكندرانيه ...ثانيا تمام اوي اللي انتي بتعمليه مع اهلنا في سوريا بس انا شايف ان الحل مع الراجل ده هو العصيان المدني ...لان الناس دي لو فضلت تعمل مظاهرات لحد بكره ما حدش حيسمعها بشار بس بيموت فيهم ومن الواضح ان الجيش عندهم موالي لحد دلوقتي لصف بشار ..يعني الناس دي معهاش ورقة ضغط علي النظام غير المظاهرات ودي بتتقابل بالرصاص ...والعصيان المدني وده المهم يوقفوا حال البلد ليه عشان يجبر علي التحرك اصل سعتها مش حيقدر يقتل الشعب كله وربنا معاهم ...ملحوظه انا معاكي في مهاجمتك للنظام السعودي بس براحه شويه عليهم عشان الناس دي برده رمز لمكان هما مش عارفين مقدرته بس هو ده اللي نفسي اوصله احترمنا لبلد الرسول والقائم عليها لكن كشخص ربنا عليهم ...

علان العلانى said...

سوريا تحالف الفساد وديكتاتورية الحزب الواحد


قلت في بداية الاحداث :نعم كان حافظ الأسد محنكا وبارعا في سياسته الخارجية ولكن على بشار أن يصنع معادله جديدة للسياسة الداخلية لسوريا وعلى تحالف الفساد وسدنة ديكتاتورية الحزب الواحد أن يدركوا أن الحرية كالمسمار كلما قرعته على رأسه كلما رسخ والشعب السوري كما يخبرنا التاريخ له صوله لا تبقي ولا تذر فلا تقطعوا شعرتكم التي
أخترعتوها مع الناس حينها كنا نظن أن هناك رؤية سياسية تحكم سوريا

http://baynalkitabah.blogspot.com/2011/04/blog-post_23.html

وجهة نظر said...

أقترح تنظيم وقفة أسبوعية أمام السفارة السورية ومنها ع الليبية ومنها ع اليمنية ، ومنها ع البحرين ومنها ع السعودية عشان ترحم أمنا ، ونختم بالتونسية ست الكل ، وكل سفارة نقف قدامها ربع تلت ساعة بالكتير ، بس توصيل رسالة فقط لا غير ..
إيه رأيكم ؟؟

Dr.issamo said...

روعة
تسلمي يا نوارة
ربنا يحميكي

الفوريجي said...

شكلين ما بحكي

هي أزمة في الحكم موضعها
وأصل جذورها
ضمائر فاسدة لم يعد في نبضها
شرف الآباء
هي طغمة فقدت لطول مكوسها
في الحكم معنى الحياة وقيمة الشهداء
حار الدليل بين سدنة بعثهم وشيوخهم
في غيهم يتلفظون بخسة
في البؤس أعجزت الرثاء
وتفتنوا تأويل معني َأُولِي أمرهم
للظلم متكأ للطغاة غطاء
ويراد منهم عاجلا نسخ الأصول
وسورة الأسراء
ظنوا اللجاج تحوطا في غيهم
والسفسطة في حزبهم براعة وذكاء
باعوا دينهم لدنيا مذلهم حتي
غدوا والدين سوق بغاء
يا طغمة ذهب الحياء في شرعها
والكبرياء
بين التخشب والتزلج لن تجد
في عربهم اوكردهم غرباء
بين المهيج والمهرج لن تجد
فرقا تميز فيه حرف الهاء
في حزبهم نزق فريد وبعثه
بندول يذهب رائح أو غاديا
بين الصفيق وابنة اللكناء

amal said...

ربنا معاكوا يا اهل الشام والله المصريين كلهم بيدعوا لكم وان شاء الله ربنا هيحرركوا قولوا يارب , وشكرا ليكى يانواره دايما جدعه ومشرفه المصريين ربنا يحميكى

qqq said...

يا أختي فوقي شوية الله يكرمك، يحيى الجمل عمال يخرب في البلد و كل يوم فتنة و مصيبة كبيرة جاية من وراه، نفسي أعرف هبط علينا من أي داهية، المهم... دلوقتي زي ما سيادتك ما شاء الله بقيتي من المفكرين و المحللين الاستراتيجيين أصحاب الكراسي الفضائية، عايزين من سيادتك نطرة حنية للداخل عشان يبدو إن احنا على أبواب تحديات أكبر لأنها المرة دية ليها علاقة و ثيقة بالإقتصاد و الأمن و المعدة الخاوية، الأخ الكريم وزير المالية كان عمال يدينا في تصريحات وردية عن قوة الاقتصاد المصري و زيادة المرتبات و التعويضات و غيره و إذ فجأة نفاجا بسيادته في أمريكا لطلب 10 مليار دولار حتة واحدة و بصورة عاجلة، و الأخ وزير الكهرباء لازال يواصل مسلسل الكذب القديم و اللعب على استغلال جهل الناس بمواضيع الكهربا و عمال ينشر في أخبار عن تطوير محطة السد العالي اللي هو أساسا عقد صيانة لتصحيح التطوير اللي عمله الأمريكان الله يخرب بيوتهم من 7 سنين تقريبا و مالوش أي علاقة بزيادة القدرات المولدة أو الاستعدادات العاجلة لمواجهة الصيف القادم، كفاية تصريحات ديكورية، عايزيين صدق و شفافية، عايزين مصارحة و مكاشفة، الخلاصة: ركزي شوية في البلد و مواضيع الجمل و عمر سليمان الله يكرمك، و عايزيين نفجر طاقات الشعب و نبتدي الشغل لحسن مش حنلاقي ناكل و الله زي ما قال شومان.

Unknown said...

نوارة .... احنا فريق مزيكا جديد, كل شغلنا عن مصر, عاملين كليب جديد, لو عجبك ممكن نزعه عندكم في محطة التحرير؟؟

اللينك اهه

http://www.youtube.com/watch?v=yAl9IbE_0JU

Unknown said...

يا نوارة اسحبي التعليق لانه لا يليق
فسوريا لم ترتاح منذ ستة 2003 ولم تترك لرئيسها فرصةالتفرغ للداخ حدودهال وما زالت تتعرض للضغوط وشتان بين نظام يدعم المقاومين ونظام يسجنهم وادعوك بكل احترام ان تعلمينا عن مصر الجديدة هل اصبحت تدعم المقاومين وهم على حدودها

حازم الهواري said...

لا حول ولا قوة الا بالله العلى العظيم بشار شبه ابوه كلب وخاين ..........يالله امس فقط 88 شهيد منهم طفل لما شفته قلبى اتوجع يخرب بيت ابوك يا بشار حد يقتل فى شعبه بالشكل ده ....حكام العرب دول مصنوعين من ايه كلهم نسخة كربونية واحدة عجينة واحدة والاغرب انهم يقتلوا فى الناس ويقولك دى عناصر مدسوسة هى اللى بتعمل كده يخرب بيت ابوكم ربنا يورينا فيكم يوووووووووووم اقسم بالله ابتديت اشك ان كل الحكام العرب مش مسلمين من الاصل وانهم يهود مش عملاء فقط لالالا يهود بالفعل لان ما فيش بنى ادم يعمل فى شعبه كده مبارك الكلب عمل فينا كده والقذافى المختل المجنون بيعمل كده وبن على الهارب عمل كده والشويش على بعد الله صالح بيعمل فى اخواتنا دولقتى فى اليمن كده والكلب بشار شغال قص فى الناس الغلابة اللى كل ذنبهم انهم عايزين يعيشو بكرامة ...............لعنة الله على كل حاكم عربي مستبد دخول التاريخ كلهم بوساختهم وبكرة يفتركهم ويحطوهم مع هولاكو وجانكيز خان وجلال الدين بن خوارزم شاه ومحمد بن الاحمر

الصبر يا اهلنا فى سوريا الصبر مفتاح الفرج وزي ماقالت الست نوارة خلوها سلمية وحافظوا على سلميتها والله كلمتكم اقوى من الف بندقية وبصوا بقى بشار جبان ورجالته والله اجبن من الفئران لانهم بيتشطروا على المتكتفين او النسوان بس ودول كلامكم بويجعهم وبيدبحهم وسلميتكم هى اللى بتكسرهم ........ربنا معاكم وينصركم ان شاء الله

محمد طنطاوي said...

حسبنا الله ونعم الوكيل فى هذا الطاغية المجرم ، المجرم يذبح شعبه ، هذه هى عقيدته الحقيقية عقيدة الذبح ، هذا المجرم الذى اتخذ من المقاومة ستارًا يتستر به على جرائمه ، ظهر الآن وجهه الحقيقى ، وصيتى لكم يا شعب سوريا موتوا على مات به أهلكم وإخوانكم فإما النصر أو الشهادة، والذبح الذبح لبشار الكلب وكل من على شاكلته

صمت الحملان said...

السلام عليكم ورحمة الله وبركاته ازيك يا نوارة وكل الاحباب ربنا معانا كلنا نحن الشعوب العربية التي لم تقضي علي الاحتلال بعد واظن ان هذا هو الاوان وربنا ينصرنا جميعا واكيد سوريا عندنا ناس واعية ومثقفة فاهمة ايه اللي لازم يعملوهبس ايه التجاهل التام منك للي بيحصل في مصر لان لما احنا نمشي خطي سليمة هندي مثل كويس لغيرنا في ثورتهم الثورة مش خلع رئيس مضايقنا ونحطة في المستشفي وخلاص الثورة لحقت مصر قبل ما حسني يخربها بس مش معقول نسلمها لصاحبه يكمل اللي احنا منعناه يعمله ياريت تكملوا المشوار قبل ما يفوت الاوان عدي 3 شهور ولم يتحقق شئ وربنا يريكم الحق حقا ويرزقكم اتباعه ويريكم الباطل باطلا ويرزقكم اجتنابه

كيوبيد said...

نواره كلام حلو وزى الفل وربنا ينصرنا على كل طاغية وكل العرب اللهم امين بس خالينا فى حالنا احنا حالنا لا يسر عداو ولاحبيب يعنى علشان نسيبو ونورح سوريا كما احسن بشار يقول ان احنا بانصدير لهم الثوره خاليا فى حالنا احنا احسن شوفى قنا والى حصل فيه والمنيا والسلفين والى بيعملو فى البلد محدش قدار يقوف فى وشهم عاميلن زى القطار مش عاجبهم حد وكلنا كافره وعبدة اصنام تسمى الدموقرطية والعلمانية والشيوعى حد يقول لهم حرام عليكم اتقو الله فى مصر لما توصل انهم يدخلو المساجد ويستوى عليه حد يعرف البشر دى ان دى سرقة وحرام وربنا يستر على مصر وعلى شعبه من هاولاء الذين ضيقو الدين حتى اصبح لايسعى غيرهم

Anonymous said...

يارب انت القادر على نصر الاحرار يارب كن لهم عونا ونصيرا في كل مكان وصبرهم على مصائبهم يارب


انت ما بقتيش بتتكلمي على اي حاجه
بتحصل في مصر ليه؟؟

بساطه said...

انا بعت البوست الي فات لاهلي ةاقاربي في سوريا وانبسطوا اوي منه وانشاءالله هبعت ده كمان.. ربنا يقويهم

شآمي said...

مخطئ و متواطئ من يظن أن ما يجري في سوريا هو ثورة, الامور باختصار مخطط تكلف ثلاثة مليار دولار, حيك لسوريا و كما رصدت له ميزانية ضخمة, تم تجنيد عدد من المأجورين, و وضع فيه عدة سيناريوهات و خطط. و هناك ثوار في درعا..لا ليس ثوار, في درعا محافظ و موظف امني فاسدين تورطا بمعالجة خاطئة لوضع كان يتطلب حكمة, لكن عالجوه بقسوة و غير مسؤولية, فثارت الاهالي عليهم, و خرجوا مطالبيت بالثأر من المحافظ و المسؤول الامني, وهما الآن بعد مقابلة وفد من درعا للرئيس في السجن ريثما يتم التحقيق معهمو يأخذوا عقابهم.

و في اللاذقية خرجت ناس تطالب بمطالب محقة, و إندس معهم جماعات مسلحة أعمارهم مأجورة لا تصل للعشرينمن العمر, أودت بقتلى من المدنيين و الامن.

و كانت جملة اصلاحات حصلت في سوريا أهمها :

تغيير الحكومة

إقرار قانون الحريات

إقرار قانون الإعلام

إلغاء العمل بقانون الطوارئ

تفعيل قانون الاحزاب

سن قانون التظاهر السلمي

رفع الأجور

محاربة الفساد



أما عن منجزات الفورة السلمية فكانت:
1-حرق العلم السوري اثناء المظاهرات السلمية
2 حرق المقرات الحكومية التي هي ملك للشعب وليس حكرا ً لأحد .
3-اثارة النعرات الطائفية التي لم نسمع بها الا عندما بدأت المظاهرات .
4-قتل أفراد الجيش وقوات الأمن و التمثيل بجثثهم... و مالووو
5-اشاعة الفوضى ومحاولة النيل من هيبة الدولة
6-بث وتلفيق مقاطع كاذبه للتحريض واللعب على وتر الدين


هم يروجون لفكرة اسقاط النظام لان بديلهم جاهز, أغبياء.... عبد الحليم خدام الخائن؟؟!!!!! أو فريد الغادري الذي تبرأ منه والده من اكثر من عشرة أعوام؟؟!!فشروا

ثم كم سوري خرج متظاهر و ضد النظام بكل سوريا ؟؟؟ عشرة الاف؟؟عشرين الف؟؟ طيب لو فرضنا كانوا خمسيييييييين الف, ماذا تفعل نسبة خمسين الف من اصل تلاتة و عشرين مليون؟

أنا لست مضطرة لأن أكمل شرح و أوضح صورة الكل يحرص على عدم رؤيتها, فليظل كل طرف على الجنب الذي يريحه, و الأيام ستوضح كل ما هو مخفي.



فلتبقى وسائل الإعلام ...وسائل تعتيم



و ليبقى القرضاوي ينعق كالبوم منادياً بالجهاد و هو قابع في بيته قرب القاعدة الامريكية في السيلية بقطر و يهتز زجاج منزله كلما حلقت او حطت طائرة حربية امريكية, و السي في الخاص به عامر بلقاء مع الصهاينة و مصافحة لزوجة امير قطر,و رقبته مثقلة بدم كل من سقط في سوريا, و كتير من الفتاوى اللي سيواجه ربه بها, و أثبت أنه مصاب بالإنفصام شخصية... فبشار هذا الذي هاجمه و استعدى المسلمين عليه, هو هو بشار الذي التقاه منذ ثلاثة سنوات و مدحه و تغزل به و بسياسته الحكيمة و بحب الشعب له!!!!



و ليبقى العرب صمٌ بكمُ عميٌ رغم ما يبدو من ملكيتهم لهدهد سليمان بحيث كلهم يعرف كل تفصيل بكل بلد.



و لتبقى الجزيرة منور من لا منبر له, على فكرة هناك اعتصام من خمسة أيام أمام مكتب الجزيرة بدمشق و طبعاً لا يجرؤون على الاشارة إليه, و هذا ما يبرر اغلاق الستائر خلف الضيوف السوريين كي لا يظهر الرأي الاخر.



و ليبقى الصديق عدو مخفي



و ليبقى عزمي بشارة برسيل للمؤسسات


و لتبقى سوريا .... سوريا



و ليبقى الوضع على ما هو عليه


و الأيام جايي

حازم الهواري said...

الى الاخ علاء اللى بيقول اسحبي التعليق يا نوارة .....وبيسائل عن مصر الجديدة اللى بتدعم المقاومة طيب يا استاذي الفاضل ممكن تقولى عمل ايه بشار الجحش للمقاومة ؟؟؟؟؟؟؟؟ احنا يا سيدى مش رجالة وعملاء وفينا العبر زي ما بيقول بن حافظ الجحش وانت بترددوا وراه قلى انت بقى يا معلم عملتوا ايه فى حرب غزة؟؟؟؟؟هااا... مش سامع .... اقولك عمل ايه بشار ومن قبله ابوه اللى بتدعى انه بيحمى المقاومة خد عندك رقم :
1-ينما كان حافظ الأسد وزيراً للدفاع في يونية 1967م أبلغ القيادة المصرية العسكرية ، أن هناك حشوداً عسكرية اسرائيليه على الحدود السورية ، وكان البلاغ كاذباً والتقطت القيادة السياسية المصرية الطعم واتخذت إجراءات كلها كانت في خدمة أهداف اسرائيل ، قبل أن تتأكد من صحة الخبر الذي أشاعه النظام السوري،وكانت نكسة يونيو 1967م .
2-تهدي وزارة الخارجية الإسبانية تحياتها إلى السفارة السورية عبر وسيطها ، وتعلمها أنها نقلت رغبة الخارجية السورية إلى الجهات الأمريكية المختصة بأنها ترغب بالمحافظة على الحالة الناجمة عن حرب حزيران 1967 ، أن تسليم الجولان الحصين المتحكم في الأراضي المحتلة وتهجير أهله بداعي انه لا قيمة لجزء من الأرض لقاء حفاظهم على كرسي الحكم. قال إبراهيم ماخوس وزير الخارجية السوري النصيري انذاك ليس مهماً أن تحتل اسرائيل دمشق أو حتى حمص وحلب فهذه أرض يمكن تعويضها وإعادتها أما إذا قضي على الحزب ( الذي تتستر خلفه الطائفة ) فكيف يمكن تعويضه وهو أمل الأمة العربية . وجعلوا من الخيانة ذكاء ومن الخذلان ، نصراً ويستغرب سامي الجندي البعثي القيادي اختيار ماخوس له لمفاوضة أبا إيبان وزير خارجية إسرائيل في فرنسا قبل حرب حزيران ثم يقول لعله يريد توريطي ليضمن سكوتي .
ممكن يا اخ علاء تجاوبني على الحجات دي ؟؟؟؟؟؟؟
ـ لماذا سلّمت الجولان بلا حرب عام /1967/ ، حين كان حافظ أسد وزيراً للدفاع ، وأذاع بيان سقوط القنيطرة قبل سقوطها بساعات طويلة؟
- ـ ما الثمن الذي دفعه نظام الحكم ووزير الدفاع أحد أركانه آنذاك للشعب السوري إزاء تسليم بقعة شاسعة من أرض الوطن بلا حرب؟
ـ ما الثمن الذي قُبض من اليهود ، لقاء الجولان ، ومن قبضه ، وكيف؟
ـ ما معنى أن يُرفَّع وزير دفاع ، سبّب لبلاده أشنع هزيمة عرفتها في تاريخها.. إلى رئيس للبلاد ، ويستمر في حكمها ثلاثين عاماً؟

5 ـ لماذا قامت حرب تشرين عام /1973/ بمبادرة وتخطيط من الرئيس الذي سلم الجولان وزيراً لاسترداد الجولان تحريرها ، ثمّ لم يحرَّر شبر منها، بل ضاعت عشرات القرى الجديدة؟


ـ لماذا انسحب اليهود من جنوب لبنان ، ولماذا هم مطمئنون في الجولان ، لا تفزعهم طلقة من بندقية صيد؟

ـ إذا كان النظام الذي استولى على مقاليد البلاد بالدبابات ، قد سلّم الجولان بلا حرب ـ وهي ليست إرثاً له من أبيه ـ فماذا يسلّم الوريث ، إذا أخذ البلاد ومن عليها وما عليها ، من بشر ودواب وشجر.. وراثة عن أبيه؟ ومن يملك أن يقول له "لا" أو أن يسأله " لماذا ".. إذا سلّم البلاد كلها ، هديّة سائغة ، أو عربون مودّة ، لجيرانه اليهود..؟
؟؟؟؟؟؟؟؟؟؟؟؟؟؟؟؟
ده جزء من اللى عمله حافظ الجحش ولو عايز اكتر فيه اكتر واكتر .........بس اهم سؤال عايزك تجاوب عليه

عمل ايه بن حافظ الجحش فى حرب غزة ؟؟؟؟؟؟؟؟؟؟؟؟؟؟ اللى لسه دم الشهدا فيها سخن وبلاش تقولنا احنا عملنا ايه لان قلتلك من الاول فينا العبر وفينا اللى مكفينا بس جاوبني بس عمل ايه بن الجحش للعرب ولغزة ؟؟؟؟؟؟؟؟؟؟؟؟؟؟؟

أرنوب said...

زي ما عملوا مع المعارضة الايرانية لانهم عارفين يعني ايه سوريا تبقى حرة وديمقراطية، يعني خراب بيتهم المستعجل ان شاء الله
....
تصدقي بأه إنك عبيطة ومالكيش في اللي بتكتبي فيه .. لسبب بسيط .. هو أن أمريكا هي اللي عامله الثورة دي أي أنها صاحبة شرارة البدء .. ليه ؟ لأن الرجل يملك أهم ركيزتين للحكم والإستقرار (زي ما كتبتي جلالتك بنفسك) يبقى شعبه يثور ضده ليه ؟ عشان هوه ما يستاهلهمش وبيتاجر بيهم ؟ إيش عرفك ؟ ومن أين لك بالمعلومات التي تجعلك تحكمين عليه مثل هذا الحكم ؟ .. ولا هي تناحه وتلقيح جتت وخلاص ؟ وبعدين .. هل من المعقول أن تندلع كل هذه الثورات في العالم العربي تباعاً على سبيل الصدفة ؟ أم أن ورائها من يدبر ويخطط ويحكم التدبير والتخطيط ؟ ثورتنا مثلاً - رغم إيماني المطلق بها وبدواعيها - لن تؤدي إلا إلى حكم الإخوان والسلفيين بما سوف يحدثونه من فوضى وحروب طائفية وساعتها تخش أمريكا والمجتمع الدولي يقسموا مصر زي ما عملوا مع السودان .. هه .. ما رايك ؟ أليست هذه النتيجه هي ما تسعى أمريكا إليه ويعتبر بالنسبة لها حلماً غالياً ؟ وقيسي على ذلك كل الثورات العربية الحالية التي لن تؤدي إلى خراب بيت أمريكا كما تتوهمين بل إلى خراب بيتنا إحنا

حازم الهواري said...

وانت ياعم ارنوب اللى عليم ببواطن الامور ؟؟؟؟؟؟؟؟؟؟يعنى لما جميع الحكام بياخدو اومرهم من امريكا وامريكا شريك استراتيجي لجميع الحكام وحليف قوى وداعم دائم وحجات كده مقلبظة كتيرة بتقى زي العسل على القلب امريكا ولما بقى سيادتك الشعوب تكره العبودية وتثور على الظلم تبقى مدعومة من امريكا وقلة مندسة وعملاء وولاد ستين فى سبعين يعنى هى حلال ليهم وتحرم على الشعوب بلا مقاومة بلا زفت 40 سنة الجولان محتلة فين بقى المقاومة ؟ لبنان انطحنت طحن فى 2006وغزة شربت المنقع بعدها وماشفناش لا مقاومة ولا يحزنون من بشار ولا من غيره ما نبطل بقى حكاية المندسين والللى قابضين فلوس لان فى الاخر بيطلع الكلام كله بالعكس وبيطلع الريس هو اللى حرامى وهو اللى مندس

Unknown said...

واحد ارنوب.. عايز منه ايه؟ سيبه ياكل خس وجزر

Unknown said...

وبعدين بئااا أنا سعودية وابتديت اقلق بجد وخايفة انزل مصر تاني :(
معقول الكلام اللي بتقوليه ده يا نوارة !!!
ولو افترضنا جدلا ان النظام في السعودية بيبعت فلوس وتمويل بأي شكل لسورية لدعم النظام المستبد هناك
ماشي ياستي
منين بيدعمهم ومنيين المشايخ عندنا المحسوبين على النظام مثل الشيخ يوسف الأحمد والسيخ محمد العريفي وغيرهم بيدعموا المقاومة بشكل كبير جدا ..خدي عندك مثلا الشيخ صالح اللحيدان وهو عضو هيئة كبار العلماء في السعودية دعى الثوار في بيان ..واضح وصريح إلى الإستمرار المقاومة حتى خلع النظام الفاسد في سورية ...طي هو النظام السعودي ساكت عليهم ليه ..بلاش دي

الأخبار في قناة العربية والقنوات السعودية نازلة بهدلة في النظام السوري ..طب كيف!!انا فعلا مش عارفة اربط بين الخطين اقصد من ناحية دعم النظام بالسلاح اللي ما فيش عليه اي دليل حقيق وبين الأخبار والبهدلة اللي نازلة ترخ على النظام السوري من جهة تانية وطبعا بيانات هيئة كبار العلماء!! يريت توضحي اكتر هذا التناقض ..ازاي النظام السعودي بيعمل الشيء وعكسه

Unknown said...

وبعدين بئااا أنا سعودية وابتديت اقلق بجد وخايفة انزل مصر تاني :(
معقول الكلام اللي بتقوليه ده يا نوارة !!!
ولو افترضنا جدلا ان النظام في السعودية بيبعت فلوس وتمويل بأي شكل لسورية لدعم النظام المستبد هناك
ماشي ياستي
منين بيدعمهم ومنيين المشايخ عندنا المحسوبين على النظام مثل الشيخ يوسف الأحمد والسيخ محمد العريفي وغيرهم بيدعموا المقاومة بشكل كبير جدا ..خدي عندك مثلا الشيخ صالح اللحيدان وهو عضو هيئة كبار العلماء في السعودية دعى الثوار في بيان ..واضح وصريح إلى الإستمرار المقاومة حتى خلع النظام الفاسد في سورية ...طي هو النظام السعودي ساكت عليهم ليه ..بلاش دي

الأخبار في قناة العربية والقنوات السعودية نازلة بهدلة في النظام السوري ..طب كيف!!انا فعلا مش عارفة اربط بين الخطين اقصد من ناحية دعم النظام بالسلاح اللي ما فيش عليه اي دليل حقيق وبين الأخبار والبهدلة اللي نازلة ترخ على النظام السوري من جهة تانية وطبعا بيانات هيئة كبار العلماء!! يريت توضحي اكتر هذا التناقض ..ازاي النظام السعودي بيعمل الشيء وعكسه

mhamd said...

يا الله يا نورة شو الوضع عندنا معقد لدرجة كبيرة جدا والا اظن ان هناك احدا لاسف يعرف بشكل جيد الوضع الدخلي السوري غير السورين انفسهم لان النظام بسوريا وضع الدولة كلها في صندوق اسود حتى لا احد يعلم ماذا يصنع بشعبه النظام بسوريا المسالة لديه مختلف تماما عن الدولة الاخرى مختلف عن مصر واليمن وليبا هنا حقا اقول انها تختلف جدا من حيث وضع سوريا جعرافيا والنسيج الاجتماعي الحساس بسوريا اتفائل بكلمك وارتاح قليل لكن فعلا يا نورة الموضوع صعب جدا كما قالت الموضع بالنسبة للنظام حياة او موت الجيس السوري تم تصفتيه من قبل حافظ الاسد وزرع فيه الفساد والطائفية حتى يحمي الحاكم والوطن والمواطن ليس من اهدافه لاسف اقوال الكلام وقبلي ينزف يوجد هناك احرار ولا يخلى لكن ف بلالاحداث الاخيرة كل من يرفض امر يتم تصفيته من مجندي وضباط لان القرار الفعلي بيد العصابات العليا الوضع مقلق جدا وخصوصا بعد سقزط عدد كبير من الشهداء يقدر با كثر من 1000 لا ن هناك خطف للجثث ودفن جماعي ليتم لتغطية الجريمة التي يقوم بها النظام هناك مئات المفقدين بدرعا لوحدهايقارب العدد 800 مفقود ! الوضع مقلق جدا جدا ايران من طرف اسرائيل ايضا وامريكيا والمقاومة وكله يساوم على الشعب شعب سوريا جريح جريح

mhamd said...

يا الله يا نورة شو الوضع عندنا معقد لدرجة كبيرة جدا والا اظن ان هناك احدا لاسف يعرف بشكل جيد الوضع الدخلي السوري غير السورين انفسهم لان النظام بسوريا وضع الدولة كلها في صندوق اسود حتى لا احد يعلم ماذا يصنع بشعبه النظام بسوريا المسالة لديه مختلف تماما عن الدولة الاخرى مختلف عن مصر واليمن وليبا هنا حقا اقول انها تختلف جدا من حيث وضع سوريا جعرافيا والنسيج الاجتماعي الحساس بسوريا اتفائل بكلمك وارتاح قليل لكن فعلا يا نورة الموضوع صعب جدا كما قالت الموضع بالنسبة للنظام حياة او موت الجيس السوري تم تصفتيه من قبل حافظ الاسد وزرع فيه الفساد والطائفية حتى يحمي الحاكم والوطن والمواطن ليس من اهدافه لاسف اقوال الكلام وقبلي ينزف يوجد هناك احرار ولا يخلى لكن ف بلالاحداث الاخيرة كل من يرفض امر يتم تصفيته من مجندي وضباط لان القرار الفعلي بيد العصابات العليا الوضع مقلق جدا وخصوصا بعد سقزط عدد كبير من الشهداء يقدر با كثر من 1000 لا ن هناك خطف للجثث ودفن جماعي ليتم لتغطية الجريمة التي يقوم بها النظام هناك مئات المفقدين بدرعا لوحدهايقارب العدد 800 مفقود ! الوضع مقلق جدا جدا ايران من طرف اسرائيل ايضا وامريكيا والمقاومة وكله يساوم على الشعب شعب سوريا جريح جريح

emmy said...

لو كل المقاومة ضد اسرائيل مقاومة كلامية اكيد اكيد تكون اسرائيل في نعيم بشار رافض للسلام مع اسرائيل ورمز للمقاومة بامارة ايه؟دول بيقسموا ولا 4-2-4 بتاعة الكورة ويرسمولنا وشوش فشار يا نوارة دوره في الفيلم انه يتكلم واسرائيل مرتاحة ومنشكحة طول ما هو بيتكلم لانهم عارفين ومتاكدين ان آخره كلمتين وحبايب ..... حبايب