بالنوسبة للمحافظين

طب واحنا ايه اللي يخلينا احنا نقبل بتعيينات وبعد ما يعينوا نعمل لهم مظاهرات.. مدام كده كده بننزل الشارع ونبات فيه يبقى ننتخب المحافظ

ييجي واحد يقول لي: لا مافيش وقت

مافيش وقت لايه يا امور؟ هو بس فيه وقت للنومة في الشارع وقطع السكة الحديد؟ احنا ورانا ايه يعني؟ ننتخب المحافظين في الشهرين الجايين دولم

بص يا سيدي

انتخاب المحافظين له منافع عدة، وممكن يتعمل بخطة سهلة

اولا: المنافع

1- اهم منفعة للقوى السياسية الناشئة واللي لسه ما اشتغلتش على الارض وقاعدة تقول الاخوان اكلوا الساندوتش بتاعي

مرة واحد قريبنا، عنده اربع سنين، فجأتن لقيته لطش ابن خالته اللي في نفس السن بالالم على وشه، وراح فاتح جاعورته وقعد يعيط، الواد اللي ضرب مش اللي انضرب هو اللي بيعيط، اللي انضرب ما عيطش، وراح قايل: عااااااا... مش عااااييييززز يلعب معااااايااااااا مش عااااايز يلعب معااااايااااا.. فاخدته على جنب وقلت له: ماهو يا حبيبي لو هو مش عايز يلعب معاك مش حتخليه يلعب معاك لما تلطشه بالالم.. هات لعبك، واقعد العب بيها لوحدك، وهو لما يلاقي اللعب حلوة حييجي يلعب معاك، لكن لما تلطشه بالالم على وشه مش حيبقى عايز يلعب معاك ولا عايز يشوف خلقتك تاني

بدل ما القوى السياسية المختلفة مجتمعة قاعدة تعيط وتقول الاخوان مش عايزين يلعبوا معايا.. العبوا بقى انتوا 

نعمل انتخابات محافظين، وانتخابات محليات، وده يبقى تدريب كويس للقوى السياسية اللي مش بتعرف تتعامل مع الشارع انها تنزل النقابات وتنزل العشوائيات والضواحي والقرى النائية وتعمل حملات، ممكن ما تنجحش، بس اهي تبقى اتدربت، عرفت نقط ضعفها فين، ونقط قوتها فين، وتبتدي تحاول تعالج نقاط الضعف وتدعم نقاط القوة عشان لما تيجي انتخابات المجلس تبقى على الاقل عرفت تعمل شوية تربيطات على الارض، ماهم مش حينزلوا يشتغلوا على الارض الا بالطريقة دي، لإنهم كسالى.. كسالى جدا، وعشان كده بيتخانقوا مع المجلس العسكري لإنهم عايزينه يجيب لهم الرضعة وهم قاعدين في السرير

وهو ما ينقلنا للنقطة التانية

2- بدل ما كل شوية الناس تمسك في خناق المجلس العسكري - وطبعا مش بتمسك في خناق عصام شرف مهما عمل لانه جاي على هواها، عادي يعني ماهم مطففين - ما المجلس العسكري يريح دماغه من الهوسة دي وينزل الناس تنتخب محافظينها ولو حد فتح بقه بقى معاهم يقولهم: هاااه؟ انا مالي؟ الناس هي اللي انتخبت، ومش ذنبي والله انكم فشلة، هو انتوا كل ما تفشلوا تمسكوا في خناقي انا؟ اديني اديتكم فرصة تانية بعد الاستفتاء عشان تورونا شطارتكم

كمان ده تدريب كويس للمجلس العسكري على ادارة انتخابات المجلس بدل ما يمسكوا في خناقه ويقولوا له انت اخوان انت سلفي انت فلول، اهو يشوف على الارض يقدر ازاي يغطي الانتخابات، ويشرف عليها، وينظمها، زي ما عمل في الاستفتاء، يعني باللغة العسكرية تبقى تطعيم للمعركة.. زي حرب الاستنزاف كده، انتخابات على نطاق ضيق ينفع يتم السيطرة عليه لو فشل، ولو نجح يحسس الناس بالثقة في نفسهم وفي نفس الوقت يبقى تدريب على المعركة الكبيرة

اي خسارة في معركة المحافظين والمحليات يمكن تداركها، لكن الخسارة في معركة المجلس حتبقى مصيبة

وبدل ما تباغتوا الناس وتفاجئوهم ان التظاهر ممنوع، ما تشغلوهم في حاجة تلهيهم عن التظاهر، ماهو لو نازل انتخابات المحافظين والمحليات وخلافه، مش حيعمل مظاهرة، يعمل مظاهرة ليه؟ حينزل الاماكن ويعمل مؤتمرات شعبية ويلف على الاحياء والقرى اللي تابعة للمحافظة بتاعته، مش عنده وقت يتظاهر، واللي مش عاجبه مرشح ينزل مرشح قدامه

3- ده كويس للاقتصاد على عكس ما اي حد تاني ممكن يفتكر

فلسوا اللي معاهم فلوس شوية، عارفة ان فيه ناس حتستغل الفلوس، يا ريت.. كل اللي جيبه معبي مخزن فلوسه للمجلس، لا... خلوه يحل الكيس بدري بدري، والناس ايام مبارك اللي هو مبارك كانوا بياخدوا الفلوس ويضربوا عليها وما يروحوش الانتخابات او يروحوا وينتخبوا اللي على مزاجهم.. مش وحش ان حد نازل انتخابات المحافظين والمحليات ويخش على الناس برشة جريئة، خليه يدفع احسن من عينه، واهو يشيل الاقتصاد شوية بدل ما الناس عمالة تقر وتشتكي ان كل حاجة غالية، واحنا نمشي وراه ونقول للناس: الحرامي اهو.. الحرامي اهو.. ومن غير ما نمشي وراه، الناس عارفة انه حرامي من ايام مبارك، ايام مبارك ماحدش كان بيعرف ينزل قدامه، وماحدش كان بيعرف يراقب تزويره، وماحدش كان بيعرف يلقطه

اييييووووةةةة يلقطه، وهو ما ينقلنا الى النقطة الرابعة

4- قالك.. اديني فرصة تانية اثبت لك فيها حبي

اللي هم الاخوة اللي كانوا بينزلوا يقفلوا الصناديق ويقدموا رشاوى ويشتروا اصوات.. نعمل ايه؟ نديهم فرصة ولا نوئدهم؟ 

انتخابات المحافظين والمحليات حتخلينا نعرف، بسرعة لو عملنا انتخابات وكل واحد نزل بالمرشح بتاعه، حنعرف مين اللي بيقدم فلوس وبيشتري اصوات ونعمل لامه فضيحة ونخلي اللي ما يشتري يتفرج عليه، ونعرف بقى هو بيمثل انهي اتجاه، واسمه ايه؟ ومين اللي بيشتغل معاه؟ عشان نجيبه من قفاه... اييييوووةةة اييييووووةةةة.. زي ما عملتوا في الظباط المعتصمين وجبتوا لنا هلع.. فاكرين؟

سيبتوهم يخشوا الميدان عشان تعرفوا عددهم وقوتهم وشكلهم واولهم واخرهم وبعدين دخلتوا وقعتوا قلبنا احنا عشان تجيبوهم بعد ما اتأكدتوا ان عددهم قليل ومالهمش وزن، واحنا اللي اتخضينا وشعرنا طقطق 

مدام قلبكم جامد كده وبتجربوا فينا عادي، ما تجربوا فينا برضه عشان تعرفوا مين المرتشي ومين الحرامي ومين المزور، واهي حاجة يمكن تداركها

5- المحافظ مش مهم ابدا.. ايا كان اللي حينجح في الانتخابات، ده لو طلع وحش اللي انتخبوه يشيلوه، واضراره مش مهمة، وصلاحياته مش كتيرة، وممكن يتعفق بسهولة، طب ما تخلونا احنا وانتوا والقوى السياسية نجرب نفسنا في منصب مش مهم عشان تبقى دي اقل الخسائر

ثانيا: الاعتراضات على الاقتراح

1- قالك مافيش وقت... ايوة يعني انت بتعمل ايه دلوقت؟ مافيش وقت لايه؟ انت وراك ايه دلوقت حاليا؟ بتخترع الذرة ومش فاضي لنا؟ لا بقى.. احنا دلوقت فاضيين، وفاضيين زيادة عن اللزوم، وده كخ علينا

انا فخورة طبعا اني مصرية، والشعب المصري شعب عسل عسل عسل.. بس لما بيلاقي دقيقة فاضية في حياته بيبقى ابن ستين كلب 

ما ينفعش الشعب ده يفضى، احنا الشعب الوحيد اللي كان بيستعجل مبارك يمشي لان وراه شغل

يا سيدي ما ينفعناش احنا نفضل فاضيين، لما بنفضى بنتخانق مع بعض وبيطلع منا اوسخ مافينا وبنبقى عاملين زي اركان حرب متقاعد بيوقف عياله طابور صفر وانتباه على الفطار الصبح احنا لو من هنا لحد كمان شهرين ولا حتى شهر ونص استعدينا لانتخابات محافظ حنشتغل بايدينا وسنانا بدل ما نقعد نمسك في خناق بعض

2- الانتخابات مكلفة.. يا سلااااااااااااام، هو انت بتخسر كام دلوقت؟ بالعكس، الانتخابات دي حتطلع فلوس كتير تحت البلاطة، خلي الحرامية يفلسوا، ماهو انت دلوقت بتخسر فلوس عشان الناس نايمة لك في الشارع، الناس كده كده بتنزل الشارع، تطلع قانون، تطلع روحهم، هو حد بيعرف يسيطر على الناس دي؟ خليهم ينزلوا الشارع بحاجة مفيدة، وعلى الاقل نزلتهم يغطي تكلفتها ولاد الحرامية اللي بينزلوا الانتخابات بالفلوس، وحش ده؟ 

وبعدين احنا طول عمرنا بنجيب الجون في الوقت بدل الضائع، يعني احنا مش بنعرف نشتغل الا تحت ضغط، وكل ما الوقت قل كل ما مجهودنا اتضاعف واداءنا بقى احسن.. احنا كده دي طبيعتنا

3- لا لا لا مش حينفع... لو عملنا انتخابات للمحافظين في الوقت القليل ده السلفيين حينجحوا

ااااه.. السلفيين، اللي بقوا موازين لابو رجل مسلوخة

كويس.. خليهم ينجحوا، المحافظ اصلا منصب مش مهم للدرجة دي، منصب النائب في البرلمان اهم، واهي المية تكدب الغطاس

يا اما نخلص من بعبع السلفي اللي بياكل عيال صغيرة ده، ولما ينجح كمحافظ يخدم الناس ويتقي ربنا في الميزانية اللي في ايده، ويكشف الحرامية ويقدمهم للتحقيق وينضف المحافظة، ويبقى ساعتها الناس اللي بتنام تحلم بالسلفيين وتصحى مفزوعة دي تتبط شوية وتعرف ان الواحد ممكن يبقى سلفي ومش بيقطع ودان ولا بياكل دراعات ولا بيشرب عصير دم مسيحيين

يا اما يطلعوا السلفيين دول مازينجر، ويحجبوا البنات بالعافية، ويمنعوا الشباب من القعدة على الكورنيش، ويخربوا بيوت الكازينوهات، ويقفلوا القهاوي، ويمنعوا ترميم الكنائس، ويهدوا الاضرحة، وينكدوا على الناس وفي الحالة دي الناس حتتخنق منهم، المصريين ما بيبحوش الخنقة، اه نصلي ونصوم ونعمل عاشورا.. بس ما تخنقش عليا، احنا الشعب الوحيد في العالم اللي المحجبات فيه بيصلوا ويصوموا ويقروا قرآن ويرقصوا في الافراح قدام الناس كلها والرجالة اللي قاعدين ما بيحسوش ان فيه حاجة غلط بتحصل، عادي ماهو فرح، والرخم اللي بيتدخل عشان يقعد البنات اللي بترقص بيبقى عبرة خلقه في وسط الفرح.. خلاص دي طبيعتنا وماحدش حيقدر يغيرها واللي حيحاول يغيرها حيترمي من الشباك، ولو نزلوا لهم شرطة الحسبة في المحافظة يبقى السلفيين كده اتحرقوا الى غير رجعة، وخلصنا منهم الى الابد، والناس حتعتصم لأم المحافظ المجنون ده وتقول له غور في داهية ده انت ابن تيت، وبعد كده لو اي سلفي عدى في الشارع حينضرب، ومش حيعتبوا المجلس

اظن كده فير ايناف؟ مدام هم قطاع موجود في المجتمع، من حقهم يتحطوا في الاختبار، لو طلعوا ناس كويسة مش من حقك تشتمهم، والاصول تعتذر لهم عشان عممت عليهم وصنفتهم انهم كلهم زي محمد حسين يعقوب، ولو طلعوا مهابيش الناس حتشيلهم، وحترتاح يا سيدي من وشهم الى الابد... استبينا؟ اظن كده حق ربنا

ثالثا: الطريقة

سهلة قوي

حكومة عصام شرف تعلن ان المحافظين الموجودين دول محافظين لتسيير الاعمال، وتقول اننا حنعمل انتخابات كمان شهر ونص او شهرين على الاكثر للمحافظين، وتنزل شروط الترشح للمحافظين

الموضوع ده يتعمل في اسبوع من دلوقت، بس الاعلان يبقى دلوقت حالا اننا بنفكر نعمل انتخابات محافظين، وفي خلال اسبوع حننزل تصورنا والشروط للترشح

الناس اول ما حتسمع كده، المعتصم حيروح

اللي بيتخانق حيبطل خناق عشان يلحق يلم نفسه ويختار مرشح

اول ما يتم اعلان قبول الترشح الناس حتنظم نفسها عشان تنزل في لجان للاحياء والضواحي والقرى التابعة للمحافظة

وماحدش له حق يقول انا مش مستعد، مش مستعد اديني باديلك فرصة اهو تستعد وتتعرف على الشارع، وتنظم نفسك، واصلا لو خسرت الانتخابات دي مش مشكلة خالص، خالص يعني، المهم تبقى دربت نفسك وقست قوتك

اسألوني انا بقى واحدة كانت بتجيب نمر عالية من غير ما تذاكر

عمري في حياتي ما فتحت كتاب ولا عملت واجب ولما كبرت شوية ما بقتش احضر اساسا

بس قبل الامتحان بأسبوعين افضل احل في امتحانات احل في امتحانات احل في امتحانات واجيب نمر اعلى من اللي قاعد يدح ويحفظ من اول السنة

مافيش حاجة تقوي اتصالك بالشارع وقدراتك على الشحن وكسب اصوات غير انك تنزل الانتخابات وتشتغل عملي بدل ما تقعد تنظر على ام الناس وتخنق عليهم وعايز المجلس العسكري يحبس لك الاخوان على ما تعمل انت بادي بيلدينج

لا اشتغل بقى

والله الموفق

--------

بالنوسبة ليحيى الجمل الطود الراسخ

احنا عايزين نخلص منه الراجل ده.... لا بجد، حد يشيله ولا نشيله احنا؟ 

عصام شرف ملزوم يشيل لنا الطود الراسخ.. فورا

---------

بالنوسبة للي بيقولوا لي: خلينا في نفسنا. تعليقا على كلامي لما باتكلم عن الثورات العربية

على فكرة.. دي غباوة، وانا لا اتورع اني اقول للي بيقول كده: انت غبي

الثورة دي ما كانتش حتقوم اساسا لو كنا فضلنا في نفسنا.. هو لولا تونس كنا عملنا ثورة؟ 

تاني عشان نوضح الواضحات

لو كنا فضلنا في نفسنا ما كناش اهتمينا بثورة تونس، ولو ما كناش اهتمينا بثورة تونس ما كناش عملنا ثورة

لو كنا فضلنا في نفسنا ما كناش تابعنا تطورات ثورة تونس، ولو ما كناش تابعناها ما كناش حلينا امن الدولة ولا الحزب الوطني ولا حاكمنا مبارك، لاننا بنستفاد من خبرات بعض، هو احنا مش كل يوم بنعمل ثورة يعني

ولو فضلنا في نفسنا وما دعمناش الثورات العربية اللي حوالينا اجهزة الاستخبارات بتاعة الانظمة الاستبدادية اللي حوالينا مش حتسيبنا في حالنا

احنا لو فضلنا في نفسنا، النظام السعودي مش حيفضل في نفسه، ولا ناسيين انه كان بيضغط عشان مبارك ما يتحاكمش؟ وقبل كده كان بيضغط عشان ياخد مبارك عنده في تبوك، لو نجحت ثورة اليمن اللي السعودية متدخلة عشان تفشلها، وثورة سوريا اللي برضه السعودية متدخلة عشان تفشلها، مش حنلاقي حد رافع علم السعودية في قنا وعامل لنا فتنة طائفية هنا في البلد، وحيبتدي النظام السعودي يتعامل مع امر واقع حواليه في المنطقة، ونجاح الثورات اللي حوالينا حيساعدنا ويدعم موقف ثورتنا في الداخل، وتبادل الخبرات حيقوينا، وممكن نساعد بعض اقتصاديا ونقف جنب بعض وبالتالي الازمة الاقتصادية اللي عندنا ممكن تتحل لو احنا وتونس وبقية الدول اللي فيها ثورات - تنجح ان شاء الله - اتسندنا على بعض حنشكل كيان اقوى، واقتصاد اقوى، وبالتالي دعم اقوى لقيم الثورة، وهكذا وهكذا

بلاش خيبة والنبي

مشاكل كتير داخلية تفصيلية تتحل لو الثوارت اللي حوالينا نجحت

انا مش باحب الغباوة على فكرة

كمان مافيش وقت عندنا للغباوة.. اهي دي الحاجة الوحيدة اللي احنا ما عندناش وقت ليها، غير كده احنا فري بعد الضهر ممكن نشرب قهوة سوا