Saturday, 23 April 2011

بالنوسبة للمحافظين

طب واحنا ايه اللي يخلينا احنا نقبل بتعيينات وبعد ما يعينوا نعمل لهم مظاهرات.. مدام كده كده بننزل الشارع ونبات فيه يبقى ننتخب المحافظ
ييجي واحد يقول لي: لا مافيش وقت
مافيش وقت لايه يا امور؟ هو بس فيه وقت للنومة في الشارع وقطع السكة الحديد؟ احنا ورانا ايه يعني؟ ننتخب المحافظين في الشهرين الجايين دولم
بص يا سيدي
انتخاب المحافظين له منافع عدة، وممكن يتعمل بخطة سهلة
اولا: المنافع
1- اهم منفعة للقوى السياسية الناشئة واللي لسه ما اشتغلتش على الارض وقاعدة تقول الاخوان اكلوا الساندوتش بتاعي
مرة واحد قريبنا، عنده اربع سنين، فجأتن لقيته لطش ابن خالته اللي في نفس السن بالالم على وشه، وراح فاتح جاعورته وقعد يعيط، الواد اللي ضرب مش اللي انضرب هو اللي بيعيط، اللي انضرب ما عيطش، وراح قايل: عااااااا... مش عااااييييززز يلعب معااااايااااااا مش عااااايز يلعب معااااايااااا.. فاخدته على جنب وقلت له: ماهو يا حبيبي لو هو مش عايز يلعب معاك مش حتخليه يلعب معاك لما تلطشه بالالم.. هات لعبك، واقعد العب بيها لوحدك، وهو لما يلاقي اللعب حلوة حييجي يلعب معاك، لكن لما تلطشه بالالم على وشه مش حيبقى عايز يلعب معاك ولا عايز يشوف خلقتك تاني
بدل ما القوى السياسية المختلفة مجتمعة قاعدة تعيط وتقول الاخوان مش عايزين يلعبوا معايا.. العبوا بقى انتوا 
نعمل انتخابات محافظين، وانتخابات محليات، وده يبقى تدريب كويس للقوى السياسية اللي مش بتعرف تتعامل مع الشارع انها تنزل النقابات وتنزل العشوائيات والضواحي والقرى النائية وتعمل حملات، ممكن ما تنجحش، بس اهي تبقى اتدربت، عرفت نقط ضعفها فين، ونقط قوتها فين، وتبتدي تحاول تعالج نقاط الضعف وتدعم نقاط القوة عشان لما تيجي انتخابات المجلس تبقى على الاقل عرفت تعمل شوية تربيطات على الارض، ماهم مش حينزلوا يشتغلوا على الارض الا بالطريقة دي، لإنهم كسالى.. كسالى جدا، وعشان كده بيتخانقوا مع المجلس العسكري لإنهم عايزينه يجيب لهم الرضعة وهم قاعدين في السرير
وهو ما ينقلنا للنقطة التانية
2- بدل ما كل شوية الناس تمسك في خناق المجلس العسكري - وطبعا مش بتمسك في خناق عصام شرف مهما عمل لانه جاي على هواها، عادي يعني ماهم مطففين - ما المجلس العسكري يريح دماغه من الهوسة دي وينزل الناس تنتخب محافظينها ولو حد فتح بقه بقى معاهم يقولهم: هاااه؟ انا مالي؟ الناس هي اللي انتخبت، ومش ذنبي والله انكم فشلة، هو انتوا كل ما تفشلوا تمسكوا في خناقي انا؟ اديني اديتكم فرصة تانية بعد الاستفتاء عشان تورونا شطارتكم
كمان ده تدريب كويس للمجلس العسكري على ادارة انتخابات المجلس بدل ما يمسكوا في خناقه ويقولوا له انت اخوان انت سلفي انت فلول، اهو يشوف على الارض يقدر ازاي يغطي الانتخابات، ويشرف عليها، وينظمها، زي ما عمل في الاستفتاء، يعني باللغة العسكرية تبقى تطعيم للمعركة.. زي حرب الاستنزاف كده، انتخابات على نطاق ضيق ينفع يتم السيطرة عليه لو فشل، ولو نجح يحسس الناس بالثقة في نفسهم وفي نفس الوقت يبقى تدريب على المعركة الكبيرة
اي خسارة في معركة المحافظين والمحليات يمكن تداركها، لكن الخسارة في معركة المجلس حتبقى مصيبة
وبدل ما تباغتوا الناس وتفاجئوهم ان التظاهر ممنوع، ما تشغلوهم في حاجة تلهيهم عن التظاهر، ماهو لو نازل انتخابات المحافظين والمحليات وخلافه، مش حيعمل مظاهرة، يعمل مظاهرة ليه؟ حينزل الاماكن ويعمل مؤتمرات شعبية ويلف على الاحياء والقرى اللي تابعة للمحافظة بتاعته، مش عنده وقت يتظاهر، واللي مش عاجبه مرشح ينزل مرشح قدامه
3- ده كويس للاقتصاد على عكس ما اي حد تاني ممكن يفتكر
فلسوا اللي معاهم فلوس شوية، عارفة ان فيه ناس حتستغل الفلوس، يا ريت.. كل اللي جيبه معبي مخزن فلوسه للمجلس، لا... خلوه يحل الكيس بدري بدري، والناس ايام مبارك اللي هو مبارك كانوا بياخدوا الفلوس ويضربوا عليها وما يروحوش الانتخابات او يروحوا وينتخبوا اللي على مزاجهم.. مش وحش ان حد نازل انتخابات المحافظين والمحليات ويخش على الناس برشة جريئة، خليه يدفع احسن من عينه، واهو يشيل الاقتصاد شوية بدل ما الناس عمالة تقر وتشتكي ان كل حاجة غالية، واحنا نمشي وراه ونقول للناس: الحرامي اهو.. الحرامي اهو.. ومن غير ما نمشي وراه، الناس عارفة انه حرامي من ايام مبارك، ايام مبارك ماحدش كان بيعرف ينزل قدامه، وماحدش كان بيعرف يراقب تزويره، وماحدش كان بيعرف يلقطه
اييييووووةةةة يلقطه، وهو ما ينقلنا الى النقطة الرابعة
4- قالك.. اديني فرصة تانية اثبت لك فيها حبي
اللي هم الاخوة اللي كانوا بينزلوا يقفلوا الصناديق ويقدموا رشاوى ويشتروا اصوات.. نعمل ايه؟ نديهم فرصة ولا نوئدهم؟ 
انتخابات المحافظين والمحليات حتخلينا نعرف، بسرعة لو عملنا انتخابات وكل واحد نزل بالمرشح بتاعه، حنعرف مين اللي بيقدم فلوس وبيشتري اصوات ونعمل لامه فضيحة ونخلي اللي ما يشتري يتفرج عليه، ونعرف بقى هو بيمثل انهي اتجاه، واسمه ايه؟ ومين اللي بيشتغل معاه؟ عشان نجيبه من قفاه... اييييوووةةة اييييووووةةةة.. زي ما عملتوا في الظباط المعتصمين وجبتوا لنا هلع.. فاكرين؟
سيبتوهم يخشوا الميدان عشان تعرفوا عددهم وقوتهم وشكلهم واولهم واخرهم وبعدين دخلتوا وقعتوا قلبنا احنا عشان تجيبوهم بعد ما اتأكدتوا ان عددهم قليل ومالهمش وزن، واحنا اللي اتخضينا وشعرنا طقطق 
مدام قلبكم جامد كده وبتجربوا فينا عادي، ما تجربوا فينا برضه عشان تعرفوا مين المرتشي ومين الحرامي ومين المزور، واهي حاجة يمكن تداركها
5- المحافظ مش مهم ابدا.. ايا كان اللي حينجح في الانتخابات، ده لو طلع وحش اللي انتخبوه يشيلوه، واضراره مش مهمة، وصلاحياته مش كتيرة، وممكن يتعفق بسهولة، طب ما تخلونا احنا وانتوا والقوى السياسية نجرب نفسنا في منصب مش مهم عشان تبقى دي اقل الخسائر
ثانيا: الاعتراضات على الاقتراح
1- قالك مافيش وقت... ايوة يعني انت بتعمل ايه دلوقت؟ مافيش وقت لايه؟ انت وراك ايه دلوقت حاليا؟ بتخترع الذرة ومش فاضي لنا؟ لا بقى.. احنا دلوقت فاضيين، وفاضيين زيادة عن اللزوم، وده كخ علينا
انا فخورة طبعا اني مصرية، والشعب المصري شعب عسل عسل عسل.. بس لما بيلاقي دقيقة فاضية في حياته بيبقى ابن ستين كلب 
ما ينفعش الشعب ده يفضى، احنا الشعب الوحيد اللي كان بيستعجل مبارك يمشي لان وراه شغل
يا سيدي ما ينفعناش احنا نفضل فاضيين، لما بنفضى بنتخانق مع بعض وبيطلع منا اوسخ مافينا وبنبقى عاملين زي اركان حرب متقاعد بيوقف عياله طابور صفر وانتباه على الفطار الصبح احنا لو من هنا لحد كمان شهرين ولا حتى شهر ونص استعدينا لانتخابات محافظ حنشتغل بايدينا وسنانا بدل ما نقعد نمسك في خناق بعض
2- الانتخابات مكلفة.. يا سلااااااااااااام، هو انت بتخسر كام دلوقت؟ بالعكس، الانتخابات دي حتطلع فلوس كتير تحت البلاطة، خلي الحرامية يفلسوا، ماهو انت دلوقت بتخسر فلوس عشان الناس نايمة لك في الشارع، الناس كده كده بتنزل الشارع، تطلع قانون، تطلع روحهم، هو حد بيعرف يسيطر على الناس دي؟ خليهم ينزلوا الشارع بحاجة مفيدة، وعلى الاقل نزلتهم يغطي تكلفتها ولاد الحرامية اللي بينزلوا الانتخابات بالفلوس، وحش ده؟ 
وبعدين احنا طول عمرنا بنجيب الجون في الوقت بدل الضائع، يعني احنا مش بنعرف نشتغل الا تحت ضغط، وكل ما الوقت قل كل ما مجهودنا اتضاعف واداءنا بقى احسن.. احنا كده دي طبيعتنا
3- لا لا لا مش حينفع... لو عملنا انتخابات للمحافظين في الوقت القليل ده السلفيين حينجحوا
ااااه.. السلفيين، اللي بقوا موازين لابو رجل مسلوخة
كويس.. خليهم ينجحوا، المحافظ اصلا منصب مش مهم للدرجة دي، منصب النائب في البرلمان اهم، واهي المية تكدب الغطاس
يا اما نخلص من بعبع السلفي اللي بياكل عيال صغيرة ده، ولما ينجح كمحافظ يخدم الناس ويتقي ربنا في الميزانية اللي في ايده، ويكشف الحرامية ويقدمهم للتحقيق وينضف المحافظة، ويبقى ساعتها الناس اللي بتنام تحلم بالسلفيين وتصحى مفزوعة دي تتبط شوية وتعرف ان الواحد ممكن يبقى سلفي ومش بيقطع ودان ولا بياكل دراعات ولا بيشرب عصير دم مسيحيين
يا اما يطلعوا السلفيين دول مازينجر، ويحجبوا البنات بالعافية، ويمنعوا الشباب من القعدة على الكورنيش، ويخربوا بيوت الكازينوهات، ويقفلوا القهاوي، ويمنعوا ترميم الكنائس، ويهدوا الاضرحة، وينكدوا على الناس وفي الحالة دي الناس حتتخنق منهم، المصريين ما بيبحوش الخنقة، اه نصلي ونصوم ونعمل عاشورا.. بس ما تخنقش عليا، احنا الشعب الوحيد في العالم اللي المحجبات فيه بيصلوا ويصوموا ويقروا قرآن ويرقصوا في الافراح قدام الناس كلها والرجالة اللي قاعدين ما بيحسوش ان فيه حاجة غلط بتحصل، عادي ماهو فرح، والرخم اللي بيتدخل عشان يقعد البنات اللي بترقص بيبقى عبرة خلقه في وسط الفرح.. خلاص دي طبيعتنا وماحدش حيقدر يغيرها واللي حيحاول يغيرها حيترمي من الشباك، ولو نزلوا لهم شرطة الحسبة في المحافظة يبقى السلفيين كده اتحرقوا الى غير رجعة، وخلصنا منهم الى الابد، والناس حتعتصم لأم المحافظ المجنون ده وتقول له غور في داهية ده انت ابن تيت، وبعد كده لو اي سلفي عدى في الشارع حينضرب، ومش حيعتبوا المجلس
اظن كده فير ايناف؟ مدام هم قطاع موجود في المجتمع، من حقهم يتحطوا في الاختبار، لو طلعوا ناس كويسة مش من حقك تشتمهم، والاصول تعتذر لهم عشان عممت عليهم وصنفتهم انهم كلهم زي محمد حسين يعقوب، ولو طلعوا مهابيش الناس حتشيلهم، وحترتاح يا سيدي من وشهم الى الابد... استبينا؟ اظن كده حق ربنا
ثالثا: الطريقة
سهلة قوي
حكومة عصام شرف تعلن ان المحافظين الموجودين دول محافظين لتسيير الاعمال، وتقول اننا حنعمل انتخابات كمان شهر ونص او شهرين على الاكثر للمحافظين، وتنزل شروط الترشح للمحافظين
الموضوع ده يتعمل في اسبوع من دلوقت، بس الاعلان يبقى دلوقت حالا اننا بنفكر نعمل انتخابات محافظين، وفي خلال اسبوع حننزل تصورنا والشروط للترشح
الناس اول ما حتسمع كده، المعتصم حيروح
اللي بيتخانق حيبطل خناق عشان يلحق يلم نفسه ويختار مرشح
اول ما يتم اعلان قبول الترشح الناس حتنظم نفسها عشان تنزل في لجان للاحياء والضواحي والقرى التابعة للمحافظة
وماحدش له حق يقول انا مش مستعد، مش مستعد اديني باديلك فرصة اهو تستعد وتتعرف على الشارع، وتنظم نفسك، واصلا لو خسرت الانتخابات دي مش مشكلة خالص، خالص يعني، المهم تبقى دربت نفسك وقست قوتك
اسألوني انا بقى واحدة كانت بتجيب نمر عالية من غير ما تذاكر
عمري في حياتي ما فتحت كتاب ولا عملت واجب ولما كبرت شوية ما بقتش احضر اساسا
بس قبل الامتحان بأسبوعين افضل احل في امتحانات احل في امتحانات احل في امتحانات واجيب نمر اعلى من اللي قاعد يدح ويحفظ من اول السنة
مافيش حاجة تقوي اتصالك بالشارع وقدراتك على الشحن وكسب اصوات غير انك تنزل الانتخابات وتشتغل عملي بدل ما تقعد تنظر على ام الناس وتخنق عليهم وعايز المجلس العسكري يحبس لك الاخوان على ما تعمل انت بادي بيلدينج
لا اشتغل بقى
والله الموفق
--------
بالنوسبة ليحيى الجمل الطود الراسخ
احنا عايزين نخلص منه الراجل ده.... لا بجد، حد يشيله ولا نشيله احنا؟ 
عصام شرف ملزوم يشيل لنا الطود الراسخ.. فورا
---------
بالنوسبة للي بيقولوا لي: خلينا في نفسنا. تعليقا على كلامي لما باتكلم عن الثورات العربية
على فكرة.. دي غباوة، وانا لا اتورع اني اقول للي بيقول كده: انت غبي
الثورة دي ما كانتش حتقوم اساسا لو كنا فضلنا في نفسنا.. هو لولا تونس كنا عملنا ثورة؟ 
تاني عشان نوضح الواضحات
لو كنا فضلنا في نفسنا ما كناش اهتمينا بثورة تونس، ولو ما كناش اهتمينا بثورة تونس ما كناش عملنا ثورة
لو كنا فضلنا في نفسنا ما كناش تابعنا تطورات ثورة تونس، ولو ما كناش تابعناها ما كناش حلينا امن الدولة ولا الحزب الوطني ولا حاكمنا مبارك، لاننا بنستفاد من خبرات بعض، هو احنا مش كل يوم بنعمل ثورة يعني
ولو فضلنا في نفسنا وما دعمناش الثورات العربية اللي حوالينا اجهزة الاستخبارات بتاعة الانظمة الاستبدادية اللي حوالينا مش حتسيبنا في حالنا
احنا لو فضلنا في نفسنا، النظام السعودي مش حيفضل في نفسه، ولا ناسيين انه كان بيضغط عشان مبارك ما يتحاكمش؟ وقبل كده كان بيضغط عشان ياخد مبارك عنده في تبوك، لو نجحت ثورة اليمن اللي السعودية متدخلة عشان تفشلها، وثورة سوريا اللي برضه السعودية متدخلة عشان تفشلها، مش حنلاقي حد رافع علم السعودية في قنا وعامل لنا فتنة طائفية هنا في البلد، وحيبتدي النظام السعودي يتعامل مع امر واقع حواليه في المنطقة، ونجاح الثورات اللي حوالينا حيساعدنا ويدعم موقف ثورتنا في الداخل، وتبادل الخبرات حيقوينا، وممكن نساعد بعض اقتصاديا ونقف جنب بعض وبالتالي الازمة الاقتصادية اللي عندنا ممكن تتحل لو احنا وتونس وبقية الدول اللي فيها ثورات - تنجح ان شاء الله - اتسندنا على بعض حنشكل كيان اقوى، واقتصاد اقوى، وبالتالي دعم اقوى لقيم الثورة، وهكذا وهكذا
بلاش خيبة والنبي
مشاكل كتير داخلية تفصيلية تتحل لو الثوارت اللي حوالينا نجحت
انا مش باحب الغباوة على فكرة
كمان مافيش وقت عندنا للغباوة.. اهي دي الحاجة الوحيدة اللي احنا ما عندناش وقت ليها، غير كده احنا فري بعد الضهر ممكن نشرب قهوة سوا

69 comments:

medhat ali said...

جاااااااااااااااامدة موت
ياريت المجلس يشوفلنا حل فى الموضوع دة لان الواحد بصراحة قرف
ياتهم الهم محافظين على محليات على مجلش شعب
داهية تقطعهم وكل كليله

حسن السيد said...

انتِ دماغك عالي قوي يا نوارة الله ينور عليكي و على أبوكي و على أمك كمان :)

Hana said...

الفكرة دي يانوارة مهمة قوي، وممكن تكون مفتاح لحل كتير من الإشكالات الحالية زي ماقلتي.. وياريت تتابعوا المقترح ده وتوصلوه لكل الفاعلين على الساحة عندكم عشان يتنفذ، ولو اقتضى الأمر تعملوله مليونية حتى.

كمان انا بايدك بخصوص البعد الاستراتيجي للثورات العربية، وانها بتدعم بعض، وبعدين الحكاية مسألة مبدأ يعني ازاي الواحد يحب ان الكل يدعمو في ثورته بينما لما يكون التاني محتاج دعم تبقى الحكاية كخة. ثم الدول اللي بتنجح ثوراتها هي اللي حتشكل المشهد الجديد في الايام الجاية، وربما يقدرو يعملوا مجلس اقليمي مع بعض حيكون ليه تاثير كبير ويتمتع بقوة ناعمة بين الشعوب العربية وعند العالم كله. يعني مش فاهمة الواحد يبقى عامل ثورة وعاوز بلده يبقى بلد الحريات والعدالة والديمقراطية، وفي النهاية يسايس نظام قمعي مستبد..؟؟؟

وجهة نظري said...

معلش متزعليش مني، أول مرة من شهرين تقولي حاجة مظبوطة و صح على بعضها. هو دا المطلوب بالظبط. تحياتي لكي

iman said...

This is kalam mawzoon and does not need to be argued but rather to be seriously considered

ali said...

والله لو لم أعلم إنك مش إخوان كنت قلت إنك إخوان
لكن دا لسان العقل
عموما أنا مبطلتش ضحك من كلامك لكن بيفيدني كتير جدا جدا
-----
أخر حاجه بقى مصر وتونس تدين للمحله الكبرى 6 إبريل يا نواره ولا أحد ينسى ذلك

FALCON said...

ديما كلامك فى الجون بس انتى مش معايه ان لازم يكون فى هيبه للدوله والمحافظات مش كبيره اوى زى الولايات المتحده علشان نعملها بالانتخابات
الخوف بس ان بعد كده نطالب بحكم ذاتى لكل اقاليم على حسب رائي الشعب
احنا عملنا ثوره علشان نكون اقوى مش اضعق وده مجرد رائي

madasharshar said...

ربنا ينور عليكي يا نوارة ياريت بقى تفتحي ملف الجامعات لأنهم يا حرام كل الفترة دي رايحين جايين و طلعولنا بمقترحات تزيد في قهر المعيدين و المدرسين المساعدين و الطلبة ياريت تتحل مشكلة الفساد في الجامعة علشان الشباب ما يحسش بالقهر حتى بعد الثورة

ahmed_magdy269 said...

mn zman bn2ol el kalam da bs ka just kalam .. NWARA hia ely mskt el mwdo3 b el wr2a w el 2lam w 2smto mmyzat w 3yob w fnditha w7da w7da .. totally agreeeeeeeeeeeeeeeeeeeeee

Mode Masry said...

حرام عليكي وساكته ده كله كان من الاول كنا خلصنا من الدوشة ووجع القلب ده بس هل من مستجيب فعلا

بساطه said...

ابتديت احس ان دماغك سم يانواره:) بس انا موافق وعاجبني السم ده .. سم على الظلمه والحراميه انشاءالله

ќїĐ said...

طب ايه بقي .. عايزين الكلام الموزون ده يتنفذ

hero_33 said...

و بعدين يا نوارة فى الوضع الاقتصادي
أمريكا مش عايزة تساعدنا
و شرف ألغى الجولة الخليجية
الكل بيضغط......واضح الخليج ضاغط جامد............هنعمل إييييييييييييييييييه

3655d538-6da3-11e0-a67d-000f20980440 said...

ربنا يشفيكى

أرنوب said...

أحييك على هذا البوست الذي أوافق بشدة على كل حرف فيه (خصوصاً وجهة نظرك في التعامل مع السلفيين)... نيجي بقى للغباوة .. ماحدش قال ما نهتمش بالثورات العربية المجاورة وماحدش قال إنها مابتأثرش فينا .. المقصود يا نوراتنا حاجتين
الأولى : مانقعدش ننظر للتانيين وإحنا مانعرفش ظروفهم زي ما هما عارفينها
الثانية : إن فيه أولويات .. يعني مايكونش بيتي بيتحرق بالطائفية والثورة المضادة وأروح أقترح حلول للشعوب الأخرى .. أطفي حريقة بيتي الأول
أخيراً .. لازم تتباهي بالمعقبين على بوستاتك وعايزك تتأكدي إن فيهم ناس سعادتك ما تحلميش تقفي منهم موقف التلميذ .. أكرر .. ما تحلميش .. فأحمدي ربنا أنهم بيوجهوكي بدل مانتي كل شوية عماله تشتميهم

أبو هاجر said...

ست الكل مساء الخير
رايحة تنسيني لغتي االعربية يا بنت
شوفي يا النوارة أنا إلى حد الآن" ساكت ولا كلمة ، صابر و لا رحمة" ساكت على تجاوزاتك في حق اللغة العربية وصابر على مرمطتك لها.بل أكثر من ذلك، أتألم وأنا ساكت ،لما أشاهد تعذيبك للغة العربية .متى تعودين إليها. رغم إجادتي للهجة المصرية ستظل العربية هي حاضنتا وهويتنا .بخاصة يا النوارة لما أصبحت المدونة ملتقى أبناء الأمة العربية من المياه إلى المياه، وأصبحت صاحبة المدونة، جميلة بوحيرد جديدة .هذا يعني انك أصبحت ملكا لأمة بأكملها وليس للمحروسة وحدها . بالمناسبة أول ما تعرفت عليك في الدستور تعرفت على لغتك العربية الجميلة والجذابة . وهذا يقودني إلى الحديث عن الثورات العربية ، من يقول خلينا في حالنا، هذا ليس موقفا فكريا أو سياسيا، إنما تعبير صريح عن ضعف علمي وانهيار كبير في الوعي التاريخي لأننا ببساطة امة واحدة جسد واحد إذا اشتكي منه عضو تداعي له سائر الجسد بالسهر والحمى بل أكثر من ذلك لن نخطو خطوة واحدة على درب التقدم الحضاري و التاريخي إذا لم يحقق العرب وحدتهم القومية. و العلوم الاجتماعية و تجارب الأمم حسمت هذا الموقف فأقل من 250 مليون لا يمكن لأي شعب أن يحقق نهضة حضارية و الوحدة الأوروبية أسوة حسنة لذوي الألباب
تحياتي الصادقة

dr.hebamawgood1981 said...

والله يا نواره انت بميت راجل.....ولو فيه منك الف واحدة يبيقى فيه امل البلد تنصلح
بقولك ايه ما تعملى حزب وننفذ سوا الى بتقوليه

Hesham essa said...

انتى مش بتبلعى ريقك ليه وانتى بتتكلمى
كلامك معتبر الى حد جامد طحن بس محتاج اليات تنفيذ ، وموضوع انتخابات المحافظين ممكن يتعمل بعملية توقيعات من المحافظات زى الميت الف اللى فاتوا ن بلاش مليونيات المرة دى
وعلى فكرة مصر سندت ايام 52 كل الثورات فى المنطقة وده اكسبنا شعبية فى افريقيا كانت تحسد عليها مصر فمابالك لو الوضع ده كان مع الاشقاء العرب
بس فى كل الخطوات اللى جاية بلاش نطول لسانا على حد وبخاصة الجيش اللى كل اسبوع يتعمله مئوية او عشرية عند قبر الجندى المجهول بدون اى سبب

dr.hebamawgood1981 said...

والله يا نواره انت بميت راجل ......يا ريت تفكري تعملى حزب
لو فيه منك الف واحده يبقى فيه امل

Yaser said...

المقالة دى بقى موافق على كل ماجاء فيها جملة وتفصيلا وواضح انك حليتى امتحانات محافظين قبل كده وهاتاخدى النمرة النهائية
حتى دعم الثورات العربية المرة دى عقلتى فى مطالبك
مساندة من ناس حرة الحركة فرض علينا لكن من تنظيمات محاصرة حرام عليكى
وكده يبقى فير ايناف

omima said...

ماشى ياستى اشتمى واتهمينا بالغباء ماهو انا اللى عملت فى نفسى كدة حبيتك وزعلت عليكى لما لاقيت الناس بتهاجمك لكن اللى يلعب مع العيال لازم يستحمل وعموما رد ارنوب اسعدنى

ahmed-maksoud1 said...

ياااه بقالى كتير ما قريتش حلول لمشاكل قاعدة بترف على دماغنا ومنك بذات
وبعدين موقفنا من سوريا او اى ثورة عربيه زى زمان بظبط شعبى فقط لا غير لسان الثوار فى ليبيا دلدل عشان الحكومه المصريه او المجلس يعمل حاجه عشان الامريكان ما يدخلوش البلد وييجى جون ماكين يساوم بقه...انتوا هتدونا كام واحنا نخلص ليكم الليله.........نفس الوضع فى اليمن وسوريا والاخيرة اللى بجد مظلومه حتى من الاعلام زى الجزيرة اللى مصممه تقول عليها احتجاجات مع ان فى ليبيا من اول اسبوع سمتها ثورة
ال سعود ربنا يخدهم زى ما محى طواغيت جنبهم ..ميرسى ليكى يا نوارة

الفوريجي said...

الواد بتاع شعار البلاي بوى اللي مسمي نفسه أرنوب،احترم نفسك بروح أمكك، وبطل تباته،مش نقصه بلاليص،وتفسير أحلام ايه كل يوم خص وجزرمفيش ذوق خالص وكل واحد عامل نفسه أبو العريف يروح يكتب فى مدونة أمه لو عنده رأى أحنا بندخل هنا عشان نشوف رؤية نواره في ما يجري وفيه ستين طريقه للحوار من غير نفسنةوقلت أدب لكن لو الموضوع موضوع استعراض وقباحة فده اسهل من شكة الدبوس بروح أمك منك له اتلموا كده وشفولكم قفله

marwa said...

مشاء الله عليكى ربنا يحميكى ويكملك دايما بالعقل والعلم والمعرفه واحنا معاكى ونبى يانواره متنسيناش شقى علينا من وقت للتانى بالافكار الجامدة دى
تحياااااااااااااااااااااااااتى

أبو هاجر said...

إلى المحترم أرنوب
أولا ألف تحية من الجزائر
أنا أتابع جميع إسهاماتك و أتوقف كثيرا عند ملاحظاتك التي تعكس الكثير من الذكاء و العمق والإلمام بالوضع المصري وبخاصة موقفك النقدي منها. أما موقفك من النوارة فأصارحك القول إن موقفي سكون منحازا تمام الانحياز ويكون بعيدا كل البعد عن التجرد و الحياد و الموضوعية لأن النوارة لها دين علي كما هي عزيزة علي . ومثلما كنت اقترح للأشقاء المصريين الذين لهم رأي آخر في عبد الناصر أن نقسم جمال عبد الناصر إلى قسمين عبد الناصر المصري وعبد الناصر العربي وكنت أطالبهم أن يتركوا لنا عبد الناصر العربي نحبه على طريقتنا. كذلك لا تعاتبني على انحيازي الكامل و اللا مشروط للنوارة
أما بخصوص رؤيتك في الثورات العربية ، لقد بدا لي أنها رؤية ينقصها الكثير من الجدل بخاصة في علاقة الداخل بالخارج لأنه يتعذر النظر للداخل بمعزل عن الخارج ،بخاصة في الوضع العربي وفي هذه المسألة تحديدا تفترق النظرة الإقليمية مع النظرة القومية ، لأن التجارب التاريخية بينت أن ترتيب البيت الداخلي في كثير من الأحيان بيدا من مكان بعيد جدا وهذا ما حاول أن يشرحه أحد المعلقين لما تحدث عن علاقة مصر بمشرقها لكن النوارة تهجمت عليه وكانت عنيفة معه بدون أن افهم السبب
مرة أخرى لك تحياتي الحارة

محمد نبيل said...

مش بالسهولة دى نقول عايزين انتخابات للمحافظين لأننا مش دولة فيدرالية، فرنسا المحافظين فيها بالتعيين، موضوع نظام الحكم المحلى دة لازم يدرس من متخصصين بما يتناسب مع ظروف مصر ولازم يحصل حوار مجتمعى وتوعية بايجابيات وسلبيات أى نظام حنتبعه، الحاجات خطيرة وممكن تأثر على وحدة الدولة ولازم نتأنى وندرسها كويس.

أحمد قابيل said...

رائع يا نوارة .. كما أنت دائما

محمد نبيل said...

تعليقا على ما جاء بتعليق الأخ أبو هاجر

ذكرت هذه الجملة أخى أبو هاجر

"و العلوم الاجتماعية و تجارب الأمم حسمت هذا الموقف فأقل من 250 مليون لا يمكن لأي شعب أن يحقق نهضة حضارية "

اذن كيف نهض اليابانيون والكوريون الجنوبيون ؟ هم متفوقون حتى على الصين ذات الأكثر من مليار نسمة.

غزالي تنفيس said...

جميل كالعادة يا نوارة الثورة, موافق علي كلامك, بس ياريت نبتدي في اسرع وقت علشان الناس فاضية اوي ومصيبة ان الشعب يبقي فاضي في وقت الثورة

تامر ضياء said...

يا سلام عليكى يابنت مصر يا أصيلة
أستااااااااااااااااذة تسلمى والله

أبو هاجر said...

المحترم محمد نبيل تحياتي الخالصة
لقد تحدثت عن النهضة الحضارية وليس النهضة الاقتصادية أو التقنية وما يُقصد عادة لما يكون الحديث عن النهضة الحضارية هو السيادة التاريخية بمعنى أن أمة من الأمم لما تتوفر لها جملة شروط تتحول إلى ذات صانعة للتاريخ أي تصبح قائدة للتاريخ وحلقة أساسية فيه . كوريا لم تتحول إلى قيادة تاريخية ولا حتى الصين العظيمة عكس الغرب الذي يمسك مفاتيح التاريخ ويتقدم قاطرته . هل تتصور مثلا 2 مليون موريتاني أو 10 مليون تونسي أو 35 مليون جزائر يصنعون نهضة حضارية بالمعنى الذي أشرت إليه أما النهضة الاقتصادية فهذه ممكنة لأي شعب. أما السيادة التاريخية فشيء آخر
مرة أخرى تحياتي الخالصة

أرنوب said...

إلى الأخ الفوريجي : أولاً يابني مافيش نفسنه ولا حاجه .. ثانياً : أنا مش (واد)لأن معظمكم بمثابة أولادي من حيث السن والخبرة .. ثالثاً : من يتحدث عن (الأدب) مايقولكش : بروح أمك ..ثم أن الشتيمه - زي ما قلت يا شاطر - أسهل من السهولة وممكن أشبعك شتايم مش حتعرف ترد عليها لأنك أصلاً مش حتفهمها .. رابعاً : الشعار والرمز لا يدلان على شيء وإلا فأن شعارك (الفوريجي) يدل على إنك هجاص .. رابعاً : إحنا بندخل على مدونة النوارة مش عشان نقول أمين على كل ما تكتبه وإلا كانت بتكتب لنفسها فقط (حاجة كده زي اللي بيغني في الحمام من غير سميعه) إحنا بنشارك عشان نؤيد ما يستحق التأييد ونستهجن ما يستحق الإستهجان ... خامساً : تقدر تقول لي (إستهجان) يعني أيه ؟ عشان لو مش فاهمها أشرحهالك

بيسان said...

1

بيسان said...

المصريون ... رفعوا اسم حسني مبارك من الشوارع والميادين ... وابقوا على اسم الحسين بن طلال الذي وشى بجيشهم لاسرائيل


قضت محكمة القاهرة للأمور المستعجلة في مصر الخميس برفع اسم الرئيس السابق محمد حسني مبارك وزوجته سوزان ثابت من جميع الميادين والشوارع وكل المنشآت، وكذلك صوره الموجودة بها وإلزام رئيس الوزراء بصفته رئيس الحكم المحلى بتنفيذ ذلك.وذكر موقع بوابة "الأهرام" الأليكتروني الخميس أن المحامي سمير صبري كان أقام دعوى أمام المحكمة يطالب فيها رئيس الوزراء برفع اسم مبارك وزوجته من جميع الميادين والشوارع والمنشآت العامة
وقالت المحكمة فى حيثيات حكمها إن الشعب "اكتشف رحلة فساد مبارك التى بدأت من المنصة وانتهت فى ميدان التحرير واتضح أن الفساد الذى يتم الكشف عنه كل صباح أصبح فوق الخيال ولم تتوقف دائرة الفساد عند أحمد عز والمغربى وجرانة وأسامة الشيخ وإنما وصلت إلى أرفع المناصب التى كانت تتقلدها مجموعة من الفاسدين بمساندة مبارك ونجله
وكان مبارك قد شطب اسم ملك مصر العظيم ( رمسيس ) واستبدله باسمه حيث اصبحت اشهر محطة في القاهرة تحمل اسم محطة مبارك بدلا من محطة رمسيس ... وطال الشطب العديد من الميادين والشوارع التي وزع عليها مبارك اسماء اصحابه ومنها اهم شارع في خليج نعمة في شرم الشيخ حيث اطلق عليه مبارك اسم ملك البحرين
الا ان اكثر ما يمس مشاعر المصريين ويجرح كبريائهم هو قيام مبارك بشطب اسم ( تريموف ) من الميدان الشهير الذي كان يحمل هذا الاسم في ضاحية مصر الجديدة ليضع بدلا منه يافطة تحمل اسم ( الحسين بن طلال ) مع ان ملك الاردن الحسين بن طلال اعترف شخصيا للتلفزيون الاسرائيلي بانه طار بنفسه قبل حرب اكتوبر وتشرين الى تل ابيب لاخبار الاسرائيليين بموعد حرب اكتوبر ... ويقول الخبراء ان اسرائيل لو صدقت الملك الاردني يومها وقامت بتلغيم قناة السويس وفتح صنابير الغاز على سطح المياه واستنفرت قواتها الجوية لوقع عشرات الالاف من الشهداء المصريين خلال العبور
ومع ذلك يأتي مبارك فيكرم الحسين بن طلال بشطب اسم المهندس ( تريموف ) الذي شارك اللورد امبان في بناء مصر الجديدة ليضع بدلا منه اسم الخائن والعميل الحسين بن طلال ... كثيرون يطالبون الان بشطب اسم الحسين بن طلال عن الميدان واعادة اسم تريموف ... او على الاقل اطلاق اسم الفنان المصري الشهير حسن فائق على الميدان بدلا من حسين بن طلال خاصة وان حسن فايق كان دائم الجلوس على شرفة الميدان يوم كان ولا يزال يمتلك اول صيدلية ( اجزخانة ) في مصر الجديدة تطل على الميدان او اطلاق اسم الشهيد طيار طلعت السادات شقيق انور السادات الذي استشهد في اول طلعة جوية في حرب اكتوبر التي حاول ملك الارن خيانتها والتامر عليها
يا شعب مصر الرائع
اطقوا اسماء ابطالكم وشهداء جيشكم ورموزكم الوطنية على ميادينكم وشوارعكم .. ونظفوها من الاسماء الوسخة التي تامرت عليكم ... وعلى رأسها الحسين بن طلال

العميرى said...

أنا مش عارف هما كمان عايزين يمنعوا المخدرات و الرقص فى الأفراح و كمان شرب الخمرة و الميوه المحزق على البحر
واو
يبقي أنا نفسي أبقس سلفي
دايما الهجوم و العنصرية على السلفيين

محمد نبيل said...

الى أخى أبو هاجر

فهمت ما تقصد أخى الكريم

تحياتى اليك

hardway said...

الي الاخ / أرنوب
أقدم لك أسفي وأعتذاري..لهبوط اللغة..
وتدني اسلوب التحاور..في المدونة...ولكن
الخطأليس من الفوريجي..ولا..المهندس/حازم الهواري..ولا راندافي تعليقات سابقة تم فيها مهاجمة سيادتكم ..الخطأ من صاحبة المدونة عندما تقول وترد علي احد المشاركين في مدونتها

واحد ارنوب.. عايز منه ايه؟ سيبه ياكل خس وجزر

وهنا اريد ان أقول للمدونة/نوارة
ان من جعلك من الفائزين في صفحةلغة العصربتاعة الاستاذ/جمال غيطاس كما هو مدون وارسل لكي صورة مما كتبتي أنت

اصحاب المدونة دي نوارة واللي بيعلقوا عندها وان مشاركتهم في التعليق هي عملت المدونة كأنها وكالة انباء
شفتوا بقى احنا فزنا كلنا
يا سيدتي الفاضلة
رجاء الاهتمام برفع سقف التحاور وأسلوب الكلام الي مستوي محترم....
ولكن عذركم الوحيد انكم نتاج عصر مبارك

hardway said...

الي الاخ / أرنوب
أقدم لك أسفي وأعتذاري..لهبوط اللغة..
وتدني اسلوب التحاور..في المدونة...ولكن
الخطأليس من الفوريجي..ولا..المهندس/حازم الهواري..ولا راندافي تعليقات سابقة تم فيها مهاجمة سيادتكم ..الخطأ من صاحبة المدونة عندما تقول وترد علي احد المشاركين في مدونتها

واحد ارنوب.. عايز منه ايه؟ سيبه ياكل خس وجزر

وهنا اريد ان أقول للمدونة/نوارة
ان من جعلك من الفائزين في صفحةلغة العصربتاعة الاستاذ/جمال غيطاس كما هو مدون وارسل لكي صورة مما كتبتي أنت

اصحاب المدونة دي نوارة واللي بيعلقوا عندها وان مشاركتهم في التعليق هي عملت المدونة كأنها وكالة انباء
شفتوا بقى احنا فزنا كلنا
يا سيدتي الفاضلة
رجاء الاهتمام برفع سقف التحاور وأسلوب الكلام الي مستوي محترم....
ولكن عذركم الوحيد انكم نتاج عصر مبارك

khaledsk said...

اقتراحات ذكية وقوية
الاقتراح الخاص بالمحافظين رائع وأضيف له المجالس المحلية اللصيقة بالمواطنين والتى من المفروض أن تتابع مشاكلهم اليومية فى الاحياء والمحافظات بدلا من الوضع السابق حيث يكلف عضو مجلس الشعب بهذه الامور الهامشية بدلا من أن يقوم بدوره فى رقابة الحكومة وسن القوانين
وأقترح على الدكتور عصام شرف أن يعينك مستشارة له ليستفيد من نظرتك الثاقبة للامور
د. خالد

أرنوب said...

ثم أن التحية واجبة للأخ : أبو هاجر الذي أبادله نفس الشعور فهو من القلائل الذين أتابع تعقيباتهم إذ تختلف عن تعقيبات كثيرة لا تخرج عن نوعين لا ثالث لهما .. نوع يرفض بدون إبداء أسباب الرفض .. ونوع يؤيد على طريقة : أمين موافقون .. وكلا النوعان لا يقدمان ولا يؤخران ولا ينعشان حالة الجدل الواجبة والمطلوبة لمدونة بثراء مدونة النوارة تصيب وتخطيء وتستفز الجميع كي يتفاعل ولا يقف موقف المتفرج .. تحياتي لك ولصاحبة المدونة التي أشعر نحوها مثلما شعر جاهين نحو مصر فهو يحبها برقة وعنف وعلى إستحياء ويشتمها ويلعن أبوها بعشق زي الداء

الفوريجي said...

في البداية لمؤخذه يا شباب أنا أصلي مفقوع من اللي دخلين في الثورة المضادة تطوع وبحسن نيله
ومعلش يا نواره يا بنت الكرام
--------------------------
مين غير متشرحلي يا مشرشح ده أنته هتتمسخر ولا المخلوع
انته هتعملي زى المخلوع وتقولي أولادي
شوف يا ببجم متربس الظاهر أنك فسكنيا وخشنه واضح انك مش عارف أنته بتكلم مع مين أدخل وجوجل الفوريجي الاول ولا بلاش أذاكنت اصلا مش عارف مين نواره
أنا أقولك الأول أنته مين
تصدق انته غتيت والظاهر إني هدخلك جحر ضب ، وفي البداية ، أنا هقولك أنته مين يانحنوح ومن المخروبه بتعتك
فلنبدأ
أنت خايب الأمل في الجميع حكاما ومحكومين واسم مدونتك مهاترات و سفسطه ووتدعوا في بدايتها أعلانها أن تكون دبشا وزلطا على كل الأغبياء والمتنطعين مش ده كلامك في أول تدوينه في المخروبه بتعتك
مش كده يا ذكي أنته ومترفع
ايه بأه الي أغرى ذكائك بالتطاول على نواره
أنا مش عارف ايه اللى جرأك تتنطع
وأنا اتحداك بما أنك فكيك كده انك تعرف كلمة فوريجي معناها ايه يا بتاع الاستهجان
واللي زيك هما اللي خريوا ما دريوا
وبعدين اذا كنت داخل وشايف ان إحنا ولادك يا أبن الأيه محدش قال لك يا قبيح يلي بتشبع شتيمة انته ان اللعب مع الأولاد ميخلاش من الخربيش وخلافه والا البعيد مرتاح لده
أنا بقي اللي هفهمك
من الأخر سيب المدونه هنا للناس اللي بتقول آمين في رأيك ياسي المحلل الأستراتجي وروح على المخروبه بتعتك الظاهر انك عاوز تتظبط أنا مستنيك هناك وبلاش فضحتك تبقى على مستوي العالم العربي
أنته منفنس حبتين وصدقني هعلجك من سفسطة أمك دي
واهو تتأكد أن كنت هجاص ولا فوريجي فعلا

الفوريجي said...

ايه ياعم هارد خره أنته
ما تحترم نفسك بروح أمك أنته راخر، طب متقول في لنفسك قبل ما تقوللي

واحد ارنوب.. عايز منه ايه؟ سيبه ياكل خس وجزر

واحد فيوريجى مال امك وماله كنا فكرين الثورة نظفتكم ايه هي التعرصه داء

محمد نبيل said...

يا نوارة أرجو أن تهتمى بهذا الموضوع، انت تعرفى محامين ونشطاء ممكن يصعدوا الكلام دة
---------

يجب محاكمة مبارك وحبيب العادلى وأحمد نظيف ومحافظى البحيرة السابقين عادل لبيب و محمد سيد شعراوي لعدم تنفيذ حكم المحكمة الإدارية العليا بالقاهرة بتاريخ 5 يناير 2004 بتأييد حكم محكمة القضاء الإداري بالإسكندرية بتاريخ 9 ديسمبر 2001 بوقف قرار وزير الثقافة، باعتبار ضريح " أبو حصيرة" والمقابر التي حوله بقرية دميتوه بدمنهور من الآثار الإسلامية أو القبطية، ووقف الاحتفال السنوي بمولد الحاخام المزعوم "أبو حصيرة"

Samia said...

ياسلاه يا نواره مش لاقيه اقولك أيه على رجاحة عقلك ووضوح بصيرتك غير انى أقول لك........من انتم من انتم؟؟؟؟شباب مصر مستقبلها بصحيح لكم النصر...

أرنوب said...

إنت معاك حق يا بني .. أنا فعلاً غلطان إني رديت على عيل بشخه زيك .. روح إتعلم الكتابة الأول وإتعلم ماتغلطش في حروف الهجاء وبعدين أبقى رد وإشتم .. مين عللمك إن (إنت) تتكتب (إنته) و.. و.. بتكتب سياسية يا ننوس ؟ إتعلم كيف تكتب أولاً .. فعلا رباية عصر مبارك .. بتقولي إنت مش عارف بتكلم مين ؟ لا عارف واحد محتاج يتربى ويتعلم الأدب

a_atef20140 said...

نوااااااااااااااااااره ياترى بقى ازاي ننفذ ةده انتخابات ازااااااااااي دلوقتي وهل نممكن الرئيس الجديد بعد انتخابه علطول يغير الطقم مباشرة من غير مانستنى ويعمله انتخاااااااااب .... عايزين ننزل أرض الواااقع يانواره اللي بتقول ان ده مش حاصل الا لو خدنا خطوات عشان ننتخب محافظين بس ازاااي ياريت نوعي أكتر بتوع قنا ةواليكس والقليوبيه عشان دول اول اناس هيتهموا ويطلبوا ده سواء بالضغط الشعبي المباشر أو غير المباشر..... يعني مثلا د. عصام شرف هيزور قنا طب مانسخنها كمان ف أليكس ونرفع مطلب الشعب يريد انتخاب المحافظين والمحليات ..... ألا كمان حكاية المحليات دي

a_atef20140 said...

نوااااااااااااااااااره ياترى بقى ازاي ننفذ ةده انتخابات ازااااااااااي دلوقتي وهل نممكن الرئيس الجديد بعد انتخابه علطول يغير الطقم مباشرة من غير مانستنى ويعمله انتخاااااااااب .... عايزين ننزل أرض الواااقع يانواره اللي بتقول ان ده مش حاصل الا لو خدنا خطوات عشان ننتخب محافظين بس ازاااي ياريت نوعي أكتر بتوع قنا ةواليكس والقليوبيه عشان دول اول اناس هيتهموا ويطلبوا ده سواء بالضغط الشعبي المباشر أو غير المباشر..... يعني مثلا د. عصام شرف هيزور قنا طب مانسخنها كمان ف أليكس ونرفع مطلب الشعب يريد انتخاب المحافظين والمحليات ..... ألا كمان حكاية المحليات دي

jasmin said...

عزيزتى نواره
تحية اعزاز وتقدير
دخلت عى مدونتك بالصدفه،واعجبتنى طريقتك فى التدوين،وكذلك حسك الوطنى والقومى العالى،وهذا ليس غريبا عليك يا ابنة نجم،وكنت اتغاضى عن استخدامك لبعض الالفاظ الصادمه،واعتبرها من باب خفة الدم،ولكن اليوم كانت صدمتى اكبر من ان تحتمل،فالايغال فى اسخدام الالفاظ السوقيه يهبط كثيرا بقيمة المدونه وخاصة من بعض المعلقين،المفروض يتعمل لهم اغلاق،فالهدف من التدوين هو تداول الافكار وليس الشتائم التى على هذه الدرجه من البذائه!!!
سأرحل عن مدونتك وكلى اسف حتى ينبأنى احد ان مستوى الحوار قد ارتقى.

eman said...

اتفهم كل كلمه كتبتها ولكن هل تضمنين اذا تم اعلان قانون وشروط لانتخاب المحافظ ان لا يعترض عليه احد مثل ما اعترضوا من قبل على قانون الاحزاب الجديد بالرغم من قبول كل حاجه للتغير بعد ما نمر من هذه المرحله الا ان الائتلافات والقوى السياسيه لاترضى الا ان تؤخذ موافقتها فى كل القوانين اولا مما سيأخذ وقت لمناقشته ..ايضا اذا اعلن ان المحافظ يكون من اهل كل محافظه قد لا يعجب البعض لاسباب عديده فى قنا مثلا قال لى احد اهاليها انهم يرفضون ان يكون المحافظ من قنانظرا لطبيعتها القبليه وقد يقول البعض نحن لا نريدها ولايات
فالحل ان نستمر وفقا لخريطه الطريق الذى استفتينا عليه وقبلناه فى انتخاب مجلس شعب يقوم بانتخاب لجنه لوضع الدستور وكل القوانين التشريعيه للبلد ..وقتها لن يستطيع احد الاعتراض واثاره المشاكل

hardway said...

الي أرق نــــــــــوارة..بالادارة المحلية
كلام جميييييييييييييل..كلام عظييييييييم
طب ماتبلغيه لرئيس وزراء الثورة......
وياريت تروحي معاه محافظة قنا.........
هو حتي جدول مواعيده خــــــــــــــالي
بعد ماتم منعه من دول خليجية حسب مدونتك
الاخيرةلنا والعهده علي الراوي..........
أما علي الكسالي..الكسالي جداو عايزين الرضعةوهم قاعدين علي السرير.......
ماهم أصحابك..و أصدقائك و رفقاء الميدان
ميدان التحرير ..أنت أعلم بـهـم مـنا
شباب الائتلاف....و لا المكتب المعمول لهم في مجلس الوزراء أحسن طبـــــــــعا
تكييف وسعاه وسخن و ساقع وياسلام علي شوب الليمون هناك و هو مشــبـر.....
بلا نزول ..بلا طلوع..بلا نقابات..بلا عشوائيات..بلا مزارع ..بلا مصانع...
ماتتحرق المحافظات علي المدن علي القري
عايزين نتمتع زي الناس السابقين...
ماهما السابقون ونحن اللاحقون.......
وسلملي علي أم الدنـــــــــيا

Mohammed said...

صعب تنفيذ اقتراحك من الوجهة اللوجستية


ولكن انا عندي اقتراح تاني يا أستاذتي وهذا استشفيت بعضه من مقال لبلال فضل


ان المحافظين يتغيروا (طبعا ما عدا محافظ قنا) ويتعين 90 في المية منهم مسيحيين علشان الناس تتخرس وتبطل دوشة والسلفيين ما يصطادوش في المية العكرة


ثم يتعمل مجلس صغير مكون من 6 أشخاص لمراقبة اعمال المحافظين يرأسه عصام شرف وفيه برضه مسيحيين


لازم نقضي على مسببات الفتنة الطائفية

Dr. Mohamed said...

أما إنتي يانوارة عليكي حتة دماغ ..... إيه الأفكار الحلوة دي؟ بس على فكرة الطابور بينادوا فيه"صفا... إنتباه" وليس "صفر" ... ربنا يحميكي يابنتي

Nicholas Urfe said...
This comment has been removed by the author.
nosseir73 said...

كل ده كويس باس من ينفذ ويوصل الاقتراح ده للمجلس العسكرى وعصام شرف المحافظين فتحوا علينا وش و مهاترات لان بدل ما نفكر فى النظام الحكم الذى نريده فى مصر او ندوات وقراءات فى الديمقراطية والليبرالية ..و توعية سياسية شغالين فى حكاية المحافظين
بصراحة ضيعوا وقتنا وجهدنا

الفوريجي said...

وأنت فاكر يا أبورياله أنته انك تستاهل الواحد يراجع املاءمعاك يأبو جهل أنت كفاية الواحد يرميلك كلام زي كلاب السكك وحياة اللي خيبك وخلاك تختار الأرنب شعار لعلم اللى خلفوك الأدب يامدعي يابلاص فاكر أنك لما تتمسح في نواره هتعملك قراء يا كروديا ايوه انته لسه مش عارف بتتكلم مع مين لكن متقلقش يابتاع السفسطة والمهاترات أنا هعلمك الأدب وأهوه من أول درس أيتديت تتكلم مع نواره بأحترام ياواطي يا رمه

hardway said...

jasmin/ أسفين جدا جدا للرقيقة
نحاول بكل الجد و الجهد معالجة سوقية الالفاظ والهبوط والتدني في الحوارمع الناشطة متعهدة الثورات بالمنطقة العربيةومن قلة مندسة من فلول الفوريجية
الشر فيهم أكثر.......................
ادعو الله ان يرتقي الحوار رويدا..رويدا..
وأقوم بأبلاغك في القريب العاجل..يـارب
ياست نـــــــــــواره
خصيمك النبي..وتعالي اوريك القطر...
بلاش الكلام ده..بيطفش الناس الحلوة من المدونة..ما أنت بتعرفي تقولي..سي يو..فير ايناف..فري بعد الضهر
خلينا في اللغات دي

الفوريجي said...

وأنته يا هرد خره
ايه حكايتك بروح امك ايه شغل التعرصه ده مطوع والا قابض يا شرموط ولا جاهل ابن وسخه ما هوالنظام المعفن مفضلش منه غير الجهلة وولاد الحرام
وهي واحده من الأتنين ياأنته جاهل ورذل يأمه شرموط وأبن حرام وفي الحالتين دواك عندي

Dr. Mohamed said...

أ. نوارة ..... أرجو منع نشر التعليقات غير اللائقة وتبادل السباب بين المعلقين ... تحياتي

cherif.hakam said...

نحن أمة عربية واحدة.الطغاة العرب,ومنهم مبارك والسادات,عادوا,حقيقة القومية العربية,خدمة لسياسات,العم سام وإسرائيل,وجعلوا من واشنطون,قبلتهم.ألكارثة هى أنهم ربوا,طوال عقود,أجيالا من الشعوبيين,الكارهين لكل ما هو عربى,وبنحو أخص,ما هو فلسطينى,الذين تفصلهم,هوة واسعة,عن القوميين العرب.هل نسينا أن الشعوبيين,هم الذين أدوا بالعروبة والعرب,منذ أيام الرسالة,إلى الفرقة,فالإنقسام,فالتشرذم,فالضعف,فالهوان,فالذل والتخلف الذى نعيشه ؟ لا حل إلا بالتقارب العربى,والسوق العربية المشتركة.من يعوق تحقيق هذا الحلم الجميل..؟ نعم..,أحباؤنا الطغاة العرب..,والشعوبيون منا.. د. شريف عبد الحكم

مهند said...

وهى القرارات اصلا بتتاخد لمصلحة او ضرر القوى السياسية ، ما دام القرار هيرضى الشعب ملعون ابو خاش القوى السياسية
وبعدين هو احنا عندنا قوى سياسية اصلا غير الشارع المصرى ، انما اللى المقصودين بالمصطلح ده اسمهم شراذم سياسية

النقطة الاهم ان صدور القرار نفسه بان المنصب اصبح بالانتخاب هيلغى الاحتقان نهائى
حتى لو الانتخابات بعد سنة فالناس هتدا اصلا وهتتحمل لانها عرفت ان فى الية حقيقية وترضيهم لكن الوقت مش مناسب والظرف الاقتصادى فعلا مش مناسب
والظرف الاقتصادى ده اتمنى نركز عليه فعلا لان الامور بدات تدخل فى منعطف بجد سيئ جدا وللاسف الشعب الثورى مش سهل ينتظر اصلاح اقتصادى بالذات على عكس الاصلاح السياسى ،ولابد يرى ارباح وزهزهة الثورة المادية فى ايده حالا ، يعنى ربنا يستر

الفوريجي said...

دكتور محمد الرقيق أوي
يعنى الشتايم وقلت الأدب لما ترف على نواره دمها خفيف ولما ندخل نعلم المزقوقين وأصحاب الأمراض الاستعراضية تبقي تقيله على السيادة خلاص يا مهذب لما تشوف كلمة الفوريجي لا تقرأ وجر الموس وبعدين ايه اللى نحررك كده وخلاك تعلق في تدوينه مش في المقدمة أنا مش شايف للدكنره تاريخ في التدوين الظاهر أنته لسه جديد أحنا بقه بدينا التدوين في المحروسه وبنعرف كويس المدون والمعلق الحقيق من المزقوق من المؤفون زى أنته ما بتعرف المريض من المتمارض مش غواين أباحة وفيه أمراض مبتتعلجش الا بالبتر

الفوريجي said...

دكتور محمد الرقيق أوي
يعنى الشتايم وقلت الأدب لما ترف على نواره دمها خفيف ولما ندخل نعلم المزقوقين وأصحاب الأمراض الاستعراضية تبقي تقيله على السيادة خلاص يا مهذب لما تشوف كلمة الفوريجي لا تقرأ وجر الموس وبعدين ايه اللى نحررك كده وخلاك تعلق في تدوينه مش في المقدمة أنا مش شايف للدكنره تاريخ في التدوين الظاهر أنته لسه جديد أحنا بقه بدينا التدوين في المحروسه وبنعرف كويس المدون والمعلق الحقيق من المزقوق من المؤفون زى أنته ما بتعرف المريض من المتمارض مش غواين أباحة وفيه أمراض مبتتعلجش الا بالبتر

الفوريجي said...

دكتور محمد الرقيق أوي
يعنى الشتايم وقلت الأدب لما ترف على نواره دمها خفيف ولما ندخل نعلم المزقوقين وأصحاب الأمراض الاستعراضية تبقي تقيله على السيادة خلاص يا مهذب لما تشوف كلمة الفوريجي لا تقرأ وجر الموس وبعدين ايه اللى نحررك كده وخلاك تعلق في تدوينه مش في المقدمة أنا مش شايف للدكنره تاريخ في التدوين الظاهر أنته لسه جديد أحنا بقه بدينا التدوين في المحروسه وبنعرف كويس المدون والمعلق الحقيق من المزقوق من المؤفون زى أنته ما بتعرف المريض من المتمارض مش غواين أباحة وفيه أمراض مبتتعلجش الا بالبتر

أرنوب said...

أنا باتكلم باحترام عشان أنا محترم .. بس أنت واطي وجزمة والإحترام ما ينفعش معاك لأنك سافل ومنحط .. أنا عايزك توريني حتربيني إزاي يا أبن الهبلة يا عبيط .. مين عملك محامي عن نوارة يا أهطل يا رمه ؟ .. قال مش عارف بتكلم مين قال .. تطلع مين يا زبالة ؟ إتفو على أمثالك ويلعن أبو التدوين يا أخي لو المدونين من عينتك الوسخة

أرنوب said...

ثم مين الكلب السعران ده اللي داير يشتم في كل المعلقين ؟ المفروض لو تعليقي أو تعليق غيري ماعجبوش يرد بأدب وموضوعية .. ولا إنتي جايباه يحرس المدونة ويهبهب عليها ؟ وعمال يقول للكل : إنت مش عارف بتكلم مين ؟ ما تقول إنت مين يا سي فوريجي عشان يحصلنا الرعب .. يخرب بيت الدايه اللي سحبتك ..الظاهر إنها فعصت مخك وهي بتسحبك

amr said...

أنا موافق على انتخاب بس عندي مشكلة ... المحافظ ده سلطة تنفيذية تابعة للوزارة ... لو كان منتخب ينفذ ليه توجيهات الحكومة .. واكيد مينفعش يتعزل لو رفض ده منتخب ..

كيوبيد said...

نواره اشك انك انتى او اى حد من الاخوة هنا من الصعيد واقصد قرى الصعيد قرى عمرك ما هاتسمعى عنه قرى مش معنا فى القرن 21 الكلام ده مقدمه الى جاى انتى بتقولى محافظين بالانتخاب ده يمكن يمشى عندكم فى الوجه البحرى لكن الصعيد له واضع خاص القبلية العائلات انسى موضوع الانتخاب ده انا عايزهم تكنوقراط يكون يافهم فى شغال المحليات والمحافظة بس بردو مش يكون لواء شرطه سابق لكن موضوع الانتخاب ده انسىىىىىىىىىىىىىىىىىىىىىىى لسه بدرى علية قوى عندنا مثلا فى اسيوط فيه حوالى 7او8 عائلات كبيره وموثره فى المحافظة لو كل عائله نزلت مرشح وده اكيد هايحصل وسقط هايبقى بحر من دم والتار وخراب اسكتى بلاش هبل والنبى انا بجد بقيت مش شايف بصيص نور الثورة كل يوم عن التانى بتضيع من ايدنا واحنا واقفين نتفرج لا فية قوى سياسية نزلت عندنا الصعيد والمنيا واسيوط وسوهاج مش دى الصعيد الصعيد الحقيقى هو القرى خالينى ساكت احسن والله انا اعرف ناس اخر ما وصلهم من التاريخ كان عبد الناصر محافظ بالانتخاب فى الصعيد يعنى بحر دم اصلى انتو يابتوع بحرى ليكو تفكير ساعة على هواكم انتو بس مش شايفين غير نفسكم بس انزالى الصعيد انزالى النجوع وبعد كده ابقى اتكلمى عن محافظ بالانتخاب وربنا يكرمك ويكرمنا ويوالى من يصالح اللهم امين

Mohamed said...

والله برافوا عليك يا نوارة يارب تنجح الثورات دي ونبقي إتحاد عربي واحنا أغني منهم كلهم عندنا اللى هما عايشين عليه بس مين يفهم حرية حركة وحرية تنقل أموال وعقول وخبرات بدل ماهم بيسرقوا خيرنا ونرجع نشحت من الشحات الحسنة اللى إديناها له .تمام كده بس مين يفهم

أبو يوسف said...

ياريت الانتخابات تكون في كل المجالات ؛ ياجماعة والله والله والله جميع مؤسساتنا التعليمية ومصالحنا الحكومية مازال يترأسها كل من كان ينتمي للحزب الواطي وترضى عنه مباحث أمن الدولة {الله يرحمها} وهؤلاء لاأخفيكم خافية يقومون بتقديم السم في العسل لمرؤوسيهم وذلك باضطهاضهم وتوقيع الجزاءات عليهم وتلفيق التهم لهم مدعين أنهم يناصرون الثورة ويآزرونها ؛وهذه حقاً من وجهة نظري الثورة المضادة،فأرجو متوسلاً من السيد الدكتور /عصام شرف رئيس مجلس الوزراء سرعةإجراءالانتخابات في شتى الهيئات والمؤسسات والمصالح الحكومية والنقابات ولكم مني جذيل الشكر