Sunday, 10 April 2011

يا ترضى بحكم الشعب يا ترضى بحكم الجيش يا تقعد ساكت

اظن كل الناس عارفة اني صوت بنعم عشان الجيش يمشي بأسرع وقت ممكن، واغلب اللي صوتوا بلا قالوا لو صوتنا بنعم حييجي الاخوان، حييجي الاخوان يعني ايه؟ يعني حنعمل انتخابات في خلال ست شهور فالاخوان احتمال... احتمال ينجحوا... لا الجيش يقعد شوية كمان على ما نستعد.. او نُعد 
بس هم هم الناس اللي قاعدة بقالها اسبوعين بتشحن عشان تأهب الناس لمواجهة مع الجيش وتحط لحم قصاد حديد هي هي اللي كانت بتقول مش عايزين انتخابات عشان الاخوان ما يجوش
ودلوقت اللي مش عايز يعمل انتخابات عشان الاخوان ما يجوش بيقول يسقط المشير اللي هو اساسا حاكم مؤقت وحيمشي كمان كام شهر، ولازم يفضل قاعد في المرحلة الحرجة دي والا تحصل كارثة محققة.. او الحكم العسكري كله يمشي، بس ييجي مكانه حد له شرعية
طااااب يا سيدي
ما هو يا ترضى بحكم الجيش وهو حكمه كده، هو مالوش شرطة تانية غير الشرطة العسكرية، ومالوش معاملة تانية غير المعاملة دي، ومالوش احكام تانية غير الاحكام العسكرية، ولازم يبقى كده عشان ده جيش، حتلاقي مين يحميك لو هو مش كده؟ ومش حتربيه، ولو بتفكر تربيه يبقى بتحفر في بحر، مافيش جيش في الدنيا بيحترم حقوق الانسان وحق التظاهر، ومقارنة بالجيوش الاخرى في العالم كله، ده جيش حنين على رغم كل حوادث التعذيب وكل اطلاق الرصاص ده، اقل من كده مش حيبقى جيش ده حيبقى نادي شباب الحقانية
انا شخصيا مش باحب الحكم العسكري، وباحترم الجيش المصري، وما باحترمش اللي بيهرب من جيشه، خصوصا لما يبقى معترض على تعاون الجيش مع امريكا يقوم يهاجر على امريكا، فرد الجيش ما يهربش.. فرد الجيش المحترم يقعد في جيشه ويحاول يقلل الخسائر على قد ما يقدر، اييييوووةةة، اييييووووةةة، زي المجلس اللي مش عاجبكم ده اللي قعدوا في الجيش وما هربوش منه عشان يحافظوا عليه في حدود اتفاقية مش هم اللي وقعوها.. ودي شغلتهم
انا عايزة مؤسسة عسكرية قوية ووطنية ومتماسكة، ومش عايزاها تحكم
مش عايزاها تحكم عشان الحكم العسكري بيعذب وبيضرب نار وبيكشف على عذريات وبيخض الناس
خلاص... نعمل انتخابات
اعملوا بقى انتخابات مبكرة واللي ينجح ينجح
لأ.. مش عايزين انتخابات
عايزين مجلس رئاسي تنقي فيه اللي احنا نختاره من غير رغبة الشعب.. اصل الشعب جاهل ومحتاج توعية.. والجيش بطيء وايده طرشا
طب نعمل لك ايه احنا دلوقت؟ 
لا عاجبك الشعب، ولا عاجبك الجيش.. نجيب لك بلد منين على مقاسك؟ مش حينفع نجيب لك بلد على مقاسك، وحضرتك فيها لاخفيها
يعني يا تجيبوني انا احكم واللي على مزاجي انا، ومش على مزاج الشعب، لإنه جاهل بقى ومحتاج توعية، يا اما افكك لكم المؤسسة العسكرية، واعمل لكم انقلاب، واعمل فورتينة بينكم وبين الشعب، واهز البلد واعرضها للخطر، ومدام مش حاعرف اخلي الناس تنتخبني، يبقى اعرف بقى اقلبهم على المجلس اللي مش عايز يسلمني السلطة بدون انتخاب، وهم اساسا مش محتاجين وصاية، لما بيتنرفزوا بيضربوا بآخر ما عندهم
ماهو انت عشان تقنع الناس انها تنتخبك محتاج مجهود، لكن عشان تقوم الناس على بعض وتعمل حرب البسوس دي سهلة قوي، تشكك، وتخوف، وتخرف، وتعتمد على نقاط الضعف عند الطرفين، ومعاك ناس مستفيدة كتير حيساعدوك
هو اللي بيحب البلد دي ما قداموش الا حلين
الحل الاول استمرار الاعتماد على سلمية الثورة وتحييد الجيش حتى الانتهاء من الحصول على المطالب، من غير جر شكل، ومن غير ما اروح اجيب لهم ناس متمردة بالافرول ترتكب جريمة حرب وتتمترس بالمدنيين بدل ما تحميهم، واخد بالي اني باتعامل مع مكنة ممكن تاكل صباعي، واحافظ على مؤسسة عسكرية وطنية متماسكة مش اهدها واهددها عشان مش عايزة تعمل لي اللي انا عايزاه وما يهمنيش بقى اني اخرب الدولة المهم اوصل للي انا عايزاه
او.. عايزة بقى ابرطع واشم حرية واعمل اللي على كيفي، اعمل انتخابات مبكرة وارضى بحكم الشارع واختيار الشعب وما اقعدش كمان اعمل على الشعب حملة واشتم فيه واطالب علانية كده بالديكتاتورية واهزأه والبسه مصيبة، واختار طايفة فيه اعملها كبش فداء - اللي هم السلفيين بدون ذكر اسماء - عشان اخوف الشعب من الديمقراطية واقولهم لو عملتوا ديمقراطية حيجيلكم العو وامسح البلاط بالشعب وابهدله واحسسه انه ما يسواش ولا نكلة، وكمان اقول ان الاغلبية مش هم دول الثوار الاحرار، الثوار الاحرار هم اللي اختاروا الاختيار بتاعي اللي هو 22 في المية، يعني بادعم وجهة نظر مبارك في عدم شرعية الثورة بس عشان اطلع نفسي صح 
باقول لكم ايه؟ آدي بلدنا.. وآدي شعبنا.. وآدي جيشنا.. اللي عاجبه ع الكحل يتكحل اللي مش عاجبه يترحل 
مش عشان مش قادر تبني يبقى تخرب.. هو ده اللي بيحصل بالظبط، اللي مش عارف يبني بيهد، لإن الهد اسهل
اللي مش قادر يكون شعبية في الشارع، عشان مش قادر يقدم خطاب مجتمعي محترم، ومكسل ينزل الشارع يتكلم مع الناس، يقوم الناس على بعضها، ويحط لهم بودرة العفريت في قفاهم، ويحطهم في مواقف ومواجهات هم مش مضطرين ليها، وما هياش معركتهم، وماهياش اولولياتهم، ولا بتخدم مصلحتهم، بس مش مهم.. مش مهم.. ربنا ما يفرح حد واحنا حزانى، ومدام انا مش في السلطة يبقى يطلع عين ابو كل الناس
واللي ايام الثورة اللي بجد، وايام كربلاء مصر كان قاعد يعمل تويتنج من البيت، واللي سافر، واللي حواجبه وجعته، قرر يعمل ثوري على قفا البلد عشان يلحق اللقب 
واللي يزعل يتفلق.. وزي ما قلت لبلال فضل: اللي بيشتغل لوجه الناس بيزعل على زعل الناس، واللي بيشتغل لوجه الله ما بيزعلش من حد، او كما قال احد العارفين استوى عندي محبة الناس وبغضهم
اه نسيت
اقروا المقال ده في الواشنطن بوست.. بيقول نفس الكلام اللي باقوله

61 comments:

انـتــصار عــبـد الــمـنـعـم said...

صح كلامك
من الغباء في هذا الوقت التضحية بنصف صديق وهو الجيش وضمه إلى قائمة الأعداء الطويلة جدا

ساعي الخير said...

يا جناب النوارة
بقولك الفلول بيجهزوا لرحلة شرم من ييجي أسبوع و هم هناك من فترة غير الرحلات اللي هتبتدي من بكرة بالعربي كده بيحضروا لكم هناك مفاجأة جايز مذبحة القلعة و جايز حاجة تانية ممكن تكون وحشة ليكم لكن حلوة لناس تانية
و ساعتها هيقولوا هم جايين للرجل ليه مش اتخلي عن السلطة و الناس يقولوا اه صحيح هم عايزين ينفذوا القانون بأيديهم... و طبعاً هيقولوا انكم تستاهلوا اللي يجرالكم .. و تيجوا مشي من شرم بعد ما يكسرولكم الأتوبيسات و يقفلوا الفنادق في وشكم بحجة انها مليانة طبعاً بالفلول و ساعتها انتو اللي هتبقوا فلول تقعدوا في خيام و يقولوا عليكم بتعملوا قلة أدب و انتي عارفة أن الأدب فضلوه علي العلم و هم ناس ربنا رازقهم بجهل غانيهم عن كل العلم و ساعتها يتبقوا أجهل منهم يا بلاش حكاية شرم دي اللي ممكن اذا عيشتوا بعدها تضطروا ترجعوا مشي و جماعات فالة _ مفرد فلول يعني _ و جايز اذا رجعتوا تبقوا جماعة الثورة المنحلة و حلة يا حلة فاكرين أهل المحلة و الحد الأدني للأجور و لا كفاية أنه أتخلي يعني ثم ان صحيح يا نوارة افرض بعد ما روحتوا هو جاب بعضه و جه القاهرة بالطيارة قال ايه جاي يقابل النايب العام
يا ختييييييييييييي .. و تطلعوا له ناس في التحرير و انتوا في شرم بتبلبطوا ع البحر و تحيا الثورة و التفكير عورة و يطلع التخلي مجرد مناورة عموما النصيحة يعني من الاخر بلاش موضوع شرم ده لتكون مذبحة المماليك في الصحرا و محدش داري بيكم و لا كاميرا تصوركم و لا حد يحس بيكم لتكون نظرية المغماطيس اللي كنت عتحكي عنها بصراحة بقي فكروا شوية و اعملوا اعلان مبادئ تتفق الناس عليها لأنها هتدي الناس حقها و سيبكم منه لأنه هييجي هييجي هو هيروح فين يعني اما الفلوس فحتي لو جه ربعها مش هتعمل حاجة الناس هي اللي لازم تعمل بعد ما تنصلح بيئة العمل بالمبادئ الصالحة المتفق عليها و موفقين للخير
لا مؤاخذة لتكوني ما قرأتيهاش

مصرية جدا قوي said...

انا مخنوقه جدا وحاسه اني تايهة ونفسي اقعد في المجلس العسكري وسطهم كده وافهم في ايه ونفسي اروح شرم برضه ونفسي ازور النائب العام لاني اتخنققققققققققققققققققققت

ساعي الخير said...

هو مش رضي بحكم الجيش و لا اعتراض
فاللهم لا أعتراض بس
هو لازم يكون فيه مبادئ واضحة تحقق
ــــــــــــ العدل ــــــــــ
ساعتها الجيش أو ... المجلس العسكري يعني _ و ده علشان خاطر الناس اللي بيفرقوا في المعاملة _ يبقي قدامه خطوات محددة لتفيذ هذة المبادئ لحين عمل الأستنخابات و الكلام اللي لا بيودي و لا يجيب ده القصد في النهاية لابد من مبادئ تحقق العدل يتفق عليها يارب تفكروا فيها بدل الجري وراء السراب و الثروة اللي سايبها حسني و الحاشية قدروا ان احنا و العياذ بالله جرا لنا زي اليابان و علي فكرة بيقولوا ان اليابان ابتدت معانا بعد ثورة يوليو 52 _ و احنا خدنا فلوس الملك و أممنا اموال الباشوات عشان كله ياكل ع الجاهز و محدش اشتغل صح و لا أنتج و ادي مصانعنا و ادي مصانعهم و بعد الزلزال كمان أجور رمزية و أعمال رمزية _ المهم أاهو الظاهر انها بتبتدي تاني معانا برضه فيا تري برضه الناس هتدور علي ثروة جدو الباشا اللي سايبها حسني و الكنز اللي دفنوا مش عارفين فين _ بما انه ما فيش حاجة في البنوك يعني _ و لا كل واحد هيفكر في مبادئ تحقق الخير و العدل و تساعد علي ان كل ماتشتغل اكتر تكسب اكتر و تتقدم أكتر و ان أجرك يكفيك من غير شغلتين الصبح و بعد الظهر و ان كل واحد يجني ثمرة مجهوده و كل واحد سهل ياخد حقه في أقصر وقت ممكن ( مش حلني علي ما تحكم لك ) و لا خلاص كله عايز يبقي رئيس جمهورية و البلية تزهزه معاه ربنا يصلح نفوسنا و الأحوال قولوا آمين و موفقين للخير

marwa said...

ممكن مش تزعلى منى لو كنت قلت حاجة ضايقتك....انا و الله مش اقصد ازعلك و ان كان قلت حاجة او رايي ضايقك قوليلى بس ليه تبلكينى؟؟ على العموم سورى ماتزعليش ....التويتر بتاعى ضلم و انا هافضل اعيط بجد....يا جماعة حد يساعدنى و يحنن قلبها عليا

marwa said...

ممكن مش تزعلى منى لو كنت قلت حاجة ضايقتك....انا و الله مش اقصد ازعلك و ان كان قلت حاجة او رايي ضايقك قوليلى بس ليه تبلكينى؟؟ على العموم سورى ماتزعليش ....التويتر بتاعى ضلم و انا هافضل اعيط بجد....يا جماعة حد يساعدنى و يحنن قلبها عليا

آمال الفاتح said...

كلامك صح، الناس للأسف مش فاهمة يعني ايه ديموقراطية، كانت فاكرة إنها كعكة وفازوا بيها، ولقيوا إن دي بلد وديمقراطية هتجيب المختلف يقعد معانا ويبني معانا ويتفاهم معانا، وهم مش عايزينه المختلف ده، مكانوش عاملين حسابهم عليه، كانوا ناسيين حكاية الشعب، الشعب الجاهل المغيب اللي نزل ووقف في طوابير الاستفتاء دي بمنتهى الاحترام والحضارة، مع إنه عمره ما حضر انتخابات قبل كده، الشعب اللي دخل في كل طابور مناقشة ديموقراطية أرقى من كل تهليلهم، لأن الناس البسيطة وقفت عرضت رأيها وسمعت بعض واحترمت اختيارات بعض

dina said...

الحل هو تشكيل مجلس رئاسي كما تم اقتراحة سابقا ورجوع المجلس العسكري الموقر الى مهامه الأصلية في حماية أمن الوطن وحدوده.

mohamed said...

ايون كدة اتعدلى لسة بقول منك لله بيتينى فى ليلة نكد امبارح

ساعي الخير said...

أشتغلت و أحلوت
آدي آخرة الغباء يا حضرات الأغبياء
يا جناب النوارة دلوقتي أهو الفلول في المهندسين بيقولوا عايزينه يرجع مش حتي آسفين لا و طبعاً ده تجهيز لمسيرة بكرة اللي هتعملله درع في شرم أو تجيبه للنائب العام بزفة و لا زفة شوبير عند النيابة بعد شريط مرتضي منصور
صح مش شوبير بيكتب تاني
المهم بلاش تروحوا شرم و كنوا زي ما هم كنوا و خلوهم يجيبوا اللي عندهم و بعدين
و انتوا كانيين كده حددوا الطلبات في اعلان المبادئ بتاعة حقوق الناس مش مين يبقي ريس و مين يبقي شعب و عضو في مجلس الشعب و بعدين حددوا التهم الجنائية مش الفلوس يا ماديين ده كفاية العبارة و قتل المتظاهرين فلوس ايه اللي طالعين تحاسبوه عليها ده كله بالقانون مش السادات قال كده زمان كله بالقانون و محدش هياخد جنيه أصلاً الا بمزاجه ده فلوسه بعرقه و القانون يثبت و الجدع يثبت ده حتي دول بلاد بره قالت كده لازم المحاكمة عادلة ثم ايه الشعب اللي مش عايز يشتغل ده عايز فلوس ع الجاهز كل ما حد يحوش له قرشين عايز يا خدهم منه بدل ما ينظم نفسه علشان يكسب قرشه بعرق جبينه من غير ما أي حد كائن ما كان يقدر يهينه
المهم حددوا المبادئ و الأهداف
ثم حددوا التهم الجنائية و الأدارية مش المادية يا بتوع الفلوس يا ماديين
و ربنا يهدي كل حاير و يصلح الضماير و ينور البصاير
الا هو مش جايز برضه يجيب قرشين
حتي لو زكا من عنده و لا حتي مرؤة للشعب القحطان
اللي كان محمود سعد بيشحت عليه اه لا مؤاخذة ده محمود سعد نفسه كان بيشحت عليهم و مبيدفعلهمش من جيبه رغم انه بيقولوا كان بيقبض قد كده الله يبارك له بس كان بيحزنا ع الغلابة و يخوفنا من العصابة لما يعرض بلاويها عموما موفقين للخير

Sharm said...

تعليق انتصار عبد المنعم عجبني اكتر من الموضوع

أرنوب said...

واختار طايفة فيه اعملها كبش فداء - اللي هم السلفيين بدون ذكر اسماء - عشان اخوف الشعب من الديمقراطية واقولهم لو عملتوا ديمقراطية حيجيلكم العو
....
إنتي فعلا مابتختشيش وتتمتعين بقدر من (البجاحه) يحسدك عليها كل سياسي عالم ثالثي .. بقى الليبراليين برضه هما اللي عملوا السلفيين كبش فدا وخوفوا الناس منهم ؟ ولا عمايل السلفيين نفسهم هي اللي بتخوف الناس منهم ؟ هما الليبراليين اللي حرقوا الأضرحة وقطعوا ودن المسيحي ؟ ولا أنتي طالباه معاكي شتيمتهم وخلاص ؟ .. طب إستني شوية لما الموضوع يبرد ويتنسي عشان تعرفي تكدبي وتهييسي بحرفنه ... للتهييس أصوله يا نونو

mosadak said...

حدث ما توقعته بعد كلمة المخلوع على العربية اللي مش عربية و خرج بعض العامة و السذج الى مصطفى محمود برجاء استخدام خطاب يجمع كل تيارات الثورة و عدم الخوف بل الشجاعة في مواجهة التطورات لأن اللعب على كبير لأننا داخلين على مواجهات شعبية أو يراد لها ان تبدو كذلك مطلوب تنظيم الخطوة حتى لا ينصرف عن الثورة ملايين الشعب

omima said...

يانوارة انا معاكى مؤمنة ان الجيش هو صمام الامان الاخير للبلد دى لكن انا بعتب علية البطىء اللى ادى الى استغلال الرئيس المخلو ع الفرصة ويدافع عن نفسة فى قناة العبرية وايضا عنجى عتاب للواقفين فى الميدان حتى الان وبيقولوا تصريحات غبية ضد الجيش لانهم كدة بيساعدو المخلوغ واذيالة وبيطمنوهم ان فى انشقاق ودة مش صح

omima said...

يانوارة انا معاكى ان الجيش هو صمام الامان للبلد لكن انا عندى عتاب انة تباطىء لحد ما انتهز المخلوع الفرصة وطلع يدافع عن نفسة فى قناة العبرية والعتاب الثانى للجماعة اللى مازالوا فى الميدان وبيقولوا كلام وشعارات غبية ضد الجيش والمشير لانهم بفرحوا المخلوع وذيولة اصحاب الثورة المضادة

طبيب بيطري said...

والله بقت خل يا نوارة انا خايف الناس الغير مسيسين يطلعوا دلوقتي علي مصطفي محمود للانتقام من شباب التحرير

الشباب اللي اعتصموا ف التحرير ممكن جدا مش يكونوا خونة بس الغباء دي مصيبة كبيرة يمكن اكبر م الخيانة

مخيمر said...

ياض يا ارنوب انت عبيط ولا بتستعبط ؟؟

nehad_mhlba05 said...

Victorious democrats won't be able to completely excise the pillars of the authoritarian order. Instead, for their country to turn toward democracy, those pillars must be neutralized or co-opted. This old order may descend into violence when, as in Iraq, broad classes of elites are stigmatized and ousted from their positions. In a successful bargain, most old-regime elites retain their freedom, assets and often their jobs but accept the new rules of the democratic game.

انتى موافقة على الكلام ده؟
لان مطلب منع أعضاء الحزب الوطنى من الممارسة السياسية يتعارض مع التوصية دى!
و لا أنا فاهم غلط؟

Nermeen said...

http://www.facebook.com/home.php?#!/note.php?note_id=10150202730936703

موافقة جدا, عمالة أقول للمناضلين ضد الجيش ان النضال مابقاش انك تعارض و البطولة مابقتش انك تصرخ و تقول يسقط, الشغل حاليا انك تقدم حلول و برامج انتخابية و تقنع الشعب اللي مش عاجبك مستوى وعيه دا انك تستحق تمثله

AhmeD 3llaM said...

اكتئاب واحباط .. و..والسلام عليكم

جبهة التهييس الشعبية said...

لا ثانية واحدة

انا حاطة مقال الواشنطن بوست عشان اقول ان دي خطة امريكا اللي بتنفذها هنا مش قصدي ان الواشنطن بوست بتعبر عن رأيي اقصد ده اللي باقوله من ان لو ما اتنفذتش الخطة دي حيخربوها لنا

شريف said...

معقول جدا جدا جدا جدا .. بس في حاجه مش حتأثر كتير .. الضباط كانوا نازلين لأصلاحات في المؤسسه العسكرية اللي هي برضو مش وقتها .. اجدتي يا نواره

بهيج الشرير said...

والنبي ياأبلتي أنا عندي سؤال! هل صحيح أن الواد حبيس العاهري قبل اللومانجية مابعبصوه وكسروا عينه في طره؛ سقوه حاجة صفرة الأول علشان مايحسش بحاجة وبعدين طلع اللي شربه طرطرة اللومانجية

hassn hamdi said...

قلت من الأول وبكرر:
بعيدا عن اتهام المجلس العسكري بالخيانة والتواطؤ مع نظام مبارك (وهو ما أنا واثق فيه أكثر من ثقتي في شخصيتي)..
عرضت إعلان مباديء عام أو دستور مؤقت وقلت نجمع عليه كل القوى الوطنية لعرضه وفرضه على المجلس العسكري لكي يتم تشكيل مجلس رئاسة مدني (ولو حب يشارك فيه ممثل للمجلس العسكري مفيش مانع، المهم ينفذ مطالب الثورة) ومنتدى للحوار الوطني يضم كل تيارات وأطياف المجتمع المصري ويكون المجلس الرئاسي أداة لتنفيذ مطالب الثورة ويكون المنتدى رقيب عليه وموجه له في نفس الوقت بحيث ان المجلس الرئاسي هياخد قرارات وقوانين ما تسريش إلا بعد موافقة منتدى الحوار الوطني عليها باغلبية الثلثين وفي نفس الوقت ربطت شرعية المجلس الرئاسي بتحقيق أهداف الثورة واستبعدت تدخل الجيش كمؤسسة وطنية في الشئون السياسية وأن يقتصر دورها على مساعدة المجلس الرئاسي ومنتدى الحوار الوطني في إدارة الفترة الانتقالية وحطيت الاعلان أو الدستور المؤقت عندك هنا في المدونة ووريتكم انه بيضم أفكار وآراء اللي قالوا نعم واللي قالوا لا وبيضمن انتقال ديمقراطي سلس للسلطة ومحاسبة الفاسدين والتخلص من دستور 1971 ومن نظام مبارك وبمحاكمات مدنية كمان
ايه كان رد فعلك يا نوارة؟
لا شيء
كل اللي بتأكدي عليه يوم بعد يوم ان الشعب اختار شرعية المجلس العسكري لما وافق بنعم على التعديلات الدستورية
طب وهيه فين التعديلات دي والمجلس ألغاها باعلانه؟
والله لو جادين فعلا يبقى يتعمل حاجة زي الاعلان اللي اقترحته ويجتمع عليها الشعب كله
والبديل طبعا هو الميدان والسلاح لأننا بكل بساطة مش هنتفرج على طنطاوي ومبارك لحد ما يحاكمونا بتهمة الخيانة العظمى

Mode Masry said...

بطلو خناق ليبراليين على علمانيين على سلفيين على مسيحيين لو فضلتو تشتمو بعض وسيبتو الاهم وهوه التخلص من وش البومه بصوته اللي يغم هوه وشلته الوسخه مش هتعرفوا تتخانقو لانكو مش هتبقو موجودين اصلا سيبكو من الخناق واتوحدوا تاني اعقلو وبطلو شغل العيال ده

nehad_mhlba05 said...

بس على فكرة يا نوارة أنا مرة شاهدت محمد رجب بيقول انها ممكن تبقى زى العراق لو الحزب الواطى اتمنع و أعتقد انه كان تهديد مبطن، لكن انا شايف ان المنع هو الصح.

مخيمر said...

استاذ بهيج يعنى ايه طرطرة ؟

abo_yousef67 said...

سا الخير يا ست نوارة كنت عايز اسالك سؤال واقف في زورى حيث انى لسه مجربتش اكون في الموقف ده
ايه شعورك يا حاجة وانتى فى موقع الناس التانيين اللى بيقولوا على الناس الاولانيين قلة مندسة وكده شكله شعور حلو يا بت يا نوارة ههههههه ابقى سلميلي على عمو سوايرس صاحب ابوكى

romancy said...

هههههههههه بردو انتى تانى

ايوووووووة ايوووووووة

مهربوش عشان عشان كل سنة بيدهخلهم سبوبة حلوة من صفقات سلاح بالمليارات

ايوووة ايوووووة

مهربوش عشان عندهم اراضى بالاف الفدادين واضعين يدهم عليها باسم الجيش
وعملو عليها مزارع ومشاتل بتدخلهم فكة حلوة جدا

ايوووووووة ايووووووووة

مهربوش عشان الاوامر بضرب المتظاهرين كانت بالطيران كانت شفهية لان مفيش مجنون منهم يقبل انه يمضى على قرار زى دا لان الظباط المحترمين ال انتى شتمتى ف ال خلفوهم وقلتى عليهم عايوين يعملو الشعب دروع بشرية كانو هيرفضو تنفيذ الاوامر بس ساعتها كان كل مجلس التيوس هيلبس اسود عشان فيه دليل بخط يده على ارتكابه جرائم ضد الانسانية

ههههههههههههه ايووووووووة ايووووووة
يا ترضى بحكم الجيش وتاكل على افاك وتشوف مبارك بيطلع زى الشعرة من العجين ومش بعيد يكرموه كمان ولا يمسكوه ديوان رئيسي الجمهورية الجديد ال هما بردو هيجيبوه على مززاجهم

ههههههههه يا ترضى بحكم الشعب ال هما طبعا الاخت نوارة نجم والاستاذ بلال فضل ال كما قال فيهم عمرو بن العاص بما انهم الشعب يعنى فى خطابه لامير المؤمنين عمر بن الخطاب رض الله عنه وقتها فى وصه لاهل مصر

نسائها لعب (طبعا برعاية جبهة التدليك العسكرية بقلم نوارة القط - نجم سابقا)

ورجالها مع من غلب (طبعا برعاية الاستاذ اللوذعى صاحب السيناريوهات والحاجات والمحتاجات الهادفة وصاحب سويتش المجلس العسكرى واول بوق صحفى ميرى ف تاريخ الثورة الاستاذ بلال سرايا - فضل سابقا )

وعقبال عندكو بئا ونشوفكو كمان 30 سنة

abo_yousef67 said...

سا الخير يا ست نوارة كنت عايز اسالك سؤال واقف في زورى حيث انى لسه مجربتش اكون في الموقف ده
ايه شعورك يا حاجة وانتى فى موقع الناس التانيين اللى بيقولوا على الناس الاولانيين قلة مندسة وكده شكله شعور حلو يا بت يا نوارة ههههههه ابقى سلميلي على عمو سوايرس صاحب ابوكى

kontslata said...

إيه البيان الغريب ده أنت بتتكلم على مين وفين الشعب العبيط ده اللى مش عارف مصلحتة يا أستاذ ؟ مشكلتكم أنتم يا من تعتبروا أنفسكم أوصياء على هذا الشعب ومحتكرين للفكر الرشيد..ان اللى مش معاكم مش فاهم حاجة لا يا أستاذ ولو انت طالع علشان توجه رسالة معينة وهى أكيد للضابط اللى هاجم بلال فضل ونوارة نجم ..يبقى مش لازم تدخلنا فى حوارات ومتاهات أقل ما يمكن وصفه بها إنها مسيئة لمبدء صفحتكم الموقره .ومين أساسا بيطلب التلاحم ضد الجيش ..كلنا بنقول الشعب والجيش إيد واحدة لكن المجلس العسكرى لأ ومش بقولها كده وخلاص ..بقولها وانا عارف معناها كويس وعارف يعنى إيه مجلس رئاسى مدنى منتخب وأعرف إزاى أنتخب منهم اللى يفيد بلدى وقضيتى ويلبى مطالب الثورة بدون مجاملات وتربيطات من نتحت الترابيزة..ومين قالك أصلاً إن اللى قال لأ قال علشا الأخوان ماتمسكش الحكم ..حكم إيه ده اللى كانت حتمسكة الأخوان فى الإستفتاء يا عم المفكر الجليل ..اللى قال لأ قال لأ على دستور باطل وساقط وميت..وعلى عدم إعلان دستورى من البداية ..وعلى إصرار المجلس العسكرى انتخاب مجالس تشريعية فى ظل وجود المحليات ..ولا نصيبة سوداء كمان لا يكون حل المحليات برضة فى دمار للبلد ..ولا أنت قولتلى أنت كنت فى ثورة إيه معلش أصل بقيت مش فاهم منك حاجة.

بساطه said...

كده انتي هديتي من الخبطه والدوخه وقادره تتكلمي كلام نفهمه .. حمدالله عالسلامه .. كنت بتنائر مع ابوي(ظابط اركان حرب متقاعد) وهو مستاء من الي بيحصل والكلام على الجيش .. ولما شككت ان الظابط الي اتفصل اتصرف عليه مبالغ طائله .. قالي ان ده حقيقي .. وانهم بينغنغوهم في البعثات .. يعني بجد الواد الي ما رجعش بعد البعثه ده حيوان وحرامي وسرق البلد.. ..
وقالك الظباط الي راحو الاعتصام يستاهلوا الاعدام..
طبعا انا مش موافقه..
بس الي عايز اقوله ان قواعد وعقلية وعقيدة ظابط الجيش كفرد او مجموعه مختلفه.. هما مش وحشين بس هما مختلفين وما بيشتغلوش شغلتهم .. فلازم نحتملهم الشويه دول .. انا بالنسبه لي الموضوع سهل لاني عشت عمري في حكم عسكري في بتنا .. اما انتوا ربنا معاكم
حاولو تفهموا ان العقليه مختلفه بجد .. اما الفساد في الجيش فهو موجود وفي ظلم بيقع على افراده فعلا .. انما هنشوف الكلام ده بعدييييين ..

mitar2a3 said...

صدمتيني فيكى يا نواره وانا بحبك !!
مش معقول يكون رايك إن ال 22% اللي قالوا لأ بيهدوا .. و كأن الوطنية مع أه !! انتي اكتر منى عارفة ناس تثقى فى انتمائها جيدا قالوا لأ .. انتى كمان بتتهمى ال 22% بالهد و الكسل و العجز عن التواصل مع الشارع .. نواره فكري تانى!! .. مصر فى قلب 100% من اللى راحوا الاستفتاء واللى قالوا لأ مكانش تاجيل الانتخابات هو دافعهم الوحيد .. اعتقد انتى عارفه كل الاسباب جيدا .. بغض النظر عن مدى اقتناعك بهذه الاسباب

gogo said...

ماحدش يقدر يقوم الناس ع الجيش اغلبية الناس العادية مش العيال المتخلفين واثقين ف الجيش جدا وفي المشير ... اللي مسمين نفسهم ائتلاف شباب الثورة دول كل مابيفتحوا بؤهم الناس بتكرههم اكتر كمية كلا م مستفز وعجرفة ونفخة علي الفاضي والقشة اللي قسمت ظهر الحمار كانت اللي عاملوة يوم الجمعة والسبت جنان وتوليع وتحريض دة غير الكلام بقلة ادب مع الجيش وتحدي الجيش ومش بيعترفوا بالغلط ( اتفرجوا علي حلقة مني الشاذلي كانت جايبة واحد اسمة ناصر كريييية اخر حاجة دة غير اللي كان ف القاهرة اليوم والحرة ) ولا المؤتمر والبيان اللي عملوة منتهي الاستفزاز وقلة الادب ... بس انا ملاحظة ان اغلب الناس قرفانة منهم اوي هما بس اللي فرحانين بنفسهم ... انا عن نفسي هاقول ف كل حتة اني كواحدة شاركت ف الثورة مش مفوضاهم ولا حد فوضهم يتكلموا باسمة قا ل اية علقوا الحوار مع الجيش بس يارب مايرجعوش ف كلامهم وهاقول كدة ف صفحة الجيش وعصام شرف وكل حتة ... دول كانوا هايولعوا البلد لولا ستر ربنا ...انا سميتهم (اتلا ف الثورة) وفي ناس تانية مسمياهم (ائتلا ف شباب الثورة المضادة ) لما دخلت ع الصفحة بتاعتهم علشان اقولهم اللي فية النصيب لقيت ناس كتير مظبطاهم اتبسطت ... انا بقترح اللي يتكلم باسم شباب الثورة بجد ( مصطفي النجار - محمد دياب - نوارة نجم ) مش فاكرة حد تاني دلوقتي بس دول كلنا متأكدين انهم كانوا ف الميدان بجد من اول يوم لاخر يوم وفي وقت الخطر كانوا عاقلين وعارفين امتي نقف واية نعملة ومين نقف معاه .. مش هبل ويلا ثورة ونخبط ف الجيش ونتحداة ونقل ادبنا علشان نبقي رجالة وثورجية جامدين شوفوا محمد دياب قال عنهم اية علي اون تي في النهاردة... شكرا

أحمد كمال said...

ده مقال قديم من أيام المخفي يا نوارة

Shoukry said...

I think what I read was asking to vote NO in the referendum was also asking a presidential council!! and Yes we didn't want MB to take control over the parliament and we want a variety of parties in the next parliament (this was just one of the reasons and not the primary one)

we can't afford a new NDP and MB proved that they will be a new NDP if you saw the announcements of Essam El Eryan after the referendum and Belal Fadl and Hamdy Kandeel comments on him. Be fair please

Watch this
http://www.youtube.com/watch?v=I5ohvqRoCYE&feature=player_embedded
Clearly these weren't demonstrators

Shoukry said...

The army itself announced that it is the rest of NDP and I don't know how you accuse the demonstrators. I think some of them agreed to protect the officers but they are "Too" few. many testimonies said it was 600-700 and the army announced that they was around 3000!!!

If we are spreading accusations then I will accuse the MB according to this testimony
http://www.youtube.com/watch?v=0wRkijPDqNE&feature=share

and I will ignore the MB announcements asking the to help the army like you ignored all the announcements of the coalition of the youth revolution!!!

I myself don't think that this woman is saying the truth but I just wanted to tell you that spreading accusation is easy

mohandsmasry said...

يا استاذة نوارة كويس انك رجعتى لعقلك وهديتى علشان ترجعى تقبلى وجهات النظر التانية وتحاولى تتفهميها بس انا مش معاكى انه يا ده يا ده الحلول كانت فى ايدنا ولا زالت بردو ومقولة اللى قالو لا علشان الاخوان ما يجوش دى مغالطة كبيرة كل اللى قال لا علشان يتعمل دستور جديد بدل المسخ المصغر من دستور 71 اللى منوا بيه علينا واظن انك عارفة كويس ان دستور جديد ما كانش ابدا هاياخد وقت وكانت كل حاجة تخلص بسهولة قبل ال 6 شهور اللى محددينها يعنى الجيش بأى حال ما كانش هايقعد اكتر اما موضوع الجماعة بتوع الجيش سواء كانوا ضباط حقيقى او منتحليين شخصياتهم الرد والرأى المزبوط قاله اللواء محمد على بلال النهاردا كدا كدا هما اجرموا ولازم يتعاقبوا لكن الاعتراض على تصرف الجيش والضرب واستعادة ذاكرة الامن المركزى وعمايله هى دى محل الاعتراض كان فيه وسايل اسهل للقبض عليهم بدون تدخل المدنيين ويا ريت تهدى وتفكرى كويس وتراجعى نفسك فى موضوع شرم الشيخ وتفهمى الناس ان ده اكبر غلط وده اللى عاوزه فعلا يتعمل علشان هو عاوز فعلا الناس تروح هناك علشان كلو يضرب فى كلو وتبقى حرب اهلية بقى وفى الاصل الجيش مش هايسمح لأى حد يروح عنده .. الراجل عاوز البلد تولع يا ناس وتبقى فوضى ما تتلمش افهموها بقى

بهيج الشرير said...

أستاذ مخيمر: الطرطرة دي مشروب الوزير اللي مش مؤدب؛ وتؤخذ من أعضاء اللومانجية إلى فم العاهري مباشرة

الـمــــــــــــــــــلاح said...

أنا متفق معاكى يا أستاذة نوارة بس عندى ملحوظة بسيطة ؛ مش كل اللى قالوا لا للتعديلات الدستورية بيحرضوا حاليا على الصدام بين الثوار و الجيش ... للأسف فى ناس كتير عمالة بتخون فى كل حد بيحاول يهدى الشباب و يمنع الوقيعة بينا و بين الجيش و دا شئ أصابنى باحباط كبير لأن الناس اللى بتتكلم عن ضرورة توعية الشعب هيا نفسها محتاجة توعية لأنهم مش قادرين يفهموا ان الاختلاف فى الرأى يعنى الصدام و بيطبقوا قاعدة أن من ليس معى فهو ضدى !!! وهذا شئ مؤسف
أنا شخصيا من أكثر الناس اللى تتمنى ان يحصل تغييرات واسعة فى قيادة المؤسسة العسكرية بس مش فى الوقت الحالى ؛ لأن السؤال ببساطة مين اللى هايعمل التغييرات دى ؟؟؟ يعنى مين اللى هايعين القيادات الجديدة فى ظل عدم وجود رئاسة أو برلمان أو حتى قيادة موحدة للثورة ؟؟؟ عشان كدا المفروض نهدا و نستنى لما ييجى رئيس منتخب يتمتع بشرعية دستورية و ساعتها نقدر نتكلم عن تغيير القيادات العسكرية

hayat ank said...

بصى يانواره انا قلن لا مش علشان الاخوان بس قلن لا علشان ده كان اسمه ترقيع بشهاده المتخصصين مش تعديل قلت لا علشان انا شايفه ان التعديلات فصلوها على مقاس ناس معينه وشالوا ناس تانبه من نوعيه زويلوخلى بالك المجلس هو الى عين اللجنه المفتكسه وبعدين من الاول هو احنا الى قولنا للجيش يجى يحكم لوحده على اساس انه هو اللى قام بالثوره زفت الطين هو الى دبسنا فيه والمفروض ان دوره يكون اشرافى للامن والحمايه مش للاغتكاسات الى عمال يعملها المفروض هو كام يعمل استفتاء على وجوده او مجلس رئاسى بممثلين عنه هو الى عمال يشكل الجان ويقلب ويعدل فينا غلى اساس انه الى عمل الثوره فبيسيب الناس تقول الى هيه عايزاه ويعمل الى هو عاوزه زى مباركستان الله لا يوفقهلو هو عدل يجيب بتوع الثوره يعدلوا الكفه حتى شويه ولا حتى يطهر اهم مؤسسلت الدوله الى هيه القضاء البايض بقياده الملط وعبد المجيد محمود والشرطه الى ضحكوا علينا ودلعوا بتوع امن الدوله وسموهم ابصر ايه ولسا شغالين الله ينور والاعلام الى لسه عمال يعبى الناس بكلام فارغ بيخليهم يكرهوا الثوره وبتوه 22% هما الى عملوا الثوره يا قطه فى ظل الاغلبيه الصامته او المستوعبه من النظام السابق واعلامه وابواقه

arabian_faithful said...

السلام عليكم

بصراحة أنا يكفينى العنوان خير الكلام ما قل و دل
مش معنى كده أنك بترغى كتير و لا حاجة على فكرة :)
بس و الله أنا قلتلك قبل كده أنا بأحب أقرالك أنتى بالذات علشان بأحس أنك قريبة مننا بس أنا نفسى تردى برده على سؤالى

أحنا ليه مش فرحانين و الناس بقت تموت فى النكد و العبطا ولاد الك.. يقولولى كده يبقى كأننا معملناش حاجة
فطبعاً أنا كان عندى رد واحد
A 7 A
لأن الصحة على القد و مش بستحمل الغباوة
ياريت تقوليلنا الناس مش فرحانة ليه

سؤال أخير و النبى مين ائتلاف شباب الخيبة دول مين دول والله أنا بقيت خايف ليكونوا دول خليفة مبارك فى الملاعب
دول رذلا أخر حاجة لأ بجد تناحة ملهاش مثيل لا عاجبهم شعب و لا عاجبهم جيش ولا عاجبهم أى حد يكونوش خاطفينا و أحنا مش واخدين بالنا!!!!!!!!!!!!

د.ناريمان said...

اخيرا يا نوارة ناديتى بالانتخابات؟...لعلمك بأه الانتخابات هى الحل....الانتخابات هى الحل...الانتخابات هى الحل... الكرسى فاضى ومغرى ....مغرى للى اتخلع منه ومغرى للى كان ولسه بيحلم بيه وفى احلامه مستنيه وعشت ليالى هنيه باحلم بيه ومغرى لعبده مشتاق ومغرى للى يسوى واللى مايسواش....يبقى نلحق احنا ونقعد عليه اللى ينفعنا واللا نسيبه ونجرى يمين ونجرى شمال ونتفاجأ ان الكرسى راح..راح...ضاع...ضاع... وعايزين ثوره جديده نبقى نعملها بعد خمسين سنه ....المهم اننا هيصنا ولعبنا واتفسحنا فى شرم ورجعنا لقينا مافيش كرسى...مش عارفه اتخيل مين اللى اخده ؟ ابو رجل مسلوخه والللا العنقاء واللا الخل الوفى

muslium said...

لا حول و لا قوة الا بالله .. بوست يفتقر الى الموضوعيه بكل المقاييس .. و كله تخوين لناس شريفه مش هاممها غير مصلحة البلد .. هو انتى خلاص أنضميتى للفريق بتاع ان اللى قالوا لا قله مندسه و اجندات خاصه و مش بعيد كنتاكى .. لا حول و لا قوة الا بالله .. أتقى الله حرام عليكى .. اللى قالوا لا قالوها علشان دستور جديد يحترم الشعب مش نلم شويه ناس فى مجلس اغلبهم هيبقى حزب وطنى ونجيب رئيس الله اعلم هيطلع ايه هو كمان و نقلهم لو سمحتوا اعملولنا دستور جديد يقلل صلاحياتكم و يديها للشعب !!!
انا مصدومه فيكى و الله .. هو يا بنتى علشان تثبتى وجهة نظرك تقومى تقولى اى كلام فاضى وخلاص .. على فكره دا اكبر دليل على ان حجتك ضعيفه

و حلوه اوى حكايه يا ترضى بالمجلس العسكرى فى غباوته وبطئه و احتمال تواطئه يا اما نخربلك البلد .. مش ملاحظه ان ده نفس كلام مبارك !!
لازم تخاف علشان نقدر نحكمك .. طيب عملنا ثوره ليه مكنا سبنا مبارك بقى يا جدعان .. ما دام كله خوف وظلم يبقى مش فارق مين الىل مدوقهولنا..ربنا ينتقم من كل ظالم مفترى و لكى الله يا مصر

السلام عليكم said...

هناك هوه سحيقه بين من يدعون الليبراليه وبين الشعب واتضحت اكثر بعد وصله التعتيت والشتيمه التى حصل عليها الشعب بعد تصويته بنعم للتعديلات واتهامه بانه جاهل وغيبى ويقاد بسهوله مع انهم استخدموا الفنانيين والنخبه فى محاوله الضحك على هدا الشعب فى الاعلان الشهير بتاع خد خمسه معاك وقولوا لا بس ما نفعش واللى زاد الطينه بله ان الجيش طلع اعلان دستورى اهه زى ما انتم عايزيين اسقط دستور 71 وعمل اعلان دستورى بس فيه 50 عمال وفلاحيين قعدوا يصوتوا برلمان جاهل برضه وامى وهم اللى ودونا فى داهيه مع ان اللى ودونا فى داهيه هم ترزيه القوانيناللى هم بقى اساتده الجامعه يعنى ما فيش تعليم بعد كده واللواءات اللى كانوا بيدخلوا البرلمان على انهم فلاحيين وعمال والتزوير اللى كان بيمنع اصلا العمال والفلاحيين وانا برضه مش عايزه اقول ان مساله الماده التانيه اللى برضه نزلت زى ما هى من غير حدف ولا تعديل ولا اضافه برضه عملت عمايلها وولعت الدنيا على الجيش حتى انهم اتهموه بان الجيش من الاخوان
الناس اللى انتم فاكرينهم هبل مش كده وعلى فكره انتم لسه محتاجنيينهم للوصول للحكم بس حتحكموهم ازاى وانتم مش عارفينهم ولا حتى عايزيين تعرفوهم

الجيش بطئ لكن مش متواطئ لو متواطئ مكانش حسنى طلع امبارح بالدات على العربيه والناس ماسكه فى خناق الجيش كان استنى وركن لغايه ما الجيش يظبته لكن يطلع فى هدا الوقت بالدات حتى تتسح الهوه بين الشعب والجيش يبقى الجيش فعلا ضد حسنىوهو اللى بيحاول يقلب الناس على الجيش ومش بعيد يكون اللى حصل فى التحرير من تدبيره وتدبير اعوانه اللى لقوا الحبل قرب قوى على رقبتهم

hosseiny shatat said...

باقول لكم ايه؟ آدي بلدنا.. وآدي شعبنا.. وآدي جيشنا.. اللي عاجبه ع الكحل يتكحل اللي مش عاجبه يترحل


حمد الله على السلامه يانواره
ماعنتيش تتحمقي علينا تاني..............ماشي

hosseiny shatat said...

باقول لكم ايه؟ آدي بلدنا.. وآدي شعبنا.. وآدي جيشنا.. اللي عاجبه ع الكحل يتكحل اللي مش عاجبه يترحل


حمد الله على السلامه يانواره
ماعنتيش تتحمقي علينا تاني..............ماشي

mahmoud said...

يانوارة المجلس العسكري مش عايش لوحده في الدنيا كمان فيه فرق بين المجلس العسكري وكيان الجيش المصري المجلس العسكري دلوقتي بمقتضي الدستور بيقوم بدور سياسي يعني من حقي انتقضه واضغط عليه وانتي شوفتي ان قبل اي يوم جمعة بياخدوا خطوة لتهدئة الناس طب لييييه مش من نفسهم انا عارف ان اي انقسام حيعطي انصار النظام فرصة للبداية بعمل عسكري وممكن الحرس الجمهوري يكون معاهم انا اللي عايزه مش انقسام وحرب اهلية بس عايز اطمئن ان تفكيك النظام السابق مستمر اكيد فاكرة الحزب الوطني كانت ايه سياسته هي استقطاب الاطراف من كل انحاء مصر للانضمام ليهم لتقوية جبهتهم واللي مش معاهم كان ضدهم علي طول لدرجة وصف بعض من في نقابة المحامين للوطني بانه ترسانة الية تاكل كل من في طريقها ونحن نحاول ايقافها اذن المعاملة بالمثل علينا تفكيكهم واللي عايز ينضم للشعب ماشي واللي مش معانا منهم وبسسسسسسسس يبقي ضدنا التفكيك يكون سريع او لا دي مش قصتي المهم انه يتم اذا لم نقضي علي جذورهم ومراكز قوتهم فستكون هناك معركة تحرير اخري بعد مايتمكنوا بعد عدد من السنيين ايا كان اذن لماذا نكتفي بنصر صغير يعتقد المجلس العسكري اننا ماكناش نطوله لازم نعمل عملية جراحية دقيقة بدون تسرع المهم الاتفاق علي الهدف والوطني اللي بدا والبادي اظلم وانا ماعنديش استعداد انه يتسرب للسلطة تاني ناس خونة بيشتغلوا مع الموساد والسي اي ايه وبيحاصروا اخواتهم في غزة ومش هاممهم الامن القومي وبيعذبوا بالوكالة وبيدنسوا جهاز المخابرات وحتي اخلاق العسكرية المصرية في التعامل مع المدنيين العزل والنساء بدات تروح لازم نقضي عليه لتبقي مصر شريفة طاهرة مؤمنة والله معنا

mahmoud said...

نوارة من فضلك الرسالة دي حتلاقي فيها كلام غريب ومشاهد من افلام ورسالة طويلة ياريت تعذريني انا عايز اخليكي تحسي باللي انا حاسس بيه كانك قدامي حدخل في الموضوع بخصوص امن الدولة عشان تعرفي النظام عمل ايه انا لما كنت بشوف شهادات الناس اللي اتعذبوا علي النت مكتوبة كان فيه سؤال محيرني الدفاع عن نظام معين حاجة والغل ده في التعذيب والاغتصاب مالوش علاقة بمجرد الدفاع عن النظام يعني مثلا فيه واحدة اسمها سعدية عذبوها لحد ما ماتت وقالوا لاهلها وركزي هنا سعدية ماتت وعيالكم حنخلي شعرهم يشيب وهما في اللفة ايه الغل ده الفار ايام الرسول المعروف عنهم القسوة في التعذيب ولكن عندهم قيم ازاي مثلا فيلم الشيماء كان فيه مشهد عكرمة كان عايز ينتقم من الشيماء عشان حطت اليف علي عنقه والكبار لامووه وقالوله عايز العرب يقولوا اننا بنعذب النساء عشان محمد والشيماء كانت حرة وفيلم هجرة الرسول لما ابو جهل ولا مش عارف مين كان بيتحرش بالجارية اللي كان اسمها حبيبة اللي هي ماجدة لما قالت له مالكش عندي غير اني اصب لك الخمر ضربها وطلب من عبد انه يرميها تشتغل في الصحرا وكان مش طايقها يعني مااغتصبهاش انا سالت نفسي وماكنتش لاقي اجابة لية السجانين وامن الدولة بالغل ده مال الدفاع عن النظام بالكفر بالله كما شهد المفتي علي واحد قال له تسبني اكفر بالله ونشوف الناس حتعمل ايه وده في برنامج علي الحياة مع رولا خرسا انا استنتجت انه بيتكلم عن حد في امن الدولة لاني اتفرجت علي الحلقة في نصها بس قلت التطرف ده مش في حد تاني لو تقارني بين الكفار ايام الرسول عليه الصلاة والسلام وبين افعال النظام او بعض اشخاصه في السجون مثل الاغتصاب وحرق القران وركزي علي حرق القران والتعذيب الوحشي في امن الدولة والكفر العلني بالله تلاقي الكفار ايام الرسول ارحم انا في السجن لو اجبرت وةاحد يسجد لصورة مبارك يمكن تقولي عليا متطرف عايز يذل اللي قدامه ويوريله انه كسر تدينه وذله بس مش شرط اكون كافر بس ياتري لو حرقت القران ينفع تعتقدي لحظة اني مسلم انا عمري ما كفرت حد بس دي افعال كفار اسوء بكتير من الكفار اللي سمعنا عنهم السؤال ماهي صلة الدفاع عن نظام بكل هذا الغل والكره للشعب المسلم الاجابة لاصلة السؤال ما مصدر هذا الكفر الاجابة اللي حيرتني اخيراااااااااااا التعاون مع الموساد والسي اي ايه الموضوع خطير الاجهزه دي صنعت كفاااااااااااار ومتطرفين كمان مش مجرد دفاع عن النظام الشذوذ الناتج من متعة التعذيب مع غضب الله مع التكفير الممنهج اللي اجهزة الاستخبارات دي بتعمله صنع كفار متطرفين يعني الهدف تعذيب المسلمين وهتك اعراضهم مش موضوع دفاع عن نظام ده غل وكره وحرق للقران الغباء مننا ان ده يتعمل ويتصرف عليه بفلوسنا لو دي بلدنا يا نوارة يبقي لازم نعرف كل جنيه ضرايب رايح فين ونتاكد انه لايمكن حيروح يتصرف علي اجهزة زي دي تاني ابداااااااااااا مش زي فيلم فانلة وشورت وكاب نربي السلعوة عشان تكبر تاكلنا احنا برده الموضوع اخطر من انه جهاز بيامن نظام حكم الموضوع زي ماشرحته ليكي من اللي قريته وعرفته وعذرا علي الاطالة

mahmoud said...

فيه اخطاء في الرسالة اللي فاتت الفار المقصود بها الكفار واليف المقصود بيها السيف وعذرا مرة اخري

أبو هاجر said...

استوى عندي محبة الناس وبغضهم

Shero said...

لأ.. مش عايزين انتخابات"
عايزين مجلس رئاسي تنقي فيه اللي احنا نختاره من غير رغبة الشعب"

مين قال كده؟؟ إيه علاقة نعم اللي ستؤدي لانتخابات مجلس الشعب ولجنة تأسيسية وإن الجيش يتنازل من دلوقتي للجنة رئاسية؟ دي حاجة ودي حاجة .. أنا رحت استفتي على مواد ماكانش بينها إن الجيش لازم يفضل قاعد لحد نوفمبر عشان تقولي إن الاقتراح ده ضد نتيجة الاستفتاء.
ممكن مجلس رئاسي وانتخابات مجلس الشعب و الرئاسة تبقى في موعدها بحسب نتيجة الإستفتاء.

أحب أقول إني مش مقتنع مية بالمية بـمنطق المجلس الرئاسي بس بستغرب من ربط الموضوع ده بالاستفتاء.

نسيم الفجر said...

يا نوارة بطلي ذم في النخب السياسية كطريقة بتوجهي بيها نقدك... اسلوبك غلط جداااااا لانك بتحرضي ضدهم بكلامك ومنهم شباب الثورة نفسهم وبكدا هتكرهي الناس فيهم أصلا وتساعدي الخلق أنها تبعد عنهم أكتر ما هي بعيد .. المفروض العكس تعمليه يعني توجيه النقد ميبقاش تحريض ودعوة للكراهية بكل التهم اللي بتتهميها دي .. حرام اسلوبك دا في حد ذاته ثورة مضادة .. ومش عشان إنتِ ليكِ وجهة نظر مختلفة يبقى هما عاوزين يخربوا البلد عشان مش في السلطةواللي بيحصل يخلي الأخرس ينطق !! بلاش التعميم والإتهامات اللي ملهاش داعي في الوقت الأخبر دا !!

Mohammed Hassan said...

وانتي لما صوتي بنعم الجيش مشي يعني
وبعدين مش عارف بتودي وشك الناحية التانية وبتتنرفزي ليه لما حد يجيب سيرة المجلس الرئاسي
زي ما تكوني حابة الجيش في السلطة
ومعاملة ايه اللي كل شوية طالعالنا فيها
مش الشرطة العسكرية ضربتك قبل كده
مضربتش ليه حد من اللي في مصطفى محمود

kbahey said...

نوارة

اولا قبل ما أبدأ، انا مش باقول الجيش خاين و لا موالي لمبارك، سواء طنطاوي او المجلس او قيادات الجيش، كلهم وطنيين

بس المجلس يشوبه عيول
اولا بطئ الشديد في امور لا تحسم سريعا
و ثانيا عدم المصارحة و سرعة المعلومات منه
لانهم واخدين على التعتيم مش متعودين يصارحوا الملأ
حتى بعد ما انتي اتبح صوتك
طبيعة عملهم للاسف

العيب التاني انه كان لما بيغلط كان بيعتذر بس دلوقت بقى يكذب و خلاص

اسمحي لي اعلق على ما كتبتيه

وقعتي في غلطات منطقية كثيرة
اولا ال
False Dichotomy
قصدي الخيارات الثنائية الكاذبة، يعني يكون في خيارات كثير بس نخير الناس بين اثنين بس ابيض و اسود، كخ و دح، عسكر و حرامية، كاوبوي و هنود حمر

الموضوع مش يا ترضى بحكم الجيش يا حكم الشعب يا تقعد ساكت
في خيار ثالث و هو موضوع المجلس الرئاسي اللي ذكرتيه

و دة مطروح من قبل فتنة الصناديق و قبل تفريق الناس بالدعايات ايا كان نوعها

و ما يصحش نتهم اللي بيطالبوا بيه انهم مشتاقي سلطة

و في خيارات تانية غير دة، مثلا ان الجيش ما يستعملش القسوة سواء كهربا و كشف عذرية و بعدين ضرب رصاص
مش ان هي دي طريقتهم و خلاص

ايضا انتي عممتي في الحكم على المعتصمين
بتقولي انهم كانوا عاملين الاعتصام عشان مجلس رئاسي و الجيش يمشي و دة مش صح
و قلتي ان بتوع المجلس الرئاسي هم جابوا بلطجية

معظم المعتصمين كانوا عشان سرعة المحاكمات
و لو في بلطجية فدول يمكن نا متحمسة على الجيش او فعلا بتوع فلول قاصدين يبوظوا القعدة

و اللي قال الجيش يمشي ما قالش كدة من فراغ، هو مش عاجبه البطء و دة اللي ادى لتفاقم الامور و الاتهام بالخيانة في الاخر زي عادتنا كلنا يا مصريين
اسهل شئ التخوين، بعد المؤامرات على طول

زي ما انتي اتهمتي اللي اعتصموا هم اتهموا الجيش


و انا ضد ان الضباط يعتصموا سواء بحماس او غشم او مزقوقين
كان المفروض لبسوا ملكي و جم

المهم من كل دة: بلاش اتهامات و تعميم

اهو صفوت موافي شرف في طرة لاند و باقي سرور و عمر سليمان و احمد شفيق و الاسرة المالكة ان شاء الله قريب

kbahey said...

مرة تانية

انا مش بأخون الجيش

بس لازم يتقبلوا النقد و يصلحوا اساليبهم و يعتذروا عن الاخطاء و يكون عندهم شفافية و رسائل مستمرة للشعب

عشان الشعب يطمئن

سواء قاعدين شعر او سنة، ما تفرقش

دة تقرير من كذا منظمة عن احداث 9 ابريل

مطلوب اعتذار اولا و تحقيق سليم ثانيا و وعد بعدم تكرار دة

http://eipr.org/pressrelease/2011/04/10/1144

سومه...مجنونه فى بلد عاقل said...

كلامك صح ميه فى الميه ناس مكانشى لها شغلانه طالعه تركب على قفانا كانوا فين ايام الضرب والسحل بتاع 25 و28 وكانت فين الحلوه اللى مش عاجبها اى حاجه وطالعه فى الاعلام فول ميكب والواحد مكانشى عنده نفس يسرح شعره فى البيت

محمد said...

ما شاء الله لا قوة إلا بالله
تحليل رائع وكلام صائب ورؤية ثاقبة

egypt said...

الحمد لله كل اللى كنت بقوله من سنيين المفروض يتعمل وتوقعاتى دائما 99% صح لكن عندى سؤال للاستاذة نوارة ايه رأيك فى وائل غنيم ولييف الثورة ارجوا الرد على هذا التعليق شاب من ضمن شباب 28 يناير جمعة الغضب يوم ان ثار الشعب على الظلم والفساد فى حالة التعليق رقم تليفونى 0118873090
لو عايزة تعرفى اهم الاسباب للثورة بجد

اخوكى محمد

Ismail said...

عشان كده مصر يا ولاد حلوة الحلوات
جريدة المصري اليوم - بقلم د. أيمن الجندى ١٢/ ٣/ ٢٠١١

لم أملك نفسى من البكاء وأنا أقرأ هذا المقال الودود عن أمنا الحبيبة مصر، الذى كتبه الأديب السعودى «محمد الرطيان» ونشره فى جريدة «المدينة» السعودية، واختار له هذا العنوان الجذاب «وعشان كده مصر يا ولاد حلوة الحلوات». أشكره من أعماق قلبى باسم مصر وكل عشاق مصر. أترككم مع المقال النثرى البديع.
■ ■ ■
إن كانت مصر (أم الدنيا).. فهى من باب أولى أم للعرب جميعا.
وأى عربى لا يحب مصر فتأكدوا أن فى قلبه خللا ما.. وأى عربى يكرهها فتأكدوا أنه ابن عاق!
■ ■ ■
عودوا لطفولتكم أيها العرب: أول طبيب عالجكم.. مصرى.
أول معلم درّسكم.. مصرى. أول كتاب قرأتموه.. كتبه مصرى وطبعته مطبعة مصرية. أولى حركات التنوير.. كانت تأتى من مصر. أولى الثورات.. مصرية. أول الشهداء.. مصريون.
وأنا أحب مصر بكل ما فيها: من غلابة، وأناس طيبين، وفقراء. ورغم أنهم يعيشون فى المقابر يعرفون كيف يضحكون ويؤلفون النكات.
أحبها: بعلمائها، ومثقفيها، ودعاتها، وفنانيها... ولا تقولوا لى: لا يجتمع فى قلب مؤمن حب (وجدى غنيم) و(محمد منير) لأننى أعلم بقلبى منكم.
■ ■ ■
إنها مصر التى استطاعت أن تُصدّر لنا (لهجتها) كأنها لغة ثانية لنا.. وهى تخبئ روحها الحلوة فى لهجتها.
إنها مصر التى تشعرك من أول لقاء: «كأنها واحدة من العيلة»..
مصر التى تدخلها كأنك تدخل بيتك.
■ ■ ■
كتبت سابقاً: إذا غنّت مصر.. رقص العرب.
وإذا أنجبت «عمرو دياب» ستجد له نسخة فى كل عاصمة!
وإذا غنى «عبدالحليم» – خليّ السلاح صاحى – أخرج العرب كل أسلحتهم من مخازنها! وصار رمى اليهود فى البحر خياراً استراتيجياً لكل العرب.
أما إن جنحت للسلم، فاعلم أنه – حتى مقديشيو – سيصبح
السلام خيارها (وبطيخها) الاستراتيجى! إنها مصر:
إذا «تحجبت» سيصبح «الحجاب» أكثر الأزياء رواجاً
وإذا أطلقت لحيتها فسيقل عدد الحلاقين من طنجة إلى ظفار
وإذا خرجت للشارع وهى تحمل بيدها قنبلة وساطورا.. فاعلم أنك
سترى هذا المشهد بعد سنة، سنتين، عشر.. فى شوارع أخرى.
و: إنها مصر.. البهيّة.. الولاّدة: تنام، ولكنها لا تموت.
■ ■ ■
يا رب النيل..احفظ بلاد النيل والمواويل من الجفاف. يا رب الغلابة.. احفظ الغلابة من المعتدين. يا رب مصر.. احفظ لنا أمن مصر.
■ ■ ■
انتهى المقال. قولوا معى: «آمين».

Ismail said...

Please see this link:
http://www.djlah.net/vb/589534-post1.html