حوار بين مهندس وظابط

تحديث:
شفتوا، شفتوا، طلع كلامي صح، سمك المريوطية فيه ديدان والدكتور ثابت قال ان الديدان بتأثر في "الأماكن الحساسة مثل المخ والقلب" شفتوا بقى؟ يعني الاماكن الحساسة عند المصريين الجدد هي المخ والقلب، صح... صح والله صح، عشان لما بيشلغوا مخهم ويبتدوا يقولوا افكارهم بتحس انهم بيعملوا بيبي تقيلة، ومشاعرهم ريحتها فعلا فيها حاجة... صح صح، صح والله يا دكتور فعلا، كتر خيرك، احنا اهو تحليل الحالة بيبان واحدة واحدة، الحمد لله، يبقى بياكلوا سمك المريوطية، خلاص ادفنوا المريوطية دي حفاظا على الاجيال القادمة
---------------
الحوار ده حصل فعلا، مش بألفه ولا باتخيل منه حاجة، مهندس اتصالات كان قاعد مع ظابط شرطة وظابط الشرطة بيفهم مهندس الاتصالات، الغبي، ازاي يفكر تفكير سليم ويسيبه بقى من الشعارات اللي ما بتأكلش عيش، طبعا صديقي المهندس هو فيه عادة منيلة كده، لما يلاقي اللي قدامه بيخرف خالص يبتدي ياخده على قد عقله، هو انسحب من لسانه وقال قدام الظابط ان ما بقاش فيه احترام للعلم ولا اهتمام بالعلماء

وبمناسبة عيد العلم احب اعرض لكوا وجهة نظر ظابط الشرطة واكتبوها يمكن تنفعكوا، انبرى يقول للباشمهندز:

اهو ده بقى التفكير القديم... انتوا بتقولوا اي كلام مافيش تخطيط خالص ولا فيه رؤيا ولا تفكير في المستقبل بس بتكرروا شعارات وكلام تلفزيونات.. دلوقت انت لو عندك عالم، لازم يعيش في مستوى معين، يركب عربية، يسكن في منطقة معينة، ولاده يدخلوا مدارس معينة، وانت عايز الدولة تدعم ده كله او توفر له ده كله بانها تديله مرتب على الابحاث اللي هو بيعملها، عشان يسكن ويركب عربية وعياله يدخلوا مدارس كويسة مش اقل من ان الدولة تصرف عليه بتاع خمسين الف جنيه في الشهر، كده انت رميت خمسين الف جنيه في الارض، اخدت بيهم ايه؟ شوية ورق، الخمسين الف جنيه دي تأكل حي بحاله، طب وليه؟ البني ادم كل ما مستواه التعليمي قل بقى سهل انك تأكله، لكن يفضل ياخد في شهادات ويقرفك ويتآلط عليك ويكلف الدولة فلوس؟ عشان ايه؟ تتمنظر بيهم وتقول عندنا علماء، وبعدين؟ غير لما يبقى عندك بقى رجل اعمال هو بيصرف على نفسه وعلى البلد، والناس مستواها التعليمي اقل يبقى احتياجاتها اقل، كده الامور تمشي والفلوس تكتر في البلد

طبعا صديقي المهندس فتح بقه وقال له: يا سلاااام، تصدق ما كنتش واخد بالي خالص؟

الظابط: طبعا، ما انتوا بتتكلموا وخلاص، ما فيش تفكير في بكرة

فهمتوا يا بهايم؟ ناس اغبيا فعلا

هو ده بقى المصريين الجدد، اصل انا شفت غلاف كتاب اسمه المصريون الجدد، الاستاذ فهمي هويدي شهرني ههههه، بس هم المصريين الجدد دول لهم صفات كده

يعني لا هم عملاء، ولا هم حرامية، ولاهم ناس وحشة يعني، هم دماغهم كده، ما يقصدش حاجة والله، هو فعلا مقتنع، ومنتشرين في كل طبقات المجتمع، واشكالهم شبه بعض، تحس انه كان مفروض يكمل وبعدين حاجة حصلت اتولد كده، مش قصير، مش قزم، لا، هو فيه حاجة، يعني تركيب العظام فيه حاجة معينة كانت مفروض تكمل وما كملتش، وبيتكلموا زي بعض، بس على حسب المستوى الاجتماعي، لو اغنيا كلهم بيتكلموا بنفس الصوت ونفس التعبيرات ونفس الحركات، لو متوسطين برضه كده، ولو فقرا بيتكلموا زي بعض وبيمشوا في مجموعات، ما تلاقيش واحد منهم هربان لوحده كده الا في النادر

وكل كلامهم ومنطقهم من الشمال لليمين، او بالورب، يعني طريقة تفكير ملتوية جدا، تحس انك مش عارف ايه اللي بيزعله ايه اللي بيفرحه، التصرفات اللي مفروض تتفسر على محمل معين عنده لها تفسيرات تانية خالص، وتفضل انت تتفاجئ

زي مثلا احداث التحرش، يعني مثلا انا فاكرة ايام التحرش كنا كلنا بنسأل: ليه؟ ليه بيضربوا البنات وبيشتموهم؟ هي دي طريقة معاكسة وللا تحرش؟ ما بقاش فيه حد بيقول يا جميل يا قمر والحاجات دي؟ وبعدين حتى لو ح يتحرش بالايد، بيضرب ليه؟ وبعدين ماله فرحان كده؟ وايه سر ارتباط الحوادث دي بالعيد؟ وليه يخرجوا من صلاة العيد يعملوا كده؟

لا ما تحاولش تفهم، وعلى طول كده بقى، على طول ردود افعاله بالطريقة دي، ما تبقاش فاهم لما تعمل ايه يقوم يحصل ايه؟

وكلهم اسطامبات كده، حتى صوتهم زي بعض، اتحداك تعرف صوت واحد فيهم في التليفون، ايا كان مستواه الاجتماعي، هم كده باقات من البشر مافيش اي نوع من التفرد، وبيلبسوا نفس اللبس كأنه يونيفورم، وايه البنطلونات الجينز اللي واخدة فرشة بوية بيضا وش وضهر دي؟ وبتظهر في العيد فجأة وتختفي بعد العيد، كأنهم تنظيم

وطلعوا في مظاهرات الجزائر برضه، وضربوا الامن من غير اي سبب واضح، وعلاقتهم بالشرطة علاقة متميزة جدا

الاغنيا منهم بيحبوا الشرطة قوي وعندهم تصور ان اي حاجة بيحلها ظابط الشرطة، والفقرا من المصريين الجدد كده برضه بس بيخافوا منهم، لكن مش بيكرهوهم

وبعدين تيجي تكلمه تلاقي كل حاجة بالشقلوب لدرجة انك تحس ان فيه في مخك حاجة غلط، يقعد مثلا يحكي لك خناقة:

جالي وقال لي ازيك.. قال لي ايييه؟ ازيك.. طبعا انا فهمت على طول، قمت قلت له لا ابدا مافيش حاجة، (ويروح غامز) ماهو انا برضه ايه؟ اشتري ما ابعش، وانا ماليش في السلك ده ابدا، ييجي يقول لي ايه آه.. لا، جبت من الاخر وخلصت

ولو سألت تبقى حمار، ولو جات لك الشجاعة: لا معلش انا مش فاهم؟

الله.. انت معايا وللا معاه؟

وممكن تقلب بخناقة، ولو زعقت له يقول عليك حنين، ولو كلمته كويس يتخانق معاك ويقول انك بتلون عليه

تقول له كلام تلاقيه بيرد على كلام تاني خالص

وفيه بقى من المصريين الجدد اللي انا اشرت اليهم قبل كده، عاملين زي الست اللي لامؤاخذة مشيها بطال وبتعاير الشريفة انها مش لاقية راجل يبص في وشها، بس دول بيبقوا من المصريين المثقفين الجدد

وحالة عبثية اخلاقية بقى، لازم المجرم معاه حق والضحية هو اللي غلطان، امال ايه؟ الغباوة انك تبقى محترم، والنباهة انك تبقى واطي، وفيه خلط رهيب مابين الوطيان والذكاء، ودول بقى تلاقيهم بيقولوا جمل كده شبه: انا عندي الاسرائيلي اللي بيدخل باحترامه احسن من الجزائري اللي يشوح بالمطوة.. انا عندي الاسرائيلي اللي يدخل فلوس للبلد كسائح احسن من الغزاوي اللي بيعدي من الانفاق.. انا عندي المصري اللي بيتعامل مع اسرائيل احسن من السنغالي اللي بينام في الشارع.. انا عندي الحرامي اللي بيقول انا حرامي احسن من اللي بيصلي وهو بياكل كتير... انا عندي الرقاصة اللي بتبسط الجماهير احسن من المرة بوز الاخص النكدية... انا عندي تديني بالبونية احسن ما تجيب لي ايس كريم.. انا عندي اللي يتف في وشي احسن من يطلع بطاقة الرقم القومي.. انا عندي ارمي نفسي من الشباك احسن ما انام بعد الغدا ..إلخ، طول النهار عايشين في مقارنات كده تبقى مش عارف ترد تقول ايه؟

تحس كده انهم عاملين دماغ كيميا وسخة، وكل نظرياتهم زي نظريات الظابط كده، يعني لما تسرق وتأكل اللي حواليك احسن ما تعيش لي شريف بمرتبك.. بطلوا كلام الستينات ده

اه

المصري الجديد يتعرف من

key sentence

بطلوا كلام الستينات... اي حاجة بقى: العيب الحرام اللي ما يصحش كل ده كلام ستينات، اشمعنى ستينات؟ ليه مش خمسينات؟ ليه مش تلاتينات؟ ليه مش كلام قديم وخلاص؟ ما تعرفش، بس هي الجملة دي انتشرت

يعني مثلا انا بهت امبارح لما كنت باتريق على احمد عز عشان عايز يقنن بيع الاثار قام واحد من المصريين الجدد (وبرضه نفس التركيب الجسماني ده ونفس الصوت) قال لي: ماهو احنا مصريين ودي حاجات اجدادنا، جرا ايه لما كل واحد يشتري حتة؟ اشمعنى الحكومة تحتكرها؟ بطلوا كلام الستينات ده، هو قال لك ح نطلعها برة؟ ده بيدي فرصة ان المصريين يبقى عندهم الحاجات دي في البيت كده بدل ما كل حاجة تبقى بتاعة الحكومة ويحطوها في المتاحف وياخدوا عليها فلوس، طب احنا ليه ما نشتريهاش؟ ومنكن مثلا تبقى وسيلة كويسة للمشاريع، واحد مثلا يشتري مجموعة ويفتح متحف على حسابه ويكسب، ويبقى كده وفر للدولة وح تاخد منه ضرايب وفي نفس الوقت هو استفاد، هم دول مش اجدادنا؟ وبعدين عندهم كتير في المخازن ما يطلعوه والناس تستفاد بيه

طب انت مكاني دلوقت.. ترد تقول ايه؟

بلاش، مرة واحد قعد يقنعني ان رجل اعمال راجل كويس عشان كان بيتبرع للفقرا مع انه حرامي وعليه قضية: وفيها ايه؟ ما الحكومة بتسرق ومش بتدينا حاجة، هو بيسرق وبيدي الفقرا، يبقى ليه يقبضوا عليه؟

طب ترد تقول ايه؟ وملحوظ انك مثلا ممكن تشتمه بجد يضحك، تقول حاجة مش قصدك بيها شتيمة يزعل، وموضوع الجزائر ده كان فضيحة لأنه كان جامع شامل لكل المصريين الجدد، مافيش واحد من المصريين الجدد تخلف عن غزوة الجزائر، وبرضه بيتكلموا كده: يقلعوا البنطلون لفردوس عبد الحميد وبنت مصرية تقلع التي شيرت؟ ده بيأكد ان مافيش قومية عربية

هم فريق ضعيف.. كسب ازاي؟ قال بلد المليون شهيد قال، طب بصي على المنتخب بتاعهم، اصلا نسوانهم مش كويسة

هم جبنا جدا لعلمك وبيخافوا من خيالهم وفيهم عنف وهمجية وقلبهم ميت وما بيخافوش من حاجة

لا مش احنا اللي ننضرب ونجري احنا جامدين قوي وصيع احنا ما انضربناش على فكرة هم ولاد كلب ضربونا والناس جريت من الخوف ومعذورين ما تتريقيش عليهم، احنا جرينا عشان احنا شعب متحضر مش صيع

ايوة طبعا كرامة مصر لما جزائري يضرب محمد فؤاد بالطوب، دي تختلف عن اي مواطن مصري يتهزأ برة لان محمد فؤاد مشهور

معلش محمد فؤاد ما اتعورش بس خاف.. تختلف عن انا وانت لما نتعور لانه مطرب طبعا

طب ما مروة الشربيني اتقتلت.. يبقى ليه فردوس عبد الحميد يتقلع لها البنطلون؟ هو احنا كل مرة؟

احنا على طول عايشين العيشة دي مع المصريين الجدد على فكرة، وساعات بيبقى فيهم طفرة جينية من وسط القطيع اللي عادة بيبقى ماشي مع بعضه تلاقي واحد لوحده كده شكله قديييييييييييييييييييييييييييييييييييييييييييييييييييييييييييييييييم، شكله مدرس عربي من الاربعينيات، وعامل شعره كده زي ايام الاربعينيات، وده بيبقى المثقف اللي في القطيع ده، وبيستخدم تعبيرات عمرك في حياتك ما سمعتها غير في افلام يوسف وهبي، يعني مثلا بيقول: يصح ان الانسان...إلخ. ويبقى هو اصلا عنده واحد وعشرين سنة، وماشي مع المجموعة بتاعته عادي، وهم بيحترموه قوي، عشان بيقول يصح. والملحوظ ان فيهم رجالة رفيعين وعندهم صدر، والبنات كلهم بيلبسوا نفس اللبس، وبتلبس محزق قوي عشان الواسع بيتخنها، هي دايما تقول كده، وهي بتقول كده وهي يا اما رفيعة رفع مجاعات الصومال ومحتاجة اي حاجة تملاها، يا اما تخينة قوي وبتلبس اقل منها بنمرتين فتحس ان الهدوم ح تنفجر في وشك والزراير ح تطير فجأة وتدخل في عينك.

وقيس بقى على منطق بتاع الجزائر كل حاجة، برضه موضوع غزة، موضوع الظابط المصري، موضوع رجال الاعمال، كل حاجة كل حاجة طول الوقت بتسمع جمل شكلها كده

تعمل ايه انت بقى؟ تعمل زي اتنين صحابي بقوا يكلموا القطط والكلاب ولما اضحك يتنرفزوا مني ويقولوا لي انهم بيفهموا، والموضوع وصل بواحدة فيهم انها شاكة في سلوك القطة اللي رمت ضناها وبتدور ورا القطة عشان تعرف مين الشاب المستهتر اللي خطفها من عيالها.. والله ما كانوا كده، دول كانوا اخر اتنين عاقلين شفتهم، الله يرحمهم بقى