Thursday 21 January 2010

حوار بين مهندس وظابط

تحديث:
شفتوا، شفتوا، طلع كلامي صح، سمك المريوطية فيه ديدان والدكتور ثابت قال ان الديدان بتأثر في "الأماكن الحساسة مثل المخ والقلب" شفتوا بقى؟ يعني الاماكن الحساسة عند المصريين الجدد هي المخ والقلب، صح... صح والله صح، عشان لما بيشلغوا مخهم ويبتدوا يقولوا افكارهم بتحس انهم بيعملوا بيبي تقيلة، ومشاعرهم ريحتها فعلا فيها حاجة... صح صح، صح والله يا دكتور فعلا، كتر خيرك، احنا اهو تحليل الحالة بيبان واحدة واحدة، الحمد لله، يبقى بياكلوا سمك المريوطية، خلاص ادفنوا المريوطية دي حفاظا على الاجيال القادمة
---------------
الحوار ده حصل فعلا، مش بألفه ولا باتخيل منه حاجة، مهندس اتصالات كان قاعد مع ظابط شرطة وظابط الشرطة بيفهم مهندس الاتصالات، الغبي، ازاي يفكر تفكير سليم ويسيبه بقى من الشعارات اللي ما بتأكلش عيش، طبعا صديقي المهندس هو فيه عادة منيلة كده، لما يلاقي اللي قدامه بيخرف خالص يبتدي ياخده على قد عقله، هو انسحب من لسانه وقال قدام الظابط ان ما بقاش فيه احترام للعلم ولا اهتمام بالعلماء

وبمناسبة عيد العلم احب اعرض لكوا وجهة نظر ظابط الشرطة واكتبوها يمكن تنفعكوا، انبرى يقول للباشمهندز:
اهو ده بقى التفكير القديم... انتوا بتقولوا اي كلام مافيش تخطيط خالص ولا فيه رؤيا ولا تفكير في المستقبل بس بتكرروا شعارات وكلام تلفزيونات.. دلوقت انت لو عندك عالم، لازم يعيش في مستوى معين، يركب عربية، يسكن في منطقة معينة، ولاده يدخلوا مدارس معينة، وانت عايز الدولة تدعم ده كله او توفر له ده كله بانها تديله مرتب على الابحاث اللي هو بيعملها، عشان يسكن ويركب عربية وعياله يدخلوا مدارس كويسة مش اقل من ان الدولة تصرف عليه بتاع خمسين الف جنيه في الشهر، كده انت رميت خمسين الف جنيه في الارض، اخدت بيهم ايه؟ شوية ورق، الخمسين الف جنيه دي تأكل حي بحاله، طب وليه؟ البني ادم كل ما مستواه التعليمي قل بقى سهل انك تأكله، لكن يفضل ياخد في شهادات ويقرفك ويتآلط عليك ويكلف الدولة فلوس؟ عشان ايه؟ تتمنظر بيهم وتقول عندنا علماء، وبعدين؟ غير لما يبقى عندك بقى رجل اعمال هو بيصرف على نفسه وعلى البلد، والناس مستواها التعليمي اقل يبقى احتياجاتها اقل، كده الامور تمشي والفلوس تكتر في البلد

طبعا صديقي المهندس فتح بقه وقال له: يا سلاااام، تصدق ما كنتش واخد بالي خالص؟
الظابط: طبعا، ما انتوا بتتكلموا وخلاص، ما فيش تفكير في بكرة
فهمتوا يا بهايم؟ ناس اغبيا فعلا
هو ده بقى المصريين الجدد، اصل انا شفت غلاف كتاب اسمه المصريون الجدد، الاستاذ فهمي هويدي شهرني ههههه، بس هم المصريين الجدد دول لهم صفات كده
يعني لا هم عملاء، ولا هم حرامية، ولاهم ناس وحشة يعني، هم دماغهم كده، ما يقصدش حاجة والله، هو فعلا مقتنع، ومنتشرين في كل طبقات المجتمع، واشكالهم شبه بعض، تحس انه كان مفروض يكمل وبعدين حاجة حصلت اتولد كده، مش قصير، مش قزم، لا، هو فيه حاجة، يعني تركيب العظام فيه حاجة معينة كانت مفروض تكمل وما كملتش، وبيتكلموا زي بعض، بس على حسب المستوى الاجتماعي، لو اغنيا كلهم بيتكلموا بنفس الصوت ونفس التعبيرات ونفس الحركات، لو متوسطين برضه كده، ولو فقرا بيتكلموا زي بعض وبيمشوا في مجموعات، ما تلاقيش واحد منهم هربان لوحده كده الا في النادر
وكل كلامهم ومنطقهم من الشمال لليمين، او بالورب، يعني طريقة تفكير ملتوية جدا، تحس انك مش عارف ايه اللي بيزعله ايه اللي بيفرحه، التصرفات اللي مفروض تتفسر على محمل معين عنده لها تفسيرات تانية خالص، وتفضل انت تتفاجئ
زي مثلا احداث التحرش، يعني مثلا انا فاكرة ايام التحرش كنا كلنا بنسأل: ليه؟ ليه بيضربوا البنات وبيشتموهم؟ هي دي طريقة معاكسة وللا تحرش؟ ما بقاش فيه حد بيقول يا جميل يا قمر والحاجات دي؟ وبعدين حتى لو ح يتحرش بالايد، بيضرب ليه؟ وبعدين ماله فرحان كده؟ وايه سر ارتباط الحوادث دي بالعيد؟ وليه يخرجوا من صلاة العيد يعملوا كده؟
لا ما تحاولش تفهم، وعلى طول كده بقى، على طول ردود افعاله بالطريقة دي، ما تبقاش فاهم لما تعمل ايه يقوم يحصل ايه؟
وكلهم اسطامبات كده، حتى صوتهم زي بعض، اتحداك تعرف صوت واحد فيهم في التليفون، ايا كان مستواه الاجتماعي، هم كده باقات من البشر مافيش اي نوع من التفرد، وبيلبسوا نفس اللبس كأنه يونيفورم، وايه البنطلونات الجينز اللي واخدة فرشة بوية بيضا وش وضهر دي؟ وبتظهر في العيد فجأة وتختفي بعد العيد، كأنهم تنظيم
وطلعوا في مظاهرات الجزائر برضه، وضربوا الامن من غير اي سبب واضح، وعلاقتهم بالشرطة علاقة متميزة جدا
الاغنيا منهم بيحبوا الشرطة قوي وعندهم تصور ان اي حاجة بيحلها ظابط الشرطة، والفقرا من المصريين الجدد كده برضه بس بيخافوا منهم، لكن مش بيكرهوهم
وبعدين تيجي تكلمه تلاقي كل حاجة بالشقلوب لدرجة انك تحس ان فيه في مخك حاجة غلط، يقعد مثلا يحكي لك خناقة:
جالي وقال لي ازيك.. قال لي ايييه؟ ازيك.. طبعا انا فهمت على طول، قمت قلت له لا ابدا مافيش حاجة، (ويروح غامز) ماهو انا برضه ايه؟ اشتري ما ابعش، وانا ماليش في السلك ده ابدا، ييجي يقول لي ايه آه.. لا، جبت من الاخر وخلصت
ولو سألت تبقى حمار، ولو جات لك الشجاعة: لا معلش انا مش فاهم؟
الله.. انت معايا وللا معاه؟
وممكن تقلب بخناقة، ولو زعقت له يقول عليك حنين، ولو كلمته كويس يتخانق معاك ويقول انك بتلون عليه
تقول له كلام تلاقيه بيرد على كلام تاني خالص
وفيه بقى من المصريين الجدد اللي انا اشرت اليهم قبل كده، عاملين زي الست اللي لامؤاخذة مشيها بطال وبتعاير الشريفة انها مش لاقية راجل يبص في وشها، بس دول بيبقوا من المصريين المثقفين الجدد
وحالة عبثية اخلاقية بقى، لازم المجرم معاه حق والضحية هو اللي غلطان، امال ايه؟ الغباوة انك تبقى محترم، والنباهة انك تبقى واطي، وفيه خلط رهيب مابين الوطيان والذكاء، ودول بقى تلاقيهم بيقولوا جمل كده شبه: انا عندي الاسرائيلي اللي بيدخل باحترامه احسن من الجزائري اللي يشوح بالمطوة.. انا عندي الاسرائيلي اللي يدخل فلوس للبلد كسائح احسن من الغزاوي اللي بيعدي من الانفاق.. انا عندي المصري اللي بيتعامل مع اسرائيل احسن من السنغالي اللي بينام في الشارع.. انا عندي الحرامي اللي بيقول انا حرامي احسن من اللي بيصلي وهو بياكل كتير... انا عندي الرقاصة اللي بتبسط الجماهير احسن من المرة بوز الاخص النكدية... انا عندي تديني بالبونية احسن ما تجيب لي ايس كريم.. انا عندي اللي يتف في وشي احسن من يطلع بطاقة الرقم القومي.. انا عندي ارمي نفسي من الشباك احسن ما انام بعد الغدا ..إلخ، طول النهار عايشين في مقارنات كده تبقى مش عارف ترد تقول ايه؟
تحس كده انهم عاملين دماغ كيميا وسخة، وكل نظرياتهم زي نظريات الظابط كده، يعني لما تسرق وتأكل اللي حواليك احسن ما تعيش لي شريف بمرتبك.. بطلوا كلام الستينات ده
اه
المصري الجديد يتعرف من
key sentence
بطلوا كلام الستينات... اي حاجة بقى: العيب الحرام اللي ما يصحش كل ده كلام ستينات، اشمعنى ستينات؟ ليه مش خمسينات؟ ليه مش تلاتينات؟ ليه مش كلام قديم وخلاص؟ ما تعرفش، بس هي الجملة دي انتشرت
يعني مثلا انا بهت امبارح لما كنت باتريق على احمد عز عشان عايز يقنن بيع الاثار قام واحد من المصريين الجدد (وبرضه نفس التركيب الجسماني ده ونفس الصوت) قال لي: ماهو احنا مصريين ودي حاجات اجدادنا، جرا ايه لما كل واحد يشتري حتة؟ اشمعنى الحكومة تحتكرها؟ بطلوا كلام الستينات ده، هو قال لك ح نطلعها برة؟ ده بيدي فرصة ان المصريين يبقى عندهم الحاجات دي في البيت كده بدل ما كل حاجة تبقى بتاعة الحكومة ويحطوها في المتاحف وياخدوا عليها فلوس، طب احنا ليه ما نشتريهاش؟ ومنكن مثلا تبقى وسيلة كويسة للمشاريع، واحد مثلا يشتري مجموعة ويفتح متحف على حسابه ويكسب، ويبقى كده وفر للدولة وح تاخد منه ضرايب وفي نفس الوقت هو استفاد، هم دول مش اجدادنا؟ وبعدين عندهم كتير في المخازن ما يطلعوه والناس تستفاد بيه
طب انت مكاني دلوقت.. ترد تقول ايه؟
بلاش، مرة واحد قعد يقنعني ان رجل اعمال راجل كويس عشان كان بيتبرع للفقرا مع انه حرامي وعليه قضية: وفيها ايه؟ ما الحكومة بتسرق ومش بتدينا حاجة، هو بيسرق وبيدي الفقرا، يبقى ليه يقبضوا عليه؟
طب ترد تقول ايه؟ وملحوظ انك مثلا ممكن تشتمه بجد يضحك، تقول حاجة مش قصدك بيها شتيمة يزعل، وموضوع الجزائر ده كان فضيحة لأنه كان جامع شامل لكل المصريين الجدد، مافيش واحد من المصريين الجدد تخلف عن غزوة الجزائر، وبرضه بيتكلموا كده: يقلعوا البنطلون لفردوس عبد الحميد وبنت مصرية تقلع التي شيرت؟ ده بيأكد ان مافيش قومية عربية
هم فريق ضعيف.. كسب ازاي؟ قال بلد المليون شهيد قال، طب بصي على المنتخب بتاعهم، اصلا نسوانهم مش كويسة
هم جبنا جدا لعلمك وبيخافوا من خيالهم وفيهم عنف وهمجية وقلبهم ميت وما بيخافوش من حاجة
لا مش احنا اللي ننضرب ونجري احنا جامدين قوي وصيع احنا ما انضربناش على فكرة هم ولاد كلب ضربونا والناس جريت من الخوف ومعذورين ما تتريقيش عليهم، احنا جرينا عشان احنا شعب متحضر مش صيع

ايوة طبعا كرامة مصر لما جزائري يضرب محمد فؤاد بالطوب، دي تختلف عن اي مواطن مصري يتهزأ برة لان محمد فؤاد مشهور
معلش محمد فؤاد ما اتعورش بس خاف.. تختلف عن انا وانت لما نتعور لانه مطرب طبعا
طب ما مروة الشربيني اتقتلت.. يبقى ليه فردوس عبد الحميد يتقلع لها البنطلون؟ هو احنا كل مرة؟

احنا على طول عايشين العيشة دي مع المصريين الجدد على فكرة، وساعات بيبقى فيهم طفرة جينية من وسط القطيع اللي عادة بيبقى ماشي مع بعضه تلاقي واحد لوحده كده شكله قديييييييييييييييييييييييييييييييييييييييييييييييييييييييييييييييييم، شكله مدرس عربي من الاربعينيات، وعامل شعره كده زي ايام الاربعينيات، وده بيبقى المثقف اللي في القطيع ده، وبيستخدم تعبيرات عمرك في حياتك ما سمعتها غير في افلام يوسف وهبي، يعني مثلا بيقول: يصح ان الانسان...إلخ. ويبقى هو اصلا عنده واحد وعشرين سنة، وماشي مع المجموعة بتاعته عادي، وهم بيحترموه قوي، عشان بيقول يصح. والملحوظ ان فيهم رجالة رفيعين وعندهم صدر، والبنات كلهم بيلبسوا نفس اللبس، وبتلبس محزق قوي عشان الواسع بيتخنها، هي دايما تقول كده، وهي بتقول كده وهي يا اما رفيعة رفع مجاعات الصومال ومحتاجة اي حاجة تملاها، يا اما تخينة قوي وبتلبس اقل منها بنمرتين فتحس ان الهدوم ح تنفجر في وشك والزراير ح تطير فجأة وتدخل في عينك.
وقيس بقى على منطق بتاع الجزائر كل حاجة، برضه موضوع غزة، موضوع الظابط المصري، موضوع رجال الاعمال، كل حاجة كل حاجة طول الوقت بتسمع جمل شكلها كده
تعمل ايه انت بقى؟ تعمل زي اتنين صحابي بقوا يكلموا القطط والكلاب ولما اضحك يتنرفزوا مني ويقولوا لي انهم بيفهموا، والموضوع وصل بواحدة فيهم انها شاكة في سلوك القطة اللي رمت ضناها وبتدور ورا القطة عشان تعرف مين الشاب المستهتر اللي خطفها من عيالها.. والله ما كانوا كده، دول كانوا اخر اتنين عاقلين شفتهم، الله يرحمهم بقى

27 comments:

karakib said...

LOL :D

LiNa Sh said...

ههههههههههههههههههههههههههه
من أرهب مقالاتك
=))

طيب والله صح
التناقض في كلامهم بيبقى بششششع
لدرجة إنك فعلاً ماتبقيش لاقية رد
أصلك هاتردي تقولي إيه
الواحد بيبهت من الناس دي والله
:D

Dr Nemo said...

المشكلة دلوقت ان فيه ناس منهم هتنطلك فى التعليقات تحاول تقنعك فعلا ان كلامهم صح ... بس انا مبسوظ من الظابط ...متسق مع نفسه...هو بدل ما يتعقد من شغله ويقول انا شغال خدام للحراميه ...وبدال ما يحاول يقتنع انهم مش حراميه ...ساب كل حاجه على طبيعتها واقتنع ان ده الصح ...كل الاوضاع دى صح ...ولاد الكلب المثقفين واللى عاملين فيها ثورجيه ونخبه يولعوا ...فلتحيا دولة منخوليا العظمى

Tamer said...

هههههههههههههههههههههههههههه

لو بتتكلمي على المنطق المعووج بس , ففيه كمان القيم المعووجة , يغور اي حد بس المهم انا اعيش و اسرائيل الجامدة جدا ( بس انا جامد جدا برده وقدها و قدود ) ما تضربنيش

كنت ناقل هنا تعليق لواحد من دول من كام يوم

tamer.sala7 said...

البوست ده يدرس كان لازم ينزل في مجلة الحائط بجد انا استكيفت جدا من البوست ده

امانى عزالدين said...

مفترية والله
بجد تحفة انتى دماااااااااااغ
المصريين الجدد دول انا اكتشفت انهم كتيييير
لا كتير بجد كتير بصورة مفزعه ومعمولهم غسيل مخ ع الاخر
طيب انتى عارفة ان النوعية اللى بتتكلمى عنها دى تعتبر انها سوية نفسيا شوية
عن نوعية تانية
على الاقل زى ما بتقولى هما مقتنعين باللى بيقولوه
باعو القضية ومعترفييييييين
انما اللى تلاقيهم بيكلمو بقلب وبحماس ولازم نعمل ولازم نسوي وساعه الفعل ماتلاقيش انا بازعل عليهم اكتر والله

شمس العصارى said...

ايه يا عم كلام نص الستينات ده طالما ان الستينات لوحدها مش حلوة رغم انها موضة الميكروجيب هههههههههههههه
ههههههههههههههههههه
انا بضحك على وصفك الجسمانى و النفسى و اللبسى للمصريين الجدد مش بضحك على الميكرو جيب و الله
ههههههههههههههههه
احب ابشرك ان المصريين الجدد دول هما الاكثرية دلوقتى
و المصريين الفعليين اصحاب البلد و الخايفين عليها - انا عارف انهم اصحابها بالاسم بس - دول اقلية جدا جدا يعنى ممكن تعديهم على صباعك
يعنى انتى و شوية قراء من مدونتك و المرحوم محمد السيد سعيد
يعنى و اتنين تلاته تانى
اى و الله اصبحوا قلة قليلة جدا
عن نفسى لما كنت بدخل فى حوار مع ناس زى كده كانوا بيطيرولى مخى و اترفز و اتعصب علشان بيسيب الحق الى قدام عينه و يقلبه لباطل زى ما انتى قلتى وبعد معاناة نفسية و مجتمعية وبعد ما رجعت لنفسى كده قلت يا واد انت منتظر ايه من الناس دى لان دول الناتج الطبيعى للحالة الى عيشينها من 35 سنة - بعد الحرب على طول - يعنى لنص السبيعنات و احنا كنا كويسين
بس انا ليا رأيى يا نوارة انا بصنف الناس دى ضمن الطبقة المستفيدة من الوضع الحالى
لانى بقسم شعب مصر الى طبقة مالكة حاكمة - طبقة مستفيدة - طبقة فقرا و مطحونة
و متنسيش الاعلام الموجه الى ملا عقولهم
المهم علشان مطولش فى الكلام
انا عن نفسى بدات لا اتكلم معهم فى نقاش جاد بقيت بسمع كلامهم و اضحك بس
نلتقى بعد الطبقى المستفيدة

الخوجة said...

لألألألألألألأ
يانوارة ايه ده اول مرة اقرى بوست ليكى من الأول للاخر واحس ان انا جالس وسط سيول العريش والمطرة عمالة ترخ على رأسى أكيد كنتى قاعدة فى البلكونة فى الشمس مش معقول وعلى رأى تامر صلاح ده يدرس نابغة اسمحيلى خلاص كبرتى يانوارة وخرجتى من تحت عباءة الفاجومى والاستاذة الكبيرة الوالدة التى نجلها ونقدرها كلنا مش معقول ايه التميز دة ياترى مين اللى هيتجرأ وينشرة عرفينى ازاى ماتحاوليش يانوارة تترجمية علشان العالمية فعلا واحدة بتاع اداب يعنى كلية الاداب قسم انجليزى لاتكتب بالانجليزى صحيح يانوارة هو محتاج انتى اللى تترجمية اكتر من مرة علشان المحتوى اللى انتى حاسة بيه وتكون دماغك رايقة مع تلاته كابتشينو سحلب يعنى
نوارة انأشة يعنى اخد كوبى وانشرة ولا حقوق مخية طبعا يحق ليكى ازاى طلع منك ده عجيبة الشمس حلوة النهاردة

مهندس مصري بيحب مصر said...

معاكي حق و الله
بيقولوا كلام مناخوليا خالص
و المفروض بقى إنه عين العقل عندهم
يا مثبت العقل و الدين يارب
الواحد بيمسك نفسه من الخناق معاهم بالعافية
بس بيبقوا مستفزين جداً
معايا واحد منهم زميلي في السكن و الشغل

Unknown said...

يااااااااااااه - تصدقوا ياجماعه أنا أعرف منعم كتير أوى وعايش معاهم من كتير أوى

بس أول مره أعرف أنهم مشهورين اوى كده وأن أسمهم المصريين الجدد

بس حلوه نظرية الظابط دى
فقر وجهل علشان نعرف نصرف على القد ياأما رجل أعمال من النوع الهليب علشان يصرف على نفسه والحكومه

مش دى نظرية طاظا بطاظا ؟

طب على كده الحكومه ممكن تاخد كل شهاداتى اللى طفحت فيها الدم ويدونى مكانها فلوس وأبطل أخد شهادات تانى علشان يعرفوا يوفرولى الهوا اللى بتنفسه

احمد سعيد said...

طب وايه يعنى لما نكلم القطط والكلاب
مش عارف انتى ماسكه الموضوع دة بقالك كام يوم ليه !!

طب ما انا بكلم كل الحيوانات
والجمادات كمان
كان عندى كاسيت زمان لما كان بيستهبل كنت بزعقله يقوم يزعل ويشتغل

عادى يعنى

انا مصاحب ضفدع دلوقتى ومسميه جمال
بيفهمنى ويسمع كلامى

ايه الغريبه فى كدة ؟؟


بصى يانوارة
انا هفهمك
هو مش الحاجات دى هتشهد علينا يوم القيامه
والشاهد دة يفترض فيه العقل ساعه الحدث اللى هوة هيشهد عليه

يبقوا بيفهموا ولا لأ ؟؟؟

امال ربنا هيجيبهم يشهدوا زور يعنى ؟!!

احمد سعيد said...

اقولك فكرة

اللى شايف نفسه مش من المصريين الجدد

ممكن نعمل جزب او تجمع ولو على النت

ونسمى نفسنا قدمااااء المصريين

وناخد شعار لينا الاستاذ حسين صدقى فى فيلم العزيمه

قلتى ايه ؟

Dr.Safaa said...

برافو عليك, فعلا هو كده تماما, زي ما نكون صحينا الصبح لقينا السيل جرفنا بالليل صبحنا في بلد تانية اللغة والمفردات والأفكار والقناعات والأقنعة وكل شيء عجيب, زي الهرم المقلوب..

تحياتي لبراعتك في توصيف وقراءة الواقع ببساطة ساخرة وعميقة ومفجعة وحقيقية في نهاية المطاف.

Unknown said...

على فكرة ظاهرة المصريون الجدد قديمة جداً 00

وأعتقد والعلم عند الله أن بداية بزوغ نجمهم كانت فى نهاية السبعينيات عندما تلاقت بالصدفة التى هى خير من ألف ميعاد قطعان الردة على كل ما يمت بصلة لثورة يوليو الذين لولا هجومهم وافتراءاتهم على عبد الناصر لما وجدوا مايسدون به غائلة جوعهم ولما ركبوا المرسيدس وسكنوا على نيل القاهرة

عندما تلاقت هذه القطعان مع دراويش كامب ديفيد ومريدو السادات فكونا تحالفاً معادياً ليس فقط للإشتراكية ومكاسب العمال والفلاحين والقومية واللعروبة والإسلام 00

بل تحالفاً معادياً للعقل والذوق والجمال والتفكير العلمى

تحالفاً فى منتهى اللزوجة والقبح والفجاجة والإنحطاط والجليطة والبجاحة وقلة الأدب وزناخة المخ

ومن يراجع صحف وإعلام هذه الفترة بدقة سيلاحظ أنها كانت تخيم عليها ذات الأجواء التى نعيش فى ظلالها هذه الأيام من إنحطاط لا مثيل له

وما أشبه الليلة بالبارحة

عبده البرماوي said...

بت يا نواره.. جاتلى الرسالة دي بالغلط.. استلمى ياختى

....
أنا خايف لاكون مصريين جدد.. بقالى كام يوم كده صوتي مخنف، ونفسي هفاني على هوهوز وباقول ميرسي.. ولابد ع الفيس بوك وعمال احط هوروسكوب واختبارات الشخصة، وباقرا مقالات ممتاز القط، وحد صاحبي صاحبته فى كوستا بيقولي فيه بارتي عاملها الحزب، وانه هو وصاحبته وخطيبها هايروحو، وقالي كمان ان الحياة هناك هاتبقي اكسبلوجن

وحاسس اني بقيت باتخنق من الكلام عن الفقر والسياسة وشايف ان الفقرا يستاهلو.. ونفسي اقدم على فيزا لامريكا .. وبادور على بنطلون جينز ماركة تو بلاي اصلى بقالي اسبوع.. وشعرى - بدا يطلع واشتريتله جيل.. جاي من اسرائيل.. صنف عال.. وحاسس ان مصر من حقها تعمل جدران زي ماهي عايزه، وشايف انهم يبطلوا التعليم احسن، ومش عاوز اسمع كلمه عن حماس ولا افتكاس.. وفاتورة تليفوني زادت تلت اضعاف.. وباخد حبوب دايت مستلف تمنها من اختى الصغيرة

وكمان بقيت اقرا تين استاف.. وحاجات كده حاسس بيها انى انا مش انا يا دكتوره

مش هاقولك انا مين عشان الفضيحه.. انا مش عايز حد يقابلني فى الشارع ويقول المصريين الجدد اهه.. المصريين الجدد اهه

Unknown said...

طلعت المريوطية هي السبب في الاحتلال اللي كل البلد وهي اللي جابت القلعة جنب البحر

ايه يا عبده جواب بورنامج حياتي ده

اااااااااه فاكر بورنامج حياتي؟ كنت من متابعينه وانا صغيرة

طول عمري غاوية نكد

المهدى said...

فلتحيا نظريات نوارة هانم
دلوقت ليكى عندى نظريتين : المصريون الجدد و تعريف الغباوة ( غباوة القلب لو تفتكرى ) لكن برضه السؤال ليه كل الكره ده للستينات ؟
مش يمكن لأنها تمثل لهم عكس كل ما يعرفوه هم تربوا على التسول .. التسول فى كل شئ السياسة والأقتصاد والتعليم والعلاج والعقل والمشاعر
والستينات كانت رمزا للتحدى والعزة ؟
يمكن ؟ لو صح يبقى طبيعى إن أى متسول يكره أى تحدى أو أى شئ عزيز

شمس العصارى said...

عن نفسى لما بحب اكل سمك باكل سمك من النيل
يعنى مفيهوش ديدان بس ملوث كيميائيا من صرف مصانع كيما و مصانع سكر و الورق فى قوص
انما ديدان لالالالالالالالالالا
فين بسكوته بابا

شمس العصارى said...

والله انا ما شوفت كلام الاستاذ فهمى هويدى الا حالا الساعة11
و انا كنت علقت على البوست من قبل ما اعرف اللينكات الى فيه او اشوفها
و الله ده الى حصل انا علقت قبل ما اشوف اى شى

منظور شامل للحياة السعيده said...

جاااااااااااااااااااامد

بس للأسف دول الاكتريه

دول الاكتريه

بيفكروني بافلام الموتى الاحياء

لما يبقو ملو لاالبلد و انتي كل ما تجري تلاقيهم في وشك

و لو وقفت هيمسكوكي و تبيقي منهم

الحل اننا يا نرجعهم تاني مننا يا نسيبلهم البلد
يا نستسلم و نبقى منهم

انا عاوز افضل من قدامى المصرييين

انا عاوز افضل فايق و حاسس بالحق و العدل و الجمال و الفكر

حرام كدا

Eldebug said...

جمييييييل اوى البوست ده .. احييكى عليه بصراحة

wafaa farouk said...

النوعية دي بقت منتشرة جدا وبصراحة الواحد بطل يرد عليهم ولا يناقشهم مش ناقصة ضغط وامراض المناقشة للناس اللي عندها استعداد تفهم دول ساعات مابيدوش اللي قدمهم فرصة يتكلم علي أساس انهم هم اللي فاهميين ولما يتزنقوا يودوكي حتة تانية خالص
فالواحد يبصلهم ويهز راسه وخلاص

Anonymous said...

أحمد سعيد، علم وتم التنفيذ يا باشا..
آدي الجروب:
http://www.facebook.com/group.php?gid=275736523400

منتهى الابداع في الوصف يا نوارة :D
بقالي من ساعة ما اتكتب البوست ده وانا عايز اعلق مش عارف :)))

Tamer said...

مش يمكن لأنها تمثل لهم عكس كل ما يعرفوه هم تربوا على التسول .. التسول فى كل شئ السياسة والأقتصاد والتعليم والعلاج والعقل والمشاعر
والستينات كانت رمزا للتحدى والعزة ؟
___________________________
كلمتين حلوين اوي
مع اختلافي في ان الستينات ما كانتش رمز للعزة ولا حاجة
يمكن الخمسينات نوعا ما

بس انا متفق تماما مع المضمون
و مع وصف العالم دي

lastcrazyboys said...

هع هع هع

البوست ده في الجووون..وبصراحة وبأمــانة شديدة بقالي كتيــر ما قريتش ليكي حـــاجــات مهيســة

ده انا اضطريت اخليها لتاني يوم عشان كنت لزمن انام..واستشفيــت انها محتــاجة دماغ صاحية

بس عــارفة ايه أجمــد حــاجة في الموضوع ده ..انه في نقــاط كتيير الواحد يعــدي عليها ..ويحس انك بتغمزيه بالقــول ..او بتلقحي كلام عالقارئ اللي مكلف نفسه وداخل لك باتنين كيلو برتقان ولا مواخذة يعني..لا بجدأول مرة أقرالك حــاجة
واضحك كم الضحك ده ........على تصرفاتي

Anonymous said...

يا حاجة، بصي على هنا:
http://www.facebook.com/topic.php?uid=275736523400&topic=12693

:D

دول تفاعلوا وبدأول يفشوا غلهم هههههه

ehabafndy said...

بأمانه إنتى عندك حق و أنا بأيد كل كلمه كتبتيها فى المقال ده زى ما فى التطور الطبيعى للحاجه الساقعة فالمصريين الجدد دول هما التطور الطبيعى للنموذج إلى بيقول مثلا الفلسطين يستاهلوا مهما إلى باعوا أرضهم للياهود دا الفلسطينين دول دول وحشين و غلاوييين و ألعن من اليهود مهم معاشرين الياهود بقالهم كتير و من العاشر اليوم 40يوم صار منهم الراجل إلى بيقول كده إتجوز من الست إلى بتقول يا بت إتجوزى الراجل من دول وخلى العصمه فى إيدك و بعد شويه كده إتلككيله وطلقيه و خدى منه الشقه و العفش و الحق و المستحق و شوفى غيره و هكذا و إلى بعديه و إلى بعديه و إلى بعديه دول بقى إتجوزوا و خلفلنا عينه المصريين الجدد إلى إنتى بتقولى عليها