Tuesday, 12 January 2010

اسرائيل بتدينا على قفانا تاني

على فكرة حتى الرفق، لا مؤاخذة، له اصوله وقوانينه العرفية، ما ينفعش واحد متجوز شعب ومرافق عليه دولة "صديقة" كل شوية الدولة دي تتصل بينا وتقول لنا: والنبي يا مدام ابعتي السواق ياخد بيجامة البيه.. انا غسلتها له ونشفت
كده كتير، مافيش ست.. شعب يعني، يرضى بكده ابدا، ده لو جواز كاتوليكي البابا بنديكت بنفسه لو عرف اللي احنا فيه ح يطلقنا
ممكن احنا نبقى عارفين انه مرافق، بس الانسة لازم تدينا فرصة اننا نستعبط، كده مش مديانا فرصة خالص، الناس واخدة عننا فكرة اننا مبسوطين كده، ما يصحش
ماشي، هي واسعة قوي، بس ماشي، احنا مستعدين نصدق، ليه يا اسرائيل تطلعي لنا في التلفزيون وتقولي لنا: احنا منسقين بناء السور ده مع مصر؟ ليه الذل ده؟ ما تسيبينا نربي العيال في امان؟ هو احنا بنسأله رايح فين وللا جاي منين؟ ماهو كل يوم راجع لنا بشعرك على كتفه واحنا ساكتين، بتكيدينا ليه؟ ما تديله فرصة يكدب علينا
النهاردة كان يوم شاق
شوية اخبار عجب عجب عجب
اولا: علاء مبارك اتصل بالمنتخب وقال لهم: فرحوا الشعب 
ثانيا: اعجب ما قيل في حادث نجع حمادي 
اللهم اهلك فرانس تليكوم ومن والاهم وفليير مسجاتهم ووقع شبكاتهم وفشكل حبيباتهم فلا يعبروا بعضهم ولو برنة  
رابعا: حماس يا عيني عايزة تعمل اي حاجة عشان تمنعنا من بناء الجدار، لقوا كشف اثري وفاكرين قال ايه؟ لما يلاقوا كشف اثري ناحية الجدار تقوم تبقى منطقة اثرية وما نبنيش الجدار... هأووأوأو، هو احنا بناكل من الكلام ده؟ ده المنقبات راحوا بكمامات قامت الجامعة قالت لهم طب ممنوع الكمامات وانشالله يجيلكوا انفلوانزا الخنازير.. ولا الهوا، والله لو لقيتوا سر التحنيط مكان حفر الجدار بررررضه مافيش فايدة
خامسا: ما بقاش الا الاراجوزات كمان اللي بيتكلموا في السياسة، بس هو يدوبك كده الاراجوز ده يدعم الجدار على قده، العيب مش عليه، العيب على اللي سماه زعيم ومش مكسوفين ان اراجوز زي ده يعملوه زعيم...على رأي نجيب سرور: يا قلة البخت في ولادك يا مصر
سادسا: احنا ناس مبروكين، طلع المجاري اللي بنرميها في البحر وعملت تلوث ضاعفت لنا الثروة السمكية وفيه واحدة امريكانية عاملة بحث يفطس من الضحك، الولية شككناها في نفسها، بتقول المفروض ان الصرف والسماد يموت السمك زي ما حصل في المكسيك، لكن ده في مصر ضاعف الثروة السمكية، ثم استنتجت ان اكيد هم اللي فاهمين التلوث غلط وبتوصي بانهم يستفيدوا من خبراتنا والبيبي بتاعنا
اتاري اسرائيل كانت عايزة تشتري البيبي المصري، بس احنا لازم نعمل حملة لمنع تهويد البيبي بتاعنا، ده متربي على الغالي
هي فاكرة ان اي حد يعمل زي الناس في البحر ربنا ح يبارك له في رزقه؟ ده بيبي الفراعنة مش اي حد
سابعا: شيخ ازهري افتى بجواز سرقة الجزيرة لانها محتكرة والاحتكار حرام، على فكرة يا عم الشيخ، انا موافقة على الفتوى دي، وياريت تتعمم على كل رجال الاعمال اللي محتكرين اي حاجة، بما فيهم الامام حسني بن مبارك اللي انت بتفتي على مذهبه، محتكرنا بقاله تسعة وعشرين سنة، ياريت حد يعمل معروف فينا وييجي يسرقنا لوجه الله تعالى وح نعيش خدامينه طول العمر 
وبرضه اللي محتكر الحديد واللي محتكر الاسمنت واللي محتكر الدقيق واللي محتكر العيشة واللي عايشينها، انا شخصيا كواحدة ضد الرأسمالية اطالب بتعميم الفتوى دي على كل رجال الاعمال في العالم، هم حرامية اصلا وسرقتهم طبعا حلال
بس انا عارفة يا عم الشيخ ان ده مش رأيك.. بتحرج نفسك ليه بقى؟
نسيت ثامنا : 
اي مصري اهبل فرحان ان مالاوي غلبت الجزائر يبقى فعلا بياكل سمك متغذي ع البيبي والمجاري طفحت على مخه
انا اللي ما بافهمش في الكورة عارفة سمعة مالاوي المنيلة وانها فريق ضعيف، لما تغلب الجزائر اللي علمت علينا بجون صاروخ تبقى عيبة في حقنا احنا، طب كانت الجزائر تتغلب من فريق محترم شوية اهو كان يبقى شكلنا حلو، الا اذا كنا على رأي واحد على التويتر شايفين نفسنا ولايا ومعتبرين ان اللي ييجي على الولايا ما يكسبش
هو عموما بعد اللي عملته فردوس ومحمد فؤاد ناس كتير اخدت فكرة عننا اننا ولايا 


10 comments:

Phobos said...

أنا نفسي و منى عيني نخسر ٤-٠ شماتة في اللي فرحانين في الجزائر

Amr said...

ياستى براحه علينا - أيه كل المواضيع اللى تشرح القلب الحزين دى ؟

انا مش عارف ليه اسرائيل مصره تحرجنا فى كل قلم بتديهولنا - مع اننا سايبينلهم خدنا وبنوطيلهم قفانا كمان وقت مايحبوا

لو دوله أراجوز ومسخره وأخدت احرجه واحده من اللى بناخدها من اسرائيل كان زمانهم قطعوا العلاقات وبطلوا خدمات من زمان اوى
هما ماسكين صور على مصر ؟
ولا داهيه ليكون شريط فيديو

هو عادل امام مش أكرمله يقعد بأه كده ويستريح فى أواخر أيامه ؟
هو ليه مصر اوى كده يضيع كل حاجه حلوه عملها زمان ؟

Yosry said...

على الصبح كده !!!!
متشكر جدا يا نوارة على البوست دا
خبطتين فى الراس توجع
انتى بقا مش اديتينا خبطتين
دا انتى نزلتى على دماغنا بدبابة و هاتك يارقع
ابو ا لغائط
علاء
و كاذب اللى مش إمام
و كله كووووم
و الثروة السمكية دا كوم تاني
و كل الكومين اللي فاتوا دول كوم والشيخ الأزهري دا كومه تانيه كبيرة بالوكسه و الخيبه و العار و الذل

متشكر جدا يا نوارة


بالنسبة لنجع حمادي فأظن انها باينه أوي من تدبير النظام المتهاوي المتهالك الآيل للسقوط

هى فعلا السنة دى داخله علينا بصدرها كده ليه ؟؟
المصايب نازله ترف

ربنا

اللهم لا تؤاخذنا بما فعل السفهاء منا
http://www.elaana.com/vb/t25272
نقول تاني
اللهم ربنا لا تؤاخذنا بما فعل السفهاء منا

ehabafndy said...

بنظرية المؤامرة المترسخةداخلى لا أصدق أن الحكومة المصرية التى تنفق الملايين على أهون سبب رفضت أن تدفع 10مليون دولار للجزيرة لنقل مباريات البطولة الإفريقية و هى التى دفعت عشرات ملايين الدولارات لنقل كأس العالم الذى لا ناقة لنا فيها و لا جمل حجة أن الميزانية لا تسمح و أن الصحة و التعليم أولا من المباريات لا تقنعنى أبدا و أن قنوات الجزيرة المتوحشين الأنذال أصروا على مبلغ لا تقدر علية مصر حتى تعكنن على الشعب المصرى لاغراض سياسية كلام فارغ لا يمكن أن يقنع طفل صغير .
بس بصراحة ملعوبة طريقة هايلة لنشر الإحتقان و الكره للجزيرة داخل مصر مش بطالة ما هى بقت حرب بين دولة مصر العظمى 7000 سنة حضارة و خلافه و قناة تقع فى دولة لا تتخطى مساحتها مساحة حى متوسط من أحياء القاهرة .
عظيمة يا مصر .

مواطن مصري said...

مالاوي فريق قوي جدا على فكرة كانو واخدين الجزائر رايح جاي

و املي في جيلبرتو وفلافيو في انجولا يقسمو على الجزائرين

احمد سعيد said...

هههههههههههههه
تصدقى بالله
اول لما قريتك بتقولى الاراجوز
قلت
اكييييييييييد دا عادل امام
من قبل ما افتح الصفحه حتى

joyadz said...

تصدقي يا استاذة نوارة انى فرحت كثير لخسارة منتخبنا وربنا الحمد لله استجاب لدعائي ..اكره حاجة عندي الغرور والتكبر وللاسف هذين الصفتين لدينا نحن الشعب الجزائري والشعب المصري مالم استطع ان اهضمه من اجل مباراة كرة قدم تغلق المدارس ويخرج التلاميذ مبكرا والمحلات التجارية تتوقف عن النشاط من اجل مباراة كرة قدم ..عار كبير أن يصبح جلدا منفوخ يشعل الفتن ويعلى الهمم ويختزل المحن ..علما ان اسعار الخضروات والبقالة والزيت والسكر وصلت مداها..عزيزتي نوارة الحال من بعضه ومصر قرف في قرف ..

Tamer M. Fawzy said...

ممكن مصدر خبر اعلان اسرائيل انها بتعمل الجدار بالتنسيق مع مصر ؟

محتاجه جدا

جبهة التهييس الشعبية said...

انا شفت مسئول اسرائيلي بيتكلم في تقرير الياس كرام في الجزيرة ما اعرفش نزل على موقعهم وللا لا

Tamer M. Fawzy said...

طب هادور على الموقع
اشكرك جدا