Thursday, 7 January 2010

بالنوسبة لبتوع سيبنا بقى من غزة

ااااااااااااااااه، وكأن جريمة نجع حمادي جات لهم نجدة من السما، اي والله، ماهو انا لما باشك انا عارفة ان قلبي قلب خساية
طب احضرونا يا بهوات وسيدات ويا انسات
وكتاب الله المجيد، وكتاب الله المجيد، وللا اعدم تامر امين ان بتوع الشأن الداخلي دولم ما بنشوف خلقة اهاليهم في ايتها قضية في الشأن الداخلي، لا شفنا وشهم في كفر العلو، ولا عملوا حاجة في الاضرابات، ولا شفنا وشهم في القرصاية، ولا شفنا وشهم في الضرايب العقارية، ولا شفنا وشهم في العبارة، ولا شفنا وشهم في قضايا الفلاحين، ولا شفنا وشهم في اعتصامات العمال، ولا شفنا وشهم الدويقة
(وانا بادور على اللنكات اكتشفت ان بعض من شقى عمري طار، فيديوهات القرصاية والضرايب العقارية وخلافه من ايام ما المدونة الاولانية خالص انتحرت)
ابدا ابدا ابدا، ما بنشوفش وشهم غير في القضايا اللي بتاكل مع الاجانب بس، اي والله عليكوا، ولا لهم اي دقة جدعنة في ايتها موأف يا مؤمن، سبحان الله في القضايا الوطنية الحقيقية دايما دايما دايما هم عبده ظروف
امتى بقى بيفتكروا الدويقة والعبارة والعمال والفلاحين؟ اول ما تيجي سيرة فلسطين، مش معنى كده انهم لا سمح الله بينزلوا يروحوا في اي داهية تاخدهم، لا العفو، هم بس بيجيبوا سيرتهم وخلاص، اول ما سمعوا عن قضية المعابر وقافلة شريان الحياة ما بطلوش ولولة على الدويقة، مع ان سبحان الله ولا اله الا الله ولا حول ولا قوة الا بالله وان شاء الله والحمد لله بتوع الدويقة دولم فضلوا مرميين قدام المحافظة وانضربوا وطلع ايماناتهم الا ماحد فيهم نزل عبرهم بكوباية مية
اي والله يا مزمن، ما كانش حد حارق نفسه على غزة وح يموت وح ينزل له البواسير واللي نزل وهو عيان واللي راح واللي جه الا اللي ماسكين ملفات العمال والفلاحين والقضايا الداخلية، وتلاقي ناس ما بينزلوش من تحت اللحاف يزايدوا على ناس زي حسام الحملاوي مثلا اللي شايل العمال على كتفه وداير بيهم في كل حتة لما خنقنا، ليه وليه بيقول غزة
ده من حيث الواقع المعاش
من حيث النظرية، انا عايزة افهم بقى، هي الناس دي بتشتغل لحساب مبارك وللا ايه؟ عايزين يخفوا الضغط من عليه ليه؟
يعني الداخلية والاعلام المصري ادعوا ان اهل غزة ضربوهم وعوروهم، ثم بعد كده، هم هم نفس الناس، ادعوا ان المسيحيين في نجع حمادي ضربوهم وعوروهم، وهم هم نفس الناس دي قبل كده ادعوا ان بتوع المحلة ضربوهم وعوروهم، وبتوع الجزائر ضربوهم وعوروهم في عقلهم الباطن، وهم المضروبين في الارض، وكل ماحد يشوفهم يا ضنايا يضربهم ويعورهم واغلب الظن ان الغزاوية والمسيحيين قلعوا لهم البنطلونات برضه

طيب مافيش حد مش عارف ان النظام هو اللي عامل الفتنة الطائفية، وللا لسه فيه حد مش عارف؟ وللا لسه ماحدش واخد باله ان امناء الشرطة كانوا بيروحوا للمسلمين في الصعيد يقولوا لهم انصروا دينكوا دول بينصروا البنات تقوم الناس هجووووووووووم؟ وللا لسه فيه حد شاكك ان الكنيسة في نجع حمادي بلغت عن التهديدات اللي وصلتها ومع ذلك ما حطوش حراسة كافية ووقفوا يتفرجوا على الناس وهي بتموت وكمان طلعوا بيان يقولوا اصل المسيحيين بيغتصبوا الاطفال فيا عيني اللي قتلهم بقى كان دمه محروق، فيه اكتر من كده تحريض علني على المسيحيين؟ لا واليوم الساقع بتقول الاقباط بيحرقوا "بعض ايات القرآن" مش عارفة يعني ايه بيحرقوا بعض ايات القرآن، ما الامريكان كانوا بيحرقوا المصاحف، لكن بعض ايات القرآن دي شافوها ازاي يعني؟ كانت سلسلة ماشاء الله دي وللا حجاب في عب واحدة ده وللا ايه؟

طيب ماهو ده نفس النظام اللي محاصر غزة، ايه المانع حضرتك انك تقول له ياللي محاصر غزة وبتموت المسيحيين؟ هو ايه؟ وان اتهام ات اه تايم مثلا؟ مش مسموح لنا بالتصدي للنظام الا قضية واحدة كل شهر؟ لنا كوتة يعني؟
لا معلش بقى، انا ما سمعتش حد من اللي بيقولوا غزة قال: مالناش دعوة بالمسيحيين يولعوا. لكن سمعت من اللي سايبين كل حاجة جوة وبرة تولع بيقولوا مالناش دعوة بغزة خلينا في المسيحيين، لا ده انت عايز تخف الضغط عن النظام بقى، بتخدم عليه يعني، بدل ما يبقى عليه ضغط من جوة وبره عايز ترحمه، لها تفسير تاني؟ لها معنى تاني؟ ايه مصلحتك انت وانت بتدعي انك ضد النظام انك تخفف عليه الهجوم من ناحية سياسته الخارجية؟ اذا كان هو عنده وقت وجهد انه يقرفنا جوة وبرة، انت وراك ايه يعني لما تقرفه جوة وبرة انت كمان؟

طب انا زي ما رحت الوقفة بتاعة غزة ان شاء الله رايحة الوقفة بتاعة التضامن مع شهداء نجع حمادي
ادي وشي اهو.. اهو، غرقوه تفافة لو حد من بتوع: "مالناش دعوة بغزة خلينا نركز في الشأن الداخلي" حراس مصالح النظام، عتب ناحية الوقفة دي
--------
حاجة تانية مهمة قوي، اكتبوها يمكن تنفعكوا:
الانسان اللي غاب عن جريمة، اي جريمة، هو بريء منها لحد ما يدافع عنها، او يتستر عليها، او يبررها، او يقلل من حجمها، او يسكت عليها، او يصرف نظر الناس عنها
عشان كده الرسول قال الساكت عن الحق شيطان اخرس
الكلام ده ينطبق على جريمة نجع حمادي وجريمة غزة على حد سواء وعلى اي جريمة بترتكب باسمك سواء اسمك مصري او اسمك مسلم، انت ايدك مش مغسولة من دم اي من ضحايا نظامك طول ما انت ساكت، والسكوت علامة الرضا

14 comments:

مواطن مصري said...

يا نوارة ب العقل مصر ليست مسئولة عن قطاع غزة بل حماس المسئولة طيب ما تسئلي

حماس عن وضع غزة

يا ريت لا تخلطي الاوراق لأن حماس مسئولة عن وضع غزة المتدهور و يا ريت مصدر تاني غير مصدر حماس

abotl7a said...

ومش عاوز البابا يباع جمال ولا ينزل الاقباط يوافقوه علي التعديلات ولا ينتخبوا بتوع الوطني النظام بيستخدم الحوادث ديه كفزاعة ليهم عشان يحميهم من المسلمين ومن وصول الاسلامين للحكم وفي نفس الوقت عاوز يبان قدام الاغلبية انه حامي حمي الاسلام وحائط الصد ضد موامرات التنصرية زي البهلوان بيلعب ع الجانبين وفي النهاية بيطقشنا لبعد عشان يعيش

Dr Nemo said...

المشكلة ان الواحد هيرد يكتب ايه؟؟
يعنى انا بحسدك انك لقيتى عندك من النفس والبال اللى يخليكى تنزلى بتدوينه

انا قرفان الى اقصى حد ...خصوصا ان لما حاجه زى دى بتحصل ..المسيحين مش بينطقوا ولا -على الاقل- بيفضفضوا باللى حصل ولا بيندبوا حظهم قدامنا ...ودا ضغط وتعب اعصاب ودول بشر مش كائنات من القمر ...منبقاش احنا ليل نهار بصرخ باضطهادنا فى كل حتة كمسلمين فى غزة وسويسرا وووو وهما اساسا مش عارفين ياخدوا حق العيشه الكريمه فى المنيااااااااا المنيا اللى هى مش المانيا ...يعنى مروة الشربينى "واحد بشر" اتقتلت فى المانيا وجالنا حقنا .... اما فى المنيا " شوية بشر" ماتوا والارجح هيبقوا فطيس ...لان كنيستهم بتعرص على النظام واخوانهم المسلمين "فى الغالب " مش فاهمين يعنى ايه اسلام وتلاتربعهم عنده افكار طائفيه فى دماغه مع اول شرارة شكل بتنتقل لايديه ....الحل للقرف المسلسلى المستمر ده هو المصارحه بين "عقلاء " البلد على ارضيه مشتركة من تفهم "خصوصية" وفى نفس الوقت "سماحه" دين كل واحد فيهم ...دونما تدخل فى معتقدات الاخر ....ودا اللى فعلا فعلا الاديان بتطالب بيه على اختلافها بس احنا بنفسده .... انا لكيت كتير وبأيت بشوية من اللى عندى ....بس ودانى محمرة ...وانتى عارفه يا نوراه لما ودانى بتحمر ببقا غضبان من نفسى او من الوضع قد ايه ....سحقا

Ahmad said...

ربنا يباركلك يا نوارة.

بس حاجة على جنب كده. لم يثبت عن الرسول عليه الصلاة والسلام الحديث ده ولا في الصحيح ولا في الضعيف. ماترواش عنه خالص. ده قاله بعض المتأخرين من الفقهاء كحكمة يعني. رجاء تعديله ففي الحديث المتواتر "من كذب علي متعمدا فليتبوأ مقعده من النار"

ا

أحمد محمد said...

أصبحت مدمنا لمدونتك. وكلما قرأتها تذكرت كلمات أبيك، ما دمت مصر ولادة ح تفضل شمها طلعة برغم القلعة والزنازين. حذار من أن تيأسي، فلكماتك تحيي ملايين الناس ممن لا تعرفينهم ويوما ما سوف يذكرك الناس ويعرفون مدى فضلك. أحبك يا ابنتي وأدعو الله أن يرزق هذه الأمة ملايين النورات

Dr.Online said...

الانسان اللي غاب عن جريمة، اي جريمة، هو بريء منها لحد ما يدافع عنها، او يتستر عليها، او يبررها، او يقلل من حجمها، او يسكت عليها، او يصرف نظر الناس عنها
عشان كده الرسول قال الساكت عن الحق شيطان اخرس
الكلام ده ينطبق على جريمة نجع حمادي وجريمة غزة على حد سواء وعلى اي جريمة بترتكب باسمك سواء اسمك مصري او اسمك مسلم، انت ايدك مش مغسولة من دم اي من ضحايا نظامك طول ما انت ساكت، والسكوت علامة الرضا

اسمحيلي انا خدت العباره دي اقتباس و كتبتها عندي

جبهة التهييس الشعبية said...

اه طبعا

Ahmad said...

أنا كان قصدي على المقولة بتاعة الساكت عن الحق شيطان أخرس. دي ماتروتش عن الرسول عليه الصلاة والسلام

أبو أمك said...

أنا برضه مهتم بالشأن الداخلي
وبمناسبة الاوكازيون..عايز أنزل أشتري دستة شأن داخلي قطونيل

wiss said...

امبارح قلتلك ان مصر عملالي احباط، بس بردو اتفرجت على القداس وبعثت المسجات اعيد وكنت هتلفن لقتني اشوف اللي حصل هعيد على مين والزاي، الحمد لله على كل حاجة

سكوت هنصوت said...

طيب يعني حضرتك هي فين الوقفة؟؟

ويوم ايه...والساعة كام....؟؟

حكاية مكررة said...

انا بشوف الناس اللي جالسة تموت هم مصريون عرب اين كانو مسلمين مسحيين سنه شيعة أو اللي في غزة نفس الكلام واللي في اليمن واللي في لبنان فنهاية هم عرب

لهم قومية لهم انتماء يجب ان نمنحهم حق الانتماء

ومن ارتكب جنحة اين كانت يجب ان يعاقب شخيصاً ولملهاش دعوة في الطائفية التفرقة ومش عارف اية.

اعترف اني مسلم سني بس بالاخير هم برضو عرب لهم حق المواطنة والانتماء.

Amr said...

معقوله يكون فيه نظام بالغباء ده ؟

يعملوا مشكله طائفيه قادره انها تفتت أكبر الدول وأقواها علشان يغطوا على موضوع غزه ؟

عامل زى اللى ولع فى بيت جاره ولما جه البوليس يحقق راح ولع فى بيته علشان يصرف نظر الناس عن الجريمه

qrique said...
This comment has been removed by the author.