Thursday, 21 January 2010

لا إله إلا الله

مواطن مصري جاب لي الفيديو ده


وانا لقيت الفيديوهات دي







وح تلاقوا تغطية كويسة على النت ودي التغطية الوحيدة الكويسة، الاعلام مش مغطي ولا معبرنا، اكتب على اليوتيوب سيول مصر سيول العريش لو كتبت سيول اسوان مش ح تلاقي فيديوهات كتير بس اكتبها برضه يمكن حد ينزل فيديوهات

فيه حد في سيناء بيقول مافيش اي اثر للصليب او الهلال او حتى الشمعدان الاحمر

فيه واحد من الصعيد بيقول برضه مافيش اثر للدفاع المدني

وطبعا احنا مش عارفين لان مافيش تغطية كويسة، مافيش غير الفيديوهات اللي على النت، انا باقول لكوا اللي الناس بتقوله ومش لازم يبقى صح ومش لازم يبقى غلط، بس مع تجاهل الاعلام يبدو انه صح

مين بقى دعى علينا؟ انا مش قلت بطلوا دعا علينا؟ يعني ح تستفيدوا ايه لما نبقى عبرة خلقه؟ ادعوا لنا بالصلاح والهداية احنا مقصود انه يتم عزلنا عن محيطنا عشان فيه حد معين عايز يستفرد بينا

يعني مثلا لو مصر لا قدر الله كانت انضربت السنة اللي فاتت كانت الدنيا اتقلبت في العالم العربي وما كانتش ح تعدي بالساهل لانها بقى القلب والنني، السنة دي بعد الحملة المنظمة اللي قادها علاء وجمال مبارك والفرقة الماسية بقيادة احمد عز عشان يكرهوا فينا طوب الارض لو اي حاجة حصلت لنا الناس ح تقول يغوروا في داهية، انا باتهمهم بحاجة؟ ماعنديش ادلة غير تصرفاتهم، مين مصلحته ان مصر تبقى مكروهة من محيطها ومافيش عين تبكي عليها لو حصل لها حاجة؟ طيب مين اللي بيعمل كده؟ اكيد مش الجزيرة، مش ذنبها الجزيرة انها بتنقل الاخبار والتصريحات الفضيحة اللي بيقولها ابو الغيط، ذنب اللي بيعمل الاخبار، مين اللي بيعمل الاخبار؟ مين اللي بيقود حملة منظمة عشان يقول تصريحات ويعمل تصرفات تبين ان مصر دي ام الهطل وعلى السادة المقيمين خارجها مراعاة الظروف اللي احنا فيها؟ مافيش حد غير اسرائيل.. وش كده بقى
لما علاء مبارك يعمل كام مكالمة يهبل فيهم ويكره فينا كل محيطنا ماحدش مستفيد غير اسرائيل
لما جمال مبارك يقود حملة لاحياء القومية الفرعونية عشان يعزل مصر عن محيطها ماحدش مستفيد غير اسرائيل
لما احمد عز يهدد قطاع غزة بان مصر ح تضربه عسكريا ماحدش مستفيد غير اسرائيل وهو عارف اننا لا ح نضربهم ولا نيلة بس بيعملوا زي البرص يبخوا في الملح ما يسموش بس يربوا عداوة
انا مش عارفة، هي اسرائيل ناوية تعمل فينا حاجة؟ الظاهر انها ناوية تعمل فينا حاجة، والظاهر انه مش السنة دي، بس هم قالوا لنا في وشنا ان مصر "الجائزة الكبرى" والجائزة الكبرى دي مش ح تقع بالساهل كده الا كل الناس تكرهها ومهما يحصل لها وللا تصوت ماحدش ح يسأل فيها
وحملة ثلاثي اضواء المرسح جابت نتيجتها لما مذيع مصري قال للعيب كرة تونسي: طبعا فوز مصر فخر لكل العرب فاللاعب التونسي (اللي انا طبعا مش فاكرة اسمه) قال له مال مصر بقى ومال العرب؟ انتوا مش قلتوا القومية العربية ماتت واحنا مش عرب؟ خليك في مصر افرح بيها بقى
الحاجة التانية، معلش يا اخوتي في الوطن احب ابشركوا ان برضه ماحدش متعاطف معانا في موضوع السيول ده، بيجيبوا سيرة غزة اكتر، ويمكن خايفين يجيبوا سيرتنا لبعدين نشرشح لهم: ااااه انتوا بتقولوا عندنا سيول؟ لااااااا مش احنا اللي عندنا سيول، شوفوا قطر، شوفوا ايران، مش مصر اللي يبقى فيها سيول
بجد الخطاب السياسي المصري خطاب كأنهم قاصدين ان كل الناس تكرهنا وما يبقلناش حد في الدنيا كأنهم قاصدين يضرونا او بيحضرونا لحاجة وعايزينا نبقى مقطوعين عن العالم لخطة معينة بتتعمل لنا، كأنهم قاصدين يقولوا كلام مجانين عشان الناس تضحك علينا وتقول المصريين اتهبلوا
انا باقول لكوا من دلوقت عشان لو حان موعد استلام الجائزة الكبرى وقعدنا نصوت وماحدش سأل فينا ما تتفاجئوش، الا اذا حاولنا نصلح من الطين اللي عمله الحرس الجديد في الحزن الوثني، ولازم نبتدي نصلح من دلوقت
واحمد عز ده انا عايزة اعرف ايه اللي بينه وبين مصر؟ بيكرهها ليه؟ احنا عملنا له حاجة؟ الراجل عايز يبيع اثارنا ويقنن بيع الاثار، هم خلاص البلد اتباعت كلها مش لاقيين حاجة يبيعوها غير الاثار؟ وبعد كده ح يقفونا ويقولوا لنا ارقصي يا جارية؟ انا عايزة اعرف ايه حكايته الراجل ده؟ مش ممكن غبي، ده مهندس، يعني جايب مجموع في الثانوية العامة، ايه اللي بيعمله ده بالظبط؟ هي اشاعة ان امه يهودية دي صحيحة؟
والنبي والنبي والنبي ماحد يدعي علينا، والنبي، بالذات الفقرا والمظلومين والمجاهدين عشان ربنا بيستجيب لهم، والنبي تدعوا لنا، احنا اسرى وزي ما الشيخ القرضاوي قال احنا في كابوس كبير، والنبي تدعوا لنا بفك الكرب وصلاح الحال، ما احنا لو اتوحدنا واتاكلنا مش ح تستفيدوا حاجة، ربنا يخلصنا من العصابة دي على خير
ده فيه مصريين شمتانين في مصر... هو فيه كده يا ناس؟

13 comments:

شخص افتراضي said...

الكارثة أنهم بعد كل الإهمال والتجاهل ده لما ييجي وقت الحساب يلوموا البدو على ضعف انتماءهم لمصر ويلوموا الصعايدة على إيواءهم للحركات المتطرفة

* Alwaan * said...

تغطية الدستور :

الأمطار والسيول تحاصر محافظات الجمهورية وتؤدي لهدم المنازل وإغلاق الطرقات

http://dostor.org/society-and-people/variety/10/january/19/3511


الرئيس مبارك يرفع تعويضات المنازل المتهدمة بأسوان جراء السيول إلى 25 ألف جنيه


http://dostor.org/politics/egypt/10/january/20/3588


بالصور.. السيول تدمر المنازل والطرق وتشرد العشرات في أسوان وسيناء والبحر الأحمر


http://dostor.org/politics/egypt/10/january/20/3600

شخص افتراضي said...

إنما إيه حكاية أن أحمد عز أمه يهودية
هو كل واحد يخون البلد ياتطلعوا أمه يهودية يا إما جدوده يهود؟
يوسف والي قلتوا جدوده يهود
وأحمد عز
وامبارح صديق عربي قال لي أنه سمع حد بيقول أن مبارك نفسه من أصل يهودي

هو الواحد ماينفعش يبقى واطي كده منه لنفسه
يعني من غير ما يبقى في عروقه دم صهيوني؟

جبهة التهييس الشعبية said...

انا باتكلم على تغطية الفضائيات
مافيش فضائيات مغطية خالص

بالنسبة لاحمد عز

ههههههههههههه انا والله سمعت الاوشاعة دي من سنتين وطنشت قلت المصريين بيكرهوه وطلعوا امه يهودية

بس انا شاكة فيه فعلا
يعني ايه يبيع الاثار ويهدد غزة بعملية عسكرية

لا حد يدور لنا وراه ده بقى، ليكون رافت الهجان بالمعكوس

جبهة التهييس الشعبية said...

وبعدين ده بيكرهنا
ماهواش بيحب البلد وله وجهة نظر تانية مختلفة عننا
ده بيكرهنا

lastcrazyboys said...

http://www.youtube.com/watch?v=DIaqM5pFBNA

ده بالنسبــة لسيــول جدة الي كانت في العيد اللي فات

وزي مانتي شايفة شعــار القناة السعودية منور الشــاشة
والمسؤولين عن الموضوع اتحــولوا للتحقيق ..والملك أشــرف عالتحقيق بنفســه
وطبعـا التعويض اللي اتصــرف مش هقــدر اقول عالرقم ..عشان الاصــوات اللي بتصــدر من الناس وهي بتقــرا

انا بس حبيت اوضح ..ان المفــروض انــنا عالم تالت سوا سوا
ودول حبايبنــا اللي استــوردنا منهم الجلاليب القصيرة والسواك والعمامة والنقاب
فيييين بقى ساعة الازمات
سيبــك من كــل ده ..الموضوع ده حصل ايام الحاج ..وبرضه محصلش تعتيم اعلامي ..مع انه كان ممكن يتحججوا بنقل المشــاعر

====

في حاجة كمان : انا سألت وطلع فعلاً ان
أمه يهوديـــة ..وأبـــوه أرمني ..وياهووو

هع هع هع
دي حتى كاشــاعة ..مالهاش معنى..جبتيها منيـن
ايه الدماغ اللي بتيجي مع المصايب دي

مواطن مصري said...

احنا في صراع مع الماسونية

و قطر و امير قطر جزء من العائلة الماسونية و بتستخدم الاعلام

العربي لتفتيت العرب و اشعال الفتن

العرقية و الاقليات

برنامج زي الاتجاة المعاكس

اظهار مصر بمظهر العدو

تقليب الراي العام العربي على مصر

انها معركة ضد الماسونية يا نوارة

الخوجة said...

;كل الفيديوهات عن العريش
والجريمة الاسرائيلية الجديدة والغردقة وشرم الشيخ لسه اسوان اظاهر مافيهاش نت خالص
ولا العملية سكتم بكتم لحجم الماساة

سيول مصر - سيول العريش - سيول اسوان - سيول سيناء - سيول شرم الشيخ - فيضانات غزة- Sinai floods

ehabafndy said...

بصراحة أنا مختلف معاكى فى نظرية إنهم هيضربونا أو هيعملو فينا حاجه أعتقد إن أى حد يحتل مصر أو يفكر فى الموضوع ده يبقى غبى جدا أعتقد إنهم مش ممكن يعملوا كده حتى لو كانو قادرين عليه بالعقل كده يحتلونا ليه و يشيلوا همنا شعب طويل عريض و ناس جعانه و عايزه تعيش و بنيه أساسيه متهالكه يعنى هم على هم هما مش عايزين مننا أكتر من إلى بيحصل دلوقتى يبقوا محتلينا و فى نفس الوقت سيبنا نشيل همنا و نعيش مشاكلنا بنفسنا مفيش أحسن من كده هو ده أحسن و سيلة إحتلال ممكن تكون فى التاريخ مصر أحتلت كتير و الإنجليز قعدوا عندنا أكتر من سبعين سنه و لما مشوا سابوا حاجات وراهم لسه موجوده لغايه دلوقت و كان الناس عايشين أيامهم فى حال أحسن من إلى إحنا عايشين فيه دلوقت أعتقد إننا دلوقتى فى ظل الظروف الراهنه نعيش بالفعل أخطر و أصعب و أعقد حالات الإحتلال إلى ممكن تكون عدت على مصر من أكتر من سبعتلاف سنه

yousef said...

لا يا نوارة ما حدا ممكن يشمت في المصريين لأن الناس مش أغبياء

وزي ما الناس بتسمع احمد عز وجمال مبارك برضه بتسمع ابراهيم عيسى وفهمي هويدي وكل ابناء مصر الشرفاء

الله يخلصكم من العصابة اللي عندكم ويخلصنا من العصابات اللي عنا

تقبلي تحياتي

مواطن مصري said...

البابا شنودة يستقبل السفيرة الأمريكية فى زيارة «تهنئة متأخرة» بعيد الميلاد.. و«سكوبى»: قلقون بشأن الاعتداءات الأخيرة


http://www.almasry-alyoum.com/article2.aspx?ArticleID=241026&IssueID=1657

دة هما شكلهم بيحضرولنا التمام دلوقتي اربتي دة ب التقرير الي انا جيبتهولك

مواطن مصري said...

مصافحة نادرة بين مسؤولين إيرانيين وإسرائيليين في إسبانيا

ذكرت تقارير صحفية من العاصمة الاسبانية أن مصافحة نادرة حدثت بين وزير إسرائيلي وآخر إيراني أثناء مشاركتهما في معرض للترويج للمواقع السياحية في بلديهما.

وحدثت المصافحة بين وزير السياحة الاسرائيلي ستاس ميسيجنيكوف ونظيره الايراني اثناء حفل استقبال اقامه ملك اسبانيا ضمن معرض مدريد للسياحة.

وأعلن الاسرائيليون أن مسؤولا في منظمة السياحة والتراث الثقافي الإيراني المشارك في المعرض قدم دعوة للوزير الإسرائيلي للقيام بزيارة إلى ايران ومشاهدة الآثار التاريخية الإيرانية عن كثب.

ثم وقف الوزير الإسرائيلي إلى جانب رئيس منظمة السياحة والتراث الثقافي الإيراني وتصافحا خلال افتتاح المعرض.


http://www.alarabiya.net/articles/2010/01/21/97959.html


فهمتي اللعبة هتمشي ازاي

شمس العصارى said...

خلى بالك الفيديوهات دى بتصور جزء من الواقع يعنى مش كل البهدلة الى حصلت اتصورت
و هو من امتا الاعلام الحكومى الموجه بيقدم حقيقة
يا الله كل ده حصل
و من قبله خلال السنين الى فاتت زى سيول 93،94
المشكلة ان الناس دى لسه بتدى صوتها لمبارك و لسه محترمين الحكومة
الحل الامثل هو الحل على طريقة البدو
على فكرة انا حاسس من كلامك عن عز و الى بيحصل فى شلة الحكم الحرامية انك بدئتى تبطلى طيبة
نلتقى بعد المطر