Saturday, 2 January 2010

بنشكر الاخت سوزان ومازال مركز هشام مبارك في انتظاركوا

طبعا مركز هشام مبارك دول ايه؟ دول مركز قانوني، غير ربحي، وربما يكون خساري، يعني ايه؟ يعني كل غلبان مظلوم باع اللي وراه واللي قدامه على محامين نصابين وقضيته مافيهاش مكاسب: مافيها شو اعلامي، بنط سياسي، سبوبة تبعتها للممول وتقول له انا باشتغل في القضية دي.. بيروح فيييين؟ مالوش غير مركز هشام مبارك ابو الغلابة. هو ده اللي بيجري له في قضيته، ولامم شوية محامين وموظفين وحتى السعاة من اللي هم بتوع الانسانية والوطن ونحن فداهما والكلام ده اللي بيقولوا عليه بتاع الستينات وبقى مودا قديمة ده. وما اكثر الغلابة المظاليم في مصر اللي قضاياهم ما تكسبش كاميرا ولا تمويل بس مظلومين.
لزومها ايه المقدمة دي؟ عشان بس اقول لحضراتكوا ان مركز هشام مبارك دول ماهماش ناس صيع ولا فاضيين ولا قاعدين يقشروا بصل عشان اقعدهم بمنتهى البجاحة مني ومن غير ما يستفادوا مني ابيض ولا اسود عشان يستلموا التوكيلات من حضارتكوا، هم مش محطة بنزين ولا بوابين، هم بيعملوا كده بجملة الانسانية وخدمة البلد اللي واكلة لهم دماغهم وساعة الجد ماحدش ح يفتكرهم ولا يعبرهم بشكرا اللي هم عادة مش بيستنوا خمس ثواني على التليفون عشان يسمعوها، بيقفلوا في وشي على طول قبل ما اقولها (مش عارفة ايه حكاية القفل في وشي دي؟ ده كلهم بيعملوا كده: طب شكـ... تووووووت)

الاساتذة خدامين الانسانية ببلاش وكأن الانسانية دي ماسكة عليهم صور مخلة اللي قعدتهم، غصمانية واقتدار، مربوطين مستنيين وعاملين ملف مخصوص لجمع التوكيلات ما وصلهمش الا توكيل واحد من الاستاذة سوزان اللي انا ما اعرفهاش وباشكرها اشد الشكر وانا برضه قلت الجدعنة دايما سابقة في الحريم، لا ويا عيني منبهين على الساعي لو جه الصبح ولقى توكيلات من تحت عقب الباب يشيلها عشان يحطوها في الملف
طيب
انا ان شاء الله ح اعدي عليهم بكرة الاحد 3 يناير الساعة اربعة العصر اخد التوكيلات او التوكيل واوديه المعادي للاستاذ ابراهيم يسري اللي برضه مش بياخد فلوس لا من جوة ولا من برة على الشغلانة دي ده بيعملها، في سنه ده وربنا يديله الصحة ويخليهولنا، لوجه الله وفي سبيل الوطن، واللي ح الاقيه ح اخده، والله مافيش الا التوكيل بتاع الست المرجلة دي البركة في القليلة وهي كسبت القضية من قبل ما ترفعها، فيه غيره خير وبركة، انا لما عملت التوكيل ما اخدش مني نص ساعة يعني
والمعلومات تاني اهي، انا حفظتها من كتر ما كتبتها:
رقمك القومي. توكيل عام قضايا للمحامي ابراهيم يسري سيد حسين، المحامي بالنقض، العنوان 11 شارع 213 دجلة المعادي. 
وتروح 1 شارع التوفيقية مركز هشام مبارك الدور الخامس تسلم التوكيل. آخر معاد اللي هو ح اروح فيه ان شاء الله، اربعة العصر بكرة الاحد 3 يناير.
او
تيجي بنفسك مجلس الدولة يوم الاثنين 4 يناير الساعة تسعة الصبح، ومجلس الدولة يقع في الدقي
بس هو غالبا الناس بعتت على عنوان السفير ابراهيم يسري بالبريد السريع بقى على طول، غالبا كده ان شاء الله


25 comments:

زقزوق said...

احط صورة البطاقة مع التوكيل؟

مواطن مصري said...

مش حماس رجعت تاني لمخها و هتمضي المصالحةفي مصر

Amr said...

نواره
هو ممكن يحصل لعب فى التوكيلات دى - وماتوصلش بأى طريقه من الطرق ؟

أزاى توكيل واحد ؟
انا مش قانونى بس حاسس انه فيه حاجه مش مظبوطه

مى said...

مجلة ويكلي بول


تجري إستطلاعاً حول


من السبب الرئيسي في المشاكل في العالم



الخيارات

الأول - - - - - - - أمريكا

الثاني - - - العالم الإسلامي

الثالث - - - - - - إسرائيل

الرابع - - - - الأمم المتحدة

الخامس - - - - - لست متأكداً


http://www.qsoftonline.com/weekly-poll

يرجى التصويت

جبهة التهييس الشعبية said...

لا مش لازم صورة البطاقة

لا مش ممكن حد يلعب في التوكيلات وما توصلش

Abu ShoSho said...

يعني سوزان مبارك مش كفاية عليكي

سكوت هنصوت said...

نوارة

انا سمعت ان خديجة سابت جمال من 3 شهور

تعرفي حاجة عن املوضوع ده؟؟

هو صحيح حاجة كده على هامش السياق

بس برضه....نحب نعرف...دي العيلة الاولى يا ناس مش التانية ولا التالتة

wahat_alshohada said...

يا سلام يا عمرو انت ونوارة والله عسل
واحدة تقول اة اكيد اتبعتوا على عنوان سيادة السفير والتانى شاكك ان فيه توكيلات ما وصلتش!! ليه و انتم كنتم بتحلموا باكتر من 3 توكيلات مثلا
بكرة نوارة هتروح و لو لقيت 5 يبقى ربنا نفخ فى صورتنا
احنا شعب جبااااااااااان
والاعتراف بالحق فضيلة
انا رايحة بنفسى يوم الاتنين
ان شاء الله
اللى يروح بقى - دة لو حد راح اساسا- مايتكلمش هناك رايح ليه لو حد سأله

مهندس مصري said...

مواطن مصري
===========
عباس كان بيكذب اصلاً
و حماس ما قالتش انها مش حتمضي ورقة المصالحة في مصر
دي كانت كذبة من عباس و حماس نفتها فوراً
ما تفوق بقى :)

حماس معترضة على الإضافات اللي مصر أضافتها لورقة المصالحة تحت ضغط امريكي
لإن حماس رافضة الإعتراف بشرعية إسرائيل و أوامر الرباعية الدولية و مصر عايزاها تعترف بده رغم إنه ضد برنامج حماس اللي فازت على اساسه في الإنتخابات

فالإعتراض على بعض بنود الورقة مش على مكان توقيعها

دي ورقة خاصة بالصلح بين فتح و حماس يبقى إيه اللي حشر سيرة إسرائيل فيها ؟ !!!!!!!

مهندس مصري said...

في موضوع التوكيلات رأيي من رأي إيمان

Amr said...

؟!شعب جبااااااااااان
wahat_alshohada
أعتقد لو حضرتك متابع أخبار أو ليك أصدقاء عمال فى مصنع أو شركه
لو أتضايقوا من حاجه أول حاجه هاتنط فى دماغهم وقفه أحتجاجيه أمام جهة المصلحه اللى عايزين ياخدوا حقهم منها
بالله عليك ياشيخ بطل النغمه بتاعة شعب جبان شعب مش عارف أيه
مش بنقول هانعمل ثوره برتقاليه بكره الصبح

بس على الأقل شعب نايم بقاله عشرات السنين ظهرت حاجات بتقول أن فيه شريحه كبيره منه عرفت الطريق
وبدأت تشتغل فيه .

مواطن مصري said...

اسرائيليون يتظاهرون دعما لرفع الحصار عن غزة


استبق المئات من ناشطي السلام الاسرائيليين قرار مصر فتح معبر رفح ونظموا مسيرة في تل ابيب لمناسبة ذكرى مرور عام على الحرب التي شنتها اسرائيل على قطاع غزة.
وكانت تلك الحرب التي استغرقت ثلاثة اسابيع قد اسفرت عن مقتل ما يزيد عما يزيد عن 1400 غالبيتهم من المدنيين والاطفال، كما سقط فيها ثلاثة عشر اسرائيليا.
اما شعار المسيرة فقد كان حرروا غزة ، وقد رفعه الناشطون خلال مسيرتهم مساء السبت في تل ابيب، تزامنا مع الذكرى الأولى لتلك الحرب، واحتجاجا على الحصار المفروض على القطاع، الذي تسيطر عليه حركة حماس.

http://www.masrawy.com/News/MidEast/BBC/2010/January/3/1152386.aspx

هما دول مش هايجو مصر يتظاهرو ب المرة يعني ؟

Amr said...

جامده قوى لما واحد ييجى يشترى منى فيلا او شقه
نتفاوض و أظبطله العقد وكله تمام

ييجى يوم التوقيع أحطله بنود وشروط جديده أقلها يخرب بيته وأقوله أمضى الأول وبعدين نتفاهم على الشروط دى

زقزوق said...

بعت التوكيل والمفروض يوصل بكرة الصبح
كان فى نيتى ابعت خمسه ستة بعد ما اقنع عدد من زملائى فى الشغل لكن اتضح ان رايهم فى الغزاوية الاتى
نساونجية .. حريمنا هناك فى غزة
اسرائيل بتديهم اسلحة وهيروين بيهربوها فى الانفاق
كلهم خونة ولاد كلب ويستاهلوا اللى جرالهم

زقزوق said...

مواطن مصرى عمرة كام ؟
اشك انه اكتر من 15 سنة

مى said...

إمتناع حماس عن التوقيع على الورقة المصرية كان لثلاثة أسباب


1
إضافة أوراق للمصالحة لم يتم الإتفاق عليها



2
إزالة بنود كان قد تم الإتفاق عليها



3
تغيير عبارات كان قد تم التوافق عليها
بحيث تخرج الأمر عن مضمونة




و برغم ذلك و بناءً على ما يتم تسريبه من معلومات

عن قرب قيام الصهيونى بهجمة جديدة على قطاع غزة
يتم الإعداد لها بعد الإنتهاء من الجدار الفولاذى



بدت حماس حريصة هذه الأيام على تفويت الفرصة .. و مستعدة لعقد المصالحة

مع محاولة تحسين شروطها إن أمكن


و ذلك حتى تفوت الفرصة لمن يلصقون كل خطايا الصهيونى و يبررونها بالإنقسام
!!

مى said...

هناك موقع لجمع مليون توقيع ضد الجدار



http://www.amlalommah.net/nogedar/

lastcrazyboys said...

تعيين أحمد زكي بدر وزيرا للتعليم

ردا على ماجاء في المدونة دي..ونداءات طلبة جامعة عين شمس

http://no4kosa.blogspot.com/2007/11/81-23-23.html

wahat_alshohada said...

اخى زقزوق
اولا جزاك الله خيرا
ارجو ان ينال زملائك فى العمل الذين يفترون وهم فى قمة الجهل والغباء على
اخواتنا فى غزة مثل ما نال اهل غزة
ويزيدهم الله عليه ولا يتقبل منهم جزاء على حقدهم و كرههم لاخوانهم المسلمين و الاسلام منهم براء. وفى انتظار اخبار نوارة

يساري فلسطيني said...

شو اخبار التوكيلات ... سوزان ولاضبع ... تحياتي و متابع

---------------

الشعب المصري مش جبان ... هو شعب غلبان و لكنه عندما ينفجر تعود ذكريلت 77 و الامن المركزي

و بخصوص زقزوقققققق

مش عارف ارد يا نوارة و لكن اصحابه مدعون لزيارة غزة ... و علنا عهد انهم يرجعو .... ولا بلاش .. عيب

shimaa mahdy said...

ازيك يا نوارة
أنا إن شاء الله هروح بكرة الصبح مجلس الدولة
بس هو أنا المفروض أعمل ايه أول ما أوصل
يعنى انتم هتجمعوا على السلم ولا هتتقابلوا فين
شيماء

koko said...

الشهر العقارى نزل حوافز للعاملين وربطها بشرط انها تتشال لأى موظف يعمل توكيل لمركز هشام مبارك طبعا الموظف خايف على القرشين اللى هياخدهم حصل ده فى الشهر العقارى فى الاسكندرية

koko said...

الشهر العقارى نزل حوافز للعاملين وربطها بشرط انها تتشال لأى موظف يعمل توكيل لمركز هشام مبارك طبعا الموظف خايف على القرشين اللى هياخدهم حصل ده فى الشهر العقارى فى الاسكندرية

Amr said...

أنا قلت فيه حاجه غلط

علياء said...

صدقت استاذة مي فى تحليلك
لكن للأسف بدء مطبلاتية النظام فى الإساءة لحماس و بأنها رضخت و أدركت الحكمة الرئاسية المصرية فى النهاية
:)

و عجبى