اراكم غدا في مجلس الدولة ان شاء الله

انا رحت قابلت السفير ابراهيم يسري، ربنا يديله الصحة ويخليهولنا، الراجل ده نعمة من ربنا، بيقول لي: انا حضرت كل العهود من ايام الملك عمري ما حسيت اني خجلان زي النهاردة، بس احنا مش ح نسكت، ومش ح اسيب بلدي ابدا

بكرة ان شاء الله في مجلس الدولة الساعة تسعة الصبح ما تنسوش

آه، بالمناسبة، الجزائريين العبط بيشجعوا مصر... وانا مش معاهم، اتفضلوا الخبر ده، هي الناس دي ايه؟ اذا كنت انا زعلت لهم ومش مشجعة منتخب مصر في حاجة تاني ابدا ولا بلي مسافات طويلة، اقوم انا اسخن لهم وهم يشجعوا المنتخب المصري؟ على رأي عوكل: يا ولاد المجانييييييييييييين يا ولاد المجانييييييييييييييين

انا مش ح اتدخل بين الاتنين دول تاني بقى، المصريين والجزائريين يعني، يستاهلوا بعض
---
اتحاد علماء المسلمين يجرم بناء الجدار ويقول انه عمل شنيع 
------
حد يفهمني ايه الخبر ده؟ الولية لانجليزية اللي اتجوزت عمر بن لادن بقى اسمها زينة ورايحة ايران عشان تقابل بنت بن لادن اللي وصلت ايران ومقيمة هناك بعد ما هربت من افغانستان، ماحدش يسألني باتكلم عن زينة كده ليه؟ ما باحبهاش، مش عارفة ليه ما باحبهاش، من اول ما طلعوا صورها وقالوا ابن بن لادن ح يتجوز دي وشفت صورتها اتقبضت منها كده مش عارفة ليه؟ واتضايقت منه، خلاص؟ البنات الحلوات في السعودية خلصوا يعني؟ مش عارفة ليه حاسة انها جوازة كده غريبة، وبعدين دول بيتجوزوا ليل نهار اشمعنى الجوازة دي اللي كان عليها تسليط الضوء ده كله؟

انا عارفة ان ايران بتنقل عوائل المقاتلين العرب اللي في افغانستان، امهاتهم وزوجاتهم وبناتهم واخواتهم، وبترجعهم بلادهم، بس الاخت زينة ايه اللي حشرها؟ وعمر نفسه ما يروحش يجيب اخواته ليه؟ وايه يعني؟ من امتى عيلة بن لادن حريمهم سايبين كده وطالعين في الاعلام؟ اذا كنا ما نعرفش شكل بنت الراجل نفسها، ثم ايه زينة ده؟ مين اللي سماها زينة؟ وبعدين ايه علاقة زينة بايران بالقاعدة بالسلطات السعودية؟ ايه اللخبطة دي؟
وبعد ده كله، الراجل عايش وللا ميت؟ ماله خفيان كده؟ ليكون مات، الامريكان (الناس العادية يعني) اللي باعرفهم مقتنعين انه مات وان حكومتهم بتضحك عليهم، وهو كان عنده فشل كلوي، طب لو مات مش قايلين ليه؟ امريكا مش بتقول عشان عايزة تقعد في افغانستان، طيب القاعدة مش بتقول ليه؟ ولو ما ماتش راح فين؟
ثم بقى برضه انا مش عارفة زينة دي ايه اللي طلعها لوحدها في الموضوع، صفتها ايه يعني تسافر ايران "لتحريك ملف" بنات بن لادن، كل الشحطة اللي بشنبات دول مش ح يعرفوا يعملوا اللي هي ح تعمله؟ 
هي مخابرات وللا ايه؟