Thursday, 14 January 2010

ما تسكتيش يا جورجيت، وانا معاكي

ماحدش بيشجع جورجيت، وانا مش معاهم، الناس متخوفة منها عشان هي من الحزب الوطني وبيقولوا الحداية ما بترميش كتاكيت
بس انا ليا اللي هي بتقوله، قد تكون اخدتها الجلالة زي ما مينا بيقول، قد تكون مطبخة زي ما تامر بيقول، قد يكون: اللهم اهلك الظالمين بالظالمين زي ما وائل خليل بيقول
بس انا مش قادرة اشوفها بتقول الحق وما اتضامنش معاها، طبعا انا ما اقدرش اعمل لها حاجة، انا تفة يعني ايش اكون، بس مش اقل من اني اعلن تضامني مع موقفها
وانا مش قادرة اقاوم الاغراء: ست صعيدية مسيحية واقفة لوحدها قدام الداخلية والكنيسة والحزب بتاعها، انا قلت لهم على التويتر دي ناقص يبقى فيها اصل فلسطيني لجد جزائري شيعي متنصر وعضوة في حماس وعندها تينيا وح يبنوا جدار حوالين بيتها
وباقول ان اي مساس بجورجيت قليني ح يبقى المرة دي مكشوف
يعني: لو صحينا الصبح ولقيناها بتقول هالله ع الجد والجد هالله هالله عليه انا حسحس وحسحس انا ونفاجأ انها طالعة عمرة زي ما كرليس استشهد بحديث "سيدنا محمد عليه السلام"  ح نعرف انها اتهددت ومش ح نسكت
لو صحينا الصبح ولقينا مسجل خطر، اخوان مسلمين، سلفي، سعودي، ايراني، صعيدي، قناص حمساوي، عضو في خلية سرية لحزب الله، مختل عقليا، مهووس جنسيا، منحرف نفسيا، اجرب حزين، قاتلها ح نعرف مين اللي قتلها ومش ح ياكل معانا
لو صحينا الصبح ولقيناها متلفق لها قضية فساد وللا سرقة وللا مخضروات وللا دعارة روسيات وللا تهريب سلاح لحماس وللا عمالة لايران وللا تجسس لصالح هاييتي وللا تشجيع لفريق الجزائر ح نعرف برضه مين اللي عمل كده
خلاص بقى، احنا مش ح ناخد خمستاشر قفا على سهوة
بس انا ليا طلب عن جورجيت قليني، الستاشر اسرة الله يخليك.. مش منيمني الليل
ولو طلعت بتضحك علينا ومطبخينها زي ما بيقول تامر ملحوقة يعني، احنا رحنا فين؟


9 comments:

شمس العصارى said...

اول مرة اعرف ان جورجيت صعيدية
بس مش غريب على ادائها و كلامها فى المجلس
المهم حتى لو هى تبع الجزب بس هى دلوقتى انتمائها الدينى فوق انتمائها الحزبى
و ده شئ كويس
و بما اننا ضد الحزب الوطنى فانا مع جورجيت و لما يفهلوها من الحزب ده شرف كبير ليها
بس خلوا بالكم فعلا هى محتاجة وقفة و خصوصا من المثقفين لانها ممكن تخسر كل شئ كلامها ده
ربنا مع الحق و ربنا مع الى مع الحق و قبل كده احنا مع ربنا

حكاية مكررة said...

اتوقع هناك تواطؤ من الحكومة لصرف النظر عن سور غزة وشياء اخرا.

اللهم احرس وحفظ مصر وشعب مصر.

tasneem2030 said...

شكلها متطبخ زى ما قال تامر


نفت النائبة جورجيت قلينى تلقيها أى تهديدات من أى جهة داخلية أو خارجية، مؤكدة أن خلافها مع أعضاء الحزب الوطنى كان علنيا فى جلسة المجلس المذاعة، وأنها لم تتدخل فى اى حوارات مع الأعضاء بعد انتهاء الجلسة.

هذا وقد أضافت جورجيت أن الاتصال الوحيد الذى تلقته من الحزب الوطنى عقب الجلسة كان من قيادى وطنى بارز، رفضت ذكر اسمه، استنكر موقف أعضاء الحزب الوطنى والنواب المعارضين لموقفها الأخير من أحداث نجع حمادى، مشيدا بمجهودها وإخلاصها للوطن.

هذا وقد صرحت جورجيت لليوم السابع أن هذا القيادى البارز قد قال لها مداعبا "يلا اختارى الدايرة اللى عايزة تنزلى فيها الانتخابات دى" فأجابت قلينى "أنا مش هختار حاجة". وتعلق جورجيت أن هذه الرسالة تنفى ما تناقلته بعض الصحف والمواقع حول وجود مباحثات الوطنى لمنع قلينى من المشاركة فى الانتخابات، وتؤكد أن الحزب الوطنى يدعمها.

http://www.youm7.com//News.asp?NewsID=177858&SecID=97&IssueID=93

SpoiledEgy said...

هى دلوقتى انتمائها الدينى فوق انتمائها الحزبى
و ده شئ كويس

Are you serious?!
No that is not a good thing, any PM should shape his or her points of view based on his love to his country not to his religion. I am also sure that she is speaking as a representative of Egyptians and not only Egyptian Christians because if her version of the story is the true one then this is a disaster made to hurt us all.

I respect her for defending what she perceived to be the truth of what happened but I sure hope that every time we have a PM doing so its because that person is defending what is best for the ppl of this country and not the ppl who follow the same religion only.

The same applies to the governor of Quena, he should say the truth and not what pleases the ruling party and not what pleases the Church. We all, Egyptians regardless of our religious believes deserve that our officials tell us the truth uncolored with their own religious ties.

wahat_alshohada said...

معلش سؤال غلس عادى
SpoiledEgy
وغيره - غيرها ليه بتعلق - بتعلقى بالانجليزى
النبى عربى

SpoiledEgy said...

Because I do not have an Arabic Keyboard. Wish I had one but Im using a mac and it doesnt support Arabic.

soreal said...

"شعرت عندما جاءت إلي نجع حمادي بأن هدفها الوقيعة بيننا.. صحيح (ناقصات عقل ودين)،."

كل اللي أقدر أقوله هو
لا حول و لا قوه إلا ب الله
حسبي الله و نعم الوكيل

شمس العصارى said...

SpoiledEgy
ايوه انا جاد و ارى ان كلامى منطقى
جورجيت انفعلت بشدة و خرجت عن سياسة حزبها لان القتلى مسيحيين – و ده حقها بكل تاكيد- هو احنا حنحجر على الناس مشاعرها و هى مستاءة جدا و كمان احنا مستاءين من قبل ما نشوف كلامها
و الدليل على انها انفعلت للمسيحيين – بناكد تانى مرة ده حقها و حق المسيحيين ان ينفعلوا- الدليل انها اى جورجيت او اى عضو فى الحزب الوطنى لا يأبهمون للقتلى من البدو او النوبيين او يابهون لاعتقال و تشريد اصحاب الراى ولا يابهمون بمعتقلى الاخوان – الا مش كل الى ذكرتهم انا دول مصريين .... طيب ليه محدش بيتكلم عنهم
واقعيا فى مصر لا احد يتحدث عن اناس غير انتمائه الدينى - ده واقع ولا حنقول وحدة وطنية و نمثل – و كمان لا احد يتحدث عن اناس غير انتمائه الفكرى و السياسى - الا القليل جدا – و مصر قدامكم و شوفوها
ام السيد محافظ قنا فهو عبد النظام كما غيره من مسئولى الدولة و عن مفسى لا انتظر منه شئ
على ما يبدوا انك – ى لا تعيش-ى فى مصر و ده واضح من الابل ماكنتوش هههههههههههه
انا لم اتجنى على جورجيت لما قلت انتمائها الدينى زاد عن انتمائها السياسى – فى الموقف ده كلامى صحيح و انا معاها مش ضدها فى الموقف ده
من قناعاتى ارى ان حينما نعود للاسلام و نطبقه حينها و حينها فقط يجد المسيحيين ما يفقدونه الان
ــــــــــــــــــــــــــــــــــــــــــــــــ
شوفغتى يا نوارة بلد القانون اهم قبضوا على الى رايحين يعزوا
قلتلك قبل كده سلميلى على القانون و الحزب و النظام

شمس العصارى said...

بالاشارة لكلام كتير من المعلقين او حتى كلام نوارة زى ما كتير قالولها
" ان الموضوع مطبوخ و ان الحداية مش بترمى كتاكيت "
عن نفسى لا اعتقد ذلك
لان مش ممكن الحزب يستخدم احد اعضائه المسيحيين فى اثارة عواطف كل المسيحيين و تحريضهم على المطالبة بالحقيقة ول الحقيقة ظهرت يبقى دى بداية النهاية لعلاقة الحزب بالكنيسة
و لو الموضوع مطبوخ و متفبرك كان فى امكان النظام و الحزب جعل كباراته المسلمين ينزعجون و ياخدوا شوية قرارات عقابية ضد المسئولين و او كان ضحى بالمحافظ المسيحى لامتصاص غضب المسيحيين
كل الاحتمالات مقبولة الا احتمال ان تكون جورجيت مدفوعة من الحزب لذلك
يا جماعة بالعقل كده كلامها و تحديها لقس كبير و لمحافظ و لاكابر الحزب ده ممكن يكلفها حياتها السياسة بالكامل و مش بعيد تبقى مغضوب عليها او عميلة لاقباط المهجر حسب ما النظام يحب طبعا