Tuesday, 5 January 2010

سيد حجاب جاب لابويا حبس ست شهور

من حوالي اسبوع جه اعلان بقضية سب وقذف رافعها سيد حجاب على بابا، بابا كلم محامية نعرفها قالت له انها ما تقدرش تاخد قضيته لانها عندها توكيل من سيد حجاب بس هي ح تتصرف
النهاردة عرفنا ان يوم ما وصل بابا الاعلام بتاع القضية كان صدر عليه حكم بالحبس ست شهور وغرامة عشرتلاف جنيه
طبعا انا اتصرف ازاي؟ احنا مش بتوع قضايا، احنا بتوع حبس بس، كلمت مالك عدلي من مركز هشام مبارك، والمفروض ان بابا بكرة ان شاء الله ح يعمل لهم توكيل
هي القضايا دي بيتعمل فيها ايه؟ يعني اخد التوكيل والاعلان واروح بقى لمركز هشام مبارك وبعدين؟ مالك عدلي بيقول لي ما اقلقش
بس انا بصراحة قلقانة يعني.... بابا يدخل السجن عشان سيد حجاب اللي مدخله السجن؟ طب قبل كده كان السادات، ماشي، عبد الناصر، زي بعضه.. لكن؟ مين اللي جاب القلعة جنب البحر
ياللا ربنا يستر
بس ازاي الاعلان يوصل في نفس يوم صدور الحكم؟ هو ينفع ده؟

12 comments:

مى said...

بصى يا نونة


واضح إن الحكم صدر غيابى

فى الحالة ديه لازم الوالد يعمل معارضة للحكم فى النيابة التابعة لجهة سكنه



بعدها النيابة بتحدد ميعاد جلسة


فى الفترة اللى قبل الجلسة يحاول محامى الوالد يعمل تصالح إن أمكن
و إن أراد طبعاً فى الأول


إن لم يحدث التصالح بيجى يوم الجلسة و يعمل إستئناف للحكم


أهم حاجة سرعة عمل المعارضة فى النيابة حتى لا يفاجئ الوالد بجماعة تنفيذ الأحكام لا قدر الله

ABOUAL3RBY said...

نوارة قلبى عندك

ما تقلقيش خالص ده عم أحمد هو اللى علمنا الحبس على أصوله

الواضح طبعاً أن الحكم صدر غيابياً لأن بابا كان لازم يعلن مرتين وبفاصل زمنى مناسب بين الإعلان والجلسة

وفى حالة الحكم الغيابى بيتم عمل معارضة فى الحكم فى المحكمة اللى صدر منها الحكم فبيتحدد ميعاد لجلسة تنظر فيها الدعوى من جديد حضورياً وساعتها لازم عم أحمد يحضر بنفسه

وطبعاً للأسف بيدخل القفص وبعدين القاضى يفرج عنه بدون ضمان أو بالضمان أو الكفالة المناسبة لحين الفصل فى القضية حضورياً

بعد الجلسة الأولى بيحضر المحامين دون ضرورة لحضور عم أحمد

ومعلوم أن قضايا السب بتنتهى بمجرد تصالح الطرفين

وأعتقد أن عم احمد لم يقصد سب أو قذف أو تحقير أو إهانة عمنا سيد حجاب وأن الموضوع مجرد إختلاف فى وجهات النظر

واعتقد أن ولاد الحلال من المثقفين قادرين على تقريب وجهات النظر بين الطرفين بدون دعاوى ولا قضايا

المهم أن عم احمد يحضر الجلسة الأولى بنفسه مهم جداً جداً لأنه فى حالة التخلف عن الحضور القاضى فى العادة بيؤيد الحكم الغيابى وبيبقى حضورى المرة دى ويدخلنا فى مواويل لاضرورة لها

قلبى عندكم وطمنى عم أحمد وزينب وأم زينب قوى قوى

وإن شاء الله خير

بحر الالوان said...

طبعا مع احترامي الكامل للشاعر الكبير احمد فؤاد نجم ..... وكذلك الشاعر الكبير سيد حجاب .....انا هاعلق بشكل عام

1- دي جنحة سب وقذف واكيد انت عارفة كده ........ بس السؤال هي جنحة مباشرة ولا غير مباشرة .......ياعني ا/ سيد حجاب اللي رفعها مباشرة عن طريق المحكمة ..... ولا عمل محضر في القسم وبعدين اتجنحت عن طريق النيابة...... هوا عموما ما فيش فرق بين الحالتين الا في حالة الاستئناف .. في الجنح الغير مباشرة بيبقي حضور المتهم وجوبي امام القاضي .... بعكس الجنح المباشرة لا يشترط حضور المتهم في الاسئتناف امام القاضي

2- الاعلان اللي جالكم بالقضية ممكن تعرفي منه اذا كانت جنحة مباشرة ولا لا ............ لو عن طريق المحضرين وباسم سيد حجاب تبقي جنحة مباشرة ..... لو اعلان من النيابة بالقضية تبقي غير مباشرة

3- حته ان الاعلان يوصل في نفس اليوم دي مش مشكلة ....... لان الحكم دا يعتبر حكم غيابي لم يعلم به المدعي عليه ولا يسقط حقه في اي درجة من درجات التقاضي...... فحضرتك هاتعملي توكيل لمحامي هايعمل حاجة اسمها معارضة في الحكم الابتدائي للقضية كذا ورقمها كذا..... وها يتحدد لها جلسة ....وفيها المحامي هايحضر طبعا ويقدر يقدم دفاعه من مرافعة او مذكرات او ما شابه ..... وحسب الحكم في المعارضة لصالح مين ..... ممكن الطرف المتتضرر من الحكم يعمل استئناف للحكم ..... وممكن ولاد الحلال يتدخلوا وتنتهي بالتصالح ... ومافيش داعي لكل ده

عموما الموضوع بسيط .....ويارب اكون قدرت افيدك

وشكرا

حكاية مكررة said...

نفسي افهم حاجه من البوست.

كل اللي اقدر اقوله ربنا معاك.

DomDam said...

ان شاء الله خير
ربنا يطمنك قريب
يمكن تكوني مش فايقة دلوقتي، إنما بصي الرابط ده
http://fahmyhoweidy.blogspot.com/2010/01/blog-post_04.html

فهمي هويدي جايب سيرتك

Amr said...

عادى يعنى - المحضر بياخد قرشين علشان يبعت الأعلان بعد صدور الحكم

أن شاء الله فى الأستئناف مش هايكون فيه حبس أو غيره

بس لازم محامى شاطر
ربنا معاكوا

Kontiki said...

صباح الخير يا نوارة
ربنا يستر يا بنتى متقلقيش
وبعدين سيد حجاب مش لاقى وسيلة تانية للعتاب بين المثقفين والشعراء وتصفية اى حسابات الا القضايا و المحاكم
اسلوب رخيص فعلا

cocy said...

دا حكم غيابى ومن حقه الاستئناف ولن ينفذ الحكم ما تقلقيش لكن لازم تعملى توكيل لمحامى علشان يطلع على ملف القضية ويعرف أيه الموضوع

Ahmed Nasr said...

فهمي هويدي جاب سيرتك في مقاله الأخير قلت آجي..لقيت الخبر ده، وإن كنت مش فاهم منه أي حاجة..

مين سيد حجاب ده وماله بأبوكي؟!..إيه التتش اللي حصل يعني؟

أنا مش بفهم طبعا في المواضيع دي بس ربنا يسهل الحال ويسترها..

مصر 30 said...

من ناحية إن إعلام القضية يوصل بعد الحكم ففى بلدنا بتحصل ديما ... لكن سيد حجاب يرفع قضية على نجم ؟؟؟؟؟!!!!
مايتقلش عليها غير عجبت لك يا زمن !!!!!!!!!!!

احمد سعيد said...

هو سيد حجاب عضو فى الحزب الوطنى ولا ايه ؟؟

مايهمش said...

نوارة

شفتى المصيبة دى؟

http://www.youm7.com/News.asp?NewsID=174472