انا مصدومة في مشاعري

انا في حالة لا يرسم لها دلوقت

منى الشاذلي استضافت محمد صفاء عامر، وقس مش فاكرة اسمه، وحقوقي مسيحي صعيدي ما ع افتكرش اسمه ده روخر

وجعدوا يتحدوا ويجولوا، محمد صفاء عامر قال فيه مشكلة حقيقة ما يحلهاش الامن وانما محتاجة لها برنامج، الامور ح تهدا بس النار مش ح تخمد

الحقوقي الصعيدي المسيحي جام حكى كافة شيء حصل، من اول حادثة الاغتصاب، وترحيل مية وحاجة مواطن مسيحي من القرية اللي حصل فيها الاغتصاب، وانا نسيت اقول لكوا ان فيه حد من الاهالي قال لي كده في الوقفة النهاردة، قال لي ستاشر اسرة اترحلوا من القرية اللي حصل فيها الاغتصاب بناء على حكم كبارات العائلات والامن وافق على كده وبقت الكنيسة حاطاهم في مساكن ولسه ما رجعوش

وقال ان الانبا كرليس كان عنده تهديد وبلغ الامن وكل الكلام اللي احنا عارفينه دهون يا ددع منك له

ثم انبرى القس يقول الكلام اللي بقالنا كام يوم بناخده في جنابنا وساكتين مراعاة للمشاعر والمصاب، وزاد عليه انه قال، احنا مش ح ننسى الكشح، لما عشرين واحد ماتوا والمتهمين اخدوا براءة والقاضي برر الحكم بانه لا يجوز قتل مسلم بكافر

قامت منى الشاذلي جات لها هيستيريا عصابية وقالت له: احنا بنسمح بكل حاجة الا المعلومات المغلوطة، مش ممكن القاضي يقول كده ابدا، القانون المصري 

قام القس قاطعها واصر، قام محمد صفاء عامر قال له انا كنت قاضي وانا اعرف القانون مافيش حاجة في القانون المصري كده ابدا يا نيافة القس

قام القس قال: انا سمعتها في قناة الفراعين.. قام قالوا له ما معناه مش كل حاجة تسمعها في التلفزيون تصدقها ده كلام مش مظبوط

والقعدة سخنت والحقيقة ادارة منى للحوار كانت ممتازة، هي بتبقى كويسة لما بتبقى زعلانة بجد

والقس ذكر ان البلطجي له صلة باحد اعضاء مجلس الشعب 

والراجل الحقوقي الحقيقة قال كلام ممتاز واتكلم عن القانون واهمية تفعيله وان فيه مشكلة حقيقية لازم نواجهها

وما نسيوش يجيبوا فيديو كليب لشيخ الازهر وهو بيقول:

"اذا كان حدث اعتداء على الاقباط فنحن ندين هذا الاعتداء"

اوحوا بقى يا كماحة.. خير اللهم اجعله خيييير، اذا كااااان حدث اعتداااااء فده يبقى غلط

حلو كده؟

اتصل واحد من الشهود وروى اللي احنا نعرفه، وقال ان امبارح فيه ناس اعتدت في حتة اسمها.. اسمها..مهطورة.. شطورة..امورة، حاجة كده من اسامي قرى الصعيد اللي عمري ما باحفظها، وكان فيه حرايق وفيه ست ماتت مخنوقة وقال الاشاعات كتير قوي بس هو عن نفسه مش بيصدق غير اللي بيشوفه

خلاص كده؟

جه اتصال من الانبا كرليس من كنيسة نجع حمادي، اهلا وسهلا، اسمع بجى يا معلم، جالك: 

انا ما جدمتش بلاغ جبل الحادث لاني ما باتنبأش بالحوادث..انا بلغت السيد مدير الامن والسيد المحافظ بعد الحادث.. لكين الكلام عن بلاغ جبل الحادث ما حوصولش.. والنيابة ع تحجج في الموضوع

جالت له: 

طيب يا نيافة الانبا انت شايف ان حادث زي ده تحقق فيه النيابة؟

جال لها:

انت ما عيندكيش سئة في الجضا المصري وللا اييييه؟ الاوشاعات كاتير يا بتي.. يعني جالك الست دي ماتت مخنوجة من الحرايج، لع، دي كانت مولعة نار تتدفى عليها جام اتخنجت وماتات

(مولعة نار تتدفى في الحر ده؟ هو احنا جالنا شتا اصلا؟)

واحنا ناس مؤمنين، والموت علينا حج، وانا اجولك، كنا بنعزي ولجينا ام من الامهات ع تزغرد وجالت انا افتخر ان ابني شهيد، وواحد تاني كنت ع اهزر معاه واجول له: انت تستاهل ان ابنك يوبجى شهيد  انت؟ انا اجولك ع الاوشاعات، الاجباط بطبيعتهم بيوبجى عنديهم خوف، ادام الواحد خاف بيجول اي شيء، لع، ما نخافش، الخوف ده جلة ايمان، وجله سئة في الجانون، انا باجول لك كلام احاسب عليه امام الله، والبابا شنودة ما ع يعتكفش ولا حاجة، ما تصدجيش اللي على النت واللي في الجرايد، وباجول للاجباط لا تصدجوا الاشاعات، وغير اللي ع يتنشر في الاهرام والاغبار والجامهورية ما تكلمنيش.. 

منى: يعنيييي

كرليس: يعني سلامتك

الله يسلمك يا ابونا.. خلاص يا شباب، طلع ان الاجباط بالمناسبة دي بيشكروا الجاتل اشد الشكرانية على العملة اللي عملها وع يزغردوا ويرجصوا ويغنوا وارجوكم لا تصدجوا كل اللي هو جاله بنفسه ع النت ولا تصفجوا ولا تهرجوا حتى تنتهي سلامة من الغناء وبعدها افعلوا ما شئتم

ثم اغلق السماعة بعد ان بشرنا بان ده كان احسن عيد عدى على المسيحيين، فاذا بالقس اللي كان شعللها شعللها بقى بلسم للجروح، وواحة غناء، ولامؤاخذة حمامة سلام وجال: يعني احنا عايزين انشعللها وللا نحلها؟ احنا نجعد ونحل

طبعا الاستاذ الحقوقي كان ح يموت بانفجار في المخ، ومنى دلدلت فكها الاسفل، ومحمد صفاء عامر بقى يضرب كف على كف

الجدع الحقوقي يجول: يا ناااس يا عالم ده جايل لي الكلام بنفسه، الموت علينا حج لمن يوبجى موت طبيعي، لكن دي ناس ماتات مجتولة.. 

ومحمد صفاء عامر يقول: يا جدعان ما ينفعش كده يا جدعان، الجرح ما ينفعش يتليس ويتقفل عليه كده، فيه مشكلة حقيقية، مش امنية ولا قانونية بس، فيه مشكلة في التعليم فيه مشكلة في المجتمع لازم تتحل

والقسيس يجول لك: يعني انتوا عايزين اتشعلولها وللا ايييييييييييييه؟ ابه

اييييه اللي حوصول يابونا؟ ده انت من شويتين طلعت ع الجارديان تقول في قتل منظم للاقباط عشان يقضوا عليهم (ده كرليس نفسيته) ثمن انت جايل الحديت ده بنفسك هو احنا ع نتبلى عليك لييييه؟ 

عموما خير وبركة يا ابونا؟ بيجي طلعتوا بتفرحوا بالجتل ونفسكوا في الشهادة؟ يا حبيبي.. انتوا جيتوا في جمل يعني؟ من البندجية دي جبل البندجية دي يابا الحاج

قال واحد يطلع يقول لك خير اللهم اجعله خير لو حصل فعلا اعتداء يبقى عيب عيب والتاني يطلع يجول لك احنا ع نزغرد حدانا في البلد والجاتل ع يجول ما عارفش ما خابرش ما جتلتش حد

طب والناس دي؟ الاهالي المقهورين دول؟ ح يشنقونا ونسكت لهم يا ريا؟