هي حركة الندالة دي لوجه الله كده؟

تحديث:
انا فخورة جدا بولاد الشحاتة البلطجية اللي واقفين يحرسوا امن مصر
حضرتك تقدر تقرا مقال نورمان فينكليشتاين اللي بيقول فيه ان اخر مرة راحوا بقافلة فيها مساعدات محافظ شمال سينا قال لهم: ما تدونا احنا المساعدات دي وسيبكوا من موضوع غزة ده
وتقدر كمان تشوف فضيحتك بالتركي، بعد ما شفتها قبل كده بالعنجليزي والفرنصاوي، عشان تحقق مقولة مهندس حر: "الراجل ده متقاول يفضحنا و يجرسنا و يسمعنا شتيمتنا بلغات ما سمعناش عنها قبل كده؟ يدفنوك فى كنيف مالوش سيفون يا بعيد"


واضح ان الولية اللي في الفيديو دي بتسب لنا الدين، قلبي بيقول لي كده، عمال تقول ميصر ميصر، اكيد بتقول كلام قبيح، وعمالة تشخط كده: يا ولاااد.. جازا... ميصر، يا ولاد.. وتبلع ريقها، وبعدين فيه راجل وقف يشاور لنا بصباعه كده ويقول لنا: باقول لكوا ايه؟ انتوا عالم عرة بصراحة، ايه اللي انتوا عاملينه ده؟ انتوا اللي انتوا بتعملوه ده ما ينفعش ابدا على فكرة.. ماهو باين اهو الكلام، حتى كان بيتكلم بالراحة عشان يفهمنا
لالالالا اوعى تتعقد، انا عايزاك تتفشخر بنفسك كده، احنا اتشهرنا، بقينا اشهر مش اشهر نجمة واقوى من سنجام
جبهة علماء الازهر بتقول على الجدار: هو الكفر بعينه
طب بالنوسبة لاني انا حاليا دلوقت فقدت مشاعر التعاطف من كتر ما انا بقيت بنت المفضوحة دلوقت حاليا؟ المشاعرين دي يبقى حكمها ايه شرعا؟ انا اتعقدت نفسيا كده
ازاي محافظ شمال سينا يقول لهم هاتوا المساعدات احنا ناخدها؟ ايه الفضيحة دي؟ لا، مع احترامي لكل الناس، انا الحاجات دي توجع لي كرامتي قوي.. الناس تقول علينا ايه؟ جعانين؟


تحديث:

الله اكبر ولله الحمد... انا بعد كده ح اقعد على ناصية الحسين وتيجوا تبوسوا ايدي وتاخدوا البركة، لسة على التويتر محمد واكد باعت بيقول فيه مخاوف من مصادرة بعض من البوضاعة اللي جاية في القافلة، هههههههههه، اه يا جعانيييييييييييين

شافوا البوضاعة مستورمة قالوا لك ودي تدخل غزة ليه؟ ما نبيع ونكسب ونبعت لهم كلسونات تدفيهم احسن من الحاجات الالافرانكا دي

وقال لك بقى: العربيات اللي القافلة جايباها (عربيات اسعاف) موديل قديم وغزة عندها موديل 2010، لا صح، اما عالم معفنة صحيح، باعتين لهم عربيات خرج بيت؟ مش يستنضفوا عشان نعرف نصادر حاجة عدلة؟

فيه عشرين مصاب، وتلات معتقلين (من الادانب، الحمد لله، يسقط الاستقلال، هو ده العدل يا سيدي القاضي، يدوقوا اللي بندوقه ليل نهار) وربنا يستر وماحدش يموت، والمتظاهرين بيهددوا انهم يولعوها نااااار

مبسوطين يا شباب؟ انا عايزاكوا تبقوا مبسوطين ومزقططين كده،والله كتر خيرهم الادانب، عملوا لنا حس في البلد وسلونا

---------

اولا بكرة في مركز الدراسات الاشتراكية المستشار طارق البشري ح يتكلم لاول مرة عن الجدار العازل الساعة سبعة مساء ان شاء الله

مركز الدراسات الاشتراكية في شارع مراد

------------

ثانيا: هي دقة النقص اللي النظام المصري عملها مع قافلة شريان الحياة لها مبعث تاني غير سياسة المنوفية؟ يعني لففوهم راس الرجاء الصالح، وطلعوهم من العقبة على دمشق على اللاذقية على العريش وادوهم ديد لاين ما بين تلاتة لستة يناير والناس عملت بهلوانات عشان توصل في المعاد ولما جم قالوا لهم: ما يشوفش مراته وعياله

(للي مش مصريين دي نكتة: واحد شرقاوي وواحد منوفي راحوا يتنفذ فيهم حكم الاعدام، سألوا الشرقاوي نفسك في ايه؟ قال لهم: اشوف مراتي وعيالي، سألوا المنوفي: وانت نفسك في ايه؟ قال لهم: ما يشوفش مراته وعياله == وعادي ما تتخضوش، المنوفي اللي على حق ما بيزعلش من الكلام ده هههههههه)

ومنعوهم وحاصروهم وحتى ما رضوش يخلوا اللي جوة الشاحنات ينزلوا من الشاحنات حبسوهم فيها، ورموا عليهم كنابل مسيلة للدموع، حد يستشرح لي الموضوع ده الله لا يسيئكوا عشان انا خلاص حطيت صوابعي العشرة في الشق قال بيقولوا لك ايه ياخويا: المساعدات اللي جايبينها مساعدات غير ضرورية

لا افهم بقى، فرضا مثلا جايبين مصاصات ولبان ودباديب وطراطير وفرافير وبلالين، السلاطات المصرية مالها؟ يعني ايه مساعدات غير ضرورية؟ هم دافعين حاجة من جيبهم؟ هم اهالي غزة قالوا لهم: والنبي ارجوكوا اللي يجيب لنا مساعدات غير ضرورية قولوا له اننا في الحمام؟ مش فاهمة برضه

وهم انضربوا بقنابل مسيلة للدموع عشان جايبين بلالين؟ ما داهية يصادروها، فاكرين لما عوكل ايام الزلزال طلع في وشنا يقول لنا دول بعتوا لكوا بطاطين غالية قوي بعناها واشترينا بطاطين تانية ارخص باعداد اكبر؟ ما داهية ياخدوا المساعدات غير الضرورية ويبيعوها ويكسبوا ويحطوا شوية في بناء الجدار العازل، بس لا، احنا حقانيين، ح نبعت لهم كمان كوفيرتات وشرابات صوف وكام علبة جبنة براميلي وقرصين طعمية وكلسونات بدكة، احنا ما ناكلش حق حد ابدا

وعمالة اسألهم على التويتر هم عملوا كده ليه يقولوا لي وساخة، لا مش معقول، اكيد فيه حاجة تانية، يمكن طمعوا في البوضاعة؟ والله تلاقيهم طمعوا في البوضاعة وح ياخدوها يبيعوها

هيييييه، تميم البرغوتي بيقول لي بكرة تروق وتحلا، قلت له: ما شاء الله انت متفائل؟ قال لي: "لا طبعا انا باقول كده بس، اصل امريكا يمكن تنسحب من العراق وكده القوة اللي مراهنة عليها مصر ح تسيب المشرق العربي ونبقى لوحدنا بقى مننا للحيط ونتقوقع بقى"

وطبعا احنا خسرنا المغرب العربي كله في عملة الجزائر دي، خصوصا بعد ما مصطفى لامؤاخذة الفقي طلع بمنتهى النباهة والذكاء وقال: عايزين بقى نوقع ما بين المغرب والجزائر في مشكلة الصحارى دي وناخد صف المغرب ونطالب بحقها في الصحارى ونحيي المشكلة من جديد. المغاربة سمعوا الكلمتين دول من هنا وعنها وعاديك، هاتك يا فيديوهات شتيمة فينا ما معناه آه يا ناقصين يا واطيين يا رمم بقى بدل ما تصلحوا بينا تطلعوا تقولوا لنا في وشنا ح نوقع بينكوا؟ كل ده عشان ماتش؟ انتوا فاكرينا ايه؟ ايه ده؟ انتوا يهود؟

ياااااا عوووووكل يا رافع راسي في الحارة، يا مسيطني، ده مصطفى الفقي اللي المفروض انه اكتر واحد بيفهم في النظام ده؟ خلا اللي ما يشتري يتفرج علينا بنباهته، يعني بدل ما نعمل حسابنا ان الجزائريين ح يضربونا في ماتش يفوت ولا حد يموت، كل ماحد من المغرب العربي ح يشوفنا ح يرننا علقة، خصوصا انهم عرفوا اننا بنجري ونعيط ونقلع التي شيرتات ونستخبى تحت الاتوبيسات

ومش عايزين نفوق بقى، مش عايزين نقف وكفة من اللي هي كده ونشوف ان اعداءنا بقوا الجزائر وسوريا وايران وقطر وحماس وحزب الله وقناة الجزيرة (هههههه الا قناة الجزيرة دي اللي عاملة كالو لبلد بحالها) وتشافيز والشيعة والاخوان وكل نشطاء حقوق الانسان في اوروبا والدول المتغدمة وبنتكلم عن حماية امن مصر من الفلسطينيين ومالناش صحاب دلوقت غير اسرائيل وحتى امريكا بتشاور عقلها، اصلها عاملة زي الولية الفاجرة، اول ما اللي ماشية معاه يخلص تقلبه وتشوف غيره زي ما عملت مع اللي قبلها واللي قبل اللي قبلها... نبص بقى لنفسنا ونشوف اتعمل فينا كده ازاي؟ ابدا. مين اللي خلا الناس تتظاهر قدام سفاراتنا بالاعلام الفلسطيني كأننا اسرائيل؟ وماهماش اخوان ولا شيعة ولا القاعدة، دول عيال من اللي حاطين حلق في مناخيرهم وناكشين شعرهم، ازاي؟ مش عايزين نعرف، ولا عايزين نراجع نفسنا، عاملين زي العيل اللي عامل عملة وعمال يبجح

اه، على ذكر تميم صحيح، متغاظ قوي ان فيه ناس بتكتب شعر باسمه وتبعته على النت، وكل اللي غايظه انهم بيغلطوا في النحو والعروض ويكتبوا شعر ركيك وينزلوا عليه اسمه هههههههههههه رايق ده راخر، عموما مالم تسمعوه بعنيكوا وتشوفوه بودانكوا بيقول قصيدة ما تصدقوش انها بتاعته، بيعملوا معاه زي ما بيعملوا مع بابا

انا عايزة افهم مين السخيف ده اللي بيعمل كده، ده حتى الواحد يحب اسمه ينزل على شغله، تلاقيه بيشتغل مع الامن المصري الغلس

اه... فيه غارة على خان يونس دلوقت وفيها اصابات وقتيل

وفيه مظاهرات بالالاف في تركيا احتجاجا على منع قافلة شريان الحياة 3 وتشافيز ح ييجي شريان الحياة 4 واحنا قاعدين

على فكرة، الاخوة بتوع امن مصر وحدود مصر مش سداح مداح والكلام الحمضان ده: لا يدخل الجنة من كان في قلبه مثقال ذرة من كبر

ايييييييوة، ايه الكبر بقى: بطر الحق وغمط الناس، بدل التبريرات والسفسطات، نسيبنا بقى من الرغي اللي في الاعلام ده، دول ناس بياكلوا عيش من اكل دماغ الناس برغيهم ده، ونبص على واقعنا، سيبك بقى من حفر لي تحت الارض يا ميس، قلع لي البنطلون يا ابلة، شتموا مصر يا تيزة وبص على النتيجة اللي انت وصلت لها كمواطن مصري: مين عدوك فعليا دلوقت؟ مين حبيبك اللي انت مرمي في حضنه؟ الناس بتبص لك ازاي؟ العالم بيقول عليك ايه؟ مين اللي بيدافع عنك؟ ومين اللي بيهاجمك؟ ومين اللي زعلان عليك؟ موقفك ايه اقتصاديا وسياسيا وزراعيا وصناعيا وعلميا؟

شايف؟ مبسوط كده؟ لو مبسوط بحالك وانت كده كمل على الهبل بقى واقعد قول امارة اسلامية على حدودنا، والبنطلون، وامن مصر، والروسيات، والجزيرة، والفراعنة، ومصر اولا (ده كان شعار النازي بالمناسبة: المانيا اولا. لو مصر بقت نازية غيروا الدستور، بس تغيروه كله بقى) وعيش يا معلم، مش انت مبسوط بحالك؟

لو مش مبسوط، ستوب بقى، البطل الدرامي بيصنع مصيره بنفسه، نشوف وصلنا نفسنا لكده ازاي؟