يا صباح الحبة فوق وحبة تحت

والله العظيم احنا شعب طيب وامير وعقلنا مش في راسنا وكلمة تجيبنا وكلمة تودينا وسايبين دماغنا لاي ملغوصاتي يلعب فيها خصوصا لما يتك على النعرات الهابلة وكل اللي يزمر لنا نغني له.
ايه بقى حكاية ورايحين تتضامنوا مع غزة ليه ما تتضامنوا مع بتوع الدويقة؟ يعني ده يتعارض مع ده في ايه؟
واللي بيروح غزة هو اللي بيروح الدويقة بالمناسبة واللي بيقول ما تروحوش غزة لا راح غزة ولا راح الدويقة واول ما حد يقول لنا الكلمتين دول نجري وراه ونقول هييييييييييييييييييييييييه من غير ما نعقل الكلام ولا نفكر في اللي بيقول الكلام ده هدفه ايه؟
في حصار غزة وحادث الدويقة انا والاغلبية مقصرين، وناس تانية من الاقلية مش مقصرين لا مع دول ولا مع دول، وانا شفتهم وهم بيرتبوا لهنا وهنا ومش عايزة اقول اسامي اولا عشان ما اضيعش ثوابهم ثانيا عشان ممكن اقول حد وانسى حد تاني، عشان اللي بيتحرك بيتحرك للكل، وعشان اللي بيخدم بيخدم الكل
وبما اني مش ح اقول اسماء افراد فخليني اضرب مثل بهشام مبارك: ابانا الذي في حقوق الانسان
اللي بيجري ورا الدويقة وبيجري ورا قوافل غزة ومش مقصر
وانا مقصرة، ولما ابقى مقصرة ما افتيش واعدل على الناس اللي بتقوم بواجبها ومش مستنيني افكرهم بحد على الاقل اقول لهم متشكرة انهم مبيضين وشي ووش كل المصريين وقايمين بواجب انا وغير المفروض نعمله ومش بنعمله عشان دي قلة ادب مننا وما لناش اعذار
ومن المدونين فيه رجالة جدعان في الدويقة وفي غزة ومع العمال دول مش حاقول اسامي عشان ما اوديهمش في داهية
:)
ثانية واحدة هو ايه اللي مش ح اقول عشان ما اوديهمش في داهية؟ ما هم بيشروا وبيودوا نفسهم في داهية: مالك واحمد عبد الفتاح وخالد عبد الحميد وبتوع ابناء مصر وناس تانية مش فاكرة اساميهم دلوقت
ودول لا مقصرين هنا ولا مقصرين هنا والمفروض بدل ما نقعد حاطين رجل على رجل ونقول لهم اشرب من القلة دي وما تشربش من القلة دي يا نساعدهم يا نقول لهم متشكرين يا نلم لسانا عنهم
وياريت نبطل كلام الحلاقين ده اللي علمهولنا بصل الحر والصنان بتاع: احنا مالنا ومال العرب وكانوا عملوا لنا ايه العرب؟
عشان ده كلام شرحه يطول وانا الليلة مشغول
بس انا ح اتكلم عن نفسي: انا مقصرة لابعد الحدود وح احاول ابقى مفيدة اكتر من كده ولحد ما ابقى مفيدة الناس اللي قايمة بدور انا ما باعملوش اقول لهم انا متشكرة واسفة اني مش باساعدكم زي ما المفروض اساعدكم
----------
تحديث: لمساندة الدويقة وغزة وضحايا التعذيب والمعتقلين رجاء زيارة مركز هشام مبارك1 شارع التوفيقية العنوان ما يتهوش
ومركز هشام مبارك ده لو عبد شرا مال بيشتغل عندنا بالسخرة ما كانش خدمنا كده ومش مستني منا شكرانية بس نكف لسانا عنه

بعد الصاق التهمة باهالي الدويقة...الان يلصقون التهمة بالله سبحانه

المهم ان الحكومة مش غلطانة وخلاص، يعني يا اما سكان الدويقة هم اللي سابوا القصور والفلل وراحوا عاشوا بالعند في الحكومة في العشوائيات، خصوصا ان القدر لم يمهل اهالي الدويقة زي ما قال نظيف، ومن حظهم الاسود انهم يادوبك رجعوا من مارينا حصلت لهم المصيبة دي، وكله بسببهم لانهم جرابيع ومعفنين ومصممين يسيبوا النضافة لانهم مدمنين عشوائيات وبيشموا زبالة
طيب مين بقى اللي بيدير التنظيم التدميري لاهالي الدويقة الاشرار اللي باتوا في الدويقة عشان يرموا بلاهم على الحكومة البريئة؟
استغفر الله العظيم يارب، اقول ايه بس يا ربي
معلش انا باحب الدكتور سليم العوا وشايفة انه لازم يراجع نفسه في الكلام ده:
وأضاف أن الله يغضب علي المستضعفين في الارض كما حدث لأهالي الدويقة لأنهم استكانوا وسكتوا عن الحق وتولوا الطواغيت وقوما غضب الله عليهم وراحوا يصوتون لهم في الانتخابات ويهتفون بحياتهم.
يعني يا دكتور سليم والنبي الله يكرمك ويخليك ويهدينا ويهديك، ابوس ايدك يعني الكلام ده يوجع القلب حرام عليكوا
انتوا بتكرهوا الناس في ربنا ليه؟ هو موت وخراب ديار ومقابر جماعية وكمان تقولوا لهم ربنا غضبان عليكوا
ده لما الرسول قال للصحابة انتوا بتضحكوا على ايه لو تعلمون ما اعلم لبكيتم كثيرا ولضحكتم قليلا، قام ربنا ارسل اليه جبريل يقول له: يا محمد ان ربك يقرؤك السلام ويقول لك: لم تقنط عبادي مني؟
ما قالهمش ربنا غضبان عليكوا قال لهم ايه لزوم الضحك الكتير، بس
انت عارف الناس دي اللي مش بتفك الخط وبتنتخب بتوع الحزب الوطني بوجبة فيها ربع فرخة ومكرونة فشامنة، هم كمان اللي بيمارسوا البلطجة على المتظاهرين برضه بربع فرخة وخرطة مكرونة فشامنة
وساعات بساندوتش فينو فيه صباعين كفتة
يا دكتور سليم الله يعزك، انت دقت الجوع؟ انت عرفت يعني ايه تنام طول الليل على غازات وابور الجاز عشان ما عندكش بطانية في عز الشتا؟ انت عرفت يعني ايه واحدة تبيع نفسها عشان طبق عسل اسود ونص رغيف؟ (الواقعة دي حصلت بجد) انت عرفت يعني ايه واحدة تبيع ضناها عشان تاكل؟
لما الحزب الوطني كل دورة انتخابية يوزع عليهم بطاطين ووجبات عشان ينتخبوه، تفتكر ح يكون رد فعلهم انهم يعتصموا ويطلعوا يقولوا: يسقط يسقط حسني مبارك؟ تفتكر اصلا هم عارفين مين رئيس الجمهورية؟ والله العظيم فيه ناس في عزبة خير الله (واللي هي حالها احسن من الدويقة كتير) فاكرة ان رئيس الجمهورية انور السادات
انا بقى اللي باسألك يا دكتور سليم، وربنا يعلم احترامي ليك قد ايه، انت كنت فين من الناس دي؟
مين نزل لهم ووعاهم وللا عبرهم؟ مين اهتم يعلمهم وللا يأكلهم وللا يعرفهم حتى حقوقهم؟ الناس دي ما عندهاش احساس ان لها حقوق، دول حاسين انهم زوايد بشرية، هم حاسين بنفسهم كده مش بس الحكومة ولا حضرتك، ده احساسهم هم كمان، جربت يا دكتور سليم تنزل لهم من غير وجبات ولا بطاطين حتى وتقول لهم: انت انسان، انت لك كرامة، ولك حقوق، انت مسروق، انت مواطن والبلد دي بلدك، انزل اطلب حقوقك
ما فكرتش تقول لهم مقولة ابو ذر الغفاري: اذا جاع احد المسلمين فلا مال لاحد؟
ما فكرتش تنزل تقول لهم: خدوا حقكوا، الناس اللي مش بتفتكركوا غير كل دورة انتخابية هم اللي سارقين فلوسكوا؟ هم ايش عرفهم بالكلام ده اذا كان الناس المحترمة اللي زي حضرتك مش معبرينهم اصلا؟
سايبهم يا دكتور سليم ويوم ما يموتوا تقول ربنا غضبان عليهم؟
وراضي عن مين يا دكتور؟ لما يغضب على ناس بتسف التراب وراضية، تاكل من الزبالة وراضية، تنضرب الجزمة وراضية، تبيع عيالها وراضية، تبيع اعضاءها وراضية، عيالهم يلعبوا بالعقارب وراضية، جلدهم بيشقق ويتجرح من كتر البرد في الشتا وراضية، الصراصير تطلع تاكلهم في عز الحر وراضية، المجاري محاوطاهم من كل ناحية وراضية، جركن المية الملوثة بيشتروه باربعة جنيه وراضية، شايفين اللي رايح بالعربية ستة متر واللي جاي مش قادر يمشي من كتر التخن والشحم المتكوم على جتته ومش باصين لهم وراضين
وراضين يا دكتور
وبيقولوا الحمد لله
انا سمعتهم بوداني بيقولوا الحمد لله
وبيقولوا احنا احسن من غيرنا كتير
مش عارفة انا غيرهم ده شكله ايه
لما ربنا يغضب على دول..امال يرضى عن مين؟
يرضى عن اللي قاعدين في التكييف بياكلوا في قتة محلولة ومش حاسين بغيرهم؟
غيرهم اللي بيدوق الذل والنار والمرار
وفي الاخر يدفنوا بالحيا تحت الصخور ويترش عليهم فينيك عشان احنا قرفانين منهم، قرفانين منهم احياء واموات
وبرضه راضيين
لا وايه، وكمان عايز تفهمهم ان بعد ماهم راضيين باللي ربنا كتبه عليهم ده كله ربنا كمان هو اللي مش راضي
انتوا عايزين تكفروهم؟ مش باقي لهم غير ربنا، مالهمش غيره، عايزين تاخدوا منهم ربنا ليه؟ بتكفروهم كمان ليه؟ يعني لا دنيا ولا اخرة؟ وللا هو المهم ان الحكومة مش غلطانة وخلاص؟
يعني الغلط يا منهم يا من غضب ربنا، منكوا لربنا بقى اسطفلوا معاه وطلعوا الحكومة من دماغكوا
مش كده؟
ما كانش والله العشم

مناخيري اولا

امبارح كان فيه مكالمة طويلة مع واحد متعود يسخني على كل الناس، كان بقالي كتير ما اتكلمتش مع حد خالص ولا باقعد مع حد، وبعدين بقى امبارح هو استلمني، وابتدت المكالمة كالعادة، بانه اولا يستفزني، وبعد ما اصوت في ودنه (وانا امبارح كنت ح اتجنن، او اتجننت تقريبا بالفعل من اللي عملته الحكومة المصرية) وثانيا، بعد ما يسيبني اصرخ، يبتدي يوضح لي انه مش معترض على كلامي، وما تفهمش بيستفزني ليه في الاول طيب لما هو متفق معايا في الكلام، وثالثا بقى يفتن لي على كل الناس ويحكي لي على كل المناقشات الاستفزازية اللي بيتبادلها البشريات، طبعا مش ح اقول اسمه لانه بيقول عليا فتانة وفضحية. كل ده مش مهم

المهم انه وضح لي ان فيه ازمة فظيعة شاغلة الناس كلها دلوقت بعد موضوع غزة: مصر اولا؟ وللا الاسلام اولا؟

!!!!!!!!

افتكرت بعد ما قفلت معاه ان فيه مجموعة على الفيس بوك اسمها العروبة اولا

انا الحقيقة الازمة دي مأزماني قوي لاني مش عارفة احط ايدي بالظبط على الازمة، يعني اي مواطن في مصر، جنسيته مصري، ثقافته عربي، قارته افريقية، ودينه يا اما مسلم يا اما مسيحي. مش كده؟

طب فين الازمة يعني، ايه حكاية اولا؟ ومين ثانيا؟

انا اسمي نوارة، طولي مية ستة وستين سم، وعينيا سودا. دلوقت لو حد جه قال لي: لو خيروكي ما بين اسمك وما بين طولك ح تختاري ايه؟ تحبي تقصري ويفضل اسمك نوارة وللا تغيري اسمك وتفضلي طويلة؟

الحقيقة انا لو حد عمل معايا كده واصر على اني ارد عليه ح اعيط، لاني فعلا مش عارفة، طب انا ايه اللي يخليني يا اغير اسمي يا اما اقصر؟

ايهما اولا عينك وللا مناخيرك؟ شعرك وللا ودنك؟ انك خريجة اداب انجليزي وللا ان عندك جزمة بني؟

طب انا فعلا مش عارفة ايه وجه المنافسة ما بين ودني وشعري، ومناخيري وعيني، ومش عارفة ليه لازم اختار حاجة فيهم اولا وحاجة ثانيا؟

وكذلك مش عارفة فين وجه المنافسة ما بين المسيحي المصري والمسلم الاندونيسي، وما بين غزة والدويقة، وما بين اني في قارة افريقيا واني باتكلم عربي، اذا كنت انا اتولدت لقيت كل ده مع بعضه فيا، يبقى ليه فيه ناس مصرة تخيرني ما بين ودني ومناخيري؟

دلوقت هل سبق وللا وارد ان المسيحيين المصريين ياخدوا بعضهم ويحتلوا اندونيسيا؟ هل سبق وواحد اندونيسي اتخانق مع واحد مسيحي مصري على حتة شيكولاتة وطلبوا مني اني افصل ما بينهم؟

طب ما لو فصلت ما بينهم ح افصل بالحق بصرف النظر مين اندونيسي ومين مسيحي

هل اللي بيساعد الدويقة ما يقدرش ابدا يساعد غزة؟ هل اللي بيساعد غزة بيساعدها لانه بيكره سكان الدويقة ونفسه كلهم يموتوا؟

معلش يعني انا اعرف كويس قوي ان اللي نزلوا الدويقة في ايام الكارثة هم هم نفسهم اللي بيروحوا قوافل غزة

واللي ما بيروحش غزة وبيقول احنا مالنا ومالها دي حاجة ما تخصناش، والله العظيم والله العظيم ما عبر الدويقة بتلاتة صاغ ولا بكلمتين تعاطف، وما افتكروش الدويقة غير لما غزة انضربت، والله العظيم كمان مرة

وكذلك في المحلة....إلخ.

واللي بيعيش في الفشل في الامور الداخلية هو بيعيش في الفشل في الامور الخارجية

واللي اتسبب في كارثة الدويقة هو هو بنفس البنطلون بنفس الفانلة اللي اتسبب في كارثة غزة غزة

فين الازمة بقى؟

انا بجد مش عارفة افهم، واحد عمال يعذبني، ويطلع عيني، جه، هو هو نفس اللي بيعذبني ده، عذب شحيبر، وشحيبر ده اغلب مني، مش الطبيعي اني انا وشحبير نتضامن مع بعض ضد نفس الجلاد؟

هل من المنطقي اني فجأتن اتضامن مع الجلاد ضد شحيبر؟ من غير اي مبرر .......واجي على الضحية اللي زيي والومه في عز ماهو بينضرب، واساند الجلاد بكل ما اوتيت من قوة، مع انه في عز ما بيدي شحيبر بالشلوت بيديني انا في نفس ذات الوقت بالقفا، واقل ادبي على شحيبر، واقل اصلي، واقل كرامتي، وافضل اذل في شحيبر في نفس الوقت اللي انا باتذل فيه، واقول له ياما عملت لك، وياما سويت لك، وقمصاني وشراباتي

ليه؟

فيه سبب للجدل البيزنطي ده؟ 

امممممممم

غير ان شحيبر عنده كرامة وبيقاوم وبيقول انا مش ح اتذل ومش بيخاف، وانا ميت في جلدي وخواف وبصراحة كرامتي على قدي

هي كده؟ هي كده بقى؟

وللا عشان انا حاسة بالعجز والذنب تجاه شحيبر؟

وللا عشان انا زهقت من كتر ما انا غلبانة ومذلولة ما صدقت حد اغلب مني افش فيه غلي؟

طب انا كده محتاجة دكتور نفسي على فكرة يساعدني

النكتة بقى، ان الشخص الفتان اللي كان بيكلمني امبارح قال لي ان فيه نواب سحبوا استجواباتهم للحكومة تضامنا مع غزة

!!!!!!!!!!!!!!!!!!!!!!!!

لااااااااااااااااااااااااااااااااااااااه

حد يفهمني الكلام ده بجد، على اساس ايه بالظبط؟ على اساس ان الاستجوابات دي فرح واحنا ح نأجل كتب الكتاب عشان العزا اللي جنبنا؟ ده بدل ما نزود الاستجوابات ضد الحكومة اللي قارفانا وقرفها مطرطش على الناس كمان؟

طب الحكومة المصرية متآمرة على غزة نظمي فهمي رسمي، طب على الاقل، تضامنا مع غزة، اشغلها شوية عن غزة في الاستجوابات دي خلي الناس تترحم شوية من مبادرتها

طب وربنا كمان مرة انا ما فاهمة حاجة خالص

على فكرة

دي اسمها غباوة

اه والله، هي دي الغباوة بعينها يعني

كده ما ينفعش على فكرة، كده الناس فعلا ح تتفرج علينا، مش غزة اللي مسرحية، احنا اللي مسرحية كوميدية عبثية مالهاش بداية ولا نهاية، بقينا عاملين زي الواد منصور، ما بيجمعش

نهدا كده ونركز

يعني فيه نائب في مجلس الشعب كان رافع قضية على كامب ديفيد، اهي دي حاجة مفيدة، اقصد تضامنا مع غزة، مش بس تضامنا مع غزة، وتضامنا معانا احنا كمان، كامب ديفيد ذلتنا وبهدلتنا وسلبتنا سيادتنا وكرامتنا وحطتنا تحت رحمة امريكا واسرائيل ابد الابدين وعزلتنا وهي السبب في كل اللي احنا شاربينه دلوقت، احنا لو كنا مشينا على خطة التنمية كان زمانا كأحسن ما يكون، مش لو ما كناش انشغلنا بقضية فلسطين

الا موضوع فلسطين هي السبب في سوء احوالنا معيشية دي، ماهو تخريف بقى من ضمن التخريف

الواحد منين ما يمشي يلاقي تخريف، بقى هي قضية فلسطين اللي قالت لنا اقضوا على الزراعة والصناعة واقلبوا المجتمع من انتاجي لاستهلاكي وبدل ما تنتجوا اشتغلوا كومسيونجية تستوردوا شيبس ولبان وشيكولاتة وشامبوهات وتجيبوا ضرف المصانع وتبوروا الاراضي اللي فيها طمي عشان تدوا فرصة للمستثمرين يستصلحوا الصحرا لانها مكلفة والسرقة فيها مش باينة؟ وللا كامب ديفيد اللي حطتنا تحت رحمة شروط امريكا وشروط البنك الدولي وميسز بوكس والمستثمرين الاجانب والشركات المالتي ناشونال والديون اللي بتولد والمعونة اللي لا بتشبع ولا تخلا من النجاسة؟

بقى هي قضية فلسطين اللي السبب في ان حدودنا تنضرب ومجالنا الجوي يخرق واحنا ما نفتحش بقنا؟ 

على اي حال، امبارح المسخناتي اللي كان بيكلمني قال لي قانونا احنا ممكن نطلب التضامن بوصفنا مواطنين متضررين في القضية اللي رافعها النائب ده، طب انا عايزة الاقي الراجل ده، حد يعرف له طريق، هو صعيدي، كان باين من لهجته، واسمه محمد عواد او عودة مش فاكرة، ونائب في مجلس الشعب

انا عايزة اتضامن معاه، الجدع المسخناتي طلعها في دماغي، واقطع دراعي من لغلوغه لو هو تضامن وللا عمل حاجة، هو يزقني ويخلع، بس انا الفكرة عاجباني، مش بس عشان نفسي اخلص من كامب ديفيد، لاني سواء كسبنا القضية او خسرناها، يكفيني شرفا اني اتضامن مع الشخص الوحيد في البلد دي اللي سلوك مخه موصلة على بعض وبيفكر بالتسلسل المنطقي الارسطوطالي التقليدي: مقدمات بينها روابط، ونتائج منطقية لهذه المقدمات

معلش اصلي انا دقة قديمة شوية وتقليدية

ماليش في مسرح العبث وشعر الحداثة بتاع ماذا عن الخنفساء التي في نخاعك والبدر يخرج من كهرباء حذائك؟

حد يجيبهولي بقى وانا ح ادور من ناحيتي واللي عايز يتضامن يتفضل معانا  

لجنة دعم اهالي الدويقة

الميل ده جالي من تامر وجيه

لجنة دعم أهالي الدويقة

تكونت لجنة من عدد من المراكز الحقوقية والنشطين والصحفيين بهدف تقديم كافة أشكال الدعم سواء العينى أو الحقوقى لأهالى منطقة الدويقة بعد الكارثة التي راح ضحيتها مئات الأشخاص وشُردت مئات الأسر.

وقد عقدت اللجنة اجتماعين تم على أثرهما تكوين أربعة لجان متخصصة لتوفير هذا الدعم وتتمثل في الآتي:

1- لجنة المساعدات: وتقوم هذه اللجنة بجمع المساعدات العينية وتوصيلها لأهالي الدويقة.

2- لجنة الدعم القانوني: وتختص بالدفاع القانوني عن حقوق سكان المنطقة.

3- لجنة إعلامية: وتقوم هذه اللجنة بتنظيم اللقاءات والمؤتمرات الصحفية وعرض القضية على المستويين المحلى والدولي.

4- لجنة الاتصال: وتقوم هذه اللجنة بالتنسيق العام سواء بين أعضاء اللجنة أو بين اللجنة وأية جهات أخرى ترغب في التنسيق مع اللجنة لتقديم الدعم لأهالي الدويقة.

وقد تم الاتفاق على استقبال المساعدات العينية بدءا من يوم السبت الموافق 13/9/2008 وذلك بالمركز المصري لحقوق السكن القائم في 33 ش قصر النيل الدور التاسع.

تليفون وفاكس: 23922194 / 23952952

خبر عاجل من على التويتر

من مالك مصطفى عشان هو في هشام مبارك وهم اللي متابعين قضية الدويقة

النائب العام احال محافظ القاهرة ورئيس حي منشية ناصر الى التحقيق بسبب احداث الدويقة 

يييسسسسسسسسسسسسسسسسسسسسسسسسسسسسسسسسسسسسسسسسسسسس

طب وبغدادي؟ مش ح يحول بغدادي للتحقيق، حيدر بغدادي النائب عنهم في مجلس الشعب، لما الصخرة اتهدت على راسهم راحوا له مشاهم ولا سأل في قرعتهم وبس بيطلعوه في الجزيرة يقول اسرائيل ما بتخافش غير من مبارك ولولا خافت من مبارك ما كانتش وقفت حرب غزة قامت خديجة بن قنة قالت له طب ليه ما خوفش اسرائيل من اول يوم قام قال لها: لا ماهو لازم يتم ردع حماس برضه

ههههههههههههههه

مش ح يتحول للتحقيق ده؟ ده طرد سكان الدويقة لما راحوا له، هو لازمته ايه؟

الخبر التاني من نورا يونس على التويتر برضه ان فيه مظاهرات كبيرة في جامعة الازهر احتجاجا على الجدار

بس انا مبسوطة بخبر الدويقة ده، يارب ياخدوا حق الغلابة اللي ماتوا ويدوا اللي عايشين شقق ويعيشوا زي البني ادمين
----
آه ونسيت، مصر تتهم حسن نصر الله بالعمالة للنظام الايراني 
انا سألت سؤال قبل كده وماحدش رد عليا: المسرحية الهزلية المكونة من سبعمية سبعة وتمانين فصل دي ح تنتهي امتى؟ انا مش ح اقول اللي اختشوا ماتوا لان الله يرحمهم قبل ما يموتوا ما عدوش في الشارع اللي احنا ساكنين فيه اساسا ولا حتى سلموا على جار طليق بنت عمة جدتنا فاحنا ما نعرفهمش وبالتالي مش زعلانين عليهم ولا بنحيي ذكراهم السنوية، ودي اول مرة نسمع عنهم والله، ومش عارفين البني ادم لما بيختشي بيحصل له ايه؟ 
يعني نظام بيبني جدار لحصار اهل غزة بالتعاون مع اسرائيل وامريكا وفرنسا عدوان رباعي على اطفال وحريم لما وصل الامر ان اسرائيليين جم يتضامنوا يعني صعبوا ع الكافر والراجل ما كانش يقدر يعدي مناسبة عاشوراء من غير ما يتكلم عن اهل غزة يعني ضميره ما يسمحلوش، ماهو فضل ساكت وبيتقي شر لسان النظام المصري ولهم عين يقولوا له يا عميل ايران؟ أأأ....إإإ مين اللي جاب القلعة جنب البحر؟ مين اللي جاب القلعة جنب البحر؟

للتبرع لاهالي الدويقة

اول حاجة اسمعوا اذاعة الموكوس هنا
تحفة
ثانيا جبت من ابناء مصر المعلومات دهين واليكم نص الخبر:

لسلام عليكم ورحمة الله وبركاته


مشاركة من موقع أبناء مصر لأهالى الدويقة فى مصابهم الجلل تدعوا أبناء مصر كل زائريها للتبرع على أرقام الحسابات البنكية الآتية لصالح أهالى الدويقة

بنك ناصر الاجتماعي

حساب رقم 888


او مؤسسة مصر الخير

حساب رقم 100100


هذه الحسابات مضمون وصول التبرعات لمستحقيها والقائم على هذه الحسابات مفتى الديار المصرية
دكتور على جمعة

لمساعدة اهالي (الدويقة) : تحضير وجبات + مساعدات اخري يتم تحت اشراف الجمعيات التالية

جمعية سما 0101113461

جمعية رسالة نور على نور 0128602602

جمعية البداية المتواجدة بالمنطقة 0112727789

جمعية الرسالة 0101900964

أو أشرف مهدى 0101697181

جمعية الاورمان 19455

هنا موضع الزكاة والصدقات ان لم نعاون أخواننا فى هذا المصاب الجلل فمن لهم

من فرج عن مسلم كربة من كرب الدنيا فرج الله عنه كربة من كرب يوم القيامة

بالنوسبة لبتوع سيبنا بقى من غزة

ااااااااااااااااه، وكأن جريمة نجع حمادي جات لهم نجدة من السما، اي والله، ماهو انا لما باشك انا عارفة ان قلبي قلب خساية

طب احضرونا يا بهوات وسيدات ويا انسات

وكتاب الله المجيد، وكتاب الله المجيد، وللا اعدم تامر امين ان بتوع الشأن الداخلي دولم ما بنشوف خلقة اهاليهم في ايتها قضية في الشأن الداخلي، لا شفنا وشهم في كفر العلو، ولا عملوا حاجة في الاضرابات، ولا شفنا وشهم في القرصاية، ولا شفنا وشهم في الضرايب العقارية، ولا شفنا وشهم في العبارة، ولا شفنا وشهم في قضايا الفلاحين، ولا شفنا وشهم في اعتصامات العمال، ولا شفنا وشهم الدويقة

(وانا بادور على اللنكات اكتشفت ان بعض من شقى عمري طار، فيديوهات القرصاية والضرايب العقارية وخلافه من ايام ما المدونة الاولانية خالص انتحرت)

ابدا ابدا ابدا، ما بنشوفش وشهم غير في القضايا اللي بتاكل مع الاجانب بس، اي والله عليكوا، ولا لهم اي دقة جدعنة في ايتها موأف يا مؤمن، سبحان الله في القضايا الوطنية الحقيقية دايما دايما دايما هم عبده ظروف

امتى بقى بيفتكروا الدويقة والعبارة والعمال والفلاحين؟ اول ما تيجي سيرة فلسطين، مش معنى كده انهم لا سمح الله بينزلوا يروحوا في اي داهية تاخدهم، لا العفو، هم بس بيجيبوا سيرتهم وخلاص، اول ما سمعوا عن قضية المعابر وقافلة شريان الحياة ما بطلوش ولولة على الدويقة، مع ان سبحان الله ولا اله الا الله ولا حول ولا قوة الا بالله وان شاء الله والحمد لله بتوع الدويقة دولم فضلوا مرميين قدام المحافظة وانضربوا وطلع ايماناتهم الا ماحد فيهم نزل عبرهم بكوباية مية

اي والله يا مزمن، ما كانش حد حارق نفسه على غزة وح يموت وح ينزل له البواسير واللي نزل وهو عيان واللي راح واللي جه الا اللي ماسكين ملفات العمال والفلاحين والقضايا الداخلية، وتلاقي ناس ما بينزلوش من تحت اللحاف يزايدوا على ناس زي حسام الحملاوي مثلا اللي شايل العمال على كتفه وداير بيهم في كل حتة لما خنقنا، ليه وليه بيقول غزة

ده من حيث الواقع المعاش

من حيث النظرية، انا عايزة افهم بقى، هي الناس دي بتشتغل لحساب مبارك وللا ايه؟ عايزين يخفوا الضغط من عليه ليه؟

يعني الداخلية والاعلام المصري ادعوا ان اهل غزة ضربوهم وعوروهم، ثم بعد كده، هم هم نفس الناس، ادعوا ان المسيحيين في نجع حمادي ضربوهم وعوروهم، وهم هم نفس الناس دي قبل كده ادعوا ان بتوع المحلة ضربوهم وعوروهم، وبتوع الجزائر ضربوهم وعوروهم في عقلهم الباطن، وهم المضروبين في الارض، وكل ماحد يشوفهم يا ضنايا يضربهم ويعورهم واغلب الظن ان الغزاوية والمسيحيين قلعوا لهم البنطلونات برضه

طيب مافيش حد مش عارف ان النظام هو اللي عامل الفتنة الطائفية، وللا لسه فيه حد مش عارف؟ وللا لسه ماحدش واخد باله ان امناء الشرطة كانوا بيروحوا للمسلمين في الصعيد يقولوا لهم انصروا دينكوا دول بينصروا البنات تقوم الناس هجووووووووووم؟ وللا لسه فيه حد شاكك ان الكنيسة في نجع حمادي بلغت عن التهديدات اللي وصلتها ومع ذلك ما حطوش حراسة كافية ووقفوا يتفرجوا على الناس وهي بتموت وكمان طلعوا بيان يقولوا اصل المسيحيين بيغتصبوا الاطفال فيا عيني اللي قتلهم بقى كان دمه محروق، فيه اكتر من كده تحريض علني على المسيحيين؟ لا واليوم الساقع بتقول الاقباط بيحرقوا "بعض ايات القرآن" مش عارفة يعني ايه بيحرقوا بعض ايات القرآن، ما الامريكان كانوا بيحرقوا المصاحف، لكن بعض ايات القرآن دي شافوها ازاي يعني؟ كانت سلسلة ماشاء الله دي وللا حجاب في عب واحدة ده وللا ايه؟

طيب ماهو ده نفس النظام اللي محاصر غزة، ايه المانع حضرتك انك تقول له ياللي محاصر غزة وبتموت المسيحيين؟ هو ايه؟ وان اتهام ات اه تايم مثلا؟ مش مسموح لنا بالتصدي للنظام الا قضية واحدة كل شهر؟ لنا كوتة يعني؟

لا معلش بقى، انا ما سمعتش حد من اللي بيقولوا غزة قال: مالناش دعوة بالمسيحيين يولعوا. لكن سمعت من اللي سايبين كل حاجة جوة وبرة تولع بيقولوا مالناش دعوة بغزة خلينا في المسيحيين، لا ده انت عايز تخف الضغط عن النظام بقى، بتخدم عليه يعني، بدل ما يبقى عليه ضغط من جوة وبره عايز ترحمه، لها تفسير تاني؟ لها معنى تاني؟ ايه مصلحتك انت وانت بتدعي انك ضد النظام انك تخفف عليه الهجوم من ناحية سياسته الخارجية؟ اذا كان هو عنده وقت وجهد انه يقرفنا جوة وبرة، انت وراك ايه يعني لما تقرفه جوة وبرة انت كمان؟

طب انا زي ما رحت الوقفة بتاعة غزة ان شاء الله رايحة الوقفة بتاعة التضامن مع شهداء نجع حمادي

ادي وشي اهو.. اهو، غرقوه تفافة لو حد من بتوع: "مالناش دعوة بغزة خلينا نركز في الشأن الداخلي" حراس مصالح النظام، عتب ناحية الوقفة دي
--------
حاجة تانية مهمة قوي، اكتبوها يمكن تنفعكوا:
الانسان اللي غاب عن جريمة، اي جريمة، هو بريء منها لحد ما يدافع عنها، او يتستر عليها، او يبررها، او يقلل من حجمها، او يسكت عليها، او يصرف نظر الناس عنها
عشان كده الرسول قال الساكت عن الحق شيطان اخرس
الكلام ده ينطبق على جريمة نجع حمادي وجريمة غزة على حد سواء وعلى اي جريمة بترتكب باسمك سواء اسمك مصري او اسمك مسلم، انت ايدك مش مغسولة من دم اي من ضحايا نظامك طول ما انت ساكت، والسكوت علامة الرضا

عاجل: القبض على اهالي الدويقة والنشطاء ثم اخلاء سبيلهم

انا لسة صاحية وفتحت الجيكو لقيت الرسايل دي بالترتيب:

تضامن:القت قوات الامن القبض على العشرات من اهالي الدويقة وعدد من النشطاء من بينهم عصام شعبان وعمرو يوسف وعبدالله يحيى

الامن مقبضش على حد من الاهالي,اتقبض على 3بس من النشطاء واتساب اتنين منهم ع الصحراوي والتالت حيحصلهم

By MaLek 1 hour, 33 minutes ago.

تضامن:توقفت عربات الامن المركزي المحملة باهالي الدويقة في حلوان.واخلاء سبيل عصام شعبان وعمرو يحيى

By Tadamon 1 hour, 31 minutes a

الاهالي حسب "حمادة الكاشف"متحطوش في عربيات امن مركزي,ركبوا عربات ميكروباص وبينزلوا في حتت متفرقه

By MaLek 1 hour, 38 minutes ago

وسنوافيكم بالاخبار

ايزنهاور؟

الخبر ده نيوترال اداني اللنك بتاعه بس انا ح انقله لان زي ما شرحنا قبل كده الاهرام متخلف وما بيدخلش الناس على الارشيف لان الارشيف عادة بيغير هدومه كتير

سوزان مبارك تعتذر
عن حفل تكريم لمتابعة حادث الدويقة

اعتذرت السيدة سوزان مبارك قرينة السيد رئيس الجمهورية ورئيسة الهلال الاحمر المصري عن عدم حضور حفل لتكريمها ومنحها جائزة ايزنهاور للسلام‏,‏ لتتفرغ لمتابعة جهود غرفة العمليات التي شكلها الهلال الاحمر المصري والجمعيات الاهلية لإغاثة ضحايا كارثة الدويقة‏.‏

وكان من المفترض أن تتسلم السيدة سوزان مبارك الجائزة من السيدة ماري ايزنهاور رئيس جمعية الناس للناس‏.‏

يذكر أن سوزان مبارك تولي إهتماما خاصا بتطوير العشوائيات من منطلق إيمانها بضرورة توفير المجتمع الآمن لقاطني هذه المناطق وتبنت سيادتها عدة مشروعات قام بتنفيذها الهلال الأحمر وجمعية الرعاية المتكاملة لتطوير العشوائيات في مناطق الدويقة وعزبة وعرب الوالدة والمعصرة وحلوان‏.‏

ايزنهاور؟
جايزة الناس للناس من ماري ايزنهاور؟
الناس للناس؟ اللي هي بيبول تو بيبول يعني بالعنجليزي
يقصدوا الناس لبعضشيها يعني يا كابتشن، بالنوسبة لايزنهاور فالمفروض طبعا ان الخدمات اللي ح يقدمها هو انك نفسك تموت شهيد زيي كده، قوم يحقق لك امنيتك، قرفان من عيشتك وحياتك فيرسلك الى الرفيق الاعلى، واقع عليك ظلم فيبعتك لدار العدل
كده يعني
قوم اعتذرت السيدة عن حضور الحفلة اللي ح تتكرم فيها، واكيد هي والاسرة الكريمة اجدر ناس يتكرموا بالجايزة دي، هم كسبوا ثواب في ناس كتير بعتوهم للي ارحم من الام على رضيعها
وهو ده معنى جايزة ايزنهاور للسلام، وهو السلام الدائم، حيث ترقد في سلام يا عبسلام
يذكر بقى ان الخبر بيقول يذكر ان السيدة سوزان اهتمت بلا بلا بلا
ايه نوع تطوير العيشوائيات؟
مش قلت لكوا اعظم انجاز خيري انك ترسل الناس للرحيم، تخيل يا اخي المواطن لما تتحمل عبء قتل المواطنين وتشوف الدم يخر..والدم يخر..والدم يخر..عشان تكسب ثواب في الناس الغلابة وتوديهم الجنة
هو ده الايثار
ربنا يكرمك ويوفقك وتكسب جايزة الاخوان هولاكو وهتلر

هو مش عاجل قوي: الامن يضرب سكان الدويقة بالشوم

الكلام ده كان الساعة 9 بالليل النهاردة، كده برضه؟ بقى البنت المؤدبة المتربية بنت الناس المحترمين توصلوها انها تقول كده؟
ولسة
على فكرة احنا كنا بنقترح ان بتوع الدويقة يتبعوا نفس خطة كفر العلو
بس الراجل بيقول: الاعتصامات ما بتعملش حاجة، ده واحد من الدويقة
طيب يجرب طه

براءة ان شاء الله

طب وايه لزوم التأجيل يعني ما براءة ان شاء الله، وح يطلع الاغذية كويسة ومرضى السرطان هم اللي ما عرفوش ياكلوا، كانوا بيمضغوا بطريقة غير صحية جابت لهم سرطان
معروفة دي وخير الشر عاجله يعني
---
على فكرة مالك النهاردة بعت على الجايكو ان 25 اسرة من اهالي الدويقة قالوا لهم امكوا في العش وللا طارت قاموا عملوا اعتصام على مزلقان الدويقة
مش عارفة بقى ايه اللي حصل تاني
ومش شايفة اخبار جديدة على الجايكو ولا على هشام مبارك
على اي حال انا واخدة اجازة لظروف عوائلية في الفترة اللي جاية الا لو فيه حاجة قهرية بخصوص الدويقة

الاجازة مش داخل فيها الدويقة

ملحوسة: الافتراض السابق طلع خاطئ القرين مش معانا على الجايكو ولا حاجة
نعتذر لهذا العسر الهضمي
---------
احنا اتفقنا اني مريحة شوية فيما عدا ما يخص الدويقة، اهالي الدويقة يعاودون الاعتصام مرة اخرى امام المحافظة اليوم بعد المغرب الخبر من عند مالك

ومدام الواحد دخل بقى يبقى بالمناسبة السعيدة دي شوفوا الخبر ده وما يحدث في الدنمارك بلد حرية الابداع وسب اديان الناس والمشي في الشوارع توبليس

وبعدين شوفوا ده عند ابي، وده عند قطة، طيب انا وقطة لينا اعداء ابي ليها اعداء كمان؟ طب دي حتى ابي امبارح تلبستها روح عم مدبولي وقعدت تقول لقناوي: قوم يا قناوي انا جبت لك المهر في جيبي اهو، قوم البس بدلة الفرح، بس هو جري بقى وما ركبش الاسعاف
عموما انا عارفة من زمان ان مستشفى العباسية بتسرب المرضى
بس ما كنتش اعرف انهم بيزودوهم بلاب توب وهم ماشيين
يا اخوانا مافيش حد هاكر ابن حلال كده يجيب الاي بي ادرس ويدخل على جهازه يلغمهوله على الله ينفجر فيه؟
احنا اتأكدنا امبارح ان قرين ابي هو قريني بس لسة ح نشوف بقى هل هو نفسه قرين قطة وللا لا
يا ماااااااااااااااااااااالك يا جاااااااااااااااااااااااااااابر يا احمد يا غربية انتوا مش باشمهندزين قد الدنيا ما تشوفوا لنا الموضوع ده

عاجل: حتى لا تتكر مأساة الدويقة

مشروع حلم أسطبل عنتر يحتاج إلى مساعدتكم في رمضان

حتى لاتتكرر حادثة الدويقة في اسطبل عنتر

تبنى المشروع أسس التنمية و التمكين ليستطيع سكان العشوائيات (مثل عزبة خير الله و اسطبل عنتر و التي بها مساكن تماثل حالة الدويقة) رفع مستوى معيشتهم و التحكم في زمام أمورهم

في عام 1999 بدأ الاهتمام بمنطقة اسطبل عنتر وعزبة خير الله العشوائية، وتمثل الاهتمام بالقيام بدارسة اجتماعية لحالة أهالي المنطقة، وعليه بدأ العمل الخيري بتقديم كفالات ومساعدات مالية وعينية لأهالي المنطقة، ثم بدأ المشروع يقدم قروض متناهية الصغر لدعم من يقدر على إقامة أي مشروع في المنطقة إلا أن معظم هذه المشروعات لم تنجح، فأجري المشروع المزيد من الدراسات على أهالي المنطقة فتبين أن 75% منهم باعة جائلين أو 'شيالين' وأنهم يفتقروا لأية مهارات أو حرف تؤهلهم للكسب الذي يكفل لهم عيشة كريمة. قرار، وترتب عليه أن قرر المشروع إقامة برنامج يؤهل أهالي المنطقة بتعليمهم حرفة أو مهنة يتكسبون منها إضافة إلى العمل على محو أميتهم.

في عام 2003 بدأ المشروع بإقامة مشغل للخياطة والتريكو لإنتاج الزي المدرسي لأولاد فقراء المنطقة و تطور المشغل و أدخلت الأشغال اليدوية و أصبح ينتج مختلف المنتجات ذات الجودة العالية، تلى ذلك سنوات من التدريب و مراقبة الجودة ,وقد نجح المشروع في غرس قيمه في المشاركين، فارتفع مستوى وعيهم واستشعروا بالخطر و أهمية الكسب الحلال والحصول على عيشة كريمة فتمكنوا من الإنتقال إلى مساكن آمنة بعيدة عن الخطر

ثم بدأ الحلم يتطور ويتوسع ليقدم مختلف المساعدات لأهالي أسطبل عنتر، ولكن وجدنا أنه مهما زادت التبرعات وكثرت لن تعدو أن تكون مساعدات خيرية قد تستمر وقد تنتهى ، لذلك تقرر تعليم أهالي المنطقة كيفية مساعدة أنفسهم عن طريق تعليمهم حرفة يمتهنونها وبدأنا بإقامة ورشة للتدريب على صناعة السجاد، ولكن نحتاج إلى مكان أكبر يستوعب أكبر عدد ممن يتخرجون من ورشة تعليم صناعة السجاد والمتسربين من التعليم حتي يجدوا مكانا للكسب العيش الشريف. وفي سيعنا لذلك نحن لا نخدم أهالي المنطقة فقط ولكن نخدم مصر بأكملها حيث يمكن أن تصبح المنطقة المكان الذي نعيد فيه إحياء الحرف اليدوية التي كادت تندثر في مصر.

ومن هنا نحن نناشدكم جميعا أن تعاونونا في جمع مبلغ 250,000 جنيه مصري وذلك لتمويل المشروعات الحالية بعضها قائم ولكن يحتاج إلى توسع والتطوير والتحديث حتي يؤتي أكله والمشروعات هي كالآتي

1- مدرسة الفصل الواحد للأطفال

2- مدرسة السجاد للأطفال

3- محو الأمية للسيدات

4- محو أمية للرجال

5-تربية دينيةو أخلاقية و تحفيظ قرآن

5- التأمين الصحي للأسرة

7- انشطة رياضية للأطفال و الشباب

8- أنشطة فنية للأطفال

9- نشاط المسرح (التنمية من خلال الفن)

10- برنامج شامل للتوعية

11- قروض لعمل مشروعات للرجال

وكما ترون أن المشروع لا يهتم فقط بالجانب الاقتصادي في المنطقة و لكن أيضا بالجانب التربوي حيث يسعى إلى توفير الترفيه جنبا إلى جانب التعليم والتدريب لأن ذلك سيساعد في تنشأة أطفال وفتيان المنطقة بشكل صحي وقويم ينأى بهم عن تعاطي المخدرات وارتكاب الجرائم

للإتصال غادة 0105470806

نيفين 0105215288

مشروع اسطبل عنتر 0189540193 العنوان 4 شارع الرماية اسطبل عنتر زهراء مصر القديمة

لالالالالالالالالا معقول؟

ههههههههههههههه ايه ده؟

انا ح ادور على الفيديو اللي فيه واحدة من الدويقة بتدعي على حيدر بغدادي واجيبهولكوا، ربنا يجعله من حده ومن نصيبه
بس برضه ما حدش رد عليا: ايه العسل اللي احنا فيه ده؟

---

اهو

واحد بتدعي على حيدر بغدادي

وواحدة تانية بتحكي عليه، وانتوا عارفين بقى، انا كله كوم واهالي الدويقة واسطبل عنتر بالنسبة لي كوم تاني، اللي يئذيهم بالنسبة لي ما يفرقش عن اولمرت قيد انملة

شاهد اعتصام اهالي الدويقة امام المحافظة

الفيديو على اليوتيوب هنا


تحديث: طفاطيفو شال الجملة اللي مضايقة الاهالي ولو انها عادية بس هم احرار ونزل الفيديو كامل هنا، وانا ح انزله على اليوتيوب ان شاء الله عشان يبقى اسهل

هي الدنيا ليل وضلمة والموبايل بتاعي فاشل والصوت مش واضح قوي عشان كده ح احكي لكوا مع الفيديوهات

الشرطة زهقت طبعا من الزوايد البشرية اللي في الدويقة، بيقولوا لهم ما تغوروا بقى احنا فاضيين لكوا؟

الناس نايمة في الشارع راحوا قعدوا في نادي منشية ناصر الاجتماعي، هم بقى وزعوا بعض الشقق على الاحباب والاصحاب وعلى اللي دفعوا فلوس وعلى الناس اللي مكتوبين في البطاقات انهم تبع منشية ناصر، اللي مكتوب انه الفيوم او اي حتة تانية، زي ما تلات اربع مصر مكتوبة في البطاقة غير محل اقامتها، ما اخدوش حاجة، قعدوا في النادي والنادي حاجة مقرفة جدا فيه عيل اتقرص بعقربة في النادي، وهو طفل رضيع، شكله تلات شهور بس ممكن يبقى خمس شهور وشكله مسخوط من سوء التغذية، المهم الحكومة زهقت منهم والشرطة عايزة تخلص منهم، راحوا داخلين عليهم ونازلين ضرب في الستات والعيال،

الست بتقول ما ضربوش الا الستات، يا عيني على المرجلة، قعدوا يدعوا على الحكومة وعلى نائب مجلس الشعب عن الدايرة حيدر البغدادي. سألت ستتين منهم انتوا انتخبتوه، اتنين قالوا لي لا طبعا ما انتخبناش حد احنا عارفين انهم ناس وحشة. سألت ست تانية قاعدة بولادها وهي مطلقة وعندها ولد وبنت، قالت لي ايوة انتخبته كنت فاكراه راجل كويس انا ما اعرفش انه كده، بس هو خلي بينا وجامل حبايبه وبلدياته على حسابنا

لا وشوف المخ بيطلعوهم ازاي؟ ولعوا نار في المكان، تصدقوا؟ تصدقوا انهم يرموا صواريخ نار على الناس عشان يطفشوهم من المكان؟
العيال الصغيرة لقوا كاميرا فرحوا قوي وقعدوا يتصوروا ويتكلموا،

عيل منهم قال: انا ابن وزير انا، انا ابن الملك و....ام مبارك! عيل تاني بتاع عشر سنين كده قال لي: ما زمان الناس كانت بتلاقي الاكل، دلوقت كل حاجة غالية قوي...طيب ليه حسني مبارك بيغلي الحاجة على الناس؟ قلت له: تفتكر انت ليه؟ قال لي: عشان يكسب هو...بس مش حرام عليه؟

انت في سنة كام؟ انا في سنة خامسة...انا في اولى اعدادي..انا في سنة ساتة...ولقيت عيل زئرد كده لابس فانلة...بس مافيش اي حاجة تانية وعنده بتاع اربع سنين جاي يقول لي: انا في عاشرة
عندهم كلام كتير وعمالين يقولوا لي: الحاجات دي ح تنزل في كناة ايه؟ وللا على ترنت؟ طيب نزليها دلوقت..نزليها ووزعيها
مشيت وهم لسة بيتكلموا وما عرفتش اسكتهم
فيه فيديو فيه كلام عادي، بس بعد ما اتكلموا اللي فيه جم قالوا لي: لا خلاص ما تنزليش حاجة، عشان كده الفيديو ده مش ح انزله، هو عموما مافيهوش حاجة جديدة عن الفيديوهات التانية
ان شاء الله ح اروح لهم بكرة لانهم لسة عايزين يتكلموا، بالنسبة للفيديو الاخير هو مهم عشان كده باحاول ابعته لطفاطيفو عشان يشيل اخر جملة في الفيديو لان دي هي اللي خلتهم يقولوا ما تنشريش لفيديو

عاجل: طلب مساعدة لاهالي الدويقة حالا لوسمحتوا

تحديث:
خلاص خلاص....اهم حاجة دلوقت الدكتور، مش عايزين غير دكتور يروح يكشف على الاطفال دلوقت.
----
اهالي الدويقة معتصمين من امبارح بالليل قدام محافظة القاهرة في الجنينة اللي في عابدين
مالك كلمني دلوقت وقال لي انهم محتاجين بطاطين وطبيب ييجي ساعتين يشوف الاطفال وبعدين اي حاجة انت شايفها تنفع في الصيام
ترمس شاي ترمس قهوة اي حاجة يعني انت وضميرك
ربنا ييسر واروح بعد الفطار بس ممكن حد يشرح لي بالظبط فين محافظة القاهرة دي بالتحديد يعني؟

اسطبل عنتر وعزبة خير الله في انتظار مصير الدويقة

بداية هم ابتدوا يرشوا مواد كيماوية في الدويقة، غالبا ح يولعوا فيها وللا حاجة، هم بيقولوا لا والله ما جيت جنبه والله ما كلمته، ده احنا بس بننضف عشان نشتغل على رواقة
وبعدين
وحذر بيومي من وقوع كارثة مماثلة في مناطق «إسطبل عنتر» و«عزبة خير الله» في منطقة مصر القديمة، مشيرا إلى أن تلك المنطقة يسكنها نحو 750 ألف شخص وهم جميعا مهددون بسقوط صخور المقطم فوق رؤوسهم حيث أن مياه الصرف الصحي تنصرف في الهضبة وعاجلا أو أجلا سوف تحدث الكارثة. وهو ما رد عليه محافظ القاهرة قائلا لـ«الشرق الأوسط» «إن المزاعم كثيرة وتحقيق المكاسب الشخصية فرصة ولن نرد عليها وليس الوقت وقت لعب بالمصالح».
مصالح مين ما اعرفش..اكيد مصالح الشعب، ماهو مش معقولة نطلع اشاعات عشان مصالح الشعب
احنا ضد المصالح، لان المصالح اوالح زي ما انتوا عارفين
--------
طيب حد يعرف حاجة يا جماعة عن الهضبة الوسطى؟ انا ابويا ساكن هناك
هل فيه خطر على الهضبة الوسطى؟

اهالي الدويقة واسطبل عنتر بيقطعوا بسرعة

عارف اما اللبن يقطع بسرعة، ما يبقاش فيه مواد حافظة وتبقى حاطة في التلاجة وفجأة يتغابى عليك ويروح قاطع، اهم اهالي الدويقة واسطبل عنتر كده، بصراحة بقى بيتلككوا عشان يموتوا ويرموا بلاهم على الحكومة الرشيدة، تروح الحكومة تخليهم، يموتوا وهم بيتخلوا، تسكنهم في خيم يموتوا وهم بيتسكنوا، تسحلهم عادي يعني بالراحة وتجرجرهم بشويش برة البيوت بالشوم...بسيطة يعني بس كده نغزة وللا حاجة يطبوا ميتين تسكنهم في شقق ماما سوزان يموتوا
ماحدش بقى يقول لي ان الحكومة بقى هي اللي غلطانة، الله جرا ايه يا اخوانا ايه الدلع ده هم بسكوت يعني؟ مش عارفين يستحملوا كام شومة على كام جرجرة على كام سحلة على كام زقة على كام تكويمة، دي عالم بتستهبل فعلا، اصلا اصلا دي عالم مجرمة وبترمي بلاها ع الناس، عارفين زمان الصايع اللي يبطح نفسه عليك، دلوقت الصياعة تطورت بقى يموت نفسه عليك
الست اللي ماتت دي هدوا لها بيتها اللي كلفته كتير وما اخدتش تعويض، ييجي واحد يقول لي ماهم بانيين من غير ترخيص، على فكرة فيه برضه في اسطبل عنتر بانيين من غير ترخيص وزعلانين على الفلوس اللي صرفوها ولما اتقال لهم انتوا مالكوش حق انتوا بانيين من غير ترخيص سألوا سؤال لوذعي احرج كل وزراء خارجية جامعة الدول العربية: لما احنا بانيين من غير ترخيص كنتوا بتدونا ليه عداد كهربا ما فيه بيوت تانية سارقين كهربا واحنا قدمنا على عداد وانتوا عارفين انه مخالف...طب ادتونا عداد ليه؟
اممممممممممممممم
احراج ده
آه آه ماهو انت اصلك ما تعرفش تتكلم مع الاشكال دي زي ما كان الاخ مصطفى بتاع المصري اليوم بيقول، ماهم مجرمين وصيع وما تعرفش تاخد منهم حق ولا باطل، وقمة اجرامهم في انهم كل شوية يطبوا ميتين عشان يلوثوا سمعة الناس الشرفا

القبض على 22 مواطن من الدويقة

الشرطة قبضت على 22 مواطن من الدويقة واتنين اصيبوا ودلوقت المحامين رايحين ومحتاجين اعلام كاميرات يصورهم لمزيد من التفاصيل رجاء الاتصال باحمد عزت 0103978913

وبعدين بقى في وجع الدماغ ده

انا بجد برضه مش عارفة استوعب نضال اخر زمن في امريكا
منظمة قررت اولا انها متحدث رسمي باسم كل مسيحي مصري مهاجر، ثم متحدث رسمي باسم كل مسيحي مصري، ثم قررت انها تناضل في امريكا بمرتب الله اعلم كام الف دولار، ثم قررت ان وسيلة نضالها انها تشتكينا عند امريكا! عشان امريكا ح تعمل لنا ايه مش عارفة؟ طيب السؤال اللي بيطرح نفسيته، ماكنش في ضحايا مسيحيين في الدويقة؟ السؤال التاني اجباري مش اختيار: اخر مرة زار فيها اي عضو من اعضاء المنظمة دي انشالله الفراش ابو فانا كانت امتي؟ اخر مرة بصوا في وش الصعيد وللا في وش مصر كان امتى؟ يعرفوا ايه عننا وعن مصايبنا؟ ما يطلعوا من دماغنا بقى هم مش قاعدين في امريكا ياكلوا في قتة محلولة ويملوا كروشهم عايزين مننا ايه؟ وللا لا باحبك ولا باقدر على بعدك؟
احنا مش ح نخلص من وجع الدماغ ده؟
الله يخرب بيتك مطرح ما رحت يا شيخ انت السبب في كل اللي بيحصل ده

يديك على قد المصايب اللي عملتها فينا مطرح ما انت موجود، الناس تسيب صدقة جارية وانت سايب رزايا وبلاوي جارية حسبنا الله ونعم الوكيل