Wednesday, 14 January 2009

مناخيري اولا

امبارح كان فيه مكالمة طويلة مع واحد متعود يسخني على كل الناس، كان بقالي كتير ما اتكلمتش مع حد خالص ولا باقعد مع حد، وبعدين بقى امبارح هو استلمني، وابتدت المكالمة كالعادة، بانه اولا يستفزني، وبعد ما اصوت في ودنه (وانا امبارح كنت ح اتجنن، او اتجننت تقريبا بالفعل من اللي عملته الحكومة المصرية) وثانيا، بعد ما يسيبني اصرخ، يبتدي يوضح لي انه مش معترض على كلامي، وما تفهمش بيستفزني ليه في الاول طيب لما هو متفق معايا في الكلام، وثالثا بقى يفتن لي على كل الناس ويحكي لي على كل المناقشات الاستفزازية اللي بيتبادلها البشريات، طبعا مش ح اقول اسمه لانه بيقول عليا فتانة وفضحية. كل ده مش مهم
المهم انه وضح لي ان فيه ازمة فظيعة شاغلة الناس كلها دلوقت بعد موضوع غزة: مصر اولا؟ وللا الاسلام اولا؟
!!!!!!!!
افتكرت بعد ما قفلت معاه ان فيه مجموعة على الفيس بوك اسمها العروبة اولا
انا الحقيقة الازمة دي مأزماني قوي لاني مش عارفة احط ايدي بالظبط على الازمة، يعني اي مواطن في مصر، جنسيته مصري، ثقافته عربي، قارته افريقية، ودينه يا اما مسلم يا اما مسيحي. مش كده؟
طب فين الازمة يعني، ايه حكاية اولا؟ ومين ثانيا؟
انا اسمي نوارة، طولي مية ستة وستين سم، وعينيا سودا. دلوقت لو حد جه قال لي: لو خيروكي ما بين اسمك وما بين طولك ح تختاري ايه؟ تحبي تقصري ويفضل اسمك نوارة وللا تغيري اسمك وتفضلي طويلة؟
الحقيقة انا لو حد عمل معايا كده واصر على اني ارد عليه ح اعيط، لاني فعلا مش عارفة، طب انا ايه اللي يخليني يا اغير اسمي يا اما اقصر؟
ايهما اولا عينك وللا مناخيرك؟ شعرك وللا ودنك؟ انك خريجة اداب انجليزي وللا ان عندك جزمة بني؟
طب انا فعلا مش عارفة ايه وجه المنافسة ما بين ودني وشعري، ومناخيري وعيني، ومش عارفة ليه لازم اختار حاجة فيهم اولا وحاجة ثانيا؟
وكذلك مش عارفة فين وجه المنافسة ما بين المسيحي المصري والمسلم الاندونيسي، وما بين غزة والدويقة، وما بين اني في قارة افريقيا واني باتكلم عربي، اذا كنت انا اتولدت لقيت كل ده مع بعضه فيا، يبقى ليه فيه ناس مصرة تخيرني ما بين ودني ومناخيري؟
دلوقت هل سبق وللا وارد ان المسيحيين المصريين ياخدوا بعضهم ويحتلوا اندونيسيا؟ هل سبق وواحد اندونيسي اتخانق مع واحد مسيحي مصري على حتة شيكولاتة وطلبوا مني اني افصل ما بينهم؟
طب ما لو فصلت ما بينهم ح افصل بالحق بصرف النظر مين اندونيسي ومين مسيحي
هل اللي بيساعد الدويقة ما يقدرش ابدا يساعد غزة؟ هل اللي بيساعد غزة بيساعدها لانه بيكره سكان الدويقة ونفسه كلهم يموتوا؟
معلش يعني انا اعرف كويس قوي ان اللي نزلوا الدويقة في ايام الكارثة هم هم نفسهم اللي بيروحوا قوافل غزة
واللي ما بيروحش غزة وبيقول احنا مالنا ومالها دي حاجة ما تخصناش، والله العظيم والله العظيم ما عبر الدويقة بتلاتة صاغ ولا بكلمتين تعاطف، وما افتكروش الدويقة غير لما غزة انضربت، والله العظيم كمان مرة
وكذلك في المحلة....إلخ.
واللي بيعيش في الفشل في الامور الداخلية هو بيعيش في الفشل في الامور الخارجية
واللي اتسبب في كارثة الدويقة هو هو بنفس البنطلون بنفس الفانلة اللي اتسبب في كارثة غزة غزة
فين الازمة بقى؟
انا بجد مش عارفة افهم، واحد عمال يعذبني، ويطلع عيني، جه، هو هو نفس اللي بيعذبني ده، عذب شحيبر، وشحيبر ده اغلب مني، مش الطبيعي اني انا وشحبير نتضامن مع بعض ضد نفس الجلاد؟
هل من المنطقي اني فجأتن اتضامن مع الجلاد ضد شحيبر؟ من غير اي مبرر .......واجي على الضحية اللي زيي والومه في عز ماهو بينضرب، واساند الجلاد بكل ما اوتيت من قوة، مع انه في عز ما بيدي شحيبر بالشلوت بيديني انا في نفس ذات الوقت بالقفا، واقل ادبي على شحيبر، واقل اصلي، واقل كرامتي، وافضل اذل في شحيبر في نفس الوقت اللي انا باتذل فيه، واقول له ياما عملت لك، وياما سويت لك، وقمصاني وشراباتي
ليه؟
فيه سبب للجدل البيزنطي ده؟ 
امممممممم
غير ان شحيبر عنده كرامة وبيقاوم وبيقول انا مش ح اتذل ومش بيخاف، وانا ميت في جلدي وخواف وبصراحة كرامتي على قدي
هي كده؟ هي كده بقى؟
وللا عشان انا حاسة بالعجز والذنب تجاه شحيبر؟
وللا عشان انا زهقت من كتر ما انا غلبانة ومذلولة ما صدقت حد اغلب مني افش فيه غلي؟
طب انا كده محتاجة دكتور نفسي على فكرة يساعدني
النكتة بقى، ان الشخص الفتان اللي كان بيكلمني امبارح قال لي ان فيه نواب سحبوا استجواباتهم للحكومة تضامنا مع غزة
!!!!!!!!!!!!!!!!!!!!!!!!
لااااااااااااااااااااااااااااااااااااااه
حد يفهمني الكلام ده بجد، على اساس ايه بالظبط؟ على اساس ان الاستجوابات دي فرح واحنا ح نأجل كتب الكتاب عشان العزا اللي جنبنا؟ ده بدل ما نزود الاستجوابات ضد الحكومة اللي قارفانا وقرفها مطرطش على الناس كمان؟
طب الحكومة المصرية متآمرة على غزة نظمي فهمي رسمي، طب على الاقل، تضامنا مع غزة، اشغلها شوية عن غزة في الاستجوابات دي خلي الناس تترحم شوية من مبادرتها
طب وربنا كمان مرة انا ما فاهمة حاجة خالص
على فكرة
دي اسمها غباوة
اه والله، هي دي الغباوة بعينها يعني
كده ما ينفعش على فكرة، كده الناس فعلا ح تتفرج علينا، مش غزة اللي مسرحية، احنا اللي مسرحية كوميدية عبثية مالهاش بداية ولا نهاية، بقينا عاملين زي الواد منصور، ما بيجمعش
نهدا كده ونركز
يعني فيه نائب في مجلس الشعب كان رافع قضية على كامب ديفيد، اهي دي حاجة مفيدة، اقصد تضامنا مع غزة، مش بس تضامنا مع غزة، وتضامنا معانا احنا كمان، كامب ديفيد ذلتنا وبهدلتنا وسلبتنا سيادتنا وكرامتنا وحطتنا تحت رحمة امريكا واسرائيل ابد الابدين وعزلتنا وهي السبب في كل اللي احنا شاربينه دلوقت، احنا لو كنا مشينا على خطة التنمية كان زمانا كأحسن ما يكون، مش لو ما كناش انشغلنا بقضية فلسطين
الا موضوع فلسطين هي السبب في سوء احوالنا معيشية دي، ماهو تخريف بقى من ضمن التخريف
الواحد منين ما يمشي يلاقي تخريف، بقى هي قضية فلسطين اللي قالت لنا اقضوا على الزراعة والصناعة واقلبوا المجتمع من انتاجي لاستهلاكي وبدل ما تنتجوا اشتغلوا كومسيونجية تستوردوا شيبس ولبان وشيكولاتة وشامبوهات وتجيبوا ضرف المصانع وتبوروا الاراضي اللي فيها طمي عشان تدوا فرصة للمستثمرين يستصلحوا الصحرا لانها مكلفة والسرقة فيها مش باينة؟ وللا كامب ديفيد اللي حطتنا تحت رحمة شروط امريكا وشروط البنك الدولي وميسز بوكس والمستثمرين الاجانب والشركات المالتي ناشونال والديون اللي بتولد والمعونة اللي لا بتشبع ولا تخلا من النجاسة؟
بقى هي قضية فلسطين اللي السبب في ان حدودنا تنضرب ومجالنا الجوي يخرق واحنا ما نفتحش بقنا؟ 
على اي حال، امبارح المسخناتي اللي كان بيكلمني قال لي قانونا احنا ممكن نطلب التضامن بوصفنا مواطنين متضررين في القضية اللي رافعها النائب ده، طب انا عايزة الاقي الراجل ده، حد يعرف له طريق، هو صعيدي، كان باين من لهجته، واسمه محمد عواد او عودة مش فاكرة، ونائب في مجلس الشعب
انا عايزة اتضامن معاه، الجدع المسخناتي طلعها في دماغي، واقطع دراعي من لغلوغه لو هو تضامن وللا عمل حاجة، هو يزقني ويخلع، بس انا الفكرة عاجباني، مش بس عشان نفسي اخلص من كامب ديفيد، لاني سواء كسبنا القضية او خسرناها، يكفيني شرفا اني اتضامن مع الشخص الوحيد في البلد دي اللي سلوك مخه موصلة على بعض وبيفكر بالتسلسل المنطقي الارسطوطالي التقليدي: مقدمات بينها روابط، ونتائج منطقية لهذه المقدمات
معلش اصلي انا دقة قديمة شوية وتقليدية
ماليش في مسرح العبث وشعر الحداثة بتاع ماذا عن الخنفساء التي في نخاعك والبدر يخرج من كهرباء حذائك؟
حد يجيبهولي بقى وانا ح ادور من ناحيتي واللي عايز يتضامن يتفضل معانا  

65 comments:

مواطن مصري said...

معلش اسمحيلي اختلف معاكي انا مصلا اولا بغض النظر عن دينها هناك بعض الاشخاص تقول الاسلام و اسلامية اولا بمعنى لو فية واحد في الواك واكم مسلم يروح عندة و ينسى اهل بلدة


و لما المواطن المسيحي على سبيل المثال عندة مشاكل يطنشها و ميحلهاش بل بيزيد في المشكلة و يفرق على اساس الدين اي في ناس بتفضل المسلم الواك واكي عن المواطن المصري عشان الدين
زي اعلانات التوظيف مطلوب مسلمين فقططط
وهنا دة التميز

انا مصري في القارة الافريقية حضارتناو هويتنا مصرية يمكن اننا اختلطنا بحضارات اخرى ولكن هذا ليس يعني اننا نترك هويتنا الام لي هي الهوية المصرية دة ان فية ناس طلعت فتاوي بتدمير الاثار المصرية على انها مكان عبادة اوثان تخيلي لو سيبنا الناس دول يحكمو مصر

و بعدين ازاسي ااحنا نقف مع غزة و احنا اساسا امكانيات الي عدنا مش هتكفي لا غزة ولالا ال80


دة راي خاص

مصر اولا و مصر للمصرين بغض النظر عن الدين

مواطن مصري said...

اة نسيت شوفي الصور دي امير قطر قطر ها مع بيريز


http://www.alriyadh.com/2007/01/31/article221208.html


http://images.google.co.uk/images?hl=en&rlz=1B3GGGL_enEG306EG306&q=%D8%A8%D9%8A%D8%B1%D9%8A%D8%B2%20%D9%81%D9%8A%20%D9%82%D8%B7%D8%B1&um=1&ie=UTF-8&sa=N&tab=wi


http://www.facebook.com/photo_search.php?oid=61679530784&view=all

Founoon said...

دا فراغ

ولو فعلا في ناس شغلاهم القضية دي وبيتناقشوا فيها يبقى تأكدي بردو ان موضوع غزة كان شاغلهم من باب ملئ وقت الفراغ مش اكتر
ومواكبة الاحداث ويبقى في حاجة بنلوك فيها
اوشبه المطرب العاطفي اللي تاني يوم احداث غزة عمل اغنية بيقول فيها يا
رب نوالهالنا وهو كان هربان من الجيش
من سنتين
يعني مع الموجةوهوبا السقفة وحاجة يملوا بيها وقت الفراغ

يارب اشغلهم بأنفسهم

مواطن مصري said...

تصحيح مصر اولا غلطة مطبعية

TAFATEFO said...

أنا لا أتحدث هنا كمسلم يقف مع إخوانه المسلمين في غزة .. لكنني أقف إلى جانبهم من منطلق واجبي كإنسان أولاً، وأتعامل مع القضية كمسلم

جبهة التهييس الشعبية said...

ابو الغيط بيتكلم
بيقول: وقمصاني وشراباتي

جبهة التهييس الشعبية said...

مواطن

والله انت جايب اللنك ده على اساس اننا مقفوشين في سريقة واتفضحنا فبنجيب اسامي كل اللي مشاركينا في السريقة
معروف جدا ان قطر صاحبة اسرائيل
بس اني اقر على شريكي في السريقة ما ينفيش عني اني حرامية

TAFATEFO said...

بص يا مواطن يا حبيبي .. حاكم أنا أحب المواطنين كلهم

ردبت عليك مره زمان .. وهقولك تاني

مصري أولاً يعني ايه؟؟ يعني ايه مصري قبل ما تكون مسلم؟؟ ايه التعارض بين مصريتك وإسلامك؟؟ لو مصريتك أوجبت عليك الاهتمام بقضايا معينه فإنسانيتك وإسلامك يوجبوا عليك الإهتمام بيها

يعني ايه مواطن مسيحي؟؟ المسيحيه مش بلد .. اسمه مصري مسيحي

مصر مش دين .. ومسلم مش وطن

وانت في كل وقت لازملك دين ووطن .. ومينفعش في وقت تبقى بلا وطن .. أو بلا دين .. ومينفعش في وقت تخرج من كونك إنسان

يعني مايكل .. إنسان .. مصري .. عربي .. مسيحي

وعمرو .. إنسان .. مصري .. عربي .. مسلم

رتب عربي ومصري ومسلم زي مانت عايز .. بس قوللي ايه التعارض بينهم؟؟!!

قوللي حاجه واحده (غير مشكلة العنوسه في البحرين) تخليك تبدي مصريتك على إسلامك .. هو في تخيير بين مصريتك وإسلامك؟؟ ولا مصريتك وعروبتك؟؟

بمعنى ان كلهم واحد .. انت مصري علشان مولود مصر .. وعربي علشان مصر من العرب .. ومصر من العرب من قبل مانت تتولد

وانت انسان يا مواطن

أهو تركيا و فنزويلا لا هما عرب ولا هما مسلمين . تركيا وقفت مع اليهود الغربيين لما ظلموا في أوروبا .. كان اللي بيجمعهم لا العروبه ولا الإسلام ولا أي حاجه غير كونهم إنسان

عملوا زي ما أردوغان قال بالظبط .. أنا أتكلم من منطلق واجبي كإنسااااااان .. واتعامل مع القضيه كمسلم

مصري .. مسلم

امتى ممكن تبقى مصري مش مسلم .. وامتى تبقى مسلم مش مصري

يا أخي الرد عليك صعب في بوست زي ده .. لأن البوست نفسه واضح انك مقريتهوش ودخلت رديت

نواره عندها 62 سنه وطولها 166 سم .. ايه التعارض بين سنها وطولها؟؟ ايه التعارض بين اسمك وسنك؟؟ انتي ينفع تقولي اسمي أولا؟؟ خدي سني بس سيبولي اسمي؟؟ ولا في قضايا يفرضها عليك سنك

77Math. said...

تسلم لي الإيد اللي كتبت :)

Anonymous said...

النائب اسمه محمد العمدة والقضية مؤجلة ليوم 16/2/2009 بمحكمة شمال القاهرة00 والنائب محمد العمدة عضو الحزب الدستورى الاجتماعى وله مشاكسات كثيرة فى مجلس الشعب أشهرها أنه تظاهر هو ووالدته وزوجته وبناته أمام مجلس الشعب عند مناقشة قانون الختان 00
وقد أقام النائب محمد العمدة دعوي قضائية فى يوليو الماضى ضد كل من رئيس الجمهورية ورئيس الوزراء ووزيري المالية والصناعة والتجارة، طالبهم خلالها بتأميم صناعة الحديد في مصر.

ماهي said...

لا يا انسة ليست كامب ديفيد هي اللي دهولتنا وعملت وسوت
انا مقصدش المعني اللي فهمتيه
الشاب الاسمر الوسيم اللي باع دم الشهدا وعمل الاتفاقية مكنش محتاج اتفاقية لان هو متفق من غير اتفاقية فاهمة حاجة؟ما انا زي ما قولتيلي بكلم زي يونس شلبي
اللي انتو بتقولوه دا عامل زي نكتة الراجل اللي دخل لقي مراته مش عارف ايه علي الكنبة فباع الكنبة
اسفة

77Math. said...

TAFATEFO

دا غير إن الواحد لو ما عندوش دين .. عاااادي

ممكن تنبلع من المؤسسات الحقوقية(والناس يقولوا ربنا يهديك) باعتبار إنها حرية عقائدية

إنما لو ماعندوش وطن

حيحطوه في المصحة يا ف المعتقل !!


الأوطان أهمّ ..واعتبارات المجموع أهم من مصالح الأفراد

لكن مين يفهم ؟ مين يحس ؟

TAFATEFO said...

أنا لسه شايف اسم البوست دلوقتي

مناخيري أولاً

ده الاسم لوحده كفايه يا مواطن

ماهي said...

الاخ عبد الله محمود
صور ايه مع بيريز
انتا عامل زي الي بيقول مصر متواطئة في حصار غزة يااه اول مرة تعرف
ولا دا ديلاي عندنا
والله فكرتني بالست اللي كانت ماشية في جنازة عبد الناصر تصوت وتلطم ومزوداها ع الاخر
وخلاص يا حاجة ابدا مفيش
فقالولها ما الرسول مات قالت يا نهار اسود هو الرسول كمان مات

ماهي said...

الاخ عبد الله محمود
صور ايه مع بيريز
انتا عامل زي الي بيقول مصر متواطئة في حصار غزة يااه اول مرة تعرف
ولا دا ديلاي عندنا
والله فكرتني بالست اللي كانت ماشية في جنازة عبد الناصر تصوت وتلطم ومزوداها ع الاخر
وخلاص يا حاجة ابدا مفيش
فقالولها ما الرسول مات قالت يا نهار اسود هو الرسول كمان مات

TAFATEFO said...

:D:D

هو مين عبدالله محمود؟؟

بس الرسول كمان مات

:D:D

مهندس مصري said...

شوية مناصرين للصهويونية في بلجيكا في اللنك ده
http://www.powerlineblog.com/archives/2009/01/022547.php

Gaza in Belgium"

January 13, 2009 Posted by Paul at 6:55 PM

و انا معلق في التعليقات هنا
http://www.plnewsforum.com/index.php/forums/viewthread/46256/

و زعلانين من مظاهرات التضامن من مسلمين بلجيكا مع فلسطين و بيتبلوا عليهم

و انا بأرد معاهم بس عايزك تسجلي في المنتدى ده و تخشي تروقيهم يا نوارة انتي و كل الجدعان
:)

CARON said...

اسمحيلى يا انسة نوارة احيي تلكم الدماغ ٠٠ ماشاءالله

Anonymous said...

الاستاذة / نوارة

انا شايف ان اثارة هذه القضية مش وقتها خالص

لان احنا حاليا في قلب الازمة ولازم نركز مجهودنا علي دعم الاخوة في غزة

سواء كنا اسلاميين او يساريين او قوميين او ماس عاديين بدون اي ايدلوجيا سوي الوقوف مع الحق ضد الباطل

لازم نركز علي سبل دعم المقاومة وكشف المتواطئين والمتخاذلين

وبعد الازمة يبقي نشوف مشكلة الهوية دي

دي وجهة نظري
تحياتي

Anonymous said...

نوارة انتي مش عارفة الامور ماشية ازاي في شلة علي بابا؟؟ هو احنا عندنا حكومة أصلا علشان تبقي الاستجوابات ليها فايدة ولا عايدة؟ هي مش كل حاجة ماشية طبقا لتوجيهات السيد شيخ المنصر؟ هي الحكومة فيها حد علشان تطلع بمبادرات؟ ربنا يديم عليهم الهطل
أحمد

Anonymous said...

الاخت نوارة
بعد غض النظر عن طعليقات المواطن مصرى افندى

اولا احنا مسلمين
واللى وحدنا الاسلام
وطبعا عارفين ان العرب قبل الاسلام كانو قبائل عمالة تحارب بعضها مرة علشان جمل ومرة نعجة
واللى وحدها هو الاسلام
معنى اننا نقول احنا مصريين اولا يعنى ننفصل عن العالم العربة
ونترمى فى حضن الغرب
وساعتها هنبقى عاملين زى اللى رقصو عالسلم
زى تركيا لما قعدت تلحس التراب علشان يرضو يضموها للاتحاد الاوروبى
وفى الاخر برضةمادخلتش
وبدأ رجب الطيب يصحح الخطأ دة مؤخرا

فكلمة مصر للمصريين
دة اللى امريكا واسرائيل عايزاة
طب ماهى مصر للمصريين
امال مصر مثلا للهنولوليين
ولا للهولنديين
ولا للنيكاراجويين

وطبعا كلام العروبة دة كلام فارغ
لانة عمرو مالمنا ابدااااا

الدولة الاموية ساعة لما رفعت شعار العصبية القبلية للعرب
ماكملتش ميت سنة على بعض
بينما الدولة العباسية بعدها عدت الالف سنة
ضعيفة او قوية مش مهم بس كانت هى القيادة رسميا

ويعنى مثلا لو عملنا اى رابطة او شراكة دولية وجت بلد زى اندونسيا او تركيا تخش فيها نقولهم لا اطلعو برة اصلكو مش عرب
احة

احنا فى الاساس مسلمين
طبعا كلكو عارفين ان كل حركات التحرر والمقاومة اللى مطلعة افلاس امريكا واسرائيل
كنت تحت راية الاسلام
بس انهى اسلام
مش اسلام طنطاوى ولا مشايخ الازهر بتوع اللهم انصر مولانا السلطان
ولا اسلام ابن جبرين وابن عثيمين بتاع الارض مش كروية ولا تدور حول نفسها والقول بهذا يخرج من الملة
ولا بتوع الترنجات حرام والكراسى حرام وكلو حرام

ولا اسلام الجماعة اياهم بتوع الطاعة العمياء من المريد لشيخة حتى يصل
والله حى..اللة حى

ولا اسلام اربى دقنى والبس جلابية
وبعدين اشتم واسب واسرق والعن براحتى

الاسلام اللى بتكلم علية مع الاسف قليل قوى اللى يفهموة دلوقتى

الاسلام اللى يعمل دولة بل اامبراطورية عالمية
اسلام مافيهوش فرق بين عربى وهندى
ولا خليجى ومصرى
ولامسلم ولا مسيحى
الكل سواسية
خلايا فى منظومة ضخمة
كل واحد بيقوم بمهمةوشغلانة
دولة تاخذ باالاسباب والعلم والتكنولوجيا
دولة لا تضع حدود ولا تفرق بين اجناس
دولة لاتحدد نطاق ضيق لمبادئها فى العروبة ولا مش عارف اية
بل تشمل البشرية والانسانية ككل
زى ما قال الرسول صلى اللة علية وسلم فى الحديث

اما قولة مصر للمصريين دة كان شعار طلعوة الانجليز اول مابدأ الهجرة لليهود الى فلسطين علشان يحيدوهم عن القضية
وكل اللى حصل فى فلسطين كان من تحت ام الشعار دة
وعلى فكرة كانو بيعملو شعار زية فى كل بلد محتل
علشان كلة يتلهى على عينة ويخلية فى حالة

مع العلم بأن كل واضعى السياسات الكبرى لانجلترا ايام عزها كانو يهووووووود
وصلت؟

اما الجماعة بتوع العروبة اقولهم
اتلهو بلا وكسة


احمد سعيد

Anonymous said...

الانسان اولا واخيرا هو اقدس ما في الوجود , مش محتاج لا وطن ولا دين علشان تنزف مع الابرياء الي بينزفوا في غزة .

جبهة التهييس الشعبية said...

طفاطيفو
انا عندي 62 سنة؟
ماشي
وانت عندك اربع سنين

ماهي

فاهماكي والله العظيم
ومعاكي حق، بس لما تبقى في السكرتة غير لما تبقى وفقا لقوانين ومعاهدة ملزمة
فاهماني؟

77 math
ماهو الالحاد دين برضه
اي اعتقاد فيما يخص الايمان بربنا او عدم الايمان به الايمان بدين معين واديان تانية لا
اللي بيقولوا عليه الميتافيزيقا
اسمه دين
وده حاجة تانية غير البلد، غير العرق، غير الثقافة واللي اللغة احد روافدها

ومافيش حد في الدنيا عمل الدين عرقية وجنسية غير اسرائيل
عشان كده عنصرية
لان كل حاجة سايحة على بعضها

وبعدين على راي مصطفى
ما احنا بني ادمين

ده لو اللي بيندبح بالطريقة دي مجموعة قطط وكلاب كان يبقى حرام علينا لو سكتنا

يعني بريدجيت باردو متعاطفة مع الخرفان اللي احنا بندبحهم في العيد

هل بريدجيت بردو نعجة؟

ارجو ان ده يكون موضوع البحث القادم


مصطفى

المهم ان الصور جايبينها من التلفزيون ويقولوا الصور لم تنشر

caron
شالله تسلم وتعيش


انونيمس

والله العظيم انا عارفة ومعاك حق

سفسطات مالهاش اي لازمة

بس للاسف السفسطات دي بتثار دلوقت عشان تشتت الناس وتبلبلهم عشان ينفضوا من حوالين مناصرة غزة

فلازم يترد عليها بقى عشان اللت والعجن الكتير ده

ايام ضرب العراق كانوا بيرغوا في الموضوع ده

وبعدين في مذبحة غزة الاولى برضه فضلوا يتكلموا في الموضوع ده

وايام ضرب لبنان

ودلوقت الموضوع ده بيتفتح تاني


فنون

لا مش فراغ، انا ما بقتش حسنة النية، اظن ان فيه منهم بعض الناس اللي بتتعمد تثير الكلام ده وتثير النعرات عند الناس (وفيه ناس كتير بتستجيب لاثارة النعرات) عشان يشغلوهم عن القضية الاساسية

انونيمس الاخير

امال هم دخلوا المجلس ليه؟
لو كان عندهم كرامة كانوا استقالوا منه استقالة جماعية

TAFATEFO said...

أبو الغيط ده نكته .. هو جاب الشراسه دي منين؟؟ قولتلك قبل كده .. حتى بالأماره عند باب الفندق .. سألتشيني وجاوبتك .. مش عايزهتفهمي متفهميش

وبعدين هو بيشوبش؟ مصر دخلت مصر دخلت مصر دخلت .. طب وبعدين .. خلاص بقى؟؟ يعني من بعد كده دبلوماسيه بس ومفيش حرب تاني؟؟

مصر ليست في البازار .. ومصر هي القوه الرئيسيه لدى العرب !! قوة ايه؟؟ قوة ايه حد يقوله الأهبل ده

وبعدين ايه الست دي؟؟ هو محرمش؟؟ الست دي مش جايه للسياحه . دي جايه علشان نقولها!!! يا جدعان الرجل ده عبييييييييييييط

Anonymous said...

مقالة ابراهيم عيسى الجديدة

http://www.saveegyptfront.org/news/?c=165&a=18516


احمد سعيد

TAFATEFO said...

عبدالباري عطوان من شويه شركه خالص

والله الراجل ده عبيط

Anonymous said...

يعني و الله تفكير غريب ما هي اتتفاقية كامب دفيد اللي مش عجباكو اللي رجعت سينا ، وخلت السياحة تزدهر في طابا و شرم الشيخ ، بعدين تخيلي لو ما كنتش الاتفاقية موجودة ايه مصير اهل سينا تحت حكم الصهاينة ، كان ممكن يجرالهم اللي جرى لغزة ...........

جبهة التهييس الشعبية said...

الشهيد مالك مصطفى له مقولة خالدة:

في عهد عبد الناصر الانجليز خرجوا من مصر والاسرائيليين احتلوا سينا

في عهد السادات الاسرائيليين خرجوا من سينا والامريكان احتلوا مصر كلها

في عهد مبارك المصريين خرجوا من مصر وكل العالم احتل مصر كلها

TAFATEFO said...

والله والله والله كلامك صح

لو الجزيره عايزه تشتم مصر .. أحسن حاجه تعملها تجيب أبو الغيط طول اليوم

أنا مشفتش غباء كده في الدنيا .. واسطتك مين يا واصل يابن الواصل ينجحني في امتحان الخارجية

muslima said...

السلام عليكم

كيفكم اخواتى

يارب تكونوا بخير

معلش انا مضايقة من امبارح وتعبت كتير فى الشغل

الحمد لله

اللى ضايقنى انى لقيت خبر على وكالات الانباء عن زيارة الحزب الوكنى لمستشفى العريش

وفى اول متن فى الخبر بيقول ان الشريف لما شاف الاصابات والحالات الحرجة من مصابى فلسطين ساعتها قال بين قوسين

فيما معناه يعنى اللى انا شايفوا ده دليل على ادانة اسرائيل وان ده جريمة حرب

الله

طيب يا عمو صفوت هو انت لسة فاكر تزور الجرحى

طيب ماشى عديناها

طيب انت لسة فاكر ان اللى بتعملوا اسرائيل جريمة حرب

يعنى كنت مستنى لما تزور الجرحى علشان تقول حاجة زى دى

وجيمى مسمعتش انه قال اى تصريح يعنى

آآآآآآآآآآآآه

يعنى احنا حتة ياربى مبقيناش نعرف حتى نقول تصريحات

مبقناش حتى نعرف نمثل

طيب حتى دور كومبارس

ده احنا طلهنا فاشلين فى كل حاجة والله

حتى التمثيل
...............


جالى الايميل ده قلت اشارككم فيه مسلمين ومسيحين وكل الطوائف



يقرأها عليكم : مودي المكهرب



تظاهر خمستاشر مليون لاجئ مصري على الحدود المصرية الليبية أمس

للمطالبة بفتح معبر السلوم أمام اللاجئين المصريين

الذين فروا من شدة ضربات قوات الإحتلال الإسرائيلي على القاهرة و الأسكندرية مما أسفر عن مقتل ما لا يقل عن عشرة ملايين مصري و جرح حوالي عشرين مليون آخرين كلهم من المدنيين



... هذا و قد نفي متحدث باسم جيش الإحتلال الإسرائيلي أن تكون إسرائيل قد تعمدت قتل المدنيين العزل و أضاف أن جماعة الإخوان المسلمين هي المتسببة في قتلهم لأنها تقوم بتخزين صواريخ رمضان و بمب العيد داخل أماكن سكنية و أكد الناطق باسم الجيش الإسرائيلي أن الشعب المصري ليس مقصودا بتلك الضربات و إنما هي حرب بين إسرائيل و جماعة الإخوان المسلمين الإرهابية ....



و الآن مع مراسلنا ميشو الروش ليطلعنا على آخر تطورات الموقف في معبر السلوم





إليك ميشو ...



ميشو : الموقف عندي خطير طحن ... حيث رفضت السلطات الليبية فتح المعبر أمام الاجئين مما أدى إلى تزاحم الفارين من جحيم المعارك الدائرة بين فصائل المقاومة المصرية و قوات الإحتلال بالقاهرة و يزيد من خطورة الموقف تجدد الهجمات الإسرائيلية على المعبر هنا

بحجة وجود إرهابيين بيننا ....

و فيما يلي نأخذ آراء شريحة من اللآجئين العالقين ... و نقترب من أحدهم

.... هاي يا مان إيه الكلام ...؟



اللاجئ : حسبي الله و نعم الوكيل في العرب.. فين النخوة.. فين الرجولة ....؟

يا راجل بلا قرف ... بقالنا شهرين متلقحين هنا في المعبر و الإخوة الليبيين منفضينلنا ...

و الضرب شغال على ودنه... حتى البانجو مش لاقيينو



ميشو : طب إيه رأيك في إدعاءات إسرائيل بان الإخوان المسلمين هما السبب ف اللي بيحصل



اللاجئ : طبعا هما السبب لأنهم لو وقفوا فرقعة صواريخ رمضان وقتها إسرائيل مش ح تلاقي حجة تضربنا بيها



ميشو : طيب تحب توجه كلمة أخيرة لمين؟



اللاجئ : طبعا للسلطات الليبية .... و بأقولهم حطوا نفسكوا مطرحنا إحنا مسلمين و عرب بردو ... لو قفلتوا معبر السلوم قدامنا النهاردة بكرة التوانسة حيقفلوا قدامكم معبرهم

و ساعتها ح تلبسوا إسود و تغنوا ظلموه

جبهة التهييس الشعبية said...

يا مصطفى
شفته وهو بيقول

انتي سألتيني واحنا خارجين من الفندق
فاكرة؟

Founoon said...

ماهو الناس اللي بتستجيب للنعرات دي عندهم فراغ كبيييييييير

muslima said...

ياريت يا جماعة تقروا عمود انيس منصور فى الاهرام انهاردة

بيتكلم عن الصورة بتاعة ابو الغيط وليفنى اللى مسكها فيها وجابتها كل وسائل الاعلام

شكرا انيس
جبت التايهة
كتر خيرك

يقول أنى امرأة said...

ابو الغيط قال اية ؟
انا مشفتش
يا خسارة
الحاجة الوحيدة الى بتخلى الواحد يضحك شوية
هم يضحك طبعا

77Math. said...

ما اختلفنا يا نوارة الإلحاد دين اللادينيين..


أنا أصلا من أشد المعتقدين بأن لكل واحد دينه .. حتى لو لم يكن له اسم نعرفه !! حتى لو ليس الإلحاد نفسه !


كل واحد بيؤمن بحاجة يعني هو دا دينه اللي اختاره لنفسه وهو حر بقى يتحمل نتائج اختياره


اللي أنا قصدي عليه .. إن فعلا لو حنتكلم دين ولا وطن .. يبقى وطن طبعًا


زي ما قالوا الزملاء قبلي، مفيش دين من غير وطن .


إنما فعلا يكون وطن .. والدين بعد كدا نبقى نشوف حكايته إيه


وياريت على رأي الأستاذ أحمد سعيد لو فيه إسلام زي اللي بيتكلم عنه دا


إسلام بس، الإسلام اتفتت دلوقت ، محدش بيقول مسلم، بيقولوا : سني، شيعي، سلفي، إخوانجي


حاجة تقرف بجد . ولما ترد عليهم تقول أنا مسلم وبس تبقى أنت النغمة النشاز !!


ياريت في الإسلام الحقيقي .. بمعانيه الرحبة وبساطته ولا تعقيدات البشر المتخلفين

تعرفي إن حديث: ستفترق هذه الأمة على ثلاثة وسبعين شعبة ؟

في إضافة موضوعة في ذيله بتقول: كلّها في النار إلا واحدة قرأت زمان أنهم جعلوها لأغراض سياسية .. ودلوقت في السعودية تلاقي أهل السنة والجماعة اللي بيقولوا احنا نمشي كما كان الرسول و"كل الباقي في النار إلا واحدة... احنا يعني هاه خلي بالك !!"


أنا لو فتحت ف الموضوع دا ممكن ما أروح الامتحان


تحياتي

جبهة التهييس الشعبية said...

يا مسلمة
ما طفاطيفو حاطط اللنك بتاع الفيديو اهو

اتفرجي وانباساطي

كل مرة بيتفوق على نفسه

TAFATEFO said...

على فكره .. كان في اتفاق يقضي بغلق التعليقات في فيديو التعزيز .. وده محصلش

:(

Anonymous said...

http://www.youtube.com/watch?v=dhyfwJ9dJe8

مراقب مصري said...

ماهي المشكلة في الكلام... المشكلة في التوجهات نفسها

يعني الخطاب الرسمي بتاع مصر أولا هو في واقع الأمر غطاء لدور مصر الإيجابي في فشخ غزة وحصارها على مدى سنتين والدعم الكامل للحصار الإسرائيلي والتنسيق الكامل مع إسرائيل في مجزرتها الحالية

وبتوع الإسلام أولا خطابهم دا جاي تغطية برضو على مواقفهم المتخاذلة في التصدي للقضايا الوطنية وتغطية على دورهم الكسيح في صراعنا مع السلطة المباركية الغاشمة... يعني بتوع الإسلام أولا ترجمة شعارهم عمليا كان سحب الاستجوابات ضد فساد الحكومة المصرية!!

بتوع مصر أولا (الرسميين منهم) ترجمة شعارهم كان المبادرة المصرية وتصفية المقاومة (فيه هدنة في الدنيا اسمها 15 سنة هدنة؟؟؟)وتصفية القضية الفلسطينية وتكريس الاحتلال


وفي الحالتين لا إسرائيل بتكسب ولا البتاع ده... الرابح الأكبر في مجزرة غزة هو حسني مبارك ودولته... واشرب بقى يا شعب


الإخوان مش بس أغبيا لكنهم بجد في الأزمة دي - كما في مواقف سابقة - أثبتوا إنهم قوادين للنظام كمان... الغريب بقى إنهم بيدفعوا تمن غالي وبرضو بيكملوا في القوادة... مش قادر أفهم يعني إيه يطلعوا مظاهرات ضد إسرائيل بس مش ضد حسني مبارك!!! يعني إيه يعتقل منهم العشرات والمئات وببلاش كدة من غير حتى ما يخلوا للتمن اللي بيدفعوه دا مقابل... دلوقت هتاف يسقط يسقط حسني مبارك طلع هتاف مش مؤدب وعيب وحرام؟؟؟ طب خليه بقى يفشخكوا... وللأسف برضو هيتفشخوا ونفضل نتضامن معاهم... بس ليه؟؟؟؟ ما يحترموا نفسهم شوية بقى


بالنسبة لحماس... أنا أتمنى إن المقاومة تبقى مؤثرة أكتر وتبقى ضرباتها موجعة شوية ... يعني حزب الله - نتفق معاه أو نختلف - كان بيوجعهم بجد وحقق انتصارات مؤثرة بجد... طبعا الحصار عامل مهم ... بس كمان مش قادر استوعب وجود الأخ خالد مشعل في سوريا وطلوعه بالميك أب على الجزيرة وهو بيقول سنقاوم حتى لو أبيدت غزة... يا عم طب ما تموت شهيد زي الشيخ ياسين في وسط الميدان... في حرب تموز كان نصر الله وسط الناس ومكشوف ومش خايف على روحه...

حماس برضو فيها نفس جينات الإخوان وتحسيهم برضو لسة بيشاوروا عقلهم... وبرضو وهم بيدفعوا تمن غالي هم والشعب الفلسطيني كله برضو بيحسبوها سياسيا... تحسي إن منهجهم برضو ألمشاركة لا المغالبة... حاجة خرا... لسة بتوع حماس بيتعاطوا مع مبارك والنظام المصري ومش بيتعاملوا معاه كعدو وشريك في الحرب ضد غزة.... طيب يتقال لهم إيه دول؟؟؟؟

عايزين مقاومة بس مش عايزين وسخ السياسة بقى...
-----------

بالنسبة للقضية بتاعة كامب ديفيد فيه إجراء في القضاء الإداري اسمه تدخل انضمامي والناس المتضررة ضمنا في قضية زي دي من حقهم يتدخلوا قانونيا قدام القاضي ويستوفوا الورق بتاع ده ويبقوا رسميا ضمن المدعين ضد الحكومة

-----------

عايز أذكر كمان بموضوع قضية الشبكة العربية قدام القضاء الإداري للمطالبة بعزل الوزير أبو الغيط... برضو مهم إن أكبر عدد منا يتدخل انضماميا في القضية دي... الجلسة الجاية يوم عشرين يناير

دا رابط عن القضية

http://anhri.net/press/2009/pr0105-2.shtml

TAFATEFO said...

رد عبدالباري عطوان على أبو الغيط وموقف مصر والسعوديه المتحفظ على عقد قمة عربية في الدوحة والذي يضغط على العديد من الدول الأخرى لسحب موافقتها على انعقاد القمة

http://www.youtube.com/watch?v=rXdhWobtRl8&feature=channel_page

جبهة التهييس الشعبية said...

انا والله عملت دونت الاو كومنتس وبرضه الكومنتات كانت موجودة

TAFATEFO said...

هي الكويت عامله إعلان على استضافة القمة الاقتصادية؟؟ محدثين نعمه يعني ولا ايه مش فاهم؟؟

TAFATEFO said...

على فكره في واحد كاتب انه رجع لمصر الرياده في الكوميديا

:D:D

عنده حق

ده تفوق على شكوكو وإسماعيل يس .. هي دي الكوميديا السوداء بجد

مراقب مصري said...

حد يديني لنك فيديو التعزيز أنا لسة ما شفتوش

Anonymous said...

http://www.youtube.com/watch?v=dhyfwJ9dJe8

على فكرة الفيديو يحتوي على كلمات خارجة فالرجاء عدم الدخول لأصحاب الاذان المرهفة

ahmed said...

موضوع الدين الأول و لا الوطن
دى حملة من ضمن حملات التخويف من ايران
و شوفت كذا مناقشة بالطريقة دى
و يتسأل سؤال يا ترى احنا بنقف فى صف غزة لأنها دولة عربية و لا لأنها دولة مسلمة؟؟
و بعد المناقشات و الكلام الكويس من ناحية و الفارغ من ناحية
حيصدمك السؤال الاخير اللى هو الهدف من البداية


لو ايران حبت تحتل مصر حتقفى معاها عشان انتى مسلمة أولاً و لا حتقفى ضدها عشان انتى مصرية اولاً ؟

بصيغه تانية يا ترى ممكن تخونى بلدك بإسم الاسلام يعنى تبقى عميلة لدولة اسلامية اخرى؟؟

دى ناس فاضية سيبك منهم

Anonymous said...

الاخ مراقب مصرى

يعنى اية متضرر
قصدى مين اللى من حقة يشارك فى الدعوى بصفتة متضرر
واية هيا البنود اللى بيتحدد على اساسها ان كنت متضرر من عدمة
ارجو الافادة

اصلى متضرر اوى بصراحة



احمد سعيد

ماجد said...

TAFATEFOاللة ينور عليك بجد

Rania said...

كتنا نيله
كتنا كمان نيله
كتنا ستين نيله
مع الاعتذرا بجد للنيله

بوليفيا قطعت علاقتها مع اسرائيل بسبب الحرب على غزه

مش قتلكوا كتنا بجد نيله

مهندس مصري said...

شوفي الأغنية دي عن فلسطين لفريق
M.T.M

http://www.youtube.com/watch?v=oY3uIjKy-bo

شمس النهار said...

تصدقي انا اللي اول مره ادخل عندك واحس اني لسعت
هو مين فين ليه
عموما كل كلمه قلتيها صح
وانا حبيت اقول لك ده
واللي معطالين الحياه عشان غزه وكل حاجه غزه غزه
مستفيدين من ده مالها غزه
ماتشتغلوا وتشوفوا حياتكم وكمان نشوف غزه
والا هي شماعه نعلق عليها الكسل والفشل
يعني ممكن ام ماتعملش شغل البيت ولما يرجع جوزها وعيالها مايلاقوش حاجه يكلوها
تقول لهم اصلي متعاطفه مع غزه
مش كده
مااللي عايز يستجوب يستجوب هي عزومه والا خاف وكش وقال اجبها في غزه
اقولك يعني همه لما بيستجوبوا بيعملوا ايه اهم نقطونا بسكاتهم

ماهي said...

معلش ده اللي بيسموه فكر الفقر او فقر الفكر زي اللي عاوز يتصل بتل ابيب يخوفهم ولو حصل والقضاء وافق وحكم بتجميد الاتفاقية هنعمل ايه هنروح نرمي ورقة الحكم علي الحكومة مثلا؟

TAFATEFO said...

عاشر مره أقرا البوست .. وعماله تجيلي أفكار غريبه

هو ايه اللي يخليني المواطن المنوفي زيي .. زميل المهنه (باعتبار ما سيكون) .. صاحب أول ضربه ويه فتحت باب الحريه .. عليكوا وانتوا ناس شرقاويه فلاحلار؟؟!!

وازاي تتريقوا على تامر أمين .. وممتاز القط .. يا شرقاويه ويا دمايطه

منوفيتي قبل مصريتي
منوفيتي قبل مصريتي

أنا مواطن منوفي مصري

ولو تعارضت منوفيتي عن مصريتي فلن أبدي شيء على منوفيتي ولن أرضى بغير المنوفيه بديلا

يا منوفيه يا منوفيه .. شبين الكوم والباجوريه .. يا عيني يا لاللي .. يا روحي يا لاللي

ناهيكم بقى عن الشبراويه .. أهي شبراويتي دي بقى قبل مصريتي .. وسأضرب بيد من حديد على أي فسل من عابدين ولا الزاويه تسول له نفسه التعرض لمواطن شبراوي بالنقد أو التجريح

وعلى فكره بقى لو غيروني بين اني أكون منوفي وبين الكوتشي الأورق بتاعي .. هختار المنوفيه

أصيل أصيل يعني

واحد مش فاهم حاجة said...

بصراحة مقال فى غاية الجمال وموزون جدا

وبصراحة مجرد التفكير فى الفكرة دى سذاجة

جبهة التهييس الشعبية said...

يا مينا

http://www.youtube.com/watch?v=VhvU1mP6MJE

Anonymous said...

الاخ مراقب مصرى

اللة ينور عليك
اصل انت بجد حطيت ايدك عالجرح
لانى عمال اشد فى شعرى
من تناحة الاخوان المبالغ فيها
لحد مبقاش عندى شعر
نفسى اعرف بجد المهدى عاكف دة بيفكر ازاى
حاسس انة عايش فى مية اللفت
لا والمصيبة ان الحكومة كمااااان بتستغلهم وبتضرب بيهم تيارات تانية
مع كل البهدلة اللى همة فيها
طب ان ماكنتش هتتحرك دلوفتى يا عم عاكف هتتحرك امتى
وقال اية بيقولك احنا بنتبنى معركة النفس الطويل
ياخى احة
احة بجد
والله انا جايف بكرة لما جيمى يركب
نلاقى المهدى عاكف طالع بمظاهرات دعم وتأييد للننوس بحجة توحيد صفوف الشعب ودرء الفتنة
واللى يغيظ ان كل دة افقدهم كتييير جدا من قوتهم ومن مصداقيتهم فى الشارع
وياريتهم بياخدو حاجة فى المقابل
بياخدو على قفاهم
الله يرحمك يا بنا
لو كان عايش كنت اعتقد انة هيلزقلهم سداغهم بالبلغة
نفر نفر


احمد سعيد

Anonymous said...

تعيش المنوفية حرة مستقلة
تعيش
تعيش
تعيش

mido said...

@مراقب مصري

مختلف معاك فى نقطتين :

1- تفاوض حماس مع مصر ضرورى حتى لو كانت الحركة عارفة انها محاصرها , الحركة مستحيل تتنازل عن مبادىء اتفقت عليها كل الفصائل و زى ماانت شايف المبادرة المصرية اترفضت لكن التفاوض مع مصر حيقلل الحملات ضد الحركة فى الاعلام المصرى زائد تعنت أقل على المعبر
و مقارنة حماس بالاخوان غير مطروح بالمرة

2- قيادات الحركة كلهم فى غزة و ابنائهم مقاتلين فى المقاومة و الكلام ان خالد مشعل بعيد عنهم و ليه مش معاهم غير منطقى

انصح بزيارة الرابط ده و معرفة مين هو خالد مشعل

خالد مشعل

Founoon said...

ahmed

بصيغه تانية يا ترى ممكن تخونى بلدك بإسم الاسلام يعنى تبقى عميلة لدولة اسلامية اخرى؟؟

دا اسمه استهبال
لان الواقع وقتها هيكون انا خنت بلدي لصالح بلد تاني وبقيت عميلة ليها
دا الاسم الصحيح للموقف دا
الاسلام مالوش دعوة بالصراعات السياسية الحقيرةدي

انا بجد مش فاهمه ازاي ممكن الانتمائات تتجزأ
من ساعة ما موضوع نوارة نزل وانا عمالة افكر
مناخيري ولا شعري
طب اسمي ولا لون عنيا
انا بحبني على بعضي وبحب انتمائاتي على بعضها ولوحد جه على حاجة فيهم هدافع عنها بنفس الشراسة

Anonymous said...

يعنى اية تخون بلدك باسم الاسلام
دة كلام مش منطقى اساسا ولا يشكل حتى جملة مفيدة

يااااااااااجماعة
فية فرق كبير قوىىىىىى بين انك

تحارب النظام الفاسد من اجل شعبك
وارضك


وانك تحارب شعبك وارضك نفسهم من اجل انظمة فااااسدة


ياريت ما تخلطوششش بين الشعب

والنظااااااام
لان الاخير دة مهدور دمة اساسا
والقتل فية حلاال ..حلال...حلااااال


احمد سعيد

Anonymous said...

طبعا ماينفعش اخون بلدى لبلد تانية بدافع الاسلام
لان الاسلام اساسا لايدعو لكدة
يعنى الجملة اساسا مش منطقية
وبعدين البلد التانية ماهى اسلامية برضه
يعنى بالذمة لو انت ماشى فى الشارع ووقفت واحد وسألته

ينفع اخون ايدى علشان خاطر رجلى
وينفع ابيع طحالى علشان خاطر فشتى
ولو مناخيرى وودانى اتخانقو مع بعض
احكم لمين فيهم

وصوابعينى مزنقين فى بعضهم ...ممكن اعين شوية فى ضهرى؟؟؟؟


شوفو حيرد عليكم باية




هههههههه




احمد سعيد

عمرو النوبى said...

ياجماعه
النهارده منى الشاذلى مصوره فى رفح والحلقه بيتذاع البرومو بتاعها وهى بتزعق ويبدو أن فريق الأعداد بيجرى من القصف

watan said...

قوية يا نوارة
رهيبة مناخيري اولا

بتعجبني كل مرة بزيادة

طيب اسمعي الخبر هاد http://lachyab.jeeran.com/archive/2009/1/777337.html
ولو انو مدونتك بتنفع قاعدة عسكرية

بدل ما هم اشتغلوا فيها جدا مين اولا مناخيري ولا اذني وقاعدين بيحللواوادلة وشهود والدنياقايمة

مصر 30 said...

الأهــــــــــــــــرام
صفوت الشريف‏:‏ لن نفرط في ذرة رمل
واحدة‏..‏
ولن يدفعنا أحد إلي المجهول
جمال مبارك‏:‏ الأولوية لنقل المساعدات‏..
‏ ولا أمن لإسرائيل إلا بقيام الدولة الفلسطينية

سؤال !! هو فيه مجهول أكتر من اللى إحنا فيه ؟
سؤال تانى .. هو مشكلتنا أمن الفلسطينيين و أرضهم ولا اللى بندور عليه أمن إسرائيل !!!
عموما ده اللى متوقع من الناس دى

Anonymous said...

يا نواره فاكره المرشد لمل قال طظ فى مصر أهو كده أختار!!يعنى واحد أسلامى مره قلتله خساره أن رانيا علوانى أعتزلت دى كانت بترفع علم مصر وقالى يرضه طظ فى مصر فاهمه الفكره