Tuesday, 20 January 2009

من النهاردة مافيش بوش....انا بوش....انا بوش

بصرف النظر عن شماتي الشديدة في الناس اللي كانت متفائلة باوباما
وبصرف النظر عن ان الواد ده مش نازل لي من زور لانه عامل زي نجوم السيما
بس بصراحة صعبان عليا، والله العظيم ما عارفة هو ح يعمل ايه يا قلب امه؟ وبصراحة انا مش عارفة ح نعيش من غير بوش ازاي؟ انا من كتر ما اخدت على دماغي ايام بوش حاسة اني اتولد يوم ما بوش جه، مش فاكرة اي حاجة قبل بوش، حاسة ان الدنيا ابتدت ببوش، حاسة ان بوش ده اصلا هو اللي زقنا برة الجنة، وان اول ما البشرية نزلت الدنيا لقت بوش في وشها
وختمت له بقبلة الوداع يا كلب
يا ضنايا يابن حسين، ح تعمل ايه يا مدهول في اللي الملحوس ده سايبهولك، ده ولا اعصار تسونامي

10 comments:

TAFATEFO said...

وده اعتراف لبرنامجنا

أنا بوش

وبعدين شماتتك ده جت منين مش فاهم .. يعني هو الرجل مسك خلاص؟؟ وبعدين برضه يفضل نفس السؤال .. الناس قالت أوباما أفضل ميت مره من ماكين .. وحضرتك بتقولي لا عداوه ظاهره أفضل من عداوه مستتره؟؟!! يعني كلينتون كان حليف لإسرائيل وبوش كان حليف لإسرائيل .. أيهما أفضل؟؟

ديه دي!!!!!!!!!

من المعضلات توضيح الواضحات نواره نجم

77Math. said...

ههههههههههههههه

سبحانك ياربي

عدّا عليّ رؤساء أمريكان أكثر مما عدّا علي رؤساء عرب

بس مش فارقة كثير.. هم الأشكال بتتغير والتصرفات واحدة

واحنا الأشكال مش بتتغير والتصرفات بتتسافل والوضع بينحدر

معامل الاحتكاك = صفر يا جماعة ومش عارفين حنسمع الصوت : بوووووووووووم امتى !!


على الله يكون في تحت بتاع زي أفلام هوليود، تبقى كارثة بجد لما مصر كلها تقع كدا زي اللي فراملها سايبة

حاجة تقرف

مواطن مصري said...

ربنا يهدية و متوقع انة هيتم اغتيالة في منتصف فترتة



او مش بعيد بكرة تكون فية محاولة اغتيال

جبهة التهييس الشعبية said...

لا ان شاء الله ما يتقتلش ولا حاجة

ايه النكد بتاعك ده يا مواطن

يعني لو اتحكم علينا نتقرف في حياتنا يبقى على الاقل اهو واد حليوة نصطبح بوشه بدل الخلق المجربة اللي هرتنا

mido said...

د. رؤوف العربى المتهم فى قضية إدمان الأميرة السعودية
عفو ملكى عن الطبيب المصرى بالسعودية

mido said...

بس الخبر غير مؤكد

ستيته حسب الله الحمش said...

جه اوباما مهذب ومؤدب ونهج نهج الكلب اللي قبله
عادي خالص ها نتصبح ونتمسى بخلقته ثمان سنوات قالحات يأخذن ما قدمنا لهن
اتفزلك او دمه تقل على اليهود
عادي خالص يا مونيكا تانية زي كلينتون وسيرته تبقى على كل لسان ويتفضح فضيحة المطاهر
يأما جنازة مهيبة تشبه جنازة كينيدي اللي بيشبهوا مراته بمراته

اهم حاجة البجر اتقابلوا وحضنوا بعض وكل واحد فيهم قال صالوحة صالوحة وعقفوا اصابعهم علامة الصلح وكلوا بومبوني وشيكولاتة ونداغة
عبودي مكنش عارف يقرأ الخطاب اللي اتكتب له يابشر طيب الحمار اللي كتبه كان يشكله بدل البهدلة دي

esraa said...

انتي عارفه انه عامل تصويت في موقعه علي رأي الشعب في المساعدات اللي بيدوها لاسرائيل وانه مش شايف انها ليها لازمه خصوصا في الوقت ده ومشاكلهم الاقتصاديه؟

اعتقد ان التصويت ده لوحده يتحسب للراجل ان عنده شجاعه وعمله

والتصويت لحد دلوقتي لصالح ان المساعدات تقف

حسن على said...

مثل شعبى من العصر "الجاهلى"( عدو عاقل .. خير من عوكل جاهل).وأقترح على "لجنة الفاظ الحضارة" بالجمع اللغوى اجازة استعمال كلمة "جاهل" كمرادف لكلمة" عاهل" المستخدمة حاليا

حسن على said...

يغادر البيت الابيض الان الرئيس المافيوزى" جورج دابليو سى بوش"...واسمة الحركى" مستر منكى فيس" ...بعد 8 سنوات حافلةبأحقر الافعال واشنع جرائم الأبادةالجماعية والتسلط العدوانى على دول العالم بأستثناء المتواطئين معة احيانا. يغادر البيت الابيض بعد ان " خربها وقعدعلى تلها" مشيعا باللعنات من الجميع بما فيهم اغلب الامريكيين . وفى الايام القليلة القادمة سنسمع كثير عن اسرار مخزية لتواطؤ حكام عرب وغير عرب معة فى اهم جرائمة تلك التى ارتكبت فى العالمين العربى والاسلامى