Tuesday, 13 January 2009

اولمرت ده اللي عامل زي الولية الكيادة

طالع دلوقت يقول: كوندوليزا رايس اتحط في موقف محرج هع هع هع، اصلها كانت وعدت الحكام العرب بانها تصوت على وقف اطلاق النار كركركركر، قمت انا رحت مكلم جورج بوش، قالوا لي ده مشغول بيتكلم في خطاب، قلت لهم هاتوهولي على التليفون دلوقت، راحوا جايبنه، قلت له اوعى تخلي كوندوليزا تصوت على قرار وقف اطلاق النار، راح متصل بيها بسرعة وقال ما تصوتش
هئهئهئ. والجمهور بيصقف
والبراطيش اللي على راسنا لما كوندوليزا وعدتهم وخلفت وعدها لسه بيكلموها؟ وبعدين ما قالوش ليه؟ ما قالوش ليه وعدتنا وخلت بينا وعملوا لها فضيحة بدل ما الولية الكيادة ده كل شوية يطلع يعمل لهم فضيحة، مرة يقول بيتصلوا بيا يقولوا لي خلص على حزب الله، ومرة يقول بيتصلوا بيا يقولوا لي خلص على حماس ودلوقت طالع يقول لنا انه بيدي اوامر لامريكا
انا عايزة افهم بقى بامارة ايه؟ حد يعرف يفهمني؟ ليه يعني؟ عشان هم ايه؟ دول عايشين عوالة على امريكا زينا بالظبط وبياخدوا اكتر مننا كمان
واحنا ح نفضل حاطين البراطيش دول على دماغنا؟ هم بيعملوا ايه بالظبط؟ بيشتغلوا ايه يعني؟ 

11 comments:

mido said...

يا نوارة دولا شغلتهم يبقوا حلاليف

Anonymous said...

أنا ه لغاية ما عرفت الحقيقة

إسرائيل دي بنت لاذينا

ماسكة على أمريكا سيديهات
!!

زي ما هي ماسكة علينا سيديهات بالظبط
الصواريخ تقع عندنا ويضربوا غزة من عندنا ويقتلوا جنودنا واحنا معندناش حد قادر حتى يطلع يقول بقين في الهوا

.. ماسكة علينا سيديهات بقولك

dody_pasha said...

نانا - سؤال قدراتى وثقافتى لا تساعدنى على الاجابه عنه وارجو ان تتولى انتى هذه المهمه - السؤال هو : كيف استطاعت اسرائيل تحويل مصر الى حليف استراتيجى لتصفيه القضيه الفلسطينيه؟؟؟ طبعا هذا التحول لم يكن وليد الصدفه ولم يكن تحت ضغط المرحله ولكنه بالتاكيد كان نتيجه مجهود مخلص وجبار ودراسه وتحليل وتنفيذ لسنوات كثيره وسوف اعطيكى بعض المفاتيح على حد ثقافتى يمكن تساعدك انك تحللى لنا وتجاوبى على سؤال - المفاتيح دى زى مثلا يوسف والى والسياسه الزراعيه لسنين طويله - وكمان الحركه الانفصاليه فى جنوب السودان - الحركه الانفصاليه فى درافور - الاشتراك مع اثيوبيا فى مشاريع للتحكم فى منابع نهر النيل - انهيار الصومال وان باب المندب اصبح مالوش صاحب - اتفاقيه السلام وان سيناء تظل منزوعه السلاح - الخصومات العربيه العربيه زى مصر وسوريا - مصر وليبيا - مصر والعراق - مصر والسودان - الانهيارات الداخليه مثل انهيار منظومه التعليم والصحه - القروض الماليه الاجنبيه وعدم الرقابه عليها رغم انظمه الرقابه الشديده الصرامه الموجوده فى الغرب على اموالهم مما ادى الى انتشار الفساد والرشوه - واخيرا التوريث - ياترى ح تجاوبى على السؤال؟؟؟

Mohamed said...

بيشتغلوا ايه يعني؟ انتي لسة بتسألي؟ بيشتغلوا معززتية طبعاً :):)

Anonymous said...

على الجزيرة دلوقتى مسعف بيقول انه دخل ينقز مصابة بس مالقاش مخرج وفضل محبوس جوة وهى تقريبا استشهد وضربوا عليه وهو داخل اصلا

دوار الحسينى said...

دى الجزيرة بتكرر تانى نفس الخبر
حالا اهه
شكرا انتى وكالة الانباء الوطنية

وبعدين حكامنا العرب شايفين انهم مالهمش لازمة وكلهم كبروا بالسن مايوسعوا للشباب بكل هدوء دى حياتنا واحنا احرار
مش هنستمر بحط البراطيش على دماغنا ماترحلوا عننا وبلاش عكننه احنا كده عاوزينها مولعه دول اخوتنا واطفالنا ونسائنا
الناس دى لازم تتأدب صح وتنكوى بنار اللى عملته بفلسطين
حرام عليكم وعار عليكم ايها الحكام العرب
ان ترى جثث الاطفال والنساء والرجال ولاتحترق الما


وبعدين بالصلاة على النبى مش عاوز اى عجل من اى حته يطلع ويقول اين العرب
امال انته ايه بالصلاة على النبى اجنبى ولا من القطب الشمالى كل واحد يعمل اللى يقدر عليه واللى مايقدرش يشترى سرنجه علشانهم يقعد فى بيته كل واحد ربنا وضعه بمكان يقدر يخدمهم بيه سيسأل يوم القيامة ولا ارحل واكفينا شرك العملية مش ناقصة فنجرة بق

كل واحد يعمل حاجه وكل واحد ادرى بنفسه

دوار الحسينى said...

على فكرة مطلوب ناس تساعد بتحميل المواد التموينية وكل واحد يجيب اكله معاه ادخلوا على alaa and manal's bucket
وفيه بمركز هشام مبارك تقديم مواد طبية سرنجة ولا علبه سلفا عندك اتحركوا انتو لسه هتتكلموا انتهى وقت الكلام

lastcrazyboys said...

انا عايز أفهم حاجة بس ..انتي فعلا مش عارفــة..ومش واخــدة بالك..ولا بتحاولي تكدبي عقلك
والاختيار التاني هو الأكيييييييييد
لأنه كما هو ظاهر للعيان..إنه أمريكا ماهي إلا وزارة الدفاع الاسرائيلية..واوعي تفتكري انهم بيتجملوا عليهم ..وبيدوهم معونة زي ما بيذلوا اللي خلفونا ..هم بس عشان ميعملوش حساسية ..او يمكن بيبعدوا العين زي ما خالتي بتعمل
ومش عايزين يبينوا قدام الناس
طب اذا كانت امريكا دي ذات نفسها قايمة على اقتصاد يهودي صهيوني ..هتتجمل عليهم ازااااي
"......"يــاخي

مواطن مصري said...

نوارة شايفة البوي الصهيوني

بعدين كل الناس عارفة ان كوندي نيجرو

TAFATEFO said...

الدقيقه اللي جابوها من كلام أولمرت .. وفيها الناس بتسقفله الأهبل أهي

هو اتعدى من أبو الغيط؟؟ هو في حد يطلع يقول كده؟؟ ايه العبط ده؟؟!!

Anonymous said...

احمد سعيد

الاخوة والاخوات

ابناااااائى وبنااااااتى


والله يا خت نوارة انتو بتسألو سؤال اعتقد ان كلكم عارفين اجابتة كويس

اولا
اسرائيل ماسكة اية على امريكا واوروبا
اسرائيل متحكمة فى الرأى العام
الامريكى والاوروبى عن طريق شبكة اعلامية ضخمة وذكية تستطيع توجية المواطن فى اى اتجاة مستغلة جهلة وخبيتنا
الشبكة دى يتحكم فيها يهود ينفذون اجندة صهيونية فى بلادهم
سواء من اعلاميين او صحفيين او ممثلين او ممثلات وعارضات ازياء قمامير
او اساتذة جامعة موهوبين
او مغنيين عباقرة
وكلهم يتمتعو بمصداقية عالية عند المواطن العادى
لانهم اخترقو عقلة
وعرفو ازاى يعيشو مشاكلة ويتكلمو بلسانة
وطبعا بما ان دى دول ديموقرااااطية
المواطن هو اللى بيجيب الحكومة وهو اللى بيشيلها
ودول اللى بيتحكمو فى المواطن
يبقى دول اللى بيتحكمو فى الحكومة
وطبعا كل رجال السياسة هناك عندهم نقاط ضعف
وليهم فضايح
يعنى مثلا اللى شاذ جنسيا ومصورينلة افلام
ودى على فكرة مشكلة لما تكو ن شخصية عامة
فاكرييين كلينتون والبت السكرتيرة اليهودية مونيكا
او مرتشى ودى فضيييحة كبيرة
او حرامى
من الاخر كل واحد ممسوك لة ذلة
لو خرج عن النص بيتفضح
ويخرج من السلك الديبلوماسى مربوط على ضهر حمار
ودى تبقى نهايتة
واحسنلة ساعتها يمصمص ماسورة مسدس 9 مللى

الجانب الثانى ان دى دول نظامها راس مالى فيها مؤسسات ضخمة جدا سلتطها اعلى من سلطة الحكومة نفسها
يعنى احمد عز وبهجت نموذج مصغر جدا من الناس دى

طبعا دول ليهم كلمة
وطبعا عارفين مين اصحاب الشركات دى
دة غير شركات السلاح
اللى يتسلح الجيوش ذات نفسها وعلى مستوى دولى
وطبعا اصحابها يهود


خلصنا من الغرب

نخش على اصحاب الجلالة والفخامة والسمو
نبدأ بكبير المعرسين بتاعنا
دة اساسا انسان ضعيف الشخصية
كونة كان ضابط فى الجيش دة يخلية معتاد على اخذ الاوامر
ولايجرؤ على اصدار قرار
وطبعا اللى يأكد كلامى دة ان السادات اختارة
والسادات مش اهبل
دو بلوة مسيحة
كونة اختارة يعنى انة ملقاش حد فى البلد اهبل ولا اعبط ولا اجبن منة
ويقال انة اختارة بناء على نصيحة اسرائيلية
يعنى هو مخترق اساسا

واول مامسك البلد لو تفتكرو ايام ماكان بيلبس البدل الصيفى النص كم بتاع غزل المحلة قبل مايعلموة لبس البدل الكاملة
اتلم علية شلة المنافقين والحرامية والنور
من امثال ابراهيم نافع
وطبعا يا عينى الراجل ملبوخ ومش عارف يملى الكرسى اللى قعدعلية
ودول مشكورين اتطوعو يساعدوة على انهم يثبتو دولتة ويقووة
ودة طبعا مقابل صلاحيات واسعة

واول ماحب يعيش دور الراجل الشريف فى نص التمانينيا ت ويتخلص من الاوساخ دول وابتدى يجيب ناس شرفا زى احمد رشدى

طبعا عارفين اية اللى حصل
وصلولة رسالة اننا اقوى منك
ولو ممشيتش على مزاجنا هنخسف بيك الارض
ولانة سلبى ومش متعود يفكر
اتعلم الدرس كويس
ونشأت حكمتة الشهيرة
اسرق بس ماتخليش حد يشوفك
علشان ميتحرجش قدام الناس

ومن كام سنة بدأت مراتة تزن على دماغة انة يرستق ابنة عالكرسى من بعدة طبعا مزقوقة من اسرائيل
لانهم عايزين كل حاكم يجى اسوأمن اللى قبلة ويقوم بالدوراللى هما فشلو فية ايام الحرب
وقلولة عيلتك من غير الكرسى مش هتعيش يوم واحد
طبعا علشان دة يحصل لازم يضمن امريكا وبوش افندى
طلع لبوش
طبعا بوش عارف هو جاى يتكلم فى اية بس عامل اهبل
واللة يا بوش يا سيدى انا خدمتكم العمر كلة
وبنفذ كل اوامركم
طب يا حسوسو عايز اية؟
عايز امسك ابنى من بعدى
اييييييييية؟ ابنك؟
لا يابابا لا
لست انا هذا الرجل
امريكا دولة ديموقراتية مهلبية
ولا تدعم النظم الديكتاتورية
ولايسلم الشرف الرفيع من الاذى حتى يراق على جوانبة الدم
ومن حق الشعب المصرى ان يقول كلمتة فى انتخابات حرة نزيهة
ووو....
تقمص دور يوسف وهبى\

مشى وقفاة يقمر عيش
رجع لامنا الغولة وحكالها
قالتلة ولا يهمك اطلع على اونكل شارون
راحلة وحكالة قالة ومالة دة جمال برضة ابننا ومننا وعلينا والضفر ميطلعش من اللحم واحنا بنحب مصر ونفسنا نقرب من بعض اكتر من كدةونفسنا نقابلها فى الخرابة
اصل مصر دى ....مووووووووزة قوى


راح لعمو شيراك وقعد يعيطلة ويقولة بوش منطهدنى وبيعاملنى وحش ومش عايز يمسك الواد نوفل من بعدى
طب ولا يهمك ان هاكلمهولك

راح تانى لبوش لطعوة كاام سا عة كالعادة وقالولة اترزع هنا لحسن الكومندان مش فاضيلك دلوقتى

وبعدين قابلة
بص يا حسوسو
انا بصراحة الناس كلمتنى وضغطت عليا علشان خاطرك بس برضة......مقدرش
حسوسو الوديع الاليف اللى بينسك على قفاة قال فى سرة مابدهاش
وقام متقمص دور الشخص المتنرفز وقعد يزعق
يعنى ايييييييييية
دنا اولع فى مصر كلها لو ابنى نوفل مامسكش من بعدى
على الحرام من دينى لكون طالقلكم كل بتوع الجماعات اللى كنت حابسهم علشان خاطركم
على الطلاق بالتلاتة لكون ممسك المهدى عاكف رئيس وزرا واجيبلكو حكومة اخوان
يحرق ...يخرق...

طب بس بس
ماتزعلش
خلاص هنسيبة يمسك
بس انتى برضة يا حسوسو يا حبيبى لازم تشد حيلك شوية
معدل تدمير مصر بطىء
اية ماتشوف شغلك
لازم الشعب يبقى هايف وتافة
اية امال السبكى بيعمل اية
وصفوت خلية يشد حيلة شوية
وبهجت لازم يستغل قنواتة اكتر من كدة

وطنطاوى انا بلغنى ان لسة فية ظباط فى الجيش بيقولو لا
اية المخابرات الحربية والمجموعة 75 والقضاء العسكرى مش شايفين شغلهم لييية؟

وزى كان عالامن المركزى ولاااا تزعل هنديلة احدث اسلحة فض شغب فى العالم
وكماااااان هانديلة اسلحة محرمة دوليا من سنة 1956

ودة كوووووولة لوجة اللة
وماتخفش على نوفل ابنك اتى بس اسمع كلام طنط اسرائيل كويسسس
واحنا هنحطهولك فى عنينا


بالنسبة لباقى الحكام فالموقف مايختلفش كتير

انتو شعوبكم مش طايقاكم
ولو ماسمعتوش كلامنا هنرفع ادينا عنكم
وساعتها شعوبكم هتقرقشكم هم هم
واحنا لينا دراعنا جوا بلادكم ونعرف ازاى نثير شعوبكم كويس
اجعص ظابط فى السى اى اية يقدر يقيم ثور ة فى اى بلد عربى

ولو ماحصلش ولااا تزعلو
فاكرين صدام
ممكن بكرة الصبح نعمل فيكم الى عملناة فية
ونصوركم بالموبيلات كمان
وساعتها شعوبكم هتف عليكم

يبقى تسمعو الكلام احسن

ومتزعلوش اسرائيل منكم
وتشتمو ايران الوحشة هى وحزب الله وتهيجو شعوبكم عليها
فاااااهمين
ولا


هى دى يا جماعة الصورة بمنتهى البساطة
وفى الوقت اللى نقدر فية نبقى فى قوة اللوبى الصهيونى فى الغرب
هتلاقو الرئيس الامريكى طالع يقيم عقوبات دولية على اسرائيل

ويبعت سفن محملة سلاح للمقاومة فى فلسطين
ومش بعيد يضرب اسرائيل بالكيماوى


بس خلاص

احمد سعيد