Monday, 5 January 2009

يا شباب تابعوا نورا يونس على الجايكو

لسة دلوقت واحد بيقول لي نورا يونس ماشية في جنازة قلت له عرفت منين قال لي من الجايكو
وبعدين بصيت على الجايكوهات بتاعتها، نورا على الحدود دلوقت، بتحكي حاجات فظيعة، مهم قوي نتابعها على الجايكو هنا
هي بتجدد اول باول
الله يكون في عونها، هي من ساعتها على الحدود؟ انا كلمتها من ساعة ما العيال اتقبض عليها عشان اسألها على مالك قالت لي انا في العريش
هي لسة من ساعتها هناك؟ طول عمرها جدعة
انا ح اخد شوية من تعليقاتها على الجايكو وانشرها هنا:
I'm now escorting 3 dead Pal bodies to Rafah crossing for burrial in Gaza.
الترجمة: انا رايحة مع تلات جثث لفلسطينيين بيعدوا من الحدود عشان يدفنوا في غزة
Sec services high rank taking cntrl of Arish hospital prohibiting doctors from talking to press.
الامن مسيطر على مستشفى العريش ومانع الدكاترة من الكلام مع الصحافة
ومن ده كتير، انا مش قادرة ابص تاني على الكلام اللي هي كاتباه
واحدة فلسطينية ماتت والامن مانع دفنها بعد ما اخدولها التصريح، نورا بتقول ان الكلام ده بناء على تصريحات السفير الفلسطيني
--------
حاجة تانية غريبة حصلت
من امبارح وانا بابعت للبي بي سي في
have your say
عشان اقول لهم ان حماس بتضرب المستوطنات اللي موجودة في الاراضي المحتلة وان مفروض وفقا لقرار مجلس الامن القوات الاسرائيلية تنسحب من الاراضي دي، بس هم بدل ما ينسحبوا بيجيبوا مستوطنين مدنين عشان يفرضوا واقع جديد على الارض متحدين قرار مجلس الامن
مش عايزين ابدا ينزلوا الكلمتين دول، ادور في تعليقات الناس على المعلومة دي، ابدا، حتى الانجليز المتعاطفين بيقولوا الصواريخ دي سببها الحصار
طب ليه مش عايزين ينزلوا الحكاية دي؟ يمكن انا اسلوبي حاد؟ طيب ممكن حد يروح يقول الكلمتين دول بهدوء ونشوف ح ينزلوها وللا لا؟

9 comments:

kareem said...

بجد حاولي تقولي هي قالت ايه عشان انا الجايكو مش شغال عندي

مواطن مصري said...

اة مانا شفتهم ع السيي انن جايبين ناس متظاهرين ادام البوابة بتاعت المعبر

مواطن مصري said...

بس اتاكدي لاني شفت المعبر و الامن

جبهة التهييس الشعبية said...

حاضر يا كريم
منك لله

:(

قائدو سيارات الاسعاف بتقول عشر جرحى عدوا من المعبر بس السفير الفلسطيني بيقول جريح واحد هو اللي سمح له انه يعدي

الكلام ده من 58 دقيقة

الامن بيحاصر الصحفيين وبيضايقهم، صحفي من المصري اليوم الامن طلبه يشرب معاه قهوة لمدة اربع ساعات (معلش قهوة عجوزة شوية)
تلات صحفيين اسكتلانديين احتجزوا لمدة اربع ساعات من الامن القومي على بوابة صلاح الدين وعشرين صحفي تانيين اتمنحوا من الدخول لرفح عن نقطة تفتيش الطويلة

الكلام ده من ساعتين


امبارح

جالها قائمة بالاحتياجات الطبية وبتقول انها ح تنشرها على المدونة بس هي مش قادرة تنشر بالعربي دلوقت لانها بتبعت من الموبايل

طبعا الكلام على الست اللي عندها خمسين سنة موجود في البوست

بتحذر القوافل ان الحاجات المسموح بيها للعبور من المعبر هي الاحتياجات الطبية بس، اي منتجات تانية لازم تبقى صنع في مصر عشان الجمارك

شافت صاروخي بيتبعتبوا من جنوب غزة وبينزلوا في اسرائيل
وبتبتسم....

القصف الاسرائيلي امبارح كان جنب الحدود وعامل دخنة سودا جامدة

والباقي بقى اخبار من الحدود لما كانت مقفولة امبارح والطيارات اللي بتطير فوق الحدود وكده

جبهة التهييس الشعبية said...

اه

شافت اطفال من اللي داخلين كانوا خايفين قوي

kareem said...

شكرا يا ست الكل
و مستنيين المتابعه المتميزه

مواطن مصري said...

نوارة دة مدونات اسرائيلية كتير عاملة حرب تدوينة



http://www.chayyeisarah.blogspot.com/

شوفي دي
I'm NOT war blogging,

esraa said...

خلاص هنتابعها هناك

Anonymous said...

بس معلش جمارك ، كيف يعني جمارك؟؟؟؟؟؟