فيه ايه بقى؟

فيه ايه؟

انا شفت خطبة السيد حسن هنا

فيه ايه بقى؟ ماله؟ ماله عصبي كده؟ عمره في حياته ما كان بالعصبية دي غير لما بتوع اربعتاشر اذار قالوا له ح نشيل لك شبكة الاتصالات بتاعتك، وبرضه ما كانش بالعصبية دي على فكرة، دي اكتر مرة كان فيها غضبان

ماحدش يقول لي عشان مذابح غزة لانه واخد على المذابح

ماحدش يقول لي عشان الهجوم اللي عليه لانه واخد على الهجوم

ماحدش يقول عشان الخيانة العادية دي اللي احنا وهو واخدين عليها

يعني مش ح تيجي زي ايام حرب البتاع ده

فيه حاجة غير دول كلهم، عايزة افهم بقى فيه ايه؟ ولو فيه حاجة يعرفها يقولها لنا لان فعلا اساسا الموقف كله عجب عجب عجب

كله عجب

يعني محمود عباس اللي فرض الحصار وحب على رجلين مبارك عشان يقفل الحدود طالع يقول في مجلس الامن: هذا الحصار المش عارفة ايه؟ وبيطالب برفع الحصار!

فيه ايه؟

قطر اللي لسة راجع من منتجع من اسرائيل طالع بيقول ما تساووش ما بين الجاني والضحية

فيه ايه؟

وايه الاسكتش الفكاهي اللي الحكومة المصرية عاملاه ده؟ وايه مونولوجات عوكل وابو الغيط الثنائية دي اللي عاملة زي اسكتش: صغيرين صغيرين طب ما انتوا كنتوا قدنا؟

فيه ايه؟

والاردن والسعودية واوباما مستخبيين تحت الترابيزة ليه؟

فيه ايه؟

وتركيا اللي نازلة دب في الاكراد بتتكلم عن حق الشعب الفلسطيني وهي اساسا عاملة اتفاقية عسكرية مع اسرائيل

فيه ايه؟

وحماس مش بترد على اسئلة خالص مع انهم معروفين ان بقهم مخروم يعني وبيقولوا كل حاجة بزيادة، بس فيما يخص المشروع المصري والعملية السياسية كل ما مذيع الجزيرة يسأل حد من مسئولي حماس يتوهوه ويقولوا مش سماحين مات، اكل اتناشر كيلو بسبوسة وحتة قشطة قد كده، مش البت سنية هربت، ادتها قش ساخ تشتري عشرين بيضة وتلات ارطال لحمة وتدفح اكرة الشقة طمعت في الباقي طفشت

والمذيع قاعد يقول لهم زي فيلم كلام في الحب: رد رد رد رد رد رد رد رد

فيه ايه؟

وبقى الحكومة اللبنانية ما بتنطقش، ووليد جنبلاط اللي اتكلم وفجأة بقى صلاح الدين الايوبي

فيه ايه؟

وسوريا راخرة برضه عمالة تقول مش سماحين مات...وتتوه في الكلام

فيه ايه؟

والعجب العجاب ان كوندوليزا اللي قادت حرب لبنان ما ظهرتش في المولد ده كله غير امبارح وكلمتها كانت ضعيفة خالص

فيه ايه؟

والملك عبد الله بتاع الاردن بيقول فيه مؤامرة على فلسطين! بقى الملك عبد الله ابن حسين ابن زين بيتكلم عن المؤامرات؟

فيه ايه؟

والوحيدة اللي بتتصرف بشكل طبيعي ومتوقع هي اسرائيل، زي ما عملت في لبنان بتعمل في غزة

يبقى فيه ايه بقى؟

وفي كل ده كله، السيد حسن نصر الله بقى متعصب قوي قوي قوي قوي قوي كده ليه؟ عمره ما كان متعصب كده، هو اصلا مش عصبي، وما بيتخانقش، اللي ما اتخانقش مع جنبلاط وجعجع يعني...دلوقت عصبي قوي كده ليه؟ ايه اللي عارفه ومش قادر يقوله؟ ومن امتى بقى هو ما بيقولش؟ ده ما بيخبيش اي حاجة، وكل مرة يطلع في خطاب يقول انا مش ح اقول ييجي في اخر الخطاب وما يمسكش نفسه ويقول، وعشان كده النهاردة كان شكله مكتوم قوي، من امتى حد بيعرف يكتمه ويخليه ما يتكلمش؟ 

فيه ايه؟

 فيه حتة من البازل ناقصة، في جيب مين؟ حد فاهم حاجة؟ انا عندي تخمينات بس ده مش وقت تخمينات خالص