عظمة على عظمة يا هيكل

الحقيقة انا دايما مختلفة مع الاستاذ هيكل

مش دايما قوي، بس باختلف معاه كتير في التفاصيل، يمكن في الخطوط العريضة لا، بس معظم التفاصيل

النهاردة

ما اقدرش غير اني ارفع القبعة للاستاذ هيكل وادعي له: ربنا يجعل الحلقة دي في ميزان حسناتك يا استاذ هيكل ويبارك في مخك

بيني وبينكوا هو في المقابلة دي ما اخترعش العجلة

اقصد يعني ان الموقف اوضح من انه يتطلب من الاستاذ هيكل ان يقدح زناد فكره عشان يشوف الصورة، كل حاجة واضحة

لكن اكتر حاجة غمرتني انه كان موجوع بجد، حاول يبقى حيادي وبارد على قد ما يقدر، بس بجد بجد كان مجروح من قلبه وموجوع وجع حقيقي، واول مرة في حياتي (انا متابعاه على طول على فكرة) اول مرة في حياتي اشوفه موجوع قوي قوي قوي قوي كده وبالعمق ده

هو الحقيقة عمري ما شفته موجوع، انا كنت فاكرة انه شخص عقلاني المشاعر دي ما بتدخلش خالص في حساباته، اول مرة في حياتي من ساعة ما اتولدت اشوف حراره قلبه طالعة في كل كلمة قالها وعمال يقول: انا ح احاول اكون حيادي، وفعلا كان حيادي

الكلام حيادي، والاداء مجروح جدااااااااااااااااااا 

الظاهر ان النهاردة يوم الـ"اول مرة": اول مرة حسن نصر الله يخرج عن شعوره بالشكل ده

اول مرة هيكل يبقى مجروح وكل حرف في كلامه بينزف بالطريقة دي

اول مرة انا بقى

انا

انا نوارة الانتصار المولودة في تمانية اكتوبر تلاتة وسبعين في فجر معركة الفردان

اول مرة احس اني عايشة نكبة شبه نكبة تمانية واربعين، ويمكن اكثر مرارة

واول مرة في حياتي كلها وانا باتفرج على هيكل اعيط بصوت عالي طول الحلقة

واول مرة احضر ميلاد المسيح وذكرى استشهاد الحسين في يوم واحد

واول مرة اخد بالي ان التشابه بين شخصية سيدنا عيسى وبين شخصية سيدنا الحسين كبير كده

وفيه حاجة مش فاهماها

اول مرة ابقى ممرورة ومبسوطة

ممرورة الكل عارف ليه

مبسوطة....انا نفسي مش عارفة ليه؟

حاسة اني باحضر عملية ولادة في اودة العمليات

يارب مصطفى يكون سجل الحلقة