عاجل للشغل الجد

تحديث:

ده فيديو دلال، بعته لواح اسمه توم قال لي انه مترجم محترف وانه مستعد يعمل سابتايتل لاي فيديو

عايزة تقطعوا صورة البنت وهي شايلة القطة وتعملوها بانر حلو، انا لسة راجعة وما قرتش كل الناس، ح انزل تاني وبالليل ارجع ان شاء الله ونتكلم، عشان ده بس اعداد للمدونة عشان ح ناخد الاسامي والميلات للي ح يشاركوا في المدونة

طلب عاجل يا شباب: مصطفى دلوقت مسافر، بس هو سايب التلفزيون يسجل :) المهم انا عايزة الفيديو بتاع دلال، دلال والقطة بتاعتها، الفيديو ده حد يسجله ونعمل له سابتايتل بالانجليزي، انا ممكن اترجم بس ما اعرفش ازاي اعمل سابتايتل على الفيديو المهم ان التقرير بتاع دلال بيتذاع كل شوية على الجزيرة حد يسجله بسرعة وينزله على اليوتيوب وبعدين نعمل سابتايتل لما ارجع او حد موجود يعمل له سابتايتل ويدخل يسيبه وجابر او مادو يقطعوا صورة دلال وهي شايلة القطة ووراها صورة الخراب ويسنجفوها ويعملوها بانرات حلوة، ويدخلوا يسيبوها والكل ينشرها في كل حتة ولو اتأخروا عليا ح اخرب بيتهم، هي بلطجة كده، اتوسل اليكوا تاخدو صور الهولوكوست هنا وهنا وتنشروها لحد لما اي حد يعمل سيرش على الهولوكوست ما يلاقيش غيرها، انتوا ما تتخيلوش ردود الافعال عشان كام مدونة نشروها، والصهاينة عاملين باللو على الصور دي ومش عارفين يروحوا فين وييجوا منين، التوقيعات بتاعة سحب الجايزة من بيريز عملت ربعميت واحد بس؟ اخصصصصصصصصصصصصصص، ليه يعني؟ ده على راي مواطن مصري ولا يستاهل جايزة نوفل

احنا نبتدي حاجة واحدة الاول، عايزين نعمل مدونة مشتركة، هدفها التصدي لجيش المدونين الصهاينة

بصوا بقى

طبعا ممكن يبقى هدفها خدمة القضية الفلسطينية، بس بصراحة بقى انا بعد اللي حصل ده، انا مش عايزة اخدم القضية الفلسطينية، انا اللي عايزاه دلوقت ان اسرائيل ما تبقاش موجودة، خالص، مش عايزاها في الدنيا خالص، وانا شايفة انه ممكن جدا، اساسا هي جات لنا منين زفتة دي؟ وبقالها ستين سنة بس، ولسة بقالها ستين سنة وبتعمل كده في الناس

لا يمكن باي حال من الاحوال اسرائيل دي تستمر خالص، انا مش عايزاها، مش عشان فلسطين ولا عشان الفلسطينيين ياخي بلاش الفلسطينيين اللي واقفين في زور العالم بالعرض من غير سبب دول، بس عشان الانسانية، تخيل انها لا قدر الله مشيت بالمعدل ده وخلصت على الفلسطينيين، ح تعمل ايه في بقية الانسانية، دي عمالة تتوحش وتتغول كل مدى، انا مش عايزاها خالص ابدا بعد كده، كفاية انها كرهت الناس في بعض

ما طول عمر الدنيا فيها اديان مختلفة وكانوا عايشين مع بعض، وكان بيبقى فيه حروب دينية وحروب مصالح بس مافيش كده ابدا، دي اسوأ من النازي والله العظيم، لانها رد فعل مرضي للنازية، ودايما رد الفعل المرضي بيبقى اسوأ من الفعل مهما كان الفعل سيء، دي اسوأ ما عرفته الانسانية كلها

انا لا هدفي اخدم الفلسطينيين، ولا العرب ولا المسلمين، انا هدفي اخدم الانسانية كلها بالقضاء على الفكر المريض ده

ده فيه مدون انجليزي كتب يقول: مين قال ان الناس ما بتتعلمش من التاريخ، الاسرائيليين اتعلموا من النازي يعملوا ايه في البشر

طيب اه، بس ما اتعلموش ان النازي راح في مزبلة التاريخ، زي ما هم ح يروحوا بالظبط ان شاء الله، واحنا عايزين مدونة يبقى هدفها ان اسرائيل تروح لمزبلة التاريخ

اول حاجة: محتاجين اكتر من لغة، غير الانجليزي والعربي، كان فيه واحدة دخلت لي وقالت لي انا فرنساوي، طيب عايزين لغات كمان

تاني حاجة: عايزين نركز على حاجة حاجة، يعني الجريمة الاخيرة دي، انا عارفة ان اسرائيل جرايمها كتير، واحنا محتاجين نركز على الجريمة الاخيرة، بس مش كأنها اول مرة تحصل، لازم نوصل للعالم ان هي دي طريقتها طول عمرها وان احنا مطلبنا تقديم القيادات العسكرية والسياسية للمحاكمة، واحدة واحدة، نمسك حاجة حاجة

تالت حاجة: عايزين صور وفيديوهات كتير، االمشكلة في عرض القضية الفلسطينية من اول النكبة ان بيبقى فيها وثائق طويلة ومكتوبة، عايزين شرح للقضية الفلسطينية من اولها بفيديوهات وصور بعدة لغات وبشكل مكثف من غير ما نزهق الناس برغينا، واضح ان ماحدش مقتنع بينا عشان احنا رغايين وللا ايه

خلينا نكون حسني الظن ونقول انهم مش مقتنعين عشان احنا رغايين وما نقولش انهم مش لاقيين حد يضطهدوه غيرنا

رابع حاجة بقى: احنا عايزين نطالب الامم المتحدة تطلع قانون لحماية العرب والمسلمين من الاسلاموفوبيا والعربوفوبيا لان كده بقى ما ينفعش فعلا التهزيء اللي احنا فيه، ولما نتهزأ ونزعل يتريقوا علينا، طب اللي بيتعمل فينا ماحدش يقدر يعمله في الصهاينة ابدا

خامس حاجة: انا ليا صحاب امريكان بيقولوا لي ان احد اسباب كراهية العرب انهم بيدرسوا في التاريخ الحملات الصليبية

شوف البجاحة يا اخي، شوف البجاحة يا اخي، ييجوا يحتلونا ويطلعونا احنا اللي وحشين كمان، وده بيخلي اسقاط كل الكراهية على العرب سهل، اولا لانهم بعيد، ثانيا لان يمكن استلهام الكراهية من التاريخ، لما سألتهم طب هو انتوا لازم تكرهوا حد؟ قالوا لي اه!!! لازم يبقى فيه عدو نسقط عليه كل الكراهية عشان ده بيبقى محفز كويس للشغل وشحذ الهمم والنشاط الخارجي والداخلي

(للتوضيح رجاء قراءة كتاب الامير لمكيافيللي)

لا معلش يشوفوا لهم حد يكرهوه غيرنا احنا اخدنا نصيبنا

النقطة دي لازم تتوضح

سادس حاجة: احنا مش ننتقد الناس ونعمل زيهم

بشكل اوضح، انا مش عايزة احفاد القردة والخنازير والكلام المهبب ده، اردوغان كان ذكي جدا لما قال اجدادي العثمانيين احتضنوا اليهود لما كانوا بيعانوا من الاضطهاد، والحقيقة التاريخ بيقول ان اليهود المواطنين طول فترة الحضارة العربية كانوا مدلعين اخر دلع، اكتر من المسيحيين بكتير (هههههه يا عيني المسيحيين) وانا عندي وثائق تاريخية بكده، ودراسات تاريخية عاملها الباحثين اليهود نفسهم، وفي مؤتمر المخطوطات كان فيه باحث يهودي قدم بحث رائع بيوثق بالمخطوطات ان مكانة اليهود في ظل الحضارة العربية كانت اخر دلع وهشتكة وده لانهم كانوا عددهم قليل واهتماماتهم كلها منصبة على التجارة والعلوم وما كانش لهم اطماع سياسية فكان دايما الخليفة يدلعهم ويقربهم

بالمختصر، انا مش عايزة عنصرية، ومش عايزة نكرر غلطة الصهيونية، هم يعملوا رد فعل للناز واحنا نعمل رد فعل للصهيونية ونلف في حلقة مفرغة، التوحش والكراهية دي لازم تقف دلوقت حالا لو ينفع

عشان كده انا مش عايزة اسرائيل خالص بقى، مش عايزاها خالص، تروح في الزبالة دي ما ينفعش تعيش اكتر من كده، ستين سنة وعملت ده كله، امال لو قعدت كمان عشر سنين ح تعمل ايه

انا دلوقت حالا حاطة هدف قدامي عايشة عشانه ان اسرائيل تختفي في ظرف عشر سنين، ومستعدة اعمل اي حاجة عشان هدفي ده يتحقق، ومش ح ينفع احققه لوحدي، كل الاهداف في بدايتها كانت مستحيلة

بما في ذلك اسرائيل نفسها، كانت مستحيلة لدرجة ان الفلسطينيين والعرب قبل النكبة كانوا مش واخدين خوانة ولا مصدقين اصلا انها حاجة ممكن تحصل

واهي حصلت، وانا مؤمنة اننا نقدر نرجع الوضع على ما كان عليه وده يبقى اسهل من مهمة الناس اللي خلقت وضع جديد، ودلوقت انا مش عايزة حاجة في حياتي غير كده

اللي عايز يتشارك معايا في الحلم ده يتفضل، انا عندي الميل بتاعي اهو على المدونة، ويسيب تعليق هنا، يقول لي امكانياته، ومقترحاته، ح نبتديها بمدونة وربنا هو المستعان، ننظم افكارنا ووقتنا ومقترحاتنا، ومش عايزة واحد ولا واحدة هدفه اقل من مسح اسرائيل من على الخريطة واعادة الوضع على ما كان عليه زي الاول، زي ما كنا طول عمرنا في المنطقة دي بالذات، اعراق مختلطة واديان مختلفة وكنا عايشين، مافيش حاجة اسمها وطن قومي لليهود

طب فين الوطن القومي للمسلمين؟ وفين الوطن القومي للمسيحيين؟ وفين الوطن القومي للبوذيين؟ والهندوس؟ واللا دينيين؟ وشهود يهوه؟ اشمعنى اليهود يبقى لهم وطن قومي؟ واليهودية دي دين وللا جنسية وللا عرقية وللا ايه بالظبط؟

اليائسون يمتنعون

مغسولو الامخاخ يمتنعون

المتصهينون طبعا يمتنعون

وماحدش يكلمني عن سلام، السلام ما يبقاش مع كيان بيهدد سلام البشرية كلها

واكتر من كده، انا عندي قناعة ان الصهاينة المحتلين فلسطين دول بني ادمين، وفي النهاية جهازهم العصبي مش ممكن يستحمل اللي بيعملوه في الناس ده، زي الراجل اللي حرق باسبوره الاسرائيلي، زي الست دي وحتى لو مش متخيلين انهم يمسحوا فكرة الصهيونية بالالحاح ح يقتنعوا وح يعرفوا انهم ما يقدروش يعيشوا بالطريقة دي، ولا فيه انسان في الدنيا ينفع يعيش كده، ودي مش دولة لان مالهاش سيادة، لولا الفيتو الامريكي والسلاح الامريكي والدولار الامريكي عليها كان زمانها في الزبالة من زمان

انا مصدقة في اننا نقدر على راي سي زفت الطين اللي لو مالوش قيمة في حياتنا غير انه اوحى لنا بان كل حاجة ممكن يبقى كفاية

yes we can