هم بيتغابوا حتى على نفسهم؟

تحديث: اه صحيح، ضروري والنبي تصوتوا على الاستفتاء اللي انا عاملاه ده والنبي، كل واحد يصوت مرة واحدة

ضروري بس عشان فيه حاجة كده ح نتكلم فيها سوا

يعني الناس خطفت جندي اسرائيلي، تقوم اسرائيل عشان تنقذه تموته؟

ايه الغباوة دي؟

على فكرة، مش ح اقدر اقول اني مبسوطة، حيوان مين اللي ينبسط في الظروف دي، بس متفائلة

اولا اسرائيل مش ح تلوش بالغباوة دي الا اذا كانت واخدة علقة كويسة ملففاها حولين نفسها ومخلياها تعافر وتعند وتستخدم كل الوسائل عشان ما ينفعش تاخد علقة تانية والا ح تبقى محدتة حمامات التلات ومسخرة القهاوي

ثانيا وصل بيها الجنان انها تستخدم اسلحة فسفورية والمجتمع الدولي كله بيعزز عليها، النهاردة في جنيف كانت الجلسة آخر تعزيز

كده بقت فضيحة تاريخية، والفضيحة دايما في مصلحة اللي معاه الحق

ثالثا اوباما ح يعطي اولوية للسلام؟ ده عند امه يا ادهم، جزمة مين اللي ح يعمل سلام مع اسرائيل؟ الا اذا كانوا ناويين يلعبوا لعبة في الانتخابات وغيروا طقم الحرب ده عشان الحكام العرب الهبل يبقى لهم نفس يقعدوا مع الحكومة الجديدة

رابعا اسرائيل منعت حزبين عربيين من دخول الانتخابات!!!! اهلاااااااااااا

join the club

برضه يا اخوانا من عاشر القوم، مدام ابتدوا يعبطوا كده يبقى كويس، بدل ما قاعدين نقول اسرائيل متقدمة علينا علميا واقتصاديا وبتنجان، احنا لسة ح نقوم نجري وراها، اهي جاية اهي، عشان نعرف نتعامل بس

خامسا لو حصلت انتخابات حرة في فلسطين - واشك ان امريكا ح تسمح بكده مرة تانية لكن الله غالب - طقم محمود عباس وسلام فياض ودحلان وشلتهم (ما اقصدش فتح اقصد الطقم اللي قتل عرفات) ح ينضربوا بالشباشب والقباقيب، ولا حتى ح ينتخبوا نفسهم، ولو امريكا فرضت سلام فياض مثلا او اي حد من المطروحين زي عريقات على سبيل المثال والحصر ح تبقى ليلة سودا على دماغهم ودماغ امريكا في ساعة واحدة

سادسا

والله حرب غزة دي تنفع تتسمى الفاضحة والكاشفة زي سورة التوبة كده

مش بس فضحت العالم والحكام العرب

فضحتنا احنا نفسنا قدام نفسنا

والفضيحة كويسة، انا باحب الفضايح، عشان كل حاجة تتشاف تحت الكشاف وتتعالج

ان شاء الله

ان شاء الله

ان شاء الله

الكيان الصهيوني الى زوال قريب، وح ياخد معاه كل الجربانين والدلاديل وكل النتانة اللي في المنطقة اللي جات معاه، وح تمشي معاه ان شاء الله

تسألني بأمارة ايه؟

اقول لك: احساس كده