استعنا ع الشقا بالله

ياللا يا شباب، احنا الحمد لله ابتدينا المدونة لمحاربة الصهيونية، ومحمود شلطف عمل الفيديو بتاع دلال خلاص، وفيه كذا حد مشارك في المدونة دلوقت وده اللنك بتاعها

http://justicenownetwork.blogspot.com/

اللي عايز يشارك معانا يسيب الميل بتاعه عشان ابعت له انفيتيشن اللي مش عايز الميل بتاعه يتنشر يقول لي في التعليق مش للنشر

عشان احنا لسة باديين مافيش حاجة عملناها قوي غير فيديو دلال وكام فيديو وعايزين اقتراحاتكوا معانا

فيه كام نقطة بس عايزة اوضحها:

ماحدش مستفيد من استمرار اسرائيل غير الحكام العرب، مافيش حاجة واكسانا غير وجود اسرائيل اللي دايما بيأجل احلامنا في التقدم والمطالبة بحقوقنا

عشان كده الحكام العرب ماسكين فيها بايديهم وسنانهم، ولا نافع حرب ولا نافع سلام مع اسرائيل

ادي احنا اهو خير مثال:

لما كنا بنحارب كنا بنسف التراب ونسكت: هشششششش احنا ورانا حرب، لما ننتصر ان شاء الله نبقى نتكلم

وادي احنا اهو عملنا سلام مع الكيان الصهيوني

قاعدين نتنفض من الرعب والخوف: لا ما نفتحش المعبر احسن اسرائيل تضربنا

لا ما نطردش السفير احسن اسرائيل تضربنا

لا ما نوقفش الغاز احسن اسرائيل تضربنا

لا ما نكحش احسن نصحي اسرائيل من النوم وتضربنا

وفوق البيعة حسني مبارك اخد سوكسيه بعمره كله، ليه؟ مش عشان بطل قومي لا سمح الله

بس عشان منوفي، قفل على الناس وهي بتنضرب: وحمانا من ان اسرائيل تضربنا

الله

يعني ح نعيش خايفين في الحرب والسلم؟

ح نعيش مأجلين احلامنا في الحرب والسلم؟

النقطة التانية

تفكيك اسرائيل مافيش اسهل منه

اذا كانت اقامتها اللي هي كانت اصعب اتحققت

بس المهم الواحد يصدق في حلمه، واللي معاه الحق مش ممكن يخسر، ومافيش اي حاجة مهما كانت صغيرة او بسيطة، مدام بتتعمل باخلاص، تبقى مش مهمة

صحيح انا لا بنحارب ولا بنعمل حاجة فيها مجهود يعني

بس مين عارف، يوضع سره في مدون خلقه