ولا الامريكان بني ادمين اصلا

ماحدش يقول لي اصل الاعلام بيضللهم، السي ان ان قدامي اهي، بتغطي تغطية كويسة وبتاخد من الجزيرة كمان وجايبة كل العيال اللي روسهم طايرة والمحروقين والعمي وكل حاجة، وبعد كل اللي شافوه ده ستين في المية من المشاركين في استطلاعات الرأي لمشاهدي السي ان ان متعاطفين مع اسرائيل

!!!!!!!!!!

انا عايزة افهم ده على اي اساس؟ مين يعني يشوف المناظر دي ويتعاطف مع اللي بيعمل كده في الناس الا اذا كان خنزير؟

دي لو حرب تحرير فلسطين، والجيوش العربية منتصرة وعملت كده في الاسرائيليين كنت ولعت فيهم وفي نفسي

حتى المذيعة، ومذيعات السي ان ان عشان يدوا انطباع انهم موضوعيين بيفضلوا مبتسمين ابتسامة هابلة ويبقى الواحد مش فاهم هي مالها سعيدة قوي كده وهي بتقول كل المصايب دي، حتى المذيعة ام ابتسامة بلهاء فتحت بقها وقالت للراجل بتاع الاستطلاع: ليه؟ ليه يعني؟ قال لها يمكن عشان حداشر سبتمبر، الله يخرب بيوتهم على بيوت اهاليهم على بيوت اللي ماتوا في حداشر سبتمبر، ما كانوش تلاتلاف واحد اللي قتلوا قدامهم اتنين مليون وقاعدين يعوموا في دم الناس بقالهم سبع سنين ويتشفوا في غيرهم لما اسرائيل تموت لهم ناس كمان، والراجل يقول لها الناس لما اوباما قال ان اسرائيل بتدافع عن نفسها اتأثروا قوي وده لمس جواهم وتر

الهي يقطع اوتارهم هم واسرائيل في ساعة واحدة قادر يا كريم

طب ناس ربنا مديهم ناعوم تشومسكي اللي بيقول ان اوباما ما يفرقش كتير عن بوش وانت قتل المدنيين دي استراتيجية اسرائيلية نشأت مع نشأة دولة اسرائيل وانهم بيتعمدوا يعملوا كده عشان يكسروا ارادة الناس ويخوفوهم ويثنوهم عن حتى التفكير في المقاومة

وبيقول مقاومة ما بيقولش ارهاب

حمير ليه بقى؟ ايه اللي يخليهم حمير؟ يعني ناعوم تشومسكي ده بينزل عليه الوحل؟ مش بني ادم زي بقية البني ادمين؟

لا مش حمير....اشرار عشان هم عندهم ناس بتفهمهم اهو وبيتشفوا في دماء الاطفال برضه 

امال احنا نعمل ايه اللي ربنا مدينا مصطفى الفقي؟ ده احنا ابطال والله

وكل ما تكلمهم يقولوا لك: ما كل الحضارات كان عندها امبراطورية، اشمعنى احنا؟ ما انتوا كان عندكوا امبراطورية، احنا كمان عايزين امبراطورية! هو احنا بنوزع فسدق هنا؟

الامبراطوريات دايما بتموت وبيفضل ذكرها، يعني الفراعنة الناس فاكراهم بالاهرامات والتحنيط، اليونان الناس فاكراهم بالفلسفة والمنطق، الرومان الناس فاكراهم بالـ...بايه؟ بالملاحم والشذوذ الجنسي، العرب الناس فاكراهم بالجبر وعلم الاجتماع والشعر، انجلترا الناس فاكراها بالثورة الصناعية

الامريكان بقى ح يفتكروهم بايه؟ ح يفتكروهم برقصة الافتتاح اللي ابتدوا بيها الامبراطورية في الحرب العالمية التانية في هيروشيما وناجزاكي، القنبلة الذرية، والنووية، والعنقودية، والفسفورية، والدايم

حتى الكمبيوتر والموبايل والريسيفر قابلين للانفجار

يعني دي الامبراطورية المتفجرة، على الله يفرقعوا قريب بقى ويخلصونا

اسكتوا، مش قريت واحد بيقول على اوباما انه شيوعي وانه عامل زي جمال عبد الناصر؟ ههههههه والله ما اعرفش انا امريكاني في سني كده يعرف جمال عبد الناصر منين؟ بس بيقول انه بيتحدى الكونجرس وعايز يمشي خطة الاقتصاد بتاعته غصب عنهم والخطة بتاعته شيوعية وبيستغل كاريزمته ويأثر على الناس ويقولهم كلام يريحهم وفي الاخر يعمل اللي في دماغه وبيفرض رأيه في كل حاجة وعامل زي جمال عبد الناصر

هههههههه

احسن خليهم يخيبوا، هو الراجل لسة عمل لهم حاجة؟ ده ما بقالوش خمس ايام، ده حاطط خطة تسوى عمرهم، ياريت حد من البهايم هنا يعملها، احسن خليهم يرفضوها وتطبل على دماغهم، خلي الديمقراطية اللي قارفينا بيها تنفعهم، دي تغور من وشهم، وهو يستاهلهم برضه، عشان يبقى يطلع لنا يرقع صداغنا من غير مناسبة وكل ما تجيله فرصة يسب لنا ويقول لنا: لت مي بي مور كلير احنا ملزمين بامن اسرائيل

وطبعا لت مي بي مور كلير دي مش متوجهة لا للامريكان ولا للاسرائيليين لان ده مفروغ منه بالنسبة لهم، ده جاي لنا احنا وبيقول لنا: وانظر لي وفي ذلك حكمة، ماهو احنا اتبلينا بواحد الكام سنة اللي قضاهم في اندونيسيا ح تخلينا في اللا وعي بتاعه على طول وح يقضي عمره كله يبذل كل جهده عشان يتبرى مننا

طب كويس بقى انهم لبسوه في الشيوعيين خلينا احنا نخلص من البلوة اللي اتحدفت علينا دي، انا عارفة كان مستخبي لنا فين ده راخر؟