شوية تيبس للسيد وزير خارجة جمهورية مصر العربية

ايها الاخوة المواطنون ما حدث لم يكن بالمفاجئة، فانه ضمن التوقعات المرئية في ليلة رأس السنة

1-

مافيش شخصية سياسية في الدنيا اسمها: "الشيخ" حسن نصر الله. سماحة السيد (عشان من نسل الرسول) واسمه حسن نصر الله مش عايز تقول سماحة السيد لحد ما تعمل له تحليل دي ان ايه، براحتك، اسمه حسن نصر الله، او السيد حسن نصر الله، والحمد لله انك عرفت ان اسمه حسن وما قلتش الشيخ سماحة السيد حسن نصر الله على اساس انه هو اسمه سماحة وابوه اسمه سيد وجده اسمه حسن، برافو والله، عرفتها لوحدك دي؟

2- مافيش معبر في الكون ده اسمه كرَم ابو سالم، مافيش كرَم، كرَم ما جاش ناحيتنا، اسمه كرْم ابو سالم، يعني بستان الكرْم، الكرم اللي هو العنب مش كرم الكريم يعني، الترجمة: بستان العنب بتاع الحاج ابو سالم

3- فيه مهدئات آمنة، موتيفال، ده خفيف خالص بنديه للاطفال اللي بتجيلهم حالة هيستيرية قبل امتحانات رابعة ابتدائي، تقدر تاخده قرص قبل ما تطلع اي مؤتمر صحفي، بس تكون فطران كويس

4- مصر اسمها: جمهورية مصر العربية، درة العرب، واصلهم، وامهم، وبتجري في جيناتهم، غصب عن عين التخين والرفيع، ودي المادة الاولى من الدستور المصري واللي مش عاجبه يشوف له بلد تانية تبقى توك توك على قده وللا حتى بسكلتة مدام ما بيعرفش يسوق عربيات

5- لما الانسان يتكلم عن نفسه هو حر يتعصب ويشتم ويتف ويشخر وينف ويعمل كل اللي هو عايزه، لما يتكلم نيابة عن بلد يعرف مقام البلد اللي هو بيتكلم عنها، ومقام مصر كبير قوي، سميها بقى شوفونية عنصرية عقدة تفوق، دي اسمها مصر: فجر الضمير، مش فجر الشرشحة، لها مقام عالي، وعليها واجبات لازم تأديها بما يليق بمقامها، واللي يتكلم نيابة عنها يا يبقى عملاق زيها، يا يشب عشان يوصل لها. الاقزام يمتنعون

6- الدفاع عن مواقف قذرة بدعوى الدفاع عن مصر هو الهجوم الحقيقي على مصر. اللي عايز يدافع عن ندالته ومواقفه المخزية، اللي عايز يقول وانا مالي عيش ندل تموت مستور يشتغل سواق تاكسي ما يحكمش مصر

ما يحكمش

7- دور مصر مش ان تُعَرص زي ما ربنا كعبل لسانك، مصر دي كان اسمها القائد الاعلى للقوات العربية، مصر اللي انجلترا خافت منها وما رضيتش تعدي الجسر الجوي الامريكي اللي بيمد اسرائيل بالسلاح لبعدين مصر تزعل، ما ينفعش البلد دي يجور عليها الزمن لحد ما تبقى تصريحات مسئوليها هي الفاصل الكوميدي في نشرات الاخبار

8- زلة اللسان دي الناس ح تحكي وتتحاكى عليها، عشان انت اصلك كنت ناقص دي كمان، شفت ربنا عمل فيك ايه؟ ولسة، عشان تعرف اللي بيشتم الاولياء المجاهدين ربنا بيخليه عبرة خلقه، ارتجع بقى عشان انت ما تعرفش معاداة الاوليا بتجيب الخراب ازاي، ربنا قال من عادى لي وليا آذنته بالحرب، انت قد حرب ربنا؟

وفي الختام

اسمه عيسى ما اسموش عيسوي، مات مصلوب مش في حادثة موتوسيكل، وانت نازل ابقى انزل على السلم ما تتزحلقش على الترابزين

الا هل بلغت؟ اللهم فاشهد