Tuesday, 13 January 2009

على وشك يبان يا نداغ اللبان

احنا ح نعمل ايه؟ كل حاجة تعدي زي ما عدت قبل كده؟ جو كاتب بوست حلو قوي، بس المشكلة في البوست انه فيه كلام خطير بناء على تصريحات بيريز والاعلام الصهيوني
دلوقت بيريز بيقول ان زعماء العرب بيقعدوا معاه ويقولوا له خلص على حماس ويطلعوا قدام الناس يقولوا كلام تاني ما عدا مصر اللي في قلبها على لسانها، مبدئيا يا سيد بيريز احنا ما نعرفش انها اللي في قلبها على لسانها، يعني اقصد ما قالتلناش كده، ولما مبارك قال لساركوزي خلصوا على حماس واوعوا تنتصر، ساركوزي فضحه عندكوا انتوا، ما قالش الكلام ده عندنا، واحنا اصلنا ناس مش بنحب نصدق الحاجات اللي بتضايقنا، وبعدين لما الريس ما ردش كل الناس قعدت تقول له زي فيلم كلام في الحب: رد رد رد رد رد رد رد رد
لحد ما هيكل قال له: رد
فرد وقال ما قلتش، وانت بتقول ان مبارك اللي في قلبه على لسانه، طب ما ده معناه انه بيفضفض مع كل الناس الا احنا! وبعدين وفقا للاعلام الصهيوني، زي ما جو كاتب، عمر سليمان زعق لاسرائيل وقال لهم ايه بقى؟ ايه الخيبة اللي انتوا فيها دي؟ نديكوا وقت اكتر من كده ايه؟
ووفقا للوفود الحقوقية، زي ما جو بيقول، محمود عباس بيتهرب منهم عشان عايزين يمضوه على شكوى لاتهام اسرائيل بجرائم الحرب
--
طب احنا لحد امتى ح نفضل نعمل زي الام اللي فشلت في تربية ابنها وكل ما حد يقول لها يا ستي ابنك سكري مش شايفاه بيتطوح ازاي؟ تقول لهم: لا، ده بس دايخ من كتر المذاكرة. يا ستي ابنك شمام، مش شايفة مناخيره بتسح ازاي
- اصل يا قلب امه نام على المكتب وهو فاتح الشباك فجاله زكام
يا ستي احنا شايفينه وهو بيسرق عربية مع صحابه
- لا هم صحابه صيع، بس هو ابدا ما يعملش كده، والله باقوله يسيبه منهم، ده غلبان وممكن يلعبوا بدماغه
احنا ح نفترض ان بيريز كداب، والاعلام الصهيوني كداب، والحقوقيين العرب والنرويج كدابين، وساركوزي كداب، وكل دول عدوينك كلهم بيكرهوكي نافع هو اللي بيحبك نافع هو خطيبك
وانهم بيعملوا كده عشان يوقعوا الناس في بعض طب تقدروا تقولوا لي اشمعنى منقيين الحكومة المصرية والاردنية والسعودية ومحمود عباس بالذات عشان يتبلوا عليهم كل يوم كل يوم؟ وهو هو نفس الكلام بنفس البنطلون بنفس الفانلة، اللي اتقال من سنتين ونص ايام حرب لبنان هو هو اللي بيتقال السنة دي
طب اشمعنى بيقولوا الكلام ده؟
وليه ماحدش بيرد عليهم؟ رد رد رد رد رد رد رد رد
طب هم يعني لو عايزين يوقعوا الدنيا في بعض بالكدب، يقدروا مثلا يقولوا الكلام اللي احنا بنقوله على حماس من غير اي دليل غير ان كلم العربي يدهيك واللي فيه يجيبه فيك، يقدروا يقولوا احنا اتفاقنا كده مع حماس، او يقدروا يجيبوها بشكل ملتوي، ان مثلا احنا كنا متفقين مع حماس على اننا نقلب عباس والاتفاق كان بينص على انهم يرموا صواريخ في الحتة الفلانية قاموا رموا صورايخ في حتة تانية غير اللي احنا اتفقنا عليها
اهو
شفتوا التأليف سهل ازاي؟ وكلمة زي دي لو قالها اولمرت وللا بيريز (بصرف النظر عن عدم منطقيتها) اجهزة الاعلام بتاعتنا ح تغنيها وتلحنها وترقص عليها
واحنا عشان جبنا وخايفين وفي نفس الوقت حاسين بالذنب ما ح نصدق نطلع ان حماس عميلة وكانت متفقة معاهم ونفضل نلك في الكلام ده عشان نرتاح ونريح ضميرنا
وبكده، تقدر اسرائيل تقتل كل الناس من غير اي تعاطف معاهم وخلاص، ده هم من غير ما يقولوا كده فيه ناس مرضى عقليا بيلبسوا حماس المسئولية، ما بال بقى لو لبست حماس تهمة، اي تهمة، انشالله تقول احنا اللي بعنا لهم الصواريخ دي عشان يضربوا بيها عباس قاموا ضربونا بيها
شوفوا، اديني عمالة اديهم افكار اهو، وما اعتقدش انهم مستنيين افكاري اللوذعية يعني، اكيد هم انبه مني وعندهم افكار احسن
شفتوا سهلة ازاي؟
طب ما عملوش كده ليه؟ اقصد لو كدابين يعني، ما يكدبوا كدبة تنفعهم ما تضرهمش، الكدبة دي تضرهم وتضر الحكام العرب، لو كانت كدبة
صح؟
انتوا فاهمين يعني ايه انسان - مش ح اقول حاكم عربي ولا حتى مطرب عربي - انسان يتفق مع آلة عسكرية عشان تقضي على حد؟
اي حد
مش مقاومة، ومش ناجحة في الانتخابات، ومش مهمة خالص، مش بني ادمين، اميبا خلية اولى على رأي عمرو دياب
فاهمين يعني ايه ده؟ اقصد يعني، تخيل نفسك انت، بتتفق مع واحد يقتل لك واحد
طب تخيل نفسك بتتفق مع واحد يقتل لك جارك
طب تخيل نفسك بتتفق مع عدو يقتل لك اخوك اللي ساكن جنبك
طب تخيل نفسك بتمثل شعب وبتعمل كده، يا ناس ما ينفعش كده على فكرة، يعني، بالراحة كده، اللي يتفق مع اسرائيل انها تقضي على فصيل مقاوم في بلد جنبه، تتفتكروا ممكن يتفقوا معاها علينا احنا بايه؟ واللي ح يقول لي مافيش داعي للاتهام بالعمالة والتخوين ح افتح الشباك وارميه منه وانا على فكرة ساكنة في الدور الاتناشر، تفتكروا كل اللي احنا فيه ده مصادفة؟
ازاي يعني اكلنا متسرطن وميتنا ملوثة وارضنا متباعة (سبحان الله اللي بيعايب على انسان ربنا بيقعدها فيه - قعدنا نقول باعوا ارضهم لحد ما بلدنا تلات اربعها ابتاع) ونفوسنا متحطمة، والناس كلها عندها اكتئاب وماشيين يخانقوا دبان وشهم، واتحولنا بقدرة قادر من شعب مزارع وصانع لشعب مستهلك وكومسيونجي، واتحولنا بقدرة قادر من خير اجناد الارض لناس عايشة ميتة ولو واحد اتكرع بصوت عالي كل اللي حواليه يجروا من الرعب، وتعمد اذلال الناس وكسرة نفسهم
كل ده صدفة؟
صدفة كده من عند ربنا؟
ده احنا لو قوم لوط ربنا مش ح يعذبنا بالطريقة دي، قوم لوط ربنا خسفهم وخلاص
تفتكروا الموت النفسي والعقلي والجسدي البطيء ده مصادفة؟
يعني انا اسفة بس الواحد يقول ايه؟ يقول الحمد لله ان موضوع غزة ده حصل عشان الاعمى يشوف؟ عشان لما نقول اسرائيل صراعنا معاها صراع وجود مش بسببنا احنا بسبب انها هي مش عايزانا، والسلام معاها اخطر من حربها، لان السلام معاها ح يديها فرصة تتسلل وتنتشر زي السرطان وتحطمنا من جوانا، وتعين فوق راسنا عملاء، لما نقول كده وييجي ناس، ما اعرفش بقى، مخاليل وللا عملا، يارب يكونوا عملا عشان على الاقل يبقوا بياخدوا مقابل لقرفهم، يقولوا لنا: ايه الكلام القديم ده؟ ايه نظرية المؤامرة دي؟ طيب، انا عندي امارات كتير اهو، بص في الشارع، بص في الواقع
اديني امارة بقى على كلامك ان الكلام ده قديم ونظرية مؤامرة، اديني دليل
طب اهو، اسرائيل نفسها بتقول لنا: فيه مؤامرة على فكرة
ح يموتونا يا كلاوي
- ما تبقاش شكاك قوي كده
امبارح واحدة كانت بتكلمني في التليفون، وانا عيانة وعندي برد، ومافيش في قلبها رحمة قعدت تخنق فيا، وبص بقى بتدافع عن موقف مصر ازاي: العاهرة اللي برخصة احسن من اللي عاملة حاجة وهي عاهرة
!!!!!!!!!!!!!!!!!!!!!!
على فكرة انا مش ح اكلمها تاني البت دي، وعلى الله تكون بتقرا دلوقت عشان انا فعلا مش عايزة اعرفها وقلت لها امبارح اني مش عايزة اعرفها، واحدة ببقها بتقول انها بتعزز على عاهرة، ومش مكسوفة من نفسها
ده حتى المعززين المحترفين ما بيقولوش كده، ايه المنطق ده؟
اولا
بالنوسبة لانهي احسن العاهرة المستحية وللا اللي بتشرد لنفسها، دي مسألة قيمية اخلاقية نسبية خلافية، فيه ناس تقول اللي مستخبية اهي عندها خشا انما التانية البعيدة بجحة، وفين ناس تقول بجحة بجحة بس على الاقل مش بتغش حد، وعليه فافتراض ان اللي في قلبه على لسانه احسن من اللي مخبي علينا دي مسألة نقدر نتناقش فيها
ثانيا
هي بقت كده؟ يعني دلوقت بقى الامر الواقع ان حكوماتنا عاهرة بس يا ترى مين احسن المستخبية وللا اللي واخدة رخصة؟
طب واحنا بالنوسبة لنا يعني كبني ادمين وبنات عائلااااات محترماااااات حبيبي، احساسنا ايه وده واقعنا؟
يا جدعاااااااااااان مصر دلوقت مقدمة مشروع مبادرة - بعد علقة امبارح اللي اخدتها غزة - تنص على بقاء قوات الاحتلال في غزة
يا جدعان نشغل مخنا
ماهو اللي عايز يحط احتلال على حدودنا، هو هو اللي موت الناس في العبارة، وهو اللي بقاله سنين بيزرع فينا الفساد والكسل والاكتئاب والجبن والمرض
والاتنين: سياسته الداخلية والخارجية (اذا اعتبرنا ان فلسطين خارجية - يا خيبتي التقيلة على الجهل) الاتنين بيصبوا في مصلحة اسرائيل بس
هو نفس ذات الصخص والله العظيم، مافيش اي تربيط خالص في المخ كده؟ ده مش تلوث بقى، ده احنا معمول لنا عمل

9 comments:

Anonymous said...

احمد سعيد

الاخوة والاخوات

ابناااااائى وبنااااااتى


والله يا خت نوارة انتو بتسألو سؤال اعتقد ان كلكم عارفين اجابتة كويس

اولا
اسرائيل ماسكة اية على امريكا واوروبا
اسرائيل متحكمة فى الرأى العام
الامريكى والاوروبى عن طريق شبكة اعلامية ضخمة وذكية تستطيع توجية المواطن فى اى اتجاة مستغلة جهلة وخبيتنا
الشبكة دى يتحكم فيها يهود ينفذون اجندة صهيونية فى بلادهم
سواء من اعلاميين او صحفيين او ممثلين او ممثلات وعارضات ازياء قمامير
او اساتذة جامعة موهوبين
او مغنيين عباقرة
وكلهم يتمتعو بمصداقية عالية عند المواطن العادى
لانهم اخترقو عقلة
وعرفو ازاى يعيشو مشاكلة ويتكلمو بلسانة
وطبعا بما ان دى دول ديموقرااااطية
المواطن هو اللى بيجيب الحكومة وهو اللى بيشيلها
ودول اللى بيتحكمو فى المواطن
يبقى دول اللى بيتحكمو فى الحكومة
وطبعا كل رجال السياسة هناك عندهم نقاط ضعف
وليهم فضايح
يعنى مثلا اللى شاذ جنسيا ومصورينلة افلام
ودى على فكرة مشكلة لما تكو ن شخصية عامة
فاكرييين كلينتون والبت السكرتيرة اليهودية مونيكا
او مرتشى ودى فضيييحة كبيرة
او حرامى
من الاخر كل واحد ممسوك لة ذلة
لو خرج عن النص بيتفضح
ويخرج من السلك الديبلوماسى مربوط على ضهر حمار
ودى تبقى نهايتة
واحسنلة ساعتها يمصمص ماسورة مسدس 9 مللى

الجانب الثانى ان دى دول نظامها راس مالى فيها مؤسسات ضخمة جدا سلتطها اعلى من سلطة الحكومة نفسها
يعنى احمد عز وبهجت نموذج مصغر جدا من الناس دى

طبعا دول ليهم كلمة
وطبعا عارفين مين اصحاب الشركات دى
دة غير شركات السلاح
اللى يتسلح الجيوش ذات نفسها وعلى مستوى دولى
وطبعا اصحابها يهود


خلصنا من الغرب

نخش على اصحاب الجلالة والفخامة والسمو
نبدأ بكبير المعرسين بتاعنا
دة اساسا انسان ضعيف الشخصية
كونة كان ضابط فى الجيش دة يخلية معتاد على اخذ الاوامر
ولايجرؤ على اصدار قرار
وطبعا اللى يأكد كلامى دة ان السادات اختارة
والسادات مش اهبل
دو بلوة مسيحة
كونة اختارة يعنى انة ملقاش حد فى البلد اهبل ولا اعبط ولا اجبن منة
ويقال انة اختارة بناء على نصيحة اسرائيلية
يعنى هو مخترق اساسا

واول مامسك البلد لو تفتكرو ايام ماكان بيلبس البدل الصيفى النص كم بتاع غزل المحلة قبل مايعلموة لبس البدل الكاملة
اتلم علية شلة المنافقين والحرامية والنور
من امثال ابراهيم نافع
وطبعا يا عينى الراجل ملبوخ ومش عارف يملى الكرسى اللى قعدعلية
ودول مشكورين اتطوعو يساعدوة على انهم يثبتو دولتة ويقووة
ودة طبعا مقابل صلاحيات واسعة

واول ماحب يعيش دور الراجل الشريف فى نص التمانينيا ت ويتخلص من الاوساخ دول وابتدى يجيب ناس شرفا زى احمد رشدى

طبعا عارفين اية اللى حصل
وصلولة رسالة اننا اقوى منك
ولو ممشيتش على مزاجنا هنخسف بيك الارض
ولانة سلبى ومش متعود يفكر
اتعلم الدرس كويس
ونشأت حكمتة الشهيرة
اسرق بس ماتخليش حد يشوفك
علشان ميتحرجش قدام الناس

ومن كام سنة بدأت مراتة تزن على دماغة انة يرستق ابنة عالكرسى من بعدة طبعا مزقوقة من اسرائيل
لانهم عايزين كل حاكم يجى اسوأمن اللى قبلة ويقوم بالدوراللى هما فشلو فية ايام الحرب
وقلولة عيلتك من غير الكرسى مش هتعيش يوم واحد
طبعا علشان دة يحصل لازم يضمن امريكا وبوش افندى
طلع لبوش
طبعا بوش عارف هو جاى يتكلم فى اية بس عامل اهبل
واللة يا بوش يا سيدى انا خدمتكم العمر كلة
وبنفذ كل اوامركم
طب يا حسوسو عايز اية؟
عايز امسك ابنى من بعدى
اييييييييية؟ ابنك؟
لا يابابا لا
لست انا هذا الرجل
امريكا دولة ديموقراتية مهلبية
ولا تدعم النظم الديكتاتورية
ولايسلم الشرف الرفيع من الاذى حتى يراق على جوانبة الدم
ومن حق الشعب المصرى ان يقول كلمتة فى انتخابات حرة نزيهة
ووو....
تقمص دور يوسف وهبى\

مشى وقفاة يقمر عيش
رجع لامنا الغولة وحكالها
قالتلة ولا يهمك اطلع على اونكل شارون
راحلة وحكالة قالة ومالة دة جمال برضة ابننا ومننا وعلينا والضفر ميطلعش من اللحم واحنا بنحب مصر ونفسنا نقرب من بعض اكتر من كدةونفسنا نقابلها فى الخرابة
اصل مصر دى ....مووووووووزة قوى


راح لعمو شيراك وقعد يعيطلة ويقولة بوش منطهدنى وبيعاملنى وحش ومش عايز يمسك الواد نوفل من بعدى
طب ولا يهمك ان هاكلمهولك

راح تانى لبوش لطعوة كاام سا عة كالعادة وقالولة اترزع هنا لحسن الكومندان مش فاضيلك دلوقتى

وبعدين قابلة
بص يا حسوسو
انا بصراحة الناس كلمتنى وضغطت عليا علشان خاطرك بس برضة......مقدرش
حسوسو الوديع الاليف اللى بينسك على قفاة قال فى سرة مابدهاش
وقام متقمص دور الشخص المتنرفز وقعد يزعق
يعنى ايييييييييية
دنا اولع فى مصر كلها لو ابنى نوفل مامسكش من بعدى
على الحرام من دينى لكون طالقلكم كل بتوع الجماعات اللى كنت حابسهم علشان خاطركم
على الطلاق بالتلاتة لكون ممسك المهدى عاكف رئيس وزرا واجيبلكو حكومة اخوان
يحرق ...يخرق...

طب بس بس
ماتزعلش
خلاص هنسيبة يمسك
بس انتى برضة يا حسوسو يا حبيبى لازم تشد حيلك شوية
معدل تدمير مصر بطىء
اية ماتشوف شغلك
لازم الشعب يبقى هايف وتافة
اية امال السبكى بيعمل اية
وصفوت خلية يشد حيلة شوية
وبهجت لازم يستغل قنواتة اكتر من كدة

وطنطاوى انا بلغنى ان لسة فية ظباط فى الجيش بيقولو لا
اية المخابرات الحربية والمجموعة 75 والقضاء العسكرى مش شايفين شغلهم لييية؟

وزى كان عالامن المركزى ولاااا تزعل هنديلة احدث اسلحة فض شغب فى العالم
وكماااااان هانديلة اسلحة محرمة دوليا من سنة 1956

ودة كوووووولة لوجة اللة
وماتخفش على نوفل ابنك اتى بس اسمع كلام طنط اسرائيل كويسسس
واحنا هنحطهولك فى عنينا


بالنسبة لباقى الحكام فالموقف مايختلفش كتير

انتو شعوبكم مش طايقاكم
ولو ماسمعتوش كلامنا هنرفع ادينا عنكم
وساعتها شعوبكم هتقرقشكم هم هم
واحنا لينا دراعنا جوا بلادكم ونعرف ازاى نثير شعوبكم كويس
اجعص ظابط فى السى اى اية يقدر يقيم ثور ة فى اى بلد عربى

ولو ماحصلش ولااا تزعلو
فاكرين صدام
ممكن بكرة الصبح نعمل فيكم الى عملناة فية
ونصوركم بالموبيلات كمان
وساعتها شعوبكم هتف عليكم

يبقى تسمعو الكلام احسن

ومتزعلوش اسرائيل منكم
وتشتمو ايران الوحشة هى وحزب الله وتهيجو شعوبكم عليها
فاااااهمين
ولا


هى دى يا جماعة الصورة بمنتهى البساطة
وفى الوقت اللى نقدر فية نبقى فى قوة اللوبى الصهيونى فى الغرب
هتلاقو الرئيس الامريكى طالع يقيم عقوبات دولية على اسرائيل

ويبعت سفن محملة سلاح للمقاومة فى فلسطين
ومش بعيد يضرب اسرائيل بالكيماوى


بس خلاص

احمد سعيد

مواطن مصري said...

قناة النيل للأخبار: وفد كبير من الحزب الوطني الحاكم إلى شمال سيناء .. ومتحدث باسم الحزب يقول أنهم سيقومون بأكبر تظاهرة في تاريخ الحزب من أجل أهل غزة "حسب قناة النيل للأخبار

Anonymous said...

بصراحة الخبر اللى جابة الاخ مواطن مصرى دلوقتى
مش ممكن اعلق علية الا
باسلوب تعجب سماعى وليس قياسى
يشمل اصدار صوت متتابع من سقف الحلق مع رفع مؤخرة اللسان لاعلى وفتح الفم

احمد سعيد

لقد خلقنا الله احرارا said...

بعد اذنك يا زعيمة-- استاذ احمد كلامك رائع وبسيط والمشكلة ان كلنا عارفينه زى مانكون كنا معاهم بس يمكن احيانا بنضحك على نفسنا علشان مايجيلناش انهيار عصبى بس اكتر كلمة لمستنى لما قلت عن صدام لانى وبصرف النظر عن رأينا فيه عيطت يوم ما اتقبض عليه لانى حسيت ان امريكا بتربينا وان البلطجة الامريكية هتعيش ازهى عصورها كنا زمان بنتكلم ونقطع نفسنا قوى عن مؤامرات الاستعمار ياريتهم فضلوا يتأمروا علينا على الاقل مكناش هنحس بالفشل زى دلوقت -- الاغبياء الفشلة ربنا طمس بصيرتهم طبعا اقصد حكامنا مش بيفهموا الدروس صح ثقافة الانبطاح بوظت دماغهم اول امبارح افغانستان وامبارح العراق وكل يوم فلسطين طيب امتى يفهموا ان الدور علينا وساعتها هنجرى على حدودنا مع فلسطين وليبيا والسودان واستحالة حد يعبرنا الموقف ده بيفكرنى بمعنى الاية الكريمة ومن يعرض عن ذكرى فان له معيشة ضنكا ونحشره يوم القيامة اعمى قال ربى لما حشرتنى اعمى وقد كنت بصيرا قال كذلك اتتنا اياتنا فنسيتها وكذلك اليوم تنسى -------متهيألى ربنا سبحانه وتعالى بعت لينا وليهم ايات كتير بس فعلا انها لاتعمى الابصار وانما تعمى القلوب التى فى الصدور ------------------مواطن مصرى ----------بتجيب سيرة الحزب الوطنى فى مكان طاهر زى ده ربنا يسامحك

Anonymous said...

ية يا احمد يا سعيد دة
تجنن ياراجل اسلوبك جميل لازم تعمل مدونة انت خسارة فى البلد دبة

Anonymous said...

اللي بتقوله الصحافة الا سرائيلية ما هو الا خطة عشان تزعزع العلاقة بين الشعوب و الحكام و انتي بالطريقة اللي بتكتبي فيها بتساهمي بشكل غير مباشر بالخطة الاسرائلية
و سلامتك

ماجد said...

ايا جماعة صدقونى واللة العظيم تلاتة فية ناس كتير فى البلد مصدقين حسنى مبارك و مش حقول بيحبوة بس معتقدين انة بيتصرف صح وان الناس الوحشة اللى مش فاهمة عاوزة مصر يعينى تحارب وبتردد كل الكلام البطيخ اللى بيتقال انا ساعات بحس اننا بجد شعب اهبل وحلال فينا اللى بيحصل لان قدروا يزرعم فينا المثل القبيح اللى بيقول طالما مش عارف اية بعيد عنى يبقى ماليش دعوة ومش قادرين يفهموا ان كل واحد علية الدور ان مكنش النهاردة حيبقى بكرة ومش قادرين يفهموا ان مصر بجد غنية وكبيرة وفعلا ام الدنيا واننا منستهلش كل اللى بيحصل فينا دة احنا كرامتنا متبعزقة واللة ان احنا اغنا بلد فى المنطقة لا دول الخليج ولا دول البطيخ بس يظهر ان الجبن والخنوع والذل والجهل اللى زرعوه فينا خلانا نستسهل ونقول ماهو اللى نعرفة احسن من اللى منعرفهوش وباقى الامثال الىى من النوع دة حد يفهمنى علشان اية الناس تتنازل عن كرامتها علشان تعيش ازااااااى ماهو لو مفيش كرامة يبقى حتموت ذليل وربنا واللة ليحاسبنا والبداية كانت بالحكومة دى من اكبر راس لاصغر ساعى فى اى حتة فين مصر اللى كنا بنسمع عنها زمان حد يقولى بجد هى فين انا عاوز اعيش فيها

Anonymous said...

اللة ينور ياعم احمد كل مرة تتحفنا بالمفيد والمشكلة اناحناكلنا فاهين دة كويس جدا بس حد يدلنى اية الحل كل واحد تقابلة يقول الحمدللة احنا احسن من غيرنا بس لحد امتى وفعلا صدق المقاومين بان سمو الحرب دى حرب الفرقان لانها اظهرت الحقيقة بقى يابيض يااسود وكل المواقف المايعةاللى كانوا بيضحكو علينا بيها خلاص بقت غيرصالحة للاستخدام بس هل دة هيحرك فينا نحن شعب الزومبى شيءمافتكرش وعلى فكرة المعلومة دى لمصطفى الزومبى برضة ريحتهم وحشة---------------دودو

Anonymous said...

بصى يا ست دودو
انا عارف ان الكلام دة هيضايق ناس كتييير
بس عايزكم ولو للحظة تفكرو فية
علشان البلد دى حالها يتصلح
لازم النظام يتغير بالكاااامل
النظام مش الحكومة

ويجى نظام وطنى
يخاف عالبلد
طبعا امريكا واسرائيل مش هتسكت
هيبقى الحل ساعتها فى قيادة سياسية بمنتهى الذكاء تعرف ازاى تدير الدفة لصالحها
وازاى تكسب الدول المعادية لامريكا واسرائيل وتكون حلف مشترك
وازاى تضغط على الدول الحليفة لهم علشان تحيدها
بحيث نضمن وقت نشل حركتها فية زى ما ايران بتعمل كدة دلوقتى
نقدر فية نصلح حال البلد على قد مانقدر
ونحيى الجيش من تانى
وفى نفس الوقت تعرف تحشد الشعب كويس وتفهمة مصلحتة وتغسلة دماغة
ودة لن يتم الاعن طريق التيار الدينى
وفى نفس الوقت نوضح للخارج اننا مش دولة عدوانية ولا نعادى الا من يعادينا
يعنى من الاخر عايزين قيادة سياسية بمنتهى الدهاء تعرف ازاى تمسك خيوط اللعبة خارجيا
وازاى توفق بين كل التيارات الداخلية وتحشدها كلها ورا هدف واحد

وبلاش حد يقولى الكلام الاهبل بتاع هو احنا قد اسرائيل ولا امريكا
اة احنا اضعف منهم عسكريا كتيييييير قوى
بس المواضيع دى مش يتتحسب بالبندقية والمدفع زى مانتو فاكرين
المسائل دى بيبقى ليها حسابات تانية كتير
وعلشان اقنعكو بكلامى
هسالكو سؤالين
الاول لية اسرائيل فى 67 وقفت عند القناة مع انها كانت تقدر تكمل
موشى ديان قال علشان ماقدرش ااكل 30 مليون
لا مش علشان كدة
لان مصر بلد تقيلة
تقيلة بموقعها
وبمساحتها
وببحرين حواليها
وبحر رمال متحركة غربها
وجوز صحارىيدوب فيهم التنين ولا يبان
وبتمانين مليون انسان
متركزين فى شريط ضيق وكثافة عالية
وشوارع ضيقة
وعشوائيات من المستحيل اختراقها
بالاضافة لانة شعب متجانس نسبيا يعنى مش هينفع يعملو معاة زى العراق مثلا اللى متقسمين لسنة وشيعة واكراد وبلا ازرق
ولو لسة ماقتنعتوش اسالو نفسكم ليةمصر بالذات مستهدفة بهذا الكم الرهيب من الفساد دونا عن باقى الدول العربية؟؟؟؟

مش كل الكروت فى ايد امريكا ولا حتى 99 زى ماتقال

طيب الحكومة دى مش هتيجى بالدعا ومصمصة الشفايف
ان الله لايغير مابقوم حتى يغيرو ما بانفسهم
اة لو صبرتو واستحملتو هيغورو فى داهية
بس هييجى الاسوأ منهم
وهكذا

وعمركم ماهتغيرو حاجة بمظاهرات وسط البلد والاعتصامات والكلام الفارغ اللى مش هيهز شعرة منهم

الحل هو ثورة
ثورة بجد
ثورة عنيفة
ومعلش ماحدش يقول عليا دموى ولا سادى دة فعلا هو الحل
ثورة مش سلمية
هيموت ناس كتير
اة ميحصل
بس الالف اللى ممكن يموتو النهاردة كان ممكن يبقو 100 لو الكلام دة حصل من فترة

وبكرة هيبقو مليون
كل يوم بيعدى احنا بنضعف
وهما بيذدادو قوة

النظام مش نايم على ودانة لا النظام بيعد نفسة كويس قوى لليوم دة
والمليون وسبعميت الف عسكرى بكرة يبقو تلاتة واربعة وخمسة مليون
دة غير السلاح اللى اكتر من تلتين ميزانية البلد رايحة علية
(قصدى سلاح الامن المركزى اوعو تكونو
(افتكرتو ان قصدى سلاح الجيش لاسامح الله

موضوع صعب بس بكرة هيبقى اصعب
والحرية مش ببلاش وابقو اقرو الشعار اللى فوق مدونة نوارة كويس
دى الحاجة الوحيدة اللى ممكن تلحق البلد

طب مين اللى هيعمل الثورة

الفلاح والصنايعى والعواطلى وطلبة الجامعةواى جزى يمكن استقطابة فى الجيش او الشرطة

مش بتوع الاحزاب ولا التيارات اياها
ولا الرفيق الشيوعى
ولا المناضل الاشتراكى
لان دول جهادهم جهاد فموى
بس

الاخوان شرحة برضة
بس عندهم ميزتين مش عند حد
الاولانية انهم بيتحركو تحت راية الدين ودة مش عيب بالاضافة لانة بيديهم قوة كبيرة جدا

ثانيا الاخوان عندهم قدرة اسطورية على حشد الراى العام
ودى حصلت قدام عينى اكتر من مرة
مثلا خطبة جمعة
ولا تجمع فى مصنع
تلاقى واحد فى الخمسينيات من العمر طلع من النصمن النص بلظبط
وفى التوقيت المناسب
ويروح قايل كلمتين
وفجأة تولع وتشعلل
والتجمع ينقلب مظاهرة جامدة
وطبعا صاحبنا بيكون فص ملح وداب


دول مش شباب الفيس بوك ولا المدونين ولا اى حد تانى
وان كنت لا اتهمهم بل بالعكس
هم ناس اصحاب قضيةومبادىء بس مع الاسف لسانهم مقصوص واديهم مشلولة
لان جمهور النت فى مصر مقصور على فئات محددة
اما بالنسبة لموضوع اسراء فمن حسن الحظ ان موضوع الاضراب اتسرب برة النت قبلها بوقت كافى
وعرفتة كل الناس

ودة بيحطنا قدام موضوع المحلة اللى انا شايفة اكبر تهديد هدد النظام
يمكن اكبر من موضوع احداث الامن المركزى كمان
كان مين اللى عملة
مين اللى اتحرك فعليا فى الشارع
المواطن
الجاهل
الفقير
مش اى حد تانى
مش عمو عاكف اللى كش فى جلدة وخاف واثر السلامة
وقال انة لن ينضم للاضراب
شفتو اللى حصل
سيبكو من اللى اتزاع فى التلفزيون
وكمان النت
اسألو حد حضر الموضوع عالواقع
انا مش باتكلم من فراغ لانى
كنت موجود فى المحلة ساعتها
وعاصرت الموضوع من اول ابريل لحد يوم عشرين
وشفت بعينى ازاى حيين بس من احياء المحلة هددو عرش النظام
ايوة حيين بس
مش كل المحلة
باقى البلد كانت نايمة فى العسل
ومش كل الحيين
لا دالعيال الصغيرة
والشباب الحافى
ولو كانو لقم قيادة كانو استمرو هم بطلو بس لانهم زهقو ومعرفوش يعملو اية تانى بعد كدة
يعنى مش شطارة من الامن المركزىولا حاجة
دول وصلو بالنظام لدرجة من الرعب انهم خلو شوية اوساخ من امثال رضا طبلية وعبد الفتاح عمر يقولو للظباط فى التلقين الابتدائى
اى كلب يفتح بقه اضربوة بالنار
عرفتو قد اية مرعوبين

بس الثورة دى من غير قيادة هتبقى دمار

طب يا عم احمد فين القيادة اللى هتقود ثورة ولا هاتشكل حكومة دا البلد فاضية

غلط دا اللى عايزين يفهموة للناس
ياما فية عقول نضيفة بل وعبقرية اتنفت من مصر من سنين ومنا عينهم يرجعو بلدهم تانى
ومعتقلات حسوسو مليانة من خيرة الشباب والاساتذة والدكاترة
منهم اللى مسجون من سنة واحد وتمانين

طب دا الناس ماتت فيها النخوة
لا لسة الشعب المصرى شعب متقلب ولا يمكن التنبؤ بتصرفاتة
وثوراتة ان حدثت فهى تكون بمنتهى العنف
والعنف دة بيتناسب طرديامع طول فترة الخمول

اقرو مذكرات الجنرال ديزية قائد القوات الفرنسية فى حملة نابوليون على الصعيد
بجد هتتخضو
هتحسو انة شعب تانى غير مصر
سييييبكو من كل الكلام اللى حصل فى الدلتا وثورة القاهرة الاولى والتانية
دة حااااجة تانية خاااااااالص
كفاية اقولكو ان ماحدش رجع منهم
مع العلم ان المصرى اياميها كان اغبى من دلوقتى
واجهل
واجبن
بس واجة
افراد اغبياء وجهلة وعزل
فى مواجهة اعتى الة حربية فى زمنها بسلاحها ومدافعها وتكتيكها

المصريين اياميها ماكانوش احسن من دلوقتى لا كانو اسوأ

ولا النظام كان اقوى ولا انصح من نابوليون
لا دا اغبى

وياريت بعض الاخوة المدونين يبطلو القنعرة وفشخرة البق والالفاظ الكبيرة
وبيطلو كلمة اللى عاجبة عاجبة واللى مش عاجبة يطلع برة مدونتى
وقولة انا مش هنزل لمستوى الناس
لا علشان خاطرى انزل لمستواهم شوية

الكلام دة انا مش تاليف
لا انا والحمد للةعشت فى المحلة ايام الاضراب وكنت فى وسط الناس
وعشت جوة شركة الغزل مع العمال ايام الاضراب
وقعدت مع ظباط امن مركزى وامن دولة كمان وقيادات فى الداخلية فى الحدثين دول وغيرهم كتير
وعاااارف كويس قوى مطبخ الداخلية بيشتغل ازاى
وبيخطط ازاى

معلش انا عارف ان كلامى غريب لاننا مع الاسف مش متعودين علية هنا فى مصر
احنا متعودين عالمعارضة المؤدبة
معارضة بتختشى

ماتعودناش عالصراحة


كان نفسى اقول كمان شوية بس مع الاسف مش ممكن اطول فى الكومنت اكتر من كدة


احمد سعيد