على وشك يبان يا نداغ اللبان

احنا ح نعمل ايه؟ كل حاجة تعدي زي ما عدت قبل كده؟ جو كاتب بوست حلو قوي، بس المشكلة في البوست انه فيه كلام خطير بناء على تصريحات بيريز والاعلام الصهيوني

دلوقت بيريز بيقول ان زعماء العرب بيقعدوا معاه ويقولوا له خلص على حماس ويطلعوا قدام الناس يقولوا كلام تاني ما عدا مصر اللي في قلبها على لسانها، مبدئيا يا سيد بيريز احنا ما نعرفش انها اللي في قلبها على لسانها، يعني اقصد ما قالتلناش كده، ولما مبارك قال لساركوزي خلصوا على حماس واوعوا تنتصر، ساركوزي فضحه عندكوا انتوا، ما قالش الكلام ده عندنا، واحنا اصلنا ناس مش بنحب نصدق الحاجات اللي بتضايقنا، وبعدين لما الريس ما ردش كل الناس قعدت تقول له زي فيلم كلام في الحب: رد رد رد رد رد رد رد رد

لحد ما هيكل قال له: رد

فرد وقال ما قلتش، وانت بتقول ان مبارك اللي في قلبه على لسانه، طب ما ده معناه انه بيفضفض مع كل الناس الا احنا! وبعدين وفقا للاعلام الصهيوني، زي ما جو كاتب، عمر سليمان زعق لاسرائيل وقال لهم ايه بقى؟ ايه الخيبة اللي انتوا فيها دي؟ نديكوا وقت اكتر من كده ايه؟

ووفقا للوفود الحقوقية، زي ما جو بيقول، محمود عباس بيتهرب منهم عشان عايزين يمضوه على شكوى لاتهام اسرائيل بجرائم الحرب

--

طب احنا لحد امتى ح نفضل نعمل زي الام اللي فشلت في تربية ابنها وكل ما حد يقول لها يا ستي ابنك سكري مش شايفاه بيتطوح ازاي؟ تقول لهم: لا، ده بس دايخ من كتر المذاكرة. يا ستي ابنك شمام، مش شايفة مناخيره بتسح ازاي

- اصل يا قلب امه نام على المكتب وهو فاتح الشباك فجاله زكام

يا ستي احنا شايفينه وهو بيسرق عربية مع صحابه

- لا هم صحابه صيع، بس هو ابدا ما يعملش كده، والله باقوله يسيبه منهم، ده غلبان وممكن يلعبوا بدماغه

احنا ح نفترض ان بيريز كداب، والاعلام الصهيوني كداب، والحقوقيين العرب والنرويج كدابين، وساركوزي كداب، وكل دول عدوينك كلهم بيكرهوكي نافع هو اللي بيحبك نافع هو خطيبك

وانهم بيعملوا كده عشان يوقعوا الناس في بعض طب تقدروا تقولوا لي اشمعنى منقيين الحكومة المصرية والاردنية والسعودية ومحمود عباس بالذات عشان يتبلوا عليهم كل يوم كل يوم؟ وهو هو نفس الكلام بنفس البنطلون بنفس الفانلة، اللي اتقال من سنتين ونص ايام حرب لبنان هو هو اللي بيتقال السنة دي

طب اشمعنى بيقولوا الكلام ده؟

وليه ماحدش بيرد عليهم؟ رد رد رد رد رد رد رد رد

طب هم يعني لو عايزين يوقعوا الدنيا في بعض بالكدب، يقدروا مثلا يقولوا الكلام اللي احنا بنقوله على حماس من غير اي دليل غير ان كلم العربي يدهيك واللي فيه يجيبه فيك، يقدروا يقولوا احنا اتفاقنا كده مع حماس، او يقدروا يجيبوها بشكل ملتوي، ان مثلا احنا كنا متفقين مع حماس على اننا نقلب عباس والاتفاق كان بينص على انهم يرموا صواريخ في الحتة الفلانية قاموا رموا صورايخ في حتة تانية غير اللي احنا اتفقنا عليها

اهو

شفتوا التأليف سهل ازاي؟ وكلمة زي دي لو قالها اولمرت وللا بيريز (بصرف النظر عن عدم منطقيتها) اجهزة الاعلام بتاعتنا ح تغنيها وتلحنها وترقص عليها

واحنا عشان جبنا وخايفين وفي نفس الوقت حاسين بالذنب ما ح نصدق نطلع ان حماس عميلة وكانت متفقة معاهم ونفضل نلك في الكلام ده عشان نرتاح ونريح ضميرنا

وبكده، تقدر اسرائيل تقتل كل الناس من غير اي تعاطف معاهم وخلاص، ده هم من غير ما يقولوا كده فيه ناس مرضى عقليا بيلبسوا حماس المسئولية، ما بال بقى لو لبست حماس تهمة، اي تهمة، انشالله تقول احنا اللي بعنا لهم الصواريخ دي عشان يضربوا بيها عباس قاموا ضربونا بيها

شوفوا، اديني عمالة اديهم افكار اهو، وما اعتقدش انهم مستنيين افكاري اللوذعية يعني، اكيد هم انبه مني وعندهم افكار احسن

شفتوا سهلة ازاي؟

طب ما عملوش كده ليه؟ اقصد لو كدابين يعني، ما يكدبوا كدبة تنفعهم ما تضرهمش، الكدبة دي تضرهم وتضر الحكام العرب، لو كانت كدبة

صح؟

انتوا فاهمين يعني ايه انسان - مش ح اقول حاكم عربي ولا حتى مطرب عربي - انسان يتفق مع آلة عسكرية عشان تقضي على حد؟

اي حد

مش مقاومة، ومش ناجحة في الانتخابات، ومش مهمة خالص، مش بني ادمين، اميبا خلية اولى على رأي عمرو دياب

فاهمين يعني ايه ده؟ اقصد يعني، تخيل نفسك انت، بتتفق مع واحد يقتل لك واحد

طب تخيل نفسك بتتفق مع واحد يقتل لك جارك

طب تخيل نفسك بتتفق مع عدو يقتل لك اخوك اللي ساكن جنبك

طب تخيل نفسك بتمثل شعب وبتعمل كده، يا ناس ما ينفعش كده على فكرة، يعني، بالراحة كده، اللي يتفق مع اسرائيل انها تقضي على فصيل مقاوم في بلد جنبه، تتفتكروا ممكن يتفقوا معاها علينا احنا بايه؟ واللي ح يقول لي مافيش داعي للاتهام بالعمالة والتخوين ح افتح الشباك وارميه منه وانا على فكرة ساكنة في الدور الاتناشر، تفتكروا كل اللي احنا فيه ده مصادفة؟

ازاي يعني اكلنا متسرطن وميتنا ملوثة وارضنا متباعة (سبحان الله اللي بيعايب على انسان ربنا بيقعدها فيه - قعدنا نقول باعوا ارضهم لحد ما بلدنا تلات اربعها ابتاع) ونفوسنا متحطمة، والناس كلها عندها اكتئاب وماشيين يخانقوا دبان وشهم، واتحولنا بقدرة قادر من شعب مزارع وصانع لشعب مستهلك وكومسيونجي، واتحولنا بقدرة قادر من خير اجناد الارض لناس عايشة ميتة ولو واحد اتكرع بصوت عالي كل اللي حواليه يجروا من الرعب، وتعمد اذلال الناس وكسرة نفسهم

كل ده صدفة؟

صدفة كده من عند ربنا؟

ده احنا لو قوم لوط ربنا مش ح يعذبنا بالطريقة دي، قوم لوط ربنا خسفهم وخلاص

تفتكروا الموت النفسي والعقلي والجسدي البطيء ده مصادفة؟

يعني انا اسفة بس الواحد يقول ايه؟ يقول الحمد لله ان موضوع غزة ده حصل عشان الاعمى يشوف؟ عشان لما نقول اسرائيل صراعنا معاها صراع وجود مش بسببنا احنا بسبب انها هي مش عايزانا، والسلام معاها اخطر من حربها، لان السلام معاها ح يديها فرصة تتسلل وتنتشر زي السرطان وتحطمنا من جوانا، وتعين فوق راسنا عملاء، لما نقول كده وييجي ناس، ما اعرفش بقى، مخاليل وللا عملا، يارب يكونوا عملا عشان على الاقل يبقوا بياخدوا مقابل لقرفهم، يقولوا لنا: ايه الكلام القديم ده؟ ايه نظرية المؤامرة دي؟ طيب، انا عندي امارات كتير اهو، بص في الشارع، بص في الواقع

اديني امارة بقى على كلامك ان الكلام ده قديم ونظرية مؤامرة، اديني دليل

طب اهو، اسرائيل نفسها بتقول لنا: فيه مؤامرة على فكرة

ح يموتونا يا كلاوي

- ما تبقاش شكاك قوي كده

امبارح واحدة كانت بتكلمني في التليفون، وانا عيانة وعندي برد، ومافيش في قلبها رحمة قعدت تخنق فيا، وبص بقى بتدافع عن موقف مصر ازاي: العاهرة اللي برخصة احسن من اللي عاملة حاجة وهي عاهرة

!!!!!!!!!!!!!!!!!!!!!!

على فكرة انا مش ح اكلمها تاني البت دي، وعلى الله تكون بتقرا دلوقت عشان انا فعلا مش عايزة اعرفها وقلت لها امبارح اني مش عايزة اعرفها، واحدة ببقها بتقول انها بتعزز على عاهرة، ومش مكسوفة من نفسها

ده حتى المعززين المحترفين ما بيقولوش كده، ايه المنطق ده؟

اولا

بالنوسبة لانهي احسن العاهرة المستحية وللا اللي بتشرد لنفسها، دي مسألة قيمية اخلاقية نسبية خلافية، فيه ناس تقول اللي مستخبية اهي عندها خشا انما التانية البعيدة بجحة، وفين ناس تقول بجحة بجحة بس على الاقل مش بتغش حد، وعليه فافتراض ان اللي في قلبه على لسانه احسن من اللي مخبي علينا دي مسألة نقدر نتناقش فيها

ثانيا

هي بقت كده؟ يعني دلوقت بقى الامر الواقع ان حكوماتنا عاهرة بس يا ترى مين احسن المستخبية وللا اللي واخدة رخصة؟

طب واحنا بالنوسبة لنا يعني كبني ادمين وبنات عائلااااات محترماااااات حبيبي، احساسنا ايه وده واقعنا؟

يا جدعاااااااااااان مصر دلوقت مقدمة مشروع مبادرة - بعد علقة امبارح اللي اخدتها غزة - تنص على بقاء قوات الاحتلال في غزة

يا جدعان نشغل مخنا

ماهو اللي عايز يحط احتلال على حدودنا، هو هو اللي موت الناس في العبارة، وهو اللي بقاله سنين بيزرع فينا الفساد والكسل والاكتئاب والجبن والمرض

والاتنين: سياسته الداخلية والخارجية (اذا اعتبرنا ان فلسطين خارجية - يا خيبتي التقيلة على الجهل) الاتنين بيصبوا في مصلحة اسرائيل بس

هو نفس ذات الصخص والله العظيم، مافيش اي تربيط خالص في المخ كده؟ ده مش تلوث بقى، ده احنا معمول لنا عمل