ما بدهاش بقى

من الصبح وانا جالي اخبار من العريش ورفح ان حالة الاستنفار عالية جدا، وان اهل رفح والعريش عايشين نفس اللي عايشه اهل غزة، وبتيجي عليهم شظايا وفيه ناس مصابين، ومنهم اطفال.

وسكت، مش طالبة قلق يعني انا عملت زي ما باعمل كل مرة، ادخل وادفس راسي في المخدة لمدة نص ساعة

دلوقت اول مرة يتم الاعلان عن حالات الاصابة من شظايا قصف الشريط الحدودي، وده لما اللي اصيبوا كانوا ظباط امن

لكن لسة لحد دلوقت ماحدش جاب سيرة الاطفال اللي جات عليهم شظايا القصف الاسرائيلي على الشريط الحدودي المصري، ولسة ما نعرفش هم اتصابوا وللا ماتوا، وعشان كده ما كانوش عايزين يدخلونا، اي حد بيروح هناك بيتمنع يتكلم مع الناس وطبعا في البلالا، انسى انك تصور

مافيش مشكلة، مش كل حاجة تتصور، ممكن يبقى تأمين ما جراش حاجة

هه

طبعا الاخبار اللي جات لي دي انا ما شفتهاش بعيني، بس ناس بتكلمني وبتقول لي، وناس قاعدين هناك

طيب انا ح اعتبرهم كدابين، مافيش حاجة من دي حصلت خالص، ودي اول مرة شريطنا الحدودي يتقصف واول مرة حد مصري يصاب، ومافيش حالة استنفار ولا حاجة والناس دي بتضحك عليا

ممكن يعني ليه لا؟

مدام ما شفتش بعيني ما اقدرش اجزم

هه

طيب؟

فيه ايه بقى؟ مش يفهمونا؟

وياترى ح يعملوا نفس المناحة اللي اتعملت على الظابط الاولاني؟ طب على الاقل الظابط الاولاني الله يرحمه بقى ضرب على فلسطيني موته قام الناس ضربت عليه، او حتى مش هو اللي ضرب عليه موته، ومش الامن اللي ضرب على الفلسطينيين خالص

هه

الواقع بيقول ان فيه فلسطيني ومصري ماتوا، الفلسطيني راح فطيس ولا نعرف مات ازاي، والمصري استغل موته كأسوأ ما يكون الاستغلال لواحد ميت مالوش ذنب غير انه كان بينفذ الاوامر

يا ترى ح نعمل ايه في التلاتة اللي اتصابوا على الحدود؟ وللا دول راحوا زي اللي راحوا قبل كده على ايد القناصة الاسرائيليين؟

طيب، طبعا راحوا زي اللي راحوا على ايد القناصة الاسرائيليين، ومش بعيد حماس تلبسهم هم كمان، ماهي حماس دي هي اصلا اللي خرمت الاوزون اصلا، والكلام ده حصل بعد تلاتة وعشرين يوم من خرمهم للتعريفة، واغلب الظن ان صواريخ حماس هي اللي اتسببت في زلزال تسونامي، بسبب انها كانت بتضرب خوازيقها دي على الارض بتنزل على الاسفلت تخرم الارض تعمل رجة، رجة في رجة

قام الزلزال وصل لتسونامي ولا حول ولا قوة الا بالله، حماس وحشة وحشة

هه

طيب، بما ان الوطن مسنود بعود كبريت واحنا قاعدين وحاسين ان مافيش امان، ولو اسرائيل ضربت جوة رفح كمان مش على شريط الحدود مش ح نرد، وماحدش طالب اننا نرد على فكرة احنا نفسنا يعني مش مطمنين

ودي حاجة على فكرة انا والله متفهماها، فعلا على رأي اللي ساب لي تعليق: مصر مخوخة من راسها

طيب

وبما ان اللي موجود دلوقت مالوش ذنب، هو وارث اتفاقية مكتفاه ومقيداه ومش عارف يتصرف وهي مكبلاه وما يعرفش يتحايل عليها، ده هو من غير ما يعمل حاجة واهم بيضربوا الشريط الحدودي مع ان الست كانت المفروض عندنا عشان تطمنا اننا مالناش في اللي جاي

هه

طيب طيب

طيب اولا: مش تقولوا لنا؟

يعني الاتفاقية لما اتمضت كانت سرية، طب اللي مضاها مات، وانت وارثها غصب عنك ودي حاجة احنا ممكن نتفهمها

طب مش تفهمنا؟ مش تقول لنا؟ وللا نقعد زي الاطرش في الزفة كده؟ تيجي في وسط الكلام تفاجئنا اننا مالناش سيادة على حدودنا وتقول لنا: اللي بيدخل باخطر اسرائيل واللي بيخرج باخطر اسرائيل؟ جاي تقول لنا الكلام ده دلوقت؟

يا جدعان ما ينفعش كده هو احنا طراطير في ام البلد دي؟ واحد يخبي علينا ان مضايق تيران مقفولة وفي وسط الكلام يقول لنا: ح نفتح مضايق تيران بقى؟ وواحد يمضي اتفاقية من اولها لاخرها ما نعرفش فيها بند واحد وقاعدين نضرب اخماس في اسداس ومهما قال في وسط الكلام ما كناش ح نعرف حاجة، لانك يعني، طلع جملة مفيدة من هلفطة مدتها تلات ساعات، وواحد يفاجئنا ان اسرائيل مراقبة حدودنا بالكاميرات واننا لو ما فتشناش واخطرناها بكل شاردة وورادة ح تنزل بنفسها وتفتش الناس: وما تقوليش فلسطين بقى دي ارض محتلة!

طب ياريت يجولنا دوغري المرة دي ويفهمونا، الشريط الحدودي بتاعنا بينضرب ليه؟ وليه احنا مش ح نعمل حاجة بالخصوص ده زي ما احنا ما عملناش حاجة بخصوص اللي ماتوا على ايد القناصة الاسرائيليين ومنهم امن ومنهم مدنيين وطفلة؟

انا مش ح اسمع من حد، انا عايزة اسمع من حكومتي، لا ح اصدق حد بيكلمني في التليفون، ولا ح اصدق الجزيرة، ولا ح اصدق اللي ح يدخلوا يعلقوا

هه

انا عايزة حكومتي تيجي معانا دوغري وتفهمنا، هو احنا بنقول حاجة وللا بنعمل حاجة لا سمح الله؟ احنا بس عايزين نفهم، عشان على الاقل يا سيدي نقدر موقف الحكومة، ولو موقفها ضعيف وادي الله وادي حكمته، يبقى فهمنا ونبطل بقى نجعر ونلطم، نفهم بس، نعرف راسنا فين ورجلينا فين؟

وهاتوا لنا حد يعرف يكلمنا غير عاطف السكري ده والنبي عشان نفهم منه بس، مش طالبة ضحك دلوقت خالص

-----

وطبعا طبعا بتوع السيادة والبيادة ماحدش فيهم ح يفتح بقه، ولو فتح بقه ح يقول ان حماس هي السبب، لان ده المنطقي طبعا، ماهي حماس دي مركز الكون، واله الظلام عند الزرادشت

والله الواحد مش عارف، منين حماس صواريخها بمب العيد، ومنين هي مؤثرة قوي كده ومتحكمة في مسار الكواكب والمجرات والمتسببة في كل الكوارث السياسية والاقتصادية والعسكرية والطبيعية والصناعية والزراعية والتجارية؟ طب يعني مش قبل ما ياخدوا اوامر بالكلام اللي المفروض يكرروه زي البغبغانات مش يسالوا مسئولهم اللي بيلقنهم؟ ياخدوا ويدوا معاه في الكلام عشان بس ما يبقاش شكلهم يضحك كده، وللا ح يرفدهم؟