Sunday 11 January 2009

ما بدهاش بقى

من الصبح وانا جالي اخبار من العريش ورفح ان حالة الاستنفار عالية جدا، وان اهل رفح والعريش عايشين نفس اللي عايشه اهل غزة، وبتيجي عليهم شظايا وفيه ناس مصابين، ومنهم اطفال.
وسكت، مش طالبة قلق يعني انا عملت زي ما باعمل كل مرة، ادخل وادفس راسي في المخدة لمدة نص ساعة
دلوقت اول مرة يتم الاعلان عن حالات الاصابة من شظايا قصف الشريط الحدودي، وده لما اللي اصيبوا كانوا ظباط امن
لكن لسة لحد دلوقت ماحدش جاب سيرة الاطفال اللي جات عليهم شظايا القصف الاسرائيلي على الشريط الحدودي المصري، ولسة ما نعرفش هم اتصابوا وللا ماتوا، وعشان كده ما كانوش عايزين يدخلونا، اي حد بيروح هناك بيتمنع يتكلم مع الناس وطبعا في البلالا، انسى انك تصور
مافيش مشكلة، مش كل حاجة تتصور، ممكن يبقى تأمين ما جراش حاجة
هه
طبعا الاخبار اللي جات لي دي انا ما شفتهاش بعيني، بس ناس بتكلمني وبتقول لي، وناس قاعدين هناك
طيب انا ح اعتبرهم كدابين، مافيش حاجة من دي حصلت خالص، ودي اول مرة شريطنا الحدودي يتقصف واول مرة حد مصري يصاب، ومافيش حالة استنفار ولا حاجة والناس دي بتضحك عليا
ممكن يعني ليه لا؟
مدام ما شفتش بعيني ما اقدرش اجزم
هه
طيب؟
فيه ايه بقى؟ مش يفهمونا؟
وياترى ح يعملوا نفس المناحة اللي اتعملت على الظابط الاولاني؟ طب على الاقل الظابط الاولاني الله يرحمه بقى ضرب على فلسطيني موته قام الناس ضربت عليه، او حتى مش هو اللي ضرب عليه موته، ومش الامن اللي ضرب على الفلسطينيين خالص
هه
الواقع بيقول ان فيه فلسطيني ومصري ماتوا، الفلسطيني راح فطيس ولا نعرف مات ازاي، والمصري استغل موته كأسوأ ما يكون الاستغلال لواحد ميت مالوش ذنب غير انه كان بينفذ الاوامر
يا ترى ح نعمل ايه في التلاتة اللي اتصابوا على الحدود؟ وللا دول راحوا زي اللي راحوا قبل كده على ايد القناصة الاسرائيليين؟
طيب، طبعا راحوا زي اللي راحوا على ايد القناصة الاسرائيليين، ومش بعيد حماس تلبسهم هم كمان، ماهي حماس دي هي اصلا اللي خرمت الاوزون اصلا، والكلام ده حصل بعد تلاتة وعشرين يوم من خرمهم للتعريفة، واغلب الظن ان صواريخ حماس هي اللي اتسببت في زلزال تسونامي، بسبب انها كانت بتضرب خوازيقها دي على الارض بتنزل على الاسفلت تخرم الارض تعمل رجة، رجة في رجة
قام الزلزال وصل لتسونامي ولا حول ولا قوة الا بالله، حماس وحشة وحشة
هه
طيب، بما ان الوطن مسنود بعود كبريت واحنا قاعدين وحاسين ان مافيش امان، ولو اسرائيل ضربت جوة رفح كمان مش على شريط الحدود مش ح نرد، وماحدش طالب اننا نرد على فكرة احنا نفسنا يعني مش مطمنين
ودي حاجة على فكرة انا والله متفهماها، فعلا على رأي اللي ساب لي تعليق: مصر مخوخة من راسها
طيب
وبما ان اللي موجود دلوقت مالوش ذنب، هو وارث اتفاقية مكتفاه ومقيداه ومش عارف يتصرف وهي مكبلاه وما يعرفش يتحايل عليها، ده هو من غير ما يعمل حاجة واهم بيضربوا الشريط الحدودي مع ان الست كانت المفروض عندنا عشان تطمنا اننا مالناش في اللي جاي
هه
طيب طيب
طيب اولا: مش تقولوا لنا؟
يعني الاتفاقية لما اتمضت كانت سرية، طب اللي مضاها مات، وانت وارثها غصب عنك ودي حاجة احنا ممكن نتفهمها
طب مش تفهمنا؟ مش تقول لنا؟ وللا نقعد زي الاطرش في الزفة كده؟ تيجي في وسط الكلام تفاجئنا اننا مالناش سيادة على حدودنا وتقول لنا: اللي بيدخل باخطر اسرائيل واللي بيخرج باخطر اسرائيل؟ جاي تقول لنا الكلام ده دلوقت؟
يا جدعان ما ينفعش كده هو احنا طراطير في ام البلد دي؟ واحد يخبي علينا ان مضايق تيران مقفولة وفي وسط الكلام يقول لنا: ح نفتح مضايق تيران بقى؟ وواحد يمضي اتفاقية من اولها لاخرها ما نعرفش فيها بند واحد وقاعدين نضرب اخماس في اسداس ومهما قال في وسط الكلام ما كناش ح نعرف حاجة، لانك يعني، طلع جملة مفيدة من هلفطة مدتها تلات ساعات، وواحد يفاجئنا ان اسرائيل مراقبة حدودنا بالكاميرات واننا لو ما فتشناش واخطرناها بكل شاردة وورادة ح تنزل بنفسها وتفتش الناس: وما تقوليش فلسطين بقى دي ارض محتلة!
طب ياريت يجولنا دوغري المرة دي ويفهمونا، الشريط الحدودي بتاعنا بينضرب ليه؟ وليه احنا مش ح نعمل حاجة بالخصوص ده زي ما احنا ما عملناش حاجة بخصوص اللي ماتوا على ايد القناصة الاسرائيليين ومنهم امن ومنهم مدنيين وطفلة؟
انا مش ح اسمع من حد، انا عايزة اسمع من حكومتي، لا ح اصدق حد بيكلمني في التليفون، ولا ح اصدق الجزيرة، ولا ح اصدق اللي ح يدخلوا يعلقوا
هه
انا عايزة حكومتي تيجي معانا دوغري وتفهمنا، هو احنا بنقول حاجة وللا بنعمل حاجة لا سمح الله؟ احنا بس عايزين نفهم، عشان على الاقل يا سيدي نقدر موقف الحكومة، ولو موقفها ضعيف وادي الله وادي حكمته، يبقى فهمنا ونبطل بقى نجعر ونلطم، نفهم بس، نعرف راسنا فين ورجلينا فين؟
وهاتوا لنا حد يعرف يكلمنا غير عاطف السكري ده والنبي عشان نفهم منه بس، مش طالبة ضحك دلوقت خالص
-----
وطبعا طبعا بتوع السيادة والبيادة ماحدش فيهم ح يفتح بقه، ولو فتح بقه ح يقول ان حماس هي السبب، لان ده المنطقي طبعا، ماهي حماس دي مركز الكون، واله الظلام عند الزرادشت
والله الواحد مش عارف، منين حماس صواريخها بمب العيد، ومنين هي مؤثرة قوي كده ومتحكمة في مسار الكواكب والمجرات والمتسببة في كل الكوارث السياسية والاقتصادية والعسكرية والطبيعية والصناعية والزراعية والتجارية؟ طب يعني مش قبل ما ياخدوا اوامر بالكلام اللي المفروض يكرروه زي البغبغانات مش يسالوا مسئولهم اللي بيلقنهم؟ ياخدوا ويدوا معاه في الكلام عشان بس ما يبقاش شكلهم يضحك كده، وللا ح يرفدهم؟

15 comments:

Empress appy said...

الموضوع ده من فتره يا نواره مش دلوقتى والناس بتسكت فى رفح المصريه وبيخلوا ولادهم ميخرجوش للعب ولا لاى حاجه والبيوت الزجاج بتاعها بيتكسر وبلاوي كتير الناس مش بتتكلم علشان ميرجعوش يقولك دول فلسطنين ما انا قولت لك كله له نسايب وقرايب فلسطنين وبيساعدوهم يا بنتى والله مسيرها تهدي وتروحي وهوريكي وهخليكى تسمعي بودانك وبعدين ما هما الاطفال بيتقتلوا من بدري وهما بيلعبوا قدام البيوت والظباط وتطلع اسرائيل الكلاب يقولوا اسف ده خطا مش جديده يعنى

maha zein said...

لا عادي خالص
مش اتنشوا
اهلا وسهلا بيك في وطنك
ومن البداية واحنا مجالنا الجوس مكشوف
وان كان عاجبكم

العالم دي خايفة من ايه
ولا العالم دول يكونش ميلتهم يهودية واحنا مضحوك علينا من زمان

يعني اني عندك حق
قوللنا بس عشان نفهم في ايه
قوللنا وريحوا بالنا
بس علي مين
ده وربنا اللى يفكر للحظة انه يسأل ولا ينطق لا يتاكل علي بوزه وينزلوا طحن فيه بالشلاليط لحد ما عينه تبظ من جوه

دول عالم في وراهم سر كبير
وربنا شكلهم باعوا البلد
ولا مش فهمة بردو مش بعيد كمان شوية يجيلنا كل واحد انذار بالأخلاء لليهود

Empress appy said...

نسيت اقولك من الاسبوع اللى فات واحد اسمه عوده من العيله مات كان بينقل مصابين من على الحدود ساعه لما ضربوا جنب المعبر واتنقل مستشفى السلام هنا ةتانى يوم توفى وممكن تسالى فى المستشفى كان فى العنايه المركزه لان حالته خطر

TAFATEFO said...

ايه القدم ده؟؟ مصر قايله من زمان ان إسرائيل بتبلغها ققبل كل قصف على الحدود

يعني الناس دي من حقها تقاضي الحكومة المصرية .. امال الحكومة شغاله عند أهلنا ايه؟؟ ما هي مسؤوله عن إدارة شؤون الدولة

طبعاً أنا مش مقتنع بالهتي بتاع كامب ديفيد ووارثها ومنيلها والكلام ده

متفتكريش الحكومه بريئه .. أو حتى عايشه في دور البريئه .. إسرائيل بتخضر الجانب المصري قبل أي قصف للشريط الحدودي

أبو الغيط قالك دور مصر ايه؟؟

TAFATEFO said...

وبعدين على رأي ميدو .. مصر هتوجه إنذار شديد اللهجه لمنع تكرار ذلك مجدداً .. أو كبيرها يستدعوا السفير لإبلاغه اعتراض مصر على مثل هذه الأعمال

TAFATEFO said...

الجمله اللي كنت بقول لحضرتك عليها أن تعزز قدرات الشعب الفلسطيني على العيش في أمن وحياة

نفسي أفهم أنهي عيل في خامسه إبتدائي يقول جمله زي دي؟؟ العيش في حياة؟؟ جديدة دي

Unknown said...

يا سيدي بريئة
بريئة بريئة
مالهاش اي ذنب وغلبانة وتحت خط الفقر كمان
بس يكلمونا
يكلمونا زي ما بنكلمهم
مش ممكن التجاهل ده، دي لو كانت جوازة كانت بطلت


يا ابي

ما انا عارفة
والجوامع ازازها متكسر دلوقت والبلد متبهدلة


مها
على فكرة يا مها الصوت شغال يا حبيبتي

انا لسة مشغلاه دلوقت اهو

Anonymous said...

اصلا موضوع الظابط المصري الذي استشهد على الحدود كانت الجزيرة تبثه بشكل مباشر لكن على اتصال ، فالمراسل في رفح المصرية اتصل على الجزيرة و قال انه في ظابط مصري مات و فلسطيني اعتقد كان من عائلة ابو جبل و بعدين تم التكتيم على الموضوع

Unknown said...

http://www.masrawy.com/News/MidEast/Reuters/2009/January/11/684549.aspx

مش ده برضه اعلان حرب يانوارة ولا ايه رأيك؟

Anonymous said...

الاخت مها زين
باقى الاخوة

يكونش ملتهم يهودية
شكلهم باعو البلد


ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

هى هى هى هى هى


ها ها ها ها ها ها


هع هع هع هع


هق هق هق


تصدقو ضحكت بجد

لهو انتو لسة بتشكو فى كدة
بجد لسة ماخدتوش بالكوا


صباااااااااااااااااااح الفل

صح النوم يا جماعة




احمد سعيد

Anonymous said...

على فكرة اخبر دة صحيح لان امبارح مذيعة الحياة اليوم سافرت رفح قال علشان تنقل لنا معانتهم وهى على الهوا قعدت توصف اللى حصل وتصدع البيوت والذى منة وساعة ماجت تقول الشظايا اصابت عربية ملاكى القاهرة رقم كذا قام زميلهافىالاستديو مغيرالموضوع على طول ومرجعوش فتحوة تانى --دودوة

Anonymous said...

«لماذا لم تفتح مصر معبر رفح 24 ساعة في اليوم منذ اليوم الاول للمعارك؟ وما الفخ الاسرائيلي الذي تحدث عنه الرئيس حسني مبارك ونصبته تل ابيب.. للقاهرة»؟! بعيدا عن السفسطائية والفلسفة وبهرجة الكلمات نقول ان.. «المعبر لو كان مفتوحا منذ اليوم الاول، لخرج منه اكثر من مليون فلسطيني باتجاه مصر، ليتجمعوا في مساحة من الارض داخل سيناء - وربما قرب الحدود المصرية الفلسطينية - ثم تضطر مصر لاعطائهم مائة الف خيمة، فتأتي «الاونروا» وتقرر فتح مكتب هناك، ومخازن للطحين والزيت والسكر وتقوم ببناء مدارس للاطفال ومستشفى ومستوصف، وتمر سنة وراء اخرى وتأتي الثالثة والرابعة، فيبدأ الفلسطينيون ببناء منازل من الطوب والاسمنت، وتظهر مطاعم «الحمص والشاورما والفلافل والمسبحة»، فترفض اسرائيل عودتهم وتغلق معبر «رفح» من جانبها، فيتحول «مخيم سيناء» الى نسخة اخرى من مخيمات «اليرموك» في سورية، و«عين الحلوة» و«المية - مية» و«برج البراجنة» في لبنان، و«الوحدات» - وغيرها - في الاردن، فتصبح مصر «رابع» دولة عربية تحتوي على فلسطينيي الشتات!! تحصل اسرائيل على فرصة ذهبية - بل الماسية - حين يصبح قطاع غزة شبه خال من البشر، فتقيم عليه عشرات المستوطنات، وخلال اربع أو خمس سنوات، يسكنه مائة الف مستوطن، فينضم «عرب غزة» - في الخارج - الى عرب المهاجرين واللاجئين والنازحين ما بين اعوام 1948 و1967!! فهل هذا هو.. المطلوب؟!

Anonymous said...

الخبر على رويترز :

اصابة اربعة في مصر بشظايا القصف الاسرائيلي لغزة
http://ara.reuters.com/article/topNews/idARACAE50A0OT20090111

طائرات إسرائيلية تحلق فوق الأراضي المصرية لقصف غزة
http://ara.reuters.com/article/topNews/idARACAE50A0IZ20090111

الخبر على بي بي سي:

اصابة شرطيين مصريين جراء القصف الاسرائيلي على رفح

http://news.bbc.co.uk/hi/arabic/middle_east_news/newsid_7823000/7823109.stm

Empress appy said...

معلش يا نواره هرد على الانونيمس الاخير
ومين قالك ان اهل سينا بيسيبوا ارضهم بسهوله ولا اصل بيسبوها دول بيقتلوا بعض علشانها احنا عندنا الارض مش عرض وبس دى كل حاجه ده كلام مرسل اسفه انى بقولك كده وده خوف ملوش محل من الاعراب اسالنى انا انا من اهل البلد وادري باهلى اكتر سينا يعنى

Anonymous said...

على فكرة التعليق اللى بدأ بـ " لماذا لم تفتح مصر معبر رفح 24 ساعة " هو نص مقالة فؤاد الهاشم الكاتب الكويتى فى جريدة الوطن يوم 11/1/2008 ، وفؤاد الهاشم ده مجرد رقاص بيكتب للى بيدفعله وسبق وقال على المصريين وقت ما الشرطة الكويتية عذبت اتنين مصرين بماء النار إن المصرى تمنه 300 دولار يعنى تمن غسالة كورى فى السوق الحرة فى المطار ، وقال على الشهيد نزار ريان بعد استشهاده إنه إزاى كان بيجاهد وهو متجوز أربعة وقال بالنص " غارق حتى أذنيه بين أفخاذ ثمانية من نسوانه " .... فياريت السيد صاحب التعليق ميتخدعش فى تحليله لأنه مجرد واحد منافق كل همه يلم دولارات من اللى بيدفع