Thursday 31 March 2011

خبز، حرية، عدالة اجتماعية

والسبب الحقيقي اللي ممكن يقودنا لديكتاتورية هو ان اغلبية الطبقة المتوسطة عايزة تاكل حق الفقرا وتعيشهم تحت رحمتها يشحتوا وحسبي الله ونعم الوكيل
انا مش لاقية مرشح رئاسة مبدئيا... وحاشوف مرشح مجلس الشعب اذا اولويته العدالة الاجتماعية حانتخبه، غير كده مش حانتخب مخلوق
كنت باتكلم عن هشام بسطويسي بس قال عن مجانية التعليم نفس اللي قاله البرادعي
اولا.. ماحدش يمد ايده على مجانية التعليم.. خالص، مافيش حاجة اسمها ادعم التعليم الفني واخلي التعليم الجامعي بفلوس عشان اصرف على التعليم الفني.. ايه ده ايه ده ايه ده؟
ندعم التعليم الفني، ونصرف على التعليم الجامعي، ونحسن المدارس الحكومية، ونرفع مستواها لحد ما تبقى احسن من المدارس الخاصة بل والمدارس الانترناشونال وده مش مستحيل ابدا، ده يتعمل في خمس سنين
ده المفروض يبقى الخطة العاجلة اللي تتعمل للتعليم، ويبقى التعليم عندنا زي انجلترا وفرنسا والسويد، واتضح اننا عندنا فلوس اكتر منهم هم التلاتة جمعاء
انا اصلا متغاظة من وجود المدارس الانترناشونال
ومش طالبة حد يليغها، ابسلوتلي، دي تفضل موجودة ويتبهدلوا ضرايب عشان نعرف نصرف على التعليم
انا اللي عايزاه، وده ينفع يتعمل في ظرف خمس سنين، ان المدرسة الحكومة تبقى هي المميزة، ولما حد يتحرم من المدرسة الحكومة يبقى متضايق، او مكسوف يقول انه خريج مدرسة خاصة، لأن ده معناه ان مستواه في التعليم قليل قوي قوي قوي وفشل في التعليم الحكومي لحد ما اهله طلعوه وودوه بقى مدرسة بفلوس عشان ياخد شهادة وخلاص
الوضع كده في انجلترا فعلا، وفي فرنسا، وفي السويد، واللي بيدخل مدرسة اهلية بيذوب خجلا، ولما فرنسا منعت المحجبات من دخول المدارس الحكومية المسلمين عملوا مظاهرات وقالوا ليه نضطر ندخل مدرسة اهلية واحنا لنا حق نتعلم كويس
بس الطبقة المتوسطة مش عايزين كده
طبعا الاغنيا مش عايزين ضريبة تصاعدية لأنهم عايزين يسرقوا وما يدفعوش مفهوم ده، وبيتحججوا بإن ده حيطفش الاستثمار، البلد اللي اقتصادها يعتمد على الاستثمار لدرجة انها تعمل استربتيز للمستثمرين يبقى ما عندهاش اقتصاد.. وما عندهاش شرف، وما عندهاش كرامة، وتبقى ماشية مع المستثمرين في الحرام، والمستثمرين قايلين لها: احنا مش بتوع جواز عايزة تعيشي معانا على كده اهلا وسهلا مش عايزة بالسلامة، وهي راضية
والمستثمر اللي مش عايز يدفع ضريبة عادلة يبقى عايز يسرق مش عايز يستثمر، احنا عايزين نجتذب الحرامية ليه؟ وعايزين نعيش مصر في الحرام ليه وهي مزة والف من يتمناها ويجيب لها مهر وشبكة وشقة مفروشة من مجاميعه؟ طب نظيف كان بيقول كده عشان نظيف ووزراته واللي معينه واللي مشغله واللي مصاحبه عاملين برتيتة حرامية وعايزين يوسعوا نشاطهم، وعايزين يحطوا مصر في المطبخ ويلبسوها جلابية مقطعة، ويخلوها تطبخ وتمسح وتكنس ولما ييجي ضيوف ينادوها ترقص لهم.. احنا ليه عايزين نعمل فيها كده تاني؟ ما خلاص بقى هي مش حتعمل كده تاني، هي حترجع لبيتها واودتها وتعيش زي ما مفروض تعيش
بعض الناس اللي من الطبقة المتوسطة ومش عايزين مجانية تعليم مش عايزينها لسبب حقير جدا.. مالوش علاقة بالميزانية، وان الفلوس اللي بتتصرف على مجانية التعليم كتير وممكن تتوفر، (لأن الفلوس اللي بتتصرف على التعليم 15 في المية من الميزانية والفلوس اللي بتتصرف على الداخلية 30 في المية)، وان مافيش مجانية تعليم حقيقية والكلام ده... هي مش عايزاه عشان مش عايزة ابنها يقعد جنب ابن البواب في المدرسة
بس كده
بدليل ان اللي بيعترضوا على مجانية التعليم مش معترضين على الصحة، ان المستشفيات كلها تبقى مستوى واحد مافيش حاجة اسمها مستشفى للبشوات ومستشفى لولاد الكلب.. ببساطة لأنه مش حيقعد مع البواب في نفس الاودة، فهم ما عندهمش مانع يبقى نظام الصحة في مصر زي انجلترا وفرنسا والسويد واي دولة محترمة عندها حد ادنى من العدالة الاجتماعية، وان العلاج الكويس بيبقى في مستشفيات الحكومة، لأن كل واحد حيبقى له اودة وهو مش حيضطر يختلط بالغلابة ولا حاجة، الى جانب انهم مش وحوش يعني، هم طبقيين طبقية وسخة، بس مش قتالين قتلا، ونفسهم البواب والسمكري وساكن العشوائيات يتعالج كويس في مستشفى كويسة، وما يدفعش فلوس لأن ده حقه، بس ما نفسوش ابنه يتربى مع الغلابة.
تلاتين سنة هو قاعد يمد ايده من الشباك ويديهم صدقة.. بس ما عندوش استعداد يبقى زيهم زيه.. او بالاحرى، ما عندوش استعداد يبقى زيهم زيه، امال يفك عقده على مين؟
بس معلش، ينفع ده يتعالج.. بس ناخد بالنا من المرض ده، ونواجهه، ما جراش حاجة، ما ينفعش الواحد يفضل يتهمهم ولو اني انا متغاظة منهم وحاسة انهم ظلمة وقاسيين، بس عادي يعني، ماهو مبارك اتسبب في امراض كتير، كل الناس اخدت بالها من مرض الطائفية اللي رباه مبارك على الغالي، كل الناس اخدت بالها من تحول الدين الى عصبية وحزبية بعد افراغه من قيمه وبقى الموضوع شكله اهلي وزمالك
لكن ماحدش اخد باله من مرض الطبقية القذرة اللي اصاب كتير من الطبقة المتوسطة اللي طول النهار يقولوا احنا المتعلمين احنا اللي حننضف البلد احنا اللي حنعل نهضة، ولما البسطويسي قال ينفع نرجع الكتاب (وبالمناسبة منهج تعليمي رائع لو شلنا منه عنصر الخرزانة يعني، لأنه بينمي الذكاء بدرجة عالية) واحد قال كتاب ايه؟ عيب البسطويسي انه ما كانش عايش برة، وميزة البرادعي انه عاش برة فبقى عنده خيال! وكل اعتراضهم على نسبة 50% عمال وفلاحين ان العمال والفلاحين بصمجية وما ينفعش يحطوا لنا تشريعاتنا احنا عايزين مثقفين واساتذة جامعة!
طب دي طبقية قذرة.. مش طبقية بس، دي طبقية قذرة
والطبقية القذرة دي كانت باينة من ساعة الاستفتاء وماحدش اخد باله منها لأن صوت خناقة المسلمين والمسيحيين كان اعلى، على اي حال انا مبسوطة من خناقة المسلمين والمسيحيين لأنها مش حتتكرر بالشكل ده تاني، لأن الناس عندها رغبة حقيقية انها تحسن من نفسها في كل حاجة، وكل ما تشوف مشكلة عايزة تعالجها
وحنعالجها دي.. اقصد خناقة المسلمين والمسيحيين، السلفيين اتخضوا وحسوا انهم بقوا مكروهين والناس بتحملهم مسئولية بلاوي كتير في البلد، والحقيقة هم متحملين مسئولية حاجات كتير حصلت ايام مبارك واثارها موجودة لحد دلوقت، بس هم كمان ما ينفعش يتشيطنوا كده، لأن كل واحد فينا، سواء كفرد، او كجزء من مجموعة، عمل حاجات مضرة بالبلد لأن المناخ فاسد، واعتقد انهم حيصححوا سكتهم، ما هو مبارك مشي، وهم يقدروا يمارسوا حريتهم في العقيدة من غير ما يقرفوا غيرهم، واعتقد انهم عايزين يصلحوا صورتهم اللي اتشوهت قوي وهم فعلا ما كانوش عايزين الامور توصل لكده، هم زي البيوريتانز بتوع امريكا، عايزين يمشوا يكلموا الناس في ربنا والصلاة والدين ويبقى لهم كوميونيتي وخلاص كده، واظنهم ابتدوا يحطوا نفسهم على التراك الصحيح وابتدوا ياخدوا بالهم ان فيه اخطاء لازم تتصلح حتى لو ما صرحوش بوضوح انهم بيصلحوا اخطاء
نفس الحكاية بالنسبة للمسيحيين، هم اخدوا بالهم انهم قعدوا فترة كبيرة سلبيين، ومنعزلين، وملمومين على روحهم كده ومسلمين دماغهم للقنوات الطائفية، وعايزين بقى يبتدوا يشاركوا ويكون لهم دور، صحيح مشاركتهم لسه لها طابع طائفي، وتحركهم لسه بتوجيهات من الكنيسة، بس دي اول مرة يعتصموا مثلا خارج الكنيسة، وده تطور، حاولوا ينزلوا الاستفتاء ويراقبوا، برضه الدافع كان طائفي، بس اهي خطوة اولى، احنا كنا فين؟ ابتدوا يعترضوا على المصالحات العرفية، طبعا القنوات والمواقع المسيحية الطائفية بتاعة الحقونا المسلمين بيموتونا لسه شغالة بس ابتدوا هم يخرجوا عن اطارها ويتعاملوا على ارض الواقع، ويحاولوا يتضامنوا ويحاولوا يشاركوا وكانوا بيراقبوا في الاستفتاء على اللجان وبيحاولوا يحسنوا من نفسهم ويبقوا ايجابيين على قد مايقدروا، المنهج الطائفي القبلي مش حيخلص بين يوم وليلة، ولسه طبعا لما بيسمعوا اسم مسيحي بيسخنوا له اكتر، زي مثلا مايكل نبيل اللي املي ومنايا انه ما يتعذبش وماحدش يمسه ولا يعذبه عشان ما يعملش بطل على امنا، واصلا هو غير معبر عن المسيحيين، لا هو مسيحي، ولا مؤمن بالمسيحية، ولا هو بيعبر عن انتماءات المسيحيين، بس اسمه مايكل فسخنوا له.. لكنهم حتى لما سخنوا ابتدوا يقولوا: احنا مش موافقين على ارائه بس هو حر يعبر عن نفسه، ما قالوش النغمة بتاعة زمان: اااااه عشان مسيحي قبضوا عليه، وده برضه خطوة واسعة جدا، بس واحدة واحدة هم بيحاولوا يغيروا الطريقة اللي عاشوا بيها تلاتين سنة
الناس كلها بتحاول تحسن من نفسها، وتحاول انها تعمل حاجة كويسة، وتشوف هي غلطت في ايه طول الفترة اللي فاتت وتحاول تصلحه، واول استفتاح كان بالمجموعات اللي لها صفة دينية عشان دي اكتر المجموعات المؤثرة في المجتمع ودي حاجة حلوة، انا مبسوطة ومتفائلة
بس الطبقة المتوسطة مش واخدة بالها ان مبارك تسبب في انها طبقية حقيرة
مش قصدي اشتم، قصدي ان الطبقية دي حقيرة، يعني ايه طبقية حقيرة؟ يعني طبقية واطية، يعني قليل الاصل الواطي بس هو اللي يتكلم بطريقة: مش الجهلة والبصمجية هم اللي حيشرعوا لنا قوانينا... قليل الاصل الواطي محدث النعمة بس هو اللي مش عايز مجانية تعليم لأنه مش عايز ابنه جنب ابن الزبال في المدرسة، دي حتى مش طبقية الناس الشيك ولا طبقية الارستقراطية الانجليزية اللي ما تبانش من كتر ماهي معمولة بشياكة.. دي طبقية الناس اللي اشتروا فيلا من فلوس المخدرات وبيرموا قشر البرتقان على السجادة الشينواه ومعلقين ملابسهم الداخلية على دراع تمثال فينوس الكبير وشكله وحش قوي وجنبه فازة صيني ضخمةةةةةةةةةةةةة، ومعلقين في البيت النجفة اللي بتتعلق في الفنادق، ويتنكروا لجيرانهم القدام، وام الواد تقوله ما تلعبش مع ابن البواب عايزين نصاحب ولاد الناس الهاي لايف انت مش اقل من حد فيهم يا ولا 
يعني حتى مش عارفين يبقوا طبقيين على الاصول وبحق ربنا، بقوا طبقيين طبقية: العيش البلدي ده ما يدخلش عندنا البيت.. ما ناكلش الا فينو
وده طبعا لأننا قعدنا تحت حكم عيلة واطية تلاتين سنة فطبعت علينا كلنا، معلش تتعالج، بس تتعالج بإن الناس تاخد بالها انها بتقول كلام ما ينفعش يتقال، ما ينفعش تقول الشعب جاهل ومش حيعرف ينتخب الا اذا كنت معلق ملابسك الداخلية على دراع تمثال فينوس، ما ينفعش تقول مش عايزين مجانية تعليم لأنك مش عايز ابنك يتعلم مع ابن الفقير، ما ينفعش تقول ال50% عمال وفلاحين دول شوية بصمجية وجهلة ما يحطوش لنا التشريعات الا اذا كنت بترمي قشر البرتقان على السجادة الشينواه... بلدي قوي يا حسين
وعلى رأي علاء سيف: انت معترض على فكرة الكوتة ممكن نتفاهم ونتناقش في جدواها، لكن حتقول الفلاحين والعمال جهلة وما ينفعش يشرعوا لنا يبقى غور مش عايز اعرفك
ايه الجهل ده؟ 
مين اللي قال ان الشرط في العامل والفلاح المرشح انه يبقى مش متعلم؟
ومين اللي قال ان المشاركة في التشريعات تستوجب ان كل المشاركين فيها لازم يبقوا متعلمين ومتخصصين في القانون؟ مش فيه حاجة اسمها فئة منتفعين؟ والعمال والفلاحين من فئات المنتفعين؟ المنتفعين في كل حتة في الدنيا لهم دور في التشريع، ايه الشغل البلدي ده.. حتى مش عارف تبقى طبقي صح؟ ايه دخل العلام في وضع قوانين يشارك فيها فئة اجتماعية؟ انت ما تعرفش ان حتى الناس اللي ما عندهاش نسبة تمييز ايجابي للمنتفعين لهم نقابات وكيانات بتشارك في وضع القوانين وبتشيل نواب وتحط نواب؟ اكلمكم بقى باللغة اللي بتفهموها مدام عقدة الخواجة واكلاكم؟ ما سافرتش بلاد الخواجات وشفت الرعاة والفلاحين لما بيواجهوا مشاكل بيدخلوا المجالس التشريعية بالمعيز والخرفان بتاعتهم ويشيلوا النائب اللي خرب بيتهم هيلا بيلا - حرفيا مش مجازا - ويعزلوه؟ 
اما اللي بيقولوا: المرشحين في نسبة العمال والفلاحين لا يمثلوا العمال والفلاحين فعلا... آه.. ده على اساس ان الفئات كانوا بيمثلوا الفئات فعلا؟ يعني احمد عز كان يمثلك لكن مرشح الفلاحين هو اللي ما كانش بيمثلهم، ما المجلس كله لا يمثل الشعب على بعضه بكل فئاته، ومرشحين العمال والفلاحين ظباط شرطة، طب ما مرشحين الفئات رجال اعمال.. لو الفلاحين مش ظباط شرطة، الفئات كمان مش رجال اعمال، ومالك فرحان قوي انك متعلم كده وبتعرف لغات؟ ايه الإحداث ده؟ 
ولما ممدوح شاهين يقول: الخمسين في المية عمال وفلاحين من مكتسبات ثورة يوليو وما ينفعش نفرط فيها. ناس تقعد تشتم في ثورة يوليو؟ الله يرحمه، لولا ثورة يوليو ما كنتش انت اتعلمت ويا ريتك ما اتعلمت عشان ما تنساش اصلك.. ياي ياي ياي
يعني الجيش اللي بناء مؤسسته هرمي وهايراركي بيحترم القاعدة الشعبية وانت لأ؟ اه.. عارفين ليه؟ عشان احنا رباية شرطة مش جيش.. ظابط الجيش بيخاف على العسكري بتاعه وشفت بعيني لما عسكري واحد اتصاب 3 ظباط الجيش اتخضوا عليه ازاي وقعدوا يشتموا في الشعب كله عشان عسكري اتصاب، وركعوا على الارض عشان يداووه بايديهم، انما ظابط الشرطة بيضرب العسكري... واحنا بقالنا 30 سنة متربيين على ايد اللي بيضرب العسكري
بس احنا مش عايزين نبقى تربية ميري خالص، احنا عايزين نبقى تربية مهذبة من غير ما نضطر نجيب ميري يعرفنا الصح من الغلط ويضطر اللواء ممدوح شاهين يفهم ناس المفروض انهم مثقفين ازاي انك ما ينفعش تتجاهل اكتر من نص الشعب وتحتقرهم والراجل ضغطه يعلا ويروح المستشفى عشان المثقفين بيشتموا له في الفقرا والشعب 

مرة مش عاجبهم تصويت الشعب في الاستفتاء، ومرة مش عاجبهم مجانية التعليم وعايزين يأصولوا منها، ومرة مش عاجبهم نسبة العمال والفلاحين، مش عشان معترضين على فكرة الكوتة - وهي وجهة نظر محترمة نعرف نتناقش فيها مع الناس المعترضة على فكرة الكوتة وسوا اختلفنا او اتفقنا ممكن نفضل نحترم بعض - لكن عشان الفلاحين والعمال مش بيعرفوا انجليزي وما يصحش يشرعوا لنا
لالالالالا إحداث إحداث إحداث
أنا اقولك بقى لو عايز تبقى طبقي صح، الناس الشيك اللي بجد، الراقية اللي بجد، تعمل كده زي بيل جيتس مثلا اللي بيقعد ينشر صوره ايام ما كان فقير دقة ويقول انا ده، او زي الاميرة ديانا اللي تلبس لبس الفلاحين الانجليز وتقول احنا اصلنا ده، تقوم الناس تقول: شوف اميرة ولابسة لبس الفلاحين وفخورة بأجدادها الفلاحين... لأن عندها ثقة في نفسها، ومش محتاجة تفضل تقول انا اميرة انا اميرة ومتعلمة ومثقفة وعندي علم، الجرابيع قلالات الاصل بس هم اللي بيتكبروا على القاعدة العامة للشعب وعايزين يميزوا نفسهم عنهم، عشان هو عايز يتبرا من اصله، فبيشتم في الناس اللي بتفكره باصله، فالناس تقولك: افتكر جدك المقشف اللي لولا ثورة يوليو ما كانش عرف يدخل ابوك مدرسة ويعلمه، وبعدين ربنا كرمه واشتغل ايام الانفتاح وعرف يدخلك مدرسة لغات ويطلعك بترطن
ماهو انت اللي بتضطر الناس تقولك الكلام ده.. عشان حتى لما حبيت تمثل انك طبقي، بقيت طبقي واطي، ومش ذنبك، ذنب العيلة الواطية اللي قعدت تلاتين سنة تكرف وطيانها علينا
-----------
الخلاصة... زي ما ابونا قال على التويتر (فيه قس لطيف قوي قاعد على التويتر وجميل جدا، مش باقولكم فيه تطور على الصعيد ده حصل جامد) قال: الثورة شعارها كان "خبز حرية عدالة اجتماعية" لو نسيتوا الشعار ده يبقى ثورتكم فشلت.
والناس اللي عاملة متدينة دي، ما تعرفش ان ربنا حيخرب بيتها عشان الافترا على الفقرا والتكبر والكبر؟ 
اللي يمد ايده على مجانية التعليم ومجانية الصحة وحق السكن وحق القطاع الاكبر من الشعب في انه يمثل في البرلمان اقطعها له انا شخصيا
اللي قرفان من الشعب ومستعر من اصله، يا نحاول نصلح له مخه ونخليه ما يرميش قشر البرتقان على السجادة، بدل ما يقول الشعب محتاج توعية، ياخد باله ان هو اللي محتاج يفوق كده، يا اما نوديه الجيش في الصحرا كده لحد ما يتربى، ولما يتحط عسكري يعرف ان كلنا ولاد تسعة
انا مرشحي اللي حانتخبه للمجلس او للرئاسة - واللي لسه ما اعرفش هو مين - هو اللي حيعمل لي التعليم الحكومي احسن من التعليم الخاص، وحيعمل لي ضريبة تصاعدية، وحيعمل لي المستشفيات الحكومي بيتعالج فيها رجال الاعمال، وحيتمسك بحق اغلبية الشعب في انهم يبقوا في البرلمان، وحيعمل لي حد ادنى وحد اقصى للأجور
الا حق الغلابة.. الا حق الغلابة ده مافيهوش فصال والا اولع لكم في نفسي في الشارع، اي حاجة تانية نتفاهم فيها.. 
ادوا الغلابة التعليم والصحة والسكن والحد الادنى للاجور والتمثيل في البرلمان وخدوا بقية البلد ان شالله تعملوها قراطيس ما يهمنيش تعملوا فيها ايه
غير كده، والله لو المرشح نازل لي من السما مع اتنين ملايكة.. حارميه من الشباك
واعرفوا ان ربنا عمل ده كله في مبارك عشان ظلمه للفقرا 
واعرفوا ان ربنا حيخرب بيتنا لو تجاهلنا حق الفقرا... القضاء على الفقر الاولوية الكبرى قبل الدستور وقبل القانون وقبل حتى الحريات، وقبل اي حاجة
وانا من موئعي هذا احب احيي السلفيين والمسيحيين لروحهم الايجابية ومحاولاتهم المستميتة انهم يغيروا من نفسهم ويصححوا اخطاء الماضي 
ومن موئعي هذا باقول للطبقة المتوسطة... انت عيانة يا حبيبتي.. ربنا يشفيك، بس مافيش دكتور حيقدر يساعدك لو انت ما ساعدتيش نفسك
تعالجي نفسك ازاي؟
اقولك: بدل ما تقعد تحكم على الشعب المصري من كلام الست اللي بتساعدك ولا بتساعد مراتك في تنضيف البيت وتقول: ده شعب متخلف، خلي هدفك: يوم ما الست اللي بتساعدك في البيت تبقى لها مسمى وظيفي، ولها مرتب، مش يومية وخدي كيس الرز وكيس السكر، ويبقى لها يونيفورم، وجهة هي تابعة ليها، وابنها بيتعلم مع ابنك في المدرسة ويمكن يبقى قاعد معاه في نفس الديسك، وانت وهي بتتعالجوا في نفس المستشفى تبقى الثورة دي نجحت
غير كده... الثورة دي تبقى فشلت
ولو دخل قناة السويس بس اتخصص للتعليم والصحة حيكفي ويفيض واللي احنا عايزينه ينجز في خمس سنين بس
وربنا يشفي بتوع "الشعب المصري محتاج توعية".. اه والله، يشفيكم.. امبارح قعدت اتناقش مع ناس على التويتر خلوقي اتفلقت من العياط لمدة ساعة ونص وصحيت الصبح قعدت اعيط برضه... الشعب المصري مش محتاج توعية.. الشعب المصري محتاج حقه يرجع له
قال عايزين نوعي الشعب قال... دي امراض دي، انت اللي مش عارف تقنع الشعب بيك، والعمال والفلاحين اسيادك وتاج راسك، ولو انت مش عارف تقنع الاغلبية في الشعب بوجهة نظرك تبقى انت اللي غلط مش هو اللي مش واعي، يا غلط في افكارك يا غلط في اسلوبك يا غلط في شكلك كده على بعضك.. دور على الغلط فيك واعرف ليه غيرك بيعرف يقنع الناس وانت لأ، ليه غيرك عاجب الناس وانت لأ
ليه كل الناس اللي قابلتهم في الشارع النهاردة اللي من اول البواب وبياع السجاير والشباب اللي ماشي في الشارع، والستات الموظفات، كل اللي شافوا مكالمة اللواء ممدوح شاهين مع يسري فودة امبارح، تعاطفوا مع اللواء ممدوح شاهين ضد تلاتة مثقفين وحسوا انه معذور ومعاه حق مع انه هو اللي كان متعصب وهم اللي كانوا هاديين؟ لو تلاتة مثقفين ما عرفوش يقنعوا المشاهد العادي على اختلاف وظائفهم وخلفياتهم واللواء ممدوح شاهين عرف بعصبيته دي كلها يقنعهم، اكيد مش هو اللي غلط، اكيد هم اللي غلط.. يا اما هم اللي مش عارفين يتواصلوا، يا اما هم اللي منطقهم غلط، يا صياغتهم غلط.. يشوفوا ليه كل اللي قابلتهم النهاردة مش متعاطفين معاهم؟ وليه اللي قاعدين على التويتر والفيس بوك ما بقوش عارفين يعبروا عن مطالب الشعب بعد ما كانوا البادئين لمبادرة الثورة؟ 
كل الافكار والعقائد المحترمة بتقول ان الاجماع هو الصح.. مافيش غير الفاشية والنازية هي اللي بتقول ان المجموع جاهل وغبي والنخبة هي اللي صح
في الاسلام بارك الله في الجماعة
في المسيحية مبارك الشعب
في الديمقراطية الاغلبية هي الحاكمة

103 comments:

أحمد العش said...

أستاذتى نوارة ، يؤسفنى أيحانا انك بتفكرى بعاطفتك مش بعقلك فكلامك بيناقض نفسه ، عايزه تعليمنا يبقى زى السويد وانجلترا ، طب وهى السويد وانجلترا عندها نسبة الخريجين الجامعيين لعدد السكان اللى عندنا ؟! ايه فايدة آلاف معاهم تعليم عالى ) حقوق وخدمة اجتماعية وآداب وتجارة ) وشغالين مهن ملهاش علاقة بتخصصاتهم ؟ مش أولى دعم التعليم الفنى ؟ ولا هو حساسية طبقية وخلاص ؟

ملحوظة :انا بنتمى للطبقة العاملة قلبا وقالبا وابا عن جد !

Ahmed said...

انا لاول مرة مش معاكي . الموضوع مش موضوع طبقية .الفكرة اننا ما عندناش تعليم فني اصلا و لو عملنا زي ما بتقولي كدة حنفضل ما عندناش تعليم فني . بلاش التعصب و خلاص . فكري و اسالي الناس الخبراء في التعليم هيقولو لك كدة. لو عملنا زي ما بتقولي كل الناس هيسيبو النعليم الفني و هيدخلو جامعات . هيبقي عندنا نص الشعب مهندسين و دكاترة و بالتالي نسبة البطالة حتزيد

elashkeef said...

أنا من الناس اللي ردت عليك في البوست اللي فات و كان اعتراضي على مبدأ الكوتة مش على ترشيح عامل أو فلاح أو أيا كان للبرلمان
انت قلت ان معندكيش مشكلة مع اللي معترض على مبدأ الكوتة و ممكن تتناقشي معاه
يا ريت توضحي وجهة نظرك ليه الكوتة ضرورية أصلا
لأني مش مقتنع بتمييز فئة معينة عن أخرى تحت أي مسمى

Advisor said...

يا نوارة انا معجبة بك وبتفكيرك ...وباتفق معاك في جاجات كتير ...اعذري جهلي لو انتي في حزب ...قولي لي إسمه إيه ...في إسهال أحزاب الأيام دي وكل 5 او6 طلع في دماغهم يعملوا حزب وكلهم نفس الكلام ما عدا الإخوان طبعاً ...كلامهم علي قديمه ...لو إنتي في حزب او ناوية تعملي حزب ياريت تقولي عليه...

torero said...

رشحى نفسك للرئاسة او للوزارة انا هارشحك انتى و بحبك والله

mido said...

مش حجادلك فى نقطة التعالى على الشعب لانها مفروغ منها

بس بلاش تخلطى الامور:

اللواء امبارح اتنرفز كعادته على النقد الموجه للاعلان الدستورى ككل مش المادة الخاصة بالعمال والفلاحين فقط


ملحوظة: قالهم اتناقشوا فيها وقت كتابة الدستور الجديد !

وبلاش نزايد على حسام عيسى وجمال زهران الناصريان

بقى حسام عيسى حيشتم الفلاحين والعمال والغلابة !؟
انتى شفتى حلقة تانية غير اللى شفناها ولا ايه؟

ا!!

امبارح اللواء اهان الجيش بمقارنته بالجيش فى ليبيا والبحرين
مجرد المقارنة والمعايرة اهانة لا تغتفر

---------
ومش معنى انك سألتى كام واحد فى الشارع حواليك ووافقوه يبقوا صح؟

متنسيش البعد العاطفى فى الحكم على الامور وده أثر فى المصريين بعد خطاب مبارك التانى لولا ستر ربنا

Magdy El-Serafy said...

الديمقراطية و الحرية ليست أهدافا بل هى الطرق للوصول للعدالة و المعيشة الكريمة

من اجل مصر حره بجمهوريه برلمانيه said...

يسلم كلامك يا نوارتنا صح والشعب هو القائد والمعلم والي مش عاجبه يدور له علي شعب تاني بس انا اعتراضي كان علي الكوته ليه نميز ونفرض ماالناس سوا كانوا عمال ولا فلاحين ولا مثقفين يختاروا الي بيحبوه ويحسوا انه هيشوف مصالحهم

المهدى said...

شكرا .. والله ينور
بس أمراض العيلة الواطية كتير ومحتاجة وقت تنضف ولو بدأنا فى الإجراءات من غير منهد قيم المخلوع البالية يبقى بنقفل على الجرح من غير مننضفه
الحد الأدنى الأدنى ( مش الغاية ) عند الجيش يبقى نوصل لقيم ومبادئ وثوابت الجيش وبعد كدة نبدأ
ومحاكمةالمخلوع ورموز عصرهلا تعنى شخوصهم أو حتى جرائمهم ولكن قيمهم الفاسدة

زعبلاوى said...

طيب يا نوارة , , الشعب عشان يرجعله حقه , لازم يعرف حقه فين ومع مين , يعنى برضوا الشعب محتاج توعية , مش لازم نعتمد بس على الوعى الحسى لازم يبقى فيه وعى ثقافى , يعنى انتى بيعجبك الناس اللى بتختار عضو مجلس الشعب عشان 50 جنيه ولا عشان كيلو لحمة , , وبعد كدا يمص دمهم , , اللى عايز اقوله ان الافضل من اننا نطالب بحقوق الناس , نعلم الناس حقوقها وهما بقى يختاروا , دفاعك بصرف النظر عن مدى صحته يمثل فى جوهره نفس مضمون هجوم الاخرين وهو ان الشعب ليس له رائ

Ahmed-Badr said...

أولا : شكرا , الواحد كان محتاج الدرس ده عن طريقة التفكير الطبقى ( و بعنرف انى بمارسها جزئيا و قاعد شبه الطماطم من الإحراج دلوقتى) , جردل مية بتلج على الراس بس فيه الشفا بالنسبة ليا ده قد يكون أهم بوست انتى عملتيه

ثانيا: مجانية التعليم المفروض انها تكون مجانية فعلية بجميع مراحله(لمن غير قادر على الدفع) و أى حد يقول غير كده يبقى مش عايز الخير للبلد لأن احسن حاجة بتنتجها مصر هى أهلها و معظمهم مصادر طاقة هائلة و مهملة و لازم نهتم بيها و نديها أولوية

ثالثا : التفكير الطبقى هو السبب فى الاساسى فى ان البواب أو عامل النظافة أو عامل التصليحات خريج المعهد الفنى يعامل كأنه أقل قيمة أو مقام من الدكتور أو المهندس على الرغم من أن كل واحد منهم ليه دوره فى المجتمع و ليه الحق فى حياة كريمة و مش عيب
مع مراعاة حقة و حق اسرته فى العلاج و التعليم لأانهم فى الأخر كلهم زى بعض

رابعا: أنا معترض على كل انواع الكوتة و فى نفس الوقت كنت بقول 50% كتير
بس بأمانة بعد متفرجت على جلسة الحوار الوطنى راجعت رأيي الحوار السفساطى الفارغ من المضمون هو لغة العصر فالمجلس محتاج اكبر قدر ممكن من الواقعية و دا بيكون بأهل مصر الفعليين أى المتصلين بالشارع و القادمين منه

خامسا : شكرا
و أتمنى تكون كتابتى واضحة و متستفزكيش

Anonymous said...

طب نفسى تخلصى من الايديولجيا وانتى هتضوفى ان اللى بيتكلموا فى كده خبراء تعليم واجتماع وقانون مع احترامى للواء شاهين انا حسيت من كلامه ان دم الشهدا ضاع انتى راضية عن المحليات اللواء شاهين قال لو شيلناها البلد تقع يعنى البلطجية والفاسدين لو نضفنا البلد منهم تقع هو ده المنطق اللى بتدافعى عنه ؟ ارجوكى تبطلى تفكرى بعواطفك عموما لو كده يبقى الله يرحم الشهداء والمصابين ربنا معاهم وانا يااما انتحر يا اما اهاجر بس الانتحار اسهل واقرب

Unknown said...

ايه دخل دعم التعليم الفني والصناعي وتحسين مستواه بالغاء مجانية التعليم العالي؟

ايه الجبروت ده؟

منين بتشتكوا ان نص البلد امية ومنين بتشتكوا ان خريجين الجامعة كتير؟

خريجين الجامعة مش كتير.. احنا اللي ما عندناش مشاريع تشغلهم

وطول ما احنا ما عندناش مشاريع خريجي التعليم الفني حيتركنوا على القهاوي زي خريجي الجامعة بالظبط

ما انجلترا بتدعم التعليم الفني والجامعي وحالها اهو

يعني تحرم واحد مستوى ذكاؤه يؤهله انه يبقى خريج تعليم جامعي عشان فقير؟ ويبقى اللي بيتخرج من التعليم العالي هو ابن الغني بس؟ وابن الفقير لازم لازم يبقى صنايعي؟

ايه التخلف والجهل ده؟

وليه ابن الاغنيا ما يدخلش التعليم الفني وابن الفقير يدخل تعليم عالي وكل واحد ياخد فرصته حسب ذكاؤه وقدراته ومواهبه؟ ليه يتقيم حسب فلوسه؟

ايه الشر ده؟

ليه الشر ده؟

ابراهيم رزق said...

نوارة يا بطلة

طالما لسة معندناش عدالة اجتماعية يبقى لازم الكوتة

موضوع التعليم يجب ربط التعليم فى سوق العمل لما الكناس ياخد اللى يكفيه هو و عياله و وكيل البياع اللى فى الكشك يعرف ياخد حقه بسهولة من وكيل النيابة ساعتها هيظبط سوق العمل و كل واحد هيروح الوظيفة اللى تناسبه

البرنامج اللى فى عقلك ده اقرب واحد لتحقيقه حمدين صباحى انا حضرت امس مؤتمره و تقريبا بيتكلم فى كل اللى انتى بتتكلمى فيه و انا اثق فيه
ياريت تزورينى فى مدونتى المتواضعة
خالص تحياتى

مش فاهمه said...

كل مرة اقول مش حأكتب عندك تانى و عندى مدونتى اكتب فيها اقول لأ يا بت دى برضه نوارة و اللى مش عارفاه نعرفهولها ....بصى يا ابله نوارة انا عيالى فى مدارس خاصه لغات معفنه بجد ليه دخلتهم مدارس خاصه علشان المدارس الحكومة ولا تسر عدو ولا حبيب و علشان اللى فيها اولاد بوابين صحيح بس اولاد بوابين من اللى 30 سنه من الغناء الهابط و الفن الهابط و الأعلام الهابط لحس دماغهم اولاجد بوابين من اللى بيسمعوا شعبان عبد الرحيم و بيلعبوا بالمطاوى و بيتحرشوا بالبنات فى العيد انا مش طبقيه و عمرى ما كنت طبقيه لكن زى ما فيه ناس من اللى فوق العلام بوظهم فيه كتير قوى من الناس اللى تحت ماتعرفيش تتكلمى معاهم لو بتركبى ميكروباصات و تدخلى احياء عشوائيات و تشوفى بيتفاهموا مع بعض ازاى و اسألى صاحبتك اللى فى اسطبل عنتر و هى تقولك ايوه انا معاكى المصرى الأصلى تحفه و جميل و كل حاجه لكن 30 سنه اعلام و ثقافه مافيش حاتنتج ناس عامله ازاى انا دخلت عيالى مدارس خاصه مجبره و المدرسين فى المدارس الحكومية انيل و اضل سبيلا انتى قاعده على التويتر طول الليل و مش بتشوفى الناس عايشه ازاى و اعرف ان ربنا لم يرزقك لسه بالأولاد اسمعى بلال فضل و هو بيقول بيدخل بناته مدارس بالشئ الفلانى .....انا نفسى اشوف تعليم كويس بس مش شرط كل الناس تدخل الجامعه و فى الأخر يطلعوا برضه مش متعلمين حاجه .....و بعدين كفايه حسبنة على كل اللى بيخالفك و انتى لولا عمنا احمد فؤاد نجم و ستنا صافى ناز كاظم اللى باموت فيها كان زمانك اتشحططتى فى الأقسام و اتكهربتى زى البنات اللى اتكهربت من الجيش حبيب القلب ..ياريت يا نوارة تفكرى بالعقل شويه احنا كلنا مصلحتنا واحده و مافيش حد بيملك الحكمة المطلقه عايزه تعرفى اراء الناس فى التعليم خدى اراء اللى عيالهم متشحورة فى التعليم و على فكرة مافيش حاجه اسمها انترناشيونال و حكومة بس لأ ده فيه الخاص العربى و الخاص لغات و المدارس التجريبيه و المدارس المميزة و المدارس القوميه احنا عندنا انواع من التعليم تقرف الواحد فى عيشته انا اكتر حاجه خلتنى اشجع الثورة و كنت كل يوم خناقات فى مدرسة بناتى هو التعليم البايظ اللى فى الخاص بيتبهدل اكتر من الحكومه لما تشتكى مدرس و صاحب المدرسه يقولك مش عاجبك خدى ورق عيالك و اطلعى بره او على قد فلوسكم او او احنا متبهدلين فى التعليم ده بجد و ماينفعش يناقش ببساطه كده اهدى يانوارة انتى فيكى خير و انا لسه عندى امل

mostafa alzanaty said...

اولا

Ahmed-Badr said...

فى موضوع ممدوح شاهين (المجلس الأعلى خط أحمر- احمدوا ربنا أننا مقتلناكوش زى ليبيا) أنا مش موافق على كلامك خالص ,الراجل كان لا يحتمل على الإطلاق و لولا أن الرجل الخفى اتكلم بعده و هدى اللعب انا كنت حفضل طول الليل الت و أعجن




وليه ابن الاغنيا ما يدخلش التعليم" الفني وابن الفقير يدخل تعليم عالي وكل واحد ياخد فرصته حسب ذكاؤه وقدراته ومواهبه؟ ليه يتقيم حسب "
فلوسه"؟


من بلوجك لباب السما يا رب

Heba said...

تسلم ايدك يا نوارة انا بحترمك و بحترم آرائك جدا على فكرة
بالنسبة للتعليم الفني انا طلعت فكرة كده كتبت عنهافي مدونتي عشان تطوره بحيث ينفق على نفسه انما محتاج دفعة عند البداية فقط....و كمان البلد فيها فلوس تصرف على كل حاجة و تعيشنا ملوك بس الله لا يسامح اللي نهبوها

mostafa alzanaty said...

بصى يا نوارة بمناسبة كلامك
اولا:انا طالب فى كلية هندسة اسكندرية دخلت كلية حكومية بعد ماطلع عينى اهلى فى الثانوية العامه وجبت مجموع
1- مش عارف اتعلم من الزحمة ولا اصحابى عارفين يتعلموا التعليم الصح مع ان الدكاترة بيبذلوا جهدهم كله لتعلمنا
2- اتعملت اقسام خاصة بفلوس ...دول بقى الى عارفين يتعلموا واحلى قعده واحلى عدد واخدوا الاماكن بتاعت السكاشن بتاعتنا اوتظبتطت اخلى تظبيت
وكمانا اول امبارح كنا فى معمل بندرس طلعونا عشان قسم خاص واتقلنا باللفظ"ايوه كده طلعوا لنا عامة الشعب"احنا مش زعلانين من الكلمة,,انما لما نروح نشتكى لدكتور ويقول لنا ,,ماتزعلوش اصل هما الى بيسرفوا على الكلية.....طيب فين فلوس المكتب الاستشارى الى بيدخل اد كده للكلية......................انا نفسى يااما يقللوا العدد او يزودوا كفاءة العملية التعلمية زى الهند كده وده الى بتمناه
وشكرا ياعمة الشعب
بالمناسبة اسمعى كلام المناضل حمدين صباحى

Unknown said...

علي فكرة الست اللي بتساعدنا فالبيت سألتني يوم يناير هم الناس دي بيعملوا كده ليه؟علي المظاهرة يعني قلتلها عشان مش عاوزين الرئيس الظالم الحرامي و عاوزينه يمشي عارفة قالت ايه؟قالتلي طب يعني ما هو لو مشي هيجي غيره برضه يسرق امال هيعمل ايه ماهو لازم ييجي علي الغلابة ما هو الغلابة ماحدش هيبصلهم !!!هم مقتنعين بكده و ده ما شاء الله النخبة بتأكده جواهم كل يوم بتقولهم انتوا اغبية و مش بتفهموا احنا هنضحي بوقتنا و جهدنا و نجيبلكم كل خير البلد لحد عندكم بس اصل انتم مش بتفهموا اركنوا علي جنب!!!طبعا هم مش هبل مش هيصدقوهم عشان مفيش عندهم ثقة فالاكابر دول
انا صحيح مقتنعة ان النخبة بقت طبقية شوية بس في نفس الوقت الامراض اللي اصابت كل اطياف الشعب نالت جامد من الطبقة الفقيرة و بقت بجد المرض مستفحل برضه عندهم

محمد نبيل said...

أنا شايف ان مستحيل نطور التعليم الجامعى ونخليه مجانى فى نفس الوقت باقتصاد مصر الحالى، وبعدين هو تطوير التعليم الفنى مش يبقى فى مصلحة الطبقة الفقيرة ولا ايه يا نوارة ؟!

Ahmed-Badr said...

قلت نغير جو شوىة

المصرى اليوم

أمر المستشار عاصم الجوهري، مساعد وزير العدل لشؤون الكسب غير المشروع، بمنع كل من الدكتور أحمد فتحي سرور رئيس مجلس الشعب السابق، وصفوت الشريف رئيس مجلس الشورى السابق وأمين عام الحزب الوطني، وزكريا عزمي رئيس ديوان رئيس الجمهورية السابق، ومحمد إبراهيم سليمان وزير الإسكان الأسبق من السفر، كما قرر منع أزواجهم وأولادهم من السفر لحين انتهاء التحقيقات.

يذكر أن جهاز الكسب غير المشروع أمر بالكشف عن سرية الحسابات الخاصة بهؤلاء المسؤولين بعد أن وردت إليهم تحريات الرقابة الإدارية ومباحث الأموال العامة التي أفادت بتضخم ثرواتهم بطريقة غير مشروعة


أنا لسا بلم توقيعات مستنى مظاهرة بكرة علشان الناس تكون سخنة

محمد نبيل said...

بعدين انتى عاجبك مستوى الخريجين الجامعيين أوى ؟ منهم ناس كتير عندهم مشكلة فى القراية والكتابة !

ITHat said...

و الله يا نواره انت كلامك جميل جدا بس انا عاوز اقول حاجه معلش يعني خدي نفس كده بدل النرفزه دي .. المهم انا واحد عاااادي خالص و موظف علي متفرج و مش مشترك في حزب ولا حاجه و نزلت المظاهرات لاول رمره في حياتي ايام الثوه ... و بصراحه انا شايفك منفعله بس خدي الموضوع بالهجاوه بالنسبه لمجانية التعليم انا معاكي تمام ان المدارس الحكومي تبقي احسن بكتير من الفظاع الخاص حتي التعليم الجامعي لكن تيجي لحد المحانيه اقلك مش المفروض انها تبقي لحد الجامعه الا للطلبه المتميزين جدا ... غير كده تبقي مجاني لحد مثلا الثانوي .. و اللي عاوز يكمل يكمل اديكي مثل بسيط و انا اتخرجت و معرفش صنعه في حياتي الا شويه دورات الداتا بيز و الكمبيوتر اللي اعرفهم لكني اتمني اني اعرف صنعه تكسب او اعرف اشتغل في مصنع ايه فايده ان دفعتي في كلية التجاره تبقي بعشرات الالوف لما كلنا محاسبين امال مين اللي حيدفع ضرايب .. هي مشكله لازم لها فكره مش موضوع اني شمش عاوز ابن البواب يبقي معي ابني و الله البواب في عمارات كتير مرتبه اكبر من مرتبي و التعليم ملوش دعوه بالبواب له دعوه انه اجهاد علي بلد لا يحتاج هذه الكم من بكلوريوسات اي حاجه و يقعد علي القهوه دعم التعليم اللي يخرج خبير في حاجه معينه في سوريا عندهم مدارس بتدي زي دبلوم عندنا بيشتغلو مساعد مهندس في الامارات مش مشرف عمال لااا اعلي منه شويه .. هي الفكره مصر عملت ايه في كمية الشهادات العليا فيه بكلوريوسات شغالين بوابين في الخليج الله ينتقم منك يا حسحس لو شفتي لو الشهاده العاليا لها شغل اهلا بيها و دعمها لكن لو ملهاش وجه الدعم ده للتعليم المتوسط و المتميز يكمل انشاالله للدكتوراه علي حساب البلد .
نيجي لنسبه العمال و الفلاحين يعني ايام عبد الناصر المفروض انه اهتم بالزراعه و حاول يظبها و ادي الفلاحين امتيازات كتير طيب المخلوع حول الفلاح الي واحد مش مهتم غير بزرع المحصول و انه يلم الدايره علشان يبقي له عزوه في البرلمان و بس و اللي بيدخل و الله في كتير من الاحيان مش بيعرف يكتب انا من البحيره و اقلك نايب دمنهور في سنه من السنين انا قابلته و الله جاااااهل معرفش معاه محو اميه و لا لا لكن م بيعرف يقرا يعني ميييح ..يبقي مش نحدد بقي اللي يترشح حتي يبقي متعلم حتي لو متوسط التعليم ... و اجي اقلك الناس لسنها دلدل علي موضوع القائئمة النسبيه لانه هو اللي كان حيدي الاحزاب اهميه بجد .. لكن التمييز الايجابي ده للفلاحين معتقدش حاليا له داعي كمان يمكن ايام عبد الناصر الفلاحين كانو منغلقين لا تلفزيون ولا دش و لا عربيات دلوقتي الوضع اختلف يبقي ليه التمميز و ان كان لابد حط شرط التعليم مش طبقية و لا برجوازيه بس علي الاقل احس ان النائب الي تحت القبه ممكن يكتب استجواب يشرشح الحومه وما يجي الوزير ميحطهوش تحت باطه او يضحك عليه علشان مش عارف يتكلم ... و الاهم علشان يبقي له اهميه اثناء وضع الدستور دي طبعا وجهة نظري .. و علي فكره و الله انا كل يوم بأدخل علي المدونه بتاعتك و دي تاني مره اختلف معاكي من ايام نعم ولا بتاعة الاستفتاء ... و شكرا يا نواره

إيمان said...

اقول للطبقة المتوسطة... انت عيانة يا حبيبتي.. ربنا يشفيك، بس مافيش دكتور حيقدر يساعدك لو انت ما ساعدتيش نفسك

اه يا نواره هى دى المشكله .. جوزى اول يوم بعد الثورة قالى عارفه اكبر خطر على الثوره ايه .. اننا لسه بنفكر تحت نفس القمع بتاع زمان نفس الفوبيا ونفس المخاوف لو فعلا الانتخابات النزيهه هتطلع نفس الناس يبقى كانوا بيزوروا ليه .. وليه مصاريف وبلطجيه وتزوير .. احنا لسه قدامنا شوية على ما نفهم نفسنا بس طول ما احنا عايزين الخير لمصر يبقى كل مره هنتعلم من غلطنا

مهندس مصري بيحب مصر said...

أنا مع مجانية التعليم و العلاج و حق السكن و غيرها و غيرها
و مع حق الفلاحين و العمال في الترشح لعضوية المجالس النيابية بدون حد اقصى لنسبة عضويتهم و بدون حد أدنى
أنا ضد الكوتة الـ 50% بتاعتهم
سيبوهم يترشحوا بدون كوتة و يارب يآخدوا 80% أو 90% حتى
لكن سيبوا حرية الإختيار للشعب عبر الصندوق يا بنت الشعب

و لازم المرشح يكون حاصل على الإبتدائية أو محو الأمية مش مجرد بيفك الخط

و بطلي عياط و تشنج و إستهدي بالله:))

ربنا يوفق بلدنا للي فيه الخير

حاج محمد said...

هل سمعتى حمدين صباحى يانوارة؟ الراجل دة أبن بلد وقلبه على الفقراء قوى قوى - بدون ما يظلم اﻷغنياء - بس هو طالب إنهم يكونوا رأسمالية وطنية يعنى يفيدوا البلد ويساعدوا فى حل مشاكل المجتمع - أعتقد إنه أنسب رئيس نختاره بعد الثورة - ﻹن عنده رؤية واضحة ومنحاز للفقراء - ياريت تسمعيه ويلقى تأييدك - أنا بحبه جداً

Anonymous said...

أنا معاكي يا نوارة في كل كلمة بتقوليها صحيح الأغنيا لازم يدفعوا و مش معنى انهم اغنيا يبقوا حرامية... أو على الاقل معظمهم .. المدارس الانترناشونال ليها ناسها وكل التعليم اللغات له ناسه بس التعليم الحكومي لازم ينضف ولو على حساب التعليم الخاص.. الفكرة مش أكتر منها عدل للفقرا .. هما ما خلقوش نفسهم عالحال ده ولا العيب فيهم فأبسط حاجة المجتمع يقدمهالهم هو تعليم صح بالمجان و بعد كدة يا ينجح يا يفشل و يستاهل غلبه لان دي أبسط مفاهيم العدالة و تكافؤ الفرص

Anonymous said...

ممتاز انا طول عمري نفسي ابن الدكتور,وابن البواب,وابن رجل الاعمال يتعلمو مع بعض عشان مايحسوش بالفرق بينهم
بس انا كنت من الناس الي فاكرين ان القوانين لازم يشرعها قانونيين برضه وكنت فاكره ان العمال والطبقات ده ماينفعش تعمل ده,شكرا انك بتلفتي نظرنا لعيوبنا, واحنا مش هنبقى زي طبقية انجلترا احنا هنبقى احسن بكتير
واحنا فعلا بدل مانقول الشعب جاهل,لازم نحاول نقنعهم ونوصلهم وجهة نظرنا,وانا متأكده انهم هايقتنعو بدل ماحنا سايبين ودانهم للحزب الواطي

Ahmed said...

ماحدش قال نحرم يا نوارة . المتفوقين و الي مستوي ذكائهم يؤهلهم طبعا هيبقوا استثناء و ليهم منح والمشكلة اصلا مش في دول . المشكلة اننا البلد الوحيد اللي الاب فيه بيسافر الخليج ويشتغل و يجيب لولاده شقق و عربيات من و هما في ابتداءي بعد كده يخليهم ياخدوا دروس في ثانوية عامة و يحفظوا و يجيبوا مجاميع يدخلوا بيها جامعا حكومية ببلاش . من الاخر انا شايف حل المشكلة دي اننا نعمل زي اسراءيا "مع كامل كرهي ليها" و نخلي التجنيد بعد الثانوية العامة و التجنيد يبقي بيعلم مهارات اساسية و بعض الحرف عشان اللي يقرر انه يدخل سواء جامعة او تعليم فني يبقي عن اقتناع . و علي فكرة انا واحد من الناس الي اباهاتهم سافو الخليج و جابو شقق و ادوهم دروس و في الاخر دخلت جامعة حكومية و كمان كلية هندسة رغم اني شايف انه فيه غيري كتيييير كانوا احق بالفرصة دي . ارجو انك تقري كلامي لاخره و تردي عليه

nevine said...

و الله انت زي الفل يا نوارة .. كان نفسي الاقي حد واخد باله من اللي بيحصل .. تعالي غريب على الشعب و كأننا اغبيا و يقولك مجانية التعليم تتلغي و يجي بعد كده يقول الشعب جاهل.. طب لو هو جاهل بدل متعلموا تحرموا من التعليم مالتعليم كان مجاني من ايام ثورة يوليو و كان ايامها التعليم المصري من احسن نظم التعليم يكش هو النظام السابق اللي كان عايز يدمر التعليم عشان يضمن السلطة .. مع الأسف احنا اتحولنا من استبداد الفرد لاستبداد المجموع .. العقدة اللي رباها مبارك فينا بنطلعها دلوقتي على بعض .. نفس الطبقة اللي كانت بيقضى عليها هي هي العايزة دلوقتي تقضي على الاقل منها .. و لما نحرمهم التعليم عايزنهم يطلعوا ايه و لا يعملوا ايه و احنا اللي دلوقتي بنمارس القهر عليهم .. و يقولك اصل انتوا شعب غبي و مش بيفهم نفس سياسة القطيع بيحاولوا يمارسوها علينا مبتفهموش و احنا اللي بنفهم يبقى تسمعوا الكلام و انتوا ساكتين و ما تضيعوش البلد انا اسفة بس دي ناس اثبتت ان هما اليي مش فاهمين الشعب و لا عارفين يقنعوه و لا وقادرين يوصلوله باي شكل من الاشكال .. نفس ممارسات الماضي بتمارس علينا دلوقتي باسم الديمقراطية .. انا اسفة اني اقول ان دي قمة الديكتاتورية و اثبتوا ان هما مش مختلفين قوي عن النظام السابق نفس الممارسات و ان اختلفت الاهداف .. اصل مصر دلوقتي التورتة و كل واحد عايز ياخودله حتة .. ربنا يستر على بلدنا .. بلدنا كلنا مش بلد المتعلمين بس

Ahmed said...

ماحدش قال نحرم يا نوارة . المتفوقين و الي مستوي ذكائهم يؤهلهم طبعا هيبقوا استثناء و ليهم منح والمشكلة اصلا مش في دول . المشكلة اننا البلد الوحيد اللي الاب فيه بيسافر الخليج ويشتغل و يجيب لولاده شقق و عربيات من و هما في ابتداءي بعد كده يخليهم ياخدوا دروس في ثانوية عامة و يحفظوا و يجيبوا مجاميع يدخلوا بيها جامعا حكومية ببلاش . من الاخر انا شايف حل المشكلة دي اننا نعمل زي اسراءيا "مع كامل كرهي ليها" و نخلي التجنيد بعد الثانوية العامة و التجنيد يبقي بيعلم مهارات اساسية و بعض الحرف عشان اللي يقرر انه يدخل سواء جامعة او تعليم فني يبقي عن اقتناع . و علي فكرة انا واحد من الناس الي اباهاتهم سافو الخليج و جابو شقق و ادوهم دروس و في الاخر دخلت جامعة حكومية و كمان كلية هندسة رغم اني شايف انه فيه غيري كتيييير كانوا احق بالفرصة دي . ارجو انك تقري كلامي لاخره و تردي عليه

Unknown said...

نوارة صح ايه علاقة الذكاء بكمية الفلوس اللي عند اهلنا؟موضوع غريب برضه
فالدول المتقدمة مش كل الناس بتدخل جامعة عشان و هم فالمدرسة كل واحد بيكتشف قدراته و ما بقاش عندهم موضوع الطبقية دي بلدنا محتاجة ان كل الشعب يحس ان فعلا الدكتور و المهندس مش املة و نسيبهم كده سنة و لا انين اللي عاوز يبقي دكتور او مهندس اتفضل شوية شوية هيروح المفهوم ده و طبعا بجد التعليم ليس له علاقة بالمال ده اسمه تخلف
بره اللي عاوز يتعلم تعليم عالي اما بيكون فقير و شاطر فبيموت نفسه عشان ياخد منحة مجانية او انه بياخد قرض للتعليم و اللي بيعمل كده بيكون فعلا شايف نفسه فالتخصص ده و عاوزه مش عشان اللوك الاجتماعي

hayat ank said...

بصى يا نونو يا حبيبى انا بتفق معاكى كتيروبختلف معاكى شويه الاتفاق ان احنا فعلا لازم نكفل تعليم صحه وسكن دى من عندى كمان لاكن اختلافى معاكى انه 50% عمال وفلاحين فى حاجتين اولا ياريت يكونوا بجد عمال وفلاحين يعنى احنه كلنا اهالينا ايه اساسا كل عيله او اغلب مصر يا حبيبتى مهم عمال وفلاحين بس يا ريتهم دول الى بيدخلوا ده كان باب واسع للنصب والتدليس وكانوا ناس كتيربيدخلوا تحت المظله دى وهم لا عمال ولا فلاحين وعمرهم ما راحوا بلادهم وما بيظهروش غير قبل الانتخابات بشهر وشوقتى الماسوف على شبابه اباظه كان قبل الانتخابات بشهر سايب الوزاره وعامل فرح فى بلدهم ولا فرح ابن العمده بس كان الفلاحين هم اخر حد هو بيبص عليهما وبوصى انا بتكلم لغات على ادى خاااااااااااااااال واهلى ناس غلابه قوى علشان تبقى عارفهواصولنا فلاحين على جيش علشان ماتصنفينيش من دول وبعدين احنا مش عايزين ناس من الى بيبصموا ومش عارفين يقروا بتوع موافقون موافقه ورافعين اديهم علطول كمان احنا ضد التصنيف احنا كلنا واحد فى الاخر مصريين وبلا عمال بلا فلاحين مش عايزين تصنيفات عايزين كلنا نشتغل سوا من غير تصنيف والناس بتوع امبارح بيفتخروا انهم من ابناء الثوره بس الثوره دى بقالها كتير فيها حاجات صح وحاجات غلط مش قران وهما كانوا بيرفضوا النسبه للاسباب الى قلتهالك دى لانها باب خلفى للتدليس وسرقه حقوق ناس تانيه هما بجد الى محتاجين فلما نكون جربنا حاجه من الثوره وعرفنا انها باب للسرقه والتدليس والاشتغالات الى كانت بتحصل فى مجلس الشعب مش عيب اننا نغيرها امال عايزين نغير ليه وعملنا ثوره ليه علشان ما نرجعش نلف فى نفس الدايره الناس الى بتتكلمى عليهم هم الى وعوا ناس كتير وشكلوا فكرالناس الى قامت بالثوره وزى ماقلتلك قبل كده مافيش ملايكه على الارض هما بس عايزين يقفلوا الابواب الى بتادى لاى حاجه غلط وهدوئهم كان فعال لما شافوا الراجل بتاع الجيش ثائر علشان يعرفوا يفهموه مهم متخصصين شويه العلماء بيبقوا هاديينعلشان بيفكروا تفكيرعلمى مش انفعالىطب ليه ما اتكلمتيش على انه الجيش كان بيعايرنا انه ما عملش فينا زى ما عمل جيش ليبيا او البحرين طب ده كلام الناس ماكنتشى بتشتم فى الجيش دى كانت بتتكلم عن السياسه والدوله والاداء طب مازعلتيش ليه لما الراجل بتاع الجيش قال ان حل المحليات عزل المحافظين هايوقع الدوله فهم فهمونا ان ده مش حقيقى وقالوا ازاى لازم نبدا صح وكل الناس بيقولوا علشان اى ثوره تنجح لازم يكون فيه تطهيرما انا غلبت ابعت لكل الناس الكلمتين بتوع ناصر امين بتاع العداله الانتقاليه يعنى الجيش ماوصلتهوش ده مش ممكن عمالين بيقولوا احنا بنسمع الفضائيات طب ما الراجل ده طلع كتير يقول كده وهيكل قال كلام بيصب فى الحكايه دى بس بصوره تانيه وابراهيم عيسى وبلال فضل هو الجيش بيسمع نفسه بس مش عارف يسال وهو فعلا بيسال بس بيعمل الى هو عايزهاستاثاره بالقرار ما ينفعش والراجل الى حطينه فى لجنه الحوار الوطنى انتى عارفاه وكنتى بتشتمى فيه ده كان بيتكلم امبارح على اللجان المتخصصه بتاعت سوزان وبيشتشهد بيها والجيش عارف كويس ومين موالى للنظام لغايه امبارح او النهارده زكريا عزمى لسه موجود فى مكتبه ازاااااااااااااااى الى هايشتغل بمبدا فلرعونى يعنى يعمل الى هو عايزه ما ينفعشى دلوقتى حتى لوكان الجيش وتانى هاقول الى تضمنه هو الى تعمله على ايدك وهم كانوا بيقولوا كده امبارح الدستور يضعه الشعب ويصيغه القانويين يعنى اراده الشعب هى الاعلى مش حد تانى يبقوا وحشين

Unknown said...

التعليم الجامعي هنا في فرنسا مجاني و في تعليم فني شغال عال العا و الناس مش هتموت بعض ولا حاجة علي التعليم الجامعي لازم نغير فكرة ان التعليم الجامعي ممتاز و بلد شهادات و الكلام ده

elzahraamegahed said...

هو الكلام عن الغاء مجانية التعليم مقصود بيه التعليم الجامعى وفوق الجامعى ولا التعليم بالمدارس؟؟؟

التعليم بالمدارس أنا معاكى فى كل اللى قولتيه وأنا عايشه فى فرنسا ولامسه اللى بتقولى عليه وبحلم بيه
اعتقد إن اللى اتكلموا عن مجانية التعليم ما يقصدوش المدارس ، ده مش موجود ف أى حته ف العالم ان التعليم بالمدارس يبقى بفلوس ولازم المدارس الحكوميه تبقى الأفضل والأنضف زى ما فى كل الدول

بس أعتقد إن التعليم الجامعى فى مصر وكذلك الفنى فيهم مشاكل كتير ولابد من تقويمهم، والكلام عن إن التعليم الجامعى يبقى غير مجانى وأن يتم إنفاق دخله فى التعليم الفنى ربما يكون حل لأن الحقيقه اللى بيحصل حاليا إنه مفيش ولا تعليم فنى ولا جامعى ولازم يبقى فيه منح للطلبه المتفوقين للدراسة مجانا بالجامعات

بمعنى إن أنا نفسى فعلا المدارس فى مصر تبقى مستوى واحد وهو مستوى المدارس الانترناشيونال وتبقى مجانيه لكل الناس بس التعليم الجامعى هو اللى يبقى بفلوس ومجانى للمتفوقين والتعليم الفنى يبقى صح وبيخرج حد مؤهل أنه يشتغل

مش عارفه هو كده يبقى فيه ظلم لغير القادرين برضه ولا ايه؟ خايفه أكون بقيت طبقيه حقيره ويكون اللاوعى هو اللى بيحك تفكيرى
على فكره هنا فى فرنسا التعليم الجامعى مجانى برضه بس ما بيكملش الا قليليين وهو تعليم بجد وامتحانات بجد

المشكله فى التعليم الجامعى الاقبال الهائل على دخول الكليات النظريه واللى ما بيشتغلوش بيها فلازم الناس تدخل مجالات فنيه وفيها تعليم حقيقى عشان يتعلموا حاجه يشتغلوا بيها والمتفوقين هيدخلوا ببلاش بس أعدادهم مش هتبقى خرافيه كده والى عايز يكمل جامعه يشتغل ويدرس أو أهله يصرفوا عليه
المهم إن التعليم لحد الثانوى يبقى مجانى ويبقى يبقى على أعلى مستوى

نقطه أخيره هنا بعض المدارس الفنيه والجامعات ذات المصروفات العاليه فيها كوتا
أيوه كوتا بنسبة 30فى الميه لمحدودى الدخل والحكومه هى للى بتتحمل مصروفاتهم، بس الموضوع ده بيتهاجم جامد وبيفكروا يلغوه

بس آه لو أشوف مصر زى فرنسا كده فى التعليم والصحه والمساعدات اللى بتتقدم للفقراء

محمد نبيل said...

أنا خريج آداب ووالله أتمنى انى أكون خريج تعليم فنى جيد وباشتغل بتخصصى أحسن من كليتى دى.

hayat ank said...

بصى يا نونو يا حبيبى انا بتفق معاكى كتيروبختلف معاكى شويه الاتفاق ان احنا فعلا لازم نكفل تعليم صحه وسكن دى من عندى كمان لاكن اختلافى معاكى انه 50% عمال وفلاحين فى حاجتين اولا ياريت يكونوا بجد عمال وفلاحين يعنى احنه كلنا اهالينا ايه اساسا كل عيله او اغلب مصر يا حبيبتى مهم عمال وفلاحين بس يا ريتهم دول الى بيدخلوا ده كان باب واسع للنصب والتدليس وكانوا ناس كتيربيدخلوا تحت المظله دى وهم لا عمال ولا فلاحين وعمرهم ما راحوا بلادهم وما بيظهروش غير قبل الانتخابات بشهر وشوقتى الماسوف على شبابه اباظه كان قبل الانتخابات بشهر سايب الوزاره وعامل فرح فى بلدهم ولا فرح ابن العمده بس كان الفلاحين هم اخر حد هو بيبص عليهما وبوصى انا بتكلم لغات على ادى خاااااااااااااااال واهلى ناس غلابه قوى علشان تبقى عارفهواصولنا فلاحين على جيش علشان ماتصنفينيش من دول وبعدين احنا مش عايزين ناس من الى بيبصموا ومش عارفين يقروا بتوع موافقون موافقه ورافعين اديهم علطول كمان احنا ضد التصنيف احنا كلنا واحد فى الاخر مصريين وبلا عمال بلا فلاحين مش عايزين تصنيفات عايزين كلنا نشتغل سوا من غير تصنيف والناس بتوع امبارح بيفتخروا انهم من ابناء الثوره بس الثوره دى بقالها كتير فيها حاجات صح وحاجات غلط مش قران وهما كانوا بيرفضوا النسبه للاسباب الى قلتهالك دى لانها باب خلفى للتدليس وسرقه حقوق ناس تانيه هما بجد الى محتاجين فلما نكون جربنا حاجه من الثوره وعرفنا انها باب للسرقه والتدليس والاشتغالات الى كانت بتحصل فى مجلس الشعب مش عيب اننا نغيرها امال عايزين نغير ليه وعملنا ثوره ليه علشان ما نرجعش نلف فى نفس الدايره الناس الى بتتكلمى عليهم هم الى وعوا ناس كتير وشكلوا فكرالناس الى قامت بالثوره وزى ماقلتلك قبل كده مافيش ملايكه على الارض هما بس عايزين يقفلوا الابواب الى بتادى لاى حاجه غلط وهدوئهم كان فعال لما شافوا الراجل بتاع الجيش ثائر علشان يعرفوا يفهموه مهم متخصصين شويه العلماء بيبقوا هاديينعلشان بيفكروا تفكيرعلمى مش انفعالىطب ليه ما اتكلمتيش على انه الجيش كان بيعايرنا انه ما عملش فينا زى ما عمل جيش ليبيا او البحرين طب ده كلام الناس ماكنتشى بتشتم فى الجيش دى كانت بتتكلم عن السياسه والدوله والاداء طب مازعلتيش ليه لما الراجل بتاع الجيش قال ان حل المحليات عزل المحافظين هايوقع الدوله فهم فهمونا ان ده مش حقيقى وقالوا ازاى لازم نبدا صح وكل الناس بيقولوا علشان اى ثوره تنجح لازم يكون فيه تطهيرما انا غلبت ابعت لكل الناس الكلمتين بتوع ناصر امين بتاع العداله الانتقاليه يعنى الجيش ماوصلتهوش ده مش ممكن عمالين بيقولوا احنا بنسمع الفضائيات طب ما الراجل ده طلع كتير يقول كده وهيكل قال كلام بيصب فى الحكايه دى بس بصوره تانيه وابراهيم عيسى وبلال فضل هو الجيش بيسمع نفسه بس مش عارف يسال وهو فعلا بيسال بس بيعمل الى هو عايزهاستاثاره بالقرار ما ينفعش والراجل الى حطينه فى لجنه الحوار الوطنى انتى عارفاه وكنتى بتشتمى فيه ده كان بيتكلم امبارح على اللجان المتخصصه بتاعت سوزان وبيشتشهد بيها والجيش عارف كويس ومين موالى للنظام لغايه امبارح او النهارده زكريا عزمى لسه موجود فى مكتبه ازاااااااااااااااى الى هايشتغل بمبدا فلرعونى يعنى يعمل الى هو عايزه ما ينفعشى دلوقتى حتى لوكان الجيش وتانى هاقول الى تضمنه هو الى تعمله على ايدك وهم كانوا بيقولوا كده امبارح الدستور يضعه الشعب ويصيغه القانويين يعنى اراده الشعب هى الاعلى مش حد تانى يبقوا وحشين

elbarck said...

أنا معاكي في كلامك كله لكن ليا تعليق بسيط.... واحد حيوان ساعة الثورة كان بيقول طبعاً مش كل الناس تتعلم.... طبعاً كان تعليقي هو ومين جدك الباشا، لولا عبدالناصر علم جدك وباباك كان زمانك بتجري ورا عربية الرش.... التعليم المجاني حق مكفول للجميع.... لأن لو مبقاش مجاني يبقى معظمنا هنجري ورا طلبات السوبرماركت للبيوت.... التعليم وسيلة للإرتقاء وليس وسيلة للنخبوية....
لكن رغم كده عندي اعتراض بسيط وخاص بنقطة مرشحي البرلمان وهي ضرورة توفر حد أدنى من التعليم، وليكن اعدادية، الحملة الفرنسية عملت مجلس للأعيان باعتبار إنهم متعلمين وأصحاب مشورة بسبب أملاكهم، محمد علي عمل نفس المجلس، عبدالناصر عمل 50% عمال وفلاحين باعتبار انهم الطبقة التي امتلكت بعد قانون الإصلاح الزراعي، فاحنا مش هنعملها للملكية لكن هنحط شروط محددة منها حد أدنى للتعليم وليكن الإعدادية، اختبار لغة عربية موحد لجميع المرشحين علشان اللي يزوغ من الإعدادية وياخدها كده غش.... ويحصل على دورات تدريبية محددة من مركز محدد وبكده يقدر يتقدم للترشيح.... وبعد ما يدخل المجلس يتعمله دورات تدريبية باستمرار.... اعتقد بكده هنضمن مستوى مقبول للأعضاء بدل الهطل اللي كان بيحصل طوال نصف قرن....
بس

طبيب بيطري said...

والله يانوارة فعلا احنا المفروض ننزل سم في الترع عشان نخلص من الفلاحين ونحاول نجيب العمال معاهم يمكن نضرب عصفورين بحجر ويبقي مش باقي غير المثقفين
طيب المثقفين عندنا ناس زي الفل بس ساعتهم متأخرة بتاع يومين يجوا بعد الناس قالت نعم ويقعدوا يقنعوا الناس بنعم ويجوا بعد الاعلان ويحاولوا يقنعوا الناس ان الاعلان دا غلط
لدرجة ان مستشار معرفش اسمه ايه معترض علي الاعلان الدستوري بيقولوا انا كنت بقول لا عشان يطلع اعلان دستوري تقوم الناس تقول نعم ويطلع بردوا اعلان دستوري
تقريبا البشمهندس كان بينام بدري لانه معرفش ان الاعلان كدا كدا كان طالع لدرجة ان الجيش كان ناقص ينتج اغنية الاعلان الدستوري
المهم بالنسبة للتعليم المجاني فلا شك عندي في انه مثل الماء والهواء لا يجب ان ينزع من احد اما بالنسبة للتعليم الفني فيجب تنميته يعني الناس تحس ان اللي هياخد دبلوم هيلاقي شغل بمرتب محترم في موقع محترم مش الجامعة بفلوس وكدا يبقي حلينا المشكلة طيب هيطلع اطباء ومهندسين بفلوسهم واتفرج بقي علي البلاوي في العمليات والمباني وما شابه
بالنسبة للفلاحين وانا منهم
يااخت نوارة الفلاحين تغيرت تركيبتهم الاجتماعية علي مدار التلاتين سنة الاخيرة بس البشمهندسين اللي عاشوا ف المدن ودول اوروبا مخدوش بالهم انا طبيب بيطري ومن الريف واشتغلت مع الفلاحين
شوفي ياستي ممكن فوق ال 80 في المائة من شباب المزارعين معاهم دبلومات فنية تجارة وصنايع وزراعة ، اللي اتعدوا سن الاربعين 80 في المائة منهم مش متعلمين بس مثقفين بشكل معقول يعني بيفهموا لما حد يفهمهم بالنسبة للي اكبر من كدا دول بيبقوا يلا حسن الختام والفضل في كدا للكبدي والامراض المستعصية
انا اتعاملت مع تاجر وجزار لو شفتوه هتقلوه عمره ما مشي جمب مدرسة معاه دبلوم - اتعاملت مع مربي حيوانات مدير في الزراعة - انزلوا واعملوا احصائيات وشوفوا نسب التعليم والثقافة ف الريف - هتقلوا 40 ف المية جهلا بقولكم انزلوا وشوفوا هتعرفوا ان الجهلا دول عندكم ف العشوائيات وطبعا بيعتبروا ان اللي ما اخدش شهادة جهلا - بقولكم انزلوا وخلو البشمهندسين اللي بيقعدوا في التلفزيونات ليل نهار ينزلوا يحتكوا بالناس بدل ما قاعدين ع التويتر - العمال طبعا دول طبقة اعلي تعليميا من الفلاحين المشكلة الحقيقية اللي قاعد في بيته وعاوز يبقي رئيس ع التويتر الله يرحم السادات وعبدالناصر كانوا فلاحين - لكن ياتري احمد عز وبطرس غالي وصفوت الشريف وسرور كانوا فلاحين ولا جهلا عشان يعملوا فينا كدا اوعوا تقولولي ان الفلاحين في مجلس الشعب هما اللي عدلوا الدستور وهما اللي سرقوا البلد
طبعا الكلام دا مع كامل اعتراضي علي تحديد نسب لكن تتعدل ف الدستور الجديد مش هنقعد نهرد (نهرج = نتكلم ) في الفاضي
ايمن نور قاعد يجري في انحاء مصر شغال والبرادعي نايم ع التويتر وائتلاف الثورة عامل مؤتمر صحفي عشان يقول رأيه انما اللي زعلني وائل غنيم معملش مؤتمر يقول رأيه ليه دا الراجل معاه ع الفيس بوك مليون و100 الف
ألا شباب الثورة دول مبيعرفوش يعملوا حملات توعية للناس اللي مش عارفه ولا بتوع شاي وقهوة بس ( مظاهرات واعتصامات)

Tears said...

مافيش داعى نقفش من مرشح عشان له راى فى موضوع مش عاجبنا لاننا ممكن نناقشة و هو عارف ان كلامه مش قرآن و كمان فيه حاجة اسمها مجلس شعب بيمثلنا و تحديد لصلاحياته فمش معقول نقلب الترابيزة عشان حاجة كده فجاه

ياريت كل مصر تشوف الفيديو ده
http://www.youtube.com/watch?v=teNSypJ-PPE&feature=youtu.be

utopia said...

السلام عليكم :
باحب مضافتك وقلبك الطيب والله
بس مشكلتك انك ساعات بتفكرى بقلبك بس
انا معاكى ان المثقفين وكتير من الطبقة الوسطة طبقيين وحاجة تقرف
ومعاكى ان التعليم يبقى مجانى
بس مجانى للمين؟؟لكل الناس؟؟واللا اللى ذكاؤه يؤهله له؟؟
لو الواد فقير بس شاطر يكمل ويتعلم وماله لانه هاينفع البلد
وابن الغنى لو غبى وما بيفهمش ليه يكمل تعليم عالى ماله التعليم الفنى .
انما مش الكللل يا نوارتنا يتعلم مجانى

بالنسبة للكوتة بتاعة العمال والفلاحين دى تعتبر تمييز ضد مش مع العمال والفلاحين...هما ناقصين ايه عشان ندعمهم؟؟بلاش كوتة وبلاش تفرقة مالهاش لازمة كلنا ولاد حو وادم الطبقات الفقيرة بتفكر والله احيان كتيرة احسن من المثقفين بس ناقصهم بجد حاجة واحدة مصدر صادق للمعلومات غير القناة الاولى والاخبار والجامع...ده فعلا اللى ممكن نصلح فيه غير كده والله هما ميت فل واربعتاشر
وا لاخوة اللى بيتكلموا على سلوك سكان العشوائيات الواطى احب انبههم انه مش مسئولية الناس دى دى مسئولية الفقر والتهميش ووالله شوية اهتمام بيهم دماغهم هاتبقى نضيفة اخر حاجة ويمكن يسمعوا موتزارت كمان.

bedo said...

يا اخواننا اقتصاد المانيا قايم علي العمال مش الجامعيين
يعني انتي عاجبك لما تركبي تاكسي ويطلع السواق خريج تجاره ولا هندسه
وانتي فاكره لما يدعم التعليم الفني دا هيطلع عامل لووووز وممكن يقبض بالدولار كمان
ومش معني كده ان مش كل الناس تدفع فلوس للجامعه انما يتعمل منح للمتفوقين والمتميزين
مش معني اني بحب الهندسه مثلا اني ادخلها لازم اثبت اني استحق اني ادخلها

Anonymous said...

نداء إلى الشعب المصري
معا في مليونية إنقاذ الثورة
تدعو الجمعية الوطنية للتغيير أعضاءها ومؤيديها وجموع الشعب المصري في جميع المحافظات إلى الخروج في تظاهرات سلمية حاشدة يوم الجمعة الموافق 1/ 4/2011 لمتابعة تنفيذ أهم الأهداف التي قامت من أجلها الثورة ولم تتحقق بعد رغم عدالتها ومرور فترة كافية دون استجابة لها.
وتشير الجمعية الوطنية إلى أن اعتماد مبدأ العدالة الناجزة بدلا من التباطؤ في القصاص من القتلة واسترداد أموال الشعب المنهوبة أقصر الطرق لتحقيق هذه الأهداف، وهي :
1- محاكمة المجرمين...قتلة شهداء ثورة 25 يناير.
2- محاكمة اللصوص الذين نهبوا ثروات البلاد واستردادها إلى الخزينة العامة للدولة.
3- حل وتفكيك بؤر الفساد ممثلة في الحزب الوطني والمجالس المحلية والمحافظين.
4- تطهير الإعلام من القيادات الفاسدة التي ضللت الشعب ودلست عليه أثناء الثورة.
5- وضع جول زمني للتجاوب مع المطالب الفئوية العادلة بدلا من فرض مشروع لتجريم التظاهر والاعتصام.
وتؤكد الجمعية أن رفع المظالم أسهل وأوقع من تجريم التظاهر وخرق حقوق الإنسان وأن التباطؤ في تنفيذ مطالب الثورة هو والظلم سواء ولن يخدم سوى بقايا النظام البائد وسيدعم الثورة المضادة، وتؤكد الجمعية الوطنية أيضا على أن مفتاح الاستقرار وزيادة الإنتاج هو تطهير البلاد من الفساد والمفسدين.
حمي الله الثورة العظيمة من كل الدسائس والمؤامرات
الجمعية الوطنية للتغيير

OberonSky said...

أنا بقى موافقك في حاجات و مختلف معاكي في حاجات .. شوفي بقى يا ستي ... موضوع الكوته ده يطول شرحه لأنه ليه فوائد و ليه عيوب .. أهم حاجة اننا متفقين إن ستات أو عمال أو فلاحين و كل الشعب من حقه إنه ينتخب نفسه في مجلس الشعب أو الرئاسة و كدة .. الكوته عملوها في أمريكا بالمناسبة للامريكان الأفارقة و للستات في التعليم و الشغل و حاجات كدة لكن مش في الحاجات إلي فيها إنتخابات ذي مجلس الشيوخ و الكونغرس .. أول رئيس أمريكي عملها كان كينيدي و لسه موجوده لكن في ولايات معينة لغتها و الموضوع نوعاً ما في أمريكا مختلف عليه .. لكن أنا شايف إن في مجلس الشعب المفروض متكنش موجوده .. و زي ماقلت كل الناس ممكن تترشح ... لكن الكوته في التعليم الجامعي و في الشغل ممكن تساعد ناس زي ما الدراسات في أمريكا بينت ..

بالنسبة لموضوع إن العمال و الفلاحين ميفهموش و بصمجية ده طبعاً غلط كبير .. في فرق بين تعليم الكتاب و تعليم الحياة كدة زي كلمة العلم في الراس مش في الكراس .. و في ناس من غير شهادات و تعليم عالي و بتفهم أكتر من دكاترة .. فالموضوع لازم يكون شخصي .. يعني نحكم على البني أدم كل حالة بحالتها .. التعميم غلط ..

بالنسبة للتعليم لحد الثانوي و الصحة و السكن و كمان زودي عليها المواصلات المحترمة لازم تكون حق حق لكل الناس ... لكن التعليم الجامعي لازم يكون بالتفوق .. و كمان لزم يكون فيه معاهد لشهادات سنتين بدل أربع سنين و معاهد فنيةه و كدة .. شوفي كل الدول المتقدمة و حتى اليابان مش كل الناس بتروح جامعات ..

الحل إيه .. إن الجامعات تكن بمصاريف بس مش معجزة .. يعني مثلاً أنا هديلك أمثال من أمريكا لأني عشت و درست هناك .. الجامعات الخاصة مصاريفها في السنة (دراسة بس من غير سكن و أكل) في حدود 25,000$ ... الجامعات الحكومية و فيه منها كتير جامد و أحسن من الخاصة كمان بتبقى في حدود 10,000$ .. فيه منح حكومية و منح دراسية من الجامعات و المؤسسات الخيرية و فيه قروض حكومية .. موضوع القروض ده أنا مش عجبني أوي لأن الطالب ياعيني بيطلع من الجامعة مديون 50,000$ فبلاش منه النظام ده في مصر ...

لكن الطالب الشاطر جداً يجيله منح من الجامعة و يدرس ببلاش .. اللي شاطر بس مش من الأوائل بيجيله شويه منح من الجامعة و بيدفع الباقي من جيبه أو يدرس و يشتغل .. و الفقير بس برد شاطر و ملقاش منح من الجامعة بياخد منح حكومية و يدرس تقريباً ببلاش .. إلي غاوي بقة و راسه و ألف جزمة إن يروح جامعة يبقى يدفع المبلغ كامل ...

النظام ده أحسن علشان فيه ناس كتير مابترحش جامعة و بتعمل فلوس أكتر مني و منك ..

أحمد العش said...

يا ست نوارة انا بتكلم فى نقطة محددة ، خريجين الكليات النظرية زى الحقوق والآداب والخدمة الاجتماعية بالأعداد الكبيرة دى مشاريع ايه دى اللى تشغلهم ؟ دول اكبر من احتياج اى سوق عمل واى تنمية اصلا ، ومين قال اننا بالغاء مجانية التعليم بنطالب بحرمان الفقير من التعليم الجامعى ؟ بالعكس ، احنا بنطالب بحقه فى تعليم حقيقى ، بدل ما بعد مايضيع 4 سنين فى دراسة الفلسفة يشتغل مندوب مبيعات ولا كول سنتر ، طب ما تعليم فنى للمهن دى يخلص الليلة ؟ وبعدين ليه منعملش زى باقى خلق الله منح تفوق مجانية ؟ تفوق دراسى تفوق رياضى تفوق فنى الخ ، بلاش تمسك بالشكل من غير مضمون ، اللى يقرب جنب نسبة العمال والفلاحين ميلزمنيش لو هو مين ، واللى يمس مجانية التعليم جاك مسس فى ركبه ، بالعقل يا فندم :)

OberonSky said...

بالنسبة لموضوع الجيش و المجلس العسكري و اللواء ممدوح شاهين و كدة أنا شايف إنه كان غلطان و مكنش المفروض يتكلم على التلفون إذا كان متنرفز

المهم دلوقتي مش من حق الجيش إنه يقول الكلام إلي قاله و لا مؤاخذة الناس إلي أخدت صفه من إلي قبلتيهم في الشارع دول للأسف غلطانين و هقولك ليه

الشعب المصري و أولهم المتعلمين علشان متفتكريش اني بقول كدة على الغلابة .. لأ المتعلمين كتير منهم بسبب الحياة تحت النظام ده 30 سنة المفاهيم اتلخبطت عندهم .. و العاطفة المندفعة و العنصرية بقت جامدة .. أنا حسيته لم رجعت مصر .. الناس عامة طيبين لكن العزلة و الوهم بتاع احنا فراعنة و أهم شعب عربي و و و خلا الناس أولاً دايماً متوقعين الوحش من الناس إلي مش مصريين .. و بقى عندهم عقدة عكس الخواجة .. يعني زمان الخواجة كان كل حاجته حلوة .. انقلبت بقت أي حاجة من برة وحشة و مؤامرة و إستعمار إلخ إلخ

تاني حاجة انهم لسه محتاجين كبير سواء كان مبارك و دلوقتي الجيش .. و أديكي شايفة بتوع اسفين يا ريس .. يعني بعد ما بالعافية طالعنا مبارك مسك في إلي بعده هو الجيش و بقوا يدافعو عنه حتى و هو غلطان زي إلي حصل امبارح من اللواء شاهين و من التعذيب و الضرب و الكلام إلي انتي عارفة و حصل من الشرطة العسكرية .. يعني بصراحة كدة .. ناس كتيرة و أولها المتعلمين محتاج توعية فكرية و سياسية

و اوعي تقولي لأ الشعب وعي و و و .. فيه و فيه بس نسبة المغيبين و إلي مدخلين العاطفة في المنطق كتير و إلي بيدافعو عن "رمز" البلد أو "رئيس البلد أو كبير البلد سواء كان صح أو غلط برضو كتير

مفيش منع اني احترم الجيش و انتقد المجلس الأعلى .. أو احب الجيش و اشيد بوطنيته و برد أبهدل ظباط الشرطة العسكرية على قلت الأدب إلي عملوه .. أو أموت في الجيش ولهاً و في نفس الوقت أقول الحق إن فلان أو علان من قادة الجيش كان صاحب المخلوع ..

الحياة مش شرشر أو طور طور .. يا إما أحب الجيش بلا تفكير يا إما انقلب عليه .. العقل مطلوب .. و جزء كبير من الشعب المصري محتاج توعية .. و أنا كمان و انتي و كل الناس .. مفيش حد بيبطل يتعلم طول ماهو عايش .. فمع بالك بالناس إلي عاشت في ظلام و قهر سنين ...

محمد طنطاوي said...

أنا مع مجانية التعليم الجامعى لكن مع دعم أكبر للتعليم الفنى ومحاولة القيام بتطويره إى نحو يرقى للتعليم الجامعى بل وينافسه احيانًا

dr_abdog said...

اجمل مقاله قريتها للصريحه والجريئه نواره نجم.... بصراحه احيي فيك شجاعتك وتفكيرك المنطقي ...وانا متفق معاكي -كالعادة -في كل اللي قولتيه
واحب اضيف شوية اقتراحات :
أولا : يتم تطبيق ضريبه تدريجيه متزايده على السجائر والخمور ده هايخلي ناس كتيره تبطل القرف ده والدوله هاتستفيد من الفلوس دي لتنمية القطاع الصحي
ثانيا:موضوع الطبقيه ده نتيجة الاعلام اللي كان على مدى ال 40سنه الاخيره بيزن على ودان الناس بنظرية (انا اكثر منك مالا واعز نفرا)وبردوا ساهم في الموضوع ده فساد الاخلاق وغياب قواعد الدين الاساسيةوجوهره والاكتفاء بالمظهر في التدين والتعصب المقيت
انا شايف ان الموضوع ده مش هاينتهي الا لما الاعلام والجوامع والكنايس تركز على نقطة المساواه دي بجد وان يكون الناس اللي حاكمينا قدوه في الموضوع ده باننا نلاقيهم موجودين معانا في المدارس والجامعات والمستشفيات وفي كل المصالح الحكوميه
ثالثا:بالنسبه لموضوع العمال والفلاحين ده:انا رأيي انه لما تبقى الانتخابات نزيهة هايصلح نفسه بنفسه بمرور الوقت لأن الناس مثلا لو انتخبت واحد منهم مره على اساس القبليه والمجاملات والكلام اللي بيتقال ده ...لو الشخص اللي انتخبوه ده عك الدنيا ولا سرق ولا عمل اي حاجه غلط مش هايشوف البرلمان تاني لحد مايموت لأن الناس مش هاتنتخبه تاني والناس مابتنساش على فكره ...وأنا ليا نظريه كده:(ان الديمقراطيه حتى لو جابت واحد مش كويس احسن ميت مره من الديكتاتوريه حتى لو جابت احسن واحد في العالم)...

أحمد العش said...

وبعدين يا نوارة مش عاجبك البسطويسى عشان قال اللى مقتنع بيه ومحاولش ينافق الرأى العام ويلعب شعبى زى ما غيره عمل ؟ راجعى نفسك انتى عارفه البسطويسى كويس !

Eng.Tamer said...

يا بنت الناس الطيبين

انتى بتناقضى نفسك و عمالة تشتمى فى اللى بيعارضك و مش عايزة تبسطى للموضوع كله من برة

ايه علاقة الطبقية بأننا بنرفض (( فرض )) نسبة معينة للعمال و الفلاحين

انتى على حسب كلامك ان مصر نصها عمال و فلاحين يبقى اكيد هيختاروا واحد منهم صح

يبقى كله بقى يرشح نفسه من غير ما افرض نسب و تناسب ... والله حتى لو مجلس الشعب بقى 100% عمال و فلاحين مش هتفرق طالما ده اختيار الشعب

كل بلاد العالم الفقيرة و الغنية فيها عمال و فلاحين و فقرا و اغنيا ...بس مفيش بلد فى الدنيا اخترعت بدعة ان لازم العمال و الفلاحين يكونوا 50% دى

طيب انا بطالب ان الناس اللى معاهم دكتوراة يتساووا بالعمال و الفلاحين ... وي بقى نص مجلس الشعب عمال و فلاحين و النص التانى ع الاقل معاه دكتوراة ...مبسوطة كدة ؟

Sherif said...

المجانية لغاية ثانوى خق مقدس لا أقبل مجرد مناقشته. المجانية فى التعليم العالى أقبل فيها الكلام, وأنا شخصيا أتمنى إن التعليم العالى يتاح بالمجان, لكن للجميع, ولا للى يعرف قيمته وينتفع منه وينفعنا معاه؟ إيه الهدف من التعليم العالى؟ إتاحة الشهادات للجميع عشان ما حدش أحسن من حد؟ طيب مش هى دى والنبى الطبقية بعينها (اعتراف ضمنى بأن الخريج الجامعى "أرقى" من الذى ليس كذلك, أيا كانت نوعية المعرفة التى حصلها)؟ سيبنا من العالى دلوقتى وخلينا فى غير العالى: إقامة نظام تعليمى حكومى مجانى شامل (يعنى خالى من التصنيفات الغبية تجريبى ومميز وقومى ومش عارف إيه) ورفيع المستوى يجب أن يكون هدف أى حكومة محترمة, وهو هدف ضرورى لإنقاذ مصر حاليا وإيجاد مكان لها فى عالم تحكمه منافسة قطع الرقاب. والبرادعى قال فى إحدى تويتاته الأخيرة: برنامجى هو التعليم والتعليم والتعليم, كررها ثلاثا. لكن برضه الموضوع مش بالبساطة دى والنوايا الطيبة وحدها لا تكفى (ولا الأيديولوجيات الطيبة). إليكم هذا المثال: لو استطعنا فى ظرف 5 سنين كما تقول نوارة (وأنا مؤمن بأننا نستطيع, ويجب أن نفعل) تحويل التعليم الحكومى إلى تعليم حقيقى وراقى, يغرى أبناء الطبقة المتوسطة بنقل أبنائهم إليه, فمن أين يتعيش مئات الآلاف اللى شغالين حاليا فى "بزنس" التعليم الخاص؟ (ملحوظة: أنا طبيب بمستشفى حكومى, أستكمل دخلى بالترجمة, وزوجتى مدرسة تربية فنية [يعنى رسم, مبتديش دروس] بمدرسة حكومية, وعلاقتى الوحيدة بالتعليم الخاص هى أن ابنتى الوحيدة تدرس بمدرسة من المسماة مدارس اللغات).

Early bird said...

من غير قطع كلامك فكرتينى بالزغد المحترم اللى اخدته من ابويا وانا صغيره لما كنت فى سنه سته وكان شهاده وكنا طالعيين من مدرستنا فليقت مدرسه اعدادى خاصه فقلت لمجرد الدردشه يا ريت يا باباتدخلى المدرسه دى قام ادانى حته زغد وقالى ليه هو انتى ناويه متجبيش مجموع المدارس دى للفشله انتى تدخلى السنيه او الفلكى وكلاهما حكومىوبعديين هو احنا قليلين ده الفلوس اللى اتسرقت مننا فى الكام سنه الاخرانيه بس يصرف على كام دوله جنبنا كمان

Early bird said...

من غير قطع كلامك فكرتينى بالزغد المحترم اللى اخدته من ابويا وانا صغيره لما كنت فى سنه سته وكان شهاده وكنا طالعيين من مدرستنا فليقت مدرسه اعدادى خاصه فقلت لمجرد الدردشه يا ريت يا باباتدخلى المدرسه دى قام ادانى حته زغد وقالى ليه هو انتى ناويه متجبيش مجموع المدارس دى للفشله انتى تدخلى السنيه او الفلكى وكلاهما حكومىوبعديين هو احنا قليلين ده الفلوس اللى اتسرقت مننا فى الكام سنه الاخرانيه بس يصرف على كام دوله جنبنا كمان

الوصيف خالد said...

ياااه يا نوارة.. حمد الله على السلامة يا شيخة !

أرجوكي بقى خليكي كدة وسيبك من الخط الفاكس بتاع الدفاع عن الجيش علشان كلمتين مالهومش لازمة قريتيهم في ويكليكس..

حاسس إن المدونة ردت ليها الروح تاني..

نوارة اللي أعرفها ما بتجاملش حد وما بتقولش كلام مايع وخيبان تدافع بيه عن الغلط..

يسلم بقك يا قمر..

Unknown said...

أولا : بقول لحضرتك ان دموعك غالية علينا والله يا أستاذة نوارة

ثانيا : كلامك فيه حِكَم ، ويمكن أكتر حاجة لفتت نظري هيا حاجة مهمة جدا وجوهرية ويمكن مصيرية كمان وهيا موضوع التربية

ثالثا : بخصوص التربية ، كلامك ده فكرني بكلام قلته قبل الثورة في ظروف معينة أقتبس منه التالي


مع الأسف ده فعلا جزء من الواقع اللي بنعيشه

تضخمت القيم المادية البحتة في حياتنا
وساهم الإعلام الاستهلاكي التافه المبتذل في تضخيمها
ومعاه الأداء الحكو... إحم

في الوقت الذي غُيبت فيه قيم الإسلام السامية -التي كثيرا ما نتحدث عنها- من واقعنا وحياتنا العملية

وكانت هذه هي النتيجة

تعظيم الأنا والمصلحة الشخصية والإنتفاعية والانتهازية ولو على حساب الآخرين

المشكلة ان ده مابقاش طبع عند جيل معين ، ده بقى تربية وأسلوب حياة بنورثه من جيل لجيل

الطفل المصري الهمام أول ما بيفتح عينه على الدنيا -خصوصا من سنوات قليلة سابقة- يتلقفه إعلام هايف بمعنى الكلمة لا ينمى إلا التخلف العقلي إبتداءا من بوجي وطمطم مرورا بالمسلسلات والأغاني والفوازير الهابطة وانتهاءا بالأفلام المبتذلة الساقطة

ويجد هذا الطفل -الذي لا يزال هماما- نفسه وسط أسرة تنمي فيه تقديس المادة والماديات

إوعى يابني يكون فلان ابن فلان أحسن منك ، ماتسمحش لنفسك ولا لأي حد إنه يكون أحسن منك ، ليه هوه انت ناقص ايد والا رجل

اللي تغلب بيه إلعب بيه ، مش مهم قوي يعني لو فيه شبهة حرام ، فالضرورات تبيح المحظورات ، وإنك تاخد حقك -ولو ماكنش حقك- فإن ده ضرورة

ولازم تاخد حقك بإيدك ، اللي ظلمك إظلمه واللي غشك غشه واللي خانك خونه والبادي زبادي

وخليك ناصح ومفتح تاكل ملبن ، إوعى تكون طيب تتسامح بسهولة كده

وبعدين يجد هذا الطفل الذي أصبح شابا -وفقد أي أثر للهمة- نفسه وسط مجتمع يشجعه على الاختلاط بالجنس الآخر وينمي فيه أن فوزه الحقيقي أن يمتلك المال ويعتلي المناصب ويفوق غيره في المظهر ويكون معظّما في أعين الناس ، وينفره بل ويخوفه من الإلتزام بالدين بل ويهمش دور الدين وأثره في الحياة مرددا بأن الدين في القلب

يعني الإنسان المصري يتعرض منذ طفولته لمتسلسلة من الطفرات
وساعتها ينشأ بكل أسف إنسان مشوه نفسيا بكل معنى الكلمة

والنتيجة الطبيعية هي انتشار الفساد والرشوة والمحسوبية والأنانية والسلبية ومختلف الممارسات الخاطئة

آسف لأن الصورة تبدو رمادية بل سوداء وليست الصورة كلها طبعا كذلك فلا يزال ولن يزال الخير في المسلمين والحمد لله رب العالمين

مع الأسف معدلات الفساد في الدول العربية عالية وبيبقى أغلبها متصدر قائمة الفساد في التقارير الدولية
ولسه امبارح تقرير الشفافية اللي عاملاه منظمة الشفافية الدولية لم ينجح في تعدي نمرة 5 من 10 من الدول العربية إلا ثلاث دول هي الإمارات وعُمان وقطر

-----------------------------


الأعراض المرضيّة في الطبقة المتوسطة اللي ذكرتيها فكرتني بالكلام ده اللي هو يمكن كان يصاحبه شعور محبط نوعا ما من الحالة اللي كانت البلد وصلت لها قبل الثورة

طبعا الكلام اللي كنت قلته ده لا ينطبق على طبقة معينة بالذات من الناس دون الأخرى ولا معناه ان الناس عموما مش كويسة

وطبعا ماقصدتش بالانسان المصري هنا المصريين كلهم ، لكن قصدت ان أسلوب التربية ده موجود عندنا زي ما أظن انه موجود في أي بلد تاني

وفي صحيح مسلم عن رسول الله صلى الله عليه وسلم
إذا قال الرجل : هلك الناس ، فهو أهلكهم

negmat lail said...

-أنا معاكي في كل اللي بتقوليه واول حاجة لفتت نظري و لم تعبني في خطاب هشام البسطويسي هو موضوع مجانية التعليم بس لي بعض التعليقات على باقي الكلام:
- "دي حتى مش طبقية الناس الشيك ولا طبقية الارستقراطية الانجليزية اللي ما تبانش من كتر ماهي معمولة بشياكة" يا سلام حلو اوي الكلالام الطبقي ده عاجبك الطبقية اللي مش باينة ومش عاجبكالطبقية الباينة ..يا سلام سلم ...
- "والله لو المرشح نازل لي من السما مع اتنين ملايكة.. حارميه من الشباك"
بيتهيالي ده وصف حد ربنا باعته حترميه من الشباك ازاي ؟؟ ما يصحش
-"لشعب المصري مش محتاج توعية" زي ما الطبقةالمتوسطة الغلاوية دي نظام مبارك نضح عليها ..كمان كل فئات الشعب نظام مبارك نضح عليه :المثقفين و الأميين والأثرياء والفقراء كلهم عايزين توعية المهم محدش يتنطط على حد
- وبعدين عايزة اعرف لماذا قطع الارسال المباشر عن مؤتمر القوات المسلحة قبل سماع الأسئلة ؟؟؟ لمن يتبع التليفزيون ؟؟؟ فيه ناس بتقول الجيش مكسوف يطلع على الهوا و انا بقول مؤامرة ضد الجيش ومذيع بيقول الجزء ده ممنوع يتذاع ..

OberonSky said...

http://www.youtube.com/watch?v=Qw4x-bH6-YA

اللنك إلي فوق دة فيه فيديو من بعض لحظات الثورة والشعب كله في الشارع بيحارب القمع ... أنا بكيت لما شفت الفيديو ده .. و افتكرت إن الشعب ده إلي كان شجاع و واجه الموت من غير خوف ما يتخفش عليه .. فين أيام اللبراليين و السلفيين بيحاربو في خندق واحد ضد الحزب الواطي و بلطجيته .. احنا ابتدينا ننسى الأيام الحلوة ديه إلي الواحد كان حاسس فيها بالتفاؤل رغم الهجوم علينا من كل ناحية ..

سيبكو من المجلس و الجيش و الطائفية و الفرقة و المؤامرات و الخوف من المجهول ... كل ده لا يودي ولا يجيب .. الشعب ده هو إلي قام لوحده و عمل المستحيل .. ربنا معنا بكرة .. خلونا ايد واحدة .. متهتموش بحد غير اخواتك إلي وقفين جنبك في الميدان .. و مهما كان إلي وقف قصدكم .. هتنتصرو بإذن الله

Amr Omar said...

لازم نحافظ على نسبة العمال و الفلاحين و الا كأننا معملناش حاجة المجلس كده هيبقى أغلبه رجال أعمال و دول مصالحهم معروفة ، لكن ممكن يتحط ضوابط لموضوع العمال و الفلاحين

الفلاح اللي يملك أكثر من 7 فدادين لا يسمح له بالترشح
و لازم يكون عضو في نقابة الفلاحين و على حسب ما عرفت أن النقابة الجديدة دي هتحط شرط أن أقصى حد للعضوية 10 فدادين

اللي عنده اكثر من 10 عمال مش من حقه يترشح عمال

و الحد الأدنى للتعليم يكون الثانوية العامة و ما يعادلها .. بدل موضوع محو الأمية العبيط ده

أما الناس اللي بتقول أن التعليم المجاني لغاية ثانوي فقط بقول ليهم فرنسا و السويد التعليم عندهم بالمجان من المراحل الأولى لغاية الجامعة ، التعليم لا يمكن يكون طبقي و الحجج العبيطة اللي عمالين يتكلموا عنها اللي عاملين نفسهم نخبة دول عبيطة ... دي فرنسا بتعمل حاجات فوق الوصف خصوصا في التأمين الصحي ... ده الدكتور بيجي لغاية البيت عندك لو كنت عيان و مش بتدفع مليم ، و اللي متجوزين جداد الحكومة بتقدم ليهم خدمة أسمها مساعدة الأم لأول مرة ... بتقدم الأسرة أو الأم اللي بتخلف لأول مرة طلب صغير من غير ورق دمغة و لا حاجة علشن يبعتوا ليها واحدة تساعدها في شغل البيت و التنضيف و غسيل الهدوم و ده كله بالمجان ... شوفوا الحكومات اللي بتقهم بتعمل أيه و أتعلموا

Unknown said...

لا.. ايه القرف ده؟

ايه القرف ده؟

ايه القرف وضيق الافق ده؟

خلاص، كل واحد فيكم ما يدخلش ابنه جامعة

خالص

اياك اشوف حد من اللي عايزين يعملوا الجامعة بفلوس دخل ابنه جامعة

ما الست من فرنسا دخلت اهي وقالت لكم فرنسا التعليم كله مجاني بما فيه الجامعة والتعليم الصناعي شغال وزي الفل

لأن فيه مشاريع تشغل دول وتشغل دول

وايه التناقض ده؟ انتوا منين بتشتكوا من الشعب انه مش عارف ينتخب عشان جاهل ومنين مش عايزين تعلموه عشان خسارة في جتته الجامعة خليه يبقى سنكري احسن

حسبي الله ونعم الوكيل
حسبي الله ونعم الوكيل
حسبي الله ونعمل الوكيل
بصوا..

يا رب يا رب يا رب اللي عايز يلغي مجانية التعليم يصحى الصبح يلاقي كل ما يملك من مال راح منه ويفتقر فقر السنين وربنا يرزقه بعيل ولما ما يقدرش يعلمه نشوف احساسه ايه

بس كده

خلتوني ادعي من الحرقة

Unknown said...

واللي قرفان من الفقرا وعايزهم يفضلوا زي ما هم ما يجيش هنا تاني

بس

انا الفقرا عندي زي المادة التانية عند السلفيين كده

Unknown said...

مرات بواب العمارة اللي جنبنا قالت لي: ابني كان نفسه يخش شرطة، ما دخلش عشان شغلتنا مع اننا لسابع جد في الصعيد ما نعرفش غير ربنا، وابن اشهر تاجر مخدرات في بلدنا هو اللي دخل عشان معاه فلوس

هو ده اللي انتوا عايزينه مش كده؟ ان خريجين الجامعة يبقوا ولاد الوسخة

محمد نور الدين said...

ست الكل مساء الخير
نصوص فلسفية من فلسفة نوارة

مثقفين واساتذة جامعة!
طب دي طبقية قذرة.. مش طبقية بس، دي طبقية قذرة

لكن ماحدش اخد باله من مرض الطبقية القذرة اللي اصاب كتير من الطبقة المتوسطة اللي طول النهار يقولوا احنا المتعلمين احنا اللي حننضف البلد احنا اللي حنعل نهضة

والطبقية القذرة دي كانت باينة من ساعة الاستفتاء وماحدش اخد باله منها


مش قصدي اشتم، قصدي ان الطبقية دي حقيرة، يعني ايه طبقية حقيرة؟ يعني طبقية واطية، يعني قليل الاصل الواطي بس هو اللي يتكلم بطريقة



دي حتى مش طبقية الناس الشيك ولا طبقية الارستقراطية الانجليزية اللي ما تبانش من كتر ماهي معمولة بشياكة.. دي طبقية الناس اللي اشتروا فيلا من فلوس المخدرات وبيرموا قشر البرتقان على السجادة الشينواه ومعلقين ملابسهم الداخلية على دراع تمثال فينوس

ما ينفعش تقول الشعب جاهل ومش حيعرف ينتخب الا اذا كنت معلق ملابسك الداخلية على دراع تمثال فينوس،


ومن موئعي هذا باقول للطبقة المتوسطة... انت عيانة يا حبيبتي.. ربنا يشفيك، بس مافيش دكتور حيقدر يساعدك لو انت ما ساعدتيش نفسك.

لما تروقي وتهداي وترتاحي أناقشك لأن كلامك فيه خلط كبير حتى لا أقول جهلا واسعا بقضايا التربية و التعليم . وهذا الخلط وفّرت له تغطية جوية بكم هائل من السب و الشتم لمن يحاول الرد . لقد فهمت جميع أنواع السب و الشتم إلا نوع واحد أضحكني كثيرا وهي حكاية : معلق ملابسك الداخلية على دراع تمثال فينوس،

شوفي يا النوارة هناك فرق كبير وشاسع بين ديمقراطية التعليم ، و مجانية التعليم ، وتكافؤ الفرص ، وتنظيم التعليم. و الخبراء في قضايا التربية و التعليم يميزون بدقة متناهية بين هذه المفردات .
شوفي يا النوارة جدك العظيم الأستاذ الإمام محمد عبده تطرق لهذه المسالة في منتصف القرن التاسع عشر ولما تعودي إلى نصوصه تجدينها تملك راهنية كأن الرجل كتبها اليوم .يعني أزمة التعليم في الوطن العربي قديمة وأي نهضة حقيقية يتعذر قيامها بدون ثورة حقيقية في التعليم .


ورغم كل السيل الهائل من التهم و السب و الشتم ستظلين أجمل وأروع نوارة

negmat lail said...

الناس اللي بتقول ان يكون الجامعي مش عارف بمنحة تفوق وبعدين يقولولي منحة فقر وبعدين بحث فقر طيب ما هو لو فقير ممكن عشان بيشتغل تفوقه يقف عشان فقره طيب يعمل ايه ..وبعدين مين قال ان اللي يدفع يبقى احسن من اللي معهوش ...انا معاكي اللي مش عاجبه مجانية التعليم و الفقرا بره بره محدش يتنطط على حد يا ريت .. بس انتي باه بتقولي لو مفيش حد عاجبك ميه الميه مش حاتنتخبي اصلا .. طيب اصلا ليه الرئيس يمشيني على هواه ليه يعني ما يكونش موظف وينفذ اللي الشعب يقول عليه ولو فيه حاجة غلط يتعدل ..ليه ما يكونش فيه خطة وطنية لمصر كل اللي يجي ينفذها ..ما نكونش على مزاج حد..يجي يخربها يجي يعدلها؟؟؟

Amr Omar said...

ست أيه يا نوارة صحيح أنا بحلق شنبي بس لا معتز بجنسي و عايش في مصر .. بس سافرت و شوفت


ههههههه حرررام عليكي

عدلي بلاش فضايح و بلاش نتنشري التعليق ده

Eng.Tamer said...

لا حول ولا قوة الا بالله ....

نقول تور يقولوا احلبوه ..... يا انسة نوارة هانم .... ايه علاقة الفقرا و مجانية التعليم بانى مجلس الشعب يكون (( اجبارى )) فيه 50% عمال و فلاحين

انتى كدة بتلغى اهم شرط فى المواطنة و هو المساواة ....يعنى انا بطالب ان العامل و الفلاح و الدكتور و المهندس و السباك و النجار كلهم مواطنين ليهم نفس الحقوق و الواجبات

مميزش طبقة عن طبقة .... شرط ال 50% عمال و فلاحين ده اسمه تمييز و تعسف .....لان بوجود ديمقراطية حقيقة اى حد ممكن يرشح نفسه مهما كان تعليمه او ثقافته او مستواه المادى ...

وقتها هختار اللى انا مقتنع بيه لانه اختيارى ...مش هحس انى اخترت واحد لانه مفروض عليا انى اختاره


وصلت النقطة ولا برضه هتحسبنى على الناس اللى بتعارضك تانى ؟؟؟؟

د/ حوريه عبدالقادر said...

أخت نواره أنا مختلفه معاك في مجانيه التعليم بس اسمعيني الأؤل. إذا مصر تحلم بتعليم جامعي بمستوى بريطانيا مثلا، لازم تأخذ هذا النموذج. في بريطانيا كان التعليم مجاني، قبل سنين ولكن عندما بدأت الحكومه البريطانيه تري غير ذلك ، واصبح التعليم غير مجاني، وهاجم معارضين الفكره بنفس مبدأك إن التعليم سيكون حكر للأغنياء، ولكن هذا ليس صحيح. في بريطانيا كل طالب جامعي لابد أن يدفع رسوم الجامعه، ولكن بقرض توفره له الحكومه، وبعد التخرج، وان يشترط أن يتوظف براتب معين كحد أدني، يتم بعدها سداد هذا القرض، وفواده تكاد تكون لا تذكر.



ماذا يفعل هذا، تزيد اهميه التعليم الجامعي، تم كل كم سنه، ترجع هذه الأموال للدوله، تزيد ميزانه التعليم لتكون باعلي مستوي. إذا كل الدول المتقدمه بتقول إن التعليم المجاني مش جايب همه فمصر من باب أولي انها تخطو هذه الخطوه. وبعدين مجانيه التعليم لحد ثانوي ضرورره بس بعض كده الشباب لازم يرجعو جزء للبلد.

Um Moa's said...

المشكلةاننا عايزين نطبق القواعد الغربية فى التعليم وزى ما امريكا عاملة اغلى جامعات امريكا هى من يتخرج منها القادة والنخب السياسية والاقتصاديةوغيرهوباقى الشعب خريجى المدارس الحكومى هو الذى يخدم على هذة النخبة ولو حصل وواحد استحق منحة مجانية للجامعة بيبقى بعد ما طلع عينه ولازم يبقى عبقرى علشانده يحصل وفى الاخر برده عمره ما حيدخل دايرة اتخاذ القرار فى امريكا

Um Moa's said...

اولا يا نوارة بطلى تدعى على الناس ادعليهم احسن بالهداية والسداد فى الرأى
ثانيا انا معاكى فى موضوع مجانية التعليم
لان المشكلة اننا عايزين نطبق النموذج الغربى بكل عيوبه فى الغرب على قد علمى دايرة اتخاذ القرارمحصورة فى النخبة والصفوة ودول ليهم جامعاتهم الغالية جدا التى تخرج الساسةوالقادة وباقى الشعب تركوه يتعلم زى ما هو عايز لانهفى الاخر يخدم عليهم سواء طبيب والا مهندس والا زبال وهما الى فى ايديهم القرارت والسياسات العامة

qqq said...

بصراحة يا نوارة أحيانا أرائك بتكون مبنية على معلومات لا تتعدى كونها إشاعات، يعني مثلا نقدك للسلفيين غير موضوعي بالمرة و متأثر للغاية بلإعلام الموجه و الدعاية السوداء، و عشان أكون واضح أكثر ممكن سيادتك تديني تعريف واضح للسلفيين مين همة؟ و أكاد أجزم إن تعريفك للسلفيين لا يتعدى التعريف السطحي اللي الفضائيات بتحاول ترسخه و هو إن السلفي هو أي حد ملتحي و لابس جلابية و معاه سواك. بصي يا نوارة أنا أرجو منك التمهل و عدم التسرع في الحكم علي الأشياء و الحكم عليها بطريقة حدية، أبيض أو أسود علي طريقة ذوات الأربع أخيار و ذوات الاثنين أشرار كما ذكرها جورج أرويل في مزرعة الحيوانات، مع ملاحظة إن دية تاني مرة أطلب منك نفس الطلب بالتمهل و الحرص على إتزان تصريحاتك لإنك شئتي أم أبيتي أصبحتي رمز. و المرة الأولي كانت لما نشرتي نقد لاذع للجيش، عموما يا نوارة أنا لفت وجهة نظري و خلصت ضميري و لو عايزة أي معلومات أكثر عن السلفيين ممكن أساعدك بمعلوماتي المتواضعة‘ يالا كفاية كدة تعبت، سلام. ملحوظة: شوفي الرابط التالي لأحد رموز السلفية:
http://www.youtube.com/watch?v=DMy0C27BL2o&feature=feedf

Early bird said...

انا عايزه اعرف كام واحد هنا اتعلم تعليم خاص وبعديين زى ما المدراس الحكوميه فيها ناس دون المستوى المدارس الخاصه كمان فيها ناس دون المستوىوانا قصدى المستوى الاخلاقى طبعا وبعديين اللى كان فى المجلس ده لاكان عمال ولا فلاحيين دول كانوا حراميه اتجمعوا على بعض واعتقد ان فتحى سرور وصفوت الشريف وزكريا عزمى يعتبروا من الناس المتعلمينن المثقفين وهم اللى حولوا االلى فى المجلس لبصمجيه واللى فى رئاسه الصحف القوميه دول زبده المجتمع وخلاصه الفكر والثقافه ودول متقلعموش من رجلك وطبعا مش حننسى دور التلفزيون المصرى الرائدوالناس المثقفه المنشيه اللى كانوا بيكدبوا دون ان تطرف لهم عين فلو كان هو ده العلام فمرحبا بالجهل
احنا شعبنا يا جماعه واعى وفاهم والجهل مش انك لا تقرا ولا تكتب علشان ظروفك كده الجهل هو الغباوه والمصرى عمره ماكان غبى

Early bird said...

انا عايزه اعرف كام واحد هنا اتعلم تعليم خاص وبعديين زى ما المدراس الحكوميه فيها ناس دون المستوى المدارس الخاصه كمان فيها ناس دون المستوىوانا قصدى المستوى الاخلاقى طبعا وبعديين اللى كان فى المجلس ده لاكان عمال ولا فلاحيين دول كانوا حراميه اتجمعوا على بعض واعتقد ان فتحى سرور وصفوت الشريف وزكريا عزمى يعتبروا من الناس المتعلمينن المثقفين وهم اللى حولوا االلى فى المجلس لبصمجيه واللى فى رئاسه الصحف القوميه دول زبده المجتمع وخلاصه الفكر والثقافه ودول متقلعهومش من رجلك وطبعا مش حننسى دور التلفزيون المصرى الرائدوالناس المثقفه المنشيه اللى كانوا بيكدبوا دون ان تطرف لهم عين فلو كان هو ده العلام فمرحبا بالجهل
احنا شعبنا يا جماعه واعى وفاهم والجهل مش انك لا تقرا ولا تكتب علشان ظروفك كده الجهل هو الغباوه والمصرى عمره ماكان غبى

Early bird said...

عارفه من ضمن الحاجات اللى بوظت مجانيه التعليم اللعب فى الثانويه العامه كانت مسابقه واللى بيداكر فيها كان بينجح دون النظر للون او الدين او الجنس دخل بقى فيها اللعب والتحسين والتجميع والتزبيط واللى معاه فلوس الدروس يعدى واللى معهوش ميلزموش ولان فلوس الدروس حلوه فالمدرسيين بيزوغوا من المدارس والطلبه كمان فى الفتره الاخيره كانت اخر سنه فى المدارس انتظام هى اولى ثانوى بعد كده الفصول فاضيه سواء بقى تعليم خاص او عام نفسى ترجع الثانويه العامه بتاعه زمان اللى هى سنه واحده وكان اللى بيطلع الاول فيها بيكون داكر على لمبه جاز

Ahmed . M . Abdulrahman said...

قال طه حسين : التعليم كالماء والهواء

لا رقى بلا علام الخلاصه المجتمع تمزق من اوصاله فظهرت الاحزاب الاجتماعيه المصنفه للافرادعلى حسب ما يملك فى حسابه فى البنك

وهذا خطر كما ان الغرب قد صدروا لشبابنا الاحباط والجهل

هل تعلم ان عمليه التفكير الواحد تعادل فى قوتها انفجار قنبله نوويه

ان التعليم ينير البصيره ويجلى الغشاوه وبا لتعليم تنهض الامم

والمشكله فى العصر السابق ان مبارك لم يكن يستغل الفرد كقوه مثلما فعلت اليابان بعد الحرب العالميه الثانيه

الفرد نصف المتعلم خير الف مره من فرد خاهل

ولاكن علينا اولا ان نعلم ما معنى كلمه متعلم

التعلم هو اكتساب مهارات حياتيه مختلفه تؤدى الى الرقى الذهنى مما يودى القدره على الابداع الفكرى

ويمكن لعامل النظافه ان يكون متعلم
ويمكن للسمكرى ان يكون متعلم
ويمكن للسباك ان يكون متعلم

لذلك علينا تقديم كل الفرص بلا تخاذل ولا هواده

حتى لا نبكى على اللبن المسكوب

واستطيع ان اخبرك بان المرحله القادمه ستحتاج الاف بل ملاين المتعلمين للنهوض بالدوله

تحياتى

ITHat said...

هي بقت كده سيا نواره اللي يختلف معاكي تدعي الله و تقليله ميجيش هنا تاني ... مكنش العشم
و الله يسامحك

الشبكة المستقلة said...

نوارة حبيبة البي
انا و الله بحبك و بحب ليكي الخير بس المرة دية الظاهر كنتي مش نايمة كويس و كلامك فية اخطاء كتير
انا مدير و بيشتغل معاية موظفين و بتعامل مع كل الطبقات
بعامل الغلابة احسن مليون مرة ما بعامل المديرين واي مدير و صاحب صطوة بعيش علية الدور و الفقير بحسسة انة ملك و على فكرة دة للاسف أخدتة من تعاملي مع الاجانب و كان عندي نفس الامراض اللي بتحكي عنها و ربنا شفاني و الحمد لله
بس فية آراء كتير بخصوص الدستور 50%عمال و 50 % فلاحين و مجانية التعليم شايف فيها اخطاء كتير و يا ريت نسيب المواضيع المعقدة و اللي عايزة مناقشات مجتمعية و خبراء لوقتها و كمان انا مش عايزك تتحيزي لفئة دون الاخرى
و حديكي نصيحة كمان
انا اشك اذاً انا موجود
دية حكمة من تأليفي
و انا بحترم الجيش و كمان الشرطة (دة طبعاً مش حيعجبك) و بحترم اي واحد بيحترم نفسة و بيحترم الناس , بس دة ما يمنعش ان لو حد فيهم غلط لازم نحاسبة و الثورة دية ثورة الشعب و ما حدش عمل فينا جميلة و دة لو هو مننا ,
الشعب عارف مصلحتة طبعاً , بس الجوع كافر و سيدنا على قال(لو كان الفقر رجلاً لقتلتة) و مافيهاش مشكلة لو نوعي بعض, انا وصلت للي انا فية باخلاص النية و بصحابي اللي قرفوني من كتر النصيحة و كنت بسمع لهم و ما بزعلش
معلش ما تزعليش مني بس انا يصعب علية انك تتغلطي و يا ريت نركز في المتفق علية و نترك ما نختلف فيةبعد ما نوصل البلد لبر الأمان و بعد كدة نقعد نقطع في بعض على راحتنا
ربنا يهديكي و يهدينا للحق
صحيح لو عايزة موقع على الانترنت انا ممكن اساعدك من نواحي كتيرة و كمان بأشياء نادرة

Feuercheval said...

شوفي هوه مش أنا مفروس منك عشان مش مقدرة حقيقة الوضع الحالى فيما يتعلق بالنوايا الحقيقية لقيادات الجيش لكن ده لا يمنعني اني انحني احتراما للمقال ده ولصاحبة المقال ده من الاخر كده انت بني ادمة ربنا منورلك قلبك عشان كده فاهمة بالسليقة كلام زوربا لصاحبهالمثقف لما قاله ان الكون ده كبير جدا بس مع كبره ده ضيق علي ربنا قلب الانسان بس على صغره هو اللي بيساع ربنا فاوعي تجرح قلب اي انسان (وخصوصا الفقير لانك بكده بتحارب ربنا)

بهذا المفهوم شي جيفارا في الجنة دلوقتي مع انه ماركعهاش بهذا المفهوم التشيع في جوهره (اذا شيلتي منه الكلام الفارغ بتاع الامام الغائب والطقوس الغبية) هو الفهم الاصح للاسلام لانه صرخة ضد طبقية بني امية زمان والاستعلاء الطبقي او الاستعماري في كل مكان بهذا المفهوم الناس الطيبين اللي زيك ولا ري ابراهيم عيسي حينفض الناس من حولهم اول ما يعرفوا حقيقة فهمهم الصحيح للدين لانهم مع الاسف الشديد عايزين الدين كمخدر يخففوا بيه الامهم ري ما عم ماركس قال والقليلين جدا منهم اللي فاهمين الدين كما ينبغي ان يكون ثورة ضد الظلم والطبقية ودعوة لزيادة مساحة الحب في قلوبنا لتشمل الكون كله واللي قرا كتابات تولستوي ولا انجيل توماس حيفهم الكلام ده

من مظاهر فساد الفقهاء عندنا كمسلمين ان الحديث يعتبر صحيح اذا تم تلفيق سلسلة مقبولة من الرواة حتي لو كان النص لايتوافق مع روح الدين زي حديث شرب بول البعير وغيره بينما يتم رفض الحديث اذا مالقولوهوش اصل حتي لو توافق مع صحيح الدين انا شخصيا فيه حديث معتمد عندي مع ان غالبية الناس بتقول عليه ضعيف بيقول اللهم احيني مسكينا وامتني مسكينا واحشرني في زمرة المساكين اللهم احشرني وكاتبة المقالة وكل من جعل الله في قلبه الرافة والرحمة مع رسول الله صلي الله عليه وسلم في زمرة المساكين

Feuercheval said...

شوفي هوه مش أنا مفروس منك عشان مش مقدرة حقيقة الوضع الحالى فيما يتعلق بالنوايا الحقيقية لقيادات الجيش لكن ده لا يمنعني اني انحني احتراما للمقال ده ولصاحبة المقال ده من الاخر كده انت بني ادمة ربنا منورلك قلبك عشان كده فاهمة بالسليقة كلام زوربا لصاحبهالمثقف لما قاله ان الكون ده كبير جدا بس مع كبره ده ضيق علي ربنا قلب الانسان بس على صغره هو اللي بيساع ربنا فاوعي تجرح قلب اي انسان (وخصوصا الفقير لانك بكده بتحارب ربنا)

بهذا المفهوم شي جيفارا في الجنة دلوقتي مع انه ماركعهاش بهذا المفهوم التشيع في جوهره (اذا شيلتي منه الكلام الفارغ بتاع الامام الغائب والطقوس الغبية) هو الفهم الاصح للاسلام لانه صرخة ضد طبقية بني امية زمان والاستعلاء الطبقي او الاستعماري في كل مكان بهذا المفهوم الناس الطيبين اللي زيك ولا ري ابراهيم عيسي حينفض الناس من حولهم اول ما يعرفوا حقيقة فهمهم الصحيح للدين لانهم مع الاسف الشديد عايزين الدين كمخدر يخففوا بيه الامهم ري ما عم ماركس قال والقليلين جدا منهم اللي فاهمين الدين كما ينبغي ان يكون ثورة ضد الظلم والطبقية ودعوة لزيادة مساحة الحب في قلوبنا لتشمل الكون كله واللي قرا كتابات تولستوي ولا انجيل توماس حيفهم الكلام ده

من مظاهر فساد الفقهاء عندنا كمسلمين ان الحديث يعتبر صحيح اذا تم تلفيق سلسلة مقبولة من الرواة حتي لو كان النص لايتوافق مع روح الدين زي حديث شرب بول البعير وغيره بينما يتم رفض الحديث اذا مالقولوهوش اصل حتي لو توافق مع صحيح الدين انا شخصيا فيه حديث معتمد عندي مع ان غالبية الناس بتقول عليه ضعيف بيقول اللهم احيني مسكينا وامتني مسكينا واحشرني في زمرة المساكين اللهم احشرني وكاتبة المقالة وكل من جعل الله في قلبه الرافة والرحمة مع رسول الله صلي الله عليه وسلم في زمرة المساكين

assour said...

كتبت رد طويل و فيه كل حشاشة قلبي لكن ضاع و مارضاش البلوج ينشره و بالتالي لن استطيع استعادة حرف منه . انا زعلانة و الله يستر على مصر

mkreem35 said...

النهاردة انا مختلف معاكي تماما بجد موضوع الطبقية ده حقيقي بعيد تماما عننا كمصريين سواء داخل او خارج مص و موضوع التعليم طبعا ده بجد اهم حاجة لابد ان تكون محور اهتمامنا الموضوع امن قومي لا يقل عن مشكلة المياه حقيقي و لو سمعتي الدكتور غنيم طبعا له اراء ممتازة و موضوع المجانية ده محدش بيتكلم فيه من ناحية طبقية خالص و لكن افكار جزء منها اقتصادي زي موضوع التمويل و الناحية الفنية زي شكل المدرسة و عدد الفصول و اعداد الطلبة فيها و امكانيات المدرسين و دخلهم و طبعا نوعية المناهج و حرب مضادة للدروس الخصوصية و هكذا الفكرة لو احنا قلنا مجانا حتي الثانوية العامة و بعدين مجانية الجامعة ترتبط بالمجموع و التفوق بإستمرار في الكلية و المتعلمين بفلوس في المدارس الخاصة لا يتعلموا مجانا بالجامعة هو ده اختيارهم و برضه ممكن اعطاء قروض تعليم ميسرة بفوائد بسيطة لمدد طويلة تسدد بعد التخرج و العمل و هكذا موضوع المجانية يرتبط دائما بالتفوق و تصبح الثانوية العامة مستوي تعليمي يمكن حامله من العمل في السوق زيها زي الدبلومات الصناعية و الفنية

mkreem35 said...

يا نوارة ال50% المقصود منها و المعترض عليها فقط مش نظرة و حشة للفلاحين و العمال ده احنا كلنا عمال و فلاحين بس لما تعرفي ان عز كان نازل عمال و لواءات شرطةكانوا فلاحين الفكرة كلها ان اي حد ينزل المهم هو ايه برنامجه و حيعمل ايه و يطور ازاي مش مشكلة هو بيشتغل ايه انما حنستفيد منه ازاي مش علاقات و شغل لا بمعني دوره في المجلس الرقابي و التشريعي و حيفيد ازاي في حل مشاكل دائرته و كل ده مش مشكلوة خالص شهادته ايه يعني نلاقي واحد عايش في القاهرة او اسكندرية طول عمره و مترشح عن النوبة و عمره ما شافها مش عارف انتي النهاردة خنقتيني بالطبقية الغريبة و كمان فيه ناس بتقول تعليقات غريبة بس المهم اننا مش ضد اي حد و لا عاوزين نهمش اي حد تاني الشعب كله فاق و عاوز ياخد حقوقه كلها و مش حيتنازل عنها ابدا

Ahmed said...

هو الواضح انك بتردي من غير ما تقراي . عامة شكرا لذوقك و الفاظك الجميلة في الرد

ام مصرية said...

ايه الهجوم الكاسر ده على الطبقة المتوسطة الغلبانة ، فيما يختص بنسبة العمال و الفلاحين معظم المعترضين و أنا منهم معترضين على فكرة الكوتة عموما و لو لأى فئةوالا سينتهى بنا الأمر لتقسيم المجلس نسبة للعمال و نسبة للفلاحين و نسبة للمرأة و نسبة للأقباط و نسبة للمعوقين و نسبة للمهندسين .. و الابقاء على هذا النص عبث لأن معظم المستفيدين به ليسوا عمال و لا فلاحين ، و التعليم الفنى هو جزء أساسى من نهضة جميع الدول التى ذكرتيها ، و يجب ان نكف فى مصر عن ازدرائه ، و فى جميع الدول التى ذكرتيها لا يوجد تعليم جامعى مجانى ، و لا توجد كليه تقبل بالآف فقط لارضاء الناس و اقناعهم بأن أبنائهم قد أصبح معهم شهادات جامعية لا تساوى ثمن الحبر التى كتبت به ، و لا يعنى هذا ان أبناء الفقراء ممن يستحقون ( لتفوقهم ) مواصلة الدراسة لن يستطيعوا هذا فالجامعات هناك تحل هذه المشكلة باعطاء المنح و توفير فرص عمل أثناء الدراسة أحيانا داخل الجامعة نفسها و أحيانا باعطاء قروض للطلبة ، التعليم الفنى هو القاعدة الرئيسية لنمو الصناعة لأن الهرم أو المنحنى الطبيعى يجب أن يتكون من عدد قليل من المهندسين و العلماء و الباحثين الذين تعلموا تعليم جيد ( ليس و سط الآلاف )على القمة و طبقة متوسطة من الفنيين و قاعدة عريضة من العمال ،
وهكذا فى كل مهنة ،

كيوبيد said...

نواره مع انى شيوعى لكن عندى ملاحظة كتير على كلامك اولا مجانية التعليم انا ضد مجانية التعليم مش طبقيه ولكن لعدم تكافو الفرص فيه ايه معنى ان عندنا الالف من الشباب جامعى ومش لقى شغال لان اتعلم حاجه غير التعليم الصح؟؟ اتعلم تاريخ وشغال نجار والى حداد كان من الاول داخل تعليم فنى احسن له ولينا ام بخصوص الشعب الجهل دى حقيقه هاننكره ليه عندنا 45 مليون امى لا يجيد القراء والكتابه بلاش نعمل زى النعمه وندفن راسنا فى الرمال الحقيقه ظهر زى شمس النهار ولازم نحطه فى حسبنا اها ممكن ندعم التعليم لكن مجانى ده مستحيل وليه هانروح بعيد مين فاهمك ان التعليم فى مصر مجانى ده مجانى ظهر بس لكن فى الوقع هو تكليفه مرتفعه جدا جدا (الدورس الخصوصيه) والى دى برا الحساب؟؟؟ وهاتى لى طالب متفوق والى نص نص والى حتى غبى مش خد درس خصوصى وبعد ما خدنا درس بالاف الجنيات اهو عاطل ومش لقى شغال وحتى فى سوق العمل الدوالى مش له قيمه ده كلو بسبب مجانية التعليم الى هى مجانيه اسم بس ام بخصوص الصحه فا الصحه ليه واضع مختلف تمام عن التعليم اها الصحه عماد المجتمع لازم تكون فيه صحه الى بياخده الوزير زى الغفير

jasmin horizon said...

اهم حاجه يانواره الصحه النفسيه،هى الدعامه الاساسيه للانتاج،وكل انسان فى موقعه منتج ما تفرقش ان كان وزير ولا زبال،المهم الرضى والشعور باهمية الدور اللى بيقوم به،كل المواقع محتاجه ابداع،يعنى كل انسان ممكن يكون مبدع فى مجاله،ويكون ده اساس تقدبر المجتمع لدوره ،ومن ثم رضاه النفسى
يعنى انت مثلا لما تستعينى بواحده فى شغل البيت وتؤدى العمل على افضل وجه وفى اقل وقت،بلا شك سيكون ثنائك عليها عظيما،وسيعود عليها ذلك بالرضى ،وفى المقابل اكيد انت اثناء دراستك بالجامعه صادفك بعض الاساتذه لم تثنى على ادائهم وربما صببتى عليهم اللعنات.
عايزه اقولك ان التعليم الجامعى ليس هو المعيار او الهدف،وانما الهدف يجب ان يكون بناء المواطن الصالح المؤمن بدوره والراضى بقدره.

nour1971 said...

مش عارفه كلامي حا يعجب ولا لاءه بس انا مش حاسه ان ده وقته خالص نعد نتكلمعلي الطبقيه و الناس اللي فوق و الناس اللي تحت مش لمن نشوف حال البلد و نرجع الفلوس المنهوبهههههههههه (اللي حا تصرف علي التعليم و الصحه علشان نبقي بلد متقدم دول اهم شئ الاول) و نحاكم الناس اللي ناهبه البلد عايزين نركز في الحجات اللي بتلم الشعب مش المناقشات اللي بتعمل تفرقه و كل واحد ميعجبوش رأي التاني فنتخانق فمنتجمعشي فالناس التانيه تنتهز الفرصه و تضرب من تحت لتحت علشان تفرقنا كمان و كمان احنا في وقت عايزين نضلل علي بعض نحب بعض علشان نطلع الفساد اللي مستوطن في البلد دي سننننننننننين طويله اوي اكتر من ٣٠ سنه يا نواره البلد دي منهوبه من زماااااااان اوي اوي اوي لما نخلص الحجات المهمه اللي تمشي البلد دي نبقي بعدها نتخانق علي مجانيه التعليم و نعمل مظاهرات علشان التعليم و الصحه و اى حاجه متعجبناش انما لازم اللي يجي يبقي خايف من الشعب يبقي خايف يعمل حاجه غلط لأن الشعب ده بيحب بعضه و عايز يعيش عيشه احسن من الخواجات عايز يحب بلده فلما يحب بلده مش حايعمل حاجه ضد بلده و مش حا يئزي بلده و

أرنوب said...

اللي إنتي بتوصفيهم دول من محدثي النعمه ليسوا هم الطبقة المتوسطة .. الطبقة المتوسطة مش عيانه ولا حاجة (إنتي اللي عيانة ولا مؤاخذة) .. أبناء الطبقة المتوسطة هم الذين أشعلوا شرارة ثورة الخامس والعشرين لا العمال ولا الفلاحين ولا العشوائيين اللي إنتي دخلتيلنا في وصلة ردح عشان خاطرهم .. عارفه حبيابك دول حيعملوا أيه ؟ حيصوتوا في الإنتخابات لصالح خفافيش الدولة الدينيه ويفرغوا الثورة من مضمونها ويدخلوكي في عصر ظلامي مملوكي الأربعين أو الخمسين سنه الجايين يلغى خلالهم الدستور (اللي عمّاله تعيطي عليه ده) وتُحكم المحروسة (المزه اللي إحنا عايزين نحطها في المطبخ على حد قولك) بالحق الألهي وساعتها اللي حيفتح بقه ويقول رأيه ويقعد ينظر زي جلالتك كده حيتخوزق أحلى خزوقه

يوسفيات..محمد يوسف said...

هرطقة لذيذة

e said...

ﺍﻧﺎ ﻋﺎﻳﺶ ﻓﻲ ﺍﻣﺮﻳﻜﺎ ﻭﺍﺳﻤﺤﻮﻟﻲ ﺑﺎﺧﺘﺼﺎﺭ ﺍﺗﻜﻠﻢ ﻋﻦ ﺍﻟﺘﻌﻠﻴﻢ ﺍﻟﺠﺎﻣﻌﻲ ﻫﻨﺎ ﺑﺼﺮﺍﺣﺔ ﻗﻮﻱ ﺍﻟﺘﻌﻠﻴﻢ ﺍﻟﺠﺎﻣﻌﻲ ﻓﻲ ﺍﻣﺮﻳﻜﺎ ﺑﺒﻼﺵ ﺍﻧﺎ ﻣﺶ ﺑﺎﺗﻜﻠﻢ ﻋﻦ ﺍﻟﺠﺎﻣﻌﺎﺕ ﺍﻟﺨﺎﺻﺔﺯﻱ ﻛﻠﻮﻣﺒﻴﺎ ﻭﺍﻥ ﻭﺍﻱ ﻳﻮ ﺍﻧﺎ ﺑﺎﺗﻜﻠﻢ ﻋﻦ ﺍﻟﺠﺎﻣﻌﺎﺕ ﺍﻟﺤﻜﻮﻣﻴﺔ ﻭﺑﺎﻟﺘﺤﺪﻳﺪ ﺍﻟﻜﻮﻣﻴﻨﺘﻲ ﻛﻮﻟﺪﺝ ﺍﻟﻠﻲ ﺑﺘﺎﺩﻱ ﺷﻬﺎﺩﺍﺕ ﻣﺘﻮﺳﻄﺔ ﺑﻌﺪ ﺩﺭﺍﺳﺔ ﻟﻤﺪﺓ ﻋﺎﻣﻴﻦ ﻭﺑﻌﺪﻫﺎ ﻋﺎﻳﺰ ﺗﺸﺘﻐﻞ ﻋﻠﻲ ﻃﻮﻝ ﺍﻭ ﺗﻜﻤﻞ ﺳﻨﺘﻴﻦ ﻛﻤﺎﻥ ﻭﺗﺎﺧﺪ ﺑﻜﺎﻟﻮﺭﻳﻮﺱ ﺍﻟﺴﻤﺴﺘﺮ ﻳﺎ ﺟﺪﻋﺎﻥ ﻓﻲ ﻧﻴﻮﻳﻮﺭﻙ ﻫﻨﺎ ﺑﺎﻟﻒ ﻭﺧﻤﺴﻤﻴﺖ ﺩﻭﻻﺭ ﻳﻌﻨﻲ ﺍﻟﺴﻨﺔ ﺑﺘﺎﻻﺕ ﺍﻻﻑ ﺩﻭﻻﺭ ﻃﺒﻌﺎ ﺩﻱ ﻳﻌﺘﺒﺮ ﺭﺧﻴﺺ ﺟﺪﺍ ﻟﺒﺎﻟﻨﺴﺒﻪ ﻟﻤﺴﺘﻮﻱ ﺍﻟﻤﻌﻴﺸﺔ ﻻﻥ ﺍﻳﺠﺎﺭ ﺍﻭﺩﻩ ﻭﺻﺎﻟﻪ ﻓﻲ ﺍﻟﺸﻬﺮ ﻋﻠﻲ ﺍﻻﻗﻞ ﺍﻟﻒ ﺩﻭﻻﺭ ﻭﻟﻮ ﺳﻌﺎﺩﺗﻚ ﻏﻠﺒﺎﻥ ﻭﺩﺧﻠﻚ ﺍﻫﻠﻠﻚ ﻣﻨﺨﻔﺾ ﺑﺘﺎﺛﺒﺖ ﺫﻟﻠﻚ ﻋﻠﻲ ﻃﺮﻳﻖ ﺿﺮﺍﻳﺒﻚ ﻭﺍﻟﺤﻜﻮﻣﺔ ﺑﺘﺪﻓﻌﻠﻚ ﺍﻟﺮﺳﻮﻡ ﻭﺗﺪﻳﻚ ﻣﻨﺤﺔ ﺩﺭﺍﺳﻴﺔ ﺍﻗﺼﺮ ﺍﻟﻜﻼﻡ ﺍﻟﺘﻌﻠﻴﻢ ﺍﻟﺠﺎﻣﻌﻲ ﺍﻟﺤﻜﻮﻣﻲ ﻻﺯﻡ ﻳﻜﻮﻥ ﻣﺘﺎﺡ ﻟﻠﺠﻤﻴﻊ ﺣﺘﻲ ﻭﻟﻮ ﺑﺮﺳﻮﻡ ﺗﻜﻮﻥ ﻓﻲ ﻣﻘﺪﻭﺭ ﺍﻟﻜﻞ ﻭﺣﺎﺟﺔ ﺗﺎﻧﻲ ﺗﻌﻠﻴﻢ ﻓﻨﻲ ﺍﻳﻪ ﺑﺲ ﺍﻟﻤﻬﻢ ﺍﻟﺘﻜﻨﻮﻟﺠﻴﺎ ﻭﺍﻟﺤﺎﺳﺐ ﺍﻻﻟﻲ ﺯﻱ ﻣﺎﺍﻟﻬﻨﺪ ﻋﻤﻠﺖ ﻭﻏﺮﻗﺖ ﺍﻟﻌﺎﻟﻢ ﺑﻔﻨﻴﻴﻦ ﺍﻝ ﺍﻱ ﺗﻲ

elashkeef said...

بالنسبة لمجانية التعليم أنا معاك فيها
لكن ليه طيب مش بتنتقدي الجيش عشان ما نزلهاش في الاعلان الدستوري
لانها اصلا كانت مادة في دستور 71
يعني كل المواد اللي عاملة قلق(المادة التانية و نسبة العمال و الفلاحين نزلت)
اشمعنى دي

مادة(20): التعليم فى مؤسسات الدولة التعليمية مجانى فى مراحله المختلفة.

http://www.egypt.gov.eg/arabic/laws/constitution/chp_two/part_one.aspx

اشمعنى دي نستنى الرئيس و البرلمان الجاي يحطوها
ما هي موجودة في الدستور القديم

Lemonada said...

ايه المقال اللوذعي ده؟؟؟ انتي صحيتي الصبح قررتي تدبينا المقال ده على قفانا مثلاً؟؟؟
كلامك حلزوني ملتهب وحاسة انك كسرتي الكيبورد وانتي بتكتبي... المرة الجاية هتضربينا بالشاشة ف خلقتنا
بصي كل الكلام ده مش هقول غير انك محتاجة حد يكبر ف ودنك وتستعيذي بالله من الشيطان وتستهدي بالله وانتي تبقي زي الفل
بس اسمحيلي اعقب على كلامك عن البرادعي عشان الراجل متكلمش عن الغاء مجانية التعليم... مينفعش تاخدي الكلام على علاته كده... خلي عندك خيال وانتي بتسمعي وخدي نفس عميق قبل ما تترجمي, الراجل قال مش معقول واحد مقتدر يعلم ولاده مجاني... فهمتيها انتي ازاي بقى انه عايز يللللللللللغي مجانية التعليم... كل الفكرة ان ممكن ولادك يتعلموا جنب ولادي بس ولادك انتي يدفعوا فلوس بما انك اقطاعية وبتقبضي 2000 جنيه وولادي انا يتعلموا ببلاش بما اني على باب الله

pooa said...

ان كل الخوف مش من الفلاحين والعمال يمثلوا الشعب ولا لاء لان كلنا فلاحين وانهم يقرروا التشريعات دي مش مشكله المشكله الحقيقيه ان التشريعات اللي فيها لف ودوران والمقصود منها مصلحه الحاكم هتعدي من تحت دقن واحد ميبقاش قانوني وانتي عارفه ان خمسه سته في مجلس الشعب بيبقي فاهم فعلا ايه اللي بيجري والباقي بيسقف ليهم وعلى اي حال اللي بيرشح نفسه فلاحين وعمال لاهم فلاحين ولاهم عمال ده الاسم بس المواطن الغلبان ملوش شجاعه ولافلوس يرشح نفسه وان رشح نفسه بينام في اخر كرسي تحت القبه وياكلها والعه بقه رجال الاعمال ومحاسيب الحكومه اما موضوع التعليم والصحه ليكي فيه الف حق

استراحة مصرية said...

يابنتى ارحمينى ..أنا كل ما أقرأ كلامك ألاقى دماغى بتلف .. انتى بتجيبى الأفكار دى كلها منين ..تكونيش مخاوية (يعنى عليكى عفريت )..بس والله برافو عليكى يابنت الايه انتى
أقولك ؟ شدى حيلك وربنا يقويكى ويبعد عنك اللى مايسسموش

استراحة مصرية said...

والله مش عارف أبدأ ازاى لكن ححاول أوضح وجهة نظرى ورزقى على الله
أنا نفسى كل الناس النضيفة واللى عندها مستوى عالى من الوعى الفكرى والسياسى يحاولوا يكون لهم تأثير حقيقى فى الشارع ..ولما بقول الشارع مش بقصد شوارع وميادين القاهرة والمدن الكبيرة
انما بقصد كافة عموم مصر ..وللأسف مفيش أى تواجد للناس دى بين طبقات الشعب الحقيقى ..أو بمعنى أصح بين الحرافيش..ياريت نفهم ان الحرافيش فى مصر همه القوة الحقيقية اللى ممكن يكون تأثيرها أقوى من القنابل الذرية والهيدروجينية ..ياريت نفهم

nashwa said...

حطيتى ايدك عاالجرح وشخصنى تلات اربع امراض فى كشف واحد وفى عبفرية تشخيصية
اللى اتوجع يقول اى واللى يفدر يعالج يمد ايده

safy said...

what is the problem of making education free until "thanawya" only and let university set the requirements of : fees, qualification and grades of the accepted students like the american education..noticing that the "talented" or "brilliant" students do not pay fees or taking very big discount.. this process make sure that NO IDIOTS ARE UNIVERSITY GRADUATES..:) really .. i'm an 15 yrs experience engineer and RARELY i can find now a qualified engineer to use @ work, especially those who graduated from "private" univerities !!!! very BAD results from these private ones

safy said...

by the way: i'm against the 50% but not against the "30mal& fala7een" WE ARE THOSE PEOPLE..but WE have very intelligent & qualified people who can be a part of parliament, we do not have to choose someone who can't read & write ?!!!
Ibn el fala7 is university graduate now and sometimes has PHD !! why not be elected in the parliament? BUT please do not call him as one of the 50% !!??!! do not you think that is not fare to one like him?
and i agree with the opinion that if he can't read & write he can't take the right decision because he will follow .. who can lead him only not his opinion! right?

Unknown said...

أخيراً حد قال الكلمتين اللي نفسي أقولهم لناس كتير...

بس مع احترامي للكلام ده كله أنا مازلت أرى إن الشعب في حاجة إلى توعية سياسية، عشان مش لما شيخ يقول إن الديموقراطية والحرية يعني بنتك تجيب صاحبها البيت وانت ماتقدرش تتكلم يقوموا يصدقوه.

وإن لازم أي مرشح برلماني يبقى متعلم، مش شرط تعليم عالي، بس ماينفعش يبقى مابيعرفش يفك الخط. أيوة حيبقى من الفئة المنتفعة اللي لازم يتاخد رأيها، بس لو قرا قانون ومافهموش، ممكن يوافق أو يرفض عكس مصلحته لمجرد إنه مش فاهم نص القانون. يبقى إيه الحال ساعتها؟

hayat ank said...

يا نونو المجلس العسكرى بتاع التربيه الوطنيه هرب المخلوووووووووووووووع ايييييييييييييييييييه رايك فى التسجيده والبالوظه الى كلناهااااااااااااا

Unknown said...

وزودي عالمطالب مطلب كمان ياريت بلاش موضوع التوقيت الصيفي والشتوي والهطل اللي هما كانوا معيشينا فيه ده ويسيبولنا التوقيت الشتوي ابن الحلال ده

Unknown said...

ياريت تزودوا عالمطالب انه هما يلغوا حكاية التوقيت الصيفي والشتوي والهطل اللي هما كانوا معيشينا فيه ده ويسيبولنا التوقيت الشتوي ابن حلال

omima said...

ياريت الحكومة تبطل حكاية التوقيت الشتوى والهبل دة

omima said...

ياريت الحكومة تبطل حكاية التوقيت الشتوى والهبل دة