Tuesday 29 March 2011

حبيب قلبي حبيب قلبي حبيب قلبييييي :)

تحديث:
دي قائمة باسماء المحتجزين.. بس برضه فيه عيال غلابة مش مناضلين ولا بلطجية ومالهمش حد يسأل عليهم غير ربنا
مبرووووك.. عمرو عيسى حيخرج ان شاء الله لأنهم حيعيدوا محاكمته

ربنا يخليكوا ليا يا رافعين راسي، ويسعدكم ويفرحكم ويعزكم عشان ما كسفتونيش قدام العيال اللي اكلت وشي
طب والنبي بقى محمد الجندي ده من شباب 6 ابريل وحيتقدم لمحاكمة عسكرية، وياريت فيه خمستلاف قضية اتقدموا لمحاكمات عسكرية، يا ريت يعاد النظر فيهم، لأن فيه منهم كتير لا هم مناضلين ولهم ضهر، ولا هم بلطجية كمان، عيال غلابة 
احنا كنا عايزين ايه كمان؟
اه
1- محاكمة شلل الاطفال والثلاثي، عمر سليمان، وصفوت الشريف بشنبه ده، وفتحي سرور، وزكريا عزمي، اساسا عزمي ده المفروض يتكهن
2- محاكمة مبارك العاجلة
3- الاعلان الدستوري.. الاعلان الدستوري فين؟ خلاص احنا بقينا التلات.. ربنا يستر، بس واحد كتب على التويتر قال ان الدعوى بأن مبارك خان قسمه، يعني خيانة عظمى.. طب قشطة، لو حكموا ببطلان تنحيه، حنمسك في خان قسمه دي ونطالب بمحاكمته عسكريا بتهمة الخيانة العظمى.. ومش مسامحينه على تنحيه الخاين الغشاش اللي اتجوز علينا شرم الشيخ ههههههههه
4- فاضل ايه؟ فاضل ايه؟ فكروني.. انا من الفرحة نسيت الباقي
بس شلل الاطفال والثلاثي ومبارك وعيلته يتحاكموا واي حد حيفتح بقه بعد كده حاجز لسانه من لغاليغه.. آه.. والاعلان الدستوري
واحد صاحبي عايش في امريكا باعت لي على السكايب بيقول لي جيتس وزير الدفاع الامريكي راجع زعلان من زيارته لمصر والنيويورك تايمز ابتدت تشتم في الجيش
هيهيهيهيييييييييي... قشطة
كل دي اخبار مطمئنة الحمد لله، دي ناس شتيمتهم لنا نتوضى بيها
المهم بقى بقية المطالب احنا منتظرين اهو

52 comments:

Amr Ebaid said...

انت حاطة صورة غلط على فكرة

Mohamed Abdel-Ghany said...

ma3lesh ya3ny bas eih ely gab siret 3omar soliman fi el mawdo3

hwa el ragel monaser li mubarak wi ara2o el seyaseya tegib el shalal
bas di mish tohma aw zanb

ana besra7a masme3telosh qadeyet fasad aw nahb aw 3elaka bel baltaga le3'ayet delwakty

ya rit nefra2 bin el mofsedin wi el mo5talfin ma3ana fi el ra2y aw ara2hom rag3eya

Ahmed . M . Abdulrahman said...

هو دا الكلام الصح

لازم نفضل نضغط نضغط لغايه ما كل المطالب تتنفذ لان بجد كده حرام

ولازم الجمعه الجايه تكون بالملايييييييييين

ربنا معاكم ومعايا بأذنه

سلام

www.misr25jan2011.blogspot.com

Anonymous said...

اية دة يانوارة اجز لسانة من زغلولة هو انتي شغالة في مدبح عموما انا بقي خايف علي مصر فعلا كل يوم بعد ماسمع البرامج خصوصا الست مني الشاذلي وكمان بعض الصحف يصيبني الهم والغم والاقي نفسي قلقان علي مصر من التيارات الدينية المتشددة ربنا يستر ومنقولشي ولا يوم من ايامك ما هو احنا دايما كدة قلنا ايام السادات ولا يوم من ايامك ياجمال عبد الناصر وقلنا ايام عبد الناصر ولا يوم من ايامك يافاروق وقلنا ايام مبارك ولا يوم من ايامك ياسادات

Anonymous said...

السلام عليكم يا نوارة مصر
الله ..الوطن..نوارة
ههههه
انا احمد ..من الاخوان
شغال طبيب وبدرس ادارة في الجامعة الامريكية

من الاخر كده.. انتي القيادة الروحية ليها
اتمني اتواصل معاكي
ارجوكي
يهمني جداا اعرف ارائك في حاجات كتير

مهندس مصري بيحب مصر said...

دا كل ده من تأثير مليونية الجمعة الجاية
ناس ما بتجيش غير بالمليونية
حاجة تطلع الروح
لازم يناهدوا في كل طلب كده

Anonymous said...

ahmed87_2017@hotmail.com

من فضلك
ارجو التواصل

Tears said...

هو كلام الضابط ده مش يعتبر بلاغ
http://www.youtube.com/watch?v=Mnq7M0eVOYQ&feature=player_embedded

هنا فيديو لاحد المظاليم محبوس على ما فهمت بقاله اكتر من سنة بسبب انه غنى الاغنية دى و لسه منسى

http://www.facebook.com/video/video.php?v=201749623184084&oid=112657275456112&comments

المصوراتي said...

مش اول مرة ازور مدونتك

و كمان كل يوم بسمع صوتك

و عنيه تدمع

كل يوم بسمع كلمتك

مفيش خوف تاني .. مفيش ظلم تاني


ربنا يخلي لنا المجلس العسكري :)

و ربنا يجعل تدبير كل من يكيد بين الشعب و الجيش في نحره ان شاء الله


جزاكِ الله خيراً

zara shaishaa said...

What about Amr Elbahairy and the rest I do not know their names.

محمد طنطاوي said...

يا ريت تبلغى المجلس العسكرى بالمطالب دى نواره خاصة المعتقليين سواء كان من السياسيين أم من الثوريين عيب كدا لما يعمل كدا فى الثورا دا المفروض يكرموا مش يتعاملوا المعامله دى والمفوض كمان والأصول يقدم اعتذار رسمى لأخواتنا اللى امتهنت كرامتهن ودى أقل حاجة يقدر يقدمها ، يا ريت تبلغيه مش عايزين نكتفى بس بإننا نقول لبعض أنا عن نفسى هاعمل كده ويا ريت كلنا نعمل كده

كيوبيد said...

والله ان كان الكلام ده صح مع انى اشك فيه بنسبه بسيطه بس يسلم المشير ويسلم المجلس وحب اقولهم دى وسام رافيع ومن الدرجه الاولى شتيمة الامريكان هما خايفين من المارد المصرى عارفين انو هايبقى زى التنين الصينى فى اسيا مصر هاتبقى زيو فى العالم العربى وفى افريقا زى التنين الصينى ويمكن اقوى منو وكمان مره الف الف الف الف الف الف الف الف مبروووووووووووووووووووووووووووووووووووووووووووووووووووووووووووووووووووك على المشير وعلى المجلس العسكرى وعلى الجيش وسام الشتيمه من امريكا

مش فاهمه said...

انت فرحانه قوى كده على ايه ؟؟؟؟؟ انتى بتتكلمى جد

romancy said...

هو حبيب قلبك لوحدك ياختى معنى انه طلع تلات بيانات مرة واحدة دا ايه الكرم دا لا وكل بيناته سننظر سنعمل سنسوى لو المجلس العسكرى شتمنا نتف ف وشه مش نتوضى بالشتيمة ولا انتى واخدة ع انك تتوضى بمية وسخة وتعليقا ع البوست ال انتى كتباه دا ملكيش عندى غير تعليق واحد

احا

romancy said...

نزل 3 بيانات يا حلاوه أيه الجمال ده

لا معلش البيانات دى يضحكو بيها ع ال مصدقهم ولا هو ضربنى وبكا وسبقنى واشتكا وبعدين يعنى ايه شتيمة المجلس العسكرى نتوضى بيها دا حتى ربنا حرم الوضوء بمية وسخة وبصراحة تواطؤ المجلس مش هقول الجيش عشان الجيش محترم غير مجلس الدبابير ال قاعد يغذى ف الثورة المضادة ويحرس ف مبارك وكلابه دا بئا واضح وصريح ويشوفو الاعمى ولنا قبل كدا ان دى فعلا اخرة المناضل ال يحب يقلب سياسى لما بيجى يرجع مناضل تانى ميعرفش ويبئا ماسخ واى وف النهاية بيتحول لدلدول زى ما احنا شايفين كدا وبصراحة ابرك رد ع التلات بيانات دول وعلى البوست الجميل دا

احا و ف شوال كمان

romancy said...

نزل 3 بيانات يا حلاوه أيه الجمال ده
لا معلش اتوضى انتى لوحدك اصل ربنا حرم الوضوء بمية وسخة

وبعدين انتى بتدارى على ايه ماهو دا كلو معروف انهم بيمارسو من اول ما مسكو عملية اجهاض الثورة وقمع المتظاهرين ولما بيحسو انهم انكشفو معندهمش مانع انهم يطلعو بيان او حتى تلاتة يهبطو بيهم الشعب الاهبل ابو ريالة وبصراحة وضاح اوى من التهليل ال ف البوست بتاعك دا انك رابع واحدة اثبتيلى ان الشعب المصرى فعلا اهبل وبريالة لا وحمار كمان

ولو فى رد من جملة واحدة يتفق مع البوست والتلات بيانات ال طلعو النهاردة والمؤتمر الصحفى بالمرة فهو

احا
وهننزل بردو الجمعة ويخلى شرطته العسكرية بئا تعمل حاجة

Anonymous said...

بالإضافة لكل مطالب الثورة الأخرى ,المعطلة..,حزب الفساد الصهيونى,يحل,ويحرم أعضاؤه من ممارسة,أى نشاط سياسى,لمدة عشرة سنوات. د. شريف عبد الحكم

Argenda said...

نتفق على شئ مهم لا يحك ظهرك مثل ظفرك
إللي عايز ديموقراطية ينزل يحشد و يقنع الناس و بعدين يوجه الكلام للجيش ساعتها يسمعك لما الناس تكون معاك أما إننا ندخل في معارك وهمية و خايبة و كل شوية بشر يدوروا على حته من التورته و ينسى الهدف الرئيسي هنشرب كلنا و مش هنلاقي غير حكم مباركي تاني مهو الجيش وقف جنبنا لما كنا إيد واحدة لما نتفرق منلمش حد غير نفسنا
فيا ريت مننشغلش غير بتوعية أهل مصر

الشبكة المستقلة said...

كلام جميل
بس يا ريت الجيش يوفي فعلاً بوعدةو يرجع ثكناتة بعد 6 شهور ذي ما وعد

و يسيبو لنا حكومة مدنية كدة نبهدلها براحتنا
و شكراً سعاد و شكراً ناديةو شكراً انور وجدي

سميربس said...

ولو انى عادة بكون مؤدب ومبعلقش كتير فى أحلى المدونات دى انما الشىء اللى مسمى نفسه رومانسى ده مبيفهمش اللى بيقراه وغبى وميسواش فردة جزمة شمال قديمه جدا
و بس

hassn hamdi said...

فات وقت الإعلانات دي يا نوارة خلاص
كلها يومين وهتشوفي الطوفان الحقيقي في مصر

new said...
This comment has been removed by the author.
arabian_faithful said...

السلام عليكم و رحمة الله و بركاته

كالعادة أنت مصدر سعادة و بهجة لكل مصرى

فقط نسأل الله أن يرزقنا و إياكى السعادة و الرضى

و صبــــــــــــااااااااااااح الخير
لكل مصر

احلام جوليا said...

بيقولوا مبارك بيقدم اوراق علشان ياخد معاش
لا مؤاخذه يا نواره هو المعاش ده مش المفروض يتاخد بعد ما الواحد يكون دفع التأمينات والضرايب والي ميدفعش تأمينات وضرايب ملوش معاش يبقى حياخد معاشه على اساس ايه بالضبط

احلام جوليا said...

وكمان في حاجة مهمة قوي قبل الواحد ما ياخد معاشه من اي حته في الدنيا الاول لازم يقدم اخلاء طرف وصاحب العمل يوقع عليه واحنا بما اننا اصحاب العمل ومبارك كان موظف عندنا موقعناش له اخلاء طرف بالعكس ده احنا حنقدمه لمحاكمة اختلاس وسرقة اموالنا يبقى يصرف معاشه ازاي ولا هو الحكاية استعباط في استعباط ولا مسكين معهوش يصرف لا مؤاخذه الاخ المنوفي ده مش حيبطل الجلده الي هو فيها ملوش معاش يا نواره وكله بالقانون ملوش حق في معاش مدفعش تاميناته يا نواره ملوش حق في المعاش لاننا ماخلناش طرفه وعليه قضايا ونزاع ملوش حق في المعاش يا نواره الي ينطبق على الصغيرين ينطبق على الكبار يا نواره
قال رسول الله صلى الله عليه وسلم : أهلك الذين قبلهم إذ كانوا إذا سرق الشريف فيهم تركوه وإذا سرق الضعيف أقاموا عليه الحد "

nevine said...

يا نوارة يا رافعة راسنا في مصيبة هتحصل و لازم تتكلمي فيها النهاردة في خبر ان احتمال يعملوا قانون للتصالح مع رجال الاعمال ... يعني واحد زي احمد عز ده ياخد براءة عشان دفعله كام مليون ... انا الدم ضرب في نافوخي من ساعة ماسمعت انا اسفة بس دي حقوقنا احنا الشعب و احنا اللي نقرر اذا كنا نتصالح و الا لأ و ياريت بقى يشيلوا أ/يحيي الجمل من الدور العجيب ده انا لأخر وقت بأحترمه بس بجد مش مقتنعة دوره ايه بالظبط قاعد بس يطلع بأفكار جهنمية و التبي قوليلنا رأيك ايه في حكاية التصالح دي احسن انا مش مقتنعة خالص

بساطه said...

يمكن تشوفي طلباتي غريبه .. بس مهمه .. اولا يقولوا لنفسهم ولظباظهم الصغيرين اياكم والغرور .. انا بجد خايف عليهم من الغرور لانهم فجأه لقوا نفسهم نجوم مرحب بيهم في كل حته وده مش سهل على النفس البشريه انها تبقى فجأه ليها شهره وسلطه .. الطلب التاني .. ظباط المعاش( ابويا واصحابه ) كرموهم وادوهم حقهم ماينفعش عيل كان عنده 3 سنين وهما بيحاربوا ياخد مرتب ضعف معاشاتهم (حسب كلامهم) ابويا وهو فاكر نفسه بيموت لما اتصاب في الحرب قال ربنا يصبرك يامه انا واخويه .. هو واخوا عاشوا وكانوا داخلين يموتوا عشان تراب مصر .. صعبان عليه واخد جنب ومقموص من حكاية ثورة الشباب دي وعايز يعمل حزب سياسي هو واصحابه لحماية مطالب الثوره وارجاع روح 73 .. هتحضر ارواح يابا ..
اه والله لسه نفسه يخدم البلد .. انا بجد نفسي يكرموهم هما يعني باقي منهم كام واحد .. ربنا يديهم الصحه والعمر بس بجد كتير منهم ماتوا من غير تكريم لائق .. ياريت يسعدوا الباقين

بساطه said...

تكمله للكومنت الي فات معلش استحمليني انا رغاي شويه .. لما يكرموا الكبار الي حاربوا احنا هنتعلم من ده ونشوف ان الي عمل لمصر مصر هتعملله وتكرمه .. لان ابويا زمان لما كان يقولنا مصر .. كنا نرد عليه ونحرجه ونقوله عملتلك ايه وانت حاربت عشانها .. تكريم الكبار .. عبره للصغيرين

واحد عادى said...

فيه اخبار ان السعوديه بتضغط على مصر لمنع محاكمه مبارك وبتهدد بترحيل المصريين اللى عندها لو مبارك اتحاكم

Anonymous said...

والله انا كل ما اعوز اتفاءل بفتح الصفحة بتاعتك عشان اتفاءل اكتر شكرا لك

محمد نور الدين said...

ست الكل صباح الخير

واي حد حيفتح بقه بعد كده حاجز لسانه من لغاليغه.
مبروك يا النوارة لكن ماسمعناش أنك تعينت بالداخلية
وبهذه المناسبة، وبوصفك صديقة، لي طلب صغير . يوجد مطعم بقرب ميدان التحرير وهو مطعمي المفضل، مش مطعم كونتاكي أنا أتحدث عن آخر. عايزك تتوصاي فيه وما تخليش بنوع الداخلية يهوبوا ناحيته حتى أتكلم براحتي في السياسة ،و المطعم إسمه باللغة التي فرضت علي فرضا وعلموها لي غصبا عني وعن اللي خلفوني
Le Grillon

rahrom said...

ايوة يانوارة يااختى بس الفلوس اللى مش راضية ترجع دى ايه وضعها وكمان الرفاهية اللى جوه السجن بتاع اللى مايتسموش ومحاكماتهم الملخبطة دى والعاب المحامين وشوزى وجيمى نسيتيهم وبعدين الجمل وما حمل وقانون الاحزاب حجر على الحرية يعنى ايه مافيش احزاب على اساس دينى وهما مالهم ما اوروبا بجلالة قدرها فيها احزاب دينية ولا هى بدعة

mutargim said...

http://al-agenda.blogspot.com/2011/03/blog-post_29.html
كشف نظارة

jehad said...

ايه ده انتي حسستيني ان كل حاجه في مصر بقيت فله ربنا معانا وينصرنا على مين يعادينا دا احنا غلابه والله المهم لابد من الضغط المستمر على المجلس العسكري لانه ما بيجيش غير بالضغط

Unknown said...

http://www.maikelnabil.com/2011/03/blog-post_07.html


الشرطة العسكرية ألقت القبض على مايكل نبيل بعد كتابته هذه التدوينة

this is being circulated on FB.. bear in mind that this post is dated 07.03 .. what is going on .. is he still arrested .. and what would make him say all this about the military ???
and finally .. any news about the case filed about Mubarak that was due today ??

Egyptologist said...

الله أكبر

Egyptologist said...

فين تعليقاتى ؟ ولا انتو مش عايزين حد غريب ؟

arabian_faithful said...

على فكرة أنا ملاحظ إنك أثرتى علينا كلنا و خلتينا نتكلم زيك

عموماً وماله دا كويس برده أحنا نطول
هههههههههه

بس كده مش حنشترى كتبك خلاص بقى الروس أتساوت
هههههههههههههههه
أنا أنصحك متنشريشى التعليق ده بدل مايوقف حال الكتاب

Passant said...

هى الناس بتتقدم لمحاكم عسكرية ليه من اصله هى المحاكم المدنية جابت ضرفها و لا ايه

Mahmoud Elzohry said...

أية الرغي ده كلامك جميل قووووي بس ياريت تنظميه وتعملي عناصر مع اني مش حاجة
عشان أعدل على نوارة نجم وشكرا

Anonymous said...

أهداء الي السيده نواره نجم و نقولها الحمدلله مافيش ظلم تاني ...مافيش خوف تاني
https://kalamkhalti.wordpress.com/

new said...

غريبة فعلا
الاخت احلام اللي بتسأل عن المعاش
والله فعلا كرلامك بيفتح تساؤلات
معاش ايه ؟
هل الذي "يرفته" - يرفده بالعامية - يعني يقيله الوزير بنفسه ياخد معاش؟
طيب واللي يرفده الشعب كله؟

متهيألي مالوش معاش
ممكن ياخد معاش مبارك؟
مش عارف .. محتاجة استشاري تأمينات او قانوني يفتي فيها
مال المعاشات ده مال مصر برضه..واللي يسري على المواطن يسري على مبارك

ماجد العياطي said...

بس انا برضوا مش مطمن

وهنزل يوم الجمعه اللي جايه عشان بقيت المطالب

تحياتي

qqq said...

بصي يا نوارة، لبمشكلة الحقيقية دلوقتي في الطابور الخامس اللي موجود في الإعلام، إحنا ناسيين إن كل القنوات الفضائية و الصحف الخاصة كانت ممولة و تابعة لرجال أعمال؟ و هما نفسهم اللي دلوقتي بيحولوا يحموا نفسهم بالتحالف مع الأمريكان و بقايا النظام؟ باختصار إحنا عاوزين نبني إغلام شريف و مستقل و أول خطوة تكون بالبحث في تمويل الفضائيات و الصحف المشبوهة و تجريسهم و فضحهم، إحنا الشعب مش هما و إحنا اللي لازم نفضل نوصل صوتنا من ميدان التحرير و نحمي ثورتنا و لا نسمح للطفيليين أصحاب الصوت العالي بإرهاب الجيش إعلاميا و التأثير على قراراته، إيه اللي يخلي واحد زي ضيا رشوان أقل ما يمكمن إنه يوصف به إنه مالوش علاقة بينا أو بالتعبير عننا، إيه اللي يخللي واحد زي ده يفضل يتكلم و يصرخ للدرجة اللي قد تجعل كلامه فعلا يمشي؟ قطع لسان أي واحد يخلي جيشنا يكون في موقف دفاع عن وطنيته و يقول إنه مش إخوان أو أي حاجة تانية؟ نفسي أعرف هوا مين ده اللي بيشكك في وطنية الجيش و حياديته عشان أكله بسناني، الثورة نجحت عشان كانت وطنية و بعيدة عن أي تأثيرات أمريكية أو خارجية أو أيديولوجية، المشكلة إن الأمريكيين حيحاولوا بكل الطرق التدخل و ده بيكون غالبا بصناعة قائد ثم عزلة عن شعبه للسيطرة عليه، نوارة المليونيات لابد تكون مستمرة كل أسبوعين لمساعدة الجيش سياسيا و معنويا و أيضا لتكون عين الثورة عليه و الحمد لله أصبحنا خبرة دلوقتي في تأمين مظاهراتنا و حمايتها، لازم لما ننزل الميدان أيام الجمع ننزل عشان الوطن بكل أطيافه و لازم ننسى أي خلافات سياسية أو أيديولوجية أو دينية، مصر دية سفينتنا واللي حيحاول يغرقها حناكله بأسنانا زي ما عملنا في الحيزبون و ابنها الحيلة، الرسالة اللي لازم يفهمها الأمريكان و العالم كلة إن احنا وحدة واحدة و إن الإعلام ده مالوش علاقة بينا، يعني خللي الصحف تقول إن السلفيين أقاموا الحد علي المسيحي، ماشي هما بيكدبوا و ده حيظهر في المظاهرة التانية لما نفس السلفي اللي افتروا عليه يقف جنب المسيحي و يهتفوا عايزين إعلام حر، بالمناسبة يحيي الجمل عايز له وقفة و يبدوا إن أيامة بقيت معدودة لإني لاحظت إن إختياراته لرؤساء التحرير مش محايدة و ليها بعد سياسي و خلفية أيديولوجية بس مش مشكلة حنفوق له بعدين، مليونية الجمعة الجاية "لا" حيحضن "نعم" و المسلم و المسيحي حيهتفوا مع بعض عايزين إعلام حر، و الشعب كله حيقول كلمتة تاني من غير ألاعيب الفضائيات و تدخلات الجمل و المفاجئة حتكون لما الكل يقول الشعب يريد تطهير الإعلام، الشعب يريد محاكمة الفساد، الشعب يريد إسقاط الثلاثي، معادنا في التحرير إن شاء الله

مش فاهمه said...

قريتى علاء الأسوانى النهارده النسناس فى حضرة الأسد
http://www.almasry-alyoum.com/article2.aspx?ArticleID=291909&IssueID=2089
و قريتى ده
http://www.maikelnabil.com/2011/03/blog-post_07.html
مش باقولك اقتنعى باللى فيه بس بلاش الحب العذرى ده خليه حب بحذر و ماقلتلناش نازله يوم الجمعه ولا خايفه احسن حبيب القلب يزعل و ياخد على خاطره :))

مدونه ما كفايه بقى said...

بالله عليكى يا نواره تقوليلى من عمرو عيسى ده

بالله عليكى تقوليلى انا حلفتك بالله

totanona said...

احنا بنوقع ونلاقي فس العدد لا يزيد فيه حاجه غلط الحقوا وشوفوها

Bassem Zakaria El-Samragy said...

أما صحيح لو مبارك اتحاكم بتهمة الخيانة العظمى علشان خان القسم وساب البلد دي ثورتنا تبقى أكتر ثورة فكاهية في التاريخ
:D :D

ولاء نصر said...

تصدقى يا واره انتى الى بتريحى قلبى دلوقتى ربنا يباركلك يا شيخه انتى الوحيده المتفائله فى كل الى انا شايفاه انا النهارده حسيت ان فى سواد وهباب وان نهايتنا سوده ومهببه والثوره هتضيع ومش بعيد نرقى اى حد صحى بردى وقعد على الكرسى , انا بتابع مدونتك يوميا من يوم ما عثرت عليها بس عشان انتى متفائله رغم انى من الى قالوا لا ويمكن ساعات بختلف معاكى بس بصدقك

Unknown said...

http://www.nytimes.com/2011/03/27/opinion/27kristof.html?hp

هل هو ده المقال الذي تقصدينه . الراجل منزعج جدا من موضوع كشف البكارة للمقبوض عليهم من معتصمات التحرير يوم 9 مارس 2011 . و جايب واحدة من البنات تحكي و واحدة من منظمة حقوق الانسان تعقب على الحكاية

Anonymous said...

انا زعلت.. بقولك
الله..الوطن..نوارة
وبعتلك الايميل
ومردتيش..براحتك يا ستي
عالعموم اتمني التواصل..:))

hayat ank said...

g
شهدت قرية الاسراء والمعراج بوادي النطرون جريمة قتل بشعة راح ضحيتها عامل زراعي شاب يعمل في إحدى المزارع، بعد أن قام مزارع ينتمي لجماعة السلفيين بالقرية بقتله وهشم رأسه بالفأس اثناء إستغراقه فجرا في النوم لتركه الصلاة، وذلك بحسب موقع أخبار مصر التابع لاتحاد الإذاعة والتليفزيون.وتمكنت المباحث من
دى نتيجه اللجان الى بتحط القوانين فى الضلمه وهى اساسا ضد الخروج على الحاكم ده منهج وعقيده الى حط التعديلات كان اخوان والى حط قانون الاحزاب كان اخوان الجيش بيعاقبنا على الثوره ولا ليه حط دول انا نقلت الخبرعن الدستورالاصلىيتاع ابراهيم عيسى الى مش بشك فيه لحظه