Tuesday 29 March 2011

الرسالة الثالثة: ابنك يقولك ثورتك عارفة الطريق، وعارفة مين يابا العدو ومين الصديق

بسم الله الرحمن الرحيم
عزيزي الجيش..
بعد التحية والاشواق.. 
ده الجواب التالت.. وارجو منك إنك تقراه زي ما قريت اللي قبله، وننتظر منكم الاجابة
انا مش حاسأل على الاعلان الدستوري تاني خلاص بقى.. وقت ما ربنا يكتب لنا نصيب فيه حنلاقيه.. بيقولوا بكرة
يا مسهل
لكن قبل ما اقولك اللي في قلبي، احب اشكرك على اهتمامك العاجل بملف حوض النيل.. وواخدة بالي ان الامن القومي له الاولولية
بس احنا برضه اولوية 
يا ريت تريح قلوبنا، وتسعدنا، وتحقق لنا منانا في انك تتحفظ على صفوت الشريف، وزكريا عزمي (وتفصله من شغله)، وفتحي سرور، وعمر سليمان، لأن الاشاعات كترت، وكلام الناس لا بيقدم ولا يأخر، خصوصا ان القصة بتاعة كاميليا شحاتة مش حتبان على حقيقتها الا اذا اتقبض على عمر سليمان وقر واعترف، واحنا عايزين نخلص بقى من الحكاية دي بدل ما كل شوية سعادة الاخوة السلفيين عمالين يطاردوا اشباح، واللي في ايديهم المستندات فعلا مش بيتكلموا، بياخدوني على جنب يحكوا لي بس، وحسبي الله ونعم الوكيل فيهم، ولو اتعرفت الحكاية حنرتاح ونريح، صحيح ان ناس كتير حتتفضح فضيحة المطاهر والناس حتديهم بالجزم القديمة من الجانبين
بس بيني وبينكم.. احسن، اصلهم بصراحة - سوا دول ولا دول - قالبين دماغنا، وعاملين ازعاج، وكل شوية يسخنوا الناس تسخينات مش تمام، الناس حتتصدم شوية وشعرها حيقف وحواجبها حتقع من الصدمة، بس اهم يفوقوا بقى، بدل ماهم نازلين شتيمة في المحترم وبيحترموا اللي مش محترم.. ينوبكم فينا ثواب
عموما، انا عندي رسالة لك من شباب الثورة - اللي انت بتحبه - بخصوص مطالب الجمعة الجاية.. المطالب دي مكتوبة في الايفينت ده


وهذه نص الرسالة من الشباب اللي في الصورة في اهم مكان إلى الجندي الأسد اللي شايل على كتفه درع الأوطان




نداء الي الشعب المصري العظيم الي ابطال مصر و شبابها و مثقفيها :


إن مؤسسة الفساد فى مصر بما تضم من المفسدين والإنتهازيين والمتحولين مازالت تقبض بقوة على زمام المؤسسات الإعلامية والتعليمية والأمنية والإقتصادية والإدارية والإجتماعية، وتسعى بالثورة المضادة بشراسة لإستعادة زمام المبادرة بغية إجهاض باقى مطالب الشعب ، تحت دعوى أنه بسقوط الرئيس السابق وحل مجلسى الشعب والشورى قد تحققت مطالب الشعب .


إن الشعب فى مصر لن يقبل محاولة غسل النظام السابق وإعادته فى صورة أخرى.




مطالبنا /


1- الأسراع في محاكمة كبار الفاسدين و علي رأسهم مبارك و ثلاثي الشر : زكريا عزمي و صفوت الشريف و فتحي سرور .


2- حل الحزب الوطني اساس الخراب و الفساد في بلادنا .


3- تطهير الأعلام الفاسد الذي يدافع عن المجرمين و يؤيد الثورة المضادة لأجهاض ثورة الشعب , و استبدال رؤساء الجامعات و المحليات و الاعلاميين الفاسدين بأعلاميين شرفاء للمساهمة في توعية الناس و عدم تضليلهم .


4- الأفراج عن معتقلين الرأي الذين اعتقلهم الأمن المركزي مسبقا و الشرطة العسكرية حديثا .


5- التأكيد علي حرية الرأي و التظاهر السلمي و عدم العمل بأي قانون يصدر لتقييد رأي الشعب الذي يستمد الجيش منه شرعيته .


6- الأسراع من مصادرة اموال الطغاة و رجال الأعمال الفاسدين و تجميد كل ارصدتهم في كافة بنوك العالم و اولهم ال مبارك .




تنويه هام جدا جدا::


ايمانا بدور القوات المسلحة المصرية و ثقة في جيشنا العظيم
فأننا سنكمل ثورتنا و يقيننا في الله ان جيش مصر العظيم سيقوم بمساندتنا و حماية ثورتنا و لن يقبل بتقييد حرية الشعب و الألتفاف علي مطالبه و لن يتخذ قرارات اخري الا لصالح الشعب الذي هو مصدر السلطات .


و لا نشك ولا نشكك اطلاقا فى وطنية قواتنا المسلحة (خير أجناد ألارض) ونقدر دورها الهام فى حماية الثورة والثوار الذى جنبنا اسالة حمامات من الدماء...فهى ادت دورها و وجابها فى هذا الامر على اكمل وجه


نختلف فى الرأى مع المجلس الاعلى للقوات المسلحة فى ادارة عملية التحول الديمقراطى ونعلم ان المهمة الملقاه على عاتق قواتنا المسلحة ثقيلة جدا...ونزولنا للتظاهر يوم الجمعة 1/4 هو من اجل تصحيح المسار..والمطالبة بتحقيق باقى المطالب التى تضمن للمصريين جميعا نجاح ثورتنا باذن الله


ارجو من كل من ينضم للمظاهرات يوم الجمعة 1/4 الا يرددوا ولا يرفعوا اى شعار يهاجم القوات المسلحة
الحفاظ على شعار "الجيش والشعب يد واحدة"


والله الموفق
-------------
مع خالص سلامي وتحياتي
شكرا لساعي البريد
مرفق مع الخطاب هدية:



احنا كنا مدورينها على طول في الميدان... وسبحان الله، مناسبة قوي خاصة "ابنك يقول انا حواليا الميت مليون العربية، ولافيش مكان للأمريكان بين الديار"، بالذات بعد ما كلينتون خرجت من عندنا تقول: نحترم اختيارات الشعب وان كنا لا نتفق مع القيادة في كل شيء.. وبعد شوية جه جيتس وزير الدفاع الامريكي وخرج برضه يقول: نحترم اختيارات الشعب وان كنا لا نتفق مع القيادة المصرية في كل شيء.. واول ما روح نزل النيويورك تايمز شتيمة فينا.. شكرا والله، بس المطالب الفوق، ها؟ ها؟ ها؟ 
:)
واي حد حيطول لسانه يو الجمعة حينضرب سلمية سلمية زي ما كانوا امن الدولة وامناء الشرطة لما بيتقفشوا في الميدان بينضربوا.. ويتسلموا للجيش.. بعد ما نجز لسانه من لغاليغه
--------
الجواب الغرامي خلص
نتكلم مع الجدعان.. الحلوين.. اللي بيحييوا الاعلام القذر القاتل المنحط وبيدوله بالجزمة
التغييرات اللي حصلت دي ما عجبتنيش انا شخصيا.. لو عاجباكم خلاص، مافيش داعي اني اقومكم
انتوا ناس فلة، وشعب قمر، وبصراحة لو جبل كان اتهد، ونفسي وامل حياتي اني اشوفكم مبسوطين بقى، تستاهلوا تنبسطوا وترتاحوا بعد الشقا ده كله، تستاهلوا تطمنوا بعد القلق ده كله
بس عموما.. اللي مش عاجبه التغييرات
فيه واحد صاحبي اسمه صلاح صابر - برضه احب انسب الفضل لاصحابه - قال لي على فكرة لطيفة:
نعمل قائمة سوداء بالشركات اللي بتعمل اعلانات في البرامج اللي كانت معادية للثورة 
على سبيل المثال لا الحصر، قناة الحياة بتاعة البيدزا.. برنامج مصر النهاردة، برنامج لميس الحديدي اللي عمري ما شفته وبصراحة مش عارفة مين الانسان المريض اللي كان بيتفرج عليها، وكل الاخوة الافاضل اللي قالوا علينا كنتاكي وقتلونا واتسببوا في معركة الجمل والتحريض علينا
هم مش بيشيلوا ناس كتير زي لميس الحديدي او تامر امين او لبنى عسل او او او.. عشان قال ايه، بيجيبوا اعلانات
طب قشطة
الشركة اللي تعلن في برنامج في المذيعين اللي كانوا ضد الثورة احنا مقاطعين منتجاتها
وخلي الاعلانات تنفعهم
ملحوظة تانية برضه صلاح قالها: ميثاق الشرف الصحفي بيقول ممنوع الجمع بين التحرير والاعلان
يعني حكاية انا باخد فلوسي من الاعلانات دي منافية لميثاق الشرف الصحفي بالنسبة للمذيعين اللي اعضاء في نقابة الصحفيين 
عموما انا شفت وجاهة اقتراحه وشايفة انه قشطة جدا على ما صفوت الشريف يتحبس وياخد عبد اللطيف المناوي معاه وحياخد في ديله كل الناس اللي مضايقينا.. قلتوا ايه؟

56 comments:

Unknown said...

tayeb 7'odeeny 3ala ganb keda we eh mawdoo3 kamilia da?

Unknown said...

http://www.copts-united.com/Arabic2011/Article.php?I=757&A=33714
ده مدون واتقيض عليه بطريقة امن الدولة بتاعة الفجر , اراؤه زي الهباب , على دماغه مش مشكلة , المشكله هوه اتاخد ليه وازاي يتاخد كده وليه يتحاكم عسكري وليه ولا جريدة من الجرايد جابت خبره

Unknown said...

aywan .. mesh tafahemeena eih el nezam .. walla neb2a atrash fel saffa kedda ..

wekaman .. 7assal eih fel adaya bta3et botlan eltana7y kat el nahrada el mafrood ..

we kman fe twitter konty bt2ooly sm3ety 7'abar 7elw .. mat2oolyyy ba2a koll 7agga kedaa .. !!! mashy??
and what was the intention of the military and what set them straight?? based on aswany's article today ..

Anonymous said...

لا مش هاننام هى نوارة علشان بترغى واكلت دماغ حد تعرف المستخبى وباقى الشعب لا وانا متاكد ان الاخبار متسربة لانه الدكتور العوا اتكلم فيه والسلف اكيد عنهم معلومات وطبعا الجيش والحكومة السابقة والحالية والكنيسة والاخوان
يعنى انا بس اللى ماعرفش
ليه يعنى؟

محمد نور الدين said...

ست الكل مساء الخير
إنقاذ الثورة أم حماية الثورة .
الثورة لم تغرق حتى تنقذ. لهذا تمنيت لو سمي جمعة حماية الثورة
ومن فكر في هذا اليوم يجب أن نحييه لأن الثورة في حاجة للتأكيد في كل لحظة لأنها لم تصل بعد إلى بر الأمان.

ثانيا بخصوص لميس الحديدي، صدقيني لم أكن أسمع بهذا الاسم ، أنت يا النوارة اللي عرفتني عليها و الدليل أنك ذات يوم وصفتها وصفا أضحكني كثيرا لما وصفتها بالجرادة
تحياتي الخالصة

Amirat Hor Aldonya said...

كلااام جميل جدا خليتيني أتفائل شويه يللا ربنا يوفق جيشنا لمصلحة الثورة يااارب

بصي بقى يا نوراة يا جميلة أنا عندي استفسار أنا و أهلي وقعنا لمحاكمة الثلاثي المجرم و إشراف قضائي ع الأأمن الوطني ،، بس اللي معندهومش بطاقة و نفسهم يوقعوا ممكن يوقعوا بالرقم القومي اللي موجود في شهادة الميلاد الإلكترونية على فكرة انا بصيت عليه طلع هوا هوا اللي في البطاقة و لا أيه رأيكــ

Unknown said...

طب ما تورينا يا نواره وقوليلنا ايه موضوع كاميليا ده وايه علاقة عمر سليمان بالموضوع

Unknown said...

طب ما تسألوا الدكتور سليم العوا
هو قال: لم تسلم ابدا لم تسلم ابدا لم تسلم ابدا

وهو صادق

فاضل الاجابة على كام سؤال: مين هو مصدر الدكتور سليم العوا في انها لم تسلم؟

مين بقى اللي طلع اشاعة انها اسلمت وطلع الوثائق دي؟ وليه مسكوت عنه؟

مين امين الشرطة اللي راح لاهل بلدها في الصعيد وقالهم ان بنتكم اتخطفت وشحنهم على القاهرة عشان يعملوا مظاهرة؟ وراح فين؟

ليه لم يتم التحقيق في مقتل ظابط امن الدولة اللي كان ماسك ملف كاميليا؟

مش مهم فين كاميليا.. فين جوزها؟ وهل جوزها مازال كاهن لحد دلوقت ولا ساب الكنيسة؟ وبيشتغل ايه دلوقت؟

وليه موضوع كاميليا تشعب وتفرع وتحول لخناقة شخصية بين الانبا بشوي والدكتور العوا اللي ما اختلفوش على كاميليا.. بس اختلفوا على حاجات.. مش عارفين هي ايه لحد دلوقت

برجاء الرجوع لوائل الابراشي كمان

Mostafa Zayed said...

معلش انا عارف انا مش موضوعنا ولكنا عسى الله ان ينتفع احد بالمعلومة
الجيش المصرى مش خير اجناد الارض والحديث عن النبي عليه الصلاة والسلام موضوع وليس صحيحا

زينبو said...

وانا كمان والنبي خديني مع نهى على جنب وقوليلي لحسن اناكدة مش حنام لحد ماأعرف اللغز دة

صمت الحملان said...

ازيك يانوارة ربنا يخليكوا يا شباب مصر وينصرنا جميعا علي الخونة المتآمرين في خبر صاحبه بيقول انه اكيد وممكن تكوني عرفاه طنطاوي هرب حسني علي السعودية واذا كان كدا يبقي المجلس العسكري لازم يحاكم بتهمة الخيانة العظمي لانه خان الامانة وتعهد بتنفيذ طلباتنا وكل اللي بيعمله عكسها علي طول الخط وربنا ينصرنا ويفرج كربنا

aly said...

هو ايه موضوع كاميليا ماتقولي لو تعرفي بدل ما كل اللي هب ودب نازل شتيمة في السلفيين بداعي وبدون داعي؟

واللي اعرفه انهم بيتكلموا في موضوع كاميليا من قبل الثورة بكتير واتبهدلوا زي العادة بسبب موضوعها والقضية مرفوعة من قبل الثورة يعني مش بيصطادوا في المية العكرة ولا حاجة؟

وياترى مطلوب انهم ينسوا موضوع كاميليا؟؟ واضح ان مفاهيم الحرية والديموقراطية هتختلف اوي اوي عن ماكنا فاهمين. الله يرحم ايام ميدان التحرير

صمت الحملان said...

ازيك يانوارة ربنا يسترها معانا ويكمل المشوار علي خير قريت خبر علي النت صاحبة بيقول مؤكد ان طنطاوي هرب حسني علي السعودية واذا كان كدا يبقي المجلس العسكري يتحاكم بتهمة الخيانة العظمي لانه خان الامانة اللي حملها له الشعب وكمان سمحوا لبنت اخو سوزان بالتصرف في اموالها احنا لسه ابتدينا لما يعملوا كدا

aly said...

يعني الدكتور سليم العوا مش عايز يتكلم واللي بيقولوا انهم شهود كدابين
هي الانسانة نفسها فين ده اهم سؤال
يعني نلف وندور ونسال العوا والشهود والبابا وشنودة ولا الشخص المعني نفسه يظهر في العلن يتكلم اسهل!!!!!!!!

يارب اهدينا للحقيقة واجمع كلمتنا

Unknown said...

ربنا ينتقم منكم

ITHat said...

لا يا نواره احنا منهنش عليكي تسبينا معلقين طيب ايه الاخبار متعرفينا يعني ايه متسلمتش امال الناس دي بترغي في هي ايه يا نهار اسوح ... مستنين رد يا نواره

elzahraamegahed said...

بصى يا نواره أنا هنمقط من التغييرات اللى اتعملت فى مصر التهارده
هو احما كنا بنعترض على خيرى رمضان وتامر أمين مش برضو عشان موقفهممن الثورة؟ يقوموا يجيبوا ريهام؟ معلش اسنحى لى انا عشان بره مصر كنت متابعه الفضائيه على طول وهى من أكتر الشخصيات الى أساءت للثوار والثوره وما تتخيرش عن رشا مجدى وسحر ناجى
إذا كانوا مصرين يجيبوا ناس من أعداء الثوره
خلاص يجيبوا حد بيفهم ويعرف يدير حوار لأن شكلهم بينقوا بالشكل والزواق وبس

عندما ينطق القلم said...

جبهة التوعية بأهداف الثورة بالإسكندرية تحيي أبطال مصر وشبابها الشرفاء، وتربط على أيديهم وتؤيدهم في جمعة الانتصار، وسوف نخرج سويًّا بعد صلاة الجمعة من مسجد القائد إبراهيم ملتزمين بما تعاهدنا عليه من أن تكون مظاهرتنا سلمية ذات مطالب محددة وهي ما قرره إخواننا في التحرير، وكما وقفنا معًا منذ 25 يناير سنظل معًا ما دامت مطالبناالمشروعة لم تتحقق، فما دماء شهداؤنا برخيصة علينا، ولن نقبل أبدًا أن نرى أي مجرم خائن لمصر سارق لثرواتها إلا وهو خلف أسوار السجن، ومن قتل من إخواننا أحدًا لن تغمض لنا عين ولن يهدأ لنا بال إلا حينما نرى محاكمته العادله بأعيننا وفي أقرب وقت، وهذا عهدنا لشهداء ثورتنا الأبية.

هتافاتنا التي تجمع مطالبنا:
أرجو أن تصل لشباب التحرير لتكون هتافاتهم، كما سنصرخ بها في ميدان القائد إبراهيم:
قوم يا مصري يالا قول
لازم تحاكموا المسؤول
قول لجشنا وللمشير
حاكموا الحرامي الكبير
حاكموا مبارك حاكموا سوزان
لازم حق الشعب يبان
حاكموا عزمي حاكموا سرور
خلوا بلادنا تشوف النور
حاكموا صفوت الشريف
إللي عمره ما كان شريف
حاكموا النصاب والمحتال
علاء مبارك وجمال
حاكموا النصاب والمحتال
واسمه علي الدين هلال
حاكموا كمان زكريا عزمي
إللي خالى السرقة رسمي
حاكموا كمان أحمد نظيف
إللي عمره ما كان نضيف
حاكموا الحكومة الذكية
إللي لمت الحرمية
حاكموا قادة الإعلام
في الأخبار وفي الأهرام
حاكموا نقيب الصحفيين
مكرم إللي ما كانش أمين
حاكموا النصاب والمحتال
سرايا وعبد الله كمال
قول لجشنا وللمشير
دم شبابنا ثمنه كبير
قول لجيشنا إحنا هنرتاح
لما نحاكم السفاح
حاكموا حبيب العدلي وسيده
واقطعوا رجله واقطعوا إيده
قول لمجلس القوات
حرقوا ليه المستندات
دم المصري مش رخيص
هاتوا القتلة من البوليس
إللي قتلوا إخواتنا فين
الظباط المجرمين
ليه العدل نظامه مايل
حقنا ليه عليه بنتحايل
هاتوا إخواتنا من الزنازين
دول ثوار مش مجرمين
حلُّوا الحزب الوطني الواطي
إزاي قالوا عنه ديمقراطي
حاكموا محمد أبو العينين
جاب منين كل الملايين
رجّعوا لينا أراضي الدولة
إحنا شبابنا بيها أولى
يا إللي سرقتوا فلوسنا حرام
مش هنخلي عينكوا تنام

elzahraamegahed said...

موضوع كاميليا أنا بثق جدا فى كلام دكتور العوا ومصدفاه

بس ماريان وتريز الطبيبتين بتوع طب الفيوم ، دول فعلا أسلموا ودول فعلا محتجزين بقالهم سنين ويا عالم عايشين ولا ميتين
والبنتين دول بحكم شغلى فى جامعة الفيوم عندى فكره عن قصتهم وتقدرى تعرفى التفاصيل بسهوله من على النت

الموضوع مش البابا ولا السلفين وولا عند ولا أى حاجه بس فعلا حرام قصتهم مؤثره أوى

ويا ريت فعلا زى ما نجلاء الإمام ومحمد حجازى عايشين حياتهم بشكل طبيعى يقدروا الناس الناس اللى بتسلم يعيشوا بشكل طبيعى

وربنا يهدى النفوس ويقدم الخير

elzahraamegahed said...

كل الشكر والحب للقوات المسلحه ، أنتى الصراحه حببتينى فى الجيش ورجعتى لى ثقتى فيه وخليتينى بقيت متيمه انا كمان بالمشير
ولما أجيب ولد إن شاء الله هسميه حسين
بس يا ريت يشفوا غليلنا فى المخلوع وعصابته عشان نارنا تبرد من الحقير اللى سمم بدنا بالمسرطنات ولوث أرضنا بالنفايات النوويه الاسرائيليه واللى باع الغاز وباع أرض سينا لليهود

القصه مش انه حرامى ولا انه ديكتاتور حقير، ولا انه أنانى وفرط ف مية النيل عشان مقموص لكرامته ، القصه انه قهرنا وذلنا لدرجه مخليانى بدعى ان ربنا يطول عمره فى الذل والهوان هو والإنجليزيه بنت الممرضه والكلب اللى اسمه جمال

مش فاهمه said...

حانقول لا اله الا الله كنت عايزاكى تقولى لهم عاقبوا اللى كشفوا على المعتصمات بايه علشان الموضوع ده عاملى تبربنه فى دماغى

أرنوب said...

واللي في ايديهم المستندات فعلا مش بيتكلموا، بياخدوني على جنب يحكوا لي بس،
... طب ماتحكيلنا الحكاية يا ست نوارة ولا حتيجي على دي وتعملي جبانه ؟ .. بيني وبينك كده إنتي طلعتلي جبانه في حاجات كتير تانيه .. منها مثلاً : سبب عدم التحفظ على شلل الأطفال والثلاثي - على حد تعبيرك - لغاية دلوقتي .. إتكلمي .. إتكلمي - على رأي محمد منير - أمال عملالي ثورية وشايله راسك على كفك أونطه ؟

Unknown said...

سؤال جانبى بخصوص التوقعيات
بعض الناس موقعة بالسبع ارقام الاولى من غير تاريخ الميلاد ،، شغال ؟

Unknown said...

و حاجة تانية لجل النبى يا شيخة ، صورة البيان مش باينة اوى فى الطباعة و الشعب عينه متمأأه فى القراية مفيش نسخة الرزليوشن بتاعها اعلى شوية او ملف ال
Word
بتاع البلاغ

qqq said...

لا يا نوارة موش متفق مع البند 5- التأكيد علي حرية الرأي و التظاهر السلمي و عدم العمل بأي قانون يصدر لتقييد رأي الشعب الذي يستمد الجيش منه شرعيته . البند ده ما ينفعش يتحط بالطريقة العامة دية لأنه فعلا لا بد من طريقة حاسمة لفض الإعتصامات الفئوية مهما كانت عدالة مطالبها، بصي إذا حصل خلل في تطبيق القانون و ده وارد الحل يكون بالكلام مع الجيش عشان ياخد إجراء، و عمليا القانون ده عمره ما حايكون ليه أي أثر على المظاهرات الضخمة اللي يتعدي المائة ألف، و اي مظاهرة من النوع ده إستحالة الجيش يتعامل معها بعنف، و بعدين إحنا انتزعنا حقنا في تنظيم المظاهرات المليونية خلاص والجيش نفسه عايزها عشان تعطيه الدعم السياسين لكن لابد من آلية لحسم المظاهرات الفئوية بأي شكل، أيوة بكره عميد كلية الإعلام لأنه منافق و من وجوه الثورة المضادة لكن ما ينفعش أوقف الدراسة و العملية التعليمية، طب أعمل إيه ؟ أفضحة أخليه عبرة بتعليق أقوالة و غزلة في جمال و النظام السابق أضغط عليه إعلاميا، أشتكيه للكسب الغير مشروع بعد ما أجمع الأدلة على فسادة، أكشف فساده الإداري و أشتكيه للنيابة الإدارية، الخلاصة إني ما ينفعشي أعطل العمل و أخلق الفوضى: ياه نسيت أقولك إن الأهم دلوقتي إننا في المظاهرة نرجع إيد واحدة تاني، ياللا سلام

mohamed said...

فاكره لما قلتلك مفيش شىء مجانا nothing is free in this world ,وقلت يا رب اطلع غبى شوفى مين ظهر الان كمرشح للرئاسة

ahmed said...

والله يا جماعه الثوره المضاده شغاله على ودنه فى الصعيد فجاه طلع السطو على المنازل والشرطه ابتدت تلم الاسلحه اللى مع الاهالى من زمان ولا غنى عنها فى الصعيد علشان مهمه الحراميه تتسهل والرعب ينتشر وكمان الفلوس المزوره والاشاعات اللى بنسمعها ان المسلمين هايحرقوا الاقباط وان الاقباط عايزين يلغوا الماده الثانيه وعايزين نائب رئيس مش كله بالانتخاب لا كله ولا الفاسدين اللى استفادوا من الحزب الوطنى بالوظائف والاراضى

Unknown said...

ظريف إسلوبك يا نوارة وانتى بتطبطبى ع الجيش و تدادى فيه زى ما تكونى مربياهم على حجرك إنما أنا حاسس إن المجلس العسكرى ده مش بينفذ مطالب الثورة إلا لما يلاقوا الناس خلاص نازله لهم فى الميادين....عشان كده أرجوكم لازم نصر على المطالب كلها مرة واحدة على بعضها مش هبابة هبابةو مانلغيش المظاهرة بعد ما يوم الخميس يعملولنا شوية مسكنات زى كل مرة......يعنى بيقبضوا على ناس مننا ويقدموهم للمحاكمة و بعد كده يزفولنا خبر مراجعة الأحكام أو الإفراج عشان نكتب فيهم قصايد المدح .......يا نوارة المفاهيم بعد 25 يناير إتغيرت خلاص و ماعدش فيه محكوم مستنى عطف الحاكم و حنيته ولا كلامى غلط ....يا ريت تردى لو سمحتى دى أول مرة أعمل كومنت عندك و شكرا

monasoly said...

نواره انا بسال ليه المجلس الاعلى يقبض على شباب طاهر وبعدين يعتذر ويفرج عن واحد بس هما ها ينقطوا الشعب والا ايه ؟ لا وايه سرعه فى المحاكمه غريبه وسايب الثلاثى الشيطانى والرباعى المباركى احرار ولاحتى يضربهم على ايدهم ويقول لهم كخ عيب ايه ده دى الناس اتنبح حسهم مطالبين المجلس سرعه اتخاذ القرار بمعاقبتهم وكان الجيش اللى مع الثوره بيحاربوا جيش تانى شرير موجود فى عالم موازى فى بعد اخر فى مصر تانيه ؟ فى ايه يامجلس انجز بقى نشفت دمنا وحرقت اعصابنا .

Moataz Medhat said...

أرجو نعمل حملة لمقاطعة الشركات اللي تعلن في القنوات و البرامج اياها، زي ما قلتي.

خلينا نخلص منها.

كيوبيد said...

نواره اول مره اعرف انك سوسه عارفه معلومات ومخبى ومش عايزه تقولى لينا ماشى برحتك من حقك يانوار الثوره فى مصر ده اولا ثانيا بخصوص المطالب والجمعه 1 ابريل ربنا معنا ومعكو وفعلا احنا فى حاجه لمظاهرة تعرفنا ان الثوره لسه ومش معنى ان مبارك مشى وكام مسئول فى السجن يبقى خلاص بس الخوف انى اشوفكم فى السجن بتهمة الفوضى والى البلطجه التهم المعلبه دى بتاعت المجلس العسكرى وربنا معنا كلنا ويوفقنا جميعا لما فيه الخير لمصر

eman said...

ماشى يا نواره ماشى يعنى انت كمان تحنسينا بحاجات علرفاها واحنا لأ .... عموما يا خبر النهارده..ماشى
بالنسبه لموضوع المظاهرة انا معاكم لازم نطالب بمحاكمتهم ولم الفساد دة بقى ..بس شباب الائتلاف ع الفيس بوك كلامهم يقلق وبيسخنوا الدنيا ع الجيش

فارس بني خيبان said...

Dear Nawara,

Sorry i'm typing in English but I am facing a lot of difficulties in typing in Arabic ya3ni mesh
3awagan wallahi.

First of all, the Camillia issue is an issue of human rights and therefore all people no matter what their ideologies are should press to reveal all information regarding the issue

Second, reguarding the trial of the three musketeers Safwat and Azmy and Sorour there is a very important issue reguarding the petition and Egyptians abroad that I would like to discuss with you because I need your help so if you please may you contact me:
ababdelhadi@gmail.com

Thanks in advance

omar said...

طب ما تفضحيهم انتى يا نواره الناس المتورطين فى موضوع كاميليا دا وتخلصينا
احنا عايزين نعرف مين فى البلد دى نضيف ومين ......
ولا بلاش

omar said...

الأخ الى بيقول حديث خير اجناد الأرض ضعيف عنده حق
لكن فى احاديث صحيحه بنفس المعنى
زى مثلا
- حدثنا زهير بن حرب حدثنا عبد الله بن يزيد حدثنا حيوة قال : أخبرني أبو هانئ حميد بن هانئ الخولاني أنه سمع أبا عبد الرحمن الحبلي وهو عبد الله بن يزيد و عمرو بن حريث وغيرهما يقولون : إن رسول الله صلى الله عليه وسلم قال : إنكم ستقدمون على قوم جعد رؤوسهم فاستوصوا بهم خيرا فإنهم قوة لكم وبلاغ إلى عدوكم بإذن الله ـ يعني قبط مصر ـ

وحديث آخر أخرجه الطبراني وصححه الألباني.
الله الله في قبط مصر فأنكم ستظهرون عليهم ويكونون لكم عدة وأعوانا في سبيل الله

Anonymous said...

ايه رأيكم ان المظاهره تكون امام قصر الرئاسه
ونطالب بإن ملفات ديوان الرئاسه تسلم الي لجنه قضائيه
اكيد فيها مستندات تودي المخلوع في داهيه
ونحاول انقاذ ما تبقي منها قبل ما عزمي يفرمها

Alok Ray said...

ياريت تقرا ده وتقللى رايك فيه؟
http://www.alwafd.org/index.php?option=com_content&view=article&id=28509%3A%D9%81%D8%B2%D8%A7%D8%B9%D8%A9-%D8%A7%D9%84%D8%A5%D8%AE%D9%88%D8%A7%D9%86-%D9%88%D8%A7%D9%84%D8%B3%D9%84%D9%81%D9%8A%D9%8A%D9%86-%D8%B3%D9%84%D8%A7%D8%AD-%D8%A7%D9%84%D8%AB%D9%88%D8%B1%D8%A9-%D8%A7%D9%84%D9%85%D8%B6%D8%A7%D8%AF%D8%A9&catid=150%3A%D8%AB%D9%88%D8%B1%D8%A9+%D8%A7%D9%84%D8%BA%D8%B6%D8%A8&Itemid=409#axzz1HowI5Rj0

new said...

مهم جدا يضع ثوار الجمعة موضوعبن ضمن الاهداف العاجلة جدا جدا جدا الان لانقاذ مصر
الامن - ولو من خلال تقنين وضع اللجان الشعبية وفتح باب التطوع الفوري فيها - والاقتصاد والاستثمار وتشغيل البطالة وفتح مصانع جديدة وقديمة بسرعة وتوسع الزراعة والانتاج الحيواني والثروة السمكية
البلد كده بتقع بتقع بتقع
اقروا ده وانتوا تقتنعوا
http://www.masrawy.com/News/Egypt/Politics/2011/march/29/washonton.aspx?ref=extraclip

kbahey said...

نوارة

دة مثال ناجح على ازاي المانيا الشرقية اتعاملوا مع الشتازي، زي امن الدولة عندنا

يا ريت توصلي الكلام دة للي تعرفيه

انا بعته لبلال فضل من شوية و الله اعلم حيشوفه و لا لا لان هوتميل بغزالة

http://www.montrealgazette.com/news/Germany+offers+Egypt+advice+disbanding+secret+police/4521212/story.html

Unknown said...

اللهم احفظ مصرنا من الجهل والجهلاء و الفتنة" موعدنا يوم الجمعة في 1ابريل "


بجد انا قلقانة من اللغو و المزايدِة في الدين وفتح ملفات قديمة اللي مفروض اننا نفهم انها كانت لعبة من امن الدولة الكلاب يعني لما ضربونا بالقنابل و الرصاص كانوا بيفرقو ا بين المسلمين و المسحيين وفي الميدان كنا كلنا واحد قاعدنا علي نقس الارض و اكلنا نفس الاكل اللي كان موجود سواء لقمة حاف او بقسامطة محدش سئل مين مسلم ومين مسيحي؟
يا جماعة فوقوا بقي مصر السلام و السماحة مهما عملتا لانا ربنا قال كدة في القران وفي الانجيل و التاريخ بيقول كدة الفاكرين نفسهم فاهمين من غير ما يقرؤا هذه المصادر فانهم يغفلون جزء كبير من الحقيقة و مساجدنا و كنائسنا و ماعبدنا اليهودية اكبر دليل علي ذلك الفن المصري الرائع سواء في المعابد المصرية او الكنائس او المساجد او المدارس هو نتاج التسامح و المزج, فالفنان و المهندس القبطي بني و زين المسجد وادخل الكثير علي الخط العربي و اللغة العربية وفعل المسلم نفس الشئ.نحن نسيج واحد نشرب من النيل المقدس و تشرق علينا شمس واحدةوناكل مماتنبت ارضنا نتحدث لغة واحدة مزيج فريدمن العربية والمصريةالقديمةوالقبطية التي ما هي الا اخرمرحلة من اللغة المصرية القديمة ولولا الكنىسية القبطية لفقدنا هذه اللغه الفريدة.لن نسمح لفكر بربري غاشم يتخذ من الدين ساتر ان يدمر هذا التاريخ العظيم والوطن الكريم والشعب الذى مازال العالم عاجزا عن فهم اسرار حضارته التي اراد الله لها البقاء كاأكبر دليل علي نبوغ و تقوي هذا الشعب العظيم

Sabertooth said...

يا ست نوارة لو عارفة حاجة قوليها بلاش إسلوب فيصل القاسم ده ، اه المعلومات إلي عندك ...؟؟

د. هانى احمد said...

http://www.shorouknews.com/contentdata.aspx?id=419272
النائب العام سمح لنسيبه سوزان بالتصرف فى اموالها.. حاجه غريبه جدا

ايه رايكم يا ثوار فى هذا النائب العام المتباطئ فى اخذ حق المصريين والان ممكن نقول متواطئ مش كده ولا ايه؟ ليه مستعجل اوى على قريبة سوزان انت فاكر ان عندها فلوس فى مصر بس.. وخايف عليها تشحت زى معظم المصريين.. متخفش يا صنيعة النظام البائد عليها الفلوس بره كتير انت بس كمل جميلك واسمح لها بالسفر خليك اصيل!!! داهيه لتكون سوزى وكل عيله مبارك كتبوا كل حاجه باسمها تبقى حركه ملعوبه يا سيادة النائب

د. هانى احمد said...

لازم مليونيه لازم مليونيه.. علشان الكل يعرف ان الشعب المصرى مش نايم وح يحمى وح ينقذ ثورته العظيمه وان الشعب هو ابو وام واخو واخت و و و ولازم الجيش يسمع كلامه علشان يبقى فعلا الجيش والشعب المصرى الجديد المعاصر اللى مفيش حد يقول عليه قاصر تانى ابدا يبقوا ايد واحدة ضد المفسدين و معا نحو مصر الحره المتقدمه فى كل المجالات ان شاء الله

Unknown said...

الناس سايبة الموضوع الرئيسي وبتتكلم في موضوع كاميليا برضه

والله العظيم عيب قوي لما رجالة بشنبات كل همهم كاميليا راحت فين.. امال لو كانوا نزلوا لكم صورة حلوة شوية

والله العظيم تلاتة لو في ايدي الوثائق لو كنت نزلتها وعملت فضيحة بجلاجل، بس للاسف انا مش في ايدي وثائق وانتوا ما عندكوش استعداد تسعموا اي حاجة عن اصنامكم الا بالوثائق
خليكم ماشيين وراهم بقى

احلام جوليا said...

نوارة يهمني اكلمك في موضوع مهم بصفتك صحافية دلوقت الاراضي الي اشتراها اجانب من مصر باسعار زهيدة جدا وبدعم من مصر كشعب في سينا وغيرها من مدن مصر بيقولوا حيطلبوا فرق السعر من المشتري ويسيبوا له الارض ده مش عدل يا نواره الاراضي دي اصلا مش من حقهم يبيعوها لمستثمرين سواء كانوا عرب او غير عرب من غير المصريين يعني اجانب
فطبقا لقانون الدولي ومبدأ المعاملة بالمثل وهو مبدأ متعامل به عالمياً ليس من حق رعايا دولة تمنع المصريين من امتيازات محدده ان يكون لهم الحق في تلك الامتيازات في مصر بمعنى المصري لا يستطيع شراء شبر واحد في الخليج او اي دولة عربية ممنوع ويدفع ايجارات مضاعفة عن اولاد البلد باعتباره اجنبي فلماذا يسمح للخليجي والسعودي وكل اهل الخليج بشراء اراضي وشقق وخلافة في مصر ويبنوا على اراضينا الزراعية حمامات سباحة بحجة استثمار كصحفية صلتي الضوء على الموضوع قبل ما يدفعوا القرشنات ويسوها ومتنسيش اشتروا وليد بن طلال وغيره اراضي سينا الي المصرين دفعوا فيها دمهم وحياتهم دفع فيها السعوديين ملاليم وخدوها منا يخدوا ملاليمهم ويرجعوا ارضنا ولا اية يا نواره ؟؟؟؟

فارس بني خيبان said...

I agree Camillia S7ata shouild not be on top of our priority list. Our top priority is to save our revolution by more pressure to meet all the rest of our demands but it should't be forgotten after we accomplish our more important goals.

Ahmed said...

للأخت أحلام جوليا
شراء غير المصريين للعقارات في مصر هو مصلحة لمصر لما فيه من تشغيل للمهندسين والعمال المصريين وتصدير للعقارات - ودبي والبحرين فيهم نفس الموضوع، والسعودية حالياً بدأت تسمح بتملك الأجانب للعقارات، من فضلك بلاش بلبلة - المجمتمعات المتميزة في 6 أكتوبر والقاهرة الجديدة هي أضافة لمصر لأن الأجانب ميقدروش يأخدوها ويمشوا!! زي ما مصر الجديدة والمعادي وحتى القاهرة الأسماعيلية بنيت بأستثمارات الأجانب وتملكها الأجانب، ثم عاش فيها المصريين بل ويفتخرون بها.

أحمد زاهر said...

أفكار كميله خالص ربنا يباركلك يا صلاح يا صابر ويصبرنا وإياك على هؤلاء الطواغيت

Argenda said...

كان واحد مرة قالي إن الناس لما تحس إنها مهزومة بتمسك في حاجة تخليها قضية حياتها عشان تحس إن لها قيمة مش مهزومة
مرة منتخب مرة واحدة مرة شيخ مرة قسيس
كفاية كده بقه ، مصر قدامنا نمسك فيها و نخليها قضية حياتنا

عربية said...

http://arabiahgdn.blogspot.com/
أول يوم تدوين ليا
ساعدوني اصلي غشيمة
ازاي ممكن تتعرف المدونة و الناس تقراها
ها يا نوارة؟
ها يا خوانا؟

elzahraamegahed said...

لا يا نواره عندنا استعداد نسمع ونغهم ومن غير وئائق وأنا بثق فى دكتور العوا وفيكى وكل واحد ليه عقله يحكمه واللى عندك قوليه وأجرك على اله ويا صابت يا خابت ولو سمحتى يا ريت تبعتى لينك وائل الإبراشى اللى بتقولى عليه ويا ريت تقولى اللى عندك عشان تفهم الدنيا ماشيه ازاى ومين اللى عامل الغليان ده فى البلد إنتى فيه ناس كتير بيثقوا فيكى فياريت تستفيدى من كده لأن ده بيحط عليكى مسئوليه

mohamed elbanna said...

صباح الفل يا نوارة
أنا عندى ليكى فكرة يمكن تعجبك
ممكن يكون ده مش وقتها لكن خليها عندك
الجيش وعدنا انه يعمل الإنتخابات وبعدين يمشى ويعود الى ثكناته
وفى احتمال كبير ان شاء الله انه يوفى بوعده ويبقى فله
انا باقترح لو اليوم ده عشنا وشفناه اننا ننظم احتفالية كبرى على مستوى مصر كلها لتوديع الجيش الى مكانة الطبيعى ، مش قصدى حفلة أغانى لكنى قصدى عمل شعبى بسيط ومؤثر والعالم كله يرصدة
ان شالله نقف على أطراف المدن ومعانا ورد ونؤدى التحية العسكرية لكل دبابة أو مدرعة
أو نعمل حفلة كبيرة فى التحرير
أو غيره أفكار كتير
ده هيكون مهم ليه
علشان العلاقة تتأكد وتتوثق مع الجيش ويعفوا اننا وهما ايد واحده واننا بنشكرهم بجد وانهم طول العمر هيكونوا فى صفنا ضد أى مجهول قادم وعلشان كل قادة الجيش الحاليين والمستقبليين يعرفوا كده كويس
وعلشان كمان العالم كله يعرف ويشوف ويتعلم
الفكرة عندك ولو مقتنعه نفذيها بالشكل اللى تشوفيه

وصباح الفل

hayat ank said...

حاخه واحد عايزه اسالهالك ايه رايك فى تعيين عصام شرف زتهى حواس وزير للاثا بعد ما شاله لانه خلص على اثار مصركلها بيع حتى فى ايام الثوره ولغايه دلوقتى هجمات بتتدبر برعايته وقعد شهر واكتلر يقول ما فيش حاجه فى المتحف اتسرقت وكلع تمام وهو سارق 52 قطعه والناس كانت بتتظاهلر ادام الوزاره علشان يشيلوه فشاله وبعدين جابه تانى هو والحربايه سوزان مش ده تواطئ

د. هانى احمد said...

http://www.maikelnabil.com/2011/03/blog-post_07.html
تم القبض على هذا المدون اكيد بسبب كلامه ده... دى حاجات خطيرة جدا وانت يا نواره والجيش لازم يوضح ليه اتقبض عليه وايه بالتفصيل الممل اللى تفسيرهم و ما تم بخصوص هذه الانتهاكات وهل فيه بعض كبار القادة بيحاول اجهاض الثورة؟؟؟؟

hayat ank said...

سبة العمال والفلاحين تفجر ثورة غضب القضاة وفقهاء القانون ضد الاعلان الدستورى الجديد


اللواء ممدوح شاهين أثناء حديثه عن الإعلان الدستوري
أثار الإعلان الدستورى الذى أعلن عنه المجلس الأعلي للقوات المسلحة غضب واستياء عدد من القضاة وفقهاء القانون حيث أكدوا أنه لايوجد إعلان دستورى في العالم يضم 63 مادة ومن غير المقبول أن يستمد المجلس العسكري الاعلان الدستورى من دستور ساقط

قال المستشار عادل فرغلي رئيس محاكم القضاء الإداري السابق أنه غير راضي تماما عن الاعلان الدستورى الجديد،مضيفا أن المجلس العسكرى شكل لجنة قضائية لتعديل الدستور حددت تلك اللجنة 9 مواد فقط لتعديلها من دستور 1971 وتوجه الشعب للإستفتاء على تلك المواد التسع فقط فهل من المعقول أن يستفتى الشعب على 9 مواد وبعد ذلك يصبع الاعلان الدستورى مكون من 63 مادة


وقال فرغلي المتعارف عليه قانونيا ودستوريا في العالم كله أن الاعلان الدستوري يضم المواد العامة المتعلقة بالحقوق والحريات في جميع دساتير العالم وتسمى المواد الشكلية بالإضافة الى مواد موضوعية يستفتى الشعب عليها قبل إقرارها ولكن والكلام مازال على لسان فرغلي ما معنى أن يستمد المجلس العسكرى من الدستور المواد الخاصة بنسبة العمال والفلاحين في مجلس الشعب

وأضاف كان عندى أمل يشاركنى فيه غالبية المصريين بأن يلغوا كل أشكال التمييز فما معنى أن يتم تمييز العمال والفلاحين في مجلس الشعب فالمصريين متساوين في الحقوق والحريات ولا يجب أن يكون هناك تمييزا بينهم على أى أساس وتساءل فرغلي لماذا لم تطرح تلك المادة ضمن المواد التى استفتى عليها المواطنين في 19 مارس الماضي.
وشاركه الرأى المستشار الدكتور محمد عبد البديع عسران رئيس الدائرة الثانية بمحكمة القضاء الاداري قائلا هذا ليس إعلان دستورى وإنما دستور جديد أعترض عليه بشده نسبة 50% عمال وفلاحين كانت مناسبة في الستينات ولكن ما معناه وجدواها حاليا
ولفت عسران الى أنه من الأفضل لنهضة مصر وصلاحها أن يضم مجلس الشعب العلماء والمفكريين وصفوة المجتمع بدلا من الاعتماد على القبليات والعائلات وشدد عسران إذا كان الاعلان الدستورى الجديد لم يذكر جديدا بشأن انتخابات مجلس الشعب والشورى فمعنى ذلك أن الثورة لم تحقق أهدافها وأننا سنرى برلمانا مشابها للبرلمان الذى تم حله


كما أكد المستشار الدكتور البيومى محمد البيومى نائب رئيس مجلس الدولة وأستاذ القانون العام على أن الاعلان الدستور الجديد باطلا ومخالفا لأهم مبادئ الثورة مضيفا أن دستور 1971 ساقط بسقوط نظام مبارك البائد ومن ثم فلا يجوز أن يستمد منه المجلس العسكرى 80 %من نصوصه ولفت البيومى الى أن أحد أبرز أسباب قيام الثورة كانت تفصيل دساتير من شأنها إحكام قبضة الفاسدين على البلاد وبالتالى فماذا يعنى أن نقيم ثورة لنسقط النظام والقانون ثم تقوم القوات المسلحة بتعطيل الدستور ثم العمل بما يزيد عن 80% من نصوصه وتسائل لماذا تم الاستفتاء على تسع مواد فقط


وشدد البيومى على أن الاعلان الدستورى من المفترض ألا يزيد عن 20 مادة وأضاف ما جدوى عدم إلغاء نسبة العمال والفلاحين وعدم إلغاء مجلس الشورى وعدم تشكيل لجنة تأسييسية لتشكيل دستور جديد خاصة في ظل وجود بقايا وأعوان النظام السابق خارج السجون وتنظيمهم لثورة مضادة وشدد البيومى على أن المجلس العسكرى تفرغ لترقيع دستور 1971 بدلا من أن يبذل جهودا مضنية في القبض على من استولى على ثروات البلاد طوال الأعوام الماضية


ومن جهته ذكر المستشار أحمد وجدى أحد أعضاء قسم التشريع بمجلس الدولة أن المجلس الأعلي للقوات المسلحة لم يسلك الطريق الصواب مضيفا أن الشعب قام بثورة ليسقط النظام والدستور ومن ثم فكان عليه أن يعد إعلانا دستوريا منفصلا ومنقطع الصلة عن دستور 1971 يضم المبادئ العامة الموجودة في جميع دساتير العالم بالإضافة الى المواد التى وافق الشعب على تعديلها وتساؤل وجدى عن أهمية الابقاء على نسبة العمال والفلاحين ضمن الاعلان الدستور الجديد

قائلا هل مبادئ ثورة يوليو مازالت قائمة هل بعد أن تعمد رأس النظام السابق هدم جميع منجزات ثورة يوليو نسبة العمال والفلاحين هى الملاذ الوحيد

وشدد وجدى على الاعلان الدستورى بشكله الحالي يؤكد على أن القوات المسلحة تعيد إنتاج نظام مبارك ولكن بوجوه جديدة القوات المسلحة تعجل من إجراء انتخابات الشعب والشورى لجمع شتات النظام السابق
وحمل وجدى مسئولية التخبط القانونى المترتب عليه خروج الإعلان الدستورى بالشكل غير المرضي للجميع الى اللجان القضائية سواء التى قامت بإختيار المواد التى يتم تعديلها من الدستور أو التى قامت بصياغة الاعلان الدستورى بشكله الحالى مركدا أن هناك حالة من التخبط والإرتباك تشوب عملهم.

Unknown said...

عاجل جدا للصحفيين والحقوقيون: مصر: قام ضباط جيش بإطلاق 8 رصاصات حية من أسلحتهم الميري علي مواطنين عزّل في شارع محمد عبد الخالق بحلمية الزيتون بسبب أعتراض مجموعة من الأهالي - وأغلبهم من الشيوخ فوق ال 50 عام - علي أن الضابط بسبب قيامه بسد مدخل حارة بالشارع بسيارته والصعود إلي منزل خطيبته فقال لهم: أنتوا متعرفوش أنا مين؟ - وتعصب أطلق عليهم رصاص حي من الشباك ثم جاء أصدقائه من ضباط الجيش وأطلقوا النار أيضا محاولين أخراجه أمنا من الشارع بعض غضب جميع الأهالي ولكن وصلت الشرطة العسكرية وقامت بأحتجاز ضباط الجيش والمواطنين للتحقيق بمعسكر المخابرات بشارع محمد عبد الخالق بحلمية الزيتون والأن منذ دقائق المواطنين اتصلوا بنا ويستغيثون من ان العقيد هناك يضغط عليهم بالتخويف لكي يتنازلوا عن حقهم وهم رفضوا وقد غادر الضابط بسيارته بلا اي رقابة ويخشي الاهالي أن يقوم العقيد بتلفيق التهمة لهم وسجنهم - نداء للصحفيين أن يقوموا بالأتصال بأحد المحجوزين علي هذا الرقم 0118080722