Tuesday 15 March 2011

يوم 18 حننتقم من قتلة الشهداء

شركات الموبايل اللي قطعوا عننا التليفونات يوم 28 وما عرفناش نتصل بالاسعاف وناس ماتت عشان هم قاطعين الاتصال
ولا حد يقول لي غصب عنهم، ولا حد يقول لي مجبرين
قضوا كل سنين خدمتهم بيتجسسوا علينا وبيسلموا مكالماتنا ورسائلنا واحد واحد لامن الدولة وتليفوناتنا متفرغة في امن الدولة ومكتوبة بالوثائق، وعرفوا اننا كنا بنتقتل في الشارع وفضلوا قاطعين عننا الاتصال، كانت حتعمل لهم ايه وزارة الداخلية اللي ادتهم الامر؟ كانت حتقتلهم كلهم؟ كانت حتطردهم؟ ما تقدرش، لانها كانت مستفيدة منهم، قطعوا الاتصال الصبح عشان ما نتفقش على الاماكن، طب لما عرفوا اننا اتفتح علينا رصاص ما فتحوش الاتصالات ليه؟ ما جاش في بالهم اننا محتاجين اسعاف؟ اننا كنا بنتفرق وناس مننا كانت بتتزنق في شوارع جانبية لوحدها وتتحاصر ومحتاجة تكلم حد؟ ان واحد كان محتاج يبعت رسالة يبلغ اهله ولا اصحابه انه اتقبض عليه ولا انه مرمي مصاب في حتة؟ 
الناس دي ماتت ليه؟ كان منهم ناس كتير ممكن تعيش لو كان فيه تليفون واتصلنا بالاسعاف، عمري ما حانسى اننا ما عرفناش نتصل بالاسعاف على كوبري قصر النيل 
ليه؟ ليه؟ ليه الوشوش دي تموت وتتقطف بدري كده؟



ليه يا مبارك انت تعيش وهم يموتوا وتقطع عنا النجدة والاتصال انت والخدامين بتوعك بتوع شركات الاتصالات؟ انا مش مسامحة، مش مسامحة ومش عارفة اهدا ابدا، وناري مش عايزة تبرد ولا حتى تخف، كأنه لسه حاصل امبارح
يوم تمنتاشر مارس كلنا حنقفل الموبايلات وده حيخسرهم فلوس، وانا باقول كمان نشيل البطريات كلنا بتاعة التليفونات عشان فيه واحد قال لي ان ده بيوقع السيرفر باين ولا ايه ما فهمتش قوي، بس اهو حاجة اذية لهم وخلاص، نخسرهم يوم فلوس.. زي ما خسروا مصر شباب كان ممكن يعيش ويخدمها، كان ممكن يعيش ويفرح معانا بنجاح الثورة وهم كانوا اولى ناس يفرحوا، كان ممكن يعيش ويشارك في الاستفتاء والانتخابات ويعيش عيشة محترمة كريمة ويشوف مصر حرة زي ما كان بيحلم لحظة ما نزل من بيته.. هم قتلوهم.. وانا مش مسامحة
حسبي الله ونعم الوكيل فيهم
ومالهمش عذر
مدام احنا قطعنا على نفسنا العذر ونزلنا يوميها وناس منا ماتت.. هم اللي قاعدين في التكييف مالهمش عذر، واحنا مش قادرين عليهم ومش عارفين ننتقم منهم غير باننا نخسرهم فلوس، ونرفع قضية ممكن يطلعوا منها
بس ربنا موجود، ومسيرهم يدوقوا حرقة القلب اللي دقناها يوميها واللي طعمها مش عايز يروح من حلقي لحد النهاردة

53 comments:

elzahraamegahed said...

ربنا موجود
حسبنا الله ونعم الوكيل

محمد السيد said...

والله معاكي حق عاوزين نتجمع ونعمل توكيلات لمحامين محترمين ونرفع علي شركات المحمول قضايا تعويض
وكمان نلزمها بنشر اعتذار في الجرايد

abooood said...

نوارة يانوارة اناموافق طبعا

Mohammad said...

MESH DAH SAWERAS ELLI 3AMEL FEEHA WATANY

Unknown said...

mesh dah saweras elli 3amel feeha watany

Unknown said...

mesh dah saweras elli 3amel feeha watany

Sameh Elsawy said...

ارجو التوضيح لنا


اللي مهم زيه زي التعيلات هو استئاف موضوع ضخ الغاز الي اسرائيل
انت تعلمي جيدا انها اتفاقيه فساد وعمولات وخيانه لينا وللوطن.
علي اي اساس تم استئناف ضخخ الغاز ارجو التوضيح لنا
اذا كان بنفس الاساس السابق, فهو استمرار للفساد, واعلان واضح عن فشل الثوره واهدار دم شهدائها.

goha said...

لا بد من مقاضاه الشركات أمام المحاكم الدوليه، و الحصول علي غرامات مردعه للأعمال الإجراميه،تعطي لعإلات الشهداء و المصابين .

Abu Marwa said...

وخاصة شركة المناضل الكبير وعضو مجلس الحكماء ومحتضن شباب الثورة - موبينيل - واللي خايف على البلد اللي اشتراها هو واخواته - ونصير الثقافة وكبير العائلة - نجيب باشا ساويرس اللي أول مافتح قنواته قال انه مافيش سياسة ولا دين - أؤيد معاقبة شركات الاتصال ولا يغرنكم براءة وشهامة وشجاعة ومروءة الشيخ نجيب ساويرس اقصد القس مجيب ساويرس - أرجو النشر

العربي said...

كلام معقول جدا بس انا عايزة اقول حاجة في موضوع غبي و ثقيل الدم يتم الان استغلاله من ناس تافهة و هو انشار التيار الاسلامي المهم هذا الكلام للاسف و يمكن بحسن نية طلع عبود الزمر في ثلاتة فضائيات بيوم واحد و كان حواره غبي و متطرف و متخلف كمان بس انا عايزة اقول حاجة جريدة امن الدولة اليوم السابع حتقول في العد الاسبوعي في تخطيط لدولة اسلامية و كلام فارغ كالعادة اليوم السابع كلاب الفتن و بنفس الوقت تطلع لافتة لا علاقة لها بالاخوان تقول ان الاخوان يفتو بلزوم التصويت بنعم على التعديلات مش عارفة مين علق اللفتة دي الي كل الاخوان قالو انو الكلام دا غير صحيح المهم الان هذا هو ثمن الحرية محاربة الفكر لازم تكون بالفكر مش بالاعتقال و المنع و الاتهاض و احنا ناس وعيين بلاش نخلي ناس تفهة تضحك علينا و تعمل بلبلة و تخويف ملوش معنى الحرية كدا لازم تسمع كل الافكار و تواجها بالافكار من غير عنف و بس

ABO YOUSUF said...

حسبنا اللـــه ونعم الوكيل .. اللهم اغفر لشهدائنا وإرحمهم وعافهم واعف عنهم وأكرم نزلهم ووسع مدخلهم وتجاوز عن سيئاتهم واغسلهم من الذنوب والخطايا بالثلج والماء والبرد وارزقنا وارزق أهلهم الصبر والسلوان .. اللهم غفر لنا ولوالدينا وللمسلمين والمسلمات والمؤمنين والمؤمنات الأحياء منهم والأموات ... آآآمين

Unknown said...

خسروا دينهم علشان دنيا غيرهم....فى خيبه اكثر من كده...الواحد لما بيعمل حاجه جامده كويسه بيحس باحساس جميل جميل ....لكن هم حاسين بأيه؟؟؟ على فكره يانواره قوليلى اللى حايقولوا لأ اجندتهم ايه؟

ورقه ورد said...

ماشى يا نواره كلامك بس تفتكرى ده كفايه

Omadham said...

السلام عليكم و رحمة الله و بركاته
كلام مضبوط ميه في الميه
الواحد بيعمل إشتراك علشان يتكلم لما هو يكون عايز مش لما الشركة تسمح له يتكلم
اتصال الأسعاف ده ضرورة إنسانية حتى لو المشترك ما عندهوش رصيد
دول مش بس يستاهلوا نقاطعهم يوم 18 مارس بس, لا 18 يوم كمان
ده اقل واجب

elzahraamegahed said...

نواره لو سمحتى عايزه اعرف ايه فايدة العشر ايام اللى عملوها حوار مجتمعى قبل الاستفتاء على الدستور
فعلا ايه فايدتها؟
طب فيه نقط فيه شبه اجماع عليها ووجيهه جدا ليه ما تتعدلش قبل الاستفتاء

يعنى ليه تبقى الزوجه العربيه اجنبيه مش عشان زويل أبدا،انا اساسا هرشح البسطويسى
بس عشان فعلا مصر جمهوريه عربيه والعرب مش اجانب

ليه مثلا الحد الاقصى من السن مش متحدد
كفايه اوى واحد يحكم 70 ويخلص على 74

ويعنى ايه الرئيس يختار نائبه بعد شهرين ، طب ما يختاره عند الترشح او يتم انتخاب النائب ،

انا مش عارفه برضه هو الاشراف على الانتخابات لسه زى ماهو للدستوريه ولا بقى للنقض

المهم المبدأ الحوار المجتمعى والنقط اللى القضاه والمثقفين التكلموا فيها يتاخد بيها او يترد عليها او يتاخد بعضها او حد يعبرنا

dahlia.. said...

معاكي ان شاء الله

Unknown said...

شيلوا البطارية من غير ما تاقفلوا الموبايل شيلوا البطارية وهو مفتوح الموضوع دا هيفشخ شبكة الاتصالات بس لو عدد كتيير شال البطارية وفية عدد كتيير برضة بيحاول يتصل بالارقام اللى اتشال منها البطارية هتفشخ الدنيا

Anonymous said...

موافقة

Anonymous said...

موافقة

tahrir said...

سؤال
لما احنا خايفين على اصواتنا من التلاعب و بنقول ما نسلمش دقننا لحد
ليه شايفة اننا نقول نعم للتعديلات ؟
مش كده نكون سلمنا رقبتنا لرئيس الله اعلم حيكون شكله ايه ؟
يا ريت بدل ما تحاولي تقنعي الناس بحاجة انتي مش مقتنعة بيها اصلا
تقولي ليهم ليه اسلوب اللي رماك على المر ,الجيش ... مش كده ؟

tahrir said...

بدل ما نخسرهم فلوس و ضرايب البلد تقل الاحسن نجمع الادلة و نقدم بلاغات للنيابة عشان يقولوا مين اللي اداهم الاوامر و نوقع الفاسدين فيبعض

Sgheita said...

sa7 keddah you are absolutely correct these ppl tawat2o fee gareemat al qatl.. not only on 18th of March ..also every night from 12-6 a.m we remove the batteries
on a second note did you listen to this http://www.youtube.com/watch?v=kpkpt84mPSQ&feature=youtube_gdata_player

بساطه said...

ماتوا ليه؟؟ عملوا ايه؟؟ مش قادر ابطل اسال السؤال ده بنفس الدموع والحزن؟؟؟ الله يرحمهم ويرحمنا.. انا معاكي يا نواره باذن الله دي فكره حلوه ومش هيجرى حاجه لما نستغنى عن تليفونتنا يوم.. وبرافو انك افتكرتي الشركات دي لحسن نسيناهم في الزحمه..

Mohamed omar Zaian said...

howa anna law 3aiz a3mel tawkeel le7ad 3ashan el 2addeya deeh aro7 le meen w a3mel eh , ana fe eskndria

PRIEST said...

انا معاكى يا نوارة فى كل الكلام اللى كاتباه و عاوز أضيف حاجه صغيره اوى .... يالى قفلت الخطوط قفلك على مفتوح ،لأن قفل الخطوط شىء واضح و مفضوح ، فأى شىء فى الخطوط ،الناس هاتقفل المفتوح ،و الناس كانت بتموت بسبب الخطوط ، فيبقى مين ملطوط .

شمس النهار said...

هشارك في ده بالرغم انهم قطعوا الاتصال رغم انفهم وكمان خسروا ملايين في الكام يوم ده
لكن هشارك علشان كان ممكن قطع الاتصال وساب ارقام الطوارئ مفتوحة لكن حتي دي قفلوها يبقا هنا في تعمد بقتل الشعب بعد حبسه لوحده
حد يحبس شعب بحاله
وماحدش يقول لي ان ده هيجي علي دماغ العاملين من المصريين
يعني وهو مالك الشركات دي ايه مش مصري

ayman radwan said...

انا موافقك في المقاطعه دي نواره بس لازم نحدد وقت معين نقفل فيه كل الموبيلات
وليكن من الساعه 12 الظهر لغايه الساعه 8 بالليل ال هو موعد الوقفه الي احنا بنعملها ويكون كل اسبوع لغايه لما الشركات دي تتحاكم هما والي قتلو اخواننا كلهم

negmat lail said...

ايه ايك بخصوموضوع حنعمل ايه بعد لا ::
موقع الدستور الاصلي
الدكتور يحيى الجمل نائب رئيس الوزراء في برنامج "مصر النهارده":لو تم التصويت بـ "لا" على الاستفتاء سيكون هناك حديث عن إعلان دستوري مؤقت و جمعية تأسيسية لدستور جديد ده معناه إن رفض التصويت هيؤدي لإسقاط الدستور القديم بأكمله وعمل مواد جديدة بشكل مبدأي لحين عمل الدستور كاملا

Unknown said...

فكرة ممتازة يانواره وياريت تكثيف اعلامي عنها وأقل واجب يتعمل مع الناس ديه وياريت يكون يوم 28 أحسن ومش مرة وانتهينا لأ تكون ذكري شهريه وفعلا نمتنع كلنا عن استخدام الموبايل يوم28 من كل شهر وربنا مايقطعلنا عاده

زينبو said...

انا اللي اعرفه ان ساويرس باع موبينيل يا جماعة

زينبو said...

انا اللي اعرفه ان ساويرس باع موبينيل من قرابة سنة

أحمد زاهر said...

فكره جامده جداويستاهلوا انا كنت مخنوق جدا من الحركة دى وياريت فعلا الناس كلها تعمل كده

ayman radwan said...

فكره ممتازه وانا اقترح ان معادها يبقي محدد من 12 الظهر لغايه 8 بالليل عشان التنظيم بس ونعرف حجم الحمله

helal said...

فكرة هايلة ربنا يوفقكم

Mohamed said...

It is a good Idea ,and Dose any one remember " Tanzim sawert Misr "and its heroes ?????

Shoukry said...

http://shorouknews.com/Columns/column.aspx?id=409068

hayat ank said...

فعلا لازم نعمل كده يوم الجمعه نشيل بطاريات الموبايل

hayat ank said...

لازم نورى شركات المحمول الى بتمص دمنا والى فى كل الدول بيعملوا خدمه احسن من عندنا بكتير واسعارهم اقل من عندنا بكتير مع فرق مستوى الدخل والى بتتجسس علينا وقطعت عننا الخدمه وتسببت فى كوارث وبلاوى كتيروعامله فيها محايده وهيه شغاله لصالح النظام واصحابهاهم النظام نفسه شوفوا الشركات دى مين عنده اسهم فيها تلاتين فى الميه وعلى راى احمد عز الممثل فى فيلم الرهينه مش عايز افسر اكتلرمن كده

Unknown said...

كلنا معاكي يا نوراتنا يا بنت الكبير بقولبنا وبعملنا برضه النا بتكلم عن نفسي يوم 18 مش هافتح موبيلي خالص وهابلغ كل صحابي والي اقدر اوصلهم

Anonymous said...

المفروض نعمل وقفة بجد لمنع تصدير الغاز الى اسرائيل و اللى بيتصدر غصب عن قرار المحكمة ببطلان تصدير الغاز الى اسرائيل و بيتصدر غصب عننا و عن مصلحة شعبنا.يبقى اة فايدة الثورة اذا كنا لسة حنساعد الدولة اللى دايما بتؤذيناو بتقتل ولادنا على الحدود و الفلسطينين فى غزة

Passant said...

أضم صوتى لمحمد السيد فى لافع دعوي قضائىة ضد شركات المحمول

Passant said...

أضم صوتى لمحمد السيد فى لافع دعوي قضائىة ضد شركات المحمول

Unknown said...

نوارة عايزين النوت دي على الفيس بوك ، مهم اوي

MedZag said...

بصراحة:

انا قفلت الموبيل تقريبا من يوم 28 يناير

وبقيت بحس اني شامم ريحة دم كل ما استعمل الشبكات المصري بعد ما شاركت في الجريمة بغض الطرف.

انا مش قفلته عشان عايز اخسٌرهم, انا قفلته عشان قرفان منهم, وبالمثل لا اظن اني استسيغ مشاهدة فيلم لطلعت زكريا او مشاهدة ماتش قديم لحسام حسن.....

monasoly said...

وانا معاكى واقسم بالله انى هاقفل الموبايل واشيل البطاريه كمان يوم 18

Mohammed Farag said...

اولاً : الشركات دى اخلت بعقودها مع المشتركين وذلك بدون سابق انذار
ثانياً : الشركات اخلت بمسؤليتها المدنية تجاه المجتمع الذى تمارس فيه نشاطها
ثالثاً : بقطع الاتصالات الشركات اصبحت شريكة اصيله فى الضرر الذى لحق المشتركين سواء بالاصابة او الوفاة وبالتالى يجب اختصامها مثل مبارك والعادلى

انا مش مع وقف الاتصالات يوم واحد فقط انا مع وقفها لمدة 18 يوم متواصله نستخدم فيها الرسائل فقط فى حالة الضرورة القصوى

Unknown said...

المركز المصرى لحقوق السكن

13 مارس 2011



القضاء الإدارى يحدد جلسة بشأن قطع خدمة التليفون المحمول يوم 16 مارس 2011



حددت دائرة الاستثمار بمحكمة القضاء الإدارى بمجلس الدولة جلسة يوم الأربعاء الموافق 16 مارس 2011، وذلك لنظر الدعوى المقامة من المركز المصرى لحقوق السكن عن واقعة قطع خدمة التليفون المحمول يوم 28 يناير 2011.

كان المركز المصرى لحقوق السكن قد أٌقام دعوى يوم 8 مارس 2011 عن واقعة قطع خدمة التليفون المحمول يوم 28 يناير 2011 اختصم فيها كل من:

1- السيد المشير/ رئيس المجلس الاعلى للقوات المسلحة (بصفته)

2- السيد / الرئيس السابق محمد حسني مبارك(بصفته)السابقه وبشخصه

3- السيد / رئيس الوزراء السابق أحمد نظيف (بصفته) السابقه وبشخصه

4- السيد / وزير الداخلية السابق حبيب العادلي (بصفته) السابقه وشخصه

5- السيد / رئيس مجلس ادارة شركة موبينيل (بصفته)

6- السيد/ رئيس مجلس ادارة شركة فودافون (بصفته)

7- السيد/ رئيس مجلس ادارة شركة اتصالات (بصفته)

8- السيد/ رئيس الجهاز القومى للاتصالات (بصفته)

وذكر المركز فى عريضة الدعوى أنه وبتاريخ يوم الجمعة الموافق 28/1/2011 فوجئ المدعون وجميع المواطنين فى مصر بقيام الشركات الثلاثة مجتمعة بقطع الاتصالات (المحادثات الهاتفية – والرسائل النصية والصوتية) عن جميع مستخدمى ومشتركى الشبكات الثلاثة دون سابق تنبيه أو إنذار أو تحذير.

وحيث أنه بحسب التصريحات التى صدرت عن هذه الشبكات، فإن هذا القطع المفاجئ إنما قد تم انصياعا من هذه الشركات لأوامر وقرارات أصدرها إليهم المطعون ضدهم من الثانى إلى الرابع بصفاتهم السابقة وذلك حسب الاتفاقيات المبرمة بين هذه الشركات والحكومة المصرية، والتى تسمح وتبيح للحكومة مثل هذه القرارات استنادا لدواعى تعرض البلاد لمخاطر تهدد الامن القومى.

وقد جاء رد المركز المصرى على هذا الإدعاء بأن قرار قطع خدمة التليفون المحمول كان فاسدا ومجحفا بحقوق المواطنين حيث لا يجوز التذرع بإعلان حالة الطوارئ لتطبيق هذا القرار، وكذلك لمخالفة هذا القرار للدستور.

وقد ذكرت صحيفة الدعوى أن الغرض من اختصام سيادة المطعون ضده الأول السيد المشير – رئيس المجلس الأعلى للقوات المسلحة بصفته، باعتباره القائم على إدارة البلاد طبقاً لقرار تخلي المطعون ضده الثاني عن كافة سلطاته، ونقل هذه السلطات إلي المطعون ضده الأول بصفته وذلك بتاريخ 11/2/2011.

وقد طالب المركز فى دعواه بالتالى:

أولاً: بقبول الطعن شكلاً.

ثانياً: وبصفة مستعجلة بوقف تنفيذ القرار السلبي بالامتناع عن وقف إلغاء حق الجهة الإدارية بإصدار قرار وقف وقطع خدمة الإتصالات للهواتف النقالة على أن ينفذ هذا الحكم بمسودته ودون حاجة للإعلان.

ثالثاً: وفى الموضوع بإلزام المطعون ضدهم من الثاني إلى السابع متضامنين بتعويض المدعين عن الأضرار المادية والأدبية التي أصابتهم جراء القرار الإداري الصادر من المطعون ضدهم على أن يتم تخصيص مبلغ التعويض المقضي به لإنشاء مؤسسة أهلية يقوم على إداراتها المدعين بغرض تطوير التعليم والبحث العلمي والتكنولوجي فى مصر.

هذا ويدعو المركز المصرى لحقوق السكن جميع المواطنين المصريين الذين أضيروا من جراء قرار قطع خدمة التليفون المحمول يوم 28 يناير 2011 للانضمام والتدخل فى القضية. وسيعلن المركو المصرى لحقوق السكن عن موعد الجلسة فور تحديد موعدا لها.

مديرالمركز

منال الطيبى

عنوان: 33 شارع قصر النيل- الدور التاسع

القاهرة، مصر

تليفون: 23922194 202+

فاكس: 23952952 202+

إيميل: echreg@echreg.org

فافى said...

معاكى طبعا وباريت تعملى ايفنت على كده عشان الكل يعرف اللهم ارحم شهدائنا

Anonymous said...

احنا نسينا سلاح فعال و مهم جدا ... المقاااااطعة لازم نحدد أيام نقاطعهم و لا نتكلم موبايل و لا حتى رسايل و دى ليها بدايل ... في مواقع كتير بتبعت رسايل ببلاش أما الموبايل ممكن نستخدم الشات عالنت اليوم ده .. ما حبكش نتكلم و لواتزنقنا نتكلم أرضى بحيث اليوم اللي نقاطع شبكات المحمول يختلف عن اليوم اللي ما نتكلمش فيه عالأرضي .. دا حنا ممكن حتى نقاطع التليفون الأرضي و ندعوا ان ما حدش يدفع أي فاتورة و سيبوهم يقطعوا الحرارة و اتكلموا عالموبايل و شوفوهم بعد شهر واحد هايصوتوا بالصوت الحياني و يبوسوا رجل الناس انها تدفع بس أبدا لحد ما يطلعوا يعتذروا و يبدوا الندم على غلطتهم اللي دفع تمنها شباب من دمهم ..ربنا ينتقم منهم

Anonymous said...

احنا نسينا سلاح فعال و مهم جدا ... المقاااااطعة لازم نحدد أيام نقاطعهم و لا نتكلم موبايل و لا حتى رسايل و دى ليها بدايل ... في مواقع كتير بتبعت رسايل ببلاش أما الموبايل ممكن نستخدم الشات عالنت اليوم ده .. ما حبكش نتكلم و لواتزنقنا نتكلم أرضى بحيث اليوم اللي نقاطع شبكات المحمول يختلف عن اليوم اللي ما نتكلمش فيه عالأرضي .. دا حنا ممكن حتى نقاطع التليفون الأرضي و ندعوا ان ما حدش يدفع أي فاتورة و سيبوهم يقطعوا الحرارة و اتكلموا عالموبايل و شوفوهم بعد شهر واحد هايصوتوا بالصوت الحياني و يبوسوا رجل الناس انها تدفع بس أبدا لحد ما يطلعوا يعتذروا و يبدوا الندم على غلطتهم اللي دفع تمنها شباب من دمهم ..ربنا ينتقم منهم

ameno_egypt said...

الأيفنت موجود انا عملته على الفيس بوك. ياريت نشير بسرعة النهاردة الخميس.
http://www.facebook.com/event.php?eid=206606509349397&index=1

فافى said...

انا كمان عملت ايفنت عشان المقاطعه بتاعة شركات المحمول واللينك اهو
.
http://www.facebook.com/event.php?eid=206606509349397&index=1

telgohary said...

احب اوضح ليكم حاجة مهمة جدا ابل ما كلوكوا تسخنو علي شركات المحمول و انتو مش عارفيين ايه اللي بيجرا فيها:
اولا فيه اكتر من 60-100 الف ماطن مصري هينضرو من المقاطعة دي و دل عدد الموظفيين و الشركات المساعدة و حتي عمال النضافة و الخدمات الاوتسورسيدز
ثانيا: انا اعرف نا جوا الشركات دي نزلو من بيتهم وقت الحظر علشان يباتوا جوا غرف التحكم بتاعة الشركات دى لان تليفوناتهم المحمولة اللي بيستقبلو عليها الراسيل بتاعة سلامة المحطات كانت عطلانة طبعا , تصورو دول سابوا عيلاتهم بسبب قطع الاتصالاتز
ثالثا: المصرية للاتصلات عنده تحكم مركزي و هية اللي في ايدها انه تسمح ان واحد خط موبينيل يعرف يكلم خط فودافون ولا لأ. و هما قفلو اللنكات دي فحتى لو الشبكة اشتغلت مفيش مكلمات هتعدى.
رابعا: الانترنت قفلوها تماما لدرجة ان لما جم يفتحوها واجهتهم مشاكل غير عادية و ده لانهم قفلوها بصورة مركزية و مفيش شركة واحدة كانت عارفة تدخل علي اللنكات المركزية.
فا يريت ما نسبشى الحمار و نتشطر علي البردعة